पुणे : छत्रपती शिवाजीनगर मतदारसंघातील रस्ता रुंदीकरण, स्वच्छता, विहिरी संवर्धन, महापालिका वसाहत पुनर्निर्माण आदी विकासकामे मार्गी लावण्याच्या दृष्टीने महत्त्वाच्या ३४ मुद्द्यांवर महापालिका आयुक्त नवल किशोर राम यांच्या समवेत आमदार शिरोळे यांनी आज प्रदीर्घ चर्चा केली. छत्रपती शिवाजीनगर मतदारसंघातील विकासकामे आणि अन्य नागरी सुविधांच्या कामांची तत्काळ अंमलबजावणी करावी, अशा सूचना आयुक्त राम यांनी विविध खात्यांच्या प्रमुखांना दिल्या. शिवाय कामांच्या प्रगतीचा आढावा सहा महिन्यांनी घेतला जाईल, असेही आश्वासन आयुक्तांनी, आमदार शिरोळे यांना दिले.

महात्मा फुले वस्तुसंग्रहालयाचे आधुनिकीकरण करणे आणि इनोव्हेशन हबची उभारणी करणे, जंगली महाराज रस्त्यावरील मल्टिलेव्हल पार्किंग प्रकल्प मार्गी लावणे, डॉ. बाबासाहेब आंबेडकर रोडचे रुंदीकरण करणे, औंधमधील भाजी मंडई, जलतरण तलाव, ड्रेनेज लाईन सुधारणा आदी कामे, छत्रपती संभाजी महाराज उद्यानात छत्रपती संभाजी महाराज यांचा पुतळा बसविणे आणि उद्यानाचे सुशोभीकरण करणे, रस्त्यांवरील खड्डे बुजविणे, कचऱ्याचे निर्मुलन करणे आणि अतिक्रमण हटविणे, महापालिका शाळांच्या इमारतीत दुरुस्त्या करणे, महापालिकेची रुग्णालये सुसज्ज करणे, सार्वजनिक स्वच्छतागृहांची देखभाल करणे, मुळा आणि मुठा नद्यांचे संवर्धन करणे, रेन वॉटर हार्वेस्टिंग आणि विहिरींचे जतन आणि संवर्धन करणे, वाकडेवाडी, पांडवनगर येथील महापालिका वसाहतींचे (कॉलनी) पुनर्निर्माण करणे, भटक्या कुत्र्यांवर नियंत्रण आणि केबल व्यवस्थापन यांसारखे नागरिकांशी निगडित अनेक विषय वेगाने मार्गी लागतील, अशी माहिती आमदार सिद्धार्थ शिरोळे यांनी दिली.

पुणे-सार्वजनिक सेवा सुविधांसाठी राखीव भूखंड (ॲमेनिटी स्पेस) मिळवून देण्याचे आमिष दाखवून हडपसर येथील एका डॉक्टरची २४ लाख रुपयांची फसवणूक करण्यात आली आहे. या प्रकरणी माजी नगरसेविकेसह चार जणांविरुद्ध गुन्हा दाखल करण्यात आला आहे.

माजी नगरसेविका प्राची आल्हाट, त्यांचे पती अशिष आल्हाट, चिंतामणी कुरणे (रा. महंमदवाडी) आणि आसिफ शेख (रा. मंगळवार पेठ) अशी गुन्हा दाखल झालेल्या आरोपींची नावे आहेत. डॉ. महेंद्र धोंडीराम सुरवसे (वय ३९, रा. महंमदवाडी) यांनी या प्रकरणी फिर्याद दिली आहे.

नोव्हेंबर २०२३ ते जुलै २०२५ या कालावधीत हा प्रकार घडला. पोलिसांनी दिलेल्या माहितीनुसार, फिर्यादी डॉ. सुरवसे यांचे महंमदवाडी परिसरात रुग्णालय आहे. आरोपींनी त्यांना ‘ॲमेनिटी स्पेस’ मिळवून देण्याचे आणि महानगरपालिकेची परवानगी मिळवून देण्याचे आश्वासन दिले होते.

यासाठी आरोपींनी डॉ. सुरवसे यांच्याकडे २५ लाख रुपयांची मागणी केली होती. आरोपींवर विश्वास ठेवून डॉ. सुरवसे यांनी त्यांच्या पत्नीच्या आणि मित्राच्या बँक खात्यातून टप्प्याटप्प्याने २४ लाख २० हजार रुपये आरोपींच्या खात्यात जमा केले. मात्र, ठरलेली जागा न मिळाल्याने आपली फसवणूक झाल्याचे डॉ. सुरवसे यांनी फिर्यादीत म्हटले आहे.

सहकार करंडक क्रिकेट स्पर्धा ; पुणे नागरी सहकारी बॅंक्स असोसिएशनच्या वतीने आयोजन 

पुणे : रोहन बलकवडेच्या अचूक गोलंदाजीच्या जोरावर राजर्षि शाहू सहकारी बँकेने पुणे नागरी सहकारी बँक्स असोसिएशनच्या वतीने पुणे जिल्ह्यातील सर्व नागरी सहकारी बँकांसाठी आयोजित आंतरसहकारी बँक सहकार करंडक क्रिकेट स्पर्धेत संत सोपानकाका सहकारी बँकेवर आठ गडी राखून सहज मात केली.

नेहरू स्टेडियममध्ये ही स्पर्धा सुरू आहे. संत सोपानकाका सहकारी बँकेला प्रथम फलंदाजी करताना निर्धारित ८ षटकांत ७ बाद ४९ धावाच करता आल्या. यात केवळ एकालाच दुहेरी धावसंख्या गाठता आली. इतरांनी राजर्षि शाहू बँकेच्या गोलंदाजांसमोर शरणागती पत्करली. राजर्षि शाहू बँकेकडून रोहन बलकवडेने तीन गडी बाद केले, तर वैभव पायगुडेने दोन गडी बाद करून त्याला उत्तम साथ दिली. राजर्षि शाहू बँकेने विजयी लक्ष्य ६.१ षटकांतच पूर्ण केले. यात वैभव पायगुडेने १७, तर प्रशांत सुपेकरने नाबाद १५ धावा केल्या.

धावफलक
१) संत सोपानकाका सहकारी बँक – ८ षटकांत ७ बाद ४९ (कैलास शिंदे १०, श्रीपाद जगताप नाबाद ९, योगेश वाघ नाबाद ९, रोहन बलकवडे ३-१६, वैभव पायगुडे २-९, दीपक वैराट १-१५) पराभूत वि. राजर्षि शाहू सहकारी बँक – ६.१ षटकांत २ बाद ५१ (वैभव पायगुडे १७, प्रशांत सुपेकर नाबाद १५, कैलास शिंदे १-१, रोहित कडू १-१४). सामनावीर – रोहन बलकवडे. 

२) पुणे अर्बन को-ऑपरेटिव्ह बँक – ८ षटकांत ५ बाद ४७ (हृषितोष सावळे १३, सुमीत गद्रे २०७, भूषण शहारे १-६, श्रेयस फाटक १-५) पराभूत वि. संपदा सहकारी बँक – ५.१ षटकांत २ बाद ४८ (श्रेयस फाटक नाबाद २६, मंदार गुर्जुर नाबाद ६, किरण चोरमारे १-२७, एम. ढमढेरे १-४). सामनावीर –  श्रेयस फाटक. 

३) सन्मित्र सहकारी बँक – ८ षटकांत ७ बाद ५९ (प्रवीण ताम्हाणे २२, नितीन लोहार १३, ऋषीकेश जगताप १०, मयुरेश जाधव २-३, हर्षद जळगावकर १-७) पराभूत वि. कॉसमॉस को-ऑपरेटिव्ह बँक – ३.४ षटकांत बिनबाद ६० (प्रसाद शिंदे नाबाद २८, प्रतीक पटवर्धन नाबाद २५). सामनावीर – मयुरेश जाधव. 

४) जनता सहकारी बँक – ८ षटकांत ५ बाद ८१ (अथर्व जोशी ३१, उदय नाबाद १०, वेदान्त मराठे ८, अभिषेक कुलकर्णी २-२०, हिमांशू १-१५) वि. वि. महेश सहकारी बँक – ८ षटकांत ४ बाद ६२ (सागर सप्रे ११, विशाल के. नाबाद १५, चैतन्य २-१०, अश्विन शेलार १-२५, तुषार दिवटे १-१३). सामनावीर – अथर्व जोशी. 

पुणे- केवळ हातगाडी वाले , पथारीवाले यांच्यावर कारवाई महापालिका करते असा ठपका आता पुसण्याचे जणू काम सुरु झाले असून धनकवडी बरोबर कोंढव्यातही बेकायदा बांधकामांवर जोरदार कारवाई सुरु आहे.

कोंढवा खुर्द व कोंढवा बुद्रुक परिसरामध्ये अनाधिकृत बांधकाम कारवाई साठी नियुक्त केलेल्या विशेष पथकामार्फत आज दि.06/10/2025 रोजी कोंढवा खुर्द , भाग्योदय नगर S.no 52, मक्का मस्जिद जवळ एक B3+ 10 मजल्याच्या , इमारतीवर 15000 चौ.फुट आर सी सी बांधकाम तसेच कोंढवा बुद्रुक परिसरामधील स.नं. 5 (पार्ट ) लक्ष्मी नगर गल्ली नं. 1 येथे तळ मजला + 1 मजले (आर सी सी) व गल्ली नं. 5 येथे plinth वर कारवाई करण्यात आली आहे. एकूण सुमारे 18500 चौ.मी. कारवाई झाली
सदर कारवाई साठी 6 बिगारी, 5 पोलीस, 1 jcb , 4 brekar, 2 गॅस cutter, 5 कनिष्ठ अभियंता, 2 उपअभियंता उपस्थित होते.
त्यामुळे सदर अनधिकृत बांधकाम हे कारवाई झाल्यामुळे धोकादायक झालेले आहे.त्याचा वापर करण्यात येऊ नये व सदर इमारतीत सदनिका विकत घेऊ नये.असे आवाहन पुणे महानगरपालिकेने केले आहे.

पुणे- धनकवडी येथील बेकायदा बांधकामांना महापालिकेने आता लक्ष केले असून धनकवडी नवीन हद्द सर्वे नंबर 22 सर्वे नंबर तीन आंबेगाव खुर्द नवीन हद्द सर्वे नंबर 41 साई मंदिर परिसरा मागे 2 गल्ल्या येथील आर.आर.सी.सी/पक्क्या स्वरूपाचे अनधिकृत बांधकामांवर कारवाई करण्यात आली .ही कारवाई महापालिकेचे अधीक्षक अभियंता व बांधकाम विभाग झोन क्र. 02 च्या कार्यकारी अभियंत्यांच्या मार्गदर्शनाखाली उप अभियंता, कनिष्ठ अभियंता यांचे उपस्थितीत करण्यात आली

या कारवाईत एकूण 13,500 चौरस फूट आर.सी.सी/पक्क्या स्वरूपाचे अनधिकृत बांधकाम पाडण्यात आले आहे.कार्यकारी अभियंता बांधकाम विकास विभाग झोन क्र. 02 विभागामार्फत हि कारवाई करण्यात आली कारवाई च्या अनुषंगाने पोलिस कर्मचारी, महाराष्ट्र सुरक्षा बल च्या मदतीने कारवाई करण्यात आली.यात 1 जेसीबी, एक गॅस कटर, 7 अतिक्रमण कर्मचारी अशी यंत्रणा वापरण्यात आली.

पुनर्विकासाच्या नावाने जुनी गुंठेवारी किंवा अनधिकृत घरे परस्पर पाडून पुन्हा त्यावर नवी वाढीव अनधिकृत बांधकामे असलेल्या मोठ्या इमारती उभारणाऱ्या इमारतींची आता चौकशी करून कारवाई केली जाणार असल्याचे महापालिकेच्या अधिकाऱ्यांनी येथे सांगितले.

पुणे- महापालिकेत एकीकडे निवडणूक विभाग,सांस्कृतिक विभाग यांच्याकडे कर्मचारी अधिकारी यांची मारामार होत असताना दुसरीकडे उपायुक्त कर आकारणी आणि कर संकलन पदासाठी काही अधिकारी वर्गात जोरदार रस्सीखेच सुरु असल्याचे वृत्त आहे.आणि या अनुषंगाने महापालिका आयुक्त नवल किशोर राम यांच्यावर या प्रकरणी थेट मंत्रालयातून देखील दबाव आणण्यासाठी प्रयत्न होत असल्याचे समजते आहे.ही दोन्ही खाती विशेष महत्वाची मानली जातात आणि थेट जनतेच्या मुलभूत सेवेशी संबधित आहेत.कर आकारणी संकलन हे खाते तर महापालिकेची तिजोरी सांभाळण्यात आघाडीवर असले पाहिजे अशी स्थिती आहे.आणि घनकचरा विभाग हे शहराच्या स्वच्छता आणि आरोग्याशी निगडीत असल्याने तेही कामकाजात अग्रेसर असलेच पाहिजे अशी भूमिका असते.पण केवळ याचमुळे ती मलईदार देखील समजली जातात.आता या पदांवर कार्यक्षम आणि प्रामाणिक अधिकारी बसनेच लोकांच्या हिताचे असते याबाबत निर्णय घेण्याची जबाबदारी जरी आयुक्तांवर असली तरी त्यांना त्यासाठी प्रचंड दबावाला सामोरे जावे लागते हि वस्तुस्थिती आहे.

दरम्यान गेल्या ३१ ऑक्टोबर रोजीच महापालिकेतील ३ अतिरिक्त आयुक्तांकडे आयुक्त नवल किशोर राम यांनी वर्गीकरण करून विविध खात्यांची जबाबदारी सोपविली आहे . पुणे महानगरपालिका प्रशासनाकडील

अतिरिक्त महापालिका आयुक्त (जनरल) यांच्या कडे सामान्य प्रशासन विभाग,मुख्य लेखा व वित्त विभाग,लेखापरिक्षण विभाग,पाणीपुरवठा विभाग व पाणीपुरवठा प्रकल्प,घनकचरा व्यवस्थापन विभाग,आरोग्य विभाग,भवन रचना विभाग,अग्निशमन दल व आपत्ती व्यवस्थापन विभाग,विधी विभाग,उप आयुक्त (विशेष) विभाग ,समाज कल्याण विभाग,
समाज विकास विभाग,प्राथमिक शिक्षण विभाग,शिक्षणाधिकारी (माध्यमिक व तांत्रिक) विभाग,कामगार कल्याण विभाग,मंडई विभाग,
जनरल रेकॉर्ड विभाग,तांत्रिक विभाग,,प्रशिक्षण प्रबोधिनी विभाग,मागासवर्ग कक्ष,परिमंडळ क्र. १ व २ असे २१ विभाग सोपविले आहेत तर

अतिरिक्त महापालिका आयुक्त (इ) यांचे नियंत्रणाखाली
१)कर आकारणी व कर संकलन
२)बांधकाम विभाग (संपूर्ण नस्ती सह)
३)मलनिःसारण प्रकल्प (जायका)
४)मलनिःसारण देखभाल व दुरूस्ती विभाग
५)माहिती व तंत्रज्ञान विभाग
६)प्रकल्प विभाग
७)नदी सुधारणा प्रकल्प
८)विद्युत विभाग
९)सुरक्षा विभाग
१०)पर्यावरण विभाग
११)अतिक्रमण / अनाधिकृत बांधकाम निर्मुलन विभाग
१२)आकाशचिन्ह व परवाना विभाग
१३)मोटार वाहन विभाग
१४)जिल्हा नियोजन व विकास समिती विभाग (डी.पी.डी. सी.)
१५)मुद्रणालय विभाग
१६)नगर सचिव विभाग
१७)परिमंडळ क्र. ४ व ५

असे १७ विभाग सोपविण्यात आले आहेत .

अतिरिक्त महापालिका आयुक्त (विशेष) यांचे नियंत्रणाखाली

१)पथ विभाग
२)मालमत्ता व व्यवस्थापन विभाग
३)भूसंपादन व व्यवस्थापन विभाग
४)मध्यवर्ती भांडार विभाग
५)टेंडर सेल
६)उद्यान विभाग
७)क्रिडा विभाग
८)निवडणूक विभाग
९)सांस्कृतिक केंद्र विभाग
१०)प्रधानमंत्री आवास योजना
११)एस.आर.ए.
१२)माहिती व जनसंपर्क विभाग
१३)झोपडपट्टी निर्मुलन व पुर्नवसन विभाग, चाळ विभाग

१४)स्थानिक संस्था कर विभाग
१५)जनगणना विभाग
१६)ऑप्टीकल फायबर इन्फ्रास्ट्रक्चर विभाग
१७)बी.एस.यु.पी. सेल
१८)बी. ओ. टी. सेल विभाग
१९)सायकल विभाग
२०)परिमंडळ क्र. ३

असे २० विभाग सोपविण्यात आले आहेत .

पुणे- महापालिकेचे उप आयुक्त (निवडणूक) प्रसाद काटकर यांनी अधिकारी आणि कर्मचारी रजेवर जात असल्याने महापालिकेच्या निवडणूक कामकाजात अडथळा येत असल्याच्या प्रकारची गंभीर दखल घेतली असून निवडणूक कर्तव्यार्थ नियुक्त असणाऱ्या सर्व अधिकारी व कर्मचारी यांची कोणत्याही प्रकारची रजा किंवा सुट्टी खातेप्रमुखांनी मंजूर करू नये अत्यावश्यक बाबीसाठी निवडणूक कार्यालयाची पूर्व परवानगी घ्यावी असे आदेश काढले आहेत .

आपल्या कार्यालयी परिपत्रकातून दिलेल्या आदेशात निवडणूक प्रमुख प्रसाद काटकर यांनी म्हटले आहे कि,’पुणे महानगरपालिका सार्वत्रिक निवडणूक २०२५ चे कामकाज नगर विकास विभाग, महाराष्ट्र शासन व राज्य निवडणूक आयोग, महाराष्ट्र यांचे आदेश व निर्देशानुसार सुरु असून सद्यस्थितीत प्रभाग रचनेची कार्यवाही पूर्ण झालेली आहे व प्रारूप मतदार याद्यांचे कामकाज युद्ध पातळीवर सुरु असून निवडणूक विषयक इतर कामे ही अतित्वर्य व कालमर्यादेत पूर्ण करणे आवश्यक आहेत. त्यानुषंगाने असे निदर्शनास आले आहे की, निवडणूक कर्तव्यावर काम करत असताना अधिकारी / कर्मचारी रजेवर जात आहेत. त्यामुळे निवडणूक कामकाजात अडथळा निर्माण होत आहे.
तरी या कार्यालयीन परिपत्रकाचे दिनांकापासून पुणे महानगरपालिका सार्वत्रिक निवडणूक २०२५ चे संपूर्ण कामकाज पूर्ण होईपर्यंतचे कालावधीत निवडणूक कर्तव्यार्थ नियुक्त असणाऱ्या सर्व अधिकारी / कर्मचारी यांची कोणत्याही प्रकारची रजा / सुट्टी ही निवडणूक कार्यालयाची पूर्वपरवानगीशिवाय मान्य करू नये.