पुणे जिल्हा रिटेल व्यापारी संघ, समग्र नदी परिवार व क्लीन गारबेज मॅनेजमेंट करणार प्रकल्पाची अंमलबजावणी

पुणे : शहरातील व्यापाऱ्यांकडे निर्माण होणारा प्लास्टिक, सुका व ओला कचरा गोळा करुन त्यापासून खत व प्लास्टिकपासून बकेट तयार करण्याचा पथदर्शी प्रकल्प पुणे जिल्हा रिटेल व्यापारी संघ, समग्र नदी परिवार व क्लीन गारबेज मॅनेजमेंट यांच्या संयुक्त विद्यमाने राबविण्यास सुरुवात केली आहे. कचरा गोळा करणाऱ्या गाडीचे नुकतेच उद्घाटन करण्यात आले. हा पथदर्शी प्रकल्प असून सिंहगड रस्त्यावरील व्यापाऱ्यांसाठी हा राबविला जात आहे.

प्लास्टिकमुळे पर्यावरणाचा गंभीर प्रश्न निर्माण होत असल्याने प्लास्टिक बंदीची घोषणा राज्य सरकारने केली. कचऱ्याचे योग्य व्यवस्थापन होऊन ओला व सुका कचरा आणि प्लास्टिक वेगळे केले तर, प्लास्टिकचा प्रश्न निर्माण होणार नाही. परंतु, महापालिकेकडून आवश्यक तेवढे प्रयत्न यासाठी केले जात नाहीत. त्यामुळेच हा पथदर्शी प्रकल्प सिंहगड रस्त्यावरील व्यापाऱ्यांसाठी राबविण्यात येईल. यानंतर शहरातील इतर भागातही असे प्रयोग होतील, अशी माहिती पुणे जिल्हा रिटेल व्यापारी संघाचे अध्यक्ष सचिन निवंगुणे यांनी दिली. उद्घाटन प्रसंगी ग्राहक पेठचे कार्यकारी संचालक सूर्यकांत पाठक, रिटेल व्यापारी संघाचे अध्यक्ष सचिन निवंगुणे, नगरसेवक राजेंद्र शिळीमकर, नगरसेवक शंकर पवार, दिनेश धावडे, सोमारामजी राठोड, नवनाथ सोमसे, सुनील गेहलोत, विजय नरेला, कैलास बिबवे, सारंग राडकर, रविंद्र सारुक आदी मान्यवर उपस्थित होते.

या प्रकल्पांतर्गत व्यापाऱ्यांद्वारेच व्यापाऱ्यांचा कचरा गोळा केला जाणार आहे. त्याचे व्यवस्थित वर्गीकरण कले जाईल व ओल्या व सुक्या कचऱ्यापासून खत व प्लास्टिकच्या कचऱ्यापासून बकेट तयार करण्यात येणार आहेत. यासाठी मोबाईल अॅप विकसित केला जाणार आहे.

महापालिकेद्वारे प्लास्टिक अथवा कचऱ्याबाबत फारशी जनजागृती केली जात नाही. अधिकारी फक्त दंड वसूल करण्याच्या नावाखाली किरकोळ व्यापाऱ्यांना त्रास देण्यात धन्यता मानतात. त्यातून व्यापाऱ्यांची आर्थिक लूट केली जाते. याचा त्रास व्यापाऱ्यांना होतो. राज्य सरकारने याची दखल घेतली नाही तर येत्या निवडणुकीत व्यापारी त्यांना मतदीन करण्याची शक्यता कमी आहे, असेही निवंगुणे यांनी सांगितले.

पुणे : पुणे महानगरपालिकेच्या पर्वती येथील पाणीपुरवठा योजनेच्या पाईपलाईनच्या खोदकामात 12 तासात दोन वेळा महावितरणच्या दोन भूमिगत वीजवाहिन्या तोडल्याने सोमवारी (दि. 28) सायंकाळी 5.15 वाजता पर्वती जलशुद्धीकरण केंद्रासह अरण्येश्वर व विठ्ठलवाडी परिसराचा वीजपुरवठा खंडित झाला. याप्रकरणी महावितरणकडून दत्तवाडी पोलीस ठाण्यात तक्रार दाखल करण्यात आली आहे.

दरम्यान अरण्येश्वर परिसरात पर्यायी व्यवस्थेतून वीजपुरवठा सायंकाळी सुरु करण्यात आला तर जलशुद्धीकरण केंद्रासह सिंहगड रोड, विठ्ठलवाडी परिसराचा वीजपुरवठा सुरु करण्यासाठी रात्री उशिरापर्यंत दुरुस्ती काम सुरु होते.

याबाबत माहिती अशी की, दत्तवाडी येथील जुन्या पर्वती 22 केव्ही उपकेंद्रातून एक्सप्रेस फिडरद्वारे पुणे महानगरपालिकेच्या पर्वती जलशुद्धीकरण केंद्राला वीजपुरवठा केला जातो. उपकेंद्राजवळच पुणे महानगरपालिकेच्या कंत्राटदाराकडून पाणीपुरवठ्याची पाईपलाईन टाकण्यासाठी खोदकाम सुरु आहे. सोमवारी (दि. 28) पहाटे 4 वाजताच्या सुमारास जेसीबीने सुरु असलेल्या खोदकामात एक्सप्रेस फिडरची भूमिगत वाहिनी तुटली. त्यामुळे पर्वती जलशुद्धीकरण केंद्राचा वीजपुरवठा खंडित झाला होता. मात्र महावितरणकडून या जलशुद्धीकरण केंद्राला जनता वसाहत 22 केव्ही या पर्यायी वीजवाहिनीद्वारे तातडीने वीजपुरवठा सुरु करण्यात आला होता.

त्यानंतर पुन्हा आज सायंकाळी 5.15 वाजता पाईपलाईनच्या खोदकामात जुन्या पर्वती उपकेंद्राला वीजपुरवठा करणारी 22 केव्ही भूमिगत वीजवाहिनी तुटली व उपकेंद्रातील आऊटगोईंग तीन वाहिन्यांचा वीजपुरवठा खंडित झाला. परिणामी पर्वती जलशुद्धीकरण केंद्राच्या पर्यायी वीजपुरवठ्यासह अरण्येश्वर व सिंहगड रोड, विठ्ठलवाडी परिसराचा वीजपुरवठा सुद्धा खंडित झाला. यात अरण्येश्वर परिसराचा वीजपुरवठा पर्यायी व्यवस्थेतून सुरु करण्यात आला आहे. परंतु पर्वती जलशुद्धीकरण केंद्राला मूळ (एक्सप्रेस फिडर) व पर्यायी व्यवस्थेतून वीजपुरवठा करणाऱ्या दोन्ही भूमिगत वीजवाहिन्या पाईपलाईनच्या खोदकामात तुटल्याने या केंद्राचा वीजपुरवठा खंडित झाला आहे. रात्री उशिरापर्यंत या दोन्ही वीजवाहिन्यांच्या दुरुस्तीचे काम पूर्ण होणार आहे. पाईपलाईनच्या खोदकामात एकाच परिसरात 12 तासांच्या कालावधीत दोन भूमिगत वीजवाहिन्या तोडल्याप्रकरणी महावितरणकडून दत्तवाडी पोलीस ठाण्यात तक्रार दाखल करण्यात आली आहे.

पुणे : पंढरपूरची आषाढी वारी हा महाराष्ट्रातील जनतेच्या श्रध्देचा विषय आहे. राज्यातील कानाकोपऱ्यातून
लाखो वारकरी पांडुरंगाच्या दर्शनाला येत असतात. या वारकऱ्यांना केंद्रबिंदू मानून पंढरपूरच्या आषाढी वारीची तयारी
करण्याच्या सूचना अन्न व नागरी पुरवठामंत्री तथा पुणे जिल्ह्याचे पालकमंत्री गिरीश बापट यांनी आज दिल्या.
येथील विधान भवनातील सभागृहात पालकमंत्री गिरीश बापट यांच्या अध्यक्षतेखाली पंढरपूरच्या आषाढी वारी
पूर्वतयारी विषयक बैठक पार पडली. यावेळी सोलापूरचे पालकमंत्री विजयकुमार देशमुख, साताऱ्याचे पालकमंत्री विजय
शिवतारे, पशू संवर्धन मंत्री महादेव जानकर, सामाजिक न्याय राज्यमंत्री दिलीप कांबळे, खासदार अनिल शिरोळे, पुणे
जिल्हा परिषदेचे अध्यक्ष विश्वासराव देवकाते, पुण्याच्या महापौर मुक्ता टिळक, पिंपरी-चिंचवडचे महापौर नितीन
काळजे, आमदार सर्वश्री बबनराव शिंदे, प्रशांत परिचारक, विजय काळे, मकरंद पाटील, राहूल कूल, भीमराव तापकीर,
आमदार माधुरी मिसाळ, विभागीय आयुक्त दीपक म्हैसेकर, पुणे मनपाचे आयुक्त सौरभ राव, पुण्याचे जिल्हाधिकारी
नवल किशोर राम, सार्वजनिक बांधकाम विभागाचे मुख्य अभियंता प्रवीण कीडे यांच्यासह विविध विभागांचे अधिकारी,
संत ज्ञानेश्वर महाराज पालखी सोहळा प्रमुख ॲङ विकास ढगे-पाटील, संत तुकाराम महाराज संस्थानचे अध्यक्ष
बाळासाहेब मोरे, संत सोपानकाका महाराज पालखी सोहळा प्रमुखांसह विविध दिंड्यांचे प्रमुख उपस्थित होते.
यावेळी पालकमंत्री श्री बापट यांनी पुणे, सातारा आणि सोलापूर जिल्ह्यातील विविध विभागांच्या अधिकाऱ्यांकडून
आषाढी वारीच्या पूर्व तयारीचा आढावा घेतला. तिन्ही जिल्ह्यातील अधिकाऱ्यांनी तयारीचे सादरीकरण केले.
यावेळी पालकमंत्री गिरीश बापट म्हणाले, पालखी मार्गाच्या विकासासाठी केंद्र सरकारने मोठ्या प्रमाणात निधी
दिला आहे. त्यामुळे या कामाला गती देण्यासाठी तिन्ही जिल्ह्यातील अधिकाऱ्यांनी भूसंपादनाची कामे वेगाने करावीत.
भूसंपादन करताना बाधित शेतकऱ्यांना योग्य व तातडीने मोबदला देण्यात यावा. त्याच बरोबर आळंदी-देहू मार्गाच्या
दुरूस्तीचे काम तातडीने करून घ्यावे. पालखी मार्गावरील रस्त्याच्या दूरूस्तीची कामे पावसाळ्यापूर्वी पूर्ण करून
घ्यावीत. तसेच पालखी तळांच्या ठिकाणी सपाटीकरण करून तात्पुर्त्या स्वरूपात पुरेशा प्रमाणात शौचालये बांधण्यात
यावीत. पालखी तळाच्या ठिकाणी पुरेशा पाण्याची व वीजेची सोय करण्यात यावी. पर्यावरणाच्या रक्षणासाठी वारीच्या
मार्गावर प्लास्टिक पत्रावळ्या, प्लास्टिक ग्लास, प्लास्टीक पिशव्यांच्या वापरावर निर्बंध आणावेत, यासाठी लोकांच्यात
जनजागृती करावी.
वारीच्या कालावधीत वारकरी व भाविकांना आरोग्याच्या समस्या उद्भवू नयेत यासाठी शुध्द पिण्याच्या पाण्याचा
पुरवठा करण्याच्या दृष्टीने सर्व पाण्याचे उदभव तपासण्यात यावेत. तसेच आरोग्य विभागाने सर्व ठिकाणी सज्ज
राहण्याच्या सूचना पालकमंत्र्यांनी यावेळी केल्या. या कालावधीत कोणताही अनुचित प्रकार घडू नये, अपघात, दुर्घटना
टाळण्यासाठी पोलिस विभागाने सतर्क राहण्याच्या सूचना ही त्यांनी दिल्या. पंढरपूर आषाढी वारी यशस्वी पार
पाडण्यासाठी शासनाच्या सर्व विभागांनी समन्वयाने काम करण्याच्या सूचना त्यांनी दिल्या.
या बैठकीला शासनाच्या सर्व विभागांचे अधिकारी, सातारा, सोलापूर, पुणे जिल्ह्यातील स्थानिक स्वराज्य संस्थांचे
लोकप्रतिनिधी, अधिकारी उपस्थित होते.

पुणे – धनगर माझा जीवन गौरव पुरस्काराने मी भारावून गेलो आहे. हा सन्मान माझा नसून दुष्काळी भागातील जनतेने दिलेल्या आशीर्वादाचा सत्कार आहे. असे भावपूर्ण उद्गार राजकारणातील भीष्माचार्य डॉ आ. गणपतराव देशमुख यांनी काढले.

पुणे येथील ऐतिहासिक अशा शनिवारवाडा पटांगणात आयोजित केलेल्या भव्य व नेत्रदीपक अशा धनगर माझा सन्मान सोहळा कार्यक्रमात ते बोलत होते. पुण्यश्लोक अहिल्यादेवी होळकर यांची २९३ वी जयंती व धनगर माझाच्या तिसर्या वर्धापन दिनानिमित्त या कार्यक्रमाचे आयोजन करण्यात आले होते.  यावेळी आमदार रामराव वडकूते, अ‍ॅड. रामहरी रूपनवर, जिल्हा परिषद अध्यक्ष विश्वास देवकाते, माजी आमदार पोपटराव गावडे, गोपीचंद पडळकर, कार्यक्रमाचे स्वागताध्यक्ष उत्तम जानकर, यशवंत सेनेचे माधव गडदे, आल इंडिया धनगर समाज महासंघाचे प्रवीण काकडे, ज्येष्ठ पत्रकार शामसुंदर सोन्नर,  प्रा.शिवाजी दळणर, राजू दुर्गे, घनशाम हाके,रासपाचे बाळासाहेब दोलताडे, उज्वलाताई हाके, अर्जुन सलगर, तुकाराम काळे आदी मान्यवर उपस्थित होते.

तर कार्यक्रम संपताच जलसंधारण तथा राजशिष्ठाचार मंत्री प्रा. राम शिंदे यांनी उपस्थिती लावली. सिंधुदुर्ग येथील कार्यक्रम संपवून येत असताना वाहतुकीच्या प्रचंड गर्दीमुळे येण्यास उशीर झाल्याचे सांगून शुभेच्छा व्यक्त केल्या.

एका गोष्टीची खंत

आज धनगर आरक्षणाचा प्रश्न सुटल्याशिवाय राहणार नाही. मात्र एका गोष्टीची खंत वाटते, कारण नसताना मंत्रिमंडळातील एका ज्येष्ठ नेत्याने कायद्यात दुरुस्ती न करता सोलापूर विद्यापीठाला पुण्यश्लोक अहिल्यादेवी होळकर यांचे नाव देण्याची घोषणा केली. यावर जास्त टिप्पणी करणार नाही; मात्र, धनगर समाजाची फसवणूक करतात की काय अशी शंका येत असल्याची खंत ज्येष्ठ नेते आमदार गणपतराव देशमुख यांनी कार्यक्रमात व्यक्त केली.  तसेच माझे उरलेले आयुष्य राज्यातील दुष्काळ हटवण्यासाठी आणि धनगर आरक्षण मिळण्याच्या प्रश्नासाठी आहे. यासाठी जे काही करावे लागेल ते उरलेल्या आयुष्यात करेल, असेही ते म्हणाले.

आ. रामहरी रूपनवर यांनी अहिल्यादेवी होळकर यांच्या जीवन चरित्रावर प्रबोधन केले. त्यामुळे उपस्थित मंत्रमुग्ध झाले. तर आ. रामराव वडकुते व गोपीचंद पडळकर व स्वागताध्यक्ष उत्तम जानकर यांनी मनोगत व्यक्त करून शुभेच्छा दिल्या.

तसेच यावेळी श्री. पांडुरंग पोले (IAS), श्रीमती संगीता धायगुडे (आयुक्त मालेगाव महानगरपालिका), श्री. रमेशशेठ लबडे(उद्योजक), श्री. ज्ञानदेव पडळकर(अधीक्षक अभियंता), श्री. अनिल विष्णू राऊत (क्षेत्र अधिकारी भूमापन), श्री. लहूजी शेवाळे (सरसेनापती, जय मल्हार सेना), श्री. मारुती दिगंबर येडगे (युवा उद्योजक), श्री. व सौ. वैशाली सुनील कुऱ्हाडे (अध्यक्ष, सुधाई सेवाभावी संस्था), सौ. साधना संभाजी गावडे (अध्यक्षा – ईश्वरकृपा शिक्षण संस्था) या सर्वांना समाजभूषण पुरस्कार देऊन सन्मानित करण्यात आले. तसेच श्री व सौ जयश्री श्रावण वाकसे व युवा उद्योजक विवेक बिडगर यांचा विशेष सन्मान करण्यात आला. तर मुंबईतील ऋणानुबंधग्रुपच्या वतीने बहारदार समाज प्रबोधनात्मक सांस्कृतिक कार्यक्रम साजरा करण्यात आला.

कार्यक्रमाचे प्रास्ताविक धनगर माझाचे संपादक धनंजय तानले यांनी केले तर आभार गणेश खामगल यांनी मानले.

कार्यक्रम यशस्वी करण्यासठी प्रतापराज मासाळ, राजेंद्र गाडेकर, विश्वनाथ साळसकर, रुक्मिणी धर्मे, मीना सूर्यवंशी, राहुल सुरवसे, गणेश पुजारी, आदी कार्यकर्त्यांनी प्रयत्न केले.

या कार्यक्रमासाठी विविध क्षेत्रात कार्य करणारा जनसमुदाय मोठ्या प्रमाणात उपस्थित होता.

पुणे-विश्‍व शांती केंद्र (आळंदी), माईर्स एमआयटी, पुणे, भारत व एमआयटी वर्ल्ड पीस युनिव्हर्सिटी यांच्या संयुक्त विद्यमाने तथागत गौतम बुद्ध पोर्णिमेचे औचित्य साधून “बौध्द भिक्खू संघदान आराधना” समारंभाचे आयोजन केले आहे. हा समारंभ मंगळवार, दि. २९ मे २०१८ रोजी सकाळी १०.३० वा. राजबाग, लोणी काळभोर येथील एमआयटी एडीटी विद्यापीठात होणार आहे.
बौध्द भिक्खू संघदान आराधना या समारंभात डॉ. राहुल बोधी, भिक्खू नागघोष, प्रशील रत्न भंते, विश्‍व शांती केंद्र (आळंदी), माईर्स एमआयटीचे सल्लागार व लंडन येथील धम्मदूत गौतम भूमिपुत्र व प्रबुध्दरत्न व सुप्रसिद्ध साहित्यिक प्रा. रतनलाल सोनग्रा यांची प्रमुख उपस्थिती राहणार आहे.
या समारंभात त्याग, करूणा व समर्पणाने बौध्द धर्म प्रसारासाठी आपले संपूर्ण जीवन व्यतित केलेले महाराष्ट्रातून ५० पेक्षा जास्त भिक्खू या संघदान कार्यक्रात सहभागी होणार आहेत. आजच्या युगात जे बौद्ध भिक्खू झाले आहेत आणि धम्मकार्य करीत आहेत, अशांना वंदन करून त्यांना संघदान देण्याचा मनोदय आम्ही व्यक्त केला असून महनीय भिक्खूंना निमंत्रित केले आहे, अशी माहिती एमआयटी विश्‍वशांती विद्यापीठाचे संस्थापक अध्यक्ष प्रा. डॉ. विश्‍वनाथ दा. कराड यांनी दिली.
तथागत गौतम बुद्धाच्या तत्त्वज्ञानाने प्रभावित होऊन जे लोक त्यांच्या धम्म मार्गात सम्मिलित होत होते, अशांना बुद्धविहारात राहून संघटनात्मक साधना करावी लागत असे. धम्माची साधना करताना हा धम्म लोककल्याणासाठी असल्यामुळे बौद्ध भिक्खूंना सतत भ्रमण करावे लागत असे. संपूर्णपणे त्याग आणि समर्पणावर आधारित असलेली बौध्द भिक्खूंची ही जीवनपध्दती परंपरा आजही अखंडित आहे. तथागतांनी त्यांच्या जीवनात त्यांना जीवनावश्यक वस्तू मिळाव्यात, यासाठी काही नियम (विनय) सांगितले होते. त्यानुसार त्यांना आपल्या देहरक्षणासाठी वस्त्र, म्हणजे चिवर, ठेवण्याची मुभा दिली होती. ज्या ठिकाणी त्यांना भोजनदानासाठी बोलावीत त्या ठिकाणी गृहपती काही ना काही वस्तू देत असे. तथागताने वर्षाला दोन चिवरे ठेवण्याचा नियम बनविला. त्याप्रमाणे सर्व भिक्खू जर निमंत्रण मिळाले तर भोजनासह त्याचा सन्मानपूर्वक स्वीकार करीत. संघदानाची ही परंपरा हजारो वर्षे तशीच चालू आहे आणि जगातील बौद्धराष्ट्रामध्ये तिचे अत्यंत काटेकोरपणे, जाणीवपूर्वक व आस्थेने पालन होते.
बौद्ध भिक्खू कोणत्याही वस्तूचा किंवा संपत्तीचा संग्रह करीत नाहीत. फक्त आवश्यक तेवढेच ते स्वीकार करतात व त्या उपयोगात आणतात. त्यांची प्रत्येक वस्तू ही कुठल्याही प्रकारे वाया जात नाही. या काळातील सर्वांना ज्ञात असलेले बौद्ध भिक्खू भारतातील डॉ. भदंत आनंद कौशल्यायन हे होत. ते म्हणाले, बौद्ध भिक्खूंना केलेले वस्त्रदान सतत उपयोगी असते. जीर्ण झाल्यावर देखील त्याचा उपयोग भिंतीवर लेप करण्यासाठी केला जातो. याचाच अर्थ असा की, भिक्खूंना दिलेल्या सर्व वस्तूंचा उपयोग काटेकोरपणे सातत्याने होत असतो.
असा हा आगळावेगळा ऐतिहसिक कार्यक्रम विश्‍वशांती केंद्र (आळंदी) आणि एमआयटी विश्‍वशांती विद्यापीठ, पुणे, भारत यांच्या संयुक्त विद्यमाने, जगातील सर्वात मोठी घुमटाकार वास्तु म्हणून साकारत असलेल्या ‘तत्त्वज्ञ संत श्री ज्ञानेश्‍वर महाराज विश्‍वशांती प्रार्थना सभागृह आणि विश्‍वशांती ग्रंथालय’ येथे होणार आहे, ही विशेष उल्लेखनीय बाब आहे.

जागतिक स्किझोफ्रेनिया जनजागृती दिनानिमित कर्वे समाज सेवा संस्थेमार्फत विविध उपक्रम

पुणे- “स्किझोफ्रेनिया” या मानसिक आजाराच्या जनजागृतीसाठी जागतिक स्किझोफ्रेनिया जनजागृती दिनानिमित कर्वे समाज सेवा संस्थेच्या समुपदेशन अभ्यासक्रम विभागामार्फत दरवर्षी विविध उपक्रम राबविण्यात येत असून यावर्षी प्रामुख्याने “स्किझोफ्रेनिया” मुळे स्वत्व हरवून घराबाहेर पडत वर्षानुवर्षे रस्त्यावर फिरणार्या मनोरुग्णांना उचलून त्यांच्यावर उपचार व त्यांचे पुनर्वसन करण्यासाठी पुणे शहरातील नागरिकांची जागृती करीत रस्त्यावर फिरणाऱ्या सात (७) मनोरुग्णांना उचलून त्यांची पुढील उपचार व पुनर्वसनासाठी कर्जत येथील “श्रद्धा” पुनर्वसन केंद्रामध्ये मध्ये रवानगी करण्यात आली आहे.

जागतिक स्किझोफ्रेनिया जनजागृती दिनानिमित यावर्षी कर्वे समाज सेवा संस्थेच्या समुपदेशन अभ्यासक्रम विभाग व कर्जत येथील श्रद्धा पुनर्वसन केंद्र यांच्या संयुक्त विद्यमाने संस्थेचे संचालक डॉ दीपक वलोकर,प्रा चेतन दिवाण, प्रा महेश ठाकूर व श्रद्धा पुनर्वसन केंद्राचे प्रमुख डॉ भरत वाटवानी यांच्या मार्गदर्शनाखाली विविध उपक्रम राबवून “स्किझोफ्रेनिया” संबंधी ठिकठिकाणी जनजागृती करण्यासाठी विविध उपक्रम राबविण्यात आले त्यातीलच एक प्रमुख उपक्रम म्हणून रस्त्यावर फिरणाऱ्या मनोरुग्णांचे उपचार व पुनर्वसन यासंबंधी जनजागृती करीत मनोरुग्णांच्या पुनर्वसनासाठी प्रत्यक्ष कृती करण्याचा उपक्रम राबविण्यात आल्याचे प्रा चेतन दिवाण यांनी सांगितले.

स्किझोफ्रेनिया या मानसिक आजारामुळे घरातून बाहेर पडून तीन वर्षाहून अधिक काळ पुणे शहरामधील रस्त्यावर फिरणाऱ्या ओबेद या मनोरुग्णाला कर्वे – श्रद्धा च्या टीम ने गत महिन्यामध्ये उचलून उपचार व पुनर्वसन करण्यासाठी कर्जत येथील केंद्रामध्ये रवानगी केली होती त्याच्यावर उपचार करून त्याला काल स्किझोफ्रेनिया जनजागृती दिनाचे औचित्य साधून घरी सोडण्यात आले. तसेच पुणे शहरामध्ये फिरणाऱ्या इतर चार पुरुष व तीन महिला मनोरुग्णांना काल उचलण्यात आले असून त्यांच्यावर कर्जत येथील श्रद्धा च्या पुनर्वसन केंद्रामध्ये उपचार करण्यात येणार आहेत.

स्किझोफ्रेनिया आजार जडल्यानंतर घर सोडून निघून जात वर्षानुवर्षे रस्त्यावर फिरून कचराकुंडीतल्या अन्नावर पोट भरून जगणाऱ्या हजारो मनोरुग्णांना आधार देऊन त्यांच्यावर मोफत उपचार करीत पुनर्वसन करणाऱ्या “ श्रद्धा पुनर्वसन केंद्रा” चे प्रमुख व प्रसिद्ध मानसोपचारतज्ञ डॉ भरत वाटवानी यांच्या श्रद्धा पुनर्वसन केंद्रास रविवारी दि. २७ रोजी कर्वे समाज सेवा संस्थेच्या समुपदेशन अभ्यासक्रमाचे सर्व विद्यार्थी भेट देणार असून प्रा. चेतन दिवाण यांच्याकडून डॉ भरत वाटवानी यांची प्रकट मुलाखत घेण्यात येणार आहे.

पुणे5- व्‍यसनमुकती ही निरंतर चालणारी प्रक्रिया असून संबंधित विभागांनी तंबाखू, गुटखा आदी तत्‍सम मादकद्रव्‍याच्‍या सेवनाबाबत जनजागृती करावी, असे आवाहन मादकद्रव्‍य विरोधी विभागाचे पोलीस निरीक्षक सुनील दोरगे यांनी केले. राष्‍ट्रीय तंबाखू नियंत्रण कार्यक्रमांतर्गत जिल्‍हास्‍तरीय संनियंत्रण समितीच्‍या बैठकीत ते बोलत होते. यावेळी  डॉ. केतकी घाटगे,  हसीना मुजावर, दिलीप करंजखेले, प्रमोद पाटील, आशीष येनगंटीवार, डॉ. राहूल मणियार, जिल्‍हा माहिती अधिकारी राजेंद्र सरग आदी सदस्‍य उपस्थित होते.

श्री. दोरगे म्‍हणाले, राष्‍ट्रीय तंबाखू नियंत्रण कार्यक्रमांतर्गत जिल्‍ह्यातील तसेच महापालिका हद्दीतील मुख्‍याध्‍यापकांचे प्रशिक्षण आयोजित करावे, त्‍यांना शालेय परिसरात तंबाखू, गुटखा आदी तंबाखूजन्‍य पदार्थ विक्रीबंदी बाबत माहिती द्यावी, शालेय परिसरात पानस्‍टॉल, पानटपरी असतील तर त्‍यावर कारवाई करण्‍यात यावी. एस.टी तसेच पीएमपीएलच्‍या वाहनचालक तसेच वाहकांना तंबाखूजन्‍य पदार्थांच्‍या सेवनामुळे होणारे दुष्‍परिणाम याबाबत माहिती द्यावी. बचतगट, फेरीवाल्‍यांच्‍या संघटनांनाही  या कायद्याबाबत व तंबाखूच्‍या दुष्‍परिणामांबद्दल माहिती द्यावी.

13 मे रोजी तंबाखूविरोधी दिन असून त्‍यानिमित्‍ताने जाणीवजागृतीचे कार्यक्रम घेण्‍यात यावे. तंबाखूमुक्‍त  गणेशोत्‍सव आयोजनाबाबत गणेश मंडळ प्रतिनिधींना भेटून त्‍यांचे सहकार्य घ्‍यावे, असे यावेळी सांगण्‍यात आले. जिल्‍ह्यात विविध आयटीकंपन्‍या आहेत,त्‍यांचे स्‍मोकींग झोन आहेत, मात्र काही कर्मचारी पानटपरीवर अथवा चहाटपरीवर येऊन धूम्रपान करतात, त्‍यावर कार्यवाही करण्‍यात यावी, अशा सूचना यावेळी देण्‍यात आल्‍या. बैठकीत विविध सदस्‍यांनी आपल्‍या सूचना मांडल्‍या.