देशी गोवंश जतन व संवर्धन सप्ताहाचा सहकार मंत्री बाबासाहेब पाटील यांच्या हस्ते शुभारंभ

पुणे, दि. १४ : देशी गोवंशाच्या संरक्षण, संवर्धन व प्रचारासाठी व्यापक जनजागृती आवश्यक्य असल्याचे प्रतिपादन राज्याचे सहकार मंत्री बाबासाहेब पाटील यांनी पुणे येथे केले.

डॉ. शिरनामे सभागृह, कृषी महाविद्यालय, पुणे येथे महात्मा फुले कृषि विद्यापीठ, राहुरी आयोजित “देशी गोवंश जतन व संवर्धन सप्ताह” कार्यक्रमाच्या उद्घाटन प्रसंगी ते बोलत होते.

यावेळी व्यासपीठावर राज्याचे कृषिमंत्री माणिकराव कोकाटे, गोसेवा आयोगाचे अध्यक्ष शेखर मुंदडा, महाराष्ट्र राज्य कृषी शिक्षण उपाध्यक्ष तुषार पवार, महात्मा फुले कृषी विद्यापीठ, राहुरीचे अध्यक्ष शरद गडाख, कृषी आयुक्त सुरज मांढरे, महाराष्ट्र राज्य कृषी शिक्षण महासंचालक श्रीमती वर्षा लड्डा, सहयोगी अधिष्ठाता महानंद माने, प्रमुख शास्त्रज्ञ सोमनाथ माने, आदी कृषी क्षेत्रातील मान्यवर उपस्थित होते.

या वेळी बोलताना श्री. पाटील म्हणाले, या उपक्रमाचे उद्दिष्ट देशी गोवंशाच्या संरक्षण, संवर्धन व प्रचारासाठी व्यापक जनजागृती करणे हे असून, शाश्वत शेती, पर्यावरण संरक्षण, दुग्धव्यवसायाची उन्नती आणि ग्रामीण अर्थव्यवस्थेला चालना देणे हा यामागचा मुख्य हेतू होता. भारतातील पारंपरिक गोवंश हे केवळ दुग्धोत्पादनासाठी नसून जैविक शेतीसाठी आवश्यक असणारे शेणखत, गोमूत्र तसेच अन्य कृषिपयोगी घटक उपलब्ध करुन देतात. त्यामुळे देशी गोवंशाचे संवर्धन म्हणजे ग्रामीण अर्थव्यवस्थेला आधार देणारे एक प्रभावी पाऊल आहे.

आजच्या तंत्रज्ञानाच्या युगात देशी गोवंशाच्या वैज्ञानिक व्यवस्थापनाची आवश्यकता अधिक वाढली असून, या सप्ताहाच्या माध्यमातून युवक, शेतकरी, संशोधक व अभ्यासक यांना एकत्र येऊन विचारमंथनाची संधी मिळत आहे. अशा उपक्रमांमधून शेती क्षेत्रात नवे विचार, संशोधन व धोरणे आकार घेतील, असेल श्री. पाटील म्हणाले.

शेतीसाठी सरकारकडून भरीव अनुदान

शेतीसाठी शासनाकडून भरीव असे अनुदान शेतकऱ्यांना देण्यात येणार असून शेतकऱ्यांनी शाश्वत शेतीकडे, सेंद्रिय शेतीकडे लक्ष देणे गरजेचे असल्याचे मत कृषिमंत्री माणिकराव कोकाटे यांनी कार्यक्रमात बोलताना व्यक्त केले.
पुढे श्री कोकाटे म्हणाले, सरकारने शेतीसाठी वेगळे धोरण निर्माण केले असून दुधाचा शेतकऱ्यांना भरीव असा फायदा होणार आहे. दुग्धजन्य पदार्थासाठी सुद्धा अनुदानाची गरज असल्याचे मत कृषिमंत्री माणिकराव कोकाटे यांनी व्यक्त केले.

पुणे, दि. १४ : नागरिकांचे रस्ते, भूसंपादन मोबदला, नैसर्गिक आपत्तीमुळे नुकसान भरपाई, पाणीपुरवठा योजना, शेतरस्ते, सिंचनासाठी पाणी आदी मूलभूत प्रश्न सोडविण्यासाठी संबंधित विभागांनी प्राधान्याने कार्यवाही करावी, असे निर्देश जिल्हाधिकारी जितेंद्र डूडी यांनी दिले.

खासदार सुप्रिया सुळे यांच्या उपस्थितीत बारामती लोकसभा मतदार संघातील नागरिकांच्या समस्या, अडीअडचणींच्या अनुषंगाने जिल्हाधिकारी कार्यालयात आयोजित बैठकीत त्यांनी हे निर्देश दिले. यावेळी जिल्ह्याचे उपवनसंरक्षक महादेव मोहिते, निवासी उपजिल्हाधिकारी ज्योती कदम यांच्यासह संबंधित विभागांचे अधिकारी उपस्थित होते.

पुणे बाह्यवळण रस्त्याच्या अनुषंगाने नागरिकांना जास्तीत जास्त मोबदला मिळावा यादृष्टीने २०१३ च्या भूमिसंपादन कायद्यानुसार कार्यवाही करण्यात येत आहे. ही मोबदल्याची प्रकरणे गतीने निकाली निघतील यासाठी प्रयत्न करण्यात येतील. हवेली, मुळशी, वेल्हा आदी तालुक्यातील दरडग्रस्त व नैसर्गिक आपत्तीग्रस्त गावे, वस्त्या, पाड्यांचे भारतीय भूवैज्ञानिक सर्वेक्षण विभागाच्या माध्यमातून सर्वेक्षण करण्यात आले असून आवश्यक तेथे पुनर्वसन, अन्य उपाययोजना राबविण्यात येत आहेत, असे त्यांनी सांगितले. तसेच हवेली तालुक्यातील जांभले या खडकवासला धरणाच्या पाणलोटक्षेत्रात असलेल्या गावातील नागरिकांना व शालेय मुलांना प्रवासासाठी बोट मिळावी या मागणीच्या अनुषंगाने तात्काळ कार्यवाहीचे निर्देश त्यांनी प्रशासनाला दिले.

कातकरी कुटुंबांना जागा देऊन त्यांचे पुनर्वसन करण्याच्या अनुषंगाने आलेल्या मागणीच्या अनषंगाने जिल्हाधिकाऱ्यांनी यावेळी माहिती दिली. जिल्ह्यात ९ हजार २०० कातकरी कुटुंबे असून डिसेंबरपर्यंत केवळ १६ कुटुंबांकडे घरे होती. गेल्या सहा महिन्यात मोहीमस्तरावर काम करुन ९५० कातकरी कुटुंबांना जागा देण्यात आली असून त्यांना घरकुले, नियमानुसार सोयीसुविधांसाठी कार्यवाही करण्यात येत आहे. उर्वरित सर्व कातकरी कुटुंबांना येत्या ऑक्टोबरपर्यंत जमीन देण्याचे नियोजन केले आहे, असेही त्यांनी सांगितले.

यावर्षी पावसाचे प्रमाण जास्त असल्याने धरणात अधिकचा पाणीसाठा न ठेवता नियोजनबद्ध पद्धतीने पाणी सोडण्याचे नियोजन राबविण्यात आल्यामुळे मोठ्या पावसानंतरही पूरस्थिती निर्माण झाली नाही, याकडेही जिल्हाधिकाऱ्यांनी लक्ष वेधले.

इंदापूर तालुक्यातील नागरिकांच्या खडकवासला कालव्याला पाणी सोडण्याच्या मागणीच्या अनुषंगाने वस्तुस्थिती तपासून पाटबंधारे विभागाला आवश्यक ते निर्देश देण्यात येतील. इंदापूर तालुक्यातील शेत रस्त्यांच्या मागणीबाबतची प्रलंबित प्रकरणे निकाली काढण्याच्या अनुषंगाने लवकरात लवकर शिबीर घेऊन कार्यवाही करण्यात येईल. कालठण इत्यादी गावात बंदी असलेले मांगूर मासे पालनाबाबत गुन्हे दाखल करण्याच्या अनुषंगाने मत्स्यव्यवसाय विभागासोबत संयुक्त कार्यवाहीचे निर्देश पोलीस तसेच महसूल विभागाला देण्यात येतील.

तालुक्यात अंत्योदय योजनेतून दिव्यांग नागरिकांना धान्य मिळावे यासाठी इष्टांक वाढविण्याच्या मागणीवर आवश्यक ती कार्यवाही करण्यात येईल, आदी निर्देश त्यांनी दिले. सन २०१९-२० मध्ये झालेल्या गारपीठिने नुकसान झालेल्यांना नुकसानभरपाई न मिळाल्याच्या तक्रारीच्या अनुषंगाने वस्तुस्थिती तपासून गतीने कार्यवाही करण्यात येईल.

दौंड शहरातील घनकचरा व्यवस्थापन, पाणीपुरवठा, मलनिस्सारण प्रक्रिया आदींबाबत गांभिर्याने प्रयत्न करण्यात येत आहेत, असेही जिल्हाधिकाऱ्यांनी यावेळी सांगितले. कुरकुंभ औद्योगिक वसाहतीतील जलप्रदूषण, वायूप्रदुषणाच्या अनुषंगाने महाराष्ट्र प्रदूषण नियामक मंडळाने आवश्यक ती तपासणी करून कार्यवाही करावी. शहरात येणाऱ्या रस्त्यांवरील काटेरी झुडपे काढण्याच्या अनुषंगाने राज्य राखीव पोलीस दलाला कळविण्यात येईल, आदी माहिती जिल्हाधिकाऱ्यांनी दिली.

पुरंदर तालुक्यातील पुरंदर उपसा सिंचन योजनेमुळे पिण्याचे पाणी प्रदुषित होत असल्याबाबत नागरिकांच्या तक्रारीच्या अनुषंगाने पाणी गुणवत्ता तपासून आवश्यक त्या उपाययोजना करण्यात येतील. अतिवृष्टीमुळे कऱ्हा नदीवरील वाहून गेलेल्या ठिकाणी नवीन बंधारे बांधणे, दुरुस्ती करणे यासाठी जिल्हा नियोजन समितीतून निधी देण्यासाठी प्रयत्न करण्यात येतील, असेही श्री. डूडी यांनी सांगितले.

भोर तालुक्यातील रस्त्यांचे भूमिसंपादन, मोबदला तसेच रस्त्यांच्या कामांची गती वाढविणे आदींच्या अनुषंगाने संबंधित यंत्रणांसमवेत पुढील आठवडाभरात बैठक लावण्यात येईल.

बारामती तालुक्यातील जनाई शिरसाई उपसा सिंचन योजना सुरू करताना करण्यात आलेल्या भूसंपादन मोबदल्याच्या अनुषंगाने पाटबंधारे विभागाने नियमानुसार कार्यवाही करावी, असे निर्देश जिल्हाधिकाऱ्यांनी दिले.

मुळशी, वेल्हा, मावळ आदी तालुक्यातील पर्यटनस्थळांच्या सर्वांगीण विकासाचा आराखडा करण्यात आला असून लवकरच अंमलबजावणीला गती देण्यात येईल. पर्यटनस्थळांना रस्त्यांची जोडणीसह पायाभूत सुविधा पुरविण्यात येतील, असे त्यांनी यावेळी सांगितले.

पोलीस उपायुक्त संदीप भाजीभाकरे, जिल्हा ग्रामीण पोलीस विभागाचे अतिरिक्त पोलीस अधीक्षक रमेश चोपडे, जिल्हा पुनर्वसन अधिकारी स्वप्नील मोरे यांच्यासह पाटबंधारे, जिल्हा परिषद आदी विभागांचे अधिकारी, संबंधित तालुक्यातील नागरिक यावेळी उपस्थित होते.

पंडित हेमंत पेंडसे शिष्य परिवारातर्फे मैफलीचे आयोजन…

पुणे : सुप्रसिद्ध गायक पंडित जितेंद्र अभिषेकी यांचे ज्येष्ठ शिष्य पंडित हेमंत पेंडसे यांच्या शिष्य परिवारातर्फे गुरुपौर्णिमेच्या निमित्ताने आयोजित प्रात:कालीन रागांच्या मैफलीत अहिरभैरव, ललत, परमेश्वरी, बिलासखानी तोडी आणि सारंग यांचे सुमधुर सादरीकरण झाले.

वारजे येथील ओव्हलनेस्ट सोसायटीच्या सभागृहात रविवारी या मैफलीचे आयोजन करण्यात आले होते.
दुबई येथील संगीतप्रेमी रसिक श्रीरंग कुलकर्णी यांच्या वतीने कै. मोरेश्वर यशवंत कुलकर्णी यांच्या स्मृतिप्रित्यर्थ देण्यात येणाऱ्या पुरस्काराने युवा तबलावादक प्रणव मिलिंद गुरव यांचा गौरव करण्यात आला. पुरस्काराचे वितरण श्रीरंग कुलकर्णी यांच्या हस्ते झाले. मानपत्र, अकरा हजार रुपये रोख, श्रीफळ असे पुरस्काराचे स्वरूप होते.

मैफलीची सुरुवात अनुराधा लेले यांनी राग अहिरभैरवमधील ‌‘हे लाल अलसाने’ या बंदिशीने केली. त्यानंतर द्रुत लयीत पं. हेमंत पेंडसे रचित ‌‘करम तुही करतार तु‌’ ही बंदिश सादर करून ‌‘मान रे मोरा मनवा तुम‌’ ही रचना सादर केली. संदिप देशमुख यांनी राग ललतमधील ‌‘रैन का सपना‌’ ही पारंपरिक रचना आपल्या मधूर आवाजात सादर केली तर ‌‘मारी घुंगरवा खेलनवा‌’ ही दृत लयीत सादर केलेली रचना रसिकांना विशेष भावली. पंडित अभिषेकीबुवा यांनी गायलेली राग परमेश्वरीमधील ‌‘मातेश्वरी परमेश्वरी‌’ ही बंदिश राधिका ताम्हनकर यांनी प्रभावीपणे सादर करून त्याला जोडून पंडित हेमंत पेंडसे यांनी रचलेला ‌‘दिर दिर तानुम्‌‍ त देरे ना‌’ हा तराणा सादर केला.
विशेष निमंत्रित गायक पंडित सचिन नेवपूकर (संभाजीनगर) यांनी आपल्या मैफलीची सुरुवात राग बिलासखानी तोडीतील ‌‘श्री कामेश्वरी‌’ या पारंपरिक बंदिशीने केली. दृत लयीत ‌‘जा जारे जा जा रे’ ही पारंपरिक रचना बहारदारपणे सादर केली. त्यानंतर सारंग रागातील ‌‘तुम रब तुम साहिब‌’ ही पारंपरिक तसेच ‌‘गगरी फोडी मोरी कान्हाने‌’ ही स्वरचित रचना सादर केली.
कार्यक्रमाची सांगता पंडित हेमंत पेंडसे यांनी सादर केलेल्या ‌‘सब सखिया समझाए‌’ या भैरवीने झाली. कलाकारांना अभिजित बारटक्के (तबला), आदिती गराडे (संवादिनी), रोहन देशपांडे, श्रावणी कुलकर्णी, यश कोल्हापुरे, संदिप देशमुख (तानपुरा, सहगायन) यांनी साथ केली.
कार्यक्रमाचे सूत्रसंचालन सायली जोशी यांनी तर आभार प्रदर्शन प्राची बाब्रस यांनी केले.

पुणे: सुरेंद्र पठारे फाऊंडेशन व फोर्ट फिट मुव्हमेंट यांच्या संयुक्त विद्यमाने ‘मोहीम रायरेश्वराची’ हा ऐतिहासिक उपक्रम रविवारी (ता. १३ जुलै) यशस्वीरित्या पार पडला. छत्रपती शिवाजी महाराजांनी स्वराज्य स्थापनेची शपथ घेतलेल्या रायरेश्वर गडाच्या पावन भूमीत ही मोहीम आयोजित करण्यात आली होती. मोहिमेला लहानग्यांपासून ज्येष्ठांपर्यंत ६३५ जणांनी उत्स्फूर्त प्रतिसाद दर्शवला.

यावेळी ‘छत्रपती शिवाजी महाराज की जय’, ‘जय भवानी जय शिवाजी’, ‘हर हर महादेव’ या घोषणांनी प्रत्येकाच्या मनात शिवप्रेम जागवले. रायरेश्वरावरील ऐतिहासिक वास्तू, निसर्गसौंदर्य व शिवरायांचा प्रेरणादायी इतिहास यामुळे सहभागींचे मन भारावून गेले. यावेळी स्वच्छता मोहीमदेखील राबवण्यात आली.

सदर मोहिमेमागील प्रमुख हेतू ट्रेकिंगच्याही पलीकडे जाऊन छत्रपती शिवाजी महाराजांच्या गौरवशाली इतिहास जाणून घेत पुढच्या पिढ्यांपर्यंत तो नेणे हा होता. “इतिहास फक्त पुस्तकांमध्ये वाचायचा नसतो, तो असा अनुभवायचाही असतो,” असे आयोजकांनी यावेळी सांगितले.

सदर उपक्रम सुरेंद्र पठारे फाऊंडेशन व फोर्ट फिट मुव्हमेंट यांच्या गडकिल्ले मोहिमांच्या मालिकेतील हे पहिले पुष्प होते. येणाऱ्या काळातही छत्रपती शिवाजी महाराजांच्या पदस्पर्शाने पावन झालेल्या गडकिल्ल्यांवर अशा मोहिमा राबवण्याचे नियोजन आहे.

सुरेंद्र पठारे फाऊंडेशनचे अध्यक्ष सुरेंद्र पठारे म्हणाले, “गडकिल्ले आपल्या महाराष्ट्राचे वैभव आहेत आणि हे वैभव जपणे आपले कर्तव्य आहे. या उपक्रमातून हा छत्रपती शिवाजी महाराजांनी दिलेला समृद्ध वारसा पुढे नेण्याचे काम करायचे आहे.”

“छत्रपती शिवाजी महाराजांनी स्वराज्य स्थापनेची शपथ घेतली त्या भूमीत येऊन एक वेगळीच ऊर्जा निर्माण झाली. आपला इतिहास हा आपला अभिमान आहे आणि तो अभिमान आपण कायम बाळगला पाहिजे, ही जाणीव अजून घट्ट झाली. सुरेंद्र पठारे फाऊंडेशन व फोर्ट फिट मुव्हमेंटने सुरू केलेला हा उपक्रम खूप स्तुत्य आहे. आपल्या इतिहासाशी पुन्हा एकदा नव्याने जोडले जात आहोत”, अशा उत्स्फूर्त भावना मोहिमेतील सहभागार्थींनी व्यक्त केल्या.

पुणे,दि. १४: विभागातील सर्वसामान्य जनतेच्या तक्रारी, अडचणी यांची शासकीय यंत्रणेकडून न्याय्य पद्धतीने व तत्परतेने सोडवणूक करण्यासाठी दर महिन्याच्या दुसऱ्या सोमवारी विभागीय लोकशाही दिनाचे आयोजन करण्यात येत असून अतिरिक्त विभागीय आयुक्त कविता द्विवेदी यांनी आज लोकशाही दिनात दोन प्रकरणांवर सुनावणी घेतली.

यावेळी कोल्हापूर परिक्षेत्राचे पोलीस महासंचालक सुनील फुलारी, अपर आयुक्त तुषार ठोंबरे तसेच विविध विभागांचे विभागस्तरीय अधिकारी उपस्थित होते.

जिल्हास्तरीय लोकशाही दिनात तक्रार निवारण न झालेल्या दोन प्रकरणांवर यावेळी श्रीमती द्विवेदी यांनी अर्जदारांना त्यांचे म्हणणे मांडण्याची संधी दिली आणि सुनावणी घेतली. यात पुणे व सोलापूर जिल्ह्यातील प्रत्येकी एका प्रकरणावर सुनावणी घेण्यात आली. स्वातंत्र्य सैनिक वारस प्रमाणपत्र मिळण्याबाबत व खरेदी खत दस्त करुन मिळणे आदी तक्रारींवर सुनावणी घेण्यात आली.

मुंबई: विधिमंडळाच्या पावसाळी अधिवेशनात आज प्रश्नोत्तर सत्रात वडगावशेरी मतदारसंघाचे आमदार बापूसाहेब पठारे यांनी पुणे महानगरपालिकेतील अपुऱ्या कर्मचारी संख्येचा व त्यातून निर्माण होणाऱ्या समस्यांचा मुद्दा उपस्थित केला.

बापूसाहेब पठारे यांनी सभागृहात बोलताना सांगितले, की “सद्यस्थितीला पुणे महानगरपालिकेचे क्षेत्रफळ सुमारे ५२७ चौरस किमी आहे, तर मुंबई महानगरपालिकेचे क्षेत्रफळ ४३७ चौरस किमी आहे. क्षेत्रफळ मोठे असूनही पुणे महापालिकेत फक्त ८ हजार कर्मचारी कार्यरत आहेत, तर मुंबई महापालिकेत तब्बल २८ हजार कर्मचारी आहेत.”

पुढे बोलताना ते म्हणाले, “ठेकेदारांकडून पुरवल्या जाणाऱ्या कर्मचाऱ्यांपैकी सुमारे २५ टक्के कर्मचारी रोज गैरहजर असतात. त्यामुळे पुणे शहरातील स्वच्छता व्यवस्थेवर थेट परिणाम होत असून नागरिकांचे दैनंदिन जीवन विस्कळीत होत आहे.”

“या एकूण परिस्थितीला जबाबदार कोण?” असा थेट सवालही पठारे यांनी सभागृहात उपस्थित केला. प्रश्नाला उत्तर देताना राज्यमंत्री श्रीमती माधुरीताई मिसाळ यांनी पुणे महानगरपालिका व तेथील प्रशासकीय अधिकाऱ्यांना जबाबदार ठरवले आहे.

बापूसाहेब पठारे यांनी यासंदर्भात पुणे महानगरपालिका प्रशासनाने गांभीर्याने विचार करून उपाययोजना कराव्यात, अशी अपेक्षा व्यक्त केली. तसेच, वाढत्या नागरी गरजांसाठी पुरेशी मनुष्यबळ व्यवस्था करणे अत्यावश्यक असल्याचेही त्यांनी अधोरेखित केले.