• प्रसिद्ध इतिहास अभ्यासक व माजी पोलिस महानिरीक्षक डॉ. बी. जी. शेखर पाटील यांचे प्रतिपादन

पुणे – “छत्रपती संभाजी महाराजांच्या क्रूर हत्येनंतर मराठी स्वराज्य बलाढ्य औरंगझेबाविरुद्ध किती पराक्रमाने लढले, या लढ्याचा इतिहास रोमहर्षक आहे. या लढ्याची सूत्रे स्वीकारली ती महापराक्रमी संताजी घोरपडे आणि त्यांच्या शूर सहकार्यांनी. सरदार संताजी घोरपडे या व्यक्तिमत्वाने आणि त्यांच्या तळपत्या पराक्रमाच्या गाथेने मला साद घातली. त्याची परिणती ‘शूर सरसेनापती संताजी’ या पुस्तकाच्या लेखनात झाली”, असे मनोगत प्रसिद्ध अभ्यासक, संशोधक आणि माजी पोलिस महानिरीक्षक डॉ. बी. जी. शेखर पाटील (IPS) यांनी मंगळवारी व्यक्त केले. ११ मार्च १६८९ या दिवशी औरंगझेबाने छत्रपती संभाजी महाराजांची क्रूर हत्या केली होती. मंगळवारी धर्मवीर शंभूराजांच्या स्मृती जागवणाऱ्या दिवसाचे औचित्य साधून डॉ. शेखर पाटील यांनी पत्रकारांशी संवाद साधला. शंभूराजांच्या हत्येनंतरच्या काळातील मराठा सरदार, औरंगजेब, त्यांच्या लढाया विशेतः संताजी घोरपडे याविषयी डॉ. शेखर पाटील यांचा विशेष अभ्यास आहे.

डॉ. शेखर पाटील म्हणाले, “१६८३ ते १६९४ पर्यंतच्या काळात मराठी सैन्य संताजींच्या नेतृत्वाखाली औरंगझेबाशी लढत राहिले, हा इतिहास आहे. छत्रपती राजाराम महाराज जिंजीच्या किल्ल्यावर वेढ्यात असतानाही, मराठी स्वराज्याचे सर्व अर्थांनी रक्षण आणि बलाढ्य शत्रूशी दोन हात अशी कामगिरी करणारे संताजी घोरपडे हे व्यक्तिमत्व मला सदैव साद घालत राहिले. त्यातूनच या काळाविषयीच्या माझ्या संशोधनाला चालना मिळाली, आणि ‘शूर सरसेनापती संताजी’ या पुस्तकाचे लेखन घडले. आता लवकरच या पुस्तकावर आधारित रणधुरंधर संताजी हा मराठी चित्रपट प्रेक्षकांच्या भेटीस येणार आहे. उच्च दर्जाच्या सिनेमॅटोग्राफी साठी प्रसिद्ध असलेले व विविध राष्ट्रीय पुरस्कारांचे मानकरी असलेले दिग्दर्शक अमोल गोळे हा चित्रपट दिग्दर्शित करणार आहेत”, अशी माहितीही त्यांनी दिली. याप्रसंगी दिग्दर्शक अमोल गोळे, डॉ. अनिरुद्ध आंबेकर, करणसिंग बांदल, एकनाथ दुधे, आदित्य शेखर पाटील, निवृत्ती नवले तसेच घोरपडे घराण्याचे वंशज चंद्रहार घोरपडे व मानसिंग घोरपडे तसेच अन्य घोरपडे कुटुंबीय उपस्थित होते. यावेळी चित्रपटाच्या पहिला पोस्टरचे अनावरण करण्यात आले.

डॉ. शेखर पाटील पुढे म्हणाले, “शिवरायांचे जन्मस्थान असणार्या शिवनेरी किल्ल्याच्या पायथ्याशी माझे लहानपण गेले. तेव्हापासून इतिहासाची गोडी लागली. अभ्यास सुरू झाला. अवघ्या २३ व्या वर्षी संभाजी महाराज छत्रपती झाले. त्यानंतरची ९ वर्षे त्यांनी औरंगझेबाशी अशा लढाया केल्या, की औरंगझेबाने विचार बदलून आधी निजामशाही, आदिलशाही आणि कुतुबशाही संपविण्याचा निर्णय घेतला. या संपूर्ण काळाचे संशोधन हा माझ्या विशेष अभ्यासाचा विषय आहे. सलग ५ वर्षे संशोधन, सुमारे ८ हजार किलोमीटरचा प्रवास, लढायांची माहिती. या काळाशी संबंधित प्रत्येक स्थळाला भेट देऊन, मी लेखन केले आहे. सर्व उपलब्ध कागदपत्रांचा मी अभ्यास केला आहे. सुमारे ८ वर्षे स्वराज्याचे सेनापती या नात्याने संताजी घोरपडे यांनी स्वराज्य जपले, राखले, आणि औरंगजेबाला हैराण केले. संताजींच्या महापराक्रमी कर्तृत्वाला आदरांजली म्हणून माझा लेखनप्रपंच आहे, त्या लेखनाचे चित्रपटरूपही लवकरच रसिकांसमोर येईल. या विशिष्ट काळातील इतिहास, आणि मराठी सरदारांचे महान कर्तृत्व सर्वांसमोर यावे, हाच उद्देश आहे”.

दिग्दर्शक अमोल गोळे म्हणाले, “ऐतिहासिक चित्रपट करताना वातावरणनिर्मिती, पेहराव, तत्कालीन वास्तू, वस्तू यांना सर्वाधिक महत्त्व असते, हे मी मंगल पांडे, पावनखिंड या ऐतिहासिक चित्रपटांसाठी काम करताना शिकलो आहे. ‘रणधुरंदर संताजी’ चित्रपटाचे दिग्दर्शन करताना हा अनुभव उपयोगी ठरेल. सुमारे वर्षभराच्या काळात हा चित्रपट रसिकांसमोर येईल, असा आमचा प्रयत्न राहील”.

घोरपडे घराण्याचे वंशज चंद्रहार घोरपडे म्हणाले, “संताजी घोरपडे हा घराण्याचा अभिमान आहे. संताजींचे वडील मालोजी घोरपडे हे छत्रपती संभाजी महाराजांचे सरसेनापती होते. या पितापुत्रांनी स्वराज्यासाठी जे योगदान दिले, त्याचे दर्शन यातून घडेल”, याचा विश्वास आहे.

• पुणे प्रादेशिक संचालक भुजंग खंदारे यांचे गौरवोद्गार

पुणे, :तांत्रिक व अत्यंत धकाधकीच्या वीजक्षेत्रामध्ये काळानुरुप आव्हाने स्वीकारण्यासाठी सक्षम असल्याचे महिला अभियंता, अधिकारी व कर्मचाऱ्यांनी आजवर केलेल्या उल्लेखनीय कामगिरीवरून सिद्ध केले आहे असे गौरवोद्गार महावितरणचे पुणे प्रादेशिक संचालक भुजंग खंदारे यांनी काढले.

जागतिक महिला दिनानिमित्त महावितरणकडून रास्तापेठ येथील प्रशासकीय इमारतीच्या ‘प्रकाशदीप’ सभागृहात पुणे परिमंडलातील महिला अभियंता, अधिकारी व कर्मचाऱ्यांसाठी विविध कार्यक्रमांचे आयोजन करण्यात आले. यावेळी प्रादेशिक संचालक खंदारे बोलत होते.व्यासपीठावर मुख्य अभियंता राजेंद्र पवार, अधीक्षक अभियंते सर्वश्री युवराज जरग, सिंहाजीराव गायकवाड, रवींद्र बुंदेले, सहायक महाव्यवस्थापक (वित्त) माधुरी राऊत (वित्त व लेखा) यांची उपस्थिती होती. यावेळी पाहुण्यांच्या हस्ते सर्व संवर्गातील महिला अधिकारी, अभियंता, कर्मचाऱ्यांचा प्रातिनिधिक गौरव करण्यात आला.

मुख्य अभियंता राजेंद्र पवार म्हणाले की, महावितरणमध्ये महिला अभियंता, अधिकारी व कर्मचाऱ्यांची संख्या लक्षणीय आहे व त्या अतिशय सक्षमपणे काम करीत आहेत. कौटुंबिक व नोकरीच्या जबाबदाऱ्या एकाचवेळी सांभाळताना योग्य ताळमेळ साधण्याचे कसब महिलांमध्ये अधिक आहे.

‘महिला दिना’निमित्त आरोग्य तपासणी, नेत्र तपासणी शिबिराचे आयोजन करण्यात आले. तसेच प्रधानमंत्री सूर्यघर योजना व नवीकरणीय ऊर्जा याबाबत सहायक अभियंता शुभांगी क्षीरसागर यांनी सादरीकरणाद्वारे माहिती दिली. यानंतर खास महिलांसाठी संगीत रजनीचा कार्यक्रम झाला. सूत्रसंचालन उपकार्यकारी अभियंता ऐश्वर्या वस्त्रद यांनी केले. कार्यक्रमाला महिला अभियंता, अधिकारी व कर्मचारी मोठ्या संख्येने उपस्थित होते.

पुणे ; महावितरणच्या पर्वती विभाग अंतर्गत वडगाव शाखा कार्यालयाचे वडगावमधील मध्यवस्तीत स्थानांतरण करण्यात आले. या कार्यालयाच्या नव्या वास्तूचे उद्घाटन मुख्य अभियंता श्री. राजेंद्र पवार यांच्याहस्ते नुकतेच झाले.

वडगाव धायरी उपविभागातील वडगाव शाखा कार्यालय पूर्वी अभिरूची मॉलसमोर भाडेपट्टी तत्त्वावर होते. आता हे कार्यालय वडगावमधील महावितरणच्या मालकीच्या जागेमध्ये कृष्णकुंज सोसायटी, सिंहगड कॉलेज रस्ता, महादेव मंदिराजवळ येथे स्थानांतरीत करण्यात आले आहे. वडगाव परिसरातील सुमारे ३२ हजार ग्राहकांना वीज व विविध ग्राहकसेवा देणाऱ्या या कार्यालयासाठी नवीन वास्तू उभारण्यात आली आहे.

या  वास्तुचे उद्घाटन करताना मुख्य अभियंता श्री. राजेंद्र पवार यांनी अभियंता व कर्मचाऱ्यांशी संवाद साधला. यावेळी श्री. पवार यांनी तत्पर ग्राहकसेवेसोबतच तक्रारी व समस्यांचे विनाविलंब निराकरण करण्याचे निर्देश दिले. कार्यक्रमाला प्रभारी अधीक्षक अभियंता श्री. रवींद्र बुंदेले, कार्यकारी अभियंता श्री. मनीषकुमार सूर्यवंशी, अतिरिक्त कार्यकारी अभियंता श्री. अविनाश कलढोणे व श्री. राहुल यादव (स्थापत्य), श्री. विशाल लंके, वडगावचे शाखा अभियंता श्री. आतिश इंगळे व कर्मचाऱ्यांची उपस्थिती होती.

पुणे, दि. ११ मार्च २०२५: महावितरणच्या पर्वती विभाग अंतर्गत दत्तवाडी शाखा कार्यालयाच्या प्रांगणातील पडीक जागेत उभारलेल्या ‘प्रकाशदूत’ बागेचे उद्धाटन मुख्य अभियंता श्री. राजेंद्र पवार यांच्याहस्ते नुकतेच झाले. या शाखा कार्यालयाच्या प्रांगणात सुमारे ८०० चौरसफूट जागा अडगळीने व्यापली होती. तेथे साफसफाई करून हिरव्या गवताचा गालिचा व सुमारे १५० झाडांची रोपटे लावून वनराई फुलवली आहे.

‘लाइनमन दिना’निमित्त पर्वती विभागाकडून दत्तवाडी शाखा कार्यालयात कार्यक्रमाचे आयोजन करण्यात आले होते. यावेळी प्रामुख्याने छोटेखानी ऑक्सीजन रोपट्यांची लागवड केलेल्या ‘प्रकाशदूत’ बागेचे उद्घाटन मुख्य अभियंता श्री. पवार यांच्याहस्ते झाले. यावेळी अधीक्षक अभियंता श्री. रवींद्र बुंदेले व श्री. संजीव नेहेते, कार्यकारी अभियंता श्री. मनीषकुमार सूर्यवंशी व श्री. विजेंद्र मुळे यांची प्रमुख उपस्थिती होती. पाहुण्यांच्या हस्ते लाइनमन व लाइनवूमनचा प्रातिनिधिक गौरव करण्यात आला.

मुख्य अभियंता श्री. पवार यांनी अभियंता व जनमित्रांशी संवाद साधला. ‘महावितरणच्या सेवेचा केंद्रबिंदू हा वीजग्राहकच आहे. त्यांना दर्जेदार व तत्पर सेवा देण्यासोबतच स्वतःच्या आणि ग्राहकांच्या वीजसुरक्षेला सर्वोच्च प्राधान्य द्या’ असे आवाहन त्यांनी केले. कार्यक्रमाला अतिरिक्त कार्यकारी अभियंते उमेश कवडे, उमेश करपे, राहुल यादव, सहायक अभियंता चेतन सोनार व महेश देशमुख आदींसह अभियंते, जनमित्र उपस्थित होते.

• शिवजयंती महोत्सव समिती, पुणे तर्फे भव्य रक्तदान मानवंदनेचे आयोजन ; १०० स्वराज्यघराण्यांचा आणि महाराष्ट्रातील शिवशंभू भक्तांचा सहभाग 

पुणे : शिवजयंती महोत्सव समिती, पुणे तर्फे स्वराज्यरक्षक धर्मवीर छत्रपती संभाजी महाराज यांच्या ३३६ व्या बलिदान दिनी रक्तदानातून मानवंदना देण्यात आली. मानवंदनेचे हे सलग १२ वे वर्ष आहे. यावेळी जिजाऊ माँसाहेब शहाजी महाराज शिवज्योत रथाच्या नेतृत्वाखाली शिवजन्मोत्सव स्वराज्यरथ सोहळ्यात सहभागी होणाऱ्या तब्बल १०० स्वराज्यघराण्यांच्या वंशजांनी, ढोलताशा पथकांनी, क्रिडा संघटनांनी, गणेशोत्सव मंडळांनी रक्तदान मानवंदनेत सहभाग नोंदवला.

शुभारंभ लॅान्स, म्हात्रे पूल डीपीरोड येथे मानवंदनेची सुरुवात छत्रपती संभाजी महाराजांच्या पुतळ्याला पुष्पहार अर्पण करुन करण्यात आला. यावेळी रक्तदान मानवंदनेचे संकल्पक समितीचे संस्थापक अध्यक्ष अमित गायकवाड, सचिन पायगुडे, रवींद्र कंक, शंकर कडू, मंगेश शिळीमकर, प्रवीणभय्या गायकवाड, रिंकल अमित गायकवाड तसेच स्वराज्यघराण्यांचे प्रतिनीधी उपस्थित होते.

रक्तदान मानवंदनेची सुरुवात ईशान अमित गायकवाड, सचिन पायगुडे, महेंद्र भोईटे, अविनाश कडू, राजेश जोगदंड, सुनील जोगदंड, दादा भोसले, मंदार मते, बाजीराव निगडे,  ऋषीकेश पासलकर यांनी रक्तदान करुन केली. यावेळी रक्तदात्यांचा संकल्प पुर्ण झाला. हिंजवडी रक्तपेढीने रक्त संकलन केले.

अमित गायकवाड म्हणाले, स्वराज्यरक्षक धर्मवीर छत्रपती संभाजी महाराज यांचा बलिदान दिन ११ मार्च हा दिवस “महामृत्युंजय रक्दान दिन” म्हणुन महाराष्ट्र सरकारने जाहीर करावा अणि त्यादविशी संपुर्ण महाराष्ट्रात रक्तदान चळवळीतून संभाजी महाराजांना मानवंदना द्यावी. ज्या स्वराज्यरक्षक छत्रपती संभाजी महाराजांनी रक्ताचा थेंबनथेंब अर्पण केला स्वराज्याच रक्षण करण्यासाठी, भारतभूमीच रक्षण करण्यासाठी, भारताच्या गौरवशाली संस्कृतीच रक्षण करण्यासाठी त्या स्वराज्यरक्षक छत्रपती संभाजी महाराजांना रक्तदानातुन मानवंदना देऊयात, रक्ताच पांग रक्ताने फेडूया, रक्ताचे रक्ताशी नाते जोडूयात ही जाणीव जपत आम्ही सलग १२ वर्षे रक्तदान मानवंदना आयोजित करीत आहोत आणि भविष्यात राज्यव्यापी मानवंदनचे आयोजन करण्यात येणार आहे.

पुणे, १० मार्चः पुनित बालन ग्रुप तर्फे आयोजित पुण्यातील गणपती मंडळ, नवरात्र मंडळ, ढोल-ताशा पथकांच्या संघांचा समावेश असलेल्या चौथ्या ‘फ्रेंडशिप करंडक’ क्रिकेट अजिंक्यपद स्पर्धेत प्रज्योत शिरोडकर याने फटकावलेल्या नाबाद ६० धावा आणि प्रसाद घारे (नाबाद ४२) यांच्या फलंदाजीच्या जोरावर रमणबाग फायटर्स संघाने रंगारी रॉयल्स् संघाचा १० गडी राखून सहज पराभव केला आणि स्पर्धेच्या विजेतेपदावर पहिल्यांदाच आपले नाव कोरले.

सहकारनगर येथील ल.रा. शिंदे हायस्कूल येथील मैदानावर झालेल्या स्पर्धेच्या अंतिम सामन्यामध्ये पहिल्यांदा फलंदाजी करताना रंगारी रॉयल्स् संघाने १० षटकामध्ये १०३ धावांचे लक्ष्य उभे केले. यामध्ये स्पर्धेचा सर्वोत्कृष्ठ खेळाडू ठरलेला निलेश साळुंखे याने ३५ चेंडूत ७ चौकार आणि ३ षटकारांसह ६३ धावांची खेळी केली. त्याला विशाल मुधोळकर याने १६ धावा करून साथ दिली. हे लक्ष्य रमणबाग फायटर्स संघाने ७.२ षटकात व एकही फलंदाज न गमवता पूर्ण केले. सामन्याच्या दुसर्‍या डावामध्ये वर्चस्व गाजवताना रमणबाग संघाच्या प्रज्योत शिरोडकर याने २० चेंडूत ६ चौकार आणि ४ षटकारांसह नाबाद ६० धावाची खेळी केली. प्रसाद घारे याने दुसर्‍या बाजुने नाबाद ४२ धावांची खेळी करून संघाला सहज विजय मिळवून दिला.

स्पर्धेचे पारितोषिक वितरण पुनित बालन ग्रुपचे संचालक आणि स्पर्धेचे आयोजक पुनित बालन, माणिकचंद ऑक्सिरीचच्या संचालिका जान्हवी धारीवाल-बालन आणि प्रसिध्द सिनेचित्रपट अभिनेता आकाश ठोसर यांच्या हस्ते करण्यात आले. यावेळी पुण्यातील गणपती मंडळ, नवरात्र मंडळांचे अध्यक्ष, मंडळाचे सदस्य, कार्यकर्ते, ढोल-ताशा पथकातील सदस्य, मीडिया क्षेत्रातील मान्यवर सदस्य व सहभागी संघ आणि संघातील खेळाडू आदि उपस्थित होते.

विजेत्या रमणबाग फायटर्स संघाला २ लाख ११ हजार रूपये, करंडक व मेडल्स् तर, उपविजेत्या रंगारी रॉयल्स् संघाला १ लाख ११ हजार रूपये, करंडक आणि मेडल्स् देण्यात आले. मालिकेचा सर्वोत्कृष्ट खेळाडू निलेश साळुंखे याला ५१ हजार रूपये आणि इलेक्ट्रिक बाईक देण्यात आली. ‘फेअर प्ले’ पुरस्कार जिंकणार्‍या युवा योद्धाज् संघ संघाला २५ हजार रूपयांचे रोख पारितोषिक देण्यात आले. याबरोबरच स्पर्धेतील सर्वोत्कृष्ट फलंदाज- रूपक तुबाजी, गोलंदाज- सत्यजीत पाळे, यष्टीरक्षक- मयुरेश चासकर, क्षेत्ररक्षक- विशाल मुधोळकर आणि सर्वोत्कृष्ठ ५० वर्षावरील खेळाडू- संतोष गायकवाड या सर्वांना प्रत्येकी ११ हजार रूपये आणि सन्मानचिन्ह देण्यात आले.

अंतिम सामन्याचा संक्षिप्त निकालः
रंगारी रॉयल्स्ः १० षटकात ६ गडी बाद १०३ धावा (निलेश साळुंखे ६२ (३५, ७ चौकार, ३ षटकार), विशाल मुधोळकर १६, अथर्व हिरवे ३-२, प्रज्योत शिरोडकर १-११) पराभूत वि. रमणबाग फायटर्सः ७.२ षटकात बिनबाद १०४ धावा (प्रज्योत शिरोडकर नाबाद ६० (२०, ६ चौकार, ४ षटकार), प्रसाद घारे नाबाद ४२ (२५, ३ चौकार, ३ षटकार); सामनावीरः प्रज्योत शिरोडकर;

स्पर्धेची वैयक्तिक आणि इतर पारितोषिकेः
स्पर्धेतील सर्वोत्कृष्ठ खेळाडूः निलेश साळुंखे (१५१ धावा, ७ विकेट; रंगारी रॉयल्स्);
सर्वोत्कृष्ठ फलंदाजः रूपक तुबाजी (२५३ धावा, शिवमुद्रा ब्लास्टर्स);
सर्वोत्कृष्ठ गोलंदाजः सत्यजीत पाळे (१० विकेट, रमणबाग फायटर्स);
सर्वोत्कृष्ठ क्षेत्ररक्षकः विशाल मुधोळकर (रंगारी रॉयल्स्);
सर्वोत्कृष्ठ यष्टीरक्षकः मयुरेश चासकर (१२ बाद; रमणबाग फायटर्स);
सर्वोत्कृष्ठ ५० वर्षावरील खेळाडूः संतोष गायकवाड (गजर सुपरनोव्हा);
फेअर प्ले पुरस्कारः युवा योद्धाज् संघ;

पुणे, :- विभागातील सर्वसामान्य जनतेच्या तक्रारी, अडचणी यांची शासकीय यंत्रणेकडून न्याय व तत्परतेने सोडवणूक करण्यासाठी
विभागीय आयुक्त डॉ. चंद्रकांत पुलकुंडवार यांच्या अध्यक्षतेखाली आयोजित लोकशाही दिनात चार प्रकरणांवर सुनावणी घेण्यात आली. जिल्हास्तरीय लोकशाही दिनामध्ये विभागातील सर्व जिल्हाधिकाऱ्यांनी स्वतः सुनावणी घेऊन प्रकरणे निकाली काढावीत, असे निर्देश डॉ. पुलकुंडवार यांनी यावेळी दिले.

यावेळी अपर आयुक्त उपायुक्त समीक्षा चंद्राकर तसेच विविध विभागांचे विभागस्तरीय अधिकारी उपस्थित होते. नागरिकांच्या तक्रारीवर निर्णय घेण्यासाठी दर महिन्याच्या दुसऱ्या सोमवारी विभागीय लोकशाही दिनाचे विभागीय आयुक्त कार्यालयात आयोजन करण्यात येते.

जिल्हास्तरीय लोकशाही दिनात तक्रार निवारण न झालेल्या प्रलंबित दोन व नव्याने दाखल झालेल्या दोन प्रकरणांवर यावेळी विभागीय आयुक्त डॉ.पुलकुंडवार यांनी अर्जदारांना त्यांचे म्हणणे मांडण्याची संधी दिली आणि सुनावणी घेतली. यात पुणे जिल्ह्यातील तीन, कोल्हापूर जिल्ह्यातील एका प्रकरणावर सुनावणी घेण्यात आली. पुनर्वसन प्लॉटचा ताबा मिळण्याबाबत, पावसाळी नाला बांधकाम नकाशात न दर्शविल्यामुळे व साईड मार्जिनमध्ये येत असल्यामुळे बांधकाम परवानगीस स्थगिती देण्याबाबत, ट्रक चोरी प्रकरणी कार्यवाही होण्याबाबत आदी तक्रारींवर सुनावणी घेण्यात आली.