पुणे : सिंहगड रस्त्यावर मुठा उजवा कालवा फुटण्यास कालव्याबाहेरील भिंतीबाजूला दोन वर्षांपूर्वी टाकण्यात आलेल्या भूमिगत वीजवाहिन्यांचा संबंध नसल्याचे महावितरणकडूनस्पष्ट करण्यात आले.

दांडेकर पुलाजवळ गुरुवारी (दि. 27) मुठा उजवा कालवा सकाळी सव्वा अकराच्या सुमारास फुटला. तेथे इतर खासगी कंपन्यांच्या केबल्स तसेच महावितरणच्या वीजवाहिन्या दिसून आल्यामुळे कालवा फुटण्यास केबल खोदाई कारणीभूत असल्याची शंका व्यक्त झाली. मात्र या कालव्याच्या बाहेरील भिंतीबाजूला पाच फूट अंतरावर महावितरणच्या 22 केव्ही क्षमतेच्या दोन भूमिगत वीजवाहिन्यांच्या चार केबल टाकण्यात आल्या आहेत. सन 2016 मध्ये या भूमिगत वीजवाहिन्यांच्या कामासाठी पाटबंधारे विभागाकडे रितसर परवानगी घेण्यात आली होती. तसेच आवश्यक शुल्काचा भरणा केल्यानंतर पाटबंधारे विभागाच्या देखरेखीखाली तसेच त्यांनी नेमून दिलेल्या जागेत या दोन्ही वीजवाहिन्या टाकण्यात आलेल्या आहेत. त्या वेळी करण्यात आलेली खोदाई ही कालव्याच्या बाहेरील भिंतीपासून पाच फूट अंतरावर असल्याने कालवा फुटण्यासाठी या खोदाईचा कोणताही संबंध नाही. पाण्याच्या वेगवान प्रवाहामुळे भूमिगत वाहिनी असलेला भराव वाहून गेल्यामुळे वाहिन्या उघड्या झालेल्या दिसून येत आहे. मात्र कालवा फुटण्यासाठी या वाहिन्यांच्या खोदाईचा कोणत्याही प्रकारे संबंध नाही, असे महावितरणकडून स्पष्ट करण्यात आले आहे.

पुणे : “रावणाला आपण नेहमीच खलनायकाच्या भूमिकेत पाहत असल्याने तो धूसर होत चालला आहे. त्याला कितीही गाडायचा प्रयत्न केला तरीही गाडू शकत नाही. रावण दहा डोक्यानी विचार करणारा बुद्धिमान योद्धा होता. आज आपल्याला एका बाजूनेच विचार करण्याची सवय लागली आहे. घटनेने सर्वांना स्वातंत्र्य दिले आहे. त्यामुळे आजच्या काळात आपण रावणाची बाजूही समजून घेणे आवश्यक आहे,” असे मत दिग्दर्शक नागराज मंजुळे यांनी व्यक्त केले.

न्यू ईरा पब्लिशिंग हाऊस प्रकाशित उद्योजक शरद तांदळे यांच्या ‘रावण : राजा राक्षसांचा’ या कादंबरीच्या प्रकाशन सोहळ्यात नागराज मंजुळे बोलत होते. बालगंधर्व रंगमंदिरात झालेल्या या सोहळ्यावेळी चित्रलेखाचे संपादक ज्ञानेश महाराव, माजी खासदार रणजीतसिंह मोहिते पाटील, चिंतन ग्रुपचे अभिनंदन थोरात, शोभा तांदळे यांसह विविध क्षेत्रातील मान्यवर उपस्थित होते.

नागराज मंजुळे म्हणाले, “छत्रपती शिवाजी महाराज, महात्मा फुले आणि डॉ. बाबासाहेब आंबेडकर यांनी त्यावेळी आपले विचार मांडले. महात्मा फुले यांनी त्याकाळी वेगळ्या पद्धतीचे लिखाण केले. आपल्याला देखील अशा पद्धतीने वेगळा विचार स्वच्छपणे मांडता आला पाहिजे. खलनायकालाही वेगळ्या कोनातून बघण्याची दृष्टी शरद तांदळे यांनी या पुस्तकातुन दिली आहे. विरोधी विचार समजून घेण्याची क्षमता अशा लिखाणामुळे विकसित होण्यास मदत होईल.”

प्रवीण गायकवाड म्हणाले, “रामराज्याच्या काळात रावण हा विषय घेऊन पुस्तक लिहिण्याचे धाडस करणे ही कौतुकाची गोष्ट आहे. माणूस वाईट नसतो, काळ-वेळ परिस्थिती त्याला घडवत असते. रावण आता खलनायकाचा नायक झाला आहे. राम जन्माला आला तर रावण डोकावणारच आहे. सध्या राममंदिरासाठी मशिद पाडण्याचे वातावरण देशात आहे. अशा वातावरणात शरद तांदळे यांची रावण ही कादंबरी आपल्या समोर आली आहे.”

ज्ञानेश महाराव म्हणाले, “तुम्ही सत्यनिष्ठ असाल तर असत्य शोधले पाहिजे. सत्य दडवता येते पण संपवता येत नाही. प्रतिक्रिया येतच राहणार परंतु आपण क्रियावादी असले पाहिजे. फसणारे व फसवणारे अशा दोनच जाती आहेत. त्यामुळे आजच्या काळात रावण सांगायला हवा. पुस्तके ही मस्तक तयार करण्यासाठी असतात.”

शरद तांदळे म्हणाले, “रावणाविषयी वाचन केले आणि त्याविषयी लिहीत गेलो. या पुस्तकासाठी मी ४ वर्षे अभ्यास केला. रावणाला नेहमी खलनायक ठरवले जाते. त्यामुळे हे जाणून घेण्यासाठी प्रत्येकाने वाचले पाहिजे आणि लिहिते व्हायला पाहिजे.”

अभिनंदन थोरात यांनीही आपले मनोगत व्यक्त केले. अभिषेक अवचार यांनी सूत्रसंचालन केले. कुणाल गायकवाड यांनी आभार मानले.

पुणे- मुठा उजवा कालवा फुटून बाधित झालेल्‍या नागरिकांना आज मोफत धान्‍य वाटप करण्‍यात आले. अन्‍न व नागरी पुरवठा मंत्री तथा जिल्‍ह्याचे पालकमंत्री गिरीश बापट यांनी कालवाग्रस्‍तांना शासनाच्‍यावतीने आवश्‍यक ती मदत करण्‍याचे जाहीर केले होते. त्‍यानुसार जिल्‍हाधिकारी नवल किशोर राम यांनी कालवाबाधितांच्‍या नुकसानीचे पंचनामे करण्‍याचे आदेश दिले. जिल्‍हा प्रशासनाच्‍यावतीने 729 पंचनामे पूर्ण करण्‍यात आले. हे पंचनामे व कालवाबाधितांची यादी अन्‍न व धान्‍य वितरण अधिकारी कार्यालयाकडे प्राप्‍त होताच आपत्‍तीग्रस्‍तांना मोफत धान्‍य वाटप करण्‍यात आले. यावेळी अन्‍न धान्‍य वितरण अधिकरी अस्मिता मोरे, गीतांजली गरड-मुळीक, राजश्री भंडारी, वीरनक, माने आदी अधिकारी उपस्थित होते. \संपर्क गीतांजली गरड 9923002156)

कर्वे समाजकार्य महाविद्यालयामध्ये सायबर गुन्हे व मानसिक आरोग्यासंबंधी एकदिवसीय राज्यस्तरीय परिषद संपन्न

पुणेःफेसबुक व इतर सोशल मिडियावर स्वतःची जास्तीत जास्त माहिती देणे, सतत भावनिक पोस्ट टाकणे तसेच  सोशल मिडियाच्या माध्यमातून अनोळखी व्यक्तीशी सहजपणे मैत्री करणारे लोक हे सायबर गुन्हेगारांचे टार्गेट बनतात व अशा व्यक्तींची  सायबर गुन्हेगार लगेचच फसवणूक करतात असे मत  सायबर गुन्हे व सायबर सुरक्षा तज्ज्ञ अॅड वैशाली भागवत यांनी व्यक्त केले.

सोशल मिडिया,सायबर गुन्हे, सायबर सुरक्षा आणि युवक व मानसिक आरोग्य ; समस्या आणि आव्हाने या विषयावर कर्वे समाज सेवा संस्था, रोटरी क्लब ऑफ पुना वेस्ट, मनोदय मेंटल हेल्थ फोरम आणि पुणे पोलीस सायबर गुन्हे सुरक्षा विभागाने कर्वे समाजकार्य महाविद्यालयामध्ये एकदिवसीय राज्यस्तरीय परिषद आयोजित केली होती. या परिषदेमध्ये अॅड भागवत युवकांना मार्गदर्शन केले त्यावेळी त्या बोलत होत्या. या परिषदेमध्ये दै सकाळ चे  वृत्त संपादक माधव गौखले, ऑल इंडिया कौन्सिल ऑफ टेक्निकल एज्युकेशनचे सदस्य डॉ दिपक शिक्ररापुर, टेक केअर गुडनाईट सिनेमाचे दिग्दर्शक गिरीश जोशी, लेखक अतुल कहाते, पुणे सायबर क्राईम विभागातील पोलिस उपनिरीक्षक अलका जाधव, जेष्ठ मनोविकार तज्ञ डॉ. सुप्रकाश चौधरी,  डॉ वासुदेव परळीकर,  पुणे विद्यापीठाचे विज्ञान आणि तंत्रज्ञान विभागाचे डिन डॉ अरविंद शालीग्राम, डॉ शैलेश पालेकर, कल्याणी गोखले, चारू श्रोत्री, डॉ. महेश ठाकूर आदी तज्ञांनी विविध विषयांवर उपस्थितांना मार्गदर्शन केले.

यावेळी अॅड भागवत म्हणाले की, सोशल मिडियावरील केल्या जाणाया पोस्टचे निरीक्षण  हॅकर करत असतात. जे लोक जास्त तीव्रतेने भावनिक पोस्ट करतात. अशांना हॅकर टार्गेट करतात. अशा लोकांना भावनिक पोस्ट पाठवणे, आपण त्यांना खुप चांगल समजूण घेतो हे सिध्द करत हॅकर त्यांचा विश्वास संपादत करतात. नंतर भावनिक करत त्यांच्या कडून विविध काम करून घेतात. मोमो आणि ब्लू व्हेल या प्रकारेच काम करतात. तरूण मुलींना प्रेमाच्या जाळयात ओढून मानवी तस्करीचे अनेक प्रकार होतात करतात. यामुळे सोशल मिडिया सावधगिरीने हाताळावे.

यावेळी  गिरीश जोशी म्हणाले की  वयस्कर माणसे टेक्नॉलॉजी शिकण्यासाठा उत्सुक नतात. त्यामुळे ४५ वयोगटातील व्यक्तीची ऑनलाईन आर्थिक फसवणूक होण्याचे प्रमाण जवळपास ७०% आहे.सायबर सुरक्षतेकडे अद्याप गांभीर्याने पाहिले जात नाही. यावेली ऑनलाईन आर्थिक फसवणूक कशी होते. याचे अनेेक उदाहरणे जोशी यांनी  दिली. फेसबुक वरील माहिती आणि फोटोचा वापर करून आर्थिक फसवणूक केली जाते. फेसबुकवरील डाटा मोठया प्रमाणात चोरीला जातो. या डाटाच्या आधारे सायबर गुन्हे केले जात आहे. यामुळे सतत फेसबुक वर आपली माहिती टाकत जाऊ नका असे मत लेखक अतुल कहाते यांनी व्यक्त केले.

डॉ दिपक शिकारपुर यांनी सांगितले की, अनेकाना सेल्फीचे व्यसन लागले आहे. काही काळानंतर  सेल्फी व्यसनमुक्तीची  कार्यशाळा घ्यावी लागणार आहे. तंत्रज्ञान मोठ्या प्रमाणात बदलत आहे. भविष्यात काय खावे, कसे रहावे हे सगळ तुमचा स्मार्टफोन सांगेल. यावेळी  कर्वे समाज सेवा संस्थेचे संचालक डॉ दिपक वलोकर हे म्हणाले की सोशल मिडियाच्या अतिरिक्त वापरामुळे ३० ते ४० % लोकांना मानसिक आजार झाला आहे.

सायबर गुन्ह्यासंबंधी पुणे पोलिसांच्या सायबर क्राईम विभागाकडे एका वर्षात जवळपास आठ हजार तक्रारी आल्या असून या तक्रारीनुसार गुन्हेगारांना पकडले देखील आहे. ऑनलाईन फसवणूक किंवा इतर सायबर क्राईम संबधी तक्रार असल्याल सायबर क्राईम विभागाशी नागरीकांनी संपर्क साधावा असे आवाहन सायबर क्राईम  विभागाच्या  पोलिस उपनिरीक्षक अलका जाधव यांनी केले.

या कार्यक्रमाचे संयोजन संस्थेचे संचालक व मासवे संघटनेचे अध्यक्ष डॉ. दीपक वलोकर,सी.एस.आर. सेल चे मानद संचालक तथा परिषदेचे निमंत्रक डॉ. महेश ठाकूर, मेंटल हेल्थ फोरम चे कार्याध्यक्ष  तथा  परिषदेचं समन्वयक प्रा. चेतन दिवाण, रोटरी क्लब ऑफ पुना वेस्ट चे अध्यक्ष रोटरीयन चारू श्रोत्रीरोटरीयन कल्याणी गोखले व पुणे पोलीस सायबर सेलच्या पोलीस उपायुक्त ज्योती प्रिया सिंग यांच्या मार्गदर्शनाखाली करण्यात आले होते.

सोशल मीडिया, सायबर गुन्हे, सायबर सुरक्षा व युवकांचे मानसिक आरोग्य या विषयी पार पडलेल्या या परिषदेस महाराष्ट्रभरातील विविध महाविद्यालयांतून अनेक शिक्षक व विद्यार्थी उपस्थित होते.परिषदच्या यशस्वीतेसाठी  कर्वे समाज सेवा संस्थेच्या समुपदेशन विभाग व एम. एस. डब्ल्यू च्या  विद्यार्थ्यांनी विशेष परिश्रम घेतले.

पुणे : मुठा कालवा फुटल्याने सुरक्षिततेचा उपाय म्हणून बंद ठेवण्यात आलेल्या चार रोहित्रांचा शुक्रवारी (दि. 28) दुपारी चार वाजता वीजपुरवठा सुरु केल्यानंतर 350 घरांचा वीजपुरवठा पूर्ववत करण्यात आला आहे. मात्र 150 घरांमध्ये अद्यापही पाणी असल्याने व भिंतींची पडझड झाल्यामुळे वीजपुरवठा सुरु करणे शक्य झाले नाही.

गुरुवारी मुठा उजवा कालवा फुटल्यामुळे दांडेकर पूल परिसरातील घरांमध्ये पाणी शिरले होते. त्यामुळे महावितरणकडून सुरक्षिततेचा उपाय म्हणून या परिसरातील चार रोहित्रांचा वीजपुरवठा बंद ठेवण्यात आला होता. शुक्रवारी (दि. 28) सकाळी महावितरणचे 35 अभियंते व जनमित्रांनी पाण्यामुळे बाधीत घरांमधील वीजयंत्रणेची पाहणी सुरु केली. त्याप्रमाणे देखभाल व दुरुस्तीचे कामेही सुरु केली. यामध्ये सर्व्हीस वायर बदलणे, वीजमीटरची जागा बदलणे, नवीन वीजमीटर लावणे तसेच इतर दुरुस्तीचे कामे करण्यात आली. दुपारी चार वाजता चारही रोहित्रांचा वीजपुरवठा सुरु केल्यानंतर 350 घरांमधील वीजपुरवठा सुरु झाला. मात्र या परिसरातील 150 घरांमध्ये अद्यापही पाणी आहे. भितींमध्ये ओल आहे व भितींची पडझड झालेली आहे. त्यामुळे सुरक्षेच्या कारणास्तव या घरांमध्ये वीजपुरवठा सुरु करणे शक्य झाले नाही. या घरांची आवश्यक दुरुस्ती झाल्यानंतर वीजपुरवठा सुरु करण्यात येणार आहे.

पुणे- महाराष्ट्र शासनाच्या सामाजिक न्याय विभागाच्या वतीने आमदार प्रा. मेधा कुलकर्णी व ऍस्कॉप संस्थेच्या संयुक्त विद्यमाने ज्येष्ठ नागरिक दिनानिमित्त ‘ज्येष्ठोत्सव २०१८’ या विशेष कार्यक‘माचे आयोजन करण्यात आले आहे.संयोजिका आमदार प्रा. मेधा कुलकर्णी यांनी ही माहिती कळविली आहे.

राज्याचे सामाजिक न्याय व विशेष सहाय्य मंत्री राजकुमार बडोले यांच्या हस्ते सोमवार, दिनांक १ ऑक्टोबर रोजी सकाळी साडेनऊ वाजता डी. पी. रस्त्यावरील शुभारंभ लॉन्स (म्हात्रे पुलाजवळ) या कार्यक‘माचे उद्घाटन करण्यात येणार आहे. पालकमंत्री गिरीश बापट कार्यक‘माचे अध्यक्षस्थान भूषविणार आहेत. सामाजिक न्याय राज्यमंत्री दिलीप कांबळे, खासदार अनिल शिरोळे यांची प्रमुख उपस्थिती राहणार आहे.

यावेळी विविध क्षेत्रांत उल्लेखनिय कामगिरी करणार्‍या ज्येष्ठ नागरिकांचा सन्मान करण्यात येणार आहे. त्यामध्ये शां. ग. महाजन, अभिनंदन थोरात, प्रतिभा शाहू-मोडक, माधव वझे, सुधीर गाडगीळ, विश्‍वास मेहेंदळे, डॉ. मोहन आगाशे, भूषण गोखले, दीपा लागू, अरुणा ढेरे यांचा सन्मान करण्यात येणार आहे.

ज्येष्ठ नागरिकांसाठी विविध स्पर्धा, फनफेअर, विनामूल्य आरोग्य तपासणी शिबिर, बचतगटांनी तयार केलेल्या वस्तूंचे प्रदर्शन व विक‘ी आणि विविध क्षेत्रात उल्लेखनिय कामगिरी केलेल्या ज्येष्ठ नागरिकांचा सन्मान असे विविध कार्यक‘म यावेळी होणार आहेत.

पुणे-– वाढता कामाचा व्याप व अधिकारी कर्मचारी यांची अपुरी बैठक व्यवस्था कमी पडत असल्याने पुणे
महानगर प्रदेश विकास प्राधिकरण कार्यालयाअंतर्गत (पीएमआरडीए) समावेश असलेली जमीन मालमत्ता, अनधिकृत
बांधकाम विभाग, अभियांत्रिकी विभाग १, २, ३ आकुर्डीतील पीसीएनटीडीए तिसरा मजला येथे स्थलांतरित करण्यात
आले आहेत.
तसेच उर्वरित नियोजन विभाग, प्रशासन व आस्थापना, लेखा विभाग एक महिन्याच्या कालावधीत स्थलांतरित होणार
आहेत. तसेच मुख्य कार्यालय, विकास परवानगी, अग्निशमन विभाग कार्यालय औंध येथील सयाजीराव गायकवाड भवन
येथेच राहतील. नागरिकांनी स्थलांतरित झालेल्या विभाग प्रमुखांकडे माहितीसाठी पुणे महानगर प्रदेश विकास
प्राधिकरण, पीसीएनटीडीए बिल्डिंग, ए विंग, तिसरा मजला, आकुर्डी रेल्वे स्टेशन, आकुर्डी पुणे -४११०४४, येथे संपर्क
साधावा, असे आवाहन महानगर आयुक्त किरण गित्ते यांनी केले आहे.
तसेच दूर तालुक्यातील नागरिकांसाठी पीएमआरडीएची वाघोली (शिरूर व हवेली), नरसापूर (हवेली, भोर व वेल्हा),
भूगाव (मुळशी), वडगाव (मावळ), चाकण(खेड) येथे प्रादेशिक कार्यालय दिवाळीपर्यंत सुरु करण्यात येणार आहेत.