पुणे: राजर्षी छत्रपती शाहू महाराज जयंतीदिनी जिल्हा प्रशासनाच्या वतीने अभिवादन करण्यात आले. विधानभवन परिसरात झालेल्या कार्यक्रमात पुरवठा विभागाचे उपायुक्त प्रकाश कदम यांनी राजर्षी छत्रपती शाहू महाराजांच्या प्रतिमेला पुष्पहार अर्पण करून त्यांना अभिवादन केले. यावेळी पुनर्वसन विभागाचे उपायुक्त बी.एस. पऱ्हाड, निवासी उपजिल्हाधिकारी सुरेश जाधव, तहसीलदार अर्चना यादव, मोहिनी चव्हाण यांनीही राजर्षी शाहू महाराजांना अभिवादन केले.
यावेळी विभागीय आयुक्त आणि जिल्हाधिकारी कार्यालयातील अधिकारी व कर्मचारी उपस्थित होते.

“मदर अँड चाइल्ड ट्रॅकिंग सिस्टीम’ प्रकल्पास उत्तम प्रतिसाद

पुणे:

“गरोदरपणाच्या नवव्या महिन्यातील स्त्रियांसाठी राज्य शासनाच्या आरोग्य विभागाच्या वतीने आणि “बीव्हीजी इंडिया लिमिटेड’ या सेवा क्षेत्रातील कंपनीच्या माध्यमातून चालविण्यात येणाऱ्या “महाराष्ट्र मेडिकल इमर्जन्सी सर्व्हिसेस’च्या “डायल 108′ सवेतर्फे विशेष सेवा सुरू करण्यात आली आहे. या सेवे द्वारे शासनाकडे नोंदणी केलेल्या गरोदर स्त्रियांना रूग्णवाहिका सेवेकडून दूरध्वनी केला आहे. बाळंतपणाच्या कळा सुरू होणार असे वाटल्यानंतर रूग्णवाहिका बोलावण्यास उशीर केला जाऊ नये आणि लवकर मदत मिळून मातामृत्यू व अर्भक मृत्यू टाळता यावेत असा या सेवेचा उद्देश आहे.’ अशी माहिती “महाराष्ट्र इमर्जन्सी मेडीकल सर्व्हिस’चे मुख्य संचालन अधिकारी डॉ. ज्ञानेश्वर शेळके यांनी दिली.

दररोज राज्यात 10 ते 15 बाळंतपणे रूग्णवाहिकेत होत असून डॉक्टर ही आपत्कालीन मदत सुरक्षितपणे हाताळत आहेत.  “26 जानेवारी 2014 रोजी सुरू झालेल्या या अत्याधुनिक वैद्यकीय सेवेसाठी 108 या दूरध्वनी क्रमांकावर डायल केल्यास सुसज्ज रुग्णवाहिका डॉक्टरांसह येते. 108 डायलच्या वातानुकुलित विनामूल्य सेवा रूग्णवाहिकांमध्ये प्राण वाचविण्यासाठी व्हेंटीलेटरसहित सर्व अत्याधुनिक वैद्यकीय साधने आहेत.

“रोजच्या आकडेवारीनुवार 35 ते 40 टक्के म्हणजे साधारणत : 400 ते 450 गरोदर स्त्रियांना 108 क्रमांकाच्या रूग्णवाहिका मदत करत आहेत. बाळंतपणाच्या कळा सुरू होणार असे वाटल्यावर रूग्णवाहिकेला दूरध्वनी करण्यास उशीर करू नये, तसेच गुंतागुंत टाळण्यासाठी रूग्णालयात वेळोवेळी तपासणी गरजेची आहे. मे महिन्याच्या दुसऱ्या आठवड्यापासून यासाठीचा पथदर्शी प्रकल्प चालवला गेला. जूनपासून हा प्रकल्प पूर्णत: सुरू केला जात आहे. “मदर अँड चाइल्ड ट्रॅकिंग सिस्टीम’ या प्रकल्पाअंतर्गत गोळा होणारी गरोदर मातांची आकडेवारी यासाठी वापरली जाते.

राज्यात दररोज सुमारे 4 हजार बाळंतपणे होत असून त्यातील 40 ते 50 टक्के बाळंतपणे खासगी रूग्णालयात, तर 50 ते 60 टक्के शासकीय रूग्णालयात होणाऱ्या बाळंतपणापैकी 20 ते 25 टक्के गरोदर स्त्रिया 108 क्रमांकाच्या रूग्णवाहिकेची मदत घेऊन रूग्णालयात दाखल झालेल्या असतात’ अशी माहिती डॉ. प्रविण साधले यांनी दिली.

दिनांक 1 फेब्रुवारी 2014 पासून ते 17 जून 2015 पर्यंतच्या तपशीलानुसार अत्याधुनिक वैद्यकीय सेवा पुरविणाऱ्या डायल 108 रूग्णवाहिकेत झालेल्या प्रसुतीची जिल्हानिहाय आकडेवारी पुढील प्रमाणे अहमदनगर (161), अकोला (90), अमरावती (109), औरंगाबाद (214), बीड (189), भंडारा (32), बुलढाणा (121), चंद्रपूर (73), धुळे (75), गडचिरोली (72), गोंदीया (43), हिंगोली (87), जळगांव (90), जालना (93), कोल्हापूर (109), लातूर (162), मुंबई (45), नागपूर (97), नांदेड (154), नंदूरबार (84), नाशिक (212), उस्मानाबाद (124), परभणी (73), पुणे (255), रायगड (34), रत्नागिरी (29), सांगली (98), सातारा (135), सिंधुदूर्ग (16), सोलापूर (244), ठाणे (119), वर्धा (23), वाशिम (63), यवतमाळ (110), पालघर (67).

“सिनर्जी’ व “गंगोत्री’ या संस्थांचा चारुहास पंडित यांच्याबरोबरचा “चिंटू गँग’ दिनदर्शिका उपक्रम

पुणे :

गेली 24 वर्षे मराठी मनांवर अधिराज्य गाजविणारा “चिंटू’ आता “चिंटू गँग’ या मुलांसाठीच्या दिनदर्शिकेतून आपल्याला वर्षभर भेटणार आहे. या दिनदर्शिकेचा प्रकाशन समारंभ शि. द. फडणीस (ज्येष्ठ व्यंग्यचित्रकार), विनोद  तावडे (उच्च शिक्षणमंत्री व सांस्कृतिक मंत्री), एअर मार्शल भूषण गोखले (अध्यक्ष – महाराष्ट्र एज्युकेशन सोसायटी) व  श्रीरंग गोडबोले (अभिनेता, लेखक, दिग्दर्शक) यांच्या उपस्थितीत होणार आहे.

सामाजिक भान जपणाऱ्या “सिनर्जी प्रॉपर्टीज’ व “गंगोत्री ग्रीनबिल्ड’ या संस्थांची निर्मिती असणाऱ्या “चिंटू गँग’ दिनदर्शिकेचा प्रकाशन समारंभ रविवार, 28 जून 2015 रोजी सायंकाळी सहा वाजता काळे हॉल, गोखले इन्स्टिट्यूट प्रांगण, बीएमसीसी रस्ता, डेक्कन जिमखाना पुणे येथे होणार आहे. या दिनदर्शिकेचे यंदाचे दुसरे वर्ष आहे. अशी माहिती चारुहास पंडित, मकरंद केळकर, मंदार देवगावकर, गणेश जाधव, राजेंद्र आवटे व महेश पोहनेरकर यांनी पत्रकार परिषदेत दिली.

जुलै 2015 ते जून 2016 या शैक्षणिक वर्षाची ही दिनदर्शिका रंजकतेने मूल्यशिक्षण देणारी दिनदर्शिका आहे. यामध्ये “पर्यावरण’, “पाणी’, “ध्वनी प्रदूषण’, “वाहतूक’, “कचरा समस्या’ या विषयांवर संवाद साधला जाणार आहे. विद्यार्थ्यांच्या भावविश्वावर अधिराज्य गाजविणाऱ्या “चिंटू’ या व्यक्तिचित्राद्वारे मूल्याधारित शिक्षण पोहोचविण्याचे काम होणार आहे. “महाराष्ट्र एज्युकेशन सोसायटी’, “शिक्षणविवेक’ व “रोटरी क्लब ऑफ पुना नॉर्थ’ च्या मदतीने ही दिनदर्शिका 18,000 विद्यार्थ्यांपर्यंत पोहचणार आहे. ही दिनदर्शिका 50,000 विद्यार्थ्यांपर्यंत पोहोचविण्याचा मानस आहे.

प्रकाशन समारंभप्रसंगी रोहन भडसावळे व ओजस नातू यांची तबला जुगलबंदी व स्वरुप-वर्धिनी संस्थेचे विद्यार्थी मल्लखांबाची प्रात्यक्षिके सादर करणार आहेत. प्रकाशन समारंभाला उपस्थित असलेल्या शालेय विद्यार्थ्यांना ही दिनदर्शिका मोफत देण्यात येणार आहे.

पुणे – राज्य घटनेने सामान्य नागरिकांना दिलेल्या घटनात्मक अधिकारांचे संरक्षण करण्याची जबाबदारी माध्यमांबरोबरच लोकशाहीतील सर्व घटकांची आहे. सामान्य नागरिकांच्या या अधिकाराचे रक्षण करण्यात प्रसारमाध्यमांनी पुढाकार घ्यायला हवा, असे प्रतिपादन राष्ट्रपती प्रणव मुखर्जी यांनी आज येथे केले.

येथील त्रिदल संस्थेच्यावतीने देण्यात येणाऱ्या पुण्यभूषण पुरस्कार समारंभात राष्ट्रपती श्री. मुखर्जी बोलत होते. सकाळ माध्यम समूहाचे अध्यक्ष प्रतापराव पवार यांना राष्ट्रपतींच्या हस्ते येथील बालगंधर्व रंगमंदिर येथे आयोजित समारंभात पुण्यभूषण पुरस्कार प्रदान करण्यात आला. यावेळी राज्यपाल सी. विद्यासागर राव, मुख्यमंत्री देवेंद्र फडणवीस, माजी केंद्रीय कृषी मंत्री शरद पवार, पालकमंत्री गिरीश बापट, महापौर दत्तात्रय धनकवडे, ज्येष्ठ शास्त्रज्ज्ञ डॉ. आर.ए. माशेलकर, पुण्यभूषण फौंडेशनचे अध्यक्ष डॉ. सतीश देसाई आदी व्यासपीठावर उपस्थित होते.
राष्ट्रपती प्रणव मुखर्जी म्हणाले, घटनेने प्रत्येक भारतीयाला दिलेल्या अधिकारांचा कोणालाही संकोच करता येणार नाही. या अधिकार आणि हक्कांचे संरक्षण करण्याची लोकशाही प्रक्रियेतील प्रत्येक घटकांची जबाबदारी आहेच. त्याचबरोबर प्रसार माध्यमांची अतिशय महत्वाची भूमिका आहे. त्यांनी ती भूमिका अतिशय जबाबदारीने पार पाडावी. त्याचबरोबर लोकशाहीत संवादाची आवश्यकता भासते. प्रसारमाध्यमांनी सुसंवाद साधण्याची भूमिका पार पाडायला हवी.

राष्ट्रपती प्रणव मुखर्जी म्हणाले, माझी बहुतांश कारकीर्द संसदेच्या आवारात गेली. अनेकवेळा माझ्यावर माध्यमांनी टीका केली. पण मी नेहमीच ती सकारात्मकरित्या घेतली. लोकशाहीत माध्यमांनी सुसंवाद साधण्यासाठी सेतूप्रमाणे काम करण्याची आवश्यकता आहे. माध्यमांनी अशा रीतीने काम केल्यास भारतीय लोकशाही आधिक सशक्त आणि मजबूत होईल. त्यामुळे लोकशाहीसाठी आवश्यक असलेल्या विविध यंत्रणा सक्षम होण्यास हातभार लागेल.पुणे स्वातंत्र्याच्या लढ्यात आघाडीवर असलेले शहर होते. या शहरातील अनेक सुपुत्रांनी स्वातंत्र्यांच्या लढ्यात अतुलनीय, असे योगदान दिले आहे. देशासाठी शहिद झालेले राजगुरू याच मातीतले होते. पुण्याने शिक्षण, उद्योग, समाजकारण, राजकारण, समाज सुधारणा अशा विविध क्षेत्रात योगदान दिले आहे. असा गौरवपूर्ण उल्लेख करून राष्ट्रपती म्हणाले की, ‘ प्रतापराव पवार यांचे व्यक्तिमत्व त्या प्रभावळीतील आहे. त्यांनी आपल्या कर्तृत्वातून पुण्याची परंपरा आधिक समर्थपणे पुढे नेली आहे. प्रतापराव पवार यांनी सकाळ वृत्तपत्राच्या माध्यमातून सामाजिक सुधारणेच्या क्षेत्रात अतिशय चांगले काम केले आहे. सकाळ माध्यमसमूह समाज सुधारणेच्या क्षेत्रात कशा पद्धतीने चांगले काम करून दाखवू शकतो हे प्रतापराव पवार यांनी आणि सकाळ समूहाने आपल्या कामातून दाखवून दिले आहे.’ माध्यमांनी त्यांच्या कामाचे अनुकरण करण्याची आवश्यकता असल्याचेही राष्ट्रपती प्रणव मुखर्जी यांनी सांगितले.राष्ट्रपती प्रणव मुखर्जी यांनी सांगितले की, राजर्षी शाहू महाराज यांची आज जयंती आहे. शाहू महाराजांनी आपल्या कार्यातून दिलेली शिकवण आजही आपल्याला मार्गदर्शक आहे. त्यांनी आपल्या कार्यातून घालून दिलेली कामांची पद्धती आजही अनुकरणीय आहे.

प्रतापराव पवारांचे काम आदर्शवत : फडणवीस

उद्योग तसच माध्यम क्षेत्रात प्रतापराव पवारांचं कार्य उल्लेखनीय आहे. समाजातील नव्या पिढीला उत्तेजन देण्यासाठी कांही व्यक्तिमत्व समाजासमोर दिसावीत या दृष्टीने पुण्यभूषण सारखे पुरस्कार महत्वाचे ठरतात. असे सांगून मुख्यमंत्री देवेंद्र फडणवीस म्हणाले की, ‘ स्वातंत्र्यपूर्व काळात माध्यमांची भूमिका समाज परिवर्तनाची होती. समाजात स्वातंत्र्य प्राप्तीचे स्फल्लींग चेतवण्याची होती. स्वातंत्र्योत्तर काळात समाज परिवर्तन व समाजात चांगल्या गोष्टी रुजविण्याकरिता माध्यमांनी भूमिका स्वीकारली प्रतापराव पवारांनी सकाळ माध्यम समूहाच्या माध्यमांतून सामाजिक बांधिलकीच्या जाणीवेतून विविध उपक्रम राबवून आदर्शवत कार्य केले आहे. जलयुक्त शिवार या शासनाच्या महत्वाकांक्षी कार्यक्रमास तनिष्क उपक्रमाच्या सहाय्याने सकाळ माध्यम समूहाने अत्यंत पथदर्शी अस कार्य केल्याचा गौरवपूर्ण उल्लेखही मुख्यमंत्री फडणवीस यांनी यावेळी केला.

पुणे :
पुणे शहर “राष्ट्रवादी कॉंग्रेस’च्या वतीने छत्रपती शाहू महाराज जयंतीनिमित्त अभिवादन करण्यात आले. पक्ष कार्यालयात ज्येष्ठ कार्यकर्ते लक्ष्मण शिंदे यांच्या हस्ते छत्रपती शाहू महाराज यांच्या प्रतिमेस पुष्पहार अर्पण करण्यात आला.

यावेळी माजी उपमहापौर नंदू मोझे, शंकर शिंदे, राहूल मोझे, ऍड. घनश्याम खलाटे, अविनाश वेल्हाळ, आनंद रिठे, प्रशांत गांधी, मनाली भिलारे, बाळासाहेब धमाले, शिल्पा भोसले, बापू धूमाळ, योगेश वराडे आदी मान्यवर उपस्थित होते.

पुणे -‘उच्चशिक्षण देणाऱ्या संस्थांमध्ये संख्यात्मक वाढ दिसत असली, तरी गुणात्मक वाढीबाबत मोठी झेप घेणे गरजेचे आहे,’ असे मत राष्ट्रपती प्रणव मुखर्जी यांनी गुरुवारी व्यक्त केले. त्यासाठी कौशल्याधारित शिक्षणाची बाब गांभीर्याने घेऊन २०३० पर्यंत ५० कोटी जनतेपर्यंत ते पोहोचविण्याचे अभियान हाती घेणे गरजेचे असल्याचेही त्यांनी स्पष्ट केले.
भारती विद्यापीठाच्या सुवर्णमहोत्सवी वर्षाच्या सांगता समारंभात राष्ट्रपती बोलत होते. राज्यपाल सी. विद्यासागर राव, मुख्यमंत्री देवेंद्र फडणवीस, माजी केंद्रीय कृषिमंत्री शरद पवार, माजी केंद्रीय गृहमंत्री सुशीलकुमार शिंदे, माजी मुख्यमंत्री पृथ्वीराज चव्हाण, विद्यापीठाचे कुलपती डॉ. पतंगराव कदम, कुलगुरू डॉ. शिवाजीराव कदम, कार्यवाह डॉ. विश्वजित कदम या वेळी व्यासपीठावर उपस्थित होते.
पतंगराव कदम यांना राष्ट्रपतींच्या हस्ते विशेष मानपत्र देऊन गौरविण्यात आले. विद्यापीठाच्या सुवर्णमहोत्सवी वाटचालीचा आढावा घेणाऱ्या संग्रहालयाचेही राष्ट्रपतींच्या हस्ते उद घाटन करण्यात आले. शैक्षणिक प्रगतीच्या बाबतीत विकसित देशांची बरोबरी करण्यासाठी भारतातील खासगी शैक्षणिक संस्था फार महत्त्वाची भूमिक पार पाडू शकतात. शैक्षणिक संस्थांच्या संख्यात्मक वाढीसोबतच या संस्थांनी गुणवत्तेचाही ध्यास घेणे गरजेचे असल्याचे राष्ट्रपतींनी सांगितले. नावीन्याचा ध्यास घेतलेली समाजाभिमुख संशोधने आणि सामाजिक बदलांना चालना देणारी शिक्षणपद्धती भविष्यात देशाला प्रगतीपथावर नेण्यासाठी उपयुक्त ठरणार असल्याचेही त्यांनी स्पष्ट केले. पवार, शिंदे, चव्हाण यांनीही मनोगत व्यक्त केले. डॉ. विश्वजित कदम यांनी प्रास्ताविक केले.

पुण्याचे माजी खासदार सुरेश कलमाडी आणि त्यांच्या पत्नी मीरा कलमाडी यांनी काल  सायंकाळी राजभवन येथे जावून राष्ट्रपती प्रणव मुखर्जी यांची सदिछ्या  भेट घेतली .