आयसीएआय’च्या वतीने ‘एआय इनोव्हेशन समिट २०२५’

पुणे: “कृत्रिम बुद्धिमतेमुळे (आर्टिफिशियल इंटेलिजन्स-एआय) सर्वच क्षेत्रात क्रांतिकारी बदल होत आहेत. येणारा काळ हा ‘एआय’चा असून, भारतीय सनदी लेखापालांना ‘एआय’चे ज्ञान व्हावे, त्याचा चांगला उपयोग करता यावा, यासाठी प्रशिक्षण दिले जात आहे. तसेच सीए विद्यार्थ्यांच्या अभ्यासक्रमात ‘एआय’चा समावेश केला जात आहे. त्यामुळे सनदी लेखापाल अधिक तंत्रज्ञानाभिमुख व ‘एआय’ प्रशिक्षित होत आहेत,” असे प्रतिपादन दी इन्स्टिट्यूट ऑफ चार्टर्ड अकाऊंटंट्स ऑफ इंडियाचे अध्यक्ष सीए चरणज्योत सिंग नंदा यांनी केले.

संसदीय कायद्यानुसार स्थापित दी इन्स्टिट्यूट ऑफ चार्टर्ड अकाऊंटंट्स ऑफ इंडिया (आयसीएआय) आयोजित ‘एआय इनोव्हेशन समिट २०२५’, या सनदी लेखापालांसाठीच्या दोन दिवसीय राष्ट्रीय परिषदेच्या उद्घाटनप्रसंगी ते बोलत होते. ‘अकाऊंटिंग, ऑडिट, कर प्रणाली आणि शासकीय कार्यपद्धतीत परिवर्तन’ अशी या परिषदेची मध्यवर्ती संकल्पना होती. बाणेर येथील बंटारा भवनमध्ये आयोजित या कार्यक्रमावेळी ‘आयसीएआय’चे उपाध्यक्ष सीए प्रसन्नकुमार डी, सचिव सीए डॉ. जयकुमार बत्रा, ‘आयसीएआय’च्या एआय कमिटीचे चेअरमन सीए उमेश शर्मा, व्हाईस चेअरमन सीए दयानिवास शर्मा, वेस्टर्न इंडिया रिजनल कौन्सिलचे (डब्ल्यूआयआरसी) अध्यक्ष सीए केतन सैय्या, आयसीएआय पुणे शाखेचे चेअरमन सीए सचिन मिणियार आदी व्यासपीठावर उपस्थित होते. ‘आयसीएआय’च्या केंद्रीय समितीचे, विभागीय समितीचे, तसेच पुणे शाखेचे पदाधिकारी व १००० पेक्षा अधिक सीए सभासद या परिषदेला उपस्थित होते.

‘आयसीएआय’च्या पुणे शाखेच्या वतीने या परिषदेचे संयोजन केले होते. केंद्रीय समिती सदस्य सीए चंद्रशेखर चितळे यांच्या मार्गदर्शनात विभागीय समिती सदस्य सीए राजेश अग्रवाल, सीए रेखा धामणकर, सीए अभिषेक धामणे, पुणे शाखेचे उपाध्यक्ष सीए प्रणव आपटे, सचिव सीए निलेश येवलेकर, खजिनदार सीए नेहा फडके, कार्यकारिणी सदस्य सीए प्रितेश मुनोत, सीए प्रज्ञा बंब, सीए नंदकुमार कदम, सीए सारिका दिंडोकार आदींनी संयोजनात परिश्रम घेतले. आयटी तज्ज्ञ डॉ. दीपक शिकारपूर व ओपनएआय सोर्सच्या पब्लिक पॉलिसी अँड पार्टनरशिप हेड प्रज्ञा मिश्रा यांचे ‘एआय’वर बीजभाषण झाले.

सीए चरणज्योत सिंग नंदा म्हणाले, “कृत्रिम बुद्धिमत्ता, मशीन लर्निंग यांसारख्या नव्या तंत्रज्ञानाची भीती न बाळगता ते तंत्रज्ञान आत्मसात करायला हवे. शिकण्याची आसक्ती हवी. ‘एआय’मुळे अनेक गोष्टी सहज होत आहेत. केंद्र सरकारने संशोधन व इनोव्हेशनसाठी २० हजार कोटी रुपयांची गुंतवणूक केली आहे. विकसित भारताच्या दिशेने टाकलेले हे महत्वपूर्ण पाऊल आहे. तंत्रज्ञानाच्या विस्तारासाठी भारत आंतरराष्ट्रीय बाजारपेठ बनत आहे. या संधींचा सनदी लेखापालांनी लाभ घ्यावा. आज ५०० पेक्षा अधिक ‘एआय’ प्रशिक्षण वर्ग झाले असून, त्यातून २५ हजार सनदी लेखापालांनी ‘एआय’ मोड्यूल शिकले आहेत. सनदी लेखापालांनी सकारात्मक मानसिकता ठेवण्यासह शरीर व मनाच्या स्वास्थ्यावर लक्ष द्यावे. कुटुंबाला पुरेसा वेळ द्यावा. ‘वर्क लाईफ बॅलन्स’ साधण्यासाठी विविध उपक्रम हाती घेण्यात आले आहेत.”

सीए प्रसन्नकुमार म्हणाले, “कृत्रिम बुद्धिमत्ता हा आपल्या व्यवसायाचा अविभाज्य भाग बनला असून, ‘एआय’ आत्मसात केल्याशिवाय कोणताही पर्याय नाही. लाखो सनदी लेखापाल आणि सीए विद्यार्थी हे नवे तंत्रज्ञान वापरत आहेत. त्याचा आणखी प्रभावी वापर कसा करता येईल. नोकऱ्या जाणार ही भीती मनातून काढायला हवी. नवी कौशल्ये, तंत्र आत्मसात करणाऱ्यांसाठी हे संधींचे भांडार आहे. सव्वाकोटी पेक्षा अधिक रोजगार निर्मिती ‘एआय’मुळे होणार आहे. मानवी बुद्धिमत्ता श्रेष्ठ असून, त्याला कृत्रिम बुद्धिमतेची जोड मिळाल्याने विकासाचा वेग झपाट्याने वाढणार आहे.”

सीए उमेश शर्मा म्हणाले, “गेल्यावर्षी ‘आयसीएआय’ने ‘एआय कमिटी’ स्थापन केल्यापासून कृत्रिम बुद्धिमतेच्या वापराचे प्रशिक्षण अधिक व्यापक झाले आहे. प्रत्येक सनदी लेखापालांना ‘एआय’ प्रशिक्षित करून काळाबरोबर चालण्यासाठी प्रोत्साहन दिले जात आहे. जवळपास साडेचार ते पाच लाख सनदी लेखापाल येत्या काही महिन्यात हे प्रशिक्षण घेतील. २०२७ नंतर सीए होणाऱ्यांसाठी अभ्यासक्रमात ‘एआय’चा विषय शिकवला जाणार आहे.”

सीए दयानिवास शर्मा, सीए केतन सैय्या यांनीही आपले विचार मांडले. सीए (डॉ.) जयकुमार बात्रा यांनी स्वागत-प्रास्ताविक केले. सीए नेहा फडके व सीए प्रज्ञा बंब यांनी सूत्रसंचालन केले. सीए सचिन मिणियार यांनी आभार मानले.

पुणे : सारसबागेजवळील लोकशाहीर अण्णाभाऊ साठे यांच्या पुतळ्याला त्यांच्या पुण्यतिथी निमित्ताने आज (शुक्रवारी) राष्ट्रवादी काँग्रेस पक्षाच्या वतीने शहराध्यक्ष सुभाष जगताप यांनी पुष्पहार अर्पण करून अभिवादन केले.

या प्रसंगी अंकल सोनावणे, पक्षाचे कार्याध्यक्ष प्रदीप देशमुख, लक्ष्मीताई पवार, दीपक कसबे, अशोक हरणावळ, ॲड.एकनाथ सुगावकर, संजय केंदळे आदी उपस्थित होते.

तसेच बिबवेवाडी आणि अन्य मंडळांनी आयोजित केलेल्या लोकशाहीर अण्णाभाऊ साठे अभिवादन कार्यक्रमात सुभाष जगताप यांनी सहभाग घेतला.

लोकशाहीर अण्णाभाऊ साठे यांचे साहित्य, कष्टकऱ्यांच्या चळवळीसाठी त्यांनी केलेले योगदान, संयुक्त महाराष्ट्र चळवळीत त्यांनी दिलेले योगदान कायम स्मरणात राहील. अण्णाभाऊ साठे यांच्या साहित्यातून जिद्दीने लढण्याची आणि जगण्याची प्रेरणा मिळाली, असे सुभाष जगताप यांनी अभिवादन कार्यक्रमांमध्ये बोलताना सांगितले. तसेच ‘संघर्षाशिवाय प्रगती नाही’, असा अण्णाभाऊ साठे यांनी दिलेला संदेशही आपण अंगिकारायला हवा, असे आवाहनही सुभाष जगताप यांनी या प्रसंगी कार्यकर्त्यांना केले.

पुणे-‘डेक्कन एज्युकेशन सोसायटी’च्या फर्ग्युसन महाविद्यालयात एक हजार देशी वृक्ष लागवडीच्या मोहिमेचा शुभारंभ फुलगाव येथील श्री श्रुतीसागर आश्रमाचे संस्थापक स्वामी स्वरूपानंद सरस्वती यांच्या हस्ते आज करण्यात आला.

रा. स्व. संघाचे पश्चिम महाराष्ट्र प्रांताचे संघचालक नानासाहेब जाधव यांची प्रमुख पाहुणे म्हणून उपस्थिती होती. सोसायटीच्या नियामक मंडळ आणि परिषदेचे अध्यक्ष प्रमोद रावत कार्यक्रमाच्या अध्यक्षस्थानी होते. उपाध्यक्ष ॲड. अशोक पलांडे, कार्यवाह डॉ. आनंद काटीकर, पर्यावरण समितीचे अध्यक्ष विवेक मठकरी, प्राचार्य डॉ. श्याम मुडे यांची प्रमुख उपस्थिती होती. या कार्यक्रमाला संस्थेचे सर्व विश्वस्त, संचालक,प्राचार्य, बँकांचे अधिकारी अधिकारी आणि मोठ्या‌ संख्येने विद्यार्थी उपस्थित होते.

नानासाहेब जाधव म्हणाले, “पर्यावरणाचे असंतुलन व्हायला आपण सर्वजण जबाबदार आहोत. आपण ती जबाबदारी स्वीकारली पाहिजे. विकासाच्या चुकीच्या धारणा आणि आपली दोषयुक्त जीवनशैली पर्यावरणाचा ऱ्हास व्हायला कारणीभूत आहेत. भारतीय तत्त्वज्ञानात सांगितल्याप्रमाणे निसर्गाचा एकात्मिक विचार करणे आवश्यक आहे. जैविक परिवार संकल्पना प्रत्यक्षात आणली पाहिजे. तसेच निसर्गाकडे सहअस्तित्व, सामंजस्य आणि सौहार्दपूर्ण दृष्टीने पाहण्याची गरज आहे. “
.
स्वामी स्वरूपानंद सरस्वती म्हणाले, ” विकासाच्या नावावर आपण अहोरात्र काम करत आहोत. परंतु काय विकास झाला आणि किती विकास झाला हा प्रश्न आहे. सर्व जण विकासाची भाषा बाह्य अंगानेच वापरतात. जास्तीत जास्त संसाधनांचा वापर म्हणजे विकास असे म्हटले जाते. परंतु विकास करताना माणूस कुठल्या स्तराला जाऊन पोचला आहे. खरोखर विकास झालाय की जीवनाच्या नीतीमूल्यांचे, विचारांचे अवमूल्यन झाले आहे हा प्रश्न आहे.”

फर्ग्युसन महाविद्यालयाच्या शंभर एकर परिसरात जैवविविध्यता आहे. या ठिकाणी दोनशेहून अधिक प्रजातींचे दहा हजारहून अधिक वृक्ष आहेत. त्यामुळे या परिसरात परदेशी स्थलांतरित पक्षीही वास्तव्यासाठी दरवर्षी येतात. हा परिसर अधिक जैववैविध्य संपन्न करण्याच्या उद्देशाने आज शंभर प्रजातींचे एक हजार वृक्षांच्या लागवडीचा शुभारंभ केल्याची माहिती पर्यावरण समितीचे अध्यक्ष विवेक मठकरी यांनी प्रास्ताविक भाषणात दिली.

पुणे, दि. १८: बॉम्बे इंजिनिअर ग्रुप आणि केंद्र, खडकी (पुणे) यांच्यावतीने युनिट मुख्यालय कोटा अंतर्गत अग्निवीर भरती मेळाव्याचे आयोजन करण्यात आले आहे. हा भरती मेळावा ४ ऑगस्ट २०२५ पासून खडकी, पुणे येथे पार पडणार असून अग्निवीर (सामान्य कर्तव्य), अग्निवीर (तांत्रिक), अग्निवीर (ट्रेड्समन ८ वी व १० वी उत्तीर्ण) तसेच अग्निवीर खेळाडू (खुल्या श्रेणीसाठी) यांची भरती केली जाणार आहे.

पात्र उमेदवारांची प्रारंभिक तपासणी, शारीरिक तंदुरुस्ती चाचणी, सॉफ्टवेअर नोंदणी आणि शारीरिक मापन चाचणी पुढील वेळापत्रकानुसार केली जाईल. अग्निवीर खेळाडू खुल्या श्रेणीसाठी (फुटबॉल, पोहणे, हॉकी, बास्केटबॉल, रोइंग, सेलिंग आणि ट्रायथलॉन) ४ ऑगस्ट २०२५ रोजी, ५ ऑगस्ट रोजी अग्निवीर सामान्य कर्तव्य (शीख : मजहबी आणि रामदासी) ६ व ७ ऑगस्ट रोजी सामान्य कर्तव्य (मराठा), ८ ऑगस्ट २०२५ रोजी सामान्य कर्तव्य (इस्लामिक सहकार्य आणि मुस्लिम संघटना) व अग्निवीर तांत्रिक (आखिल भारतीय सर्व वर्ग), ९ ऑगस्ट २०२५ रोजी अग्निवीर व्यापारी, ८ वी व १० वी उत्तीर्ण (खुला वर्ग) संगीतकार, शेफ, ड्रेसर, स्टीवर्ड, सपोर्ट स्टाफ, वॉशरमन, मेस कीपर आणि हाऊस कीपर) यांच्यासाठी प्रारंभिक तपासणी आदी कार्यवाही केली जाईल.

सर्व उमेदवारांना भरतीच्या ठिकाणी सकाळी ५ ते ८ या वेळेतच प्रवेश दिला जाणार आहे. फुटबॉल, पोहणे, हॉकी, बास्केटबॉल, रोइंग, सेलिंग आणि ट्रायथलॉन क्रीडा शाखेतील उमेदवारांचे मूल्यांकन २५ जुलैपासून केले जाईल. बॉम्बे इंजिनिअर ग्रुप आणि केंद्र, जनरल स्टाफ (क्रीडा) यांच्याकडून प्रायोजित उमेदवारांनाच भरती प्रक्रियेसाठी ४ ऑगस्ट रोजी उपस्थित राहण्याची परवानगी असेल.

भरतीप्रक्रिया मुख्यालय बॉम्बे इंजिनिअर ग्रुप आणि केंद्र यांच्या आदेशाने पुढे ढकलली किंवा रद्द केली जाऊ शकते. उमेदवारांनी अधिक माहितीसाठी www.bsakirkee.org या संकेतस्थळाला भेट देऊन सेवा, अटी व आवश्यक कागदपत्रांची सविस्तर माहिती मिळवावी, असे आवाहन जिल्हा सैनिक कल्याण अधिकारी लेफ्टनंट कर्नल हंगे स. दै. (नि) यांनी प्रसिद्धी पत्रकान्वये केले आहे.
००००

पुणे- डॉ.अण्णाभाऊ साठे यांना सरकार भारतरत्न पुरस्कार का नाही देत ? असा सवाल ज्येष्ठ साहित्यिक डॉ. श्रीपाल सबनीस यांनी केला आहे.

क्रांतिवीर लहुजी वस्ताद साळवे एकता प्रतिष्ठान व मातंग एकता आंदोलन पुणे शहर यांच्या वतीने साहित्यसम्राट लोकशाहीर डॉ, अण्णाभाऊ साठे यांच्या पुण्यतिथी निमित्त आज दहावी व बारावी मध्ये चांगले गुण घेऊन उत्तीर्ण झालेल्या मुला मुलींचा सत्कार समारंभ व व्याख्यानाचा कार्यक्रम संपन्न झाला यावेळी ते बोलत होते . डॉ श्रीपाल सबनीस यांनी आपल्या मार्गदर्शनपर भाषणात साहित्यरत्न लोकशाहीर अण्णा भाऊ साठे यांच्या जिवन चरीत्र्यावर आधारीत खास शैलीमध्ये अण्णा भाऊचा संपूर्ण जिवन प्रवासाचे वर्णन करतांना म्हणाले की अण्णा भाऊचा साहित्य है जगविख्खात साहित्य असुन त्यांच्या शाहिरीचा संपूर्ण जगामध्ये गौरव केला जात आहे म्हणूनच त्यांना जगविख्यात साहितिक शाहिर म्हणून ओळखलं जाते अण्णा भाऊ साठे यांना भारतरत्न हा देशाचा सर्व उच्छ नागरिक किताब का नाही दिला जात असा सवाल त्यांनी सरकार ला केला आहे ?
पुणे श्रमिक पत्रकार संघाचे नवनिर्वाचित अध्यक्ष ब्रिजमोहन पाटील यांचा सत्कार डॉ . श्रीपाल सबनीस यांच्या हस्ते करण्यात आला.

त्याच बरोबर त नुकत्याच झालेल्या विधी व न्याय विभागाच्या स्पर्धा परीक्षेमध्ये कु. सबोरी अण्णा लोंढे हिने दंडाधिकारी म्हणून तिने पदवी प्राप्त झाली तिचे त्याचबरोबर काशिवाडी भागातील रहिवाशी, मनपा शाळेत शिकून संपूर्ण शिष्यवृत्ती वर अमेरिकेसारख्या प्रगत देशांमध्ये उच्च शिक्षणासाठी गेलेला समाजातील तरुण विद्यार्थी कु.ओम गायकवाड यांचा देखील मान्यवरांच्या हस्ते सत्कार करण्यात आला.

कार्यक्रमाचे मुख्ख संयोजक व संघटनेचे राज्याचे कार्याध्यक्ष अविनाश बागवे यांनी सर्वांचे स्वागत केले. या वेळी यादवराव सोनवणे , साहित्यिक संपत जाधव अँड. एकनाथ सुगावकर दादासाहेब सोनवणे त्याचबरोबर अण्णाभाऊ साठे उत्सव समितीचे स्वागत अध्यक्ष सौ लक्ष्मीताई पवार सचिव दीपक कसबे , मातंग एकता आंदोलन संघटनेचे महिला आघाडीचे अध्यक्षा अँड. राजश्रीअडसूळ, सौ.सुरेखा खंडाळे, विठ्ठल थोरात , अरुण गायकवाड, विठ्ठल गायकवाड , दयानंद अडगळे, रवी आप्पा पाटोळे , सुनिल बावकर, विलास कांबळे उपाध्यक्ष, संघटनेचे शहरातील पदाधिकारी शाखा प्रमुख त्याचबरोबर शहरातील विविध भागातील इयत्ता दहावी आणि बारावीतील उत्तीर्ण विद्यार्थी व त्यांचे पालक मोठ्या संख्येने या कार्यक्रमासाठी उपस्थित होते.कार्यक्रमाचे प्रास्ताविक अँड. राजश्री अडसूळ, यांनी केले तर आभार दयानंद अडागळे यांनी मांडले.

पुणे-

भारतीय नागरिकाच्या ओळखीशी संबंधित सर्वात महत्वाच्या कागदपत्रांपैकी एक असलेल्या आधारकार्ड मध्ये आधारकार्ड धारकाचा रक्तगट समाविष्ट करण्यात यावाअशी मागणी माजी उपमहापौर दीपक मानकर यांनी पंतप्रधान नरेंद्र मोदी, केंद्रीय आरोग्य आणि कुटुंब कल्याण मंत्री जगत प्रकाश नड्डा तसेच जागतिक आरोग्य संघटना आग्नेय आशियाच्या प्रादेशिक संचालक श्रीमती सायमाजी वाजेद यांना निवेदन देत केली आहे..
माजी उपमहापौर दीपक मानकर यांनी दिलेल्या निवेदनात म्हटले आहे की, भारत सरकारने प्रत्येक भारतीय नागरिकाच्या ओळखीशी संबंधित सर्वात महत्वाचे कागदपत्रांपैकी एक म्हणजे आधारकार्ड हा ओळखीचा पुरावा दिलेला. आधार कार्ड हे एक असे कागदपत्र बँकिंग आणि दूरसंचार क्षेत्रात एक महत्त्वाचे दस्तऐवज बनले आहे, ज्यामध्ये एखाद्या व्यक्तीचा बँक खाते क्रमांक आणि टेलिफोन नंबर त्यांच्या आधार क्रमांकाशी जोडला जातो. आधारकार्ड वर १२ अंकी अद्वितीय क्रमांक छापलेला आहे जो भारतीय विशिष्ट ओळख प्राधिकरणाने (UIDAI) जारी केला आहे. त्यामध्ये नागरिकांचे नाव, पत्ता, जन्मतारीख, मोबाईल नंबर, फोटो आणि इतर आवश्यक माहिती असते. त्यामुळे भारतीय नागरिकांना त्यांची ओळख दाखवण्यास अत्यंत सुलभ झाले आहे. आजच्या काळात प्रत्येकठिकाणी आधारकार्ड हे वापरले जाते आणि ते प्रत्येक भारतीयास आवश्यक मानले जात आहे. त्याचप्रमाणे व्यक्तीचा रक्तगट हा रक्तगट महत्त्वाचा असतो कारण तो वैद्यकीय उपचारांमध्ये, विशेषतः रक्त संक्रमणाच्या वेळी अत्यंत आवश्यक असतो. रक्तगट जुळल्यास, गंभीर आरोग्य समस्या टाळता येतात.रक्तगट महत्त्वाचे कारण रक्त संक्रमण, गर्भावस्थेतील गुंतागुंत, अवयव प्रत्यारोपण,आजारांचा धोका या वेळी रक्तगट महत्त्वाची भूमिका बजावतो. जसे की रक्त संक्रमणाच्या वेळी, रक्तगट जुळणे आवश्यक आहे. विसंगत रक्तगटाचे रक्त दिल्यास, रक्ताच्या गुठळ्या होऊन गंभीर समस्या किंवा मृत्यू देखील होऊ शकतो. आई आणि बाळ यांच्यातील रक्तगट जुळणे आवश्यक आहे. विशिष्ट परिस्थितीत, विसंगत रक्तगट माता आणि बाळासाठी धोकादायक असू शकतो. अवयव प्रत्यारोपणाच्या वेळी, रक्तगट जुळणे महत्वाचे आहे, कारण यामुळे प्रत्यारोपित अवयवाचे शरीर सहजपणे स्वीकारू शकेल. काही विशिष्ट रक्तगट विशिष्ट आजारांसाठी अधिक संवेदनशील असू शकतात. मात्र आता रक्तगट जाणून घ्यायचा असल्यास त्यामध्ये बराच वेळ निघून जातो.
एखादा अपघात किंवा कोणतीही नैसर्गिक आपत्ती झालेल्या घटनेमध्ये अपघाती नागरिकांना दवाखान्यामध्ये उपचारासाठी दाखल केले जाते. त्यावेळी त्या रुग्णास रक्ताची गरज भासल्यास रक्तगट माहित नसल्यामुळे उपचारामध्ये दिरंगाई होणे किंवा चुकीचे रक्तगट दिले जाणे यामुळे रुग्णाच्या जीवितास धोका निर्माण होण्याची शक्यता जास्त असते. आधारकार्ड मध्ये आधारकार्ड धारकाचा रक्तगट समाविष्ट झाल्यास त्या व्यक्तीला कोणत्याही अपघाती घटनेमध्ये रक्त देण्याची वेळ आल्यास आधारकार्ड मध्ये रक्तगट समाविष्ट असल्याने रक्त देण्यास सुलभ होऊ शकते.

पुणे-

महाराष्ट्र शासनाने नुकताच जनसुरक्षा कायदा पारित केलेला आहे. या कायद्यामधील तरतुदी ह्या लोकशाही प्रणालीच्या विरूध्द आहेत, त्यामुळे सर्वसामान्य नागरिकांच्या स्वातंत्र्याची व नागरी हक्कांची पायमल्ली होणार आहे, याच्या निषेधार्थ महाराष्ट्र प्रदेश काँग्रेस कमिटीच्या आदेशानुसार पुणे शहर जिल्हा काँग्रेस कमिटीच्या वतीने आज जिल्हाधिकारी कार्यालय येथे आंदोलन करण्यात आले. आंदोलनानंतर जिल्हाधिकारी यांना काँग्रेस पक्षाच्या वतीने निवेदन सादर करण्यात आले.यावेळी महाराष्ट्र प्रदेश काँग्रेस कमिटीचे सरचिटणीस ॲड. अभय छाजेड, नगरसेवक लता राजगुरू, अजित दरेकर, रफिक शेख, मेहबुब नदाफ, ब्लॉक अध्यक्ष सुजित यादव, रविंद्र माझीरे, अजित जाधव, विशाल जाधव, रमेश सोनकांबळे, राज अंबिके, प्राची दुधाने, अनिता धिमधिमे, सीमा सावंत, अनुसया गायकवाड, सुंदर ओव्‍हाळ, प्रियंका मधाळे, सीमा महाडिक, कांचन बालनायक, मंदा जाधव, ज्योती परदेशी, सतिश पवार, ॲड. रमेश पवळे, सचिन दुर्गोडे, संदिप मोकाटे, सुरेश चौधरी, भगवान कडू, संजय कवडे, नुर शेख, सुरेख नांगरे, लतेंद्र भिंगारे, वैभव डांगमाळी, विल्सन चंदेवळ, राजेश मोहिते, अनिल धिमधिमे आदींसह असंख्य काँग्रेसजण सहभागी होते.

यावेळी पुणे शहर जिल्हा काँग्रेस कमिटीचे अध्यक्ष अरविंद शिंदे म्हणाले की, ‘‘संविधानिक मूलभूत अधिकारांचा गळा घोटणारा जन सुरक्षा कायदा २०२४ महाराष्ट्र सरकारने चालू असलेल्या पावसाळी अधिवेशनामध्ये बहुमताच्या जोरावर नुकताच पास केला आहे. सरकारच्या असंविधानिक, चुकीच्या ध्येय धोरणावर जो जो विरोधी पक्ष, संघटना, सामाजिक कार्यकर्ते, नागरिक टिका टिपणी करतील, सरकारच्या विरोधात बोलतील, न्यायासाठी संविधानिक मार्गाने रस्त्यावर उतरून आंदोलन करतील त्या त्या पक्ष संघटनेतील कार्यकर्त्यांना विना चौकशी जेलमध्ये टाकण्याचा अधिकार या जन सुरक्षा कायद्याने सरकारला मिळाला आहे. संविधानिक मार्गाने काम करणारे विरोधी पक्ष संघटना, शिव शाहू फुले आंबेडकरवादी संघटना, पुरोगामी, शेतकरी कामगार संघटना यांना संपवण्यासाठीच सरकार या कायद्याचा वापर करण्याची दाट शक्यता आहे. नागरिकांच्या मूलभूत अधिकारावर तसेच लोकशाहीचा चौथा स्तंभ असलेले पत्रकार, लेखक यांच्या अभिव्‍यक्ती स्वातंत्र्यावर घाला घालणारा हा कायदा आहे. तरी या जुलमी असंविधानिक कायद्याच्या विरोधात सर्व संविधान समर्थक लोकशाहीवादी बंधू, भगिनी यांनी एकीची वज्रमुठ आवळून, या संविधान विरोधी काळ्या कायद्याला आम्ही विरोध करीत आहोत. जनसुरक्षा विधेयकावर १२ हजारांपेक्षा जास्त व्यक्ती व संघटनांनी सुचना आणि आक्षेप नोंदवलेले आहेत, त्याची जनसुनावणी घेतलेली नाही. संयुक्त समितीत आमदारांचे म्हणणे ऐकूण घेतले पण लोकांच्या मनात या विधेयकावर अनेक शंका आहेत त्या दुर करण्याची गरज आहे. देशात सध्या अस्तित्वात असलेले कायदे नक्षलवादाचा बिमोड करण्यासाठी सक्षम असताना नव्या कायद्याची गरजच काय.’’