पुणे- उर्जा संवर्धन आणि व्यवस्थापन क्षेत्रात उत्त्कृष्ट कामगिरी करणाऱ्यांना या कार्यक्रमात पुरस्कार देऊन गौरविण्यात येत आहे. हा गौरव सोहळा म्हणजे ऊर्जा संवर्धना बाबत प्रोत्साहन आणि प्रबोधन करण्याचेच एक माध्यम आहे, असे प्रतिपादन अन्न व औषध प्रशासन, अन्न व नागरी पुरवठा आणि ग्राहक संरक्षण तथा पालकमंत्री गिरीष बापट यांनी केले.

येथील महाराष्ट्र उर्जा विकास अभिकरण ( महाऊर्जा ) या महाराष्ट्र शासनाच्या संस्थेतर्फे आयोजित बाराव्या उर्जा संवर्धन आणि व्यवस्थापन पारितोषिक वितरण समरंभात ते बोलत होते. यावेळी राज्याचे ऊर्जा मंत्री चंद्रशेखर बावनकुळे, आमदार मेधा कुलकर्णी, बि. इ. इ चे महासंचालक अभय बाकरे, महाऊर्जाचे महासंचालक विपीन शर्मा, अतिरिक्त महासंचालक पुरूषोत्तम जाधव, पुरस्कार निवड समितीचे सदस्य व्ही. व्ही कानेटकर, पी. जी. चव्हाण, बि. पी. भंडारी आदी मान्यवर उपस्थित होते.

श्री. बापट म्हणाले, वाहतूक, पाणी टंचाई, ऊर्जा संवर्धन अशा अनेक समस्या आज समोर आहेत, या सर्व समस्यांबाबत जनजागृती होणे गरजेचे आहे. एका चांगल्या कामाचा गौरव केल्याने एका चांगल्या विचाराचा गौरव होतो. उर्जा संवर्धनासाठी शालेय स्तरापासून प्रबोधन करायला हवे. मोठ्या शहरांमध्ये आज पाण्याचा अतिरीक्त वापर केला जातो तो टाळायला हवा. आज देशातील 38 कोटी लोकांनी नव्याने बँक खाती उघडली आहेत. प्रयत्न केले की अनेक गोष्टी सहज शक्य होतात याचेच हे उदाहरण आहे. देशात ऊर्जा बचतीबाबत महाराष्ट्र राज्य दुसऱ्या क्रमांकावर आहे हि आनंदाची बाब.

श्री बावनकुळे म्हणाले, ऊर्जा क्षेत्रात काम करणारे देशच जागतीक पातळीवर श्रीमंत देश आहेत. आपल्या देशात देखील ऊर्जा संवर्धनासाठी तसेच प्रत्येक घरा पर्यंत वीज पोहचवण्यासाठी केंद्र शासन व राज्य शासन प्रयत्न करीत आहे. विविध योजनांच्या माध्यमातून दुर्गम भागात प्रत्येक घरात आज वीज पोहचविण्यासाठी प्रयत्न सूरु आहेत. या क्षेत्रात काम करू इच्छीणाऱ्या सर्व संस्थांना लागणारी मदत तसेच सुविधा देखील पुरवण्याचा प्रयत्न आम्ही करु. सन 2025 पर्यंत शेतकरी सौर उर्जेचा वापर करतील असा विश्वास आहे.

कार्यक्रमाचे प्रास्तावीक श्री. शर्मा यांनी केले. प्रादेशिक महाव्यवस्थापक आवाड यांनी आभार मानले. उर्जा संवर्धन आणि व्यवस्थापन क्षेत्रात काम करणाऱ्या राज्यातील सुमारे 63 संस्थांना यावेळी मान्यवरांच्या हस्ते पारितोषिक प्रदान करण्यात आले.

पुणे. :-लोकांना भासणाऱ्या वैद्यकीय समस्या दूर करण्यासाठी मोठ्या प्रमाणात विकास करू आणि सर्वसामान्य लोकांना अद्यावत हॉस्पिटल आणि जास्तीत जास्त चांगल्या सुविधा देण्यासाठी आम्ही कायमच कटीबद्ध असू अशी भावना पालकमंत्री गिरीश बापट यांनी व्यक्त केली.

पुण्याचे पालकमंत्री गिरीश बापट यांनी ससून जनरल हॉस्पिटल आणि कमला नेहरू व गाडीखाना हॉस्पिटल यांना प्राणवायूच्या पुरवठ्याअभावी होणारे अर्भक मृत्यू टाळण्यासाठी न्यूनॉटल रेप्सरेटर या जिल्हा वार्षिक योजनेतुन  ‘अॅप्रोटेक निओनेटल रेस्पिरेटर’ हे वैद्यकीय उपकरण आणि स्थानिक विकास निधीतून रुग्णवाहिका दिल्या. पालकमंत्री गिरीश बापट यांच्या हस्ते वाटप करण्यात आले.यावेळी ते बोलत होते.

ससून जनरल हॉस्पिटल आणि गाडीखाना येथे हे वैद्यकीय उपकरण तर कमला नेहरू हॉस्पिटलला फिरता दवाखाना व रुग्णवाहिका देण्यात आली. या एका उपकरणाच्या माध्यमातून २ बालकांना प्राणवायू पुरवला जाऊ शकतो.

ते पुढे म्हणाले कि, बालमृत्यूची वाढणारी संख्या लक्षात घेऊन वैद्यकीय यंत्रणेला

अधिकाधिक कार्यक्षमतेने काम करता यावे त्याचबरोबर त्यांच्या कामाची वेग वाढवा आणि एकही बालक दगावले जावू नये हा संदेश सर्वांपर्यंत जावा या कार्यक्रमाचे आयोजन करण्यात आले होते.

आपल्या येणाऱ्या पिढीसाठी गर्भवती महिलांना सकस आहार,आवश्यक औषधे हि योग्य वेळेत मिळून देण्यासाठी आम्ही नेहमी प्रयत्नशील असू. असेही ते म्हणाले  त्याचबरोबर अशा कामांसाठी अधिकाधिक लोकांनी पुढे येऊन सढळ हाताने मदत केली पहिजे. यामुळे अशी वैद्यकीय उपकरणे शहराबरोबरच जिल्ह्यातील व इतर अनेक रुग्णालयांना उपलब्ध करून देता येतील आणि जास्तीत जास्त लोकांना याचा फायदा घेता येईल.

महापौर मुक्ता टिळक,महापालिका आरोग्य अधिकारी साबणे,नगरसेवक हेमंत रासने, महेश लडकत, राजेश येनपुरे,गायत्री खडके,आरती कोंढरे याप्रसंगी उपस्थित होते.

पुणे- डान्स युनियनच्या बॅनरखाली देश, राज्य आणि शहरातील अग्रगण्य नर्तक नृत्य जगतातील इतिहास घडविणार आहेत. येत्या 29 एप्रिल रोजी बीईजी मुख्यालयाजवळ डेक्कन कॉलेज मैदान,येरवडा येथे नृत्याचे प्रदर्शन घडविणार आहेत. या कार्यक्रमात तब्बल 7000नर्तक, 400 कोरिओग्राफर्स असतील आणि यावेळी 5000 प्रेक्षक उपस्थित राहण्याची अपेक्षा आहे. एक व्यवसाय म्हणून नृत्याला आदर दर्शविण्यासाठी आणि बदलत्या काळानुसार नागरिकांनी निरोगी राहण्याचे आवाहन करण्याच्या उद्देशाने हा कार्यक्रम आयोजित करण्यात आला आहे.

या कार्यक्रमाचे समन्वयक आणि आयोजक संजय सावंत यांनी प्रसारमाध्यमांशी बोलताना सांगितले, की हा कार्यक्रम एप्रिल 29 (रविवारी) 5 ते 8 या वेळेत होणार आहे. पुणे डान्स युनियनने एप्रिल 2016 मध्ये आपल्या नृत्य संघटनेची स्थापना केली. या कार्यक्रमात बॉलीवूडमधील रियालिटी शोचे नर्तकही भाग घेणार आहेत. या कार्यक्रमादरम्यान इंदापूर, वाघोली, वडगावशेरी, डूअरस्टेप, दापोलीतील सरस्वती अनाथाश्रम येथील विविध सामाजिक संस्थांमधील अनाथ मुलामुलींनाही व्यासपीठ देण्यात येईल. कौसर खान, करिश्मा चव्हाण,कृती महेश, सिद्धेश, पुणेकर डॅनी डान्सवाला, विक्की आल्हाट आणि जीत सिंग हे नर्तक– नृत्यांगना हे या कार्यक्रमाचे विशेष आकर्षण आहेत. या कार्यक्रमात 5 ते 50 वर्षांपर्यंत वयोगटातील व्यक्ती सहभागी होऊ शकतील. यामध्ये फुलवा खमकर, शेरा गुरमीत सिंग (सलमान खानचा बॉडीगार्ड), खालिद आझमी, सबीना खान, सरूप छोटू लोहार इ. उपस्थित असतील.

आयोजकांच्या म्हणण्यानुसार यातील नृत्ये हे नृत्य–फिटनेसच्या थीमवर आधारीत आहेत. त्यात युवक आणि मध्यमवर्गीय नागरिकांवर विशेष भर देण्यात आला आहे. पुणे डान्स युनियनचे सदस्य असलेले संजय सावंत म्हणाले, 29 एप्रिल रोजी आंतरराष्ट्रीय नृत्य दिवस साजरा करण्याच्या निमित्ताने नागरिकांना फिटनेसबद्दल जागरुक करण्याच्या उद्देशाने नृत्य दिन आयोजित करण्यात आला आहे. याअंतर्गत आमच्या “लव्ह दि डान्स” या आमच्या मोफत कार्यक्रमात उपस्थित राहण्यासाठी सर्वांना आमंत्रित करण्यात आले आहे.

“या कार्यक्रमात मोठ्या संख्येने उपस्थित राहून मनापासून सहभागी होण्याचे आवाहन आम्ही पुणेकरांना करतो. यातून नागरिकांपर्यंत निरोगी व स्वस्थ राहा, हा संदेश जाईल. हा विनामूल्य कार्यक्रम असून आम्ही घडविणार असलेल्या इतिहासाचा भाग होण्यासाठी नागरीकांनी यात सहभागी होणे आवश्यक आहे, असे त्यांनी सांगितले.

कपिल मुथा व्हेंचर्सचे कपिल मुथा यांनी सांगितले की, दिव्यांग लोकांसाठी या कार्यक्रमात विशेष स्पर्धा असेल. त्यांचे मनोबल वाढविण्याकरिता आणि जीवनातील भावी आव्हानांचा सामना करण्यासाठी त्यांना प्रोत्साहित करण्यासाठी त्यांना पुरस्कार दिले जातील.

या कार्यक्रमाला पाठिंबा देणाऱ्या अन्य प्रमुख व्यक्तींमध्ये आरके अकादमीचे राहुल कोसंदकर, कपिल मुथा व्हेंचर्सचे कपिल मुथा, प्रदीप गायकवाड, कृष्णकुमार गोयल, युवराज ढमाले, दीपक जावळकर, नवजित सिंग, सोनिग्रा आणि अनिल वाधवा यांचा समावेश आहे. या कार्यक्रमात अहमदनगर, नागपूर, सांगली, मुंबई आणि औरंगाबादचे प्रतिभागी सहभागी होणार आहेत.

पुणे- “शाळा आणि घर ही शिक्षणाची दोन प्रमुख केंद्रे आहेत. औपचारीक शिक्षण हे शाळेत तर अनौपचारिक शिक्षण घरामध्ये मिळते. या दोन्ही ठिकाणाहून मिळणार्‍या संस्कारातूनच समाजात चांगल्या व्यक्तिमत्वाचा माणूस निर्माण होतो.”असे उद्गार संत गाडगेबाबा अमरावती विद्यापीठाचे कुलगुरू डॉ. मुरलीधर जी. चांदेकर यांनी काढले.
विश्‍वशांती केंद्र (आळंदी), माईर्स एमआयटीच्या वतीने आयोजित केल्या गेलेल्या “वैश्‍विक मूल्याधिष्ठित शिक्षण आणि यशस्वी व्यक्तिमत्व विकास परीक्षा -२०१८” या राज्यस्तरीय प्रमाणपत्र परीक्षेत यशस्वी झालेल्या सुवर्णपदक विजेत्या सर्वोत्कृष्ट विद्यार्थ्यांच्या सन्मान सोहळ्याच्या प्रसंगी प्रमुख पाहुणे म्हणून ते बोलत होते. अध्यक्षस्थानी विश्‍वशांती केंद्र (आळंदी), माईर्स एमआयटीचे संस्थापक अध्यक्ष प्रा. डॉ. विश्‍वनाथ दा. कराड हे होते.
यावेळी माजी प्राचार्य व पुणे जिल्हा पातळीवरील अधिकारी नानासाहेब निंबाळकर, व्ही. एस. सातव हायस्कूलचे प्राचार्य किसन जाधव हे सन्माननीय पाहुणे म्हणून उपस्थित होते. तसेच, परीक्षेचे प्रमुख समन्वयक व नागपूर विद्यापीठाचे माजी कुलगुरू डॉ. एस. एन. पठाण व जयंत पाठक हेही उपस्थित होते.
डॉ.चांदेकर म्हणाले, “संयुक्त कुटुंबपद्धतीत मुलांमध्ये संस्कार रूजविले जात असत. येथे आजीच्या गोष्टींच्या माध्यमातून मुले व अंतिमतः समाज घडविला जात असे. पण विभक्त कुटुंब पद्धतीमुळे हे सर्व अस्ताव्यस्त झाले आहे. वर्तमानकाळात संस्कार देणारे शिक्षण नसल्यामुळे याचा सर्वांनीच विचर केला पाहिजे. विश्‍वशांती केंद्राने आयोजित केलेल्या या परीक्षेमुळे विद्यार्थ्यांना संस्कारयुक्त शिक्षण मिळत आहे. याचा फायदा आर्थिक उन्नतीसाठी होईल की नाही, हे सांगता येणार नाही. पण आंतरिक व्यक्तिमत्वाला जो आकार मिळणार आहे, त्यामुळे संपूर्ण आयुष्याची गुणवत्ता वाढणार आहे. मूल्याधिष्ठित शिक्षण देणार्‍या परीक्षेमुळे विद्यार्थ्यांच्या नैतिकतेला आकार येतो. त्यामुळे पुढील काळात संपूर्ण राज्यात या परीक्षेचा प्रसार झाला पाहिजे.
प्रा. डॉ. विश्‍वनाथ दा. कराड म्हणाले, सबंध विश्‍वाला अशांतता आणि हिंसाचाराने ग्रासले आहे. हजार वर्षांच्या पारतंत्र्यामुळे आमच्या देशाने आपली अस्मिता गमाविली आहे. ब्रिटीश लोकांनी तिच्यावर जाणीवपूर्वक आघात केले आहेत. पण या सर्व प्रश्‍नांवरची उत्तरे शेकडो वर्षांपूर्वींच आमच्या संतांनी दिली आहेत. त्यांच्या मार्गाने आपण गेलो, तर येणार्‍या काळात आपण सर्व जगाला शांतीचा मार्ग दाखवू शकू.
नानासाहेब निंबाळकर म्हणाले, भारतीय मूल्यांच्या संवर्धनासाठी ही परीक्षा सर्वत्र व्हावी. समाजात चांगली व्यक्ती घडविण्यासाठी ही परीक्षा अत्यंत महत्वपूर्ण आहे. समाजात सकरात्मक बदल घडवून आणण्याचे सामर्थ्य या अभ्यासक्रमात आहे.
किसन जाधव म्हणाले, भारतीय संस्कृतीचे जतन करण्यासाठी समाजाला अशा परीक्षांची आवश्यकता आहे. या परीक्षेच्या माध्यमातून विद्यार्थ्यांमध्ये नैतिक मूल्यांची जोपासना होत आहे. अशा परीक्षांमधून विद्यार्थ्यांचे संपूर्ण व्यक्तिमत्व उमलून येण्यास मदत मिळेल.
डॉ. एस.एन.पठाण यांनी या परिक्षेच्या उपक्रमामागची व विद्यार्थ्यांना सत्कारपूर्वक पारितोषिके देण्यामागची भूमिका स्पष्ट केली. या पुढील काळात राज्यातील सर्वं शाळांमधील शिक्षक व विद्यार्थी या प्रयत्नामध्ये सहभागी होतील अशी अपेक्षा आहे.
या वेळी आकांक्षा सातव, ओंकार चौधरी व निकिता तांबडे या विद्यार्थ्यांनी आपले मनोगत व्यक्त केले.
जयंत पाठक यांनी सूत्रसंचालन केले. सौ. देवयानी पालवे यांनी आभार मानले.

–

सुवर्णपदक विजेत्या सर्वोत्कृष्ट विद्यर्थ्यांचा सन्मान-
यावेळी कु. आकांक्षा गणेश सातव, व्ही. एस. सातव हायस्कूल, पुणे व कु. प्रतीक्षा रमेश सूर्यवंशी, मुकुंदराज माध्यमिक विद्यालय, नांदगाव, जि. लातूर या विद्यार्थ्यांनी राज्यात पहिल्या क्रमांकाचा मान प्राप्त केला. त्यांना सुवर्णपदक, रु. ११,०००/- रोख बक्षीस, स्मृतिचिह्न व प्रमाणपत्र देण्यात आले. द्वितिय क्रमांक मिळविणारे कु. ओंकार अशोक चौधरी, व्ही. एस. सातव हायस्कूल, पुणे याला रौप्यपदक व रोख रु. ९,०००/- रक्कम, कु. निकिता कल्याण तांबडे, संत ज्ञानेश्‍वर माध्यमिक विद्यालय, पुणे, कु. नेहा नथाजी भोकरे, श्री शिवाजी हायस्कूल, अकोट, जि. अकोला यांनी तृतीय क्रमांक प्राप्त केला. त्यांना कांस्यपदक व रु. ७०००/- रोख रक्कम दिले. तसेच कु. खुशिया किशोर पाचाडे, कु. अपेक्षा दिगंबर गायकवाड, कु. किरण राजेंद्र गायकवाड, कु. सिद्धी रोहिदास जाधवराव व कु. वैष्णवी पद्माकर बन यांनी चौथ्या व पाचव्या क्रमांकावर यश प्राप्त केले. त्यांना अनुक्रमे रु. ५०००/- व रु. ३०००/- रोख बक्षीसे देण्यात आले. सर्व विद्यार्थ्यांना प्रशस्तीपत्रक व तत्त्वज्ञ संत ज्ञानेश्‍वर माऊलींची प्रतिमा देऊन पाहुण्यांच्या हस्ते त्यांचा गौरव करण्यात आला.

पुणे-आर्य वैश्य (कोमटी)समाजाच्यावतीने पुणे लष्कर भागातील सरदार वल्लभभाई पटेल मार्गावरील श्री नगरेश्वर देवालयमध्ये वासवी माता जयंती उत्सव सोहळा उत्साहात संपन्न झाला . त्यानिमित्ताने लष्कर भागात वासवी मातेची भव्य मिरवणूक काढण्यात आली . तसेच यंदाचे वासवी पुरस्कार नांदेड येथील दत्तात्रय देवडवार व पुणे येथील नंदकिशोर पारसेवार यांना देण्यात आला .

यावेळी प्रमुख पाहुणे पुणे कॅन्टोन्मेंट बोर्डाचे नगरसेवक अतुल गायकवाड , नगरसेवक दिलीप गिरमकर , नगरसेवक विनोद मथुरावाला ,आर्य वैश्य (कोमटी) समाजाचे ऑल इंडियाचे अध्यक्ष नंदकुमार गादेवार , राष्ट्रीय स्वयंसेवक संघाचे कसबा भागाचे संघ चालक ऍड. प्रशांत यादव आदी मान्यवर व आर्य वैश्य (कोमटी)समाज बांधव मोठ्या संख्येने उपस्थित होते .

यावेळी आर्य वैश्य (कोमटी)समाजाचे पुणे शहर अध्यक्ष लक्ष्मीकांत कोले , विश्वस्त जी. एल. निलावार , सचिव संजय पेकम , उपाध्यक्ष प्रविण गुंडेवार , कोषाध्यक्ष प्रशांत कोतुर , प्रसिद्धीप्रमुख डॉ. अभिजित बंडेवार , सदस्य सुरेश खजेपवार , राजेश केशटवार , प्रदीप महाजन , अशोक मामीडवार , मुकुंद जवाजीवार , सुनिल पेकम , सल्लागार नंदकुमार गादेवार , अनिल महाजन व महिला कार्यकारिणी मंडळ उपस्थित होते .