गंगाधाम(पुणे), ता. २२ जुलै:
            सदगुरु माता सुदीक्षाजी महाराज यांच्या कृपाशीर्वादाने संत निरंकारी मिशनच्या सामाजिक उपक्रमांतर्गत संत निरंकारी चॅरिटेबल फाउंडेशन तर्फे गंगाधाम, पुणे  येथील संत निरंकारी सत्संग भवनात भव्य मोफत आरोग्य तपासणी व चिकित्सा शिबिराचे आयोजन रविवारी (दि. २० जुलै) करण्यात आले. सकाळी ८ ते सायंकाळी ४ या वेळेत पार पडलेल्या या शिबिराचा लाभ सुमारे ५५० नागरिकांनी घेतला.
            या शिबिरात विविध वैद्यकीय तज्ञांची उपस्थिती लाभली. जनरल फिजिशियन, कान-नाक-घसा तज्ञ, हृदयरोगतज्ज्ञ, स्त्रीरोगतज्ज्ञ, कायरोप्रॅक्टिक, आयुर्वेद, होमिओपॅथी, ऑक्युप्रेशर अशा अनेक शाखांतील तज्ञ डॉक्टरांनी नागरिकांना सल्ला व उपचार दिला.
            या शिबिरासाठी १३ जुलै रोजी नागरिकांचे रक्तनमुने तपासण्यासाठी घेण्यात आले होते, तपासणी अहवालांनुसार आवश्यक त्या रुग्णांना तज्ज्ञ डॉक्टरांकडून मार्गदर्शन करण्यात आले. शिबिरात ECG सुविधा देखील उपलब्ध होती. डॉ. पुरुषोत्तम अरोरा यांच्या मार्गदर्शनाखाली २० हून अधिक डॉक्टरांचे सहकार्य लाभले. विशेष म्हणजे, तपासण्या अल्पदरात करण्यात आल्या असून औषधे मोफत पुरविण्यात आली. शिबिरासाठी आलेल्या सर्व नागरिकांसाठी नाश्ता व भोजनाची व्यवस्थाही करण्यात आली होती.
            संत निरंकारी मिशनतर्फे मानवसेवेच्या हेतूने देशभर विविध उपक्रम राबवले जातात. स्वच्छता मोहिम, वृक्षारोपण, नेत्र चिकित्सा शिबिर, महिला सशक्तीकरण, बालविकास व नैसर्गिक आपत्तीमध्ये मदतकार्य या माध्यमातून मिशन समाजातील सकारात्मक बदल घडवून आणत आहे. भारत सरकार व राज्य सरकारांनीही या कार्याची दखल घेत विविध स्तरांवर सन्मानित केले आहे.
            या शिबिराच्या यशस्वी आयोजनामध्ये संत निरंकारी सेवादल, स्थानिक ब्रँचचे स्वयंसेवक व मिशनचे अनुयायी यांनी मोलाचे योगदान दिले.

कर्करोग नियंत्रणासाठी ग्रामीण भागात प्रतिबंधात्मक उपायोजना कराव्यात
नवी दिल्ली/पुणे: महाराष्ट्रातील ग्रामीण भागातील महिलांमध्ये कर्करोगाच्या वाढत्या संख्येबाबत राज्यसभा खासदार प्रा. डॉ. मेधा विश्राम कुलकर्णी यांनी सोमवारी संसदेत लक्ष वेधले. संसदेच्या पावसाळी अधिवेशनात लक्षवेधी सत्रात महिलांमधील वाढत्या कर्करोगाबाबत चिंता व्यक्त करत कर्करोग नियंत्रणासाठी शासनाने प्रतिबंधात्मक उपायोजना त्वरित कराव्यात, अशी मागणी केली.

प्रा. डॉ. मेधा कुलकर्णी म्हणाल्या, हिंगोली जिल्ह्यात अलीकडेच झालेल्या ‘संजिवनी’ आरोग्य तपासणी मोहिमेत २.९३ लाख महिलांची तपासणी करण्यात आली. त्यामध्ये १४,५०० महिलांमध्ये कर्करोगाची लक्षणे आढळून आली आहेत. ही बाब अत्यंत गंभीर असून, ग्रामीण आणि वंचित भागांमध्ये वेळेवर निदान, त्वरित उपचार आणि सुविधा उपलब्ध करून देणे अत्यावश्यक असल्याचे त्यांनी नमूद केले. मोठ्या प्रमाणावर राबवण्यात येणाऱ्या आरोग्य तपासणी मोहिमा स्तुत्य असल्या तरी त्या केवळ पहिला टप्पा असून, त्यानंतरच्या उपचार, फॉलोअप आणि वैद्यकीय पायाभूत सुविधांचा अभाव मोठा अडथळा ठरतो, असे त्यांनी स्पष्ट केले. या पार्श्वभूमीवर, केंद्र सरकारने काही तातडीच्या उपाययोजना राबवाव्यात अशी मागणी त्यांनी केली.

डॉ. कुलकर्णी यांनी स्थानिक आरोग्य केंद्रांमध्ये मॅमोग्राफी, गर्भाशय मुख तपासणी व बायोप्सीसारख्या निदान चाचण्यांसाठी अद्ययावत सोयी-सुविधा उपलब्ध करून देण्याची सूचना मांडली. त्याचप्रमाणे दुर्गम भागांमध्ये मोबाइल ऑन्कोलॉजी युनिट्स (कर्करोग निदान गाड्या) उप्लब्ध करून सुरुवातीच्या टप्प्यावरच निदान करण्याची गरज त्यांनी मांडली. महिलांमध्ये कर्करोगाच्या सुरुवातीच्या लक्षणांची जाणीव व्हावी व या आजाराबाबतचा सामाजिक कलंक दूर व्हावा यासाठी व्यापक जनजागृती मोहिमा राबवाव्यात, असेही त्यांनी सुचवले. आयुष्मान भारत आणि महात्मा फुले जनआरोग्य योजनेसारख्या योजना अधिक प्रभावीपणे राबवून कर्करोग निदान व उपचारांचा संपूर्ण खर्च या माध्यमातून करावा, अशी शिफारस त्यांनी केली.

महाराष्ट्रात २०२३ मध्ये १.२१ लाख नव्या कर्करोग रुग्णांची नोंद झाली असून, २०२१ मध्ये ही संख्या १.१८ लाख होती. ही वाढती आकडेवारी राज्यातील, विशेषतः ग्रामीण महिलांमधील कर्करोगाचे संकट अधोरेखित करते, असे डॉ. कुलकर्णी यांनी नमूद केले. ही एक ‘मूक आरोग्य आपत्ती’ आहे आणि त्यासाठी बहु-क्षेत्रीय, तातडीची आणि सातत्यपूर्ण कृतीची गरज आहे, असे त्या म्हणाल्या. कर्करोगाचे लवकर निदान झाल्यानंतर वेळेवर उपचार सुरू व्हावेत, जेणेकरून रुग्णांना योग्य काळजी मिळेल आणि त्यांचे आयुष्य वाचवता येईल, असेही त्यांनी नमूद केले.

पुणे- नोव्हेंबर २०२४ मध्ये झालेल्या हडपसर विधानसभा मतदारसंघातील मतदानाची मोजणी पुन्हा करण्याचे आदेश न्यायालयाने दिले असल्याची माहिती माजी महापौर आणि शरद पवार गटाचे राष्ट्रवादी शहर अध्यक्ष प्रशांत जगताप यांनी कळविली आहे. भोसरी गोडाऊन येथे २५ जुलै ते २ ऑगस्ट दरम्यान ही मतमोजणी होणार आहे.असेही ते म्हणालेत.

त्यांनी या प्रकरणी सविस्तर कळविले आहे कि,’नोव्हेंबर २०२४ मध्ये महाराष्ट्रात झालेल्या विधानसभा निवडणुकीच्या प्रक्रियेबद्दल अनेक मतदारसंघातून आक्षेप नोंदवण्यात आले होते. हडपसर विधानसभा मतदारसंघाच्या मतमोजणीच्या प्रक्रिये बाबतही राष्ट्रवादी काँग्रेस पार्टी शरदचंद्र पवार पक्षाचे उमेदवार प्रशांत जगताप यांनी आक्षेप नोंदवत पुन्हा मतमोजणी करण्याची मागणी केली होती.त्यानंतर निवडणूक आयोगाने हडपसर विधानसभा मतदारसंघातील २७ EVM मशिन्स व VVPAT मशिन्सची पुन्हा मोजणी करण्यास मान्यता दिली होती. मात्र ही मोजणी करताना प्रत्यक्ष निवडणुकीत झालेले मतदान संपूर्णपणे मशीन मधून खोडून, मॉकपोल घेऊन मोजणी करण्याच्या सूचना दिल्या होत्या. निवडणूक आयोगाच्या या निर्णयास प्रशांत जगताप यांच्यासह अनेकांनी सर्वोच्च न्यायालयात आव्हान दिले होते. या प्रकरणाचा निकाल लागला असून येत्या २५ जुलैपासून प्रत्यक्ष झालेल्या मतदानाची पुन्हा मोजणी करण्यात येणार आहे. भोसरी गोडाऊन येथे २५ जुलै ते २ ऑगस्ट दरम्यान ही मतमोजणी होणार आहे.याबद्दल प्रशांत जगताप यांनी माननीय सर्वोच्च न्यायालयाचे आभार व्यक्त करत हडपसर विधानसभा मतदारसंघात झालेली मतांची चोरी जगासमोर येणार हा विश्वास व्यक्त केला.

‘महाराष्ट्र वारकरी किर्तनकार गोलमेज परिषदे’ चा समारोप.

पुणे:” विज्ञान व अध्यात्माच्या एकत्रीकरणातून नव्या विचारांचा समन्वय होईल, आणि या दोन्हीच्या विचारांचा समन्वय म्हणजे नवा भारत असेल. पंतप्रधान सतत म्हणतात की भारत एक महान व चांगले राष्ट्र होणार आहे. याची सुरूवात ‘महाराष्ट्र वारकरी कीर्तनकार गोलमेज परिषदे’तून झाली आहे. भारतीय राजकारणाला बदलावयाचे असेल तर अध्यात्मिक विचार मांडले गेले पाहिजे. येथून निघालेले मंथन हे भारतीय संस्कृतीला नवी दिशा देण्यासाठी सज्ज आहे.” असे विचार जागतिक किर्तीचे संगणक तज्ज्ञ पद्मभूषण डॉ. विजय भटकर यांनी व्यक्त केले.
‘एमआयटी वर्ल्ड पीस युनिव्हर्सिटीच्या स्कूल ऑफ एज्युकेशन, पुणे’ व ‘एमआयटी-राष्ट्रीय सरपंच संसद’ यांच्या संयुक्त विद्यमाने हनुमानवाडी आळंदी (देवाची) येथील डॉ. विश्वनाथ कराड वर्ल्ड पीस स्कूल येथे आयोजित दोन दिवसीय ‘महाराष्ट्र वारकरी कीर्तनकार गोलमेज परिषदे’ च्या समारोप समारंभ प्रसंगी प्रमुख पाहुणे म्हणून ते बोलत होते.
या प्रसंगी पंढरपूर येथील श्रीगुरू साखरे महाराज परंपरा पाईकचे हभप रामकृष्ण महाराज वीर, आळंदी येथील साधकाश्रमचे प्रमुख हभप यशोधन महाराज साखरे, बदलापूर येथील ज्येष्ठ कीर्तनकार हभप विश्वनाथ महाराज वारिंगे, देहूचे हभप पांडुरंग महाराज घुले, पंडित उद्धवबापू आपेगावकर, महाराष्ट्र राज्य साहित्य व संस्कृती मंडळाचे अध्यक्ष डॉ. सदानंद मोरे हे सन्माननीय पाहुणे म्हणून उपस्थित होते.
अध्यक्षस्थानी एमआयटी वर्ल्ड पीस युनिव्हर्सिटीचे कार्याध्यक्ष डॉ. राहुल विश्वनाथ कराड होते. तसेच पद्मश्री पोपटराव पवार व परिषदेचे प्रमुख समन्वयक योगेश पाटील उपस्थित होते.
डॉ. विजय भटकर म्हणाले,” राजकारणाला अध्यात्मिक कल कसा मिळू शकेल यावर महात्मा गांधीजी सतत विचार मांडत होते. पण या परिषदेच्या माध्यमातून यांची सुरूवात झाली आहे. येथील राजकारणाला आध्यात्मिक कसे करता येईल हे सर्वात मोठे परिवर्तन असेल. राजकारणाला स्वच्छ करण्यासाठी अशा प्रकारच्या गोलमेज परिषदेचे आयोजन होणे अत्यंत गरजेचे आहे. भारताला स्वातंत्र्य कसे आणि कोणत्या पद्धतीने मिळावे या साठी ब्रिटीशकाळात गोलमेज परिषदेला अतिशय महत्व आले होते. ही परिषद लंडन ला भरणार होती आणि येथे हे विचार मांडले जाणार होते. त्याच प्रमाणे ही परिषद देशासाठी अत्यंत महत्वाची आहे.”
डॉ. सदानंद मोरे म्हणाले,” समाजात प्रबोधनाचे सामर्थ्यशाली माध्यम कीर्तन आहे. कीर्तनकार प्रबोधनाच्या माध्यमातून सर्व जातीचे कांगोरे कमी करण्याचे प्रयत्न करीत असतो. या परिषदेत वारकरी शिक्षण संस्थेबद्दल जी चर्चा झाली त्यानुसार आता त्यांना व्यावसायिक कार्याचे प्रशिक्षण देणे काळाची गरज आहे. वारकरी संप्रदायात शिस्तबद्ध आणि ज्यांना व्हिजन आहे अश्या लोकांची खूप गरज आहे. या संप्रदायाने आता मिशन ठेऊन मार्गावर चालावे.”
डॉ. राहुल विश्वनाथ कराड म्हणाले,” ऐतिहासिक परिषदेतून असे सरपंच आणि महाराज तयार व्हावे जेणे करून देशात परिवर्तनाची लाट आली पाहिजे. जीथे अध्यात्माचा बेस असतो तेथे विकास असतोच. त्याच प्रकारे राजकारणात चारित्र्यवान लोक निर्माण करण्यासाठी भारतातील पहिली एसओजी संस्थेची निर्मिती केली आहे. आज याच माध्यमातून राज्यात दोन आमदार व देशात ८ आमदार निवडून आले आहेत. तसेच विद्यार्थ्यांच्या व्यक्तिमत्व विकासासाठी नव नवीन प्रयोग सातत्याने राबविले जात आहे.”
यशोधन महाराज सारखे म्हणाले,” वारकरी संप्रदाय हा परोपकारी संप्रदाय आहे. कीर्तनकारांनी आपल्या आचरणातून आदर्श निर्माण करावा. या परिषदेतून समोर आलेल्या वेगवेगळ्या समस्यांच्या समाधानांचे निराकरण करण्यासाठी संतांनी सांगितलेल्या विचारांवर विचार विमर्श करावा लागेल. तसेच सामाजिक समस्यांसाठी वारकरी संप्रदायाने विचार करावा. ”
यानंतर हभप रामकृष्ण महाराज वीर महाराज आणि विश्वनाथ महाराज वारिंगे यांनी आपल्या भाषणात सांगितले की, समाजाला खरी दिशा देण्याचे कार्य केवळ वारकरी संप्रदाय आणि सरपंच करू शकतात. वारकरी संप्रदाय हा विश्वधर्मी असून स्वामी विवेकानंदाच्या स्वप्नातील भारत निर्मितीच्या कार्यात अनमोल वाटा असेल. कल्याणाची आणि विकासाची मुळ कल्पना घेऊन वारकरी संप्रदायाने मानवी मूल्यांचे मुळ तत्व धरून कार्य करीत आहेत.
सूत्रसंचालन डॉ. शलिनी टोणपे यांनी केले. योगेश पाटील यांनी आभार मानले.

पुणे-पुण्यश्लोक अहिल्यादेवी होळकर पुरस्कार विधानपरिषदेच्या उपसभापती डॉ.नीलम गोऱ्हे यांना जाहीर झाला आहे अशी माहिती संस्थेचे अध्यक्ष विजय कोलते यांनी पत्रकार परिषदेत दिली.

ते म्हणाले,’ पुरस्काराचे हे तिसरे वर्ष असून या वर्षीचा पुरस्कार महाराष्ट्र विधानपरिषदेच्या उपसभापती डॉ. नीलम ताई गोन्हे यांना जाहीर करण्यात येत आहे. त्यांनी महिलांच्या प्रश्नांसाठी केलेले सामाजिक, राजकीय आणि साहित्य विषयक कार्य यांची दखल घेऊन त्यांच्या कार्याचा सन्मान व्हावा, या उद्देशाने त्यांना हा पुरस्कार जाहीर करण्यात येत आहे. हा पुरस्कार शुक्रवार दिनांक २५ जुलै २०२५ रोजी सकाळी ११ वाजून ३० मि. मा. राजे भूषणसिंह होळकर यांच्या हस्ते प्रदान करण्यात येणार असून मा. विजय बापू शिवतारे हे प्रमुख पाहुणे म्हणून उपस्थित राहणार असून हा कार्यक्रम मा. विजय कोलते यांच्या अध्यक्षतेखाली संपन्न होणार आहे. या प्रसंगी दिलीप दादा बारभाई व सुदामाप्पा इंगळे रोहिदास कुंभार माणिकराव झेंडे पाटील मंगेश घोणे यांची प्रमुख उपस्थिती राहणार आहे.आचार्य अत्रे विकास प्रतिष्ठान पुरंदरचे शरदचंद्रजी पवार महाविद्यालय जेजुरी हे पुण्यश्लोक अहिल्यादेवी होळकर यांच्या चिंचबागेत सुरू आहे.त्यांच्याविषयी कृतज्ञता व्यक्त करावी. या उद्देशाने सन २०२३ – २०२४ पासून पुण्यश्लोक अहिल्यादेवी होळकर यांच्या प्रतिवर्षी होणाऱ्या जयंतीचे औचित्य साधून राज्यस्तरीय पुण्यश्लोक अहिल्यादेवी होळकर पुरस्कार सुरू केला आहे.प्रथम पुरस्कार सक्षणा सलगर यांना देण्यात आला होता. दुसरा पुरस्कार डॉक्टर मेधा पुरव-सामंत यांना देण्यात आला होता.

या पुरस्कार प्रदान सोहळ्यासाठी जेजुरी व परिसरातील नागरिक आजी-माजी महाविद्यालयाचे विद्यार्थी, पालक या सर्वांना उपस्थित राहण्याचे आवाहन प्राचार्य डॉ. धनाजी नागणे यांनी केले आहे.

पुणे–

वैद्यराज दातार पांचभौतिक चिकित्सा व संशोधन केंद्र सांगली, आयडीआरए ,भारतीय संस्कृती दर्शन ट्रस्ट वाघोली व सेंटर ऑफ एक्सलन्स, आयुष विभाग ,पुणे विद्यापीठ या चार संस्थांच्या संयुक्त विद्यमाने 20 जुलै रोजी सावित्रीबाई फुले पुणे विद्यापीठ येथे पांचभौतिक चिकित्सा या आयुर्वेदातील विषयावरील दोन दिवसांची राष्ट्रीय स्तरावरील वैद्यकीय परिषद दिमाखात संपन्न झाली. यासाठी भारतभरातून 400 पेक्षा अधिक वैद्य ,विद्यार्थी , पदव्युत्तर विद्यार्थी ,संशोधक यांनी उपस्थिती दाखवली. धूतपापेश्वर, सांडू व इतर अनेक औषधी निर्माण कंपन्यांनी आपली संशोधनाभिमुख उत्पादने येथे सादर केली .
या परिषदेमध्ये पुणे विद्यापीठाचे कुलगुरू डॉ.गोसावी ,
आयुष विभागाचे डॉ.भूषण पटवर्धन डॉ. कौस्तुभ उपाध्याय. आय टी आर ए च्या डायरेक्टर डॉ. तनुजा नेसरी, एथिक्स कमिटीचे अध्यक्ष डॉ राकेश शर्मा बी एस डी टी या संस्थेचे प्रमुख डॉक्टर सदानंद सरदेशमुख तसेच मुख्य कन्व्हेनर वैद्य प्रशांत सुरू, वै.गिरीश टिल्लू ,वै. सुहास जोशी
वै. अशोक वाली, प्रकुलगुरू काळकर सर ,वै. राजेंद्र प्रसाद वै. वारियर हे उपस्थित होते .वैद्य आ.वा. दातारशास्त्री प्रणित पांच भौतिक चिकित्सेचा प्रचार आणि प्रसार व्हावा, त्याचप्रमाणे त्यामध्ये वेगवेगळे संशोधन व्हावे आणि त्याचा जनसामान्यांसाठी उपयोग व्हावा असे विचार मान्यवरांनी व्यक्त केले. भविष्यामध्ये अशाच प्रकारच्या पांचभौतिक चिकित्सेच्या अनुषंगाने वैद्यक परिषदा आयोजित केल्या जातील असे संयोजकांकडून सांगण्यात आले. यावेळेस “पांचभौतिक चिकित्सा तत्त्व संग्रह” या संशोधनपर लेखांच्या पुस्तिकेचे प्रकाशनही करण्यात आले.

पुणे- रोटरी क्लब विज्डमच्या अध्यक्षपदी स्वाती यादव यांची निवड करण्यात आली. मावळते अध्यक्ष निलेश धोपाडे यांच्याकडून त्यांनी सूत्रे स्विकारली. सचिवपदी प्रशांत अकलेकर यांची निवड करण्यात आली. पुण्याई सभागृह कोथरूड यथे संपन्न झालेल्या या कार्यक्रम प्रसंगी प्रांतपाल संतोष मराठे. सहाय्यक प्रांतपाल अॅड.भूषण कुलकर्णी, रोटरी पदाधिकारी, सदस्य व कुटुंबीय उपस्थित होते. या प्रसंगी बोलतांना नवनिर्वाचित अध्यक्ष स्वाती यादव यांनी आगामी वर्षात ग्रीन स्कूल्स आणि ग्रीन एक्स्पो सारख्या पर्यावरणपूरक प्रकल्पांसह अॅनिमिया थॅलेसेमिया विषयक वैद्यकीय शिबिरे, मिलेट(नाचणी,बाजरी ज्वारी) शेतीस प्रोत्साहन, तसेच बोअरवेल रिचार्ज व पावसाच्या पाण्याचे संकलन (रेन वॉटर हार्वेस्टिंग) आदी समाजोपयोगी प्रकल्प राबविणार असल्याचे सांगितले.

पुणे-सामाजिक कार्यात अग्रेसर असणाऱ्या इनरव्हील डिस्ट्रीक्ट ३१३ च्या प्रांतपालपदी डॉ आशा देशपांडे यांची निवड करण्यात आली. मावळत्या प्रांतपाल डॉ.शोभना पालेकर यांच्याकडून त्यांनी सूत्रे स्विकारली. या प्रसंगी प्रमुख पाहुण्या माजी पास्ट इंटरनॅशनल इनरव्हील रिप्रेझेंटिव्ह चारू चिंचणकर, या समारंभाच्या कन्व्हेनर माजी प्रांतपाल सुनंदा हुल्याळकर, को कन्व्हेनर माजी अध्यक्ष शृणाली आपटे, संयोजक इनरव्हील पुणे अध्यक्ष माधवी पुरोहित,सचिव सुजाता जयवंत,ज्येष्ठ उद्योजक फतेचंद रांका आदी मान्यवरांच्या बरोबरच महाराष्ट्रातील सुमारे ६०० समाजसेवी महिला पदाधिकारी उपस्थित होत्या. या प्रसंगी बोलतांना नवनिर्वाचित प्रांतपाल डॉ.आशा देशपांडे यांनी इनरव्हीलच्या सामाजिक कार्यकर्त्यांनी समाजाच्या सर्व स्तरातील गरजूंसाठी प्रकल्प राबवावेत असे सांगितले. ज्येष्ठ उद्योजक व सामाजिक कार्यकर्ते फतेचंद रांका यांनी सामाजिक कार्यकर्त्यांनी ब्रेस्ट कॅन्सर विषयी महिलांमध्ये जनजागृती,निदान व आवश्यकता असल्यास वैद्यकीय सहाय्य यात काम करावे अशी अपेक्षा व्यक्त केली व यासाठी सर्वतोपरी सहाय्य करण्याचे आश्वासन दिले.

पुणे, दि. २१ जुलै, २०२५ – महावितरणकडून वीजग्राहकांना टीओडी (Time of Day) वीजमीटर मोफत बसविले जात आहेत. पुणे परिमंडलात आतापर्यंत वेगवेगळ्या प्रकारच्या ४ लाखांहून अधिक ग्राहकांना वीजमीटर बसविण्यात आले असून, त्यांचे अचूक वीजबिल तयार होत आहे. त्यामुळे वीजग्राहकांनी अफवांना बळी न पडता सदरील मीटर बसविण्यास सहकार्य करावे असे आवाहन महावितरणने केले आहे.

वीजग्राहकांना त्यांचे वीजबिल त्यांच्या वापरानुसार अचूक व वेळेत मिळावे ही अपेक्षा असते. त्यामुळे महावितरण देखील रिडींगसाठी नवनवीन तंत्रज्ञान स्विकारुन वीजबिल तयार करत असते. बदलत्या युगात बहुतांश गोष्टी ऑनलाईन उपलब्ध आहेत. तसे वीजमीटरचे रिंडीग घेण्यासाठी लागणारा वेळ व त्यात होणाऱ्या मानवी चुका टाळण्यासाठी महावितरणने आता टीओडी मीटर बसविण्याचे धोरण स्विकारले आहे. त्यासाठी ग्राहकांना कोणताही खर्च करावा लागणार नाही. महावितरणतर्फे हे मीटर मोफत बसविण्यात येत आहेत.

हे मीटर अत्याधुनिक आहेत. यात ग्राहकाला त्याचा वीजवापर मोबाईलमधून केंव्हाही व कोठूनही तपासता येतो. त्यासाठी ‘महाविद्युत’ हे ॲप विकसित करण्यात आले आहे. नवीन मीटरमुळे महावितरणला रिडींग घेण्यासाठी कोणा बाह्यव्यक्ती अथवा कर्मचाऱ्यांवर अवलंबून राहावे लागणार नाही. त्यामुळे ठरलेल्या तारखेला व काही क्षणांत मीटरची रिडींग ऑनलाईन प्राप्त होते. शिवाय ती अचूक असते. त्यामुळे वीजबिल विनाविलंब तयार होऊन ग्राहकाला उपलब्ध होते. तसेच सौरऊर्जेमुळे महावितरणला स्वस्त विजेची उपलब्धता दिवसा अधिक होत आहे. ही स्वस्त वीज ग्राहकांना दिवसा उपलब्ध करुन देण्यासाठी टीओडी मीटर आवश्यक आहे. कारण आता दिवसाच्या वीज वापरावर सूट दिली जाणार असून या मीटरमध्ये टीओडी (Time of Day) सुविधा देखील उपलब्ध आहे.

मीटर प्रीपेड नसून, पोस्टपेडच

दुसरी अफवा म्हणजे ही मीटर प्रीपेड आहेत त्यामुळे रात्री अपरात्री रिचार्ज संपल्यावर काय करायचे अशाही अफवा सोशलमिडीयावर येत आहेत. यातही तथ्य नाही. सदरचे मीटर पूर्वीच्या मीटरप्रमाणेच पोस्टपेड असतील. महिनाभराच्या वापरानंतर त्यांना नेहमीसारखेच घरपोच किंवा ऑनलाईन वीजबिल मिळणार आहे.

वीजबिल जास्त येत नाही- काकडे

महावितरण पुणे परिमंडलचे मुख्य अभियंता सुनील काकडे यांनी म्हटले आहे कि,’ काही ठिकाणी नविन मीटरचे फायदे समजून न घेता ते बसविण्यापूर्वीच अनाठायी विरोध केला जात आहे. विजेचे बिल जास्त येत नाही तर ते अचूक असेल. ज्या ग्राहकांना मीटरवर शंका आहे. त्यांनी महावितरणच्या विभागाशी संलग्न असलेल्या मीटर चाचणी कक्षात त्याची प्रत्यक्ष पडताळणी करु शकतात. इथे जुन्या व नवीन मीटरवर समान वीजभार टाकून ग्राहकाला मीटर तपासून देण्याची सोय आहे. त्यामुळे ऐकीव किंवा सोशल मिडीयावर आलेल्या अफवांना बळी पडू नये.