एआयसी-एमआयटी-एडीटीच्या स्टुडंट इनोव्हेटिव्ह प्रोग्रामचे यश 

पुणे: शालेय विद्यार्थ्यांमधील उद्यमशीलता आणि नवनिर्मितीला चालना देण्यासाठी एमआयटी आर्ट, डिजाईन आणि टेक्नाॅलाॅजी विद्यापीठातील अटल इनक्युबेशन सेंटर (एआईसी) द्वारे अटल टिंकरिंग लॅब स्टुडंट इनोव्हेटिव्ह प्रोग्राम (एटीएल-एसआईपी) राबविला जात असून, चालू शैक्षणिक वर्ष २०२४-२५ मध्ये महाराष्ट्र तथा छत्तीसगढमधील ९ शाळांचे १४ प्रकल्प मंजुरीसाठी नीती आयोगाकडे पाठविण्यात आले आहे. अंतिम मंजुरी नंतर सहभागी चमू  आंतरराष्ट्रीय उद्योगसमूह डसॉल्ट सिस्टम्स यांच्या साह्याने त्यांचे प्रकल्प विकसित करू शकणार आहेत.

एआईसी -एमआईटी एडीटी इनक्यूबेटर फोरमच्या माध्यमातून ९ शाळांमधील १५ संघांची निवड अटल टिंकरिंग लॅब स्टुडंट इनोव्हेटिव्ह प्रोग्राममध्ये करण्यात आली. या सर्व संघाचे अंतिम ऑनलाइन प्रकल्प सादरीकरण आणि परीक्षण ऑनलाईन पद्धतीने घेण्यात आले होते.  तत्पूर्वी, निवड झालेल्या शालेय चमूसाठी विशेष प्रशिक्षण वर्ग, ऑनलाईन तसेच ऑफलाईन मार्गदर्शन सत्रांचे आयोजन करण्यात आले. या माध्यमातून प्रशिक्षणार्थींना त्यांच्या बीज कल्पनांमधुन उद्यमशील स्टार्टअप तयार करण्याबाबत सखोल मार्गदर्शन करण्यात आले.

एमआयटी-एडीटी विद्यापीठाचे कार्यकारी अध्यक्ष प्रा.डॉ. मंगेश कराड यांच्या मार्गदर्शनाखाली आयोजित ऑनलाइन सादरीकरण कार्यक्रमाच्या अध्यक्षस्थानी एआयसी-एमआयटीएडीटी इनक्यूबेटर फोरमचे व्यवस्थापक कार्यक्रम नीलेश पांडव होते; तर प्रमुख मार्गदर्शक म्हणून अभिषेक राठी आणि मनोज देशपांडे यांनी काम केले.  प्रख्यात महिला उद्योजिका आणि पुणे येथील फूड मँक कन्सल्टंट्सच्या संचालिका भाग्यश्री म्हात्रे, सायंटेक इंडिया प्रायव्हेट लिमिटेडचे वरिष्ठ विपणन अभियंता विजय वाढणे, मास एंटरप्रायझेस, पुणेचे संचालक मंगेश चव्हाण आणि एमआईटी विद्यापीठाच्या आयटी विभागाचे अविनाश चौधरी  यांनी परिक्षक म्हणून विद्यार्थ्यांच्या प्रकल्पांचे मूल्यमापन केले.    

यापूर्वी २०२२-२३ मध्ये एमआईटी एडीटी विद्यापीठाच्या बायोइंजिनियरिंग विभागाच्या मदतीने  शासकीय विद्यालय, बिलासपूर द्वारे तयार केलेल्या “फूट रिलॅक्सको” प्रकल्पाने राष्ट्रीय स्तरावर प्रथम पारितोषिक सह फ्रान्स भेटीची संधी मिळाली. त्याचप्रमाणे, गत वर्षी आर सी पटेल स्कूल, पुणेच्या टीमला टाटा फाउंडेशनच्या प्रख्यात डिजिटल इम्पॅक्ट स्क्वेअरद्वारे त्यांचा प्रकल्प विकसित करण्याची संधी मिळाली होती. 

विविध विषयांवर प्रकल्प

अपघात प्रतिबंधक यंत्रणा (स्मार्ट रोड), जलकुंभापासून सक्रिय चारकोल निर्मिती, आपत्ती निर्देशक, पथ विक्रेत्यांसाठी स्ट्रीट मार्ट, मानसिक चार्ट बोर्ड, एलपीजी गॅस लीक शील्ड, डायबेलाझल, स्वयंचलित कृषी उपकरणे इत्यादी विषयांवर प्रकल्प सादर केले. यासाठी एआईसी-एमआयटी एडीटीसह त्यांच्या विज्ञान शिक्षकांचे देखील मार्गदर्शन लाभले. 

रवींद्रनाथ महातो यांचे मत; १४व्या भारतीय छात्र संसेदेचे दुसरे सत्र 
पुणे, ९ फेब्रु.: ‘स्वातंत्र्यानंतरही देशातील अनेक बांधव असे आहेत की, त्यांना चांगले जीवन जगण्यासाठी आवश्यक असलेल्या प्राथमिक सुख- सुविधा मिळत नाहीत. त्यांच्यासाठी सरकारी पातळीवर दिल्या जाणार्‍या सुख-सुविधांना रेवडी म्हणता येणार नाही’, अशी परखड भूमिका झारखंड विधानसभेचे अध्यक्ष रवींद्रनाथ महातो यांनी मांडली. ‘आपल्याकडे कॉर्पोरेटला पायघड्या घातल्या जातात आणि गरीब, मागास समाजाच्या सामाजिक सुरक्षा योजना राबवल्यास विरोध होतो. हे चित्र बदलण्याची गरज आहे,’ असेही महातो म्हणाले.  एमआयटी वर्ल्ड पीस युनिर्व्हसिटी, पुणे आणि एमआयटी स्कूल ऑफ गर्व्हमेंट पुणे यांच्या वतीने आयोजित चौदाव्या भारतीय छात्र दुसर्‍या सत्रात ‘रेवडी संस्कृती : आर्थिक भार किंवा आवश्यक समर्थन’ या विषयावर ते बोलत होते.
यावेळी मेघालयच्या विधानसभेचे अध्यक्ष थॉमस संगमा, काँग्रेसच्या मीडिया आणि पब्लिसिटी विभागाचे अध्यक्ष पवन खेरा, भारतीय छात्र संसदेचे संस्थापक व एमआयटी डब्ल्यूपीयूचे कार्याध्यक्ष डॉ. राहुल कराड आणि कुलगुरू डॉ. आर. एम. चिटणीस आणि विद्यार्थी प्रतिनिधी उपस्थित होते.  महातो म्हणाले, ‘रेवडी शब्दाचा उल्लेख ज्यांच्यासाठी केला जातो. त्या लोकांच्या घरी ताटामध्ये कधीही प्रत्यक्षात रेवडी नसते. वास्तविक, ते लोक दोन वेळच्या जेवणासाठी आजीवन संघर्ष करत असतात. त्यांच्याकडे पिण्यायोग्य स्वच्छ पाणी, चांगल्या आरोग्य सुविधा नाहीत. रोजगाराची व्यवस्था नाही. मी झारखंड राज्याचे प्रतिनिधित्त्व करतो. तेथील परिस्थिती, विशेषत: तरुणांची परिस्थिती विदारक आहे. तुम्ही झारखंडमध्ये कुपोषण ही मोठी समस्या आहे.  सामाजिक सुरक्षेच्या योजना या रेवडी नसून, स्मार्ट आर्थिक निती आहे. देशाच्या संयुक्त संसाधन कोषातून किंवा राज्याच्या संचित कोषातून त्या दिल्या जातात. त्यावर नागरिकांचा पूर्ण अधिकार असतो. सामाजिक सुरक्षेबाबत नकारात्मक विचार करणारा एक वर्ग आहे. उद्योगपतींना पायघड्या घातल्या जातात. त्यावेळी ‘रेवडी’चा विषय कोणी काढत नाही. उद्योगातून रोजगार निर्माण होईल, असे सांगितले जाते. मात्र, किती रोजगार निर्माण झाले, हा प्रश्न कोणी विचारत नाही. देशात कॉर्पोरेटचा नफा वाढीचा दर २२ टक्के आहे. तर, त्यांच्याद्वारे दिल्या जाणार्‍या रोजगार वृद्धिचा दर १.५ टक्के आहे. दुसरीकडे गरीब व मध्यवर्गाला काही दिलासा दिला, तर विशिष्ट वर्ग नाराजी व्यक्त करतो.    पवन खेरा, ‘सरकारकडून देशभरात राबवल्या जाणार्‍या सामाजिक सुरक्षेच्या योजना रेवडी संस्कृती नाहीत. या योजनांची गरज का पडली, याचा विचार झाला पाहिजे. सरकारने विकासाच्या कामांसाठी आजवर अनेक शेतकर्‍यांच्या जमिनी संपादित केल्या. त्यामध्ये अनेक लोक मागे राहिले. त्या लोकांच्या भल्यासाठी सरकारने काही योजना आणल्या. तर, त्याला विरोध व्हायला नको.’ यावेळी विविध विद्यार्थी प्रतिनिधींनी मते मांडली. प्रा. गौतम बापट यांनी सूत्रसंचालन केले. डॉ. दीपेंद्र शर्मा यांनी प्रास्ताविक केले.

पुणे: “विविध खेळ आपल्या जीवनाचा अविभाज्य भाग आहेत किंवा आपण ते बनवून घेतले पाहिजे. खेळात केवळ जिंकणे आणि हारणे नसून, त्याहीपलीकडे खूप काही शिकवून जाणारे असतात. शारीरिक तसेच मानसिक स्थितीत सुधार आणण्यासाठी खेळ महत्त्वाची भूमिका बजावतात. विविध खेळ खेळण्याने आरोग्य निरोगी राहण्यास मोठी मदत होते. तंदुरुस्त राहण्यासाठी तर विविध खेळ खेळणे हा सर्वोत्तम पर्याय आहे”, असे मत सुरेंद्र पठारे फाऊंडेशनचे अध्यक्ष सुरेंद्र पठारे यांनी व्यक्त केले.

सुरेंद्र पठारे फाऊंडेशन आयोजित एसपीएफ स्पोर्ट्स मेनिया अंतर्गत स्विमिंग चॅम्पियनशिप, बॅडमिंटन चॅम्पियनशिप तसेच व्हॉलीबॉल चॅम्पियनशिप स्पर्धा शनिवारी व रविवारी (ता. १ व २ फेब्रु.) पार पडल्या. दरवर्षी स्पोर्ट्स मेनिया अंतर्गत या चॅम्पियनशिप आयोजित करण्यात येतात. महिला व पुरुष या दोन गटात ही स्पर्धा घेण्यात आली असून, ज्यात विविध वयोगटाचा समावेश होता. सदर स्पर्धांना खेळाडू स्पर्धकांचा मोठा प्रतिसाद लाभला.

स्पर्धेविषयी बोलताना सहभागी स्पर्धक म्हणाले, “या स्पर्धेत सहभागी होणे हा चांगला अनुभव होता. स्पर्धेच्याप्रसंगी असलेले नियोजन तसेच पुरवल्या गेलेल्या सुविधाही उत्तम होत्या. अनेक गोष्टी या स्पर्धेतून शिकायला मिळाल्या आणि प्रतिस्पर्धी ताकदीचे असल्याने नक्कीच आमच्या कौशल्यांचाही चांगला कस लागला.”

एसपीएफ स्पोर्ट्स मेनिया अंतर्गत कॅरम चॅम्पियनशिप स्पर्धा उर्वरित असून तसेच, पार पडलेल्या एकूणच स्पर्धांचा बक्षीस वितरण सोहळा आयोजित करण्यात आला आहे. यासाठी सुप्रसिद्ध अभिनेता व क्रीडाप्रेमी रणविजय सिंह, वरुण सुद यांची उपस्थिती लाभणार आहे.

मतदारसंघातील शाळांमध्ये दर्जेदार शिक्षण पुरवले जाईल; पठारे यांचे आश्वासन

पुणे: वडगावशेरी मतदारसंघाचे विद्यमान आमदार बापूसाहेब पठारे निवडून आल्यापासून सातत्याने ऑनफील्डवर दिसत आहेत. त्यांच्या पाहणी दौऱ्यांची व कामांची सध्या मतदारसंघात व पुणे शहरात चांगली चर्चा आहे. गुरुवारी (ता. ६) आमदार बापूसाहेब पठारे अचानक शाळा पाहणीसाठी गेले होते. पुणे महानगरपालिका अतिरिक्त आयुक्त पृथ्वीराज बी. पी. हेही यावेळी समवेत होते.

येरवडा येथील कै. अनुसयाबाई सावंत विद्यालय व कै. वि. द. घाटे विद्यामंदिर या शाळांना भेट देत पाहणी केली. भेटीदरम्यान, त्यांनी विद्यार्थ्यांशी संवाद साधून त्यांच्या शैक्षणिक व भौतिक सुविधांची माहिती घेतली. पठारे यांनी शाळेतील विद्यार्थ्यांसोबत बराच वेळ घालवत अभ्यासही घेतला. तसेच, पाठ्यपुस्तकातील प्रश्नोत्तरं, वाचन, लिखाण अशा शैक्षणिक बाबींवर विद्यार्थ्यांनी दिलेल्या प्रतिसादाचे कौतुक केले. त्यांनी विद्यार्थ्यांना शाळेबाबत त्यांच्या अपेक्षा व आवश्यक गोष्टींविषयी विचारपूस केली. विद्यार्थ्यांनीसुद्धा पठारे यांच्यासोबत मनमोकळा संवाद साधला.

शालेय शिक्षण, शिकवण्याच्या पद्धती, शाळेतील मूलभूत सोयी-सुविधा यासारख्या विविध पैलूंवर या भेटीदरम्यान सविस्तर चर्चा करण्यात आली. पठारे यांनी शिक्षकांकडून शाळेतील वास्तव परिस्थिती जाणून घेतली. सोबतच विद्यार्थ्यांच्या शैक्षणिक विकासासाठी आवश्यक त्या सर्व सुविधा शाळांमध्ये उपलब्ध करून देण्यासाठी प्रयत्नशील राहू, असे सांगितले.

पठारे म्हणाले, “शाळेत शिकणारी मुले-मुली उद्याच्या भारताचे भविष्य आहेत, त्यांना घडवण्याचे कायम शिक्षक मंडळी करत आहेतच, सोबतच एक लोकप्रतिनिधी म्हणून मतदारसंघातील शाळांमध्ये दर्जेदार शिक्षण मिळवून देण्यासाठी विविध माध्यमातून कार्यरत राहणे कर्तव्य आहे.”

पाहणी दौऱ्यादरम्यान, आशा राऊत (उपायुक्त, प्राथमिक शिक्षण विभाग), वंदना साळवे (क्षेत्रीय अधिकारी), चंद्रसेन नागटिळक (क्षेत्रीय अधिकार), शुभांगी चव्हाण (उपप्रशासकीय अधिकारी), जयेश शेंडकर (सहायक प्रशासकीय अधिकारी), अनिता वाघमारे (पर्यवेक्षिका), संजय पोळ (क्षेत्रीय अधिकारी), पराग राऊत (आरोग्य निरीक्षक), सुनील कलडोने (उप-आरोग्य निरीक्षक) उपस्थित होते.

पुणे, ता. 9 फेब्रुवारी : ‘डेक्कन एज्युकेशन सोसायटी’च्या (डीईएस) ‘इन्स्टिट्यूट ऑफ मॅनेजमेंट डेव्हलपमेंट ॲण्ड रीसर्च’मध्ये (आयएमडीआर) ‘सोनीलिव्ह’चे कार्यकारी उपाध्यक्ष दानिश खान यांच्या प्रमुख उपस्थितीत सुवर्ण महोत्सवी दीक्षांत समारंभ संपन्न झाला.

‘डीईएस’च्या नियामक मंडळ आणि परिषदेचे अध्यक्ष प्रमोद रावत, ‘आयएमडीआर’च्या व्यवस्थापकीय मंडळाचे अध्यक्ष जगदीश कदम, संचालिका डॉ. शिखा जैन, डॉ. पी. सी. नम्बियार, डॉ. अनिल केसकर, डॉ. सुषमा केसकर यांची उपस्थिती होती.

तंत्रज्ञानातील क्रांतिमुळे पूर्वीपेक्षा अधिक वेगाने बदल होत आहेत. त्याला विरोध न करता ते लवकरात लवकर स्वीकारण्यासाठी आजीवन शिकण्याची तयारी ठेवा. नैतिक मूल्यांचे पालन करा. असा सल्ला खान यांनी दिला.

रावत म्हणाले, “शिक्षण माणसाला एका पातळीवर नेऊन ठेवते. पुढचा प्रवास सर्वोत्कृष्ट व्हावा यासाठी शरीर, मन, आचार, विचार, व्यवहारावर नियंत्रण मिळवा. लोकांचा विश्वास संपादन करा. म्हणजे जीवनातील संघर्ष टाळता येईल.”

प्रिया अग्रवाल या विद्यार्थिनीने सुवर्ण पदकासह डॉ. प्र. चिं. शेजवलकर पुरस्कार मिळविला. डॉ. शेजवलकर यांची कन्या डॉ. सुषमा केसकर आणि जावई डॉ. अनिल केसकर यांच्या हस्ते पुरस्कार वितरण करण्यात आले.

८० कोटी नागरिकांना मोफत धान्य द्यावे लागतात, ही प्रगती आहे का?

उच्चवर्गीय वर्गाकडे किती संपत्ती एकवटली आहे,हे कळू शकतात.जातवार जनगणनेला पर्याय असू शकत नाही.

आजवर झालेला अत्याचार उजेडात येवू नये, म्हणून जात गणना नाकारण्यात येत आहे

दुसऱ्या दिवशीच्या विचारसत्रांना चांगला प्रतिसाद

पुणेः

विचारवेध असोसिएशन आयोजित ‘ जातिअंतावर करू काही ‘ विषयावरील विचारवेध संमेलनाच्या दुसऱ्या दिवशी जात , जात गणना आणि वर्चस्ववादावर विचारमंथन झाले.सर्व विचारसत्रांना चांगला प्रतिसाद मिळाला.संमेलनाचे हे सहावे वर्ष होते. राष्ट्र सेवा दल, पर्वती पायथा येथे ९ फेब्रुवारी २०२५ रोजी संमेलनाच्या दुसऱ्या दिवशी पहिल्या सत्रात हरीश सदानी यांनी मार्गदर्शन केले.

दुसऱ्या सत्रात सचिन माळी , डॉ.दिलीप चव्हाण यांनी ‘जातीय जनगणना’ विषयावर मार्गदर्शन केले.

९ फेब्रुवारी रोजी सकाळी १० वाजता सचिन माळी ,दिलीप चव्हाण यांनी ‘जातीय जनगणना’ विषयावर मार्गदर्शन केले.

दुपारच्या सत्रात ‘दलित किचन ऑफ महाराष्ट्र’ या पुस्तकाच्या संदर्भात लेखक शाहू पाटोळे यांची अनुवादक भूषण कोरगावकर यांनी मुलाखत घेतली.

नीरज हातेकर यांनी ‘आरक्षण संकल्पना आणि उद्देश ‘ तर ‘आरक्षण आणि आरक्षणाचे भवितव्य’ या विषयावर राहुल सोनपिंगळे यांनी विचार मांडले. ‘जातीय उतरंडीमुळे जातीय अत्याचार’ या विषयावर वैभव गीते यांनी संवाद साधला.’जाती जपण्यासाठी स्त्रियांवर अत्याचार-सांस्कृतिक संदर्भ ‘ विषयावर आनंद करंदीकर यांनी संवाद साधला. ‘जातीय अत्याचार पुरुष प्रधानतेमुळे’ या विषयावर अंजुम कादरी यांनी विचार मांडले.शीतल साठे,सचिन माळी यांनी नवयान महाजलसा’ सादर करुन संमेलनाला वेगळ्या उंचीवर नेले.

पहिल्या सत्रात बोलताना हरीश सदानी म्हणाले, ‘शोषक आहे,तो शोषित हवा अशी आपली भूमिका नसून मूलभूत बदल हवा आहे. ज्यांच्याकडे सत्ता आहे, विशेषाधिकार आहेत, त्यांनाही परिवर्तना च्या प्रक्रियेत सामावून घेतले पाहिजे. विशिष्ठ जात नव्हे तर वर्चस्ववाद हा आपला शत्रू आहे.हे समजून घेतले नाही तर समानतेची लढाई अपुरी राहिल.

सचिन माळी म्हणाले,’ जातीला भौतिक, सामाजिक, सांस्कृतिक आधार असलेली व्यवस्था मोडायची असेल तर आपापल्या जातीत बोलून संवाद केला पाहिजे. जातीय जन गणनेचा मुद्दा हा जातीय वाद नसून राष्ट्र निर्मितीचा मुद्दा आहे. आजवर झालेला अत्याचार उजेडात येवू नये, म्हणून जात गणना नाकारण्यात येत आहे. मनुष्यत्व नाकारणारा हा मोठा गुन्हा,भ्रष्टाचार आहे. आपण आपले स्वायत्त राजकारण उभे करत नाही, तोपर्यंत न्याय मिळणार नाही.

डॉ दिलीप चव्हाण म्हणाले,’ सामाजिक न्याय नाकारल्याने आणखी पन्नास वर्षांनी देखील भारत गरीब, निरक्षर बेरोजगार व्यक्तीचा देश असणार आहे. सत्ताधाऱ्यांना या गरिबीची भीती नसली तरी जागतिक संस्था आणि भांडवल शाहीला आहे.८० कोटी नागरिकांना मोफत धान्य द्यावे लागतात, ही प्रगती आहे का?परभणी,बीड मधील अलीकडच्या हत्या एकाच महिन्यात होऊनही परभणीच्या हत्येची चर्चा होऊ दिली जात नाही,हे लक्षात घेतले पाहिजे. उपवर्गीकरण हा डाव असून त्यात फसता कामा नये. या जात जनगणनेत श्रीमंत उच्चवर्गीय वर्गाकडे किती संपत्ती एकवटली आहे,हे कळू शकतात.जातवार जनगणनेला पर्याय असू शकत नाही.

सुरेंद्र जोंधळे म्हणाले,’ भारतात व्यक्तीची ओळख जात म्हणून होणार की नागरिक म्हणून होणार, हा प्रश्न जातवार गणनेने उपस्थित केला आहे, आणि तो महत्वाचा आहे.जाती अंताच्या प्रदीर्घ लढ्यासाठी ते आवश्यक आहे.

‘दलित किचन ऑफ महाराष्ट्र’ पुस्तकावर विचारवेध संमेलनात चर्चा

पुणे:

विचारवेध असोसिएशन आयोजित सहाव्या विचारवेध संमेलनात रविवारी, दुपारच्या सत्रात ‘दलित किचन ऑफ महाराष्ट्र’ या पुस्तकाच्या संदर्भात लेखक शाहू पाटोळे यांची अनुवादक भूषण कोरगावकर यांनी मुलाखत घेतली. राष्ट्रसेवा दल सभागृहात झालेल्या या मुलाखतीतून खाद्य संस्कृती, भाषा, आहारावरुन घातले जाणारे वाद यावर उहापोह झाला.

शाहू पाटोळे म्हणाले,पूर्वापारपासून सर्वजण ‘ अन्न हे पूर्ण ब्रह्म’ ऐकत आल्यामुळे ‘ अन्न हे अपूर्ण ब्रह्म’ हा शब्दप्रयोगच लक्षात घेतला जात नाही.हे पुस्तक वाचणाऱ्या परदेशातील वाचकांना हिंदू हे बीफ खातात, बफ खातात यावर विश्वास बसत नाही. यात लपविण्यासारखे काय आहे ? अमूक अन्न खाल्याने तमुक धर्माचा अपमान होतो,हे खोटे आहे.सगळे हिंदू शाकाहारी नाहीत. मांसाहार चांगला आहे,याचा प्रचार करावा लागत नाही.शाकाहार चांगला आहे,हे सांगावे लागते,हे लक्षात घेतले पाहिजे. खाद्यसंस्कृती असते,तशी भाषा संस्कृतीदेखील असते.प्रमाण मराठी भाषेपेक्षा आमची मराठी अधिक समृद्ध आहे,हेही मी सांगू शकतो. विदेशी वाचकसुद्धा मला कळवतात, की माझ्या पुस्तकातील हे अन्न त्यांचे पूर्वज खात होते.

आहारावरून केल्या जाणाऱ्या वादाबद्दल बोलताना पाटोळे म्हणाले,’गोवंश हत्येवर बंदी आहे.पुढे यमाचे वाहन म्हणून रेड्याच्या हत्येवर बंदीची मागणी झाली, मत्स्यावतार, वराह अवतार म्हणून त्या त्या गोष्टींवर बंदी आली, तरी आश्चर्य वाटणार नाही,असा हा काळ आहे’.

ते पुढे म्हणाले,’आहारात बदल होत राहणार,ती अपरिहार्य प्रक्रिया आहे.पण, सक्तीने हे बदल होऊ नयेत.संस्कृती सुटी-सुटी नसते. खाद्य हे आपल्याकडे धर्माशी जोडले गेले आहे. प्रत्यक्षात खाद्यवैविद्य अनेक इतर घटकांशी जोडलेले आहे. जात, वर्ण व्यवस्था जितक्या जास्त, तितक्या खाद्य संस्कृती अधिक,हे लक्षात घेतले पाहिजे. भाषेत जातीय, वर्णीय भेद आहेत,तसे खाद्यातही भेद आहेत. हे भेद उतरंडीनुसार वरून खाली आले आहेत. कोणी काय खावे,हे सरकारने ठरवू नये. मांसाहारासारखे विशिष्ट आहार वाईट आहे, अशी अंधश्रद्धा पसरवली जात आहे. महाराष्ट्रात गोवंश हत्या बंदी आहे, बफ वर बंदी नाही. म्हशीच्या, डुकराच्या मांसावर बंदी नाही, हे लक्षात घेतले पाहिजे.तरीही संभ्रम निर्माण केला जात आहे.

कमी पाणी,स्प्रिंकलर, कीटकनाशक आल्याने रानभाज्याही जवळपास संपुष्टात आल्या आहेत,असे निरीक्षणही त्यांनी नोंदवले.

भूषण कोरगावकर म्हणाले,’भाषा ही एका वर्गाच्या हातात गेल्याने अनेक गोष्टी लपून राहिल्या.दलित, आदिवासी, ख्रिश्चन, भटके असे सगळ्यांचे शब्द, पाककृती साहित्यात आले पाहिजे.’अन्न हे अपूर्ण ब्रह्म ‘चे इंग्रजी भाषांतर करताना काम सोपे नव्हते.’अन्न हे अपूर्ण ब्रह्म ‘पुस्तकामध्ये ब्लॅक ह्युमर आहे. टीका, द्वेष नाही.

गीताली वि.मं., अनिकेत साळवे, मुकुंद किर्दत,शारदा वाडेकर आदी उपस्थित होते.

पुणे :

महाराष्ट्र गांधी स्मारक निधी आणि युवक क्रांती दलाच्या वतीने आयोजित ‘गांधी दर्शन’ शिबिराला चांगला प्रतिसाद मिळाला.रविवार,दि.९ फेब्रुवारी २०२५ रोजी सकाळी साडेनऊ ते सायंकाळी साडेपाच या वेळेत आयोजन करण्यात आले होते.कोथरूड येथील गांधी भवनच्या सभागृहात हे शिबीर झाले.ज्येष्ठ पत्रकार विवेक देशपांडे (हिंदुत्वाची वाटचाल आणि पुरोगामित्वापुढील आव्हाने),ज्येष्ठ लेखक डॉ.हुबनाथ पांडे(आज के दौर में गांधी की अहिंसा),ज्येष्ठ पत्रकार कामिल पारखे (मराठी ख्रिश्चन समाज),डॉ.कुमार सप्तर्षी या मान्यवरांनी मार्गदर्शन केले.

‘ गांधी दर्शन’ विषयावरचे हे १८ वे शिबीर होते.कार्यक्रमाचे सूत्रसंचालन एड.स्वप्नील तोंडे यांनी केले.तेजस भालेराव यांनी संविधानाच्या प्रास्ताविकाचे वाचन केले.डॉ हुबनाथ पांडे यांचे स्वागत तेजस भालेराव यांनी केले तर श्रीकांत मिश्रा यांनी त्यांचा परिचय करून दिला.गांधी स्मारक निधीचे सचिव अन्वर राजन ,सचिन पांडुळे आदी मान्यवर उपस्थित होते.

डॉ. हुबनाथ पांडे म्हणाले,’गेल्या दहा वर्षांत जेवढे खोटं बोलले गेले ,तेवढे गेल्या पाच हजार वर्षांत बोलले गेले नव्हते. कुंभमेळ्याची नोंद रामायण महाभारतात मिळत नाही.तो साधारण हर्षवर्धनच्या सातव्या शतकात सुरू झाला. पण, कुंभमेळ्याची सुरूवात पुराणकाळापासून झाल्याची खोटी बतावणीही केली जात आहे.अशा प्रकारच्या अनेक खोट्या गोष्टी जाणून बुजून पसरविल्या जात आहेत, आणि समाजात गोंधळ माजवला जात आहे.यासाठी मोबाईलचा सोशल मीडियाचा साधन म्हणून वापर केला जात आहे. त्यामुळे मोबाईलद्वारे नवीन वैचारिक मानसिक गुलामी आणण्याचे षडयंत्र रचले जात आहे. त्यासाठी मोबाईल फोन स्वस्त करण्यात येत आहेत.’

ज्येष्ठ पत्रकार विवेक देशपांडे म्हणाले,’संघ केवळ मुस्लिमविरोधी नसून त्यांचा खरा शत्रू हे धर्मनिरपेक्ष हिंदू आहेत. म्हणूनच त्यांनी दाभोळकर,लंकेश आदींच्या हत्या झाल्या.संघवाल्यांना मुस्लिमांना इजा पोचवायची नाही, त्यांना सतत भितीच्या छायेत ठेवायचे आहे.२०१४ नंतर हिंदुत्वचा विखार उघडपणे, अधिक वाढला आहे,जो संधी मिळाल्याने जाहिरपणे बाहेर आला आहे.संघाची प्रेरणा ही हिंदुराष्ट्र स्थापन करणे हे असून, मुस्लिमांना दुय्यम स्थान देणे हे धोरण आहे, या बाबतीत हिटलर हा त्यांचा आदर्श आहे’.

ते म्हणाले,’राष्ट्रीय स्वयंसेवक संघाने विविध प्रकारची आर्मी तयार केली असून देशातील संघविरोधी लोकांना आणि विचारांना हर प्रकारे दडपून टाकण्यासाठी हे आर्मीदल कार्यरत आहेत.या आर्मी दलाची जबाबदारी बजरंग दलसारख्या संघटनांवर दिली आहे, त्यामुळे बिल हे थेट मोदींवर फाडले जात नाही, पण मोदी यांची या सर्व हिंसाचाराला पूर्ण मूक सहमती आहे’.

डॉ.कुमार सप्तर्षी म्हणाले ,’सर्व समाजातील जातीयवाद संपला तर संघाच्या विषारी व्यवस्थेचा आणि धोरणांचा निःपात करता येईल, आणि संघप्रेमी ब्राह्मणांना खऱ्या अर्थाने शहाणे आणि धर्मनिरपेक्ष करावे लागेल, हेच विचारवंत आणि समाजसेवकांपुढील पुढील आव्हान आहे .’

‘सेवा भवन दौड़’
आशुतोष पात्राने जिंकली

पुणे
‘सेवा भवन’ या पुण्यातील रुग्णसेवा प्रकल्पातर्फे रविवारी आयोजित ‘सेवा भवन दौड़’मध्ये उत्साहाने सहभागी होत बाराशे धावपटूंनी ‘रन फॉर किडनी हेल्थ’ हा संदेश दिला.‘सेवा भवन दौड़’च्या दहा किलोमीटर गटात आशुतोष पात्रा विजेता ठरला. युवकांबरोबरच ज्येष्ठ नागरिकांचा सहभाग हे या उपक्रमाचे वैशिष्ट्य ठरले.

‘सेवा भवन दौड़’मधील दहा किलोमीटर गटाच्या शर्यतीचा प्रारंभ रविवारी सकाळी सव्वासहा वाजता महर्षी कर्वे स्त्री शिक्षण संस्थेतून करण्यात आला.

उच्च व तंत्र शिक्षणमंत्री चंद्रकांतदादा पाटील,खासदार प्रा डॉ मेधा कुलकर्णी, लेखक, दिग्दर्शक दिग्पाल लांजेकर, ‘गिरिप्रेमी’चे उमेश झिरपे, राष्ट्रीय स्वयंसेवक संघाचे अखिल भारतीय प्रचार प्रमुख सुनील आंबेकर,पश्चिम महाराष्ट्र प्रांताचे कार्यवाह डॉ प्रवीण दबडघाव, पुणे महानगर संघचालक रवींद्र वंजारवाडकर, ‘सेवा भारती’चे पश्चिम महाराष्ट्र प्रांत संघटनमंत्री श्रीपाद दाबक, ‘आयर्न मॅन’ निखिलेश पंत यांच्या प्रमुख उपस्थितीत ‘सेवा भवन दौड़’ हा उपक्रम झाला.

ही शर्यत आशुतोष पात्रा याने जिंकली.त्याने ही शर्यत ४० मिनिटे ४९ सेकंद या वेळेत पूर्ण केली. महर्षी कर्वे स्त्री शिक्षण संस्थेतून सकाळी पावणेसात वाजता पाच किलोमीटरच्या शर्यतीचा प्रारंभ करण्यात आला. या शिवाय ‘चॅरिटी रन’ हा उपक्रमही आयोजित करण्यात आला होता.

‘सेवा भवन दौड़’ या उपक्रमापासून ‘राष्ट्रीय स्वयंसेवक संघ जनकल्याण समिती’च्या आरोग्यविषयक जनजागृती मोहिमेचाही प्रारंभ करण्यात आल्याचे समितीचे कार्यवाह प्रमोद गोऱ्हे यांनी सांगितले. ‘सेवा भवन’ प्रकल्प समितीच्या अध्यक्षा डॉ स्वाती बेलसरे, कार्यवाह पलाश देवळणकर, सहकार्यवाह उमा जोशी,मुख्य कार्यकारी अधिकारी संदेश उभे यांनी संयोजन आणि सारंग भिडे यांनी सूत्रसंचालन केले.

चौकट – १
‘सेवा भवन दौड़’मधील विजेते
दहा किलोमीटर (पुरुष गट) – आशुतोष पात्रा – प्रथम, पंकज कश्यप – द्वितीय, अन्वय नेहरकर – तृतीय
दहा किलोमीटर (महिला गट) – अमृता मांडवे – प्रथम,अमृता सोनसळे -द्वितीय, उज्ज्वला मरगळे – तृतीय

दहा किलोमीटर (साठ वर्षांवरील गट) – जयंत पाठक – प्रथम, राजेंद्र गुजराथी – द्वितीय, प्रशांत वडके – तृतीय

चौकट – २
क्षणचित्रे
मार्गावर धावपटूंचे उत्साही स्वागत
महाविद्यालयीन विद्यार्थ्यांचा स्वयंसेवक म्हणून सहभाग
‘एएफएमसी’, पुणे मेट्रो मधील शंभर जणांचा सहभाग

आयटी कंपन्यांमधील अभियंत्यांचाही उत्स्फूर्त प्रतिसाद

बच्चे कंपनीचे विशेष आकर्षण !!

पुणे- आपल्या देशात सर्कसमध्ये प्राण्यांचा खेळ करण्यास तसेच प्राणी पाळण्यास बंदी आहे. बच्चे कंपनीला आवडणारे प्राणी आता आपल्या देशात कोणत्याच सर्कसमध्ये नाहीत. रॅम्बो सर्कस मधील वाघ, सिंह ,हत्ती, अस्वल, हिप्पोपोटोमस ,चिंपांझी, उंट, घोडे , असे सारे प्राणी सरकारकडे जमा झाले. त्यावेळेस रॅम्बो सर्कसचे मालक सुजित दिलीप यांनी केरळमधील कोईमतूर येथून ६ महिने खपून हुबेहूब डिजीटल हत्ती तयार केला. सुमारे ७-८ फूट उंचीचा हा ‘’डीजीटल हत्ती’’ चाकांवर  ठेवला आहे . हत्तीच्या पाठीवर बसलेला सर्कस कलावंत तांत्रिकदृष्ट्या ऑपरेटिंग करतो व त्यानुसार हा डिजीटल हत्ती डावीकडे उजवीकडे मान वळून बघतो , व सोंड उंच करून पाण्यचा फवारा मारतो. तसेच हा डीजीटल हत्ती चीत्त्कारतो देखील ! या सोबतच कापडी चिंपांझी ,जिराफ  आणि झेब्रादेखील सर्कसमध्ये आहेत.

   येत्या काही महिनात मोठा कापडी चिंपांझी दुबईहून आणि उड्या मारणारा मोठा कापडी कांगारू ऑस्ट्रेलियामधून रॅम्बो सर्कसमध्ये देखील होईल. देशातील पहिले डीजीटल हत्ती सर्कसमध्ये पहिल्यांदा आणण्याचा मान रॅम्बो सर्कसला मिळाला याचा आनंद होतो.पुणेकरांनी देखील या डीजीटल हत्तीला मोठा प्रतिसाद दिला . असे सुजित दिलीप म्हणाले ,या प्रसंगी अक्षरकला मीडियाच्या तन्मयी मेहेंदळे यांनी “जिना यहा मरना यहा“हे गाणे गाऊन ‘रॅम्बो सर्कस’चा शुभारंभ केला.