वाहतूक कोंडीच्या समस्यांबाबत अधिकारी आणि नागरिक यांच्यासोबत बैठक

पुणे-आगामी काळ हा सण-समारंभाचा काळ आहे. त्यामुळे या काळात नागरिक खरंदीसाठी बाहेर पडण्याचे प्रमाण जास्त असते. त्यामुळे संभाव्य वाहतूककोंडी टाळण्यासाठी कोथरुड मध्ये ५० वॅार्डनची नियुक्ती करा, असे निर्देश ना. चंद्रकांतदादा पाटील यांनी आज दिले. तसेच, वाहतूक कोंडी सोडवण्यासाठी नागरिकांनीही सहकार्याची भूमिका घ्यावी, असे आवाहन त्यांनी यावेळी केले.

कोथरुड मधील वाहतूक कोंडीची समस्या सोडवण्यासाठी ना. चंद्रकांतदादा पाटील यांच्या अध्यक्षतेखाली बैठक झाली. यावेळी अप्पर पोलीस आयुक्त मनोज पाटील, वाहतूक शाखेचे पोलीस उपायुक्त हिंमत जाधव, राष्ट्रीय महामार्ग प्राधिकरणाचे संजय कदम, पुणे महानगरपालिका शहर मुख्य अभियंता प्रशांत वाघमारे, पथ विभागाचे मुख्य अभियंता अनिरुद्ध पावसकर, अतिक्रमण विभागाचे उपायुक्त संदीप खलाटे, क्षेत्रीय उपायुक्त यांच्या सह भाजपचे पदाधिकारी, माजी नगरसेवक तथा कोथरुड मधील विविध सोसायटींचे पदाधिकारी उपस्थित होते.

बैठकीच्या सुरुवातीला मतदारसंघातील माजी नगरसेवक आणि विविध सोसायटीच्या पदाधिकाऱ्यांनी वाहतूककोंडीच्या समस्या मांडल्या. यात प्रामुख्याने आंबेडकर चौक परिसर, एरंडवणे गुळवणी पथ, एमआयटी कॅालेज परिसर, पौड रोड, कर्वेरोड, कोथरुड डेपो आदी भागातील वाहतूक कोंडीच्या समस्या मांडल्या. त्यावर ना. पाटील यांनी सर्व समस्या सोडवण्यासाठी उपाययोजना करण्याच्या सूचना केल्या.

आंबेडकर चौक भागातील वाहतूक कोंडीचा प्रश्न सोडवण्यासाठी तसेच, भविष्याचा विचार करून उपाययोजना करण्याच्या सूचना केल्या. तसेच, एमआयटी कॅालेजजवळ बेदरकारपणे वाहने चालवणाऱ्यांवर कठोर कारवाई करावी. त्यासोबतच भरधाव वाहनांसाठी गतिरोधक उभारण्याच्या सूचना दिल्या. तसेच, वाहतूक कोंडीला कारण ठरणाऱ्या अतिक्रमणांवर कठोर कारवाई करण्याच्या सूचनाही यावेळी दिल्या. त्यासोबतच , आगामी काळ हा सण-समारंभाचा काळ आहे. त्यामुळे या काळात नागरिक खरंदीसाठी बाहेर पडण्याचे प्रमाण जास्त असते. त्यामुळे संभाव्य वाहतूककोंडी टाळण्यासाठी कोथरुड मध्ये ५० वॅार्डनची नियुक्ती कराव्यात असे निर्देशही या बैठकीत दिले.

यावेळी अप्पर पोलीस आयुक्त मनोज पाटील यांनी कोथरुड मतदारसंघातील वाहतूककोंडी सोडवण्यासाठी ना. पाटील यांच्या मार्गदर्शनाखाली सुरु असलेल्या उपाययोजनांचे कौतुक करून आभार मानले. तसेच, वाहतूक कोंडीस कारणीभूत ठरणाऱ्या तथा नो पार्किंग मध्ये गाडी लावून वाहतूकीस अडथळा निर्माण करणाऱ्यांवर कारवाईसाठी वाहतूक विभागाने PTP traffic हे ॲप कार्यन्वित केले असून; या ॲपवर आजपर्यंत ४५०० तक्रारी प्राप्त झाल्या आहेत. त्यापैकी ३२०० जणांवर कारवाई झाली असल्याची माहिती देत, नागरिकांनी याचा जास्तीत जास्त वापर करण्याचे आवाहन केले. त्यासोबतच एफसी रोड येथे AI कॅमेरा कार्यान्वित करुन वाहतूक कोंडीवर नियंत्रण मिळविण्यात यश आले असून, उर्वरित पुणे शहरातही कार्यान्वित करण्याचा मानस असल्याचा संकल्प यावेळी व्यक्त केला.

दरम्यान, आजच्या बैठकीत प्राप्त तक्रारी तथा वाहतूक कोंडीच्या समस्या सोडवण्यासाठी प्रशासनाने केलेल्या उपाययोजनांचा दर दहा दिवसांनी आढावा घेणार असल्याचे ही त्यांनी यावेळी बैठकीत नमूद केले.

एमआयटी डब्ल्यूपीयूत यूपीएससीच्या यशस्वितांचा १५वां राष्ट्रीय पातळीवर सत्कार संपन्न

पुणे, १२ जुलैः” प्रशासकीय सेवेत कार्य करतांना सहानुभूती, करूणा आणि पॅशन या तीन गोष्टी अत्यंत महत्वाचे आहे. पॅशन नसेल तर यशस्वी होता येत नाही. अशावेळेस पॅशनला कठोर परिश्रमाची जोड दयावी. सतत शिकण्याची सवय आणि उत्तम कार्य करण्यावर अधिक भर दयावा. आपला व्यवहारच आपल्या प्रगतीचे द्वार उघडतो.” असे विचार मुंबई येथील माजी पोलीस आयुक्त विवेक फणसाळकर यांनी व्यक्त केले.
एमआयटी वर्ल्ड पीस युनिव्हर्सिटीच्या एमआयटी स्कूल ऑफ गव्हर्नमेंट (मिटसॉग) आणि डिपार्टमेंट ऑफ इकॉनॉमिक्स अँड पब्लिक पॉलिसी यांच्या संयुक्त विद्यमाने कोथरूड येथील एमआयटी डब्ल्यूपीयूच्या स्वामी विवेकानंद सभागृहात आयोजित करण्यात आलेल्या केंद्रीय लोकसेवा आयोग (यूपीएससी) स्पर्धा परीक्षा-२०२४ मधील यशस्वितांच्या १५ व्या राष्ट्रीय सत्कार सोहळ्याच्या प्रसंगी प्रमुख पाहुणे म्हणून ते बोलत होते.
यावेळी लोकसभेच्या पहिल्या महिला माजी महासचिव स्नेहलता श्रीवास्तव व सरदार वल्लभभाई पटेल राष्ट्रीय पोलिस अकादमीचे माजी संचालक ए.एस.राजन हे सन्माननीय पाहुणे म्हणून उपस्थित होते.
तसेच एमआयटी डब्ल्यूपीयूचे कुलगुरू डॉ. आर.एम.चिटणीस, सीएओ डॉ. प्रसाद खांडेकर, स्कूल ऑफ इकॉनॉमिक्स अँड कॉमर्सच्या डीन डॉ. अंजली साने, देशातून प्रथम आलेली शक्ती दुबे, तिसरा आलेला अर्चित डोंगरे व गोपाळ वामणे उपस्थित होते.
एमआयटी वर्ल्ड पीस युनिव्हर्सिटीचे संस्थापक अध्यक्ष विश्वधर्मी प्रा. डॉ. विश्वनाथ दा. कराड यांच्या आशीर्वादाने आणि एमआयटी वर्ल्ड पीस युनिव्हर्सिटीचे कार्याध्यक्ष डॉ. राहुल विश्वनाथ कराड यांच्या मार्गदर्शनात या सोहळ्याचे आयोजन करण्यात आले होते.
या सोहळ्यात देशातून प्रथम आलेली शक्ती दुबे आणि तिसरा आलेला अर्चित डोंगरे यांना अनुक्रमे १ लाख रुपये रोख व ३० हजार रुपये रोख तसेच शाल, ज्ञानेश्वरांची प्रतिमा व सन्मानपत्र देऊन सन्मान करण्यात आला. त्याचबरोबर १४० यशस्वितांना मान्यवरांच्या हस्ते गौरविण्यात आले.
विवेक फणसाळकर म्हणाले,”नागरी सेवांमध्ये प्रवेश करण्याचा आपल्या हेतूचा कधीही विसर पडू देऊ नका. या सेेवेमध्ये प्रचंड आव्हाने असल्याने येथे राहूनच त्याचा सामना करावा. समाजाच्या व देशाच्या प्रगतीसाठी योग्य ध्येय धोरणे बनवून त्यावर अंमलबजावणी करावी. सार्वजनिक सेवा ही एक विशेष सेवा असून ती समाज व देशाच्या विकासासाठी असावी. प्रशासकीय सेवेत कार्य करतांना कठोर परिश्रमावर विश्वास ठेवा. आपण जसा व्यवहार करू तशीच परतफेड समाजाकडून मिळेल. मानवतेला प्राथमिकता देऊन त्यांच्या कल्याणासाठी कार्य करावे.”
स्नेहलता श्रीवास्तव म्हणाल्या,” प्रशासकीय सेवा हा अत्यंत महत्वाचा टास्क आहे. कठोर परिश्रम याबरोबरच सतत शिकण्याची प्रवृत्ती ठेवावी. या सेवेमध्ये स्वतःवर प्रचंड नियंत्रण ठेऊन नम्रतेचा गुण अंगिकारावा. प्रगती करण्यासाठी नवनवीन शिकण्याच्या वृत्तीबरोबरच स्वतःजवळ एक डायरी ठेऊन दिवसभराचा चार्ट लिहावा. सर्वांशी सर्वोत्तम व्यवहार कसा करता येईल या वर लक्ष केंद्रीत करावे.”
ए.एस.राजन म्हणाले,” सेवा कर्तव्य परमोधर्म ही ब्रीद वाक्य लक्षात ठेऊन याला सर्वाधिक महत्व द्यावे. आपली एक चूक ही संपूर्ण समाजाला भोगावी लागेल. त्यामुळेच अचूक निर्णय घेऊन त्याचा त्रास कोणालाही होणार नाही हे पाहावे. जीवनामध्ये शिस्त अत्यंत महत्वाची असून त्यातूनच लोकशाहीला सशक्त करण्यासाठी प्रयत्न करावे. राष्ट्रीय सुरक्षा हाच मुख्य अजेंडा ठेऊन प्रशासकीय सेवेत कार्य करावे.”
शक्ती दुबे आणि अर्चित डोंगरे यांनी राष्ट्रीय सेवेसाठी आपले कर्तव्य पार पाडण्यासाठी सर्व काही करण्याचे आश्वासन दिले.
डॉ. आर.एम.चिटणीस यांनी प्रास्ताविक व स्वागतपर भाषण केले. डॉ.प्रसाद खांडेकर यांनी सर्व सत्कारमूर्तींना आपल्या कार्याप्रती प्रामाणिकता राखण्याची शपथ दिली.
प्रा.डॉ. गौतम बापट यांनी सूत्रसंचालन केले. डॉ. अंजली साने यांनी आभार मानले.

जनकल्याण बहुउद्देशीय फाउंडेशन, पुणे आणि आशुतोष डान्स स्टुडिओज यांच्या संयुक्त विद्यमाने आयोजन
पुणे : जनकल्याण बहुउद्देशीय फाउंडेशन, पुणे आणि आशुतोष डान्स स्टुडिओज यांच्या संयुक्त विद्यमाने नृत्यकला संगम आणि अँजेलिक फेस ऑफ पुणे – सौंदर्य स्पर्धा या स्पर्धेतील विजेत्यांच्या सन्मान सोहळ्याचे नवी पेठेतील पत्रकार भवन येथे आयोजन करण्यात आले होते. या सोहळ्याला विविध क्षेत्रातील मान्यवर उपस्थित होते.

वायब्रंट ग्रुप ऑफ कंपनीच्या मुख्य कार्यकारी अधिकारी डॉ. अश्विनी जाधव, पी.के. ट्रेडर्सचे शिवाजी इंडे, पुणे बिझनेस क्लबच्या संस्थापक सपना काकडे, अभिनेता निखिल निगडे, सेलिब्रिटी मेकअप आर्टिस्ट प्रीत पाटील, फर्स्ट लेडी बाऊन्सर सिक्युरिटी ग्रुपच्या संस्थापक दीपा परब, तसेच आयोजक आशुतोष अभिजीत संकाये पाटील उपस्थित होते.

या स्पर्धेत विविध वयोगटांतील स्पर्धकांनी सहभाग घेतला होता. किड्स कॅटेगरीत साक्षी रामदासी हिने प्रथम क्रमांक पटकावला. टीन्स कॅटेगरीत स्वरा पाथरूडकरहिने बाजी मारली. मिस कॅटेगरीत धनश्री गायकवाड विजेती ठरली, तर मिसेस कॅटेगरीत प्रतीक्षा वालगुडे हिने प्रथम क्रमांक मिळवला. ‘मोस्ट पॉप्युलर फेस ऑफ द इव्हेंट’ हा किताब तितीक्षा राजेमाने हिला मिळाला.

स्पर्धेचे परीक्षण करण्यासाठी विविध क्षेत्रातील मान्यवर परीक्षक पॅनल उपस्थित होता. यामध्ये सागर अंदणकर (चंद्रपूर), प्रीत पाटील (बेंगळुरू), प्रणाली खाम्बेकर (नाशिक), निखिल निगडे (पुणे) आणि मयुरी आव्हाड (लातूर) यांचा समावेश होता.

आशुतोष अभिजीत संकाये पाटील म्हणाले, या स्पर्धेमागचा उद्देश नवोदित कलाकारांना व्यासपीठ उपलब्ध करून देण्याचा होता. राज्यभरातून आलेल्या स्पर्धकांनी अत्यंत चांगली कामगिरी केली. अशा स्पर्धांमुळे युवकांना आपली कला सादर करण्याची संधी मिळते आणि त्यांच्या आत्मविश्वासात वाढ होते. त्यामुळे पुढील काळात ही स्पर्धा अधिक व्यापक स्वरूपात आयोजित करण्यात येईल.

पुणे : सर परशुरामभाऊ महाविद्यालय आणि Quick Heal Foundation – Cyber Warriors Club यांचा संयुक्त विद्यमाने गुरुपौर्णिमेनिमित्त एक सायबर जनजागृती उपक्रम राबविण्यात आला.

सायबर शिक्षा फॉर सायबर सुरक्षा या उपक्रमात महाविद्यालयातील स्वच्छता कर्मचारी, सुरक्षा रक्षक, ग्रंथालय कर्मचारी, नॉन-टीचिंग स्टाफ, मावश्या, कॅन्टीन कर्मचारी यांच्यासारख्या अनेक सेवाभावी व्यक्तींना “गुरु” मानून त्यांचा सन्मान करण्यात आला.

या उपक्रमात विद्यार्थ्यांनी प्रत्येक कर्मचाऱ्याला काही सोप्या व उपयुक्त सायबर सुरक्षा टिप्स सांगून त्यांना डिजिटल युगात सुरक्षित राहण्यासाठी प्रेरित केले सुरक्षा रक्षक, कार्यालयीन मदतनीस, ग्रंथालयातील कर्मचारी, वॉशरूम स्वच्छता करणाऱ्या मावश्या, कॅन्टीनमधील कर्मचारी अशा अनेक कार्यकर्त्यांना विशेष “Cyber Guru” बॅज देऊन त्यांचा सन्मान करण्यात आला.

Quick heal Cyber Warriors Club च्या विद्यार्थ्यांनी या माध्यमातून सायबर सुरक्षा जागृतीसह आदर व्यक्त करण्याची अभिनव संकल्पना यशस्वीरीत्या राबवली

पुणे-येथील कोहिनूर मंगल कार्यालयात आज आयोजित करण्यात आलेल्या निवृत्त ज्येष्ठ पत्रकारांच्या स्नेहमेळाव्यात जुन्या पिढीतील निवृत्त ज्येष्ठ पत्रकारांनी पत्रकारितेच्या काळातील आठवणींना उजाळा देत  वृत्तपत्र क्षेत्रातील जुने संदर्भ, महत्त्वाच्या घटना आणि अनेक सामाजिक घडामोडींच्या आठवणी जागविल्या. पुण्यातील माध्यम समन्वयक प्रवीण प्र. वाळिंबे आणि त्यांच्या सहकाऱ्यांनी या निवृत्त ज्येष्ठ पत्रकार स्नेहमेळाव्याचे आयोजन केले होते. प्रारंभी ‘अक्षरकला मीडिया’च्या तन्मयी मेहेंदळे-कुलकर्णी यांनी स्वागतगीत गायिले. ‘अक्षरकला मीडिया’चे रोहिणी अद्वैत, सागर बाबर आणि मधुरा नातू यांनी सर्वांचे स्वागत केले.  ज्येष्ठ पत्रकार अविनाश गोडबोले यांनी पुण्यातील दिवंगत पत्रकारांच्या नावांच्या यादीचे वाचन केले. सर्वांनी स्तब्ध उभे राहून श्रद्धांजली अर्पण केली. ‘अक्षरकला मीडिया’चे प्रमुख व कार्यक्रमाचे संयोजक प्रवीण प्र. वाळिंबे यांनी प्रास्ताविक केले. ते म्हणले की, ’१० वर्षांपूर्वी पुण्यातील निवृत्त ज्येष्ठ पत्रकारांचा शोध घेऊन त्यांची माहिती संकलित केली व पहिला निवृत्त ज्येष्ठ पत्रकारांचा स्नेहमेळावा आयोजित केला होता. आता निवृत्त ज्येष्ठ पत्रकारांच्या ग्रुपमध्ये १२५हून अधिक निवृत्त ज्येष्ठ पत्रकार आहेत.’

यावेळी ज्येष्ठ गांधीवादी विचारवंत उल्हास पवार, ‘पुणे फेस्टिव्हल’चे उपाध्यक्ष व ‘कोहिनूर ग्रुप’चे अध्यक्ष  कृष्णकुमार गोयल आणि ‘बेळगाव तरुण भारत’चे संपादक व लोकमान्य मल्टिपर्पज को-ऑप. सोसायटीचे अध्यक्ष किरण ठाकुर हे प्रमुख पाहुणे म्हणून उपस्थित होते. त्यांच्या हस्ते वयाची ७५ वर्षे पूर्ण करणाऱ्या २१ निवृत्त ज्येष्ठ पत्रकारांचा पुणेरी पगडी आणि पुस्तके भेट देऊन सन्मान करण्यात आला.

यावेळी उपस्थित तीनही पाहुण्यांनी निवृत्त ज्येष्ठ पत्रकारांनी पत्रकारितेच्या माध्यमातून केलेल्या कार्याचा गौरव केला. ‘राजकारण्यांवर आणि समाजातील गैरप्रवृत्तींवर अंकुश ठेवणारे पत्रकार निष्ठेने आयुष्यभर एका अर्थाने समाजाची सेवाच करीत असतात. आज आर्थिक परिस्थिती थोडी बदललेली असली, तरी पूर्वीच्या काळी पत्रकारांना पोटाला चिमटा देऊन आपली सेवा बजावावी लागत असे. परंतु अशा कष्टदायी वातावरणातही अनेक पत्रकारांनी उत्तम काम करून चांगली समाजसेवा करीत उत्तम आदर्श लोकांपुढे ठेवला आहे. पुण्यात अशा सेवाभावी वृत्तीने काम करणाऱ्या पत्रकारांची संख्या लक्षणीय आहे. त्यामुळे पुण्यातील पत्रकार महाराष्ट्रातील तमाम पत्रकारांसाठीचे आदर्श ठरले आहेत,’ असे गौरवोद्गारही उल्हास पवार यांनी काढले.

‘कोहिनूर ग्रुप’चे अध्यक्ष कृष्णकुमार गोयल म्हणाले की, ‘पूर्वी पगार कमी होते, तरी पत्रकारितेतील निष्ठा मोठी होती. समाजाचे प्रबोधन करीत समाजाला चांगली दिशा देण्याचे काम पत्रकारांच्या जुन्या पिढीने केले. जुन्या पिढीतील पत्रकार हे ‘कोहिनूर’ हिऱ्याप्रमाणे चकमदार असून, समाजाला त्यांनी दीपस्तंभाप्रमाणे मार्गदर्शन केले,’ असे कृष्णकुमार गोयल म्हणाले.

दै. ‘बेळगाव तरुण भारत’चे संपादक व लोकमान्य मल्टिपर्पज को-ऑप. सोसायटीचे अध्यक्ष किरण ठाकुर म्हणाले की, ‘पत्रकारिता हा धर्म असून, लोकशाहीचा चौथा स्तंभ आहे. आजही माध्यमांकडे समाज अपेक्षेने बघतो. ध्येयवादी पत्रकार  हे समाजाचे वैभव असून, पुण्यातील निवृत्त ज्येष्ठ पत्रकारांचा असा स्नेहमेळावा महाराष्ट्रात एकमेव होत असावा,’ अशा शब्दांत त्यांनी कौतुक केले.

 यावेळी निवृत्त ज्येष्ठ पत्रकारांतर्फे डॉ. कुमार सप्तर्षी, कर्नल विनायक तांबेकर, अरविंद गोखले, सुधीर गाडगीळ, मुकुंद संगोराम, चंद्रशेखर कारखानीस, विनीता देशमुख , राजीव साबडे आदींनी मनोगत व्यक्त केले.ज्येष्ठ पत्रकार अरुण खोरे दै. ‘लोकमत’चे समूह संपादक विजय बाविस्कर, ‘महाराष्ट्र टाइम्स’च्या पुणे आवृत्तीचे संपादक श्रीधर लोणी, ‘प्रभात’चे कार्यकारी संपादक अविनाश भट, ‘सामना’चे निवासी संपादक अरुण निगवेकर, ‘पुढारी’चे कार्यकारी संपादक सुनील माळी, पुणे ‘लोकसत्ता’चे माजी संपादक मुकुंद संगोराम, दै. ‘प्रहार’चे माजी संपादक सुकृत खांडेकर, तसेच रमेश डोईफोडे ,हरीश केंची,सत्यजित जोशी, मीरा जोशी,राज काझी,प्रसन्न केसकर , चंद्रन अय्यर, मनोहर सप्रे,शैलेश गुजर,संतोष डिंगणकर शरद लोणकर,वल्लभ कुलकर्णी ,विद्याधर ताठे , विवेक भुसे , वाय व्ही कृष्णमुर्ती ,सुभाष इनामदार , सुभाषचंद्र जाधव,दै. ‘सकाळ’चे मुख्य वार्ताहर मंगेश कोळपकर, दै. ‘लोकमत’चे मुख्य वार्ताहर राजू इनामदार, पुणे श्रमिक पत्रकार संघाचे अध्यक्ष ब्रिजमोहन पाटील व सरचिटणीस मंगेश फल्ले, पुणे पत्रकार प्रतिष्ठानचे अध्यक्ष शैलेश काळे आदींनी उपस्थित राहून शुभेच्छा दिल्या.

या मेळाव्याला सुमारे १००हून अधिक निवृत्त ज्येष्ठ पत्रकार उपस्थित होते. त्यांमध्ये निवृत्त महिला पत्रकारांची संख्याही मोठी होती. ‘अक्षरकला मीडिया’च्या श्रुती तिवारी यांनी आभारप्रदर्शन केले. यानंतर भोजन होऊन हा स्मरणीय कार्यक्रम संपला.

७५ वर्षांवरील ज्येष्ठ पत्रकार 

फरीद शेख अमीर – १९ सप्टेंबर १९३३,

जयराम देसाई  – ७ सप्टेंबर १९३८ ,

अशोक डुंबरे  –  ३० मार्च १९३९ ,

विनायक तांबेकर  –  १२ जुन १९४०,

डॉ. कुमार सप्तर्षी  –  २१ ऑगस्ट १९४१, 

वी.वाय.कृष्णमुर्ती  –  १२ एप्रिल १९४२ ,

गोपाळ सक्रीकर  –  २८ ऑगस्ट १९४२,

उषःप्रभा  पागे -भिडे  –  २७ डिसेंबर १९४३, 

चंद्रशेखर कारखानीस  –  २८ ऑक्टोबर १९४४ ,

मोरेश्वर जोशी  –  ३१ ऑगस्ट १९४५ ,

अरविंद गोखले  –  १६ मे १९४७, 

शर्मिला कारखानीस  –  १ जून १९४८ ,

अशोक काणे  –  ११ ऑक्टोबर १९४८,

अनिल टाकळकर  –  ८ मार्च १९४९, 

 दिलीप कुकडे  –  ११ मे १९५० ,

प्रभाकर खोले  –  ७ सप्टेंबर १९५०,

सुभाष नाईक  –  ११ ऑक्टोबर १९५०, 

सुधीर गाडगीळ  – २५ नोव्हेंबर १९५०, 

मनोहर कुलकर्णी – ७ डिसेंबर १९५०.. 

महावीर जोंधळे.. यांचा  समावेश होता.

पुणे-सत्ताधारी राष्ट्रवादी काँग्रेसचे अध्यक्ष तथा राज्याचे उपमुख्यमंत्री अजित पवार यांनी बेशिस्त वर्तन करणाऱ्यांना निर्वाणीचा इशारा दिला आहे. बेशिस्त वागणारा माणूस कितीही मोठ्या बापाचा असला तरी मी पोलिसांना त्याला टायरमध्ये घेऊन झोडायला सांगणार आहे. नियम सर्वांसाठी समान आहेत. मग तो अजित पवार असो किवा अजित पवारांचा कुणी नातलग असो, असे ते म्हणालेत.

अजित पवार यांच्या हस्ते शनिवारी बारामती येथील सावित्री हॉस्पिटलचे उद्घाटन झाले. यावेळी बोलताना त्यांनी हुल्लडबाजी करणाऱ्यांना उपरोक्त शब्दांत इशारा दिला. ते म्हणाले, कधी कधी दुचाकीवाले इकडे-तिकडे पाहतात आणि हळूच राँग साईडने ओव्हरटेक करण्याचा प्रयत्न करतात. असा माणूस सापडला तर तो मुलगा किंवा व्यक्ती कितीही मोठ्या बापाचा असला तरी, मी त्याला टायरमध्ये घेऊन झोडायला सांगणार आहे. त्याला त्याच्या 10 पिढ्या आठवल्या पाहिजेत. कुणीही अजिबात नियम तोडू नका. मग तो अजित पवार असो की अजित पवाराचा नातलग असो. सर्वाना नियम सारखा आहे.

अजित पवार पुढे म्हणाले, मी जे करतो ते बारामतीकरांसह सर्वांसाठी करतो. मी अनेक ठिकाणी झाडे लावली. पण तिथे कुणीपण येत आहे. जनावरे चरत आहेत. पण तसे चालणार नाही. जिथे माणसांना बसण्यासाठी जागा केली आहे, तिथे एक दुचाकीस्वार निवांत मांडी घालून लोकांसोबत गप्पा मारत होता. मी गाडी वळवली व पोलिसांना सांगितले की, याची गाडी ताब्यात घे आणि याला चांगला टायरमध्ये घाल. मग त्याने चुकले म्हणून विनवणी केली.

मोकाट जनावरांच्या मालकांवर कारवाई करणार–अजित पवारांनी यावेळी शहरातील मोकाट जनावरांच्या मुद्यावरही भाष्य केले. काही जण चुका करतात. रस्त्यावर कचरा टाकतात. जनावरे चरायला सोडतात. मी त्यांना सांगतो, ती जनावरे कोंडवाड्यात घाला. ऐकले तर ठीक, नाही तर मी त्यांना बाजार दाखवतो. मालकांनाही माझा इशारा आहे. त्यांच्यावरही केसेस होतील. ज्यांची गाढवं आहेत, जनावरे आहेत, ज्यांच्या गायी इकडे-तिकडे फिरत असतात, त्यांनी ते आपल्या दारात बांधाव्यात. त्यांना काय खायला-प्यायला घालायचे ते घालावे. मी बारामती जी चांगली करतो, ती काय सर्वांना कसेही फिरण्यासाठी नाही, असे ते म्हणाले.

‌‘निसर्गातील कार्यक्षमता‌’ विषयावर अनोखे चित्रप्रदर्शन

पुणे : साक्षीभाव साध्य झाल्यास कोणतेही विचार, कल्पना, भावना किंवा पूर्वग्रह नाहीत अशी एका शांत, तरल, संवेदनाक्षम अवस्था प्राप्त होते. ही साक्षीभाव अवस्था संपूर्णत: ज्ञान-विज्ञान, कर्म आणि चैतन्याने परिपूर्ण असते. त्यामुळे साक्षीभावाच्या आधारे जीवनातल्या कोणत्याही बिकट समस्येवर यथार्थ उत्तर मिळते त्याचप्रमाणे अपेक्षित कार्यही हातून घडते आणि जीवनातला प्रत्येक क्षण आनंददायी ठरतो, असे प्रतिपादन गुरुतत्त्वयोग तत्त्वप्रणालीचे प्रणेते अभयकुमार सरदार यांनी केले.
गुरुपौर्णिमेनिमित्त गुरुतत्त्वयोग संस्थेच्या शिवाजीनगर येथील ध्यानमंदिरात विविध कार्यक्रमांचे आयोजन करण्यात आले होते. गुरुतत्त्वयोग प्रणालीचे प्रणेते अभयकुमार सरदार यांची प्रमुख उपस्थिती होती. त्या वेळी ते बोलत होते. या वेळी गुरुतत्त्ववेध स्मरणिकेचे प्रकाशन अभयकुमार सरदार, तेजा दिवाण, राजश्री करे, तेजस दशरथ, सुचित्रा पेंडसे यांच्या हस्ते करण्यात आले.
गुरुपौर्णिमेनिमित्त ‌‘निसर्गातील कार्यक्षमता‌’ या विषयावर अनोखे प्रदर्शन भरविण्यात आले आहे. निसर्गातील कोणतीही रचना, कार्यप्रणाली अतिशय कार्यक्षम असते. गुरुतत्त्वाने प्रत्येक जीवाला जगण्यासाठी, प्रतिकूल परिस्थितीत तग धरून राहण्यासाठी काही शारीरिक रचना दिल्या आहेत. या गुणधर्मांचा वापर करून प्राणिमात्र अंत:प्रेरणेने, सहजप्रवृत्तीने जगतात आणि त्यामुळेच ते कार्यक्षम असतात. गुरुतत्त्व हे फक्त मानावापुरते मर्यादित नसून ते सर्व निसर्गाचे मार्गदर्शक तत्त्व आहे, याचा उलगडा या प्रदर्शनातून पहायला मिळला.
गुरुतत्त्वयोगाच्या अभ्यासासाठी आणि त्याच्या साधनेसाठी योग्य वातावरण निर्माण करून देणे आणि हे तत्त्वज्ञान जास्तीत जास्त लोकांपर्यंत पोहोचवणे हे गुरुतत्त्वयोग सार्वजनिक धर्मार्थ विश्वस्त संस्थेचे ध्येय आहे. ‘गुरुतत्त्वाची शिकवण-साक्षीभावाद्वारे वैयक्तिक कार्यक्षमता’ या विषयावर तेजा दिवाण व सुचित्रा पेंडसे यांनी अभ्यासपूर्ण विवेचन सादर केले तर राजश्री करे, तेजस दशरथ आणि प्रचिती पाध्ये यांनी गुरुतत्त्वाच्या साधनेतून आलेल्या अनुभवांचे कथन केले.

पुणे, दि. ११: उद्योग क्षेत्राच्या समस्या सोडविण्याच्या दृष्टीने मुख्यमंत्री गंभीर आहेत. उद्योगांना सर्व पायाभूत सोयी सुविधा पुरविणे तसेच्या त्यांच्या समस्या, प्रश्न सोडविणे ही प्रशासनाची जबाबदारी असून त्यासाठी सर्व संबंधित विभागांनी समन्वयाने काम करावे, असे निर्देश विभागीय आयुक्त डॉ. चंद्रकांत पुलकुंडवार यांनी दिले.

जिल्ह्यातील विविध औद्योगिक संघटनांसोबत उद्योजकांच्या विविध प्रश्नांच्या सोडवणुकीबाबत विधानभवन येथे आयोजित बैठकीत ते बोलत होते. यावेळी पुणे पिंपरी चिंचवड मनपा आयुक्त शेखर सिंह, जिल्हाधिकारी जितेंद्र डूडी, पुणे महानगर प्रदेश विकास प्राधिकरणाचे अतिरिक्त आयुक्त दीपक सिंगला, पीएमपीएमएलच्या अध्यक्ष तथा व्यवस्थापकीय संचालक दीपा मुधोळ- मुंडे, जिल्हा परिषदेचे मुख्य कार्यकारी अधिकारी गजानन पाटील, पुणे विभागाचे उद्योग सहसंचालक संदीप रोकडे, जिल्हा उद्योग केंद्राच्या महाव्यवस्थापक अर्चना कोठारी आदी यावेळी उपस्थित होते.

डॉ. पुलकुंडवार म्हणाले, मुख्यमंत्री देवेंद्र फडणवीस आणि उपमुख्यमंत्री अजित पवार यांनी हिंजवडी- माण आयटी पार्क क्षेत्रात पावसाचे पाणी साचणे, वीज खंडीत होणे आदी समस्यांच्या अनुषंगाने कालच मुंबईत विधानभवनात बैठक घेतली आहे. या आयटी पार्कसह जिल्ह्यातील उद्योग क्षेत्राच्या सर्व समस्या सोडविणे आणि उद्योगांची वृद्धी व्हावी यासाठी मुख्यमंत्र्यांचे कटाक्षाने लक्ष आहे. त्यादृष्टीने सर्व अधिकाऱ्यांनी आपापसात समन्वयाने गतीने कार्यवाही करावी. उद्योगांच्या समस्यांबाबत नियमितपणे बैठका घेण्यात येतील आणि त्यासाठी आपण स्वत: तसेच जिल्हाधिकारी उपस्थित राहू, असे त्यांनी सांगितले.

उद्योगांना वीज, पाणी, रस्ते आदी पायाभूत सुविधा महाराष्ट्र औद्योगिक विकास महामंडळाने प्राधान्याने द्याव्यात. औद्योगिक क्षेत्रातील तसेच क्षेत्राबाहेरील रस्त्यांवरील खड्डे संबंधित यंत्रणांनी भरून घ्यावेत तसेच खड्डेमुक्त ठवावेत. क्षेत्रातील व क्षेत्राबाहेरील भागात कचरा, गटर आदींची स्वच्छता संबंधित यंत्रणांनी करावी.

महावितरणने अखंडित वीजपुरवठ्यासाठी फीडर, उपकेंद्रे, वीज वाहिन्या आदी यंत्रणा अद्ययावत कराव्यात. पुणे विभागात किती उद्योग आहेत तसेच त्यांना पुरविण्यात येणाऱ्या वीजपुरवठ्यात होणारा चढ-उतार याचा डाटा जमा करुन त्याचे विश्लेषण करावे, जेणेकरुन त्यावरील उपाययोजना शोधणे सोपे जाईल, अशाही सूचना विभागीय आयुक्तांनी दिल्या.

पुणे महानगर प्रदेश विकास प्राधिकरण, जिल्हा परिषद तसेच महसूल विभागाने समन्वयाने रस्त्यांवरील अतिक्रमणे मोकळी करावीत. सार्वजनिक बांधकाम विभाग, भारतीय राष्ट्रीय महामार्ग प्राधिकरणाने आपल्या हद्दीतील रस्त्यांवर पुन्हा अतिक्रमणे होणार नाहीत याची दक्षता घ्यावी.

चिंचवड येथील ईएसआयसी रुग्णालयात अत्याधुनिक उपचार मिळण्याच्या दृष्टीने उपकरणे सेवा सुविधांसाठी केंद्र शासनाकडे पाठपुरावा करण्यात येईल. तसेच रुग्णालयाला कंपन्यांचे सामाजिक उत्तरदायित्व निधीतून (सीएसआर) उपकरणे उपलब्ध करुन देण्याच्यादृष्टीने प्रयत्न करण्यात येतील, असे पिंपरी चिंचवड मनपा आयुक्त श्री. सिंह म्हणाले.

जिल्हाधिकारी श्री. डूडी म्हणाले, उद्योगांच्या वृद्धीसाठी राज्य शासन प्रयत्न करत आहे. पिंपरी- चिंचवड, चाकण, रांजणगाव, हिंजवडी, तळेगाव, जेजुरी, बारामती आदी सर्वच औद्योगिक क्षेत्रात तसेच क्षेत्राबाहेरील उद्योगांसाठी पायाभूत सुविधा पुरविण्यावर भर देण्यात येणार आहे. त्यासाठी सर्व संबंधित विभागांनी उद्योग संघटनांशी वेळोवेळी बैठका घेऊन त्यांच्या समस्या जाणून घ्याव्यात, असेही ते म्हणाले.

कंपन्यांनी आपल्या कामगारांसाठी पीएमपीएमएलच्या बसेसची मागणी केल्यास वेळा आणि मार्ग निश्चित करुन बसेस सुरू करण्यात येतील, असे श्रीमती मुधोळ- मुंडे यांनी सांगितले.

बैठकीस महाराष्ट्र औद्योगिक विकास महामंडळाचे मुख्य अभियंता नितीन वानखेडे, महावितरण पुणे परिक्षेत्राचे प्रादेशिक संचालक बी. बी. खंदारे, पिंपरी चिंचवड मनपाचे अतिरिक्त आयुक्त प्रदीप जांभळे पाटील, पुणे शहरचे पोलीस उपायुक्त संदीप भाजीभाकरे, पिंपरी चिंचवड पोलीस आयुक्तालयाचे पोलीस उपायुक्त विवेक पाटील, महावितरण बारामतीचे मुख्य अभियंता धर्मराज पेठकर, पुणे शहर भारतीय राष्ट्रीय महामार्ग प्राधिकरणाचे प्रकल्प संचालक संजय कदम, महाराष्ट्र औद्योगिक विकास महामंडळाच्या प्रादेशिक अधिकारी डॉ. अर्चना पठारे, हणुमंत पाटील आदींसह, सार्वजनिक बांधकाम विभाग, माथाडी कामगार मंडळ, कामगार विभाग, जिल्हा परिषद आदी विभागांचे अधिकारी उपस्थित होते.