पुणे : शहराच्या पश्चिम भागातील औंध, बालेवाडी व खडकी या रहिवासी आणि व्यावसायिकदृष्ट्या महत्त्वाच्या परिसरांमध्ये गेल्या काही दिवसांत भरदिवसा होणाऱ्या चोरीच्या घटनांमध्ये चिंताजनक प्रमाणात वाढ झाली आहे. रस्त्यांवरून जाणाऱ्या नागरिकांच्या दागिन्यांची उघडपणे चोरी, घरे व व्यावसायिक स्थळांवर धाडसी चोऱ्या यामुळे नागरिकांमध्ये असुरक्षिततेची भावना बळावत आहे. या घटनांना आळा घालावा आणि दोषींवर तत्काल कारवाई करण्याची मागणी माजी नगरसेवक सनी विनायक निम्हण यांनी पोलिस आयुक्त अमितेश कुमार यांच्याकडे निवेदनाद्वारे केली आहे.

या निवेदनात सनी निम्हण यांनी म्हटले आहे की,  चोरी आणि लुटीच्या घटनांमुळे या परिसरातील नागरिकांमध्ये भीतीचे आणि अस्वस्थतेचे वातावरण निर्माण झाले असून, पोलीस यंत्रणेबाबतचा विश्वास डळमळीत होत चालला आहे. सार्वजनिक सुरक्षितता व कायदा-सुव्यवस्थेच्या दृष्टीने ही परिस्थिती अत्यंत गंभीर आहे.

या उपाययोजना करण्याची मागणी

१. संवेदनशील ठिकाणी पोलीस गस्त व बंदोबस्तात वाढ करावी, विशेषतः चोरी होणाऱ्या भागांमध्ये दिवसाच्या वेळेतही नियमित पोलीस गस्तीस प्राधान्य द्यावे.

२. सीसीटीव्ही यंत्रणेची स्थिती तपासून निकृष्ट वा बंद अवस्थेतील उपकरणे दुरुस्त अथवा बदलण्यात यावीत, सार्वजनिक ठिकाणांवरील देखरेखीच्या व्यवस्थेचा कार्यक्षम वापर सुनिश्चित करावा.

३. स्थानीय रहिवाशांशी समन्वय साधण्यासाठी ‘मोहल्ला कमिटी’ व ‘बीट पोलिसिंग’ उपक्रम अधिक सक्रिय व प्रभावीपणे राबवावे, नागरिकांच्या सहभागातून स्थानिक पातळीवर गुन्हेगारी रोखण्यासाठी कृती आराखडा तयार करावा.

४. चोरीच्या घटनांची सखोल तपासणी करून दोषींवर कठोर व त्वरित कायदेशीर कारवाई करण्यात यावी, अशा प्रकारे झालेल्या घटनांचे लवकरात लवकर उकल होणे आवश्यक आहे.

५. नागरिकांमध्ये विश्वास निर्माण करण्यासाठी नियमित संवाद बैठकांचे आयोजन करावे, पोलिसांनी समुदायाशी थेट संवाद साधल्यास भीती दूर होऊन जनतेचा सहभाग वाढेल.

वरील गोष्टींची तात्काळ अंमलबजावणी केल्यास परिसरातील कायदा व सुव्यवस्था पुन्हा प्रस्थापित होईल आणि नागरिकांचा पोलीस प्रशासनावरचा विश्वास पुनः दृढ होईल, अशी आम्हांस खात्री वाटते. आपल्याकडून लवकरात लवकर योग्य ती कार्यवाही करण्यात येईल, अशी अपेक्षा सनी विनायक निम्हण यांनी व्यक्त केली आहे.

मुंबई/पुणे (दि १५) : कात्रज येथील प्रसिद्ध राजीव गांधी प्राणी संग्रहालयात मागील मागील चार ते पाच दिवसांत तब्बल १४ हरणांचा मृत्यू झाल्याची धक्कादायक घटना उघडकीस आली आहे. या प्रकारामुळे वन्यजीवप्रेमींमध्ये चिंतेचे वातावरण पसरले आहे. विषाणूजन्य आजाराने हरणांचा मृत्यू झाल्याची शक्यता वर्तवली जात आहे. आमदार हेमंत रासने यांनी हरणांच्या मृत्यूचा मुद्दा विधानसभेत मांडत प्रशासनाने इतर प्राण्यांना धोका होऊ नये, यासाठी योग्य उपाययोजना करण्याची मागणी केली आहे.

“कात्रज येथील राजीव गांधी प्राणीसंग्रहालय गेली दोन दिवसात 14 हरणांचा अचानक मृत्यू झाला असून अद्याप पोस्टमार्टम रिपोर्ट आलेला नाही. साथीच्या रोगामुळे असे झाल्याची शक्यता आहे, त्यामुळे इतर प्राण्यांना त्याचा काही प्रादुर्भाव होऊ नये, यासाठी तातडीने शासनाने योग्य उपाययोजना करण्याचे निर्देश द्यावेत” अशी मागणी रासने यांनी केली आहे..

याबद्दल बोलताना हेमंत रासने म्हणाले, “कात्रजच्या राजीव गांधी प्राणीसंग्रहालयात १४ हरणांचा मृत्यू ही अतिशय दुर्दैवी व धक्कादायक घटना आहे. या घटनेमुळे वन्यजीवांच्या सुरक्षेचा निर्माण झाला आहे. अद्याप पोस्टमार्टम अहवाल न आलेला असला, तरी साथीच्या रोगाची शक्यता नाकारता येत नाही. त्यामुळे इतर प्राण्यांना धोका होऊ नये, यासाठी तातडीने प्रतिबंधात्मक उपाययोजना करण्यात याव्यात. प्रशासनाने दक्षता घ्यावी. प्राणीसंग्रहाल पुणे शहरासह राज्यातील पर्यटकांच्या आकर्षणाचे ठिकाण असल्याने प्राण्यांची सुरक्षितता महत्वाची आहे.

पुणे- राष्ट्रवादी काँग्रेस पार्टीचे राष्ट्रीय अध्यक्ष, उपमुख्यमंत्री तथा पालकमंत्री अजित पवार यांच्या वाढदिवसाचे औचित्य साधत राष्ट्रवादी काँग्रेस पार्टी, कोथरूड विधानसभा मतदारसंघाच्या वतीने ‘शासन आपल्या दारी’ या उपक्रमाचे गोकुळ सभागृह, सुतारदरा,कोथरूड येथे आयोजन केले होते . माजी उपमहापौर दीपक मानकर यांच्या प्रमुख उपस्थितीत हा कार्यक्रम संपन्न झाला.विविध शासकीय सोयी सुविधांची माहिती आणि त्यासाठी लागणारी कागदपत्रे कशी उपलब्ध करवून घ्यावीत याची माहिती देत त्याबाबत प्रत्यक्षात कागदपत्रे आणि सुविधा मिळवून देण्यासाठी कार्यकर्त्यांनी नागरिकांना विनामुल्य मदत केली .
या उपक्रमा अंतर्गत विविध शासकीय योजनांचा लाभ कोथरूड भागातील सुतारदरा,जयभवानी नगर, किष्किंधानगर, शिवतीर्थनगर, म्हातोबा नगर येथील सुमारे ७०० पेक्षा जास्त नागरिकांना करून देण्यात आला. त्यामध्ये आधारकार्ड दुरुस्ती करणे, रेशनकार्ड दुरुस्ती करणे, ज्येष्ठ नागरिक कार्ड, शहरी गरीब कार्ड, उत्पन्न दाखला, जातीचा दाखला, नॉन क्रिमिलेयर दाखला ही शासकीय कागदपत्रे तसेच राज्य सरकारच्या तरुण,तरुणी, महिलांसाठीच्या विविध योजना यांची माहिती देऊन पूर्तता करण्यात आली.
सदर लोकाभिमुख उपक्रमाचे कोथरूड विधानसभा मतदारसंघ अध्यक्ष हर्षवर्धन मानकर, सौ. तृप्ती शिंदे, सौ. कांता खिलारे यांनी अतिशय नियोजनबद्ध आयोजन केले होते.

बाजारपेठेतील अस्थिरतेने बदलली धोरणे

पुणे, १४ जुलै: इक्विटी मार्केटमधील अस्थिरतेच्या पार्श्वभूमीवर, आर्बिट्रेज फंड्स हे कमी जोखमीच्या गुंतवणूक संधींच्या शोधात असणाऱ्यांसाठी एक आकर्षक पर्याय ठरत आहेत. कॅश आणि फ्युचर मार्केट्समधील किमतींमधील फरकांचा लाभ घेत हे फंड्स उतारचढावांच्या परिस्थितीत अधिक चांगली कामगिरी करतात आणि इंट्रा-मंथ ट्रेडिंग संधींमध्ये फंड मॅनेजर्सना अधिक जास्त वाव देतात.

टाटा ऍसेट मॅनेजमेंटचे फंड मॅनेजर श्री शैलेश जैन म्हणाले, “सध्याच्या परिस्थितीत बाजारपेठेतील अस्थिरतेचे संभाव्य लाभ घेत असतानाच गुंतवणूकदारांना थेट इक्विटी जोखमीपासून वाचवण्यासाठी आर्बिट्रेज फंड्स अतिशय योग्य आहेत. उत्पन्नाचे पारंपरिक मार्ग कमी आकर्षक बनलेले असताना देखील एलिव्हेटेड रोल स्प्रेड आणि सततची अस्थिरता यामुळे आर्बिट्रेज  फंड्स वाजवी परतावा देण्यास सक्षम आहेत. इक्विटी टॅक्स रिटर्न शोधणाऱ्या गुंतवणूकदारांसाठी आर्बिट्रेज फंड एक योग्य प्रस्ताव प्रस्तुत करतात.”

असोसिएशन ऑफ म्युच्युअल फंड्स इन इंडियाच्या माहितीनुसार, एप्रिल ते जून २०२५ दरम्यान आर्बिट्रेज फंड्समध्ये ४३,०७७ कोटी रुपयांची गुंतवणूक करण्यात आली, इतर हायब्रीड आणि इक्विटी विभागांमधील गुंतवणुकीपेक्षा ही गुंतवणूक जास्त होती. अनिश्चितता खूप जास्त वाढलेली असताना, इक्विटी जोखीम कमीत कमी ठेवून तुलनेने जास्त चांगला परतावा देऊ शकतील अशा साधनांकडे गुंतवणूकदार वळत असल्याचे या वाढीतून दिसून येते. पण नफा होईलच याची हमी नाही.

उद्योगक्षेत्रातील व्यापक ट्रेंड्सना अनुसरून टाटा आर्बिट्रेज फंडमध्ये देखील एप्रिल ते जून २०२५ या काळात ५,२१७ कोटी रुपयांची गुंतवणूक करण्यात आली, त्यापैकी ३५६ कोटी रुपये पुण्यातून गुंतवले गेले होते. ३० जून २०२५ रोजी या फंडमध्ये व्यवस्थापनांतर्गत संपत्ती १४,२७४ कोटी रुपये होती. 

वातावरण आर्बिट्रेज धोरणांसाठी अनुकूल आहे कारण वाढलेली अस्थिरता आणि मजबूत रोल स्प्रेड्स यांनी संभाव्य परतावा संधी खुल्या केल्या आहेत. रिझर्व्ह बँक ऑफ इंडियाच्या हल्लीच्या शिथिलीकरणाच्या उपायांमुळे – रेपो रेट ५० बेसिस पॉईंट्सने आणि कॅश रिझर्व्ह रेशो १०० बेसिस पॉईंट्सने कमी केल्यामुळे – निश्चित उत्पन्न देणाऱ्या पारंपरिक गुंतवणूक मार्गांच्या तुलनेत आर्बिट्रेज फंड्सची आकर्षकता अजून जास्त वाढली आहे. आगामी कॉर्पोरेट उत्पन्न आणि सकारात्मक मान्सून दृष्टिकोन देखील बाजारपेठेतील भावना उत्तेजित करेल अशी अपेक्षा आहे.

जागतिक आणि देशांतर्गत अनिश्चितता बाजारपेठेच्या भविष्यावर परिणाम करत असताना, गुंतवणूकदारांना अडचणीतून बाहेर पडण्यास मदत करण्यासाठी आर्बिट्रेज फंड हा एक पर्याय आहे. व्याजदर घसरत चालले आहेत आणि बचत खात्यातील परतावा कमी होत आहे, त्यामुळे पारंपारिक निश्चित उत्पन्न पर्यायांची आकर्षकता परताव्यासाठी तुलनेने कमी झाली आहे. त्याच वेळी, अपेक्षित भारत–अमेरिका व्यापार करार, टॅरिफ वाटाघाटी आणि सध्या सुरु असलेले भू–राजकीय तणाव यासारखे घटक बाजारातील अस्थिरता वाढवत आहेत. अमेरिकन डॉलर निर्देशांक सध्या जरी कमी असला तरी, जागतिक जोखीम टाळण्यासाठी कोणत्याही वाढीमुळे बाजारात नवीन चढउतार होऊ शकतात. या पार्श्वभूमीवर, आर्बिट्रेज फंड गुंतवणूकदारांना थेट इक्विटी एक्सपोजरशिवाय अस्थिरतेचा फायदा घेण्यासाठी कमी जोखीमचा मार्ग देण्याचा प्रयत्न करतात.

आर्बिट्रेज फंड देखील कर बचत करण्यात सक्षम आहेत, कारण त्यांच्यावर इक्विटी म्युच्युअल फंडाप्रमाणे कर आकारला जातो – ज्यामुळे त्यांना अल्पकालीन कर्ज साधनांवर फायदा मिळतो, विशेषतः जास्त उत्पन्न असलेल्या गुंतवणूकदारांसाठी जे कर भरणा केल्यानंतरचा परतावा ऑप्टिमायझ करू इच्छितात. इक्विटी मार्केट एक्सपोजरमध्ये कमी जोखीम शोधणाऱ्यांसाठी, पारंपारिक बचत पर्यायांच्या तुलनेत अधिक स्पर्धात्मक परताव्याच्या संभाव्यतेसह, आर्बिट्रेज फंड आजच्या अस्थिर वातावरणात संभाव्य गुंतवणूक संधी सादर करतात.

पुणे-मागील ७ तारीख ते १२ जुलै दरम्यानच्या पाच दिवसांत पुण्यातील कात्रज येथील राजीव गांधी प्राणी संग्रहालयातील 15 चितळ प्रकारातील हरणांचा अचानक मृत्यू झाल्याने खळबळ उडाली आहे. या घटनेमुळे प्राणी संग्रहालय प्रशासन आणि पुणे महानगरपालिकाही चक्रावून गेली आहे.प्राथमिक माहितीनुसार, यामागे एखाद्या साथीच्या आजाराची शक्यता वर्तवली जात असली तरी, अद्याप मृत्यूचे नेमके कारण अस्पष्ट आहे. प्राणीसंग्रहालयात एकूण 99 चितळ प्रकारातील हरणे होती, त्यापैकी 15 हरणांचा संशयास्पद मृत्यू झाल्याने प्रशासनाची चिंता वाढली आहे.
मृत हरणांचे शवविच्छेदन (पोस्ट मार्टेम) क्रांतिसिंह नाना पाटील पशुवैद्यकीय केंद्र आणि महाराष्ट्र शासनाच्या पशु रोग तज्ञांनी केले आहे. तसेच, मृत्यूचे नेमके कारण शोधण्यासाठी मृत हरणांचे जैविक नमुने विभागीय वन्यजीव प्रशिक्षण केंद्र नागपूर, बरेली, भोपाळ आणि ओरिसा येथील भुवनेश्वर येथील नामांकित प्रयोगशाळांमध्ये तपासणीसाठी पाठवण्यात आले आहेत. या अहवालांनंतरच मृत्यूचे खरे कारण समोर येण्याची शक्यता आहे.

प्राणीसंग्रहालयाचे पशुवैद्यकीय अधिकारी डॉ. घनश्याम पवार म्हणाले ,’ चार ते पाच दिवसात आमच्याकडील एकूण 15 हरणांचा अचानक मृत्यू झाला आहे. मृत्यू होण्यापूर्वी त्यांच्यामध्ये कोणतीही लक्षणे आढळून आलेली नाहीत. त्यामुळे या घटनांच्या मृत्यूबाबत विविध पातळ्यांवर तपासणी केली जात आहे, शहरातील आणि शहराबाहेरील काही महत्त्वाच्या नामांकित प्रयोगशाळांना जैविक नमुने पाठवण्यात आले आहेत. त्यांचा अहवाल तीन चार दिवसात आम्हाला प्राप्त होईल हा अहवाल प्राप्त झाल्यानंतरच या घटनेमाचे नेमके कारण स्पष्ट होईल.

राजीव गांधी प्राणीसंग्रहालयाचे संचालक राजकुमार जाधव म्हणाले,’ गेले पाच ते सहा दिवसांत आमच्याकडील 16 चितळांचा दुर्दैवी मृत्यू झाला आहे. मृत हरणांचे जैविक नमुने तपासणीसाठी चार महत्त्वाच्या प्रयोगशाळांना पाठवले आहेत. या हरणांच्या मृत्यूमागचे नेमके कारण प्रयोगशाळेचा अहवाल प्राप्त झाल्यानंतरच समोर येईल. मात्र, या हरणांच्या मृत्यूमागे साथीचा आजार आहे का, हे देखील आमच्याकडून तपासले जात आहे.

सावित्रीबाई फुले पुणे विद्यापीठाच्या व्यवस्थापन परिषदेचे सदस्य राजेश पांडे यांचे मत : श्री तुळशीबाग सार्वजनिक गणेशोत्सव मंडळ ट्रस्टतर्फे गरजू विद्यार्थ्यांना शैक्षणिक साहित्याचे वाटप
पुणे : पुण्यातील गणेशोत्सव मंडळांचे नेहमीच कौतुक वाटते, कारण हे मंडळे धार्मिक कार्यक्रमांबरोबरच सामाजिक भान राखून समाजातील प्रत्येक घटकासाठी कार्य करतात. तुळशीबाग मंडळाने गेल्या १२५ वर्षांपासून या सामाजिक कार्याची परंपरा जपली आहे. विद्यार्थ्यांनी समाजाचे ऋण फेडणाऱ्या अशा गणपती मंडळांचा आदर्श समोर ठेवला पाहिजे, असे मत सावित्रीबाई फुले पुणे विद्यापीठाच्या व्यवस्थापन परिषदेचे सदस्य राजेश पांडे यांनी व्यक्त केले.

मानाचा चौथा गणपती श्री तुळशीबाग सार्वजनिक गणेशोत्सव मंडळ ट्रस्टतर्फे शतकोत्तर रौप्य महोत्सवी वर्षानिमित्त गरजू विद्यार्थ्यांना शालेय साहित्याचे किट वाटप करण्यात आले. बाजीराव रस्त्यावरील नुमवी प्रशालेत कार्यक्रमाचे आयोजन करण्यात आले. यावेळी सामाजिक कार्यकर्ते उदय जगताप, मंडळाचे अध्यक्ष विकास पवार, कोषाध्यक्ष नितीन पंडित, उपाध्यक्ष विनायक कदम, शैलेश गुजर, मुख्याध्यापक प्रकाश कांबळे आदी मान्यवर उपस्थित होते. 

कार्यक्रमाच्या आयोजनात चकोर सुबंध, साई डोंगरे, मयूर दिवेकर, प्रतीक इप्ते, तुषार पवार, सागर पेद्दी, अक्षय पुजारे, अनिरुद्ध बारणे यांनी विशेष परीश्रम घेतले. किटमध्ये १२५ दप्तरे, १२५ पाण्याच्या बाटल्या, १२५ कंपास बॉक्स आणि १२५० वह्या मुलांना देण्यात आल्या.

उदय जगताप म्हणाले, विद्यार्थ्यांनी शालेय जीवनातच आपले ध्येय निश्चित करायला हवे. जे आपण पेरतो तेच उगवते, त्यामुळे भविष्यात काय हवे आहे याचा गांभीर्याने विचार करून तशीच वागणूक ठेवावी.

कोषाध्यक्ष नितीन पंडित म्हणाले, अनेक विद्यार्थी केवळ अपुऱ्या शैक्षणिक साहित्यामुळे शिक्षण सोडतात. अशा होतकरू आणि गरजू विद्यार्थ्यांसाठी मंडळातर्फे शैक्षणिक साहित्याचे वाटप करण्यात आले आहे.

पुणे दि. १५ : समाज कल्याण आयुक्तालयामार्फत सन २०२५-२६ या शैक्षणिक वर्षाकरिता शासकीय वसतिगृह प्रवेशप्रकिया https://hmas.mahait.org संकेतस्थळावर ऑनलाईन पद्धतीने होणार असून प्रवेशाबाबत अर्ज स्वीकारण्यासोबतच याद्या अंतिम करण्याबाबतचे वेळापत्रक जाहीर करण्यात आले आहे.

शालेय आणि इयत्ता ११ वी व १२ वी विद्यार्थ्यांनी वसतिगृह प्रवेशासाठी १७ जुलै रोजीपर्यंत अर्ज करावा. २१ जुलै रोजी प्रवेशाबाबतची अंतिम यादी प्रसिद्ध करण्यात येईल. बिगर व्यावसायिक अभ्यासक्रमाच्या विद्यार्थ्यांनी २१ जुलैपर्यंत अर्ज करावा. या विद्यार्थ्यांची २५ जुलै रोजी प्रवेशाबाबत अंतिम यादी प्रसिद्ध करण्यात येईल.

सामाजिक न्याय व विशेष सहाय विभागाअंतर्गत जिल्ह्यात १४ मुलांची व १० मुलींची अशी मागासवर्गीय मुलां-मुलींची २४ शासकीय वसतिगृहे आहेत. पुणे व पिंपरी-चिचवड शहरामध्ये एकूण १२ शासकीय वसतिगृहे असून त्यापैकी मुलांची ८ व मुलींची ४ वसतिगृहे आहेत. तसेच १२ शासकीय वसतिगृहे ही तालुकास्तरावर आहेत. इच्छुक पात्र विद्यार्थ्यांनी शासकीय वसतिगृहामध्ये प्रवेश घेण्याचे आवाहन समाज कल्याणचे सहायक आयुक्त विशाल लोंढे यांनी प्रसिद्धी पत्रकान्वये केले आहे.
0000

पुणे, दि. १५: कृषी विभागाकडून राज्यातील शेतकऱ्यांचे देशाबाहेर अभ्यास दौरे योजना राबविण्यात येत आहे. अभ्यासदौरे आयोजित करण्याकरिता प्रवासी कंपनीची निवड करण्यासाठी ‘जेम’ अर्थात गव्हर्नमेंट ई-मार्केटप्लेस पोर्टलवर निविदा प्रक्रिया प्रसिद्ध करण्यात आली असून २५ जुलै रोजी दुपारी १२ वाजेपर्यंत निविदा सादर कराव्यात, असे आवाहन कृषी विभागामार्फत करण्यात आले आहे.

राज्यातील शेतकऱ्यांना विविध प्रगत देशातील विकसित आणि आधुनिक तंत्रज्ञानाची माहिती होऊन त्यांचे ज्ञान व क्षमता उंचावण्याच्या उद्देशाने ही योजना राबविण्यात येत आहे. शेतमालाची निर्यात, कृषी मालाचे पणन व बाजारपेठेतील मागणी, कृषीमाल प्रक्रिया याबरोबरच त्या देशांमध्ये उपयोगात येत असलेले अद्ययावत तंत्रज्ञान अवगत करून त्याचा वापर राज्यातील शेतकऱ्यांनी त्यांच्या शेतावर, शेतीमध्ये करण्यासाठी साहाय्य करणे यादृष्टीने हे दौरे आयोजित करण्यात येतात. तसेच विविध देशांनी विकसित केलेले शेती तंत्रज्ञान व अनुषंगिक बाबी यांची माहिती त्या देशातील शेतकऱ्यांशी प्रत्यक्ष चर्चा करून मिळणार असून त्या त्या देशातील क्षेत्रीय, संबंधित संस्थांना भेटी या दौऱ्यात देण्यात येणार आहेत.

या योजनेंतर्गत युरोप दौरा १२ दिवस, इस्राईल ९ दिवस, जपान, दक्षिण कोरिया प्रत्येकी १० दिवस, चीन ८ दिवस, तसेच मलेशिया, व्हिएतनाम, फिलीपाईन्स देशासाठी १२ दिवस अभ्यासदौरे असणार आहेत. त्यांच्या आयोजनासाठी प्रवासी कंपनीची निवड करण्यात येणार आहे. या निविदा प्रक्रियेंतर्गत १८ जुलै, २०२५ रोजी निविदापूर्व सभा राजमाता जिजाऊ समिती सभागृह, कृषी आयुक्तालय, दुसरा मजला, मध्यवर्ती इमारत, पुणे येथे आयोजित करण्यात आली आहे, असेही कळविण्यात आले आहे.

पुणे, दि. 15: बदलत्या काळात नागरिकांची होणारी आर्थिक फसवणूक टाळण्याकरिता सायबर कक्षाची मदत घेवून कृती आराखडा तयार करावा, असे निर्देश जिल्हाधिकारी जितेंद्र डुडी यांनी दिले. योजनांचे लाभ देणे, सायबर फसवणुकीबाबत अद्यावत माहिती देऊन जनजागृती करणे आदींसाठी बँकांनी आर्थिक साक्षरता मेळावे आयोजित करावेत, असेही ते म्हणाले.

जिल्हाधिकारी कार्यालयात जिल्हा बँकर्ससमवेत आयोजित आढावा बैठकीत ते बोलत होते. यावेळी भारतीय रिझर्व्ह बँकेचे सहायक महाप्रबंधक भूषण लगाटे, बँक ऑफ महाराष्ट्रचे उपमहाप्रबंधक रामचंद्र रागिरी, पुणे जिल्हा मध्यवर्ती सहकारी बँकेचे व्यवस्थापकीय संचालक व मुख्य कार्यकारी अधिकारी अनिरुद्ध देसाई, जिल्हा उद्योग केंद्राच्या महाव्यवस्थापक अर्चना कोठारी, जिल्हा अग्रणी बँक व्यवस्थापक योगेश पाटील यांच्यासह सर्व संबंधित विभागाचे अधिकारी, बँकांचे प्रतिनिधी उपस्थितीत होते.

जिल्हाधिकारी श्री. डूडी म्हणाले, जिल्ह्यात केंद्र सरकार व राज्य शासनाच्यावतीने प्रधानमंत्री रोजगार निर्मिती कार्यक्रम, मुख्यमंत्री रोजगार निर्मिती कार्यक्रम, पीएम विश्वकर्मा योजना आदी महत्त्वाकांक्षी योजना राबविण्यात येत आहेत. या योजनांच्या माध्यमातून रोजगार निर्मिती, स्वयंरोजगार, कौशल्य विकासाच्या अनुषंगाने बँकेकडे कर्जमागणीबाबत प्रलंबित प्रकरणांचा विचार करता ती वेळेत मंजूर करण्याची कार्यवाही करावी. एकही पात्र लाभार्थी योजनेच्या लाभापासून वंचित राहणार नाही याची याकडे लक्ष द्यावे, असेही ते म्हणाले.

जिल्हाधिकाऱ्यांनी पुढे सूचना दिल्या, केंद्र शासनाच्या, राज्य सरकारच्या योजना तसेच विविध महामंडळामार्फत राबविण्यात येणाऱ्या योजनांबाबत लाभार्थ्यांपर्यंत माहिती पोहोचवावी. याकरिता जिल्ह्यातील सर्व बँक, शाखा व्यवस्थापकांकरिता येत्या 5 ऑगस्ट रोजी कार्यशाळा आयोजित करावी. योजनांसाठी जिल्ह्याकरिता दिलेले उद्दिष्ट सर्व बँकांनी डिसेंबर अखेर पूर्ण करण्याची दक्षता घ्यावी. तसेच पात्र लाभार्थ्यांना लाभ मिळेपर्यंत पाठपुरावा करावा.

बँकेकरिता आवश्यक असलेल्या जागेबाबत प्रस्ताव सादर केल्यास त्यांना जागा उपलब्ध करुन देण्यात येईल. कर्जपुरवठ्याकरिता उमेद अभियानाच्या धर्तीवर प्रणाली विकसित करण्याबाबत विचार करावा, असेही श्री. डुडी म्हणाले.

श्री. लगाटे म्हणाले, जनसुरक्षा मोहिमेअंतर्गत जनधन योजना, प्रधानमंत्री जीवन ज्योती विमा योजना, प्रधानमंत्री सुरक्षा विमा योजना, अटन पेन्शन योजना या योजनेत अद्यापही सहभागी न झालेल्या नागरिकांना समाविष्ट करुन घेणे आणि गाव पातळीवर १०० टक्के सामाजिक सुरक्षितता प्रदान करण्याचा उद्देश आहे. या मोहिमेंतर्गत सर्व बँकांनी सक्रीय सहभाग घेऊन नागरिकांना सहभागी करुन घेण्याची कार्यवाह करावी, असेही ते म्हणाले.

सन २०२४-२५ च्या जिल्हा पतपुरवठा उदिष्टच्या अनुषंगाने ३ लाख ५३ हजार ५२४ कोटी रुपये कर्ज वाटप करून बँकांनी वार्षिक पत पुरवठ्याचे ११७ टक्के लक्ष्य गाठले आहे. यामध्ये प्रामुख्याने ६ हजार ३७० कोटी रुपयांच्या पीक कर्ज उदिष्टाच्या तुलनेत ७ हजार ९२० कोटी पीक कर्ज (किसान क्रेडिट कार्ड) वाटप केले. तसेच लघू, सुक्ष्म व मध्यम उद्योगांसाठी एकूण ५२ हजार कोटी रुपयाचे उदिष्ट देण्यात आले होते. तथापि, ६१ हजार ८८५ कोटी रुपयांचे कर्ज वाटप करून ११९ टक्के लक्ष्य गाठले.

सन २०२५-२६ या वर्षाकरिता ३ लाख ६२ हजार २०० कोटी रुपयांचे उद्दिष्ट निश्चित करण्यात आले असून यामध्ये ७ हजार ३०० कोटी रुपये पीक कर्ज तर लघू, सुक्ष्म व मध्यम उद्योगांसाठी ६५ हजार २०० कोटी रुपयांचा समावेश आहे. यावेळी २०२५-२६ वार्षिक पत पुरवठा पुस्तिकेचे प्रकाशनही जिल्हाधिकारी श्री. डूडी यांच्या हस्ते करण्यात आले.

बैठकीच्या अनुषंगाने संगणकीय सादरीकरणाद्वारे श्री. पाटील यांनी माहिती दिली.

गुरुपौर्णिमेनिमित्त कलांगण, मुंबईतर्फे अनोखे सादरीकरण

पुणे : संगीत कलानिधी मास्टर कृष्णराव म्हणजे संगीत क्षेत्रातील ऋषितुल्य व्यक्तिमत्त्व. मास्टर कृष्णराव यांनी संगीतबद्ध केलेली वेगवेगळ्या धाटणीची गीते सादर करून त्यांना गुरुपौर्णिमेच्यानिमित्ताने आदरांजली वाहण्यात आली. ७ वर्षापासून ते २५ वर्षापर्यंतच्या विद्यार्थ्यांनी गायन, वादन, निवेदनाची बाजू सांभाळत कल्पकता आणि कलात्मकतेची चुणूक दर्शविली.
कलांगण, मुंबई संस्थेच्या संस्थापिका वर्षा भावे यांच्या संकल्पनेतून आणि दिग्दर्शनातून शनिपार येथील भारत गायन समाज येथे या अनोख्या कार्यक्रमाचे आयोजन करण्यात आले होते.
शास्त्रीय संगीत, भारूड, गवळण, अभंग, भक्तिगीते, नाट्यगीतांसह चित्रपटगीते अशा विविध गीत प्रकारांना मास्टर कृष्णराव यांनी दिलेल्या चाली आजही स्मरणात राहणाऱ्या आहेत. गुरुपौर्णिमेच्यानिमित्ताने गुरूंना वंदन करण्याच्या उद्देशाने मास्टर कृष्णराव यांच्या गीतांचा कार्यक्रम आयोजित करण्यात आला होता.
‘बात कान सुनिये जी’, ‘किस्न्याची माया लय भारी’, ‘असा नेसून शालू हिरवा’, ‘क्षण आला सौख्याचा’, ‘काका अप्पा शूर शिपाई’ यासारखी वैविध्यपूर्ण धाटणीची गीते विद्यार्थ्यांनी सादर केली. ‘लख लख चंदेरी तेजाची न्यारी दुनिया’ या अजरामर गीताने झालेली सांगता हा क्षण कार्यक्रमाचा कळसाध्याय ठरला.
श्रीरंग जोशी, सानिका फडके, जुई देशपांडे, विभा हरिश्चंद्रकर, तनय नाझिरकर, भार्गव वैद्य, इवा जोशी यांनी गीते सादर केली. अन्वी पाटणकर (संवादिनी), सिद्धी देशपांडे, इरा परांजपे (व्हायोलिन), ऋषभ गोडबोले (की-बोर्ड), अभय ओक (बासरी), आदित्य केळकर, वेदांग जोशी (तबला), मानस कांबळे (तालवाद्य) यांनी समर्पक साथसंगत केली. तर आद्या दामले आणि वर्षा भावे यांनी कार्यक्रमाचे निवेदन केले.
मास्टर कृष्णराव या ऋषितुल्य व्यक्तिमत्वाला आदरांजली वाहताना लहान मुलांनी समजून-उमजून केलेले सादरीकरण कौतुकास्पद ठरले. मास्टर कृष्णराव यांनी संगीतबद्ध केलेली सुमधुर पदे सादर करत बालकलाकरांनी कार्यक्रम वेगळ्या उंचीवर नेत सादरीकरणाचे शिवधनुष्य पेलले.
लहान वयापासूनच मुलांना संगीत, वाद्य याची गोडी लागावी यासाठी कलांगण संस्था काम करीत असल्याचे संस्थेच्या संचालिका वर्षा भावे यांनी रसिकांशी संवाद साधताना सांगितले. मास्टर कृष्णराव यांनी आपल्या संगीत कारकिर्दीची सुरुवात केलेल्या पुण्यात पहिल्यांदाच कार्यक्रमाचे सादरीकरण करता आले, याचे समाधान असल्याचेही त्या म्हणाल्या.