पुणे- एका व्यावसायिकाच्या हत्येची खळबळजनक घटना बिहारमध्ये उघडकीस आली आहे. यामुळे खळबळ उडाली आहे. घोसी पोलीस स्टेशन हद्दीतील माननपूर गावाजवळ शनिवारी, १२ एप्रिल रोजी सकाळी मृतदेह आढळून आला होता.त्यानंतर सोमवार १४ एप्रिल रोजी मृतदेहाची ओळख पटली. मृत व्यक्तीचे नाव लक्ष्मण साधू शिंदे असे आहे. हा पुण्यातील एक व्यापारी होता आणि तो भंगार व्यवसायिक होता.

प्राप्त माहितीनुसार,सायबर गुंडांनी कोथरूडमधील व्यावसायिकाला पाटण्याला बोलावले आणि नंतर त्याचे अपहरण करून हत्या केली. गळा दाबून या ५५ वर्षीय उद्योगपतीचा खून करण्यात आला आहे. कंपनीच्या कामासाठी मेल करून या व्यक्तीला पाटण्याला बोलवले होते. कंपनीचे काही टूल्स आणि मशीनरी स्वस्त भावात विकत देतो, असा आरोपींकडून उद्योगपतीला मेला आला होता.
स्वस्तात मशिनरी मिळेल यासाठी उद्योगपती लक्ष्मण साधू शिंदे बिहारला गेले होते. त्यानंतर तिथे त्यांची हत्या करण्यात आली आहे. पुण्यातील कोथरूड पोलीस स्टेशनमध्ये बेपत्ता असल्याची तक्रार कुटुंबाकडून देण्यात आली होती. खून का केला याच कारण अद्याप समजू शकले नाही. मात्र बिहारच्या स्पेशल टीमने या संदर्भात पाच संशयितांना ताब्यात घेतले आहे.आरोपींनी त्यांची हत्या करून बिहारच्या-जेहानबाद राष्ट्रीय महामार्ग क्रमांक 33 वर टाकून दिला. त्यानंतर आरोपींनी घटनास्थळावरून पळ काढला आहे. पाटणा पोलिसांकडेही लक्ष्मण शिंदे गायब झाल्याची तक्रार प्राप्त झाली होती. हत्या झाल्यानंतर बिहार पोलिसांच्या विशेष पथकाने पाच संशयितांना जेहानबाद आणि नालंदा या जिल्ह्यातून अटक केली.

तसेच त्यांचा मृतदेह आणण्यासाठी पुणे पोलीस बिहारमध्ये दाखल झाले आहेत. या काळात, गुन्हेगारांनी त्या व्यावसायिकाला पाटणा, नालंदा आणि जहानाबाद येथे नेले असावे, असा संशय पोलिसांना आहे. या प्रकरणाचे पडसाद पाटणा पोलीस मुख्यालयापर्यंत पोहोचले आहेत. या हाय-प्रोफाइल खून प्रकरणाचा तपास पाटणा, जहानाबाद आणि नालंदा पोलीस संयुक्तपणे करत आहेत. या प्रकरणी बिहार पोलिसांकडून अधिक चौकशी सुरू आहे.

पुणे, दि.१५: महाराष्ट्र राज्य महिला आयोगाच्या “महिला आयोग आपल्या दारी” उपक्रमांतर्गत नियोजन भवन, जिल्हाधिकारी कार्यालय येथे आयोजित सुनावणीत पुणे शहरातील कौटुंबिक छळ, मालमत्ता आदी प्राप्त एकूण १२३ तक्रारींवर कार्यवाही करण्यात आली आहे.

आयोगाच्या अध्यक्षा रूपाली चाकणकर आज पासून तीन दिवस पुणे जिल्हा दौऱ्यावर आहेत १६ एप्रिल रोजी पुणे ग्रामीणकरिता जिल्हाधिकारी कार्यालय आणि १७ एप्रिल रोजी पिंपरी चिंचवड येथे जनसुनावणी होणार आहे.

श्रीमती चाकणकर यांनी आज पुणे शहर विभागासाठी जनसुनावणी घेतली. महिलांना मुंबई येथील आयोगाच्या कार्यालयात येण्याची गरज भासू नये, त्यांना त्यांच्या जिल्ह्याच्या ठिकाणी न्याय मिळावा यासाठी आयोगाकडून सर्व संबंधित यंत्रणेसोबत जिल्हास्तरावर सुनावणी आयोजित करण्यात आली आहे. यावेळी एकाच छताखाली पोलिस, प्रशासन उपस्थित असल्याने महिलांच्या तक्रारीवर त्याच ठिकाणी कार्यवाही करण्यात येत आहे.

श्रीमती चाकणकर यांनी जिल्ह्यातील महिला व बालकांच्या प्रश्नांबाबत आढावा घेतला. यावेळी पोलिस, प्रशासन, महिला व बालविकास, कामगार, परिवहन, शिक्षण, आरोग्य विभागाच्या वरिष्ठ अधिकाऱ्यांनी आपल्या विभागांचे सादरीकरण केले.

जनसुनावणी आणि आढावा बैठकीस जिल्हाधिकारी जितेंद्र डूडी, पोलिस उपायुक्त (गुन्हे) निखिल पिंगळे, आयोगाच्या सदस्य सचिव नंदिनी आवडे, निवासी उपजिल्हाधिकारी ज्योती कदम, जिल्हा महिला बालविकास अधिकारी मनिषा बिरारीस उपस्थित होते.

स्व.तनिषा भिसे यांच्या मृत्यूनंतर महिलांच्या आरोग्याच्या दृष्टीने रुग्णालयासाठी मार्गदर्शक तत्वे असावीत अशी आयोगाची भूमिका होती. त्याबाबत उपसंचालक आरोग्य डॉ राधाकिसन पवार, ससून रुग्णालयाचे अधिष्ठाता डॉ एकनाथ पवार यांनी आपला अहवाल आयोगास सादर केला. श्रीमती रूपाली चाकणकर यांनी, जनसुनावणी आणि आढावा बैठकीनंतर आयोजित पत्रकार परिषदेत माहिती देतांना एसओपीबाबत माहिती दिली.

पुणे– पुणे महापालिका आंतर जिल्हा बदलीतील गैरव्यवहाराची चौकशी करावी, अशी मागणी माजी विरोधी पक्ष नेते उज्वल केसकर, सुहास कुलकर्णी आणि प्रशांत बधे यांनी शिक्षण आयुक्त यांच्याकडे केली आहे. पुणे महानगरपालिकेमध्ये 318 शिक्षक भरती मध्ये घोटाळा झाला होता, त्याबाबत सर्व तपशील सरकारला सादर केला होता. राज्य सरकारच्या शिक्षण आयुक्ताने आदेशही दिले; परंतु पुणे महानगरपालिकेने पुढे काही केले नाही. असा आरोप देखील माजी नगरसेवकांनी केला आहे. नागपूर च्या धर्तीवर पुणे महापालिकेतील शिक्षक भरती गैरव्यवहार प्रकरणाची पुन्हा चर्चा सुरु झाली आहे.

माजी नगरसेवकांनी शिक्षण आयुक्त आणि राज्य सरकारला दिलेल्या निवेदन नुसार पुणे महानगरपालिकेच्या हद्दीत समाविष्ट 34 गावांमध्ये शिक्षकांची संख्या असताना त्या शिक्षकांचा समावेश महानगरपालिकेत न करता त्यांना जिल्हा परिषदेमध्ये ठेवले आणि इतर जिल्हा परिषद मधून शिक्षक आले हे चुकीचे आहे, कायदेशीर कदाचित योग्य असू शकेल. पवित्र पोर्टलवरूनं अतिशय पारदर्शी प्रक्रिया आपण राबवली जात आहे. परंतु पुणे महानगरपालिकेच्या शिक्षण विभागाने पाठवलेल्या माहिती बाबत सुस्पष्ट खुलासा पुणे महानगरपालिका कडून मागवावा. आत्ता पवित्र पोर्टल मध्ये ज्यांना नेमणुका दिला आहेत, त्यांची कागदपत्र तपासणी होईपर्यंत पुणे महानगरपालिकेची संच मान्यता, उपलब्ध शिक्षक, संवर्गातील शिक्षक व पदवीधर शिक्षक यांचा पूर्ण ताळमेळ लागल्याशिवाय पुढच्या कुठल्याही गोष्टीला मान्यता देऊ नये. पुणेकर नागरिक भरत असलेल्या कर रकमेतून 50 टक्के पगार प्रशासनामार्फत या शिक्षकांवर खर्च होतो. त्यामुळे यामध्ये पारदर्शक व्यवहार असणं आवश्यक आहे. असे पुणेकर म्हणून आमचे मत आहे. असे निवेदनात म्हटले आहे.

ज्या ज्या शंका आमच्या मनामध्ये आहेत त्या बाबत आम्ही प्रशासनाकडे खुलासे मागितले आहेत चर्चा केली आहे परंतु कागदपत्र अद्याप मिळालेली नाही. या शिक्षकांच्या पगारांपैकी 50 टक्के वाटा महाराष्ट्र शासन देखील उचलणार आहे त्यामुळे शासनाने देखील पूर्ण खात्री करणे आवश्यक आहे असे आमचे मत आहे. 313 शिक्षक इतर जिल्हा परिषद मधून जे आले त्यांची पदवीधर अ पदवीधर विषय संवर्ग आणि रोस्टर याची तपासणी न करता नियुक्ती केली आहे त्याची देखील संपूर्णपणे तपासणी होणं आवश्यक आहे. माजी नगरसेवकांनी पुढे म्हटले आहे कि, याबाबत जे एक सकारात्मक पाऊल उचलले आहे त्याचे आम्ही स्वागत करून याबाबत अधिक चौकशी करावी अशी मागणी करतो आहोत. जे गैर मार्गाने कायदा धाब्यावर बसवून पुणे शहरांमध्ये नियुक्ती करून घेतली आहे त्याबाबत त्वरित निर्णय करावा. अशी देखील मागणी शिक्षण आयुक्त यांच्याकडे करण्यात आली आहे.

पुणे : रुग्णसेवा हीच ईश्वरसेवा हे ब्रीद अंगिकारून जय गणेश रुग्णसेवा अभियान अंतर्गत ‘आरोग्य गणेशा’ मध्ये श्रीमंत दगडूशेठ हलवाई सार्वजनिक गणपती ट्रस्ट, सुवर्णयुग तरुण मंडळातर्फे २०२४-२५ आर्थिक वर्षात मोठे योगदान देण्यात आले आहे. यामध्ये वर्षभरात विविध प्रकारच्या शस्त्रक्रिया, तपासण्या, साहित्य व औषधे वाटप अशी विविध प्रकारची सर्वतोपरी मदत तब्बल ७२ हजार ४८३ रुग्णांना करण्यात आली आहे. मागील वर्षी २०२३-२४ या वर्षात ४१ हजार ८७७ रुग्णांना मदत करण्यात आली होती, अशी माहिती ट्रस्टचे अध्यक्ष सुनील रासने यांनी पत्रकार परिषदेत दिली.

पत्रकार परिषदेला ट्रस्टचे अध्यक्ष सुनील रासने, उपाध्यक्ष डॉ. रामचंद्र उर्फ बाळासाहेब परांजपे, कोषाध्यक्ष महेश सूर्यवंशी, सरचिटणीस व आमदार हेमंत रासने, सहचिटणीस अमोल केदारी, सुवर्णयुग तरुण मंडळाचे अध्यक्ष प्रकाश चव्हाण, पदाधिकारी यतीश रासने, सौरभ रायकर, मंगेश सूर्यवंशी, तुषार रायकर यांसह पदाधिकारी व कार्यकर्ते उपस्थित होते.

ट्रस्टचे सरचिटणीस व आमदार हेमंत रासने म्हणाले की, जनतेच्या मूलभूत गरजा लक्षात घेऊन शिक्षण आणि आरोग्य या क्षेत्रात ट्रस्टचे काम सुरू आहे. ट्रस्टच्या माध्यमातून आरोग्य विभाग सुरू करण्यात आला असून रुग्णांना सर्वतोपरी मदत होईल असा प्रयत्न करण्यात येतो. ट्रस्टची रुग्णवाहिका सेवा देखील सातत्याने सुरू आहे. ट्रस्टच्या माध्यमातून ससून येथे रुग्ण व नातेवाईकांना भोजन देखील मोफत दिले जाते.

महेश सूर्यवंशी म्हणाले, महाराष्ट्र शासन आरोग्य विभाग व पुणे महानगरपालिकेच्या विविध योजनांचा लाभ कसा घ्यावा, हे अनेक रुग्णांना माहीत नसते. त्या रुग्णांना ट्रस्टतर्फे योजनांचा लाभ करून दिला जातो. तसेच, ज्या रुग्णांकडे अपुरी कागदपत्रे असतील, त्यांना नागरी सुविधा केंद्राच्या माध्यमातून कागदपत्रे मिळवून देण्याकरिता देखील ट्रस्ट सदैव तत्परतेने कार्य करीत आहे. वर्षभरात ट्रस्टशी संलग्न विविध २२३ रुग्णालय आणि विविध संस्थांमधून ही सेवा दिली जात आहे. जय गणेश विद्यार्थी पालकत्व योजनेतील विद्यार्थ्यांना मोफत आरोग्य शिबीर व विविध शाळांमध्ये आरोग्य शिबीराच्या माध्यमातून देखील ही सेवा दिली जाते.

• कर्णबधिर लहान मुलांच्या गुंतागुंतीच्या ८ शस्त्रक्रिया यशस्वी
  महाराष्ट्राच्या विविध जिल्ह्यातील जन्मत: कर्णबधिर असलेल्या वयवर्षे १ ते ४ मधील लहान मुलांच्या कॉक्लियर इम्प्लांट या अत्यंत गुंतागुंतीच्या शस्त्रक्रिया मोफत करून देण्यात आल्या. या प्रत्येक शस्त्रक्रियेचा खर्च १२ लाख रुपये प्रत्येकी असून अशा ८ शस्त्रक्रिया वर्षभरात झाल्या आहेत. ज्युपिटर हॉस्पिटलच्या माध्यमातून या शस्त्रक्रिया करण्यात आल्या.
• मोफत महाआरोग्य शिबीर रविवारी (दि.२०)
  जय गणेश रुग्णसेवा अभियानांतर्गत यंदा मोफत महाआरोग्य शिबीराचे आयोजन रविवार, दि. २० एप्रिल रोजी सकाळी ९ ते सायंकाळी ५ यावेळेत करण्यात आले आहे. श्रीमंत थोरले बाजीराव पेशवे रस्त्यावरील नू.म.वि. प्रशाला व कनिष्ठ महाविद्यालयात हे शिबीर होणार आहे. यामध्ये ह्रदय आजार, कर्करोग, किडनी, नेत्र आजार, दंत उपचार, स्त्री रोग, लहान मुलांच्या शस्त्रक्रिया, अपंगांना मोफत जयपूर फूट वाटप, रक्त तपासणी, रक्तदान शिबीर, ईएनटी, आयुर्वेदिक, होमिओपॅथी उपचार, अस्थिरोग, विविध थेरपी, रेडिओलॉजी, श्रवण आणि स्पीच थेरपी उपचार विनामूल्य करून देण्यात येईल. नागरिकांसाठी वाहने पार्किंग व्यवस्था नू.म.वि. प्राथमिक शाळा, अप्पा बळवंत चौक येथे करण्यात आली आहे. -: सन २०२४-२५ वर्षातील आढावा :-
• नेत्र तपासणी व शस्त्रक्रिया – ३७,२२२
• दंत रोग उपचार – २३६४
• किडनी विषयक उपचार व शस्त्रक्रिया – २०८९
• कर्करोग शस्त्रक्रिया – १२३०
• लहान मुलांच्या शस्त्रक्रिया – ६७२
• ह्रदय शस्त्रक्रिया – ४२९
• अस्थिरोग शस्त्रक्रिया – १३३
• मोफत पॅथॉलॉजिकल टेस्ट – ९२७८
• मोफत फिजिओथेरपी – ७८३१
• श्रवणयंत्र व मोल्ड वाटप – ५१५०
• कृत्रिम अवयव व उपकरणे वाटप – ३७४८
• एमआरआय, सिटी स्कॅन (५० टक्के सवलत) – २३३७
• ससून रुग्णालयात भोजनथाळी – १२ लाख रुग्ण

*श्रवणदोष असणा-या गरजू रुग्णांना मोफत श्रवणयंत्र
श्रवणदोष असणाऱ्या गरजू रुग्णांना मोफत श्रवणयंत्र मोल्ड व श्रवणयंत्र वाटप केले जाते. यावर्षी ५ हजार १५० कर्णबधिर मुले व नागरिकांनी याचा लाभ घेतला. ट्रस्टच्या वैद्यकीय विभागात आलेल्या नागरिकांना खुबा प्रत्यारोपण, गुडघा, प्रत्यारोपण आणि अस्थिरोग विषयक १३३ जणांच्या शस्त्रक्रिया देखील करण्यात आल्या आहेत. तसेच, किडनी स्टो, डायलिसिस, प्रोस्टेट ग्रंथी, पर्मकॅथ, फिस्तुला अशा २ हजार ८९ जणांच्या शस्त्रक्रिया विनामूल्य करून देण्यात आल्या आहेत.

*महाराष्ट्रातून आलेल्या लहान मुलांच्या विनामूल्य शस्त्रक्रिया
महाराष्ट्राच्या विविध भागातून आलेल्या ६७२ लहान मुलांच्या ह्रदय, किडनी, कर्करोग व अन्य शस्त्रक्रिया यशस्वीपणे केल्या गेल्या. तर, एमआरआय, सिटी स्कॅन, सोनोग्राफी, मेमोग्राफी यासांरख्या महागड्या तपासण्यांवर ५० टक्के सवलतीच्या दरात २ हजार ३३७ रुग्णांना तपासण्या करून देण्यात आल्या आहेत.

दगडूशेठ ट्रस्टचे मोफत पॅथॉलॉजिकल टेस्ट सेंटर – ९ हजार २७८ रुग्णांच्या मोफत तपासण्या
पुण्यातील धनकवडी भागात काशिनाथ पाटील नगर येथे दगडूशेठ ट्रस्टचे मोफत रक्त व विविध प्रकारची रुग्ण तपासणी करणारे केंद्र आहे. याकेंद्रामध्ये दररोज किमान ५० पेक्षा अधिक रुग्णांची तपासणी मोफत केली जाते. रक्त तपासणी व विविध तपासण्या अंतर्गत सीबीसी, रक्तगट, थायरॉइड, लिपिड प्रोइल, लिव्हर फंक्शन टेस्ट, फास्टींग पीपी शुगर, एसजीओटी/एस जी पीटी, युरिया, ईएस आर, युरीन, एच आयव्ही इत्यादी विविध प्रकारच्या तपासण्या विनामूल्य केल्या जात आहेत. वर्षभरात ९ हजार २७८ रुग्णांची रक्ततपासणी केली आहे.

मोफत फिजिओथेरपी, कृत्रिम अवयव व साहित्य वाटप, दंतरुग्णवाहिका सेवा
आरोग्य शिबीरात व ट्रस्टच्या वैद्यकीय विभागात आलेल्या अस्थिरोग आजार असलेल्या नागरिकांना मोफत फिजिओथेरपी, अ‍ॅक्युप्रेशर थेरपी, न्युरोथेरपी अशा आवश्यक थेरपी ७ हजार ८३१ रुग्णांना करून देण्यात आल्या. तसेच राज्याच्या विविध भागातून आलेल्या ३ हजार ७४८ विकलांग व्यक्तीना मोफत कृत्रिम अवयव व उपकरणे वाटप करण्यात आले. याशिवाय दंत रुग्णवाहिका द्वारे २ हजार ३६४ रुग्णांना दाढ काढणे, सिमेंट भरणे, रूट केनॉल, कवळी बसविणे असे उपचार विनामूल्य देण्यात आले आहेत.

प्रत्येक महिन्याला शहराच्या विविध भागात आरोग्य शिबिर
उत्सवाची पारंपारीक जागा असलेल्या बुधवार पेठेतील दत्त मंदिरासमोर जय गणेश प्रांगण येथे किंवा शहराच्या विविध भागात प्रत्येक महिन्याला आरोग्य शिबिर आयोजित केले जाते. त्यामध्ये विविध रुग्णालयातील तज्ञ डॉक्टर्स रुग्णांची विनामूल्य तपासणी करुन आजाराचे रोग निदान करतात तसेच शिबिरात मोफत औषधोपचाराचे वाटप देखील करण्यात येते. दानपेटी आणि देणगीच्या माध्यमातून मंदिरात जमा होणारा समाजाचा पैसा, देवाचे सर्व धार्मिक उपक्रम करुन उरलेला निधी परत समाजाला देण्याचा प्रयत्न यामाध्यमातून ट्रस्ट करीत आहे, यातून ट्रस्टने श्रध्देला सेवेची जोड दिलेली आहे.

तब्बल १३ रुग्णवाहिकांच्या माध्यमातून अखंडीतपणे विनामूल्य
ट्रस्टच्या एकूण १३ रुग्णवाहिका असून अखंडपणे २४ तास पुणे शहर, पिंपरी चिंचवड व जिल्ह्यात विनामूल्य सेवा दिली जाते. तसेच महाराष्ट्रात डिझेल खर्चात सेवा दिली जात आहे. यामध्ये कान, डोळे, दंत तपासणी व्हॅनसह कार्डियाक रुग्णवाहिकेचा देखील समावेश आहे. याशिवाय संत ज्ञानेश्वर महाराज, संत तुकाराम महाराज, संत सोपानकाका यांच्या पालखी सोहळानिमित्त वारक-यांना ट्रस्टच्या रुग्णवाहिकाद्वारे तज्ञ डॉक्टरांच्या माध्यमातून मोफत वैद्यकिय सेवा औषधोपचार पुणे ते पंढरपूर वाटप केले जाते. तसेच पालखी सोहळा निमित्त वारक-यांसाठी जय गणेश प्रांगण येथे मोफत डोळ्यांची तपासणी आणि मोफत चष्मे वाटप शिबिर देखील घेतले जाते.

ससून सर्वाेपचार रुग्णालय पुणे येथे वर्षभरात १२ लाख रुग्णांना मोफत भोजन
जय गणेश रुग्णसेवा अभियान अंतर्गत राबविण्यात येणारे ससून सर्वोपचार रुग्णालयातील कार्य समाजाभिमुख आहे. यामध्ये वर्षभरात १२ लाख रुग्णांकरीता दररोजचे २ वेळचे भोजन,चहा आणि नाश्त्याची सोय केली जाते. रुग्णालयातील गरोदर महिलांच्या पाच वॉर्डाचे नूतनीकरण हा दगडूशेठ ट्रस्टच्या कार्यातील महत्वाचा टप्पा आहे. याशिवाय ५९ नवजात बालकांसाठी अतिदक्षता विभाग आणि रुग्णांकरीता अतिदक्षता विभाग देखील अद्यावत करण्यात आला. गरोदर महिलांसाठी ५ कक्ष तसेच रुग्णांच्या नातेवाईकांकरीता विश्रांती गृहाची व्यवस्था दगडूशेठ ट्रस्ट तर्फे करण्यात आली आहे.

गणेशोत्सव कार्यकाळात ४ बेडचे मोफत आयसीयू
गणेशोत्सवामध्ये येणा-या भाविकांची गर्दी पाहता दत्तमंदिर ते मुख्य गणपती मंदिरापर्यंत एकूण ४ वैद्यकिय मदत केंद्रांची व्यवस्था करण्यात येते. यावर्षी महाराष्ट्रात प्रथमच ४ बेडचे मोफत आयसीयू व २ कार्डियाक रुग्णवाहिका सुविधा देण्यात आली. त्यामध्ये विविध नामांकित रुग्णालयांमार्फत तातडीची वैद्यकिय मदत उपलब्ध करुन दिली जाते. यामध्ये केंद्रावर मोफत औषधोपचार, डॉक्टर्स, नर्सेस व इतर स्टाफ इत्यादी प्रकारची वैद्यकिय सुविधा दगडूशेठ ट्रस्टच्या माध्यमातून भाविकांसाठी दिली जाते.

पुणे-पत्नीने कोर्टात पोटगीचा दावा दाखल केल्यामुळे संतापलेल्या एका व्यक्तीने आपल्या पत्नीच्या गुप्तांगात हळद-कुंकू लावलेले लिंबू पिळल्याचा संतापजनक प्रकार पुणे जिल्ह्यात उजेडात आला आहे. ही घटना वर्षभरापूर्वी घडली. याविषयी 36 वर्षीय पीडित महिलेने गत 11 तारखेला पोलिसांत फिर्याद दाखल केली. त्यानंतर हा प्रकार समोर आला आहे.

यासंबंधीच्या माहितीनुसार, फिर्यादी महिला व आरोपी पती यांचा 2004 मध्ये विवाह झाला होता. त्यांना 2 मुले आहेत. लग्नानंतर काही वर्षांनी पतीने पत्नीच्या चारित्र्यावर संशय घेण्यास सुरुवात केली. त्यामुळे त्यांच्यात सातत्याने वाद होत होते. या वादाला कंटाळून पीडिता आपल्या दोन्ही मुलांना घेऊन बालेवाडी येथे राहण्यासाठी गेली. त्यानंतर आरोपी पतीही पिंपळे निलख परिसरात दुसऱ्या ठिकाणी राहण्यास गेला. पीडितेने नवऱ्याविरोधात पोटगीचा दावा दाखला. पण मधल्या काळात मुलांची शाळा सुरू झाली. त्यांची वह्या, पुस्तके नवऱ्याच्या घरीच राहिल्या होत्या. त्यामुळे ते आणण्यासाठी पीडिता पतीच्या घरी गेली.

त्यावेळी महिलेची आई, मामी व मुले ही सोसायटीच्या पार्किंगमध्ये थांबली होती. तर पत्नी वरच्या मजल्यावर असणाऱ्या फ्लॅटमध्ये साहित्य आणण्यासाठी गेली होती. त्यावेळी आरोपीने मद्यप्राशन केले होते. मुलांच्या शाळेच्या साहित्यासाठी आली आणि आमचे साहित्य घेऊन जाते काय? असे म्हणत आरोपीने पत्नीला शिवीगाळ करण्यास सुरुवात केली. पण पतीने मद्यपान केले असल्यामुळे तिने त्याला फारसा प्रतिसाद दिला नाही. यामु्ळे संतापलेल्या पतीने मी बोलत असलो तरी माझ्याकडे पाहत नाही असे म्हणत घरातील कोयता काढून पत्नीच्या गळ्यावर ठेवला.त्यानंतर पत्नीला जबरदस्तीने कपडे काढायला लावले. तो एवढ्यावरच थांबला नाही. त्याने पत्नीच्या इच्छेविरोधात तिच्याशी शारिरीक संबंध प्रस्थापित करून हळद-कुंकू लावलेल्या लिंबाच्या 4 फोडी तिच्या गुप्तांगात पिळले. त्यानंतर मी तुझ्यावर जादूटोणा केली असून, तू आता वेडी होणार आहेस. हा प्रकार कुणाला सांगितला तर मी तुला ठार मारेन, अशी धमकीही त्याने पीडितेला दिली. त्यामुळे पीडित महिलेने ही गोष्ट कुणालाही सांगितली नाही. ती कुणालाही काही न बोलता आपल्या आई-मुलांसह आपल्या घरी गेली. त्यानंतर काही दिवसांनी तिने हा प्रकार आपल्या आई व मामीला सांगितला. त्यानंतर त्यांनी 11 एप्रिल रोजी सांगवी पोलिस ठाण्यात या प्रकरणी तक्रार दाखल केली. त्यानंतर हा प्रकार उजेडात आला.

पुणे, दि. १५ एप्रिल २०२५:आळंदी-कळस रस्त्यावर ग्रेफ सेंटरसमोर असलेल्या ओढ्यात ट्रेंचवर फेकलेल्या कचऱ्याला आग लागली. यात ट्रेंचमधील महावितरणच्या २२ केव्ही क्षमतेच्या ८ वीजवाहिन्या जळाल्या. आज पहाटे २.३० च्या सुमारास हा प्रकार घडला. त्यामुळे विश्रांतवाडी, कळस, धानोरी, लोहगाव परिसरातील सुमारे १ लाख १५ हजार ग्राहकांचा वीजपुरवठा पहाटे ५ वाजेपर्यंत टप्प्याट्प्याने सुरु करण्यात आला. तर विश्रांतवाडी, कळस परिसरातील सुमारे १० हजार आणि दिघी परिसरातील १७ हजार अशा २७ हजार वीजग्राहकांचा वीजपुरवठा दुपारी १२.३० वाजेपर्यंत बंद होता.

याबाबत माहिती अशी की, नगररोड विभाग अंतर्गत आळंदी-कळस रस्त्यावर ग्रेफ सेंटरसमोर एक ओढा आहे. तेथील एका ट्रेंचमध्ये महावितरणच्या ८ वीजवाहिन्या आहेत व त्याद्वारे विश्रांतवाडी, कळस, धानोरी, लोहगाव, दिघी परिसरातील सुमारे १ लाख ४२ हजार ग्राहकांना वीजपुरवठा केला जातो. मात्र ओढ्यातील या ट्रेंचवर सातत्याने कचरा टाकण्यात येत होता. साठलेल्या या कचऱ्याला आज पहाटे २.३० च्या सुमारास आग लागली. आग वाढल्याने महावितरणकडून पुढील धोका टाळण्यासाठी तातडीने वीजपुरवठा खंडित करण्यात आला. सोबतच अग्निशमन दलानेही त्वरेने दाखल होऊन पहाटे ३ च्या सुमारास आग विझविली.

यानंतर महावितरणकडून सर्वप्रथम पर्यायी व्यवस्थेतून वीजपुरवठा सुरळीत करण्याचे व जळालेल्या वीजवाहिन्यांच्या दुरूस्तीचे कामे युद्धपातळीवर सुरू करण्यात आले. यामध्ये पर्यायी व्यवस्थेतून विश्रांतवाडी, कळस, धानोरी, लोहगाव परिसरातील सुमारे १ लाख १५ हजार ग्राहकांचा वीजपुरवठा पहाटे ५ वाजेपर्यंत टप्प्याटप्प्याने सुरू करण्यात आला. मात्र विजेच्या वाढलेल्या मागणीमुळे पर्यायी वीजवाहिन्यांवर भार व्यवस्थापन शक्य नसल्याने या परिसरातील सुमारे १० हजार लघुदाब आणि दिघी परिसरातील सुमारे १७ हजार ग्राहकांचा वीजपुरवठा सुरू होऊ शकला नाही.

महावितरणकडून दुरुस्ती कामे त्वरित करण्यासाठी एकाचवेळी ६ कंत्राटदारांना पाचारण करण्यात आले. सोबतच नगररोड विभागाचे कार्यकारी अभियंता श्री. अशोक जाधव, अतिरिक्त कार्यकारी अभियंता श्री. शारंगधर केनेकर व हर्षितकुमार वाकोडे यांच्यासह शाखा अभियंते, जनमित्रांनी दुरुस्ती कामात सहभाग घेतला.  वीजवाहिन्यांचा जळालेला भाग बदलणे, जॉईंट देणे व इतर कामांसह वीजवाहिन्यांच्या दुरुस्तीचे कामे दुपारी १२.३० वाजता पूर्ण झाले. त्यानंतर सर्वच परिसरातील वीजपुरवठा दुरुस्त केलेल्या वाहिन्यांद्वारे सुरू करण्यात आला.