पुणे, दि. २२: बेघर नागरिकांना हक्काचे घर उपलब्ध करुन देण्याचे शासनाचे धोरण असून रमाई आवास घरकुल योजनेअंतर्गत पात्र नागरिकांना घरे उपलब्ध करुन देण्याची कार्यवाही करावी, अशी सूचना समाज कल्याण विभागाचे सहायक आयुक्त विशाल लोंढे यांनी केली
जिल्हाधिकारी यांच्या मान्यतेने जिल्हाधिकारी कार्यालयात आयोजित रमाई आवास घरकुल निर्माण, ऊसतोड कामगारांना ओळखपत्र देण्याबाबत जिल्हास्तरीय समिती, तृतीयपंथीयांच्या समस्या, तक्रारी संदर्भात जिल्हास्तरीय तक्रार निवारण समिती, मागासवर्गीय मुला-मुलींसाठी शासकीय तसेच अनुदानित वसतिगृह निरीक्षण समिती, जिल्हा ज्येष्ठ नागरिक समन्वय सनियंत्रण समितीची आढावा बैठकीत ते बोलत होते.
श्री. लोंढे म्हणाले, समाज कल्याण विभागाच्यावतीने ९७३ तृतीयपंथीयांना ओळखपत्र, प्रमाणपत्र, ८०५ मतदान कार्ड उपलब्ध करुन देण्यात आले असून याबाबत पुणे जिल्हा देशात क्रमांक एकवर आहे. शिधापत्रिका उपलब्ध करुन देण्याबाबत विशेष शिबीर आयोजित करावे. याकरिता सामाजिक संस्थेची मदत घ्यावी.
रमाई आवास घरकुल योजनेचा पात्र लाभार्थ्यांना लाभ देण्याकरिता विशेष मोहीम राबवावी. लाभार्थ्यांचे घरकुलाबाबत एका महिन्यात प्रस्ताव सादर करावे. एकही पात्र लाभार्थी योजनेपासून लाभापासून वंचित राहणार नाही, याबाबत दक्षता घ्यावी.
जिल्ह्यातील ज्येष्ठ नागरिक करिता विरंगुळा केंद्राची स्थापना करावी. केंद्राकरिता जागा उपलब्धतेकरिता प्रशासनाने स्थानिक लोकोप्रतिनिधीशी समनव्य साधावा. ज्येष्ठ नागरिकांच्या पोलीस स्टेशनमध्ये प्राप्त तक्रारीचे पोलीसाने प्राधान्याने निराकरण करावे. आरोग्य विभागाने त्यांना उपचार वेळेत मिळेल यादृष्टीने कार्यवाही करावी. सामाजिक न्याय व विशेष सहाय्य विभागाच्या ९ जुलै २०१८ रोजीच्या धोरणाची अंमलबजावणी करुन ज्येष्ठांना न्याय मिळवून देण्याची कार्यवाही करावी.
शासकीय आणि अनुदानित वसतिगृहामधील विद्यार्थ्यांची नियमित आरोग्य तपासणी करावी. विद्यार्थ्यांना मिळणाऱ्या सोई-सुविधांबाबत त्यांच्याशी चर्चा करुन अडीअडचणीचे निराकरण करावे. भाड्याच्या जागेवर असलेल्या इमारती शासकीय जागेवर बांधण्याचे नियोजन असून जागांबाबत संबंधित विभागाने पाठपुरावा करावा.
जिल्ह्यातील साखर कारखान्याने संबंधित ग्रामसेवकाशी समन्वय साधून ऊसतोड कामगारांना ओळखपत्र उपलब्ध करुन देण्यात यावे. त्यांची नियमित आरोग्य तपासणी करावी. तसेच कामगारांना नियमितपणे अन्नधान्य मिळेल याबाबत दक्षता घ्यावी, अशा सूचना श्री. लोंढे यांनी दिल्या.
यावेळी सर्व संबंधित विभागाचे अधिकारी, कर्मचारी, साखर कारखान्याचे अधिकारी आदी उपस्थित होते.
0000

पुणे-पुण्यातून एक धक्कादायक घटना समोर आली आहे. अधिकारी असलेल्या पत्नीवर नजर ठेवण्यासाठी क्लास वन अधिकाऱ्याने घरातच स्पाय कॅमेरे बसवले. या कॅमेराच्या माध्यमातून या अधिकाऱ्याने आपल्या पत्नीवर नजर ठेवणे सुरू केले. धक्कादायक बाब म्हणजे पत्नीच्या अंघोळीचे व्हिडिओ काढून ब्लॅकमेल देखील केले. यानंतर पत्नीने आपल्या क्लास वन अधिकारी पतीसह सासरच्या सात जणांवर आंबेगाव पोलिस ठाण्यात गुन्हा दाखल केला आहे.अंघोळीचे व्हिडिओ व्हायरल करण्याची धमकी देत क्लास वन अधिकारी त्याच्या पत्नीकडून माहेरून गाडी आणि कारच्या हप्त्यासाठी दीड लाखांची मागणी करत मानसिक छळ करत असल्याचे अधिकारी पत्नीने सांगितले. याप्रकरणी पतीसह सासरच्या सात जणांविरुद्ध गुन्हा दाखल करण्यात आला आहे. यात सासू, सासरे, दीर आणि इतर नातेवाईकांचा समावेश आहे.

सन 2020 मध्ये पीडितेचा संबंधित क्लास वन अधिकाऱ्यासोबत विवाह झाला होता. सुरुवातीला त्यांचा संसार सुरळीत आणि आनंदात सुरू झाला. मात्र काही काळातच पतीने पत्नीवर संशय घेण्यास सुरुवात केली. त्यानंतर त्याचे वागणे अधिक त्रासदायक बनत गेले. पती वारंवार पैशांची मागणी करत होता आणि त्यासाठी पत्नीवर मानसिक दबाव टाकत होता. यासोबतच तिच्या हालचालींवर लक्ष ठेवण्यासाठी त्याने घरात गुप्त स्पाय कॅमेरे बसवले.ऑफिसमध्ये गेल्यावर आपल्या पत्नीवर हा अधिकारी आपल्या पत्नीवर नजर ठेवायचा. इतकेच नव्हे तर या अधिकाऱ्याने बाथरूममध्ये देखील स्पाय कॅमेरे बसवले. या माध्यमातून पत्नीचे अंघोळीचे व्हिडिओ त्याने रेकॉर्ड केले असल्याचे समोर आले आहे. अंघोळीचे व्हिडिओ व्हायरल करण्याची धमकी त्याने पत्नीला दिली. तसेच गाडी आणि घरच्या हप्त्यासाठी दीड लाख रुपये माहेरून घेऊन येण्यासाठी जबरदस्ती सुरू केली.

आपल्याला पतीकडून मानसिक आणि शारिरीक छळ होत असल्याचा आरोप करत त्या पत्नीने पोलिसात धाव घेतली आहे. यामध्ये स्पाय कॅमेराच्या व्हिडीओंचीही तक्रार करण्यात आली आहे. या प्रकरणी गुन्हा नोंद करण्यात आला असून पोलिस पुढील तपास करत आहेत.

पुणे, दि. २२ जुलै, २०२५ : पुण्यातील फर्ग्युसन कॉलेज रस्ता हा शहराची शान असणारा भाग आहे. अलीकडच्या काळात या ठिकाणी रात्री उशिराने येऊन बेकायदेशीरपणे विक्री करण्याचे प्रकार वाढले आहे. हे विक्रेते बाहेरील लोक आहेत, त्यामुळे शहराच्या सुरक्षेचा प्रश्न ऐरणीवर आला आहे. त्यामुळे त्यांच्यावर कडक कारवाई करण्याची मागणी शिवाजीनगरचे आमदार सिद्धार्थ शिरोळे यांनी महानगरपालिका आणि पोलीस आयुक्त यांच्याकडे केली आहे. देशातील कुठल्यातरी राज्याच्या नावावर बेकायदेशीररीत्या भारतात आलेले आणि पुणे शहरात फर्ग्युसन रस्त्यावर अनधिकृत व्यवसाय करणाऱ्या लोकांमुळे सुरक्षिततेचे प्रश्न उपस्थित होत असतील तर त्यांना विरोध केला जायलाच हवा, असेही त्यांनी नमूद केले.

नुकत्याच झालेल्या पावसाळी अधिवेशनात शिरोळे यांनी उपस्थित केलेल्या शहरातील महत्त्वाच्या प्रश्नांबाबत माहिती देण्याकरीता आयोजित पत्रकार परिषदेत पत्रकारांनी विचारलेल्या प्रश्नांना उत्तर देताना शिरोळे बोलत होते.  

फर्ग्युसन कॉलेज रस्त्यावर रात्री नऊ नंतर वेगळेच लोक येऊन लहान खोक्यांमध्ये विविध प्रकारच्या वस्तूंची विक्री करत असतात, हे लोक स्थानिक नसून बाहेरून आलेले आहेत. इथे विक्री करण्याचा व्यवसाय ते बेकायदेशीरपणे करत आहेत, त्यामुळे शहराच्या सुरक्षेचा प्रश्न निर्माण झाला आहे, त्यामुळे त्यांच्यावर तातडीने कारवाई करण्याची मागणी आपण महानगरपालिका आणि पोलीस आयुक्त या दोघांची भेट घेऊन त्यांच्याकडे केली असल्याचे शिरोळे यावेळी म्हणाले.

शिवाजीनगर बसस्थाकाविषयी विचारलेल्या प्रश्नाला उत्तर देताना शिरोळे म्हणाले, बसस्थानकाच्या विकासाचे काम हे पब्लिक प्रायव्हेट पार्टनरशिपच्या माध्यमातून सुरु आहे. या ठिकाणी इन्व्हेस्टमेंट लिझ जर अधिक काळ ठेवता आले, तर त्याचा फायदा होणार आहे. सध्या त्यावर काम सुरु असून लवकरच हा प्रश्न मार्गी लागणार आहे. राज्यात महाविकास आघाडीचे सरकार सत्तेत असताना हे काम रेंगाळले होते. आपण या कामात कोणताही खोडा घालत नसून हे काम मार्गी लावण्याचे पूर्ण प्रयत्न करत असल्याचे शिरोळे यांनी नमूद केले.

पुणे विद्यापीठ चौकात उभारण्यात आलेल्या पुलापैकी एका पुलाचे म्हणजे राजभवनापासून ते ईस्क्वेरकडे येणाऱ्या पुलाचे काम पूर्ण होण्याच्या मार्गावर आहे. येत्या महिन्या अखेरपर्यंत हे काम पूर्ण होणार असून त्याचे उदघाटन मुख्यमंत्री देवेंद्र फडणवीस आणि पालकमंत्री अजित पवार यांच्या हस्ते करण्याचे नियोजन आहे. बाणेर आणि पाषाणकडे जाणाऱ्या पुलाचे काम देखील अंतिम टप्यात आले असून ते देखील लवकरच पूर्ण होणार असल्याची माहिती शिरोळे यांनी दिली. शिवाजीनगर येथील आकाशवाणी चौकातील मेट्रोचा खांब हा वाहतुकीसाठी अडथळा ठरत आहे, त्यामुळे त्यावर कोणता पर्याय काढता येईल, यावर चर्चा सुरु असून त्यावर लवकरच तोडगा निघेल, असा विश्वास शिरोळे यांनी व्यक्त केला. पावसाळी अधिवेशनात निर्णय घेण्याच्या दृष्टीने विधायक चर्चा झाल्या, चांगल्या प्रकारचे निर्णय या वेळी घेण्यात आले अशी माहितीही त्यांनी दिली.

पुण्यामध्ये ओव्हरहेड केबलचा त्रास नागरिकांना सहन करावा लागत आहे, त्यामुळे सरकारने त्याबाबतचे डक्ट पॉलिसी तयार करून त्याची सक्ती करण्याची आवश्यकता असल्याचा मुद्दा शिरोळे यांनी अधिवेशनात लावून धरला होता. याशिवाय सार्वजनिक ठिकाणी सीसीटीव्ही बसवण्यासाठी समितीची स्थापना करून सरकार धोरण निश्चित करणार असल्याचेही त्यांनी सांगितले.

पुणे मेडिकल टुरिझम हब म्हणून विकसित करण्याची सूचना शिरोळे यांनी सरकारकडे केली. त्याचबरोबर पुणे हे डिफेन्स स्टार्टअप आणि उत्पादन केंद्र म्हणून सरकारने जाहीर करण्याची मागणी आणि अहमदाबाद येथील नरेंद्र मोदी स्टेडियमच्या धरती वर गहुंजे येथे कॉन्सर्ट अरीना करावा अशी सूचना शिरोळे यांनी अधिवेशनात केली होती.

शहरांमध्ये अंडर फ्लायओव्हर रिडेव्हलपमेंट पॉलिसी करावी, शहरात अन्नधान्य वितरणात होणारे गैरप्रकार टाळण्यासाठी पुण्यामध्ये पूर्णवेळ अन्नधान्य वितरण अधिकाऱ्याची नेमणूक, सायबर गुन्ह्याचा वाढता धोका लक्षात घेता शहरात पाच ठिकाणी सायबर पोलीस ठाणी निर्माण करण्याच्या प्रस्तावाला सरकारने तात्काळ मंजुरी द्यावी, ऑनलाइन दाखले मिळण्यात विलंब होतो आणि विद्यार्थ्यांना महाविद्यालयांच्या प्रवेश प्रक्रियांमध्ये अडचण येते या करिता राज्य शासनाची वेबसाईटची क्षमता वाढवावी अशी मागणी,  शहरातील टेकड्यांवर टाकण्यात येणाऱ्या राडा रोडा थांबवण्यासाठी एक सर्वेक्षण करून असे प्रकार करणाऱ्यांवर कारवाई करण्याची मागणी, शाळांमध्ये सीसीटीव्ही बसवताना त्याची देखभाल करण्याची यंत्रणा देखील उभी करण्यात यावी,  खाजगी जागेतील झाडांच्या फांद्या महानगरपालिकेकडून सवलतीच्या दारात तोडून मिळाव्यात अशा अनेक मागण्या अधिवेशनादरम्यान केल्याचे शिरोळे यांनी नमूद केले.

पुणे दि. 22 : शासकीय मुलींचे वसतिगृह गोलेगाव रोड, शिरुर या वसतिगृहात प्रवेश घेण्याकरिता https://hmas.mahait.org या संकेतस्थळावर अर्ज करुन अधिकाधिक विद्यार्थीनींनी या संधीचा लाभ घ्यावा.
इयत्ता 8 वी व पुढील शिक्षण घेत असलेल्या मागासवर्गीय अनु.जाती, अनु. जमाती, वि.जा.भ.ज., इतर मागासवर्गीय, वि.मा. प्रवर्ग, दिव्यांग व अनाथ प्रवर्गातील विद्यार्थीनींनी अर्ज करावे. या वसतिगृहामध्ये प्रवेश मिळालेल्या विद्यार्थिनींना निवास, भोजन, स्टेशनरी साहित्य, अंथरूण पांघरून व दरमहा निर्वाह भत्ता इ. सोयी सुविधा देण्यात येतात.
अधिक माहितीसाठी मुलींचे शासकीय वसतिगृह शिरुर येथे कार्यालयीन वेळेत अधीक्षिका- 9011461232, कार्यालयीन सहाय्यक – 9022771564 या क्रमांकावर संपर्क साधावा, असे प्रसिध्दी पत्रकान्वये गृहपाल श्रीमती ए. एस. सूर्यवंशी यांनी कळविले आहे.

पुणे दि. 22 : जिल्यातील सर्व माजी सैनिक, माजी सैनिकांच्या विधवा यांच्या पाल्यांना सन 2024-25 मध्ये 60 टक्के किंवा त्यापेक्षा जास्त गुण मिळवून 10 वी, 12 वी व पदवी परिक्षा उत्तीर्ण होऊन पुढील शिक्षण घेत आहेत अशा सर्व माजी सैनिक, माजी सैनिक विधवांच्या पाल्यांना जिल्हा सैनिक कल्याण कार्यालयामार्फत शिष्यवृत्तीचे वाटप करण्यात येणार आहे.

शिष्यवृत्तीचे अर्ज जिल्हा सैनिक कल्याण कार्यालयात उपलब्ध असून संबंधितांनी त्यांचे पाल्यांचे अर्ज 15 ऑक्टोबर 2025 पूर्वी आवश्यक त्या कागदपत्रासह जिल्हा सैनिक कल्याण कार्यालयात सादर करावेत. असे आवाहन ले. कर्नल हंगे स. दै. (नि.), जिल्हा सैनिक कल्याण अधिकारी, पुणे यांनी प्रसिध्दीपत्रकान्वये केले आहे.

पुणे, दि. २२: देशी गोवंशाच्या संरक्षण, संवर्धनासाठी राज्यशासनाच्यावतीने देशी गाय संशोधन केंद्राला ७३ कोटी रुपयाचा निधी उपलब्ध करुन दिला असून आगामी काळातही याकामी आवश्यक ते सहकार्य करण्यात येईल, असे प्रतिपादन राज्याचे क्रीडा व युवक कल्याण मंत्री दत्तात्रय भरणे यांनी केले. देशी गोवंशाच्या संरक्षण, संवर्धनाकरिता सर्वांनी मिळून प्रयत्न करण्याची गरजेचे आहे, असेही त्यांनी नमूद केले.

डॉ. शिरनामे सभागृह, कृषी महाविद्यालय, पुणे येथे महात्मा फुले कृषी विद्यापीठ, देशी गाय संशोधन व प्रशिक्षण केंद्र आणि पुणे जिल्हा मध्यवर्ती सहकारी बँक यांच्या संयुक्त विद्यमाने आयोजित ‘देशी गोवंश जतन व संवर्धन सप्ताहा’च्या समारोपप्रंसगी ते बोलत होते. यावेळी व्यासपीठावर विधानसभा उपाध्यक्ष अण्णा बनसोडे, महाराष्ट्र राज्य गोसेवा आयोगाचे अध्यक्ष शेखर मुंदडा, महाराष्ट्र राज्य कृषी शिक्षण व संशोधन परिषदेचे उपाध्यक्ष तुषार पवार, महात्मा फुले कृषी विद्यापीठाचे अधिष्ठाता डॉ. साताप्पा खरबडे, पुणे जिल्हा मध्यवर्ती सहकारी बँकेचे अध्यक्ष डॉ. दिगंबर दराडे, कृषी महाविद्यालयाचे सहयोगी अधिष्ठाता डॉ. महानंद माने, प्रमुख शास्त्रज्ञ सोमनाथ माने आदी कृषी क्षेत्रातील मान्यवर उपस्थित होते.

श्री. भरणे म्हणाले, देशी गायी बाबत समाजात प्रेम, आत्मयिता असून ग्रामीण भागात महत्वाचे स्थान आहे. त्यामुळे देशी गायीबाबत आज विविध ठिकाणी संशोधन होत आहेत. आगामी काळ हा कृषी क्षेत्राला अनुकूल असून कृषी महाविद्यालयातील विद्यार्थ्यांनी शेती तसेच देशी गोवंशाच्या संरक्षण आणि संवर्धनाबाबत शेतकऱ्यांना माहिती देण्याचे काम करावे. पुरस्कारामुळे आपल्या जबाबदारीत वाढ होते, त्यामुळे देशी गोवंशाच्या संरक्षण आणि संवर्धनाचे काम करण्यासोबतच त्याचे मोठ्या प्रमाणात प्रसार करण्याचे काम करावे, असेही श्री. भरणे म्हणाले.

श्री. बनसोडे म्हणाले, देशी गोवंश जतन व संवर्धन सप्ताहानिमित्त आयोजित कार्यक्रमातून विविध देशी गाईबाबत माहिती मिळाली. त्यामुळे आगामी काळात विविध गोशाळेला भेटी देऊन त्यांचे संरक्षण आणि संवर्धनाच्या कामकाजाविषयी माहिती घेण्यात येईल, असेही श्री. बनसोडे म्हणाले.

श्री. मुंदडा म्हणाले, महाराष्ट्र गोसेवा आयोगाला स्थापन होवून दोन वर्ष झाली असून गोमातेला राज्य मातेचा दर्जा देणारे महाराष्ट्र हे पहिले राज्य आहे. गोवंश परिपोषणासाठी प्रतिमहिना १ हजार ५०० रुपये आणि प्रत्येक तालुक्यात एका गोशाळेला देशी गोवंश निवाऱ्याकरिता १५ ते २५ लाख रुपयांचे अनुदान देण्यात आले आहे. आज सर्वत्र देशी गोवंश जतन व संवर्धन दिन साजरा करण्यात येत आहे. गोसेवा आयोगाच्यातीने गोवंश संवर्धनाकरिता गोसंवर्धन, गोसंगोपन, गोसंरक्षण, गोमयमुल्यवर्धन, गोशाळा, गोरक्षक, गोआधारित शेती, गोपालक, गोसाक्षरता आणि गोपर्यटन या संकल्पनेवर आधारित ‘गो-टेन’ उपक्रम राबविण्यात येत आहे. देशी गोवंश संगोपन, संवर्धनाकरिता महाराष्ट्र गोसेवा आयोग कटीबद्ध आहे, नागरिकांनी यासाठी सहकार्य करावे, असे आवाहन श्री. मुंदडा यांनी केले.

यावेळी मान्यवरांच्या हस्ते देशी गोवंशाच्या संरक्षण, संवर्धनाकरिता काम करणाऱ्या संस्था, व्यक्तींचा सन्मान करण्यात आला.

नामदार चंद्रकांतदादा पाटील यांची मनपा आयुक्तांना सूचना

पुणे:गदिमांप्रमाणे कोथरूड मध्ये सुधीर फडके अर्थात बाबूजींचे स्मारक उभारण्यासाठीचा प्रस्ताव तयार करा, अशी सूचना राज्याचे उच्च व तंत्र शिक्षणमंत्री आणि कोथरुडचे आमदार चंद्रकांतदादा पाटील यांनी महापालिका आयुक्तांना केले आहे.

पुणे महानगरपालिकेच्या वतीने गीतरामायणाचे कवी ग. द. माडगूळकर यांचे स्मारक कोथरुड मध्ये उभारण्यात येत आहे. त्याचप्रमाणे गीतरामायणाचे संगीतकार असलेल्या सुधीरजी फडके यांच्या कार्यास साजेसे स्मारक कोथरुडमध्ये झाल्यास ते अधिक संयुक्तिक होईल. या दोन महान शिल्पकारांची स्मृती जतन करण्याची संधी यानिमित्ताने पुणे महानगरपालिकेला मिळणार आहे. चांदणी चौक परिसर रस्ते विकासामुळे आणि बंगलोर-मुंबईकडे जाणारा राष्ट्रीय महामार्ग कोथरुडजवळूनच जात असल्यामुळे हे स्मारक कोथरुड परिसरातच होणे आवश्यक वाटते.

यामुळे शहरातील वाहतुक या अडचणीशिवाय संपूर्ण राज्यातील आणि देशभरातील रिसकांना तसेच मान्यवर मंडळींना या दोन्ही स्मारकांमध्ये जाणे सोयीचे होईल. महाराष्ट्रातील आणि विदेशातील सुद्धा लक्षावधी रिसकांकडून पुणे महानगरपालिकेच्या या सांस्कृतिक कामाची नोंद घेतली जाईल. त्यामुळे पुणे महानगरपालिकेच्या वतीने सुधीरजी फडके यांचे उचित स्मारक कोथरुडमध्ये उभे करण्याबाबत आवश्यक तो प्रस्ताव तयार करण्यात यावा, अशी सूचना ना. पाटील यांनी मनपा आयुक्तांना केली आहे.