पुणे-राज्यातील जिल्हा परिषदा आणि पंचायत समित्यांच्या सार्वत्रिक निवडणुकीसाठी गण, गट रचनेचे प्रारूप जाहीर झाल्याने जिल्हा परिषद आणि पंचायत समित्यांच्या निवडणुकीच्या मोर्चे बांधणीला खऱ्या अर्थाने सुरुवात होत आहे. या पार्श्वभूमीवर आज पुणे जिल्ह्यातील सर्व जिल्हा परिषद व पंचायत समितीच्या, पालिकांच्या निवडणुका स्वतंत्रपणे लढवणार असल्याची घोषणा आम आदमी पार्टीचे राज्य प्रवक्ते मुकुंद किर्दत यांनी पुण्यात पत्रकार परिषदेत केली. पुणे ग्रामीण जिल्हाध्यक्ष दत्तात्रय कड ,वैभव टेमकर तसेच शिवाजी कोलते, सुनील सवदी ,सुभाष करांडे आदी उपस्थित होते.

यावेळी आप चे प्रदेश प्रवक्ते मुकुंद किर्दत म्हणाले,पुणे जिल्ह्यात 73 गट आणि 146 गण निश्चित केलेले आहेत. या सर्व जागांवरती आम आदमी पार्टी स्वतंत्रपणे लढणार असून त्यासाठी उमेदवार निश्चिती प्रक्रिया सुरू करणार असल्याचे आज सांगण्यात आले. या जिल्ह्यात अनेक वर्षे केवळ सतरंज्या उचलणारे परंतु प्रामाणिक आणि कष्टाळू राजकीय कार्यकर्ते आहेत. नवीन पर्याय देत असताना केवळ प्रस्थापित घराणेशाहीमुळे अनेक वर्षे कुठलीही निवडणूक लढवू न शकणाऱ्या अनेक प्रामाणिक राजकीय कार्यकर्त्यांना ही संधी असेल. सहकारी संस्थांच्या आर्थिक नाड्या हातात ठेवून राजकारण करणाऱ्या, केवळ सत्तेसाठी पक्ष बदलत राहणाऱ्या प्रस्थापित नेत्यांना आम आदमी पार्टीच्या पुणे जिल्ह्यातील प्रवेशामुळे धक्का बसू शकतो. पंजाब , दिल्ली प्रमाणे सामान्य माणसाचा विकास, शिक्षण, आरोगी सुविधा, हाताला काम, योग्य दाम, भ्रष्टाचाराची पोलखोल हा निवडणूक प्रचाराचा केंद्रबिंदू असेल असे मुकुंद किर्दत यांनी संगितले.

ग्रामीण भागात शेतकऱ्यांच्या शेतीमालाला आज दहा वर्षांपूर्वीचा भाव सुद्धा मिळत नाही. त्यातच दूध उत्पादक शेतकरी व इतर संलग्न व्यवसाय सुद्धा अडचणीत आहेत. जिल्ह्यात सरकारी शाळांचा दर्जा सुमार आहे आणि आरोग्य व्यवस्था पूर्णपणे सलाईनवर आहे. पुणे जिल्हा सोयीप्रमाणे निष्ठा बदलणार्‍या भ्रष्टाचारी नेत्यांमुळे काही तालुके अविकसित मागास ठरतील अशी स्थिति आहे. व्यवस्था बदलण्याचा प्रयत्न आम आदमी पार्टी करेल असे पुणे जिल्हा (पूर्व,दक्षिण) अध्यक्ष दत्तात्रय कड यांनी सांगितले.

स्मार्टमीटरला विरोध , विस्थापित पीडितांना न्याय, आदिवासींना मूलभूत सुविधा यावर जुन्नर, आंबेगाव, मावळ भागात पक्ष काम करीत आहे. ग्रामीण भागामध्ये पक्षाची धुरा सांभाळणाऱ्या चारित्र्यवान कार्यकर्त्यांना या निवडणुका मार्गे प्रथमच संधी दिली जाईल. त्याचबरोबर सामाजिक प्रश्नाची जाण असणारे नवीन तरुण चेहरे देण्याचा पक्ष प्रयत्न करेल. राजकारण हा पैसे कमवण्याचा व्यवसाय नसून सामाजिक काम आणि बदल घडवण्याचे माध्यम आहे असा विचार करणाऱ्या युवकांना पक्षांमध्ये सामील होण्याचे आवाहन यावेळी करण्यात आले तसेच लोकांच्या देणगी मधून ही निवडणूक लढवणार असल्याची माहिती पुणे जिल्हा ( पश्चिम,उत्तर) अध्यक्ष वैभव टेमकर यांनी दिली.

पुणे- विमानतळ परिसरात कचऱ्याची ११ ठिकाणे हटवण्याचे आदेश देत केंद्रीय मंत्री मुरलीधर मोहोळ यांनी विमानतळाच्या सुरक्षा हद्दीत प्राणी , पक्षांचा वावर थांबवून विमान सुरक्षेसाठी विविध सूचना आज महापालिका अधिकाऱ्यांना केल्या.

पुणे आंतरराष्ट्रीय विमानतळाच्या विविध विषयांसंदर्भात आज पुणे महापालिकेत एक महत्त्वाची बैठक घेत केंद्रीय मंत्री मुरलीधर मोहोळ यांनी अधिकाऱ्यांना विविध निर्देश दिले.या बैठकीस महापालिका आयुक्त श्री. नवल किशोर राम, विमानतळ संचालक श्री. संतोष डोके आणि विमानतळ प्राधिकरणाचे अधिकारी, भारतीय वायुदलाचे अधिकारी, वाहतूक पोलीस उपायुक्त श्री. हिम्मत जाधव, वन विभागाचे अधिकारी आणि विविध सामाजिक संघटनांचे प्रतिनिधी उपस्थित होते.

गेल्या काही दिवसांपासून विमानतळाच्या धावपट्टीवर बिबट्याचा वावर, पक्षांची वाढलेली रेलचेल आणि विमानतळ परिसरातील वाहतूक प्रश्न असे विविध विषय प्रामुख्याने समोर आले होते. या सर्व विषयांवर तोडगा काढण्यासाठी पुणे महापालिका आयुक्त, विमानतळाच्या विविध विभागांचे अधिकारी, हवाई दलाचे अधिकारी, पोलीस अधिकारी आणि वन विभागाचे अधिकारी यांच्या समवेत बैठकीत वरील सर्व विषय सोडवण्यासाठी त्यांनी सूचित केले. विमानतळ परिसरात काही दिवसांपूर्वी बिबट्याचा वावर आढळल्याने परिसरात पिंजरे जाळ्या लावण्यात आले असून बिबट्या ज्या ठिकाणाहून परिसरात प्रवेश करतो किंवा लपून बसतो, त्या ठिकाणी प्रतिबंध लावण्याच्या सूचना त्यांनी दिल्या . शिवाय विमानतळ परिसरात कचऱ्याचे विविध ११ ठिकाणे निदर्शनास आले असून त्या ठिकाणची स्वच्छता करून पक्षांचा वावर थांबवण्याचा प्रयत्न आहे. कोणत्याही परिस्थितीत प्राणी आणि पक्षांसाठी विमानतळ परिसरात खाद्य उपलब्ध होणार नाही, याची खबरदारी घेण्याचे निर्देशही दिले आहेत. महत्वाची बाब म्हणजे परिसरात होणारे वाहतूक कोंडी टाळण्यासाठी वाहतूक पोलिसांना विशेष खबरदारी आणि कृती आराखडा करण्याचेही सूचित केले असून त्यावर तातडीने अंमलबजावणी करण्याचा प्रयत्न आहे. विमानांच्या ये-जा करण्यासाठी कोणती अडचण येऊ नये, यासाठी सर्वतोपरी खबरदारी घेतली जात असून विमानांच्या सुरक्षेला आमचे सर्वोच्च प्राधान्य आहे आणि त्या दृष्टीने उपस्थित सर्व अधिकाऱ्यांना निर्देश देऊन, त्या दृष्टीने तातडीने कार्यवाही करण्याचे आदेश मोहोळ यांनी दिले आहेत.

पुणे- कॉंग्रेस प्रवक्ते गोपाळदादा तिवारी यांच्या नंतर आता भाजपचे शहर अध्यक्ष धीरज घाटे यांनी देखील ढोल ताशा पथकांना महानगरपालिकेने सरावासाठी जागा उपलब्ध करून द्यावी अशी मागणी आज महापालिकेकडे केली आहे.

महाराष्ट्राचे सांस्कृतिक वैभव असलेला आणि सव्वाशे वर्षांची परंपरा लाभलेल्या पुण्यातील सार्वजनिक गणेशोत्सवामध्ये ढोल-ताशा पथके लयबद्ध पद्धतीने वाद्यवादन करून आपली सेवा गणरायाच्या चरणी रुजू करतात. पुण्यातील विविध ढोल-ताशा पथकांमधील वाद्यवादन उत्सवप्रेमी नागरिकांना मनापासून आवडते. या पथकांसाठी गणेशोत्सवापूर्वीचा सराव हा फार महत्त्वाचा असतो. आज पुण्यातील मध्यभागामध्ये अनेक ढोल-ताशा पथकांना सरावासाठी आवश्यक मैदाने उपलब्ध नाहीत. या पार्श्वभूमीवर बुधवारी सकाळी भारतीय जनता पार्टीचे पुणे शहराध्यक्ष धीरज घाटे यांच्या नेतृत्वाखाली शिष्टमंडळाने महापालिकेचे आयुक्त श्री. नवलकिशोर राम यांची भेट घेतली.
पुण्याच्या मध्य भागातील महापालिकेच्या ताब्यात असलेली मैदाने तात्पुरत्या स्वरुपात ढोल-ताशा पथकांना उपलब्ध करून द्यावीत, अशी मागणी करणारे पत्र आयुक्तांना देण्यात आले. गणेशोत्सवाला आता राज्य महोत्सवाचा दर्जा मिळालेला आहे. असे असताना पारंपरिक ढोल-ताशा पथकांना सरावासाठी मैदाने उपलब्ध झाली पाहिजेत. सरावामुळेच ही पथके गणेशोत्सवात तालबद्ध पद्धतीने वादन करू शकतात. विविध पथकांना सध्या सराव कुठे करायचा, हा प्रश्न भेडसावतो आहे. त्यामुळे महापालिकेची मैदाने पथकांना तात्पुरत्या स्वरुपात उपलब्ध करून देण्याची मागणी करण्यात आली.
विविध सण आणि उत्सव मोठ्या उत्साहात साजरे करण्यासाठी राज्यातील भाजपा-महायुतीचे सरकार कायमच पुढाकार घेते. त्यात यंदापासून गणेशोत्सव हा राज्य महोत्सव म्हणून साजरा करण्याचा निर्णयही घेण्यात आला आहे. असे असताना ढोल-ताशा पथकांना सरावासाठी मैदाने उपलब्ध झाली पाहिजेत, अशीच आमची भूमिका आहे.
महापालिका आयुक्तांनी या प्रकरणात सकारात्मक भूमिका घेतली असून, महापालिकेच्या ताब्यातील मैदाने सराव पथकांना देण्यात यावीत, अशा सूचना पालिकेच्या मालमत्ता विभाग आणि क्रीडा विभागाला दिल्या आहेत. यामुळे यंदाच्या गणेशोत्सवही जल्लोषात साजरा होईल.
शहराध्यक्ष धीरज घाटे यांच्या समवेत माजी नगरसेवक अजय खेडेकर, बापू मानकर, रवींद्र साळेगावकर, पुनीत जोशी,सुनील पांडे, राजू परदेशी तसेच ढोल ताशा महासंघाचे ऍड अनिश पाडेकर व केतन देशपांडे उपस्थित होते.

मुंबई: विधिमंडळाच्या पावसाळी अधिवेशनातील अर्धा तास चर्चा सत्रात काल (ता. १५) आमदार बापूसाहेब पठारे यांनी पुणे शहरातील शाळा सुरक्षा व स्वच्छतेच्या गंभीर प्रश्नांकडे लक्ष वेधले.

“पुणे शहरात हजारो शाळा आहेत. मात्र आकडेवारीनुसार केवळ २००० शाळांमध्येच सीसीटीव्ही कॅमेरे बसवण्यात आले आहेत. उर्वरित १०००-१५०० शाळांमध्ये अद्याप ही सुविधा उपलब्ध नाही. विद्यार्थ्यांच्या सुरक्षेच्या दृष्टीने हे अत्यंत महत्त्वाचे असून अशा शाळांमध्ये तातडीने सीसीटीव्ही बसवण्याचे आदेश सरकार देईल का?” असा थेट सवाल त्यांनी सभागृहात केला.

याचबरोबर पुणे महानगरपालिकेच्या शाळांमधील स्वच्छता व मनुष्यबळाचा प्रश्नही त्यांनी मांडला. ते म्हणाले, “महानगरपालिकेच्या शाळांमध्ये स्वच्छतागृहांची स्वच्छता राखण्यासाठी पुरेसे कर्मचारी नाहीत. परिणामी अस्वच्छतेची गंभीर समस्या निर्माण झाली आहे. तसेच, अनेक शाळांमध्ये शिपायांचीही कमतरता आहे. त्यामुळे या शाळांमध्ये आवश्यक मनुष्यबळ उपलब्ध करून देण्यासाठी तातडीने कार्यवाही केली जाईल का?”

या प्रश्नांवर शालेय शिक्षणमंत्री दादा भुसे यांनी सकारात्मक प्रतिसाद दिला. “ज्या पुणे महानगरपालिकेच्या शाळांमध्ये सीसीटीव्ही बसवलेले नाहीत, त्या शाळांमध्ये ही सुविधा लवकरात लवकर पुरवली जाईल. तसेच, शौचालय स्वच्छतेबाबत आणि मनुष्यबळ पुरवठ्याबाबतही महानगरपालिकेला आवश्यक त्या सूचनाही देण्यात येतील,” असे आश्वासन त्यांनी सभागृहात दिले.

रिंगरोडबाबत महानगर आयुक्त डॉ. योगेश म्हसे यांनी साधला संबंधित शेतकऱ्यांशी संवाद

पिंपरी (दि.१६) : रिंगरोडसाठी लागणाऱ्या भूसंपादन प्रक्रियेसाठी संबंधित शेतकऱ्यांशी संवाद आणि समन्वय ठेवूनच पुढील निर्णय घेण्यात येणार आहे. कुठल्याही शेतकऱ्याचे नुकसान होणार नाही, याची प्रथम प्राधान्याने काळजी घेऊन भूसंपादन प्रक्रिया राबवली जाणार असल्याचे पुणे महानगर प्रदेश विकास प्राधिकरणाचे महानगर आयुक्त डॉ. योगेश म्हसे यांनी स्पष्ट केले. बुधवारी (दि.१६) ग.दि. माडगूळकर सभागृहात प्रस्तावित अंतर्गत ६५ मीटर रुंद रिंगरोडसाठी ज्या शेतकऱ्यांच्या जमिनीचे भूसंपादन करण्यात येणार आहे, त्यांच्याशी संवाद साधताना ते बोलत होते.

शेतकऱ्यांचे हक्क आणि अधिकारांचा प्रथम विचार करून भूसंपादन प्रक्रिया राबवली जाणार आहे. यात शेतकऱ्यांनी भूसंपादनास संमती दिली तर त्यांना २५ टक्के अधिकचा मोबदला शासनाकडून मिळणार असल्याचे यावेळी स्पष्ट करण्यात आले. या रिंगरोडमुळे बहुतांश गावे मुख्य रस्त्यांशी जोडली जाणार असल्याने दळणवळणाच्या अधिक सोयी – सुविधा उपलब्ध होतील. यासह भूसंपादनानंतर शेतकऱ्यांकडे शिल्लक राहणाऱ्या जमिनीचे महत्वदेखील पूर्वीपेक्षा अधिक वाढणार असल्याचे यावेळी भूसंपादन अधिकाऱ्यांनी सांगितले.

थेट खरेदी, संमतीने खरेदी, टीडीआर आणि इन्सेटिव्ह एफएसआय आदीबाबत शेतकऱ्यांना यावेळी सविस्तर मार्गदर्शन करण्यात आले. बैठकीत रिंग रोड टप्पा एक आणि टप्पा दोन यामध्ये बाधित होणाऱ्या शेतकऱ्यांसोबत चर्चा करण्यात आली. यावेळी पीएमआरडीएचे महानगर आयुक्त डॉ. योगेश म्हसे, अतिरिक्त महानगर आयुक्त दीपक सिंगला, मुख्य अभियंता रिनाज पठाण, भूसंपादन समन्वय अधिकारी कल्याण पांढरे, सह आयुक्त हिम्मत खराडे, अधीक्षक अभियंता प्रभाकर वसईकर, भूमिअभिलेख विभागाच्या अधिक्षक आशा जाधव आदी अधिकारी उपस्थित होते.

शेतकऱ्यांच्या शंकांचे निरसन

प्रस्तावित रिंगरोडमुळे बाधित होणाऱ्या शेतकऱ्यांना भूसंपादनाची प्रक्रिया समजावी, या उद्देशाने बुधवारी पीएमआरडीएतर्फे संबंधित शेतकऱ्यांशी संवाद साधत त्यांच्या अडीअडचणी समजून घेत त्यांच्या शंकांचे निरसन करण्यात आले. यासह भूसंपादन प्रक्रिया कशी राबवली जाते, याबाबत सविस्तर माहिती देण्यात आली.

या गावातील शेतकऱ्यांची उपस्थिती
रिंगरोडसाठी भूसंपादन करण्यात येणाऱ्या वडगाव शिंदे, निरगुडी, आंबेगाव खुर्द, जांभळवाडी, भिलारेवाडी, मांगडेवाडी, गुजर निंबाळकरवाडी, येवलेवाडी, पिसोळी, वडाचीवाडी, कदमवाकवस्ती (ता. हवेली), सोळू (ता. खेड) या गावातील बाधित होणाऱ्या शेतकऱ्यांशी संवाद साधण्यात आला.

पुणे दि. 16 : खेड तालुक्यातील बी.सी.ई.बी.सी मुलींचे शासकीय वसतिगृह राजगुरुनगर या वसतिगृहात प्रवेश घेण्याकरिता https://hmas.mahait.org या संकेतस्थळावर अर्ज करुन या संधीचा अधिकाधिक विद्यार्थीनींनी या संधीचा लाभ घ्यावा.
इयत्ता 8 वी व पुढील शिक्षण घेत असलेल्या मागासवर्गीय अनु.जाती, अनु. जमाती, वि.जा.भ.ज. आ.मा.प्रवर्ग, वि.मा. प्रवर्ग, अपंग व अनाथ विद्यार्थीनींनी 17 जुलै तसेच 11 वी व बिगर व्यवसायिक अभ्यासक्रमात शिक्षण घेतलेल्यांनी 23 जुलैपर्यंत अर्ज करावे. या वसतिगृहामध्ये प्रवेश मिळालेल्या विद्यार्थिनींना निवास, भोजन, स्टेशनरी साहित्य, अंथरूण पांघरून व दरमहा खर्चासाठी प्रत्येकी 500 रुपये प्रमाणे निर्वाह भत्ता व स्वच्छता प्रसाधनासाठी प्रत्येकी 100 रुपये देण्यात येतात.
अधिक माहितीसाठी बी.सी.ई.बी.सी. मुलींचे शासकीय वसतिगृह राजगुरुनगर येथे कार्यालयीन वेळेत संपर्क साधावा,असे प्रसिध्दी गृहपाल पी.व्ही. आंबले यांनी पत्रकान्वये कळविण्यात आले आहे.

उपमुख्यमंत्री अजित पवार यांच्या वैद्यकीय तंत्रज्ञान क्षेत्रातील पाठपुराव्याला यश

बारामती, दि. 16: पुण्यश्लोक अहिल्याबाई होळकर शासकीय रुग्णालयात ‘मेडियल पिव्होट’ (Medial Pivot) गुडघ्याचे इम्प्लांट (सांधे) वापरून शहरातील पहिली रोबोटिक कृत्रिम सांधरोपण शस्त्रक्रिया यशस्वीरित्या पार पडली. बारामती येथील वैद्यकीय तंत्रज्ञान क्षेत्रात ही शस्त्रक्रिया गरजू रुग्णांकरिता दिलासा देणारी बाब आहे.

बदलत्या काळात तालुक्यातील रुग्णांना अत्याधूनिक वैद्यकीय तंत्रज्ञानाचा वापर करुन उपचार मिळाले पाहिजे, याकरिता राज्याचे उपमुख्यमंत्री तथा जिल्ह्याचे पालकमंत्री अजित पवार यांचा सतत पाठपुरावा असतो. प्रयोगशील, प्रगतीकडे वाटचाल करणाऱ्या बारामती शहरात अत्याधुनिक वैद्यकीय तंत्रज्ञानाचा वापर करण्याच्या दिशेने हे एक ऐतिहासक, क्रांतीकारी पाऊल आहे. ही शस्त्रक्रिया वैद्यकीय तंत्रज्ञानातील अत्याधुनिक पद्धती स्वीकारण्यासोबतच येथील रुग्णांना उच्चतम-गुणवत्तेच्या वैद्यकीय सोई-सुविधा अधिक सुलभतेने मिळण्यासाठी पर्याय असल्याचे दर्शवून देते.

डॉ. गिरीश भालेराव, ऑर्थोपेडिक जॉइंट रिप्लेसमेंट सर्जन यांच्या मार्गदर्शनाखाली बारामती येथील शासकीय रुग्णालयातील कुशल सर्जिकल पथकाने ही कठीण, जटील अग्रगण्य शस्त्रक्रिया केली. रोबोटिक तंत्रज्ञानाची बिनचूक कार्यप्रणाली वापरून डॉक्टर्सनी बॉयराड मेडीसीस (Biorad Medisys) या कंपनीचा मेडियल पिव्होट ( Medial Pivot) गुडघा प्रत्यारोपित केला. जो गुडघ्याच्या नैसर्गिक हालचालीची नक्कल करून सांधरोपण शस्त्रक्रिया अतिशय सुलभ करण्यासाठी डिझाइन केलेला इम्प्लांट आहे.

शस्त्रक्रियेमध्ये वापरला जाणारा मेडिअल पायवोट हा गुडघ्याचा कृत्रिम सांधा शस्त्रक्रियेनंतर अधिक नैसर्गिक आणि सहज कार्य करण्यासाठी रचना केलेला आहे. त्याची रचना संपूर्ण हालचालीच्या श्रेणीमध्ये गुडघ्याच्या आतील बाजूस एक स्थिर पिव्होट पॉइंट प्रदान करते, ज्यामुळे निरोगी गुडघा नैसर्गिकरित्या हालचाल करतो त्या पद्धतीने बारकाईने प्रतिकृती बनवते. रोबोटिक सहाय्य सर्जनना रिअल-टाइम डेटा आणि इम्प्लांट प्लेसमेंटवर अचूक नियंत्रण प्रदान करून इम्प्लांटची अचूकता आणि टिकाऊपणा आणखी वाढवते. ज्यामुळे वैयक्तिक रुग्णाच्या शरीर रचनेनानुसार सदर इंप्लांट अचूक कार्यरत होते.

डॉ. गिरीश भालेराव, ऑर्थोपेडिक जॉइंट रिप्लेसमेंट सर्जन: ‘बारामतीमधील रुग्णांना पहिल्यांदाच हे प्रगत रोबोटिक तंत्रज्ञान आणि मेडिअल पिव्होट गुडघा असे लाभ देऊ करताना आम्हाला खूप आनंद होत आहे. या बाबींची जोड दिल्यामुळे आम्हाला उच्च पातळीची अचूकता प्राप्त करता येते आणि प्रत्येक व्यक्तीच्या गरजेनुसार गुडघा इंप्लांट तयार करता येते.’

पुणे, दि. 16: जिल्ह्यात समूह पद्धतीने (क्लस्टर) लागवड करण्याचे निश्चित करण्यात आलेल्या पिकांच्या लागवड क्षेत्रात वाढ होण्यासाठी त्या त्या क्षेत्रात मोठ्या स्वरुपाचे प्रशिक्षण आयोजित करावे. संबंधित पिकांसाठी प्रशिक्षित करण्यात आलेल्या मास्टर ट्रेनर्सचे सक्षमीकरण भविष्यात या पिकांच्या क्षेत्रवाढीसाठी उपयुक्त ठरेल, असे प्रतिपादन जिल्हाधिकारी जितेंद्र डूडी यांनी केले.

जिल्हाधिकारी कार्यालयात आयोजित दिशा कृषी उन्नतीची – 2029 अभियान आणि ‘ॲग्री हॅकॅथॉन’ बाबत आढावा बैठकीत ते बोलत होते. यावेळी जिल्हा अधीक्षक कृषी अधिकारी संजय काचोळे, आत्माचे प्रकल्प संचालक सूरज मडके, सर्व तालुक्यांचे तालुका कृषी अधिकारी, विविध शेतकरी उत्पादक कंपन्यांचे प्रतिनिधी, कृषी विज्ञान केंद्रांचे प्रतिनिधी आदी उपस्थित होते.

जिल्हाधिकारी श्री. डूडी म्हणाले, दिशा कृषी उन्नतीची-2029 या पंचवार्षिक अभियानात निश्चित केल्यानुसार फळपिके तसेच इतर पिकांच्या लागवडीचे लक्ष्यांक गाठणे गरजेचे आहे. त्यासाठी नियोजनबद्ध अंमलबजावणी करावी. प्रशिक्षणाद्वारे जनजागृती, अधिकाधिक शेतकऱ्यांना सहभागी करून घेणे, त्या त्या भागात प्रक्रिया उद्योग उभारणे, जेणेकरुन शेतकऱ्यांना त्यांच्या पिकांना बाजारपेठ, योग्य बाजारभाव मिळेल याची खात्री देणे आदी प्रयत्न करावेत.

इंदापूर, बारामती येथे केळी, सूर्यफूल, पुरंदर येथे अंजीर, सिताफळ, जुन्नर येथे आंबा, केळी, स्ट्रॉबेरी पिकांचे प्रशिक्षण आयोजित करावे. प्रशिक्षणासाठी गरजेप्रमाणे पाणी फाउंडेशन, कृषी विज्ञान केंद्रांचा सहभाग घ्यावा. मास्टर ट्रेनर्स हे इतर शेतकऱ्यांना प्रशिक्षित करणार असल्याने मोठ्या प्रमाणात शेतकरी या पिकांच्या लागवडीसाठी पुढे येतील.

प्रक्रिया प्रकल्प तसेच अन्य बाबींसाठी निधी विविध योजनांच्या अभिसरणातून (कन्व्हर्जन्स) मिळण्यासाठी कृषी विभाग आणि शेतकरी उत्पादक कंपन्यांनी प्रयत्न करावेत. तसेच अतिरिक्त निधीची गरज कंपन्यांचे सामाजिक दायित्व (सीएसआर), बँकेमार्फत वित्तपुरवठा तसेच आवश्यकता असल्यास जिल्हा नियोजन समितीतून निधी देऊन पुरविण्यात येईल. प्रकल्पांसाठी दाखल केलेले प्रकल्पांचे कर्ज गतीने मंजूर व्हावे यासाठी बँकांसोबत बैठक लावण्यात येईल, असेही ते म्हणाले.

जागतिक स्तरावर अनेक देशात भव्य कृषी प्रदर्शने आयोजित केले जातात. शेतकरी उत्पादक कंपन्यांनी त्या ठिकाणी जाऊन आपली दालने लावावीत तसेच आपल्या कृषी आधारित उत्पादनांना नवीन बाजारपेठा शोधाव्यात, असेही ते म्हणाले.

जूनमध्ये झालेल्या ॲग्री हॅकॅथॉनमध्ये पुरस्कार देण्यात आलेल्या 16 नाविन्यपूर्ण तंत्रज्ञान, उपक्रम प्रत्यक्षात निर्मिती होऊन बाजारपेठेत विक्रीला येण्याच्या दृष्टीने आर्थिक मदत पुरविण्यासाठी बाँबे चेंबर ऑफ कॉमर्स आदी संस्थांनी पुढाकार घ्यावा. तसेच या स्टार्टअपला आयमॅटसारख्या संस्थांनी तांत्रिक, व्यावसायिक मार्गदर्शनासाठी मार्गदर्शकाची भूमिका बजावावी. हॅकॅथॉनमध्ये प्रदर्शित करण्यात आलेले तंत्रज्ञान कशा प्रकारे शेतापर्यंत जात आहे, त्याचेही संनियंत्रण करावे. पुढील हॅकॅथॉनची तयारी नियोजित वेळेत होईल तसेच त्यात अधिक अचूकता, नवीन बाबी कशा घेता येतील या अनुषंगानेही सूचना कराव्यात आदी सूचना श्री. डुडी यांनी दिल्या.

यावेळी श्री. काचोळे यांनी सादरीकरण करुन क्लस्टर पद्धतीने लागवड करण्यात येणाऱ्या पिकांच्या लागवडीबाबत सुरू असलेल्या कामकाजाची माहिती दिली. श्री. मडके यांनी प्रशिक्षण तसेच शेतकरी अभ्यासदौरे आदींच्या अनुषंगाने माहिती दिली.
0000

पुणे : भागवत महापुराणातील मंगलाचरणाच्या पहिल्या चरणात भक्तिभावाने भगवंतास वंदन करून त्याला समर्पित होण्याचा संदेश दिला आहे. दुसऱ्या चरणात सृष्टीच्या उत्पत्तीपासून ब्रह्मज्ञान, आत्मबुद्धी व दिव्यता या संकल्पनांचे मांडणी करण्यात आली आहे. तर तिसऱ्या चरणात त्रिगुणात्मक सृष्टीचे वर्णन व भगवंताच्या विविध स्तुतींचा समावेश आहे. दशलक्षणांनी समृद्ध असलेले भागवत हे महापुराण म्हणजे वेदांच्या वृक्षाला माधुर्याने आलेले परिपक्व फळ होय. भक्ती, ज्ञान आणि वैराग्य यांचा संगम म्हणजे भागवत महापुराण, असे मत ह.भ.प. प्रणव गोखले यांनी व्यक्त केले.

ग्रंथ पारायण दिंडी, पुणे यांच्या वतीने ‘श्रीमद्भागवताचे समग्र दर्शन’ या प्रवचनाचे आयोजन सदाशिव पेठेतील भावे हायस्कूलच्या प्र. ल. गावडे सभागृहात करण्यात आले होते. यावेळी उपस्थितांना मार्गदर्शन करताना गोखले बोलत होते.  ग्रंथ पारायण दिंडीचे विरेंद्र कुंटे यावेळी उपस्थित होते. प्रवचनामध्ये श्रीनारायण कवचाचे महत्त्व आणि त्याची उपासना यावरही गोखले यांनी विवेचन केले.

प्रणव गोखले म्हणाले, श्रीनारायण कवच हे प्रभावी, भक्तिपर आणि रक्षण करणारे अत्यंत शक्तिशाली स्तोत्र आहे. इंद्राला सत्तेपासून वंचित करण्यात आल्यानंतर त्याने दुर्वास ऋषींचा सल्ला घेऊन हे कवच धारण केले. हे केवळ शाब्दिक स्तोत्र नसून शरीर, मन आणि आत्मा या तीनही स्तरांवर प्रभाव टाकते आणि भक्ताला निर्भय बनवते, असेही त्यांनी सांगितले.

विरेंद्र कुंटे म्हणाले, ग्रंथ पारायण दिंडी, पुणे या संस्थेतर्फे वर्षभर अनेक आध्यात्मिक उपक्रम राबविले जातात. भागवत महापुराण सर्वश्रुत असले तरी त्यामध्ये असलेले बारकावे, महत्त्व व स्तोत्रांचे अध्यात्मिक मूल्य सामान्य जनतेला समजावे यासाठी या प्रवचनाचे आयोजन करण्यात आले. पुढील काळात भागवतातील स्कंदा प्रमाणे अनेक विषयांवर संपूर्ण भागवत निरुपण केले जाणार आहे जसे भागवतातील तत्वज्ञान, इतिहास, भौगोलिक रचना,अशा अनेक अपरिचित विषयांवर निरुपण केले जाणार आहे.