पुणे : पुणे परिमंडलाचे कार्यक्षेत्र असलेल्या हवेली, खेड, मावळ, जुन्नर, आंबेगाव, मुळशी तालुक्यांतील 90 हजार 517 कृषीपंपधारक शेतकर्‍यांना नुकत्याच जाहीर झालेल्या मुख्यमंत्री कृषी संजीवनी योजनेच्या माध्यमातून  वीजबिलाच्या थकबाकीतून मुक्त होण्याची संधी मिळाली आहे.

राज्य शासनाने जाहीर केलेल्या मुख्यमंत्री कृषी संजीवनी योजनेत दि. 31 मार्च 2017 पर्यंत असलेल्या मूळ थकबाकीचा हप्त्यांनी भरणा केल्यास व्याज व दंड माफ केले जाणार आहे. यात हवेली, खेड, मावळ, जुन्नर, आंबेगाव, मुळशी तालुक्यांतील 90 हजार 517 कृषीपंपधारकांकडे 231 कोटी 65 लाख रुपयांची  एकूण थकबाकी आहे. यातील 185 कोटी रुपयांच्या मूळ थकबाकीचा दिलेल्या हप्त्यांचा चालू वीजबिलांसह भरणा केल्यास त्याच प्रमाणात 44 कोटी 32 लाख रुपयांचे व्याज व 2 कोटी 30 लाख रुपयांचा दंड माफ करण्याचा राज्य शासन विचार करणार आहे.

पुणे परिमंडलात 71 हजार 529 कृषीपंपधारकांकडे प्रत्येकी 30 हजार रुपयांपेक्षा कमी अशी एकूण 90 कोटी 42 लाख रुपयांची मूळ थकबाकी आहे. त्यामुळे या कृषीपंपधारकांना प्रत्येक तीन महिन्यांच्या कालावधीत समान 5 हप्ते देण्यात येईल. त्यानुसार मूळ थकबाकीचा चालू वीजबिलांसह भरणा केल्यास व्याज व दंडाचे 18 कोटी 48 लाख रुपये माफ होऊ शकतील. तसेच प्रत्येकी 30 हजार रुपयांपेक्षा अधिक मूळ थकबाकी असणार्‍या 18 हजार 988 कृषीपंपधारकांकडे 94 कोटी 59 लाख रुपयांची मूळ थकबाकी आहे. ही थकबाकी प्रत्येकी दीड महिन्यांच्या 10 समान हप्त्यांत चालू वीजबिलांसह भरल्यास 28 कोटी 85 लाख रुपयांचे व्याज व दंड माफ होऊ शकतील.

पुणे परिमंडलातील थकबाकीदार कृषीपंपधारकांनी मुख्यमंत्री कृषी संजीवनी योजनेत सहभागी होऊन थकबाकीमुक्त व्हावे तसेच माहिती घेण्यासाठी किंवा सहभागी होण्यासाठी संबंधित कार्यालयांशी संपर्क साधावा असे आवाहन असे आवाहन महावितरणने केले आहे. योजनेत सहभागी न झालेल्या कृषीपंपधारकांकडून नियमानुसार थकबाकी वसुली किंवा वीजपुरवठा खंडित करण्याची कारवाई होणार आहे.

योजनेचे विशेष वीजबिल

न मिळाल्यास संपर्क साधा

मुख्यमंत्री कृषी संजीवनी योजनेसाठी थकबाकीदार कृषीपंपधारकांना विशेष वीजबिल देण्यात येत आहेत. यामध्ये संबंधीत ग्राहकांकडे असलेली एकूण थकबाकी, भरावयाची मूळ थकबाकी व त्यासाठी हप्त्यांची संख्या व रक्कम याबाबतची माहिती या विशेष वीजबिलात देण्यात आली आहे. वीजबिल वाटपाची प्रक्रिया वेगाने सुरु आहे. जून 2017 चे त्रैमासिक चालू वीजबिल भरून 15 नोव्हेंबरपर्यंत या योजनेत सहभागी व्हावे लागणार असल्याने हे विशेष वीजबिल न मिळाल्यास थकबाकीदार कृषीपंपधारकांनी महावितरणच्या संबंधीत कार्यालयाशी त्वरित संपर्क साधावा, असे आवाहन महावितरणने केले आहे.

पुणे- आमदार प्रा. मेधा कुलकर्णी यांच्या सहकार्याने व नवनाथ शेटे स्पोर्टस्‌ अकादमी तर्फे आयोजित एआयटीए, एमएसएलटीए व पीएमडीटीए यांच्या मान्यतेखाली होत असलेल्या 25000डॉलर पुणे ओपन आयटीएफ महिला अजिंक्यपद टेनिस स्पर्धेत उपांत्यपुर्व फेरीत भारताच्या बिगर मानांकीत झील देसाईने युक्रेनच्या चौथ्या मानांकीत वालेरीया स्त्राखोवाचा पराभव करत उपांत्यफेरीत प्रवेश केला.

एमएसएलटीए स्कुल ऑफ टेनिस, श्री शिवछ्त्रपती क्रीडा संकुल, म्हाळुंगे बालेवाडी येथे सुरू असलेल्या या स्पर्धेत एकेरी गटात उपांत्यपुर्व फेरीत एक तास दहा मिनिट चाललेल्या सामन्यात भारताच्या बिगर मानांकीत झील देसाईने युक्रेनच्या चौथ्या मानांकीत वालेरीया स्त्राखोवाचा 6-3, 6-2 असा पराभव करत उपांत्यफेरी गाठली. भारतच्या तिस-या मानांकीत कारमान कौर थंडीने आपल्या कामगिरीत सातत्य राखत मोन्टेनेग्रोच्या सहाव्या मानांकीत एना वेसेलीनोवीकचा 6-2, 7-5 असा पराभव करत उपांत्य फेरीत प्रवेश केला. दुस-या मानांकीत रोमानीयाच्या जॉकलीन अदिना क्रिस्टीन हीने स्लोवाकीयाच्या आठव्या मानांकीत तेरेझा मिहालीकोवाचा 7-6(2), 6-2 असा टायब्रेकमध्ये पराभव केला.

दुहेरी गटात उपांत्य फेरीत चायनीज तायपेच्या पी-ची ली व रशियाच्या याना सिझीकोवा या जोडीने भारतच्या झील देसाई व थायलंडच्या बुनयावी थामचायवात यांचा 3-6, 6-2, 10-2 असा तीन सेटमध्ये पराभव करत अंतीम फेरीत प्रवेश केला. उपांत्य फेरीच्या दुस-या लढतीत रोमानीयाच्या जॉकलीन अदिना क्रिस्टीन व स्लोवाकीयाच्या तेरेझा मिहालीकोवा यांनी तुर्कीच्या बेरफु सेंग्झी व स्वित्झरलॅंडच्या करीन केनेल यांचा 6-0, 6-1 असा सहज पराभव करत अंतीम फेरीत प्रवेश केला.

स्पर्धेचा सविस्तर निकाल- एकेरी गट- उपांत्यपुर्व फेरी

जॉकलीन अदिना क्रिस्टीन(रोमानीया,2)  वि.वि तेरेझा मिहालीकोवा (स्लोवाकीया,8) 7-6(2), 6-2

कारमान कौर थंडी(भारत,3) वि.वि  एना वेसेलीनोवीक(मोन्टेनेग्रो,6) 6-2, 7-5

झील देसाई(भारत) वि.वि वालेरीया स्त्राखोवा(युक्रेन,4) 6-3, 6-2

बुनयावी थामचायवात(थायलंड) वि.वि  करीन केनेल(स्वित्झरलॅंड) 6-2, 6-3

दुहेरी गट- उपांत्य फेरी

पी-ची ली(चायनीज तायपे)/ याना सिझीकोवा(रशिया,3) वि.वि  झील देसाई(भारत)/ बुनयावी थामचायवात(थायलंड) 3-6, 6-2, 10-2

जॉकलीन अदिना क्रिस्टीन(रोमानीया)/ तेरेझा मिहालीकोवा (स्लोवाकीया,4) वि.वि  बेरफु सेंग्झी(तुर्की)/ करीन केनेल(स्वित्झरलॅंड) 6-0, 6-1

पुणे :

‘नोटाबंदी निषेध, पुणे’ आयोजित नागरी सभेला मंगळवारी सायंकाळी मोठा प्रतिसाद मिळाला.नोटा बंदीतून अर्थव्यवस्थेत मंदी आली आणि स्वायत्त संस्थांचा ऱ्हास पर्वास प्रारंभ झाला असा आरोप या नागरी सभेत केला गेला.

अर्थतज्ज्ञ अभय टिळक, अॅड. अजित अभ्यंकर, रत्नाकर महाजन, डॉ.विश्वंभर चौधरी या नागरी सभेत सहभागी झाले. संदीप बर्वे यांनी सूत्रसंचालन केले.एस एम फाऊंडेशन येथे ही नागरी सभा झाली.

अॅड. असीम सरोदे म्हणाले, १९७८ मध्ये नोटाबंदीचा निर्णय घेतला तेव्हा तो प्रक्रिया पार पाडून रिझर्व बँकेने जाहीर केला होता. मोदींनी ही प्रक्रिया पाळली नाही. खोटे दावे करणे ही या सरकारची सवय झाली आहे. नोटा बंदीच्या अर्थ नीतीच्या मागे अनर्थ नीती आहे.

अभय टिळक म्हणाले, ‘काळा पैसा रोखीच्या स्वरूपात ठेवला जात नाही, हे मोदी सरकारला कळले नाही. सुगीच्या वेळेस नोटा बंदी झाल्याने शेतीचे कंबरडे मोडले गेले. नोटा बंदी, जीएसटीने विकासदरावर परिणाम झाला. क्रोनी कॅपिटालायजेशनचा नवा चेहरा दिसू लागला. रिझर्व बँकेच्या स्वायतत्तेचा संकोच झाला, ही ऱ्हास पर्वाची चुणूक आहे.

रत्नाकर महाजन म्हणाले, कोणत्याही आर्थिक निकषावर नोटा बंदीचा निर्णयाचे समर्थन करता येत नाही. उलट दोन हजाराच्या नोटांनी भ्रष्टाचार सोपा झाला. नोटा बंदी हा अर्धवट मेंदूने घेतलेला अर्धवट निर्णय आहे. तरी प्रधान प्रचारक आणि प्रचारकांची टोळी अहंगंड सोडायला तयार नाहीत.

अॅड. अजित अभ्यंकर म्हणाले, ‘ नोटा बंदी निर्णय फसला यात शंका नाही. मात्र,काळ्या पैशाची समस्या फक्त पंतप्रधानांच्या हाती देण्याइतकी किरकोळ नाही.जनतेने या बेकायदेशीर उत्पन्नाविरूध्द क्रांतीकारक लढाई केली पाहिजे. बँकांमध्ये आलेला पैसा काळा नाही, हे सरकारलाच सिद्ध करावे लागणार आहे. सोन्याची आयात या वर्षात दुप्पट झाली. सोने कोणी घेतले, बेनामी प्रॉपर्टी कोणी घेतल्या याची श्वेतपत्रिका आणा.म्हणून नोटा बंदी हा कावा होता असे म्हणावे लागते. नोटा मोजायला वेळ का लागला ? खोट्या नोटांची समस्या संपली नाही.बेहिशेबी पैशाच्या समस्येविरुद्ध लढण्याची या सरकारची इच्छाशक्ती नाही.

अध्यक्षस्थानावरुन बोलताना डॉ.विश्वंभर चौधरी म्हणाले, ‘ नोटा बंदीच्या विरोधात सिव्हील सोसायटीच्या माध्यमातून देशभर कार्यक्रम होत आहेत. राजकीय पक्ष एकत्र आले, पुरोगामी संस्था एकत्र आले, हेही महत्वाचे झाले. नोटा बंदीच्या निर्णयानंतर किती ज्वेलर्स वर कारवाई झाली ? काळा पैसा पांढरा होताना कमिशन कोणाकडे गेले ? कोणत्या पक्षाने जमिनी खरेदी केल्या? या प्रश्नांची उत्तरे मिळाली पाहिजेत. रिझव्र्ह, बँकेने ज्या नोटा वाटल्या त्याची नोंद का ठेवली नाही. नोटा बंदीने ग्रामीण अर्थव्यवस्था मोडीत निघाली. १२० माणसे जाऊनही उर्मटपणाने नोटा बंदीचा वर्धापनदिनाचा उत्सव केला जात आहे. हे सरकार असंवेदनशील आहे. लोकशाही कशी चालणार हा प्रश्न आहे.

तुघलक शहाणा वाटावा अशी परिस्थिती आहे. लोकांची नजर आहे, असा जाब विचारला पाहिजे. पंतप्रधानपद हे हिरो गिरीचे पद नाही.जादूगाराचे पद नाही, हे जनतेने सांगीतले पाहिजे.

कार्यक्रमानंतर सेनापती बापट यांच्या पुतळ्यासमोर १२० मेणबत्त्या लावून नोटबंदी रांगांमध्ये मृत पावलेल्या भारतीय नागरिकांना श्रध्दांजली वाहण्यात आली.
नरेश बोडके यांनी आभार मानले.

कार्यक्रमाला डॉ.कुमार सप्तर्षी, डॉ. उर्मी ला सप्तर्षी, अभय छाजेड, ९१ वर्षीय कम्युनिस्ट कार्यकर्त्य शांता रानडे, अन्वर राजन, आनंद करंदीकर, अशोक धिवरे, अप्पा अनारसे उपस्थित होते

पुणे- भारतीय राज्यघटनेचे शिल्पकार डॉ बाबासाहेब आंबेडकर हे संपूर्ण जगतासाठी एक आदर्श असे  उच्चविद्याविभूषित विद्यार्थी व व्यक्तिमत्व होते, त्यांनी खडतर शिक्षणप्रवासातून केलेल्या उल्लेखनीय कामगिरीचा आदर्श विद्यार्थ्यांनी डोळ्यासमोर ठेवत त्यांच्यासारखेच विद्यार्जन करुन नावलौकिक मिळवावा अशी अपेक्षा कर्वे समाज सेवा संस्थेचे संचालक डॉ दीपक वलोकर यांनी संस्थेमार्फत साजऱ्या करण्यात आलेल्या विध्यार्थी दिन कार्यक्रमादरम्यान व्यक्त केली.

महाराष्ट्र सरकारद्वारे यावर्षीपासून डॉ बाबासाहेब आंबेडकर यांनी सर्वप्रथम केलेल्या शाळा प्रवेश दिनाचे औचित्य साधून डॉ बाबासाहेबांचा  शाळा प्रवेश दिन हा विद्यार्थी दिन म्हणून साजरा करण्यात यावा असे जाहीर करण्यात आले होते त्यानिमित्ताने आज संस्थेमध्ये समाजकार्याचे विद्यार्थी व प्राध्यापकांच्या उपस्थित हा दिवस साजरा करण्यात आला. कार्यक्रमाच्या अध्यक्षस्थानी प्रा. डॉ महेश ठाकूर हे होते तर प्रा. शर्मिला सहदेव व प्रा. चेतन दिवाण यांची प्रमुख उपस्थिती होती.

समाजकार्य प्रथम व द्वितीय वर्षाच्या प्रवीण गुंजाळ, दिपाली पवार, रोहित धायरकर, अजित मिसाळ व आकाश सावळकर यांनी मनोगते व्यक्त केली.

डॉ महेश ठाकूर, प्रा. शर्मिला सहदेव व प्रा. चेतन दिवाण यांनी आपले विचार व्यक्त केले.

कार्यक्रमाचे सूत्रसंचालन मक़्बुल देशिंग यांनी केले तर आभार अभिजित काकडे यांनी मानले.