पुणे, – पश्चिम महाराष्ट्रात नवीन वीजजोडण्या व नादुरुस्त वीजमीटर बदलण्यासाठी महावितरणच्या कार्यालयांमध्ये सद्यस्थितीत थ्री फेजचे पुरेसे नवीन वीजमीटर उपलब्ध आहेत. या वीजमीटरचा तुटवडा असल्याच्या माहितीवर विश्वास ठेऊ नये तसेच नवीन वीजजोडणीच्या प्रक्रियेत स्वयंघोषित एजंटांनाही थारा देऊ नये असे आवाहन महावितरणकडून करण्यात आले आहे.

पुणे, कोल्हापूर, सातारा, सांगली व सोलापूर जिल्ह्यासाठी पुरेसे थ्री फेजचे नवीन वीजमीटर उपलब्ध करून देण्यात आले आहेत. त्याचप्रमाणे २० कि व्हो पेक्षा जास्त भार असलेल्या ग्राहकांसाठीही पुरेसे  सीटी ऑपरेटेड टीओडी वीजमिटर उपलब्ध करून देण्यात आलेले आहेत.

पश्चिम महाराष्ट्रात सद्यस्थितीत नवीन वीजजोडणी तसेच सदोष किंवा नादुरुस्त वीजमीटर बदलण्यासाठी पुरेसे मीटर उपलब्ध करून देण्यात आले आहेत. पेडपेडींगमधील नवीन वीजजोडणी ताबडतोब देण्याचे तसेच नादुरुस्त वीजमीटर सुद्धा तातडीने बदलण्याचे निर्देश प्रादेशिक संचालक श्री. संजय ताकसांडे यांनी दिले आहेत. नवीन मीटर लावल्यानंतर त्याची महावितरण अंतर्गत ईआरपीमध्येही (एंटरप्रायजेस रिसोर्स प्लॅनिंग) तात्काळ नोंद करण्याच्या सूचना देण्यात आल्या आहेत. वीजमीटर उपलब्ध नसल्याचे कारण सांगून वीजग्राहकांची दिशाभूल केल्याच्या तक्रारी प्राप्त झाल्यास संबंधित कर्मचार्‍यांविरुद्ध कठोर कारवाई करण्यात येणार असल्याचे महावितरणकडून स्पष्ट करण्यात आले आहे.

महावितरणमध्ये नवीन वीजजोडणी, वाढीव वीजभार मंजुरी, नावात बदल आदींबाबतची प्रक्रिया सुटसुटीत व पारदर्शक करण्यात आली आहे. महावितरणची वेबसाईट किंवा मोबाईल अ‍ॅपद्वारे नवीन वीजजोडणीसाठी अर्ज करण्याची सोय उपलब्ध आहे. वेबसाईटवर नवीन वीजजोडणीचा एक पानी अर्ज उपलब्ध आहे व लागणारी आवश्यक कागदपत्रे व महत्वाचे म्हणजे वीजजोडणीसाठी लागणार्‍या शुल्काची माहिती उपलब्ध आहे. ऑनलॉईन किंवा अर्ज भरून दाखल केलेल्या नवीन वीजजोडणीची महावितरण अंतर्गत प्रक्रिया ही पूर्णतः ऑनलाईन करण्यात आलेली आहे. त्यामुळे अर्ज दाखल केल्यानंतर त्याची स्थिती ही ग्राहकांना स्वतः वेबसाईटवर पाहता येते किंवा महावितरण कार्यालयातून त्याबाबत माहिती घेता येते.

वीजग्राहकांना कोणत्याही प्रकारची अडचण आल्यास, तक्रार असल्यास त्यांनी थेट संबंधित कार्यालयाच्या वरिष्ठ अधिकार्‍यांना अथवा कार्यकारी अभियंता यांच्या निदर्शनास आणून द्यावी. महावितरणकडून वीजग्राहकांसाठी ‘ऑनलाईन’सह कार्यालयीन ग्राहकसेवा अतिशय सुलभपणे राबविण्यात येत आहेत. त्यामुळे वीजग्राहकांना कोणत्याही स्वयंघोषित एजंटांकडे जाण्याची आवश्यकता नाही. हे स्वयंघोषित एजंट स्वतःच्या आर्थिक फायद्यासाठी वीजग्राहकांची फसवणूक करून त्यांची आर्थिक पिळवणूक करतात. त्यामुळे वीजग्राहकांनी अशा स्वयंघोषित एजंटांना थारा न देता महावितरणच्या सेवांचा थेट लाभ घ्यावा असे आवाहन करण्यात आले आहे.

पुणे-डेक्कन एज्युकेशन सोसायटीच्या नवीन मराठी शाळेत लोकमान्य टिळक पुण्यतिथी व शाहीर आण्णाभाऊ साठे जयंती साजरी करण्यात आली. शाळेमध्ये बाल सभेचे आयोजन करण्यात आले .या सभेचे संपूर्ण कामकाज विद्यार्थ्यांनीच पार पडले. अध्यक्ष म्हणून इयत्ता चौथी शिवनेरी वर्गातील कु.सानिया भंडारे ,लोकमान्यांच्या वेशभूषेत चि.गणेश पासलकर व अण्णा भाऊ साठे यांच्या वेशभूषेत कु.गौरी पुंडे हे विद्यार्थी आले होते.

बाल सभेचे औचित्य साधून शाळेत चालू असलेल्या स्वस्तिक पथकातील बालव्यवस्थापकांचा शपथविधी आज घेण्यात आला.

कार्यक्रमाच्या सुरुवातीस दीपप्रज्वलन व प्रतिमा पूजन माननीय मुख्याध्यापिका सौ कल्पना वाघ , कार्यक्रमाचे अध्यक्ष व ज्येष्ठ शिक्षक यांच्या हस्ते झाले. त्यानंतर कार्यक्रमाचे स्वागत व प्रास्ताविक माननीय मुख्याध्यापिका सौ कल्पना वाघ यांनी केले . विद्यार्थ्यांना लोकमान्य टिळकांचे दहा गुण बाईंनी सांगितले .शाहीर अण्णाभाऊ साठे यांची माहिती चि. हर्षवर्धन मुळीक याने सांगितली. त्यानंतर लोकमान्य टिळक व शाहीर अण्णा भाऊ साठे यांच्या कार्याविषयी भाषणे  विद्यार्थ्यांनी केली .लोकमान्यांच्या वेशभूषेतील चि.गणेश पासलकर  याने अवांतर वाचन व व्यायामातून शरीर व मन बळकट करा असा संदेश दिला .अध्यक्ष भाषणात लो.टिळक व अण्णा भाऊ साठे यांचे प्रेरणादायी विचार मांडले.इयत्ता चौथी शिवनेरी वर्गातील विद्यार्थ्यांनी लोकमान्य टिळक स्तवन सादर केले. ज्येष्ठ शिक्षिका सौ.तनुजा तिकोने यांनी बालसभा आयोजित केलेल्या विद्यार्थ्यांचे कौतुक केले व शाबासकी दिली.

लोकमान्य टिळकांची अधिक माहिती मिळवण्यासाठी इयत्ता चौथीच्या विद्यार्थ्यांनी आजच्या दिवशी नारायण पेठेतील केसरीवाड्यास भेट दिली .यावेळी तेथे माननीय मुख्याध्यापिका सौ कल्पना वाघ व ज्येष्ठ शिक्षक  सौ तनुजा तिकोने, सौ.जयश्री खाडे, व धनंजय तळपे यांच्या हस्ते लोकमान्य टिळकांच्या पूर्णाकृती पुतळ्यास पुष्पहार घालण्यात आला .

या बालसभेचे सूत्रसंचालन  चि.गंधार दांडेकर,पाहुण्यांचा परिचय चि.अन्वय जोगळेकर,आभार  कु अनन्या बर्वे या विद्यार्थ्यांनी केले .विशेष म्हणजे सभेसाठी फलक लेखन कार्यक्रम पत्रिका बैठक व्यवस्था रांगोळ्या इत्यादी सर्व सभेची तयारी विद्यार्थ्यांनीच केली होती .अशा प्रकारे शाळेत बाल सभेचे आयोजन आणि लोकमान्य टिळक पुण्यतिथी व लोकशाहीर आण्णाभाऊ साठे यांची जयंती उत्साहात साजरी करण्यात आली.

पुणे- राष्‍ट्रीय ग्रामीण आरोग्‍य अभियान  तसेच राष्‍ट्रीय आरोग्‍य अभियानांतर्गत रुग्‍ण कल्‍याण नियामक समित्‍यांची आढावा बैठक जिल्‍हाधिकारी नवल किशोर राम यांनी आज घेतली. रुग्‍णांच्‍या उपचारासाठी येणारा निधी आरोग्‍य शिबीर आणि अत्‍यावश्‍यक औषध खरेदीसाठी वापरावा, अशा सूचना त्यांनी दिल्‍या. बैठकीस जिल्‍हा परिषदेचे अतिरिक्‍त मुख्‍य कार्यकारी अधिकारी नृसिंह मित्रगोत्री,  जिल्‍हा शल्‍य चिकित्‍सक डॉ. अशोक नांदापूरकर, जिल्‍हा आरोग्‍य अधिकारी दिलीप माने, जिल्‍हा क्षयरोग अधिकारी संजय दराडे, डॉ. एन.जी. ढवळे आदींसह इतर सदस्‍य उपस्थित होते.

प्रारंभी जिल्‍हाधिकारी नवल किशोर राम यांनी गेल्‍या आर्थिक वर्षातील खर्चाचा आढावा घेतला. या वर्षातील नियोजनाप्रमाणे खर्च करण्‍याचे निर्देशही त्‍यांनी दिले. उरो रुग्‍णालय, प्रादेशिक मनोरुग्‍णालय, कुष्‍ठरोग रुग्णालय यांच्‍या खर्चाचा आढावा घेण्‍यात आला.  राष्‍ट्रीय ग्रामीण आरोग्‍य अभियानांतर्गत प्रजनन व बाल आरोग्‍य कार्यक्रम, नियमित लसीकरण, आशा योजना, महत्‍त्वाचे आजार नियंत्रण कार्यक्रम याशिवाय माता बाल संगोपन कार्यक्रम, जननी सुरक्षा योजना, प्रधानमंत्री मातृवंदन योजना यांचाही यावेळी आढावा घेण्‍यात आला.

जिल्‍हा आरोग्‍य अधिकारी डॉ. माने यांनी जिल्‍ह्यात 96 प्राथमिक आरोग्य केंद्रे, 539 उपकेंद्रे, 13 आयुर्वेदीक दवाखाने, 26 ग्रामीण रुग्णालये, 3 तरंगते दवाखाने, 11 आरोग्य पथके कार्यरत असल्‍याचे सांगितले. जिल्‍ह्यात 125 रुग्ण कल्‍याण समित्‍या असून त्‍यांच्‍या नियमित बैठका होत असल्‍याचेही त्‍यांनी सांगितले. प्रधानमंत्री मातृवंदन योजनेत पुणे जिल्‍हा राज्‍यात दुस-या क्रमांकावर असल्‍याचे यावेळी सांगण्‍यात आले.

पुणे :रोटरी क्लब च्या अवयवदान प्रतिज्ञा मोहिमेत भारती विद्यापीठ इन्स्टिट्यूट ऑफ मॅनेजमेंट अॅण्ड आंत्रपुनरशिप डेव्हलपमेंट (‘ आयएमईडी’) सहभागी होणार आहे.रोटरी क्लबने ९ ऑगस्ट रोजी पुण्यात होणाऱ्या अवयवदान प्रतिज्ञा मोहिमेबद्दल विद्यार्थी, प्राध्यापकांना गुरुवारी आयएमईडी येथे माहिती दिली. अध्यक्षस्थानी ‘ आयएमईडी ‘ चे संचालक डॉ. सचिन वेर्णेकर होते.रोटरीचे गिरीश देशपांडे, उदय कुलकर्णी, सायली भालेराव, मानसी भालेराव हे पदाधिकारी , प्राध्यापक, विद्यार्थी उपस्थित होते

पुणे-पुणे महानगर प्रदेशाचा अत्याधुनिक विकास आराखडा तयार करण्याच्या अनुषंगाने
सिंगापूर शासनाच्या वतीने सुरबाना जूरोंग संस्थेच्या टीमकडून भौगोलिक क्षेत्राची पाहणी दि. २३ ते २५
जुलै दरम्यान पूर्ण करण्यात आली.विकास आराखड्यातील संभाव्य स्थळाची पाहणी केल्यानंतर

पीएमआरडीएच्या मुख्य सभागृहामध्ये दि.२६ जुलै २०१८ रोजी पाहणी टीम आणि पीएमआरडीए अधिकारी

वर्गासोबत सयुंक्त कार्यशाळा संपन्नझाली. यावेळी महानगर आयुक्त किरण गित्ते, नियोजन विभागाचे महानगर नियोजनकार विवेकखरवडकर, सुरबाना जूरोंग संस्थेचे संचालक आंनदन करुणाकरण, क्रिसिल संस्थेचे प्रकल्प

वयवस्थापक रीदल दमाणी आदी मान्यवर उपस्थित होते.

पीएमआरडीए हदीतील नगरपरिषद क्षेत्र, म्हाळुंगे नगर रचना योजना, विशेष आर्थिक क्षेत्र (SEZ),
औद्योगिक विकास क्षेत्र, प्रदेशातील धरण क्षेत्र, पश्चिम घाट क्षेत्र, पुणे-मुंबई द्रूतगती मार्ग परिसर,
टाऊनशिप आदी क्षेत्र अग्रस्थानी ठेऊन या विकसनशील क्षेत्राची विशेष करून पाहणी करण्यात आली.
दि.२६ जुलैला संपन्न झालेल्या सयुंक्त कार्यशाळेमध्ये प्रदेश विकास आराखडा तयार करण्यासाठी चर्चेअंती
सिंगापूरटीमला एक समयबद्ध कार्यक्रम देण्यात आला. याप्रमाणे ऑगस्ट महिन्यापर्यंत सामाजीक व आर्थिक
सर्वेक्षण अहवाल, ऑक्टोबर महिन्यापर्यंत कन्सेप्ट प्लॅन आणि मार्च २०१९ पर्यंत प्रारूप विकास आराखडा
तयार करण्यात येणार असल्याची माहिती महानगर आयुक्त श्री किरण गित्ते यांनी दिली.