सातारा : शिवशाहीर बाबासाहेब पुरंदरेंना महाराष्ट्र भूषण पुरस्कार देणारा समारंभ स्थगित करा . अशी मागणी  छत्रपती शिवरायांचे वंशज खासदार उदयनराजे भोसले यांनी केल्याने आता १९ ऑगस्ट चा समारंभ होतो किंवा नाही .. कि पुरस्कार नाकारून पुरंदरे हेच हा विषय संपवतील याकडे अनेकांचे लक्ष लागले आहे शिवशाहीर बाबासाहेब पुरंदरेंना महाराष्ट्र भूषण पुरस्कार देण्यावरुन महाराष्ट्रात उभी फूट पडली आहे. पुरंदरेंना पुरस्कार देण्यास राष्ट्रवादीचे आमदार जितेंद्र आव्हाड यांनी ठाम विरोध केला आहे. शिवाय, महाराष्ट्रातील अनेक विचारवंतांनीही पुरंदरेंना पुरस्कार देण्यास विरोध दर्शवला आहे. या वादात आता राष्ट्रवादीचे खासदार उदयनराजे भोसलेंनीही उडी घेतली आहे. पुरंदरेंना देण्यात येणाऱ्या पुरस्कार स्थगित करावा, अशी मागणी उदयनराजेंनी केली आहे. विशेष म्हणजे काही दिवसांपूर्वी उदयनराजेंनी पुरस्कार देण्यास पाठिंबा दिला होता.बाबासाहेब पुरंदरेंनी लिहिलेल्या शिवरायांच्या इतिहासावर आक्षेप घेतले जात आहेत आणि त्या आक्षेपात काही प्रमाणात तथ्य असल्याचं आमचं मत आहे. त्यामुळे, या आक्षेपांची तपासणी करुन जोपर्यंत सोक्षमोक्ष लागत नाही, तोपर्यंत बाबासाहेब पुरंदरेंना देण्यात येणारा महाराष्ट्र भूषण पुरस्कार स्थगित ठेवावा, अशी मागणी उदयनराजेंनी केली आहे.

लोकशाहीर अण्णाभाऊ साठे यांच्या  मानवतेचा संदेशामुळे  मागासवर्गीय समाज  मुख्य प्रवाहात आला आहे परंतु , सध्या काही जातीयवादी पक्षाकडून  जातीयवादाचे विष पेरण्याचे काम करून समाजात तेढ निर्माण करण्यात येत आहे , असे प्रतिपादन महाराष्ट्र विधानसभाचे विरोधी पक्षनेते राधाकृष्ण विखे पाटील यांनी केले .

   महात्मा फुले पेठमधील सावित्रीबाई फुले स्मारकमधील सभागृहात मातंग एकता आंदोलन महाराष्ट्र राज्याच्या वतीने लोकशाहीर अण्णाभाऊ साठे यांच्या ९५ व्या जयंतीनिमित ” समाजाचा प्रबोधन मेळावा ” व गुणवंत विद्यार्थ्याचा गुणगौरव समारंभ ते बोलत होते . मेळाव्याचे उद्घाटन दीपप्रज्वलन करून व  महापुरुषांच्या प्रतिमेस पुष्पहार अर्पण करून राधाकृष्ण विखे पाटील यांच्या हस्ते अभिवादन करण्यात आले . या मेळाव्याच्या अध्यक्षस्थानी मातंग एकता आंदोलनाचे संस्थापक अध्यक्ष व माजी गृहराज्यमंत्री रमेशदादा बागवे , विशेष उपस्थिती महाराष्ट्र प्रदेश कॉंग्रेस कमिटीचे  प्रवक्ते सचिन सावंत , माजी राज्यमंत्री चंद्रकांत छाजेड ,मातंग एकता आंदोलनाचे कार्याध्यक्ष नगरसेवक अविनाश बागवे , उपाध्यक्ष अप्पा उकरंडे ,  शिक्षण मंडळ उपाध्यक्ष नुरुद्दीन सोमजी , नगरसेविका लता राजगुरू , मातंग एकता आंदोलनाचे पुणे शहर अध्यक्ष सुरेश अवचिते , मुख्य समन्वयक विठ्ठल थोरात , महिला आघाडी प्रमुख सुरेखा खंडाळे , संघटनेचे राज्य भरातील पदाधिकारी आणि कार्यकर्ते उपस्थित होते . यावेळी प्रमुख पाहुण्याच्या हस्ते टेब , अण्णाभाऊ साठे यांचे खंड देऊन गुणवंत विद्यार्थ्यांचा गुणगौरव करण्यात आला .

       यावेळी राधाकृष्ण विखे पाटील यांनी  सांगितले कि , अण्णाभाऊ साठे यांनी समाजव्यवस्थेला बदलण्यासाठी संयुक्त महाराष्ट्र चळवळीत योगदान दिले . समाजात विचाराने क्रांती घडवून आणली , समाजाला जनजागृत करण्याचे काम त्यांनी केले . अण्णाभाऊनी महाराष्ट्रासाठी दिलेले योगदान विसरता कामा नये . पहिल्या दलित साहित्य समेलनाचे ते अध्यक्ष होते . सध्याच्या माध्यमांनी अतिरिकेंच्या फाशीच्या बातम्या दाखवण्यापेक्षा अण्णाभाऊ साठे यासारख्या महापुरुषांचे जीवनपट दाखवले पाहिजे . मातंग समाज नेहमीच कॉंग्रेस पक्षाच्या पाठीशी उभा राहिला आहे , विरोधी पक्षाच्या नात्याने आपल्या मागण्या प्राधान्याने सोडविण्याचे आश्वासन त्यांनी दिले .

    यावेळी महाराष्ट्र प्रदेश कॉंग्रेस कमिटीचे  प्रवक्ते सचिन सावंत यांनी सांगितले कि , महाराष्ट्राला युगपुरुषांनी जे चित्र निर्माण केले ते चित्र तसे उभे राहण्याची गरज आहे परंतु गोळ्वलकर गुरुजींच्या विचाराचे चित्र महाराष्ट्रात उह्जे राहत आहे . शिक्षकांना रामभाऊ म्हाळगी प्रशिक्षण केंद्रात वेगळ्या प्रकारचे  प्रशिक्षण दिले जात आहे . सर्व ठिकाणी संघाची लोक भरण्याचे काम चालू आहे . नथुराम गोडसे यांचे मंदिर बांधण्याचे काम चालु आहे . यांचा विचार काय आहे ? या जातीयवादामुळे प्रगती खुंटली आहे . मनुस्मृतीच्या विचारांच्या धारेतून आलेली लोकांची सत्ता व गोळ्वलकर गुरुजीच्या विचार धारेतून आलेली सत्ता समाजाला कोठे नेणार आहे ? अण्णाभाऊ साठेचे साहित्य जागतिक स्तरावर २७ भाषामधून प्रकाशित झाले आहे . अण्णाभाऊनी काटेरी आयुष्यातून निवडुंग फुलविण्याचे काम केले आहे . त्यामुळे अण्णाभाऊच्या विचारांनी प्रेरित असलेले रमेश बागवे यांचे नेतृत्वाची वाट मातंग समाज बघत आहे .

    मातंग एकता आंदोलनाचे संस्थापक अध्यक्ष व माजी गृहराज्यमंत्री रमेशदादा बागवे यांनी सांगितले  कि , मातंग समाजाने लोकसंख्येच्या प्रमाणात स्वंतत्र आरक्षण मागत आहे . मातंग आयोग , भूमिहीन शेतकरी बांधवाना जमीन , सुशिक्षित बेरोजगारांना रोजगाराची मागणी करण्यात येत आहे . समाजाला सामाजिक , राजकीय , शैक्षणिक , आर्थिक न्याय मिळाला पाहिजे . प्रामाणिकपणे वागणारा समाज आहे . समाज बांधव कष्टाचे जीवन जगत आहे . समाजातून सर्वोच्च पदावर जो पर्यंत जात नाही तो पर्यंत काम केले पाहिजे . मातंग समाज आता पिवळ्या झेंड्याखाली एकत्र येत आहे .

     मातंग एकता आंदोलनाचे कार्याध्यक्ष नगरसेवक अविनाश बागवे यांनी आपल्या भाषणात सांगितले कि , मातंग एकता आंदोलनाच्या माध्यमातून अडचणी न मांडता कृतीतून समाजासाठी काम केले आहे . त्यासाठी समाजासाठी असणारी तळमळ व्यक्त करण्यासाठी आपण आपली ताकद उभी केली पाहिजे. मातंग एकता आंदोलनाच्या कार्यकर्त्यांनी गावोगावी जाऊन समाजबांधवांची कामे केली पाहिजेत .

    यावेळी माजी राज्यमंत्री चंद्रकांत छाजेड यांनी सांगितले कि , शासनाने मागासवर्गीय बांधवांचे प्रश्न मांडलेले नाही या सरकारला मागासवर्गीय समाजाची जाण राहिलेली नाही . त्यामुळे अछे दिन ज्या वेगाने आलेले आहे,  त्याच वेगाने जाणार असून बुरे दिन येणार आहे.

    या मेळाव्याचेप्रास्ताविक  विठ्ठल थोरात यांनी केले तर सूत्रसंचालन रमेश सकट यांनी केले तर आभार सुजित यादव यांनी मानले . राष्ट्रगीताने मेळाव्याची सांगता झाली .

सातारा (जिमाका):- राज्य शासन आणि जिल्हा प्रशासन याचबरोबर लोकांच्या उत्स्फूर्त सहभागामुळे जिल्ह्यातील जलयुक्त शिवार अभियानाचे कार्य प्रशसंनीय ठरले आहे, असे गौरवोद्गार राज्याचे जलसंपदा, जलसंधारण व संसदीय कार्य राज्यमंत्री तथा जिल्ह्याचे पालकमंत्री विजय शिवतारे यांनी काढले.
जलयुक्त शिवार अभियानांतर्गत घेण्यात आलेल्या कामांचा जलपूजन समारंभ पालकमंत्री शिवतारे यांच्या हस्ते आज शिंदेवाडी येथे झाला. त्यावेळी ते बोलत होते. यावेळी आमदार श्रीमंत छत्रपती शिवेंद्रसिंहराजे भोसले, जिल्हाधिकारी अश्विन मुद्गल, अप्पर जिल्हाधिकारी प्रमोद यादव, उपजिल्हाधिकारी (रोहयो) पराग सोमण, प्रांताधिकारी मल्लिकार्जुन माने, जिल्हा अधीक्षक कृ षी अधिकारी जितेंद्र शिंदे, आत्माचे प्रकल्प संचालक गणेश घोरपडे, शिंदेवाडीच्या सरपंच अर्चना मनवे, कृषी, पाटबंधारे, महसूल विभागातील अधिकारी आणि स्थानिक कार्यकर्ते आदी उपस्थित होते.
पाणी हा सर्वांच्या जिव्हाळ्याचा विषय असला तरी दुष्काळी भागातील जनतेच्या दृष्टीने याला विशेष महत्व आहे. त्यामुळे आज येथे जलपूजन करीत असताना जलदेवतेची कृपा या भागावर अशीच राहू दे, अशी कामना केल्याचे सांगून पालकमंत्री म्हणाले की, जलसंधारणाच्या कामाला सरकारने विशेष प्राधान्य दिले असून यामुळे दुष्काळी भागातील जनतेला मोठा दिलासा मिळाला आहे. यामुळे या भागातील जनतेला दीर्घकालीन लाभ मिळणार आहे. तसेच भूगर्भातील पाण्याची पातळी वाढून शाश्वत सिंचन सुविधा उपलब्ध होईल, अशी अपेक्षा व्यक्त करुन श्री. शिवतारे पुढे म्हणाले की, पुढील काळात जलसंधारण आयुक्तालय उभारुन या क्षेत्रातील सर्व कामे एका छत्राखाली व्हावीत या दृष्टीने शासन प्रयत्नशील आहे.
जिल्हाधिकारी अश्विन मुद्गल यांनी शिंदेवाडी गावातील नागरिकांनी श्रमदानाच्या माध्यमातून उत्स्फूर्तपणे जलयुक्त शिवार अभियानाचे काम केल्याबद्दल गावकऱ्याचे अभिनंदन करुन पाण्याचा योग्य वापर केला तर काय घडू शकते याचं उदाहरण या गावाने सर्वांपूढे ठेवले आहे, असे सांगून यापुढेही येथे असेच एकदिलाने हे कार्य पुढे चालू ठेवले जाईल अशी अपेक्षा व्यक्त केली.
आमदार श्री.भोसले यांनी राज्य शासन, पालकमंत्री आणि जिल्हा प्रशासन यांनी खोऱ्याच्या विकासासाठी आणि या भागातील जनतेच्या हितासाठी उल्लेखनीय कार्य केले जात असल्याबद्दल गौरवोद्गार काढले. याप्रसंगी ग्रामस्थांतर्फे पालकमंत्री, आमदार, जिल्हाधिकारी, अन्य शासकीय अधिकारी आणि कार्यकर्ते यांचा सत्कार करण्यात आला

मुंबई -जनतेच्या तक्रारी, गाऱ्हाणी व सूचना ऑनलाईन पद्धतीने थेट शासनासमोर मांडण्यासाठी सुरू करण्यात आलेल्या ‘आपले सरकार’ पोर्टलच्या दुसऱ्या टप्प्याचा प्रारंभ स्वातंत्र्यदिनी (15 ऑगस्ट) मुख्यमंत्री देवेंद्र फडणवीस यांच्या हस्ते करण्यात आला. जनतेला ऑनलाईन सेवा देण्याच्या दृष्टीने मंत्रालयस्तरावर आपले सरकार हे वेब पोर्टल सुरू करण्यात आले होते. या उपक्रमाचा पहिला टप्पा 26 जानेवारी 2015 रोजी जनतेसाठी सुरू करण्यात आला होता. नागरिकांकडून मंत्रालय स्तरावरील 10000 तक्रारी आजपर्यंत प्राप्त झाल्या असून त्यापैकी 78 टक्के तक्रारींचा निपटारा झाला आहे. पोर्टलवर मिळणाऱ्या प्रतिसादानुसार नागरिकांच्या तक्रारींचे समाधानकारक निपटाऱ्याचे प्रमाण 84.5 टक्के इतके लक्षणीय आहे. आता ही सेवा जिल्हास्तरावर विस्तारण्यात आली आहे. पथदर्शी तत्त्वावर राबविण्यात येणारा हा उपक्रम सुरुवातीला सहा जिल्ह्यांत राबविण्यात येणार असून त्यामध्ये ठाणे, नाशिक, पुणे, औरंगाबाद, अमरावती आणि नागपूर या जिल्ह्यांचा समावेश करण्यात आला आहे. हळूहळू हा उपक्रम ३० जिल्ह्यात सुरु करण्यात येईल.