पुणे, ता. १९ ः डेक्कन एज्युकेशन सोसायटीच्या डीईएस श्री. नवलमल फीरोदिया विधी महाविद्यालयाने आयोजित केलेल्या लोकमान्य टिळक अभिरुप न्यायालय स्पर्धेत आयएलएस विधी महाविद्यालयाने विजेतेपद पटकाविले. अनहिता के, समर्थ सक्सेना, आयुष अभिनव यांनी प्रतिनिधित्व केले. चौदा महाविद्यालयांनी सहभाग घेतला.
बेंगलोरच्या स्कूल ऑफ लॉ, ख्रिस्ट यूनिव्हर्सिटीने दुसरा क्रमांक मिळविला. लुईस उन्नी, प्रियांका देशमुख, अंकिता होरो यांनी प्रतिनिधित्व केले. आयएलएसच्या समर्थ सक्सेनाला बेस्ट ऍडव्होकेट आणि केईएस लॉ कॉलेज, मुंबईच्या स्वेजत दाहो, राहुल मिश्रा, किंजल यांना बेस्ट मेमोरियलने गौरविण्यात आले.
न्यायमूर्ती हॉसबेट सुरेश यांच्या हस्ते उद्घाटन करण्यात आले. सोसायटीच्या नियामक मंडळाचे अध्यक्ष डॉ. शरद कुंटे अध्यक्षस्थानी होते. मुंबई उच्च न्यायालयातील न्यायमूर्ती मकरंद कर्णिक यांच्या हस्ते पारितोषिक वितरण करण्यात आले. विधी क्षेत्रात करिअर करण्यासाठी कायद्याचे सखोल ज्ञान आणि तंत्रज्ञानाचा योग्य वापर करण्याची क्षमता आवश्यक असल्याचे मत ऍड. कर्णिक यांनी व्यक्त केले. प्राचार्या डॉ. रोहिणी होनप यांच्या मार्गदर्शनाखाली डॉ. प्रताप साळुंके, स्वरुप वाघमारे, पलटक अरोरा, रोहन निकजे यांनी कार्यक्रमाचे संयोजन केले.

पुणे: नवीन दात बसविण्यासाठी अचूक नेव्हीगेशन करून डॉक्टरांना मदत करणारे ‘नेव्हीगेशन इंप्लांटोलॉजी’ (नेव्हीडेंट) तंत्र प्रथमच पुण्यात आल्याची माहिती डॉ. संजय जैन (दंत चिकित्सक, पीरियोडोंटिस्ट आणि इम्प्लॉँटोलॉजीस्ट) यांनी दिली.

पुणे श्रमिक पत्रकार संघात आयोजित पत्रकार परिषदेत त्यांनी ही माहिती दिली.

जुन्या पद्धतीनुसार दंत चिकित्सक दात बसविताना डॉक्टरांचे कौशल्य आणि अंदाज महत्वाचा ठरत असतो. प्रत्येक रुग्णाच्या जबड्याचा, दातांचा आकार, ठेवण, खोली, कोन वेगळी असते. त्याप्रमाणे नवे दात बसवावे लागतात. त्यात काही प्रमाणात माप आणि जागेच्या चुका होऊ शकतात.

मात्र, ‘रियल टाईम डायनॅमिक नेव्हीगेशन’ तंत्राने इंप्लांट बसविताना दात अचूकपणे बसवता येतो.

तपासणीसाठी तोंडात ‘थर्मोप्लास्टिक स्टेंट’ टाकून तपासणी केली जाते. त्यामुळे जबडा, दात या बद्दलच्या सर्व गोष्टी सिटी स्कॅन केल्याप्रमाणे संगणकावर दिसतात.

या तंत्राद्वारे इंप्लांट उपचार करताना प्रथम तपासणी केली जाते. त्याठी रुग्णाच्या जबड्यात ‘नेव्हीस्टेंट’ बसवला जातो. त्याद्वारे सीटी स्कॅन होते, आणि जबड्याची रचना, दात, ठेवण यांचे अचूक मोजमाप उपलब्ध होते. ही माहिती संगणकावर दिसते आणि उपलब्ध होते. त्या माहितीनुसार नवे दात करणे, बसवणे सुलभ होते.

हे तंत्र आणि नेव्हीगेशन मशिन भारतात प्रथमच पुण्यात आणले असून, डॉ. संजय जैन त्याद्वारे उपचार करीत आहेत. तसेच डेंटल इंप्लांट शस्त्रक्रियेत सॅटेलाईट आणि जीपीआरएस (GPRS) ची मदत होणार आहे, त्यामुळे कोणतेही रेडिएशन आणि एक्स रे काढावा लागणार नाही.

आत्तापर्यंत या नेव्हीगेशन तंत्राने त्यांनी 25 रुग्णांवर इंप्लांट उपचार केले आहेत. या क्रांतीकारक तंत्राने ’इंप्लांट डेन्टीस्ट्री’ ही उपचारपद्धती पूर्णपणे बदलणार असल्याची माहिती डॉ. संजय जैन यांनी दिली.

या तंत्राचे उपचार तुलनेने महाग नाहीत. वेळेतही बचत होते, असे त्यांनी सांगितले. ‘क्लॅरॅनॉव’ कंपनीचेे हे नेव्हीगेशन मशिन  आहे. ‘नेव्हीडेंट’ असे या मशिनचे नाव आहे.

पुणे- लष्कर भागातील बंगला नंबर एकमधील हजरत सय्यद मोहम्मद शाह रहे पाचपीर दर्गाह ४३८ वा उरूस सर्वधर्मियांनी एकत्रित येउन उत्साहात साजरा करण्यात आला . या उरुसामध्ये संदल शरीफ , उर्स शरीफ , जियारत आदी धार्मिक कार्यक्रम उत्साहात संपन्न झाले . यावेळी शाहिद अजमेरी व मेहमूद निजामी यांचा कव्वालीचा कार्यक्रम झाला . त्यानंतर भंडाऱ्याचा कार्यक्रम झाला . यावेळी शेरा चढविण्यास भाविकांनी गर्दी केली होती .

या उरुसाचे आयोजन करण्यासाठी दर्गाहचे खादिम जयकुमार राघवाचारी , योगेश चव्हाण , अमर शेख पुणेकर , गणेश  राघवाचारी , रोहित चिंडालिया , नासिर शेख , निजाम शेख , विजयन जोजफ , रविंद्र वाल्मिकी , सुरेश वर्मा , सोमेश खरात , महेश मोरे , हुसेन शेख , निलेश जाधव , स्वप्नील सकट आदींनी केले होते. 

या उरुसामध्ये प्रमुख पाहुणे माजी महापौर प्रशांत जगताप , नगरसेवक अविनाश बागवे , शिवसेना पुणे कॅन्टोन्मेंट विभागप्रमुख अमोल देवळेकर , अर्शद अक्कलकोटकर , प्रकाश बहिरट , पोपट गायकवाड , मन्नू कागडा , पप्पू सलुजा , तुषार त्रिवेदी , कैलाशकुमार आदी मान्यवर उपस्थित होते.