पुणे : आर्ट आॅफ लिव्हिंग अ‍ॅकॅडमी आॅफ परफॉर्मिंग आर्टस् (आलाप) आणि नृत्यभारती कथक डान्स अ‍ॅकॅडमी, पुणे यांच्या संयुक्त विद्यमाने, कथक नृत्यशैलीच्या कलाकारांसाठी आजपासून (1ऑक्टोबर ) ते ४ आॅक्टोबर पर्यंत मरकळमध्ये विशेष कार्यशाळा आयोजित केली आहे. गुरुतुल्य पद्धतीवर आधारित असणारी ही कार्यशाळा‘आर्ट आॅफ लिव्हिंग’च्या त्रिवेणी आश्रमात पार पडेल.
कथकचे विद्वान कलाकार आणि कुशल अध्यापक डॉ. पुरू दाधीच पुण्यात प्रथमच नृत्यविद्या प्रदान करणार असून हे एक निवासी शिबिर असेल.
कथकच्या सर्व पैलूंवर प्रभुत्व असणारे डॉ. दाधीच हे सतत प्रचारात नसलेल्या अशा काही अप्रचलित नायिकांवर आधारित नृत्यरचना या कार्यशाळेमध्ये शिकवणार आहेत. ज्यांच्या काव्य आणि संगीतरचनाही त्यांच्या स्वत:च्या आहेत. त्याबरोबरच ताल-लयीसंबंधित ‘जातिमाल’ ही रचना शिकवली जाईल. ज्यामध्ये सर्व ‘जातिं’चा अंतर्भाव असेल. आपल्याजवळची कला आणि अमर्याद ज्ञान मुक्त हस्ताने देऊ करणाऱ्या बुजूर्ग कलाकाराजवळ निवासी शिबिरात राहून ज्ञान मिळवणं ही एक उत्तम संधी कथकच्या विद्यार्थी आणि कलाकारांना मिळणार आहे.
पुण्यासह इतर अनेक शहरांतील कलाकारांनी यामध्ये सहभाग घेतला आहे. डॉ. पुरू दाधीच यांच्या पत्नी आणि प्रतिष्ठित कलाकार डॉ. विभा दाधीचही या कार्यशाळेत सक्रिय योगदान देणार आहेत.
