पुणे : “अपेक्षांच्या ओझ्यातून येणारा ताण, ‘टेस्ट’ घेण्याची उत्सुकता, सामाजिक दबाव यातून माणूस व्यसनांच्या जाळ्यात अडकतो. याशिवाय, आजचे तरुण सोशल मीडियाच्या आहारी गेल्यामुळे त्यांच्या शारीरिक आणि मानसिक आरोग्याच्या समस्या निर्माण होत आहेत. आभासी माध्यमातून बाहेर पडून परस्परांतील संवाद आणि व्यसनांच्या आहारी गेलेल्यांचे योग्य समुपदेशन यातूनच व्यसनमुक्ती शक्य होईल,” असे प्रतिपादन मुक्तांगण व्यसनमुक्ती आणि पुनर्वसन केंद्राच्या संचालिका मुक्ता पुणतांबेकर यांनी केले.

समाजातील व्यसनाधीनता दूर करण्यासाठी आणि नीती-मूल्यांच्या शिक्षणातून समाजस्वास्थ्य चांगले राहण्यासाठी सूर्यदत्ता ग्रुप ऑफ इन्स्टिट्यूटतर्फे ‘सूर्यदत्ता ग्लोबल रिहॅबिलिटेशन सेंटर’ सुरु करण्यात आले आहे. या केंद्राच्या उद्घाटनप्रसंगी मुक्ता पुणतांबेकर ‘व्यसनाधीनता आणि आपण’ या विषयावर बोलत होत्या. संस्थेच्या बावधन कॅम्पसमध्ये झालेल्या या कार्यक्रमावेळी संस्थेचे संस्थापक अध्यक्ष डॉ. संजय चोरडिया, उपाध्यक्षा डॉ. सुषमा चोरडिया, उद्योजक यशराज पारखी, बॉल स्टेट युनिव्हर्सिटीच्या मिलर कॉलेज ऑफ बिझनेसचे सहयोगी अधिष्ठाता डॉ. सुशील शर्मा, बॉल स्टेट युनिव्हर्सिटीतील डॉ. मारी तेरेसा, इनोसर्वचे सहसंस्थापक राहुल जैन आदी उपसाठो होते.

मुक्ता पुणतांबेकर म्हणाल्या, “कामामुळे, अपेक्षाभंगामुळे येणारा ताण, सामाजिक प्रतिष्ठा, वाईट संगत यामुळे तरुणाई व्यसनाधीन बनत आहे. पालकांकडून त्यांना पुरेसा वेळ दिला जात नाही, हेही कारण त्यामागे आहे. ग्रामीण आणि शहरी बायकांमध्ये व्यसने वाढत आहेत. त्यांच्याकडून सुपरवूमेन बनण्याची आकांक्षा त्यासाठी कारणीभूत ठरत आहे. तरुणाई इंटरनेटच्या जाळ्यात ओढली जात असून, सोशल मीडिया, पॉर्नसाईट्स यामध्ये अडकली जात आहे. त्यामुळे त्यांना व्यसनापासून मुक्त करण्यासाठी पालकांचे मार्गदर्शन व भूमिका महत्त्वाची आहे. एकमेकांमध्ये संवाद वाढायला हवा.’’

डॉ. संजय चोरडिया म्हणाले, “तंबाकू, दारू, गुटखा, जंक फूडचे सेवन, सोशल माध्यमांचा अतिवापर, स्क्रीनचे व्यसन यासह मनातील वाईट विचार, सायबर गुन्हेगारीला बळी पडणे, त्यातून निर्माण होणारा ताण-तणाव, नात्यांमधील दुरावा अशा अनेक प्रश्नांवर तोडगा काढण्यासाठी हे केंद्र उपयुक्त ठरणार आहे. विविध विषयांतील तज्ज्ञ, मार्गदर्शकांना बोलावून त्यामार्फत विद्यार्थी-शिक्षक आणि पालक यांच्या मनाची मशागत करून सदृढ, सुंदर मन घडविण्याचा आमचा मानस आहे. लोकांनी एकमेकांशी चांगले वागावे, संवाद ठेवावा, यासाठी नीतिमूल्यांची शिकवण दिली जाणार असून, त्याची सुरुवात सूर्यदत्ता ग्रुपच्या विद्यार्थी-शिक्षकांपासून केली जाणार आहे. त्यानंतर ही चळवळ देशव्यापी केली जाणार आहे. त्यासाठी लवकरच एका ऍपची निर्मिती केली जाणार आहे.”

पुणे–बेसुमार पाणी वापरणाऱ्या पुणे महापालिकेला जलसंपदा विभागाने दणका दिला असतानाच दुसरीकडे प्रशासनाच्या निष्काळजी कारभारामुळे पुण्यातील सिंहगड रस्ता, नवशा मारुती-चुनाभट्टीजवळील परिसर जलमय झाला आहे. जलकेंद्राच्या टाक्या ओव्हरफ्लो झाल्याचे वृत्त असून यामुळे परिसरातील आठ ते दहा घरांमध्ये पाणी शिरले आहे.

कालवा सल्लागार समिती, जलसंपदा विभाग आणि महाराष्ट्र जलसंपत्ती नियमन प्राधिकरणाच्या आदेशाला केराची टोपली दाखवत बेसुमार पाणी वापरणाऱ्या महापालिकेला जलसंपदा विभागाने तिसऱ्यांदा दणका दिला आहे. पर्वती जलकेंद्राला पाणी पुरवठा करणारे महापालिकेचे दोन पंप बुधवारी दुपारी तीन वाजता जलसंपदा विभागाकडून बंद करण्यात आले होते. या घडामोडींच्या पार्श्वभूमीवर गुरुवारी सकाळी पर्वती जलशुद्धीकरण केंद्रातील रॉ- वॉटर व्हॉल्व्ह नादुरुस्त झाल्याने लाखो लिटर पाणी वाया गेले. तब्बल 2 तास हे पाणी वाहत होते. या बिघाडामुळे परिसरातील काही भागांमधील रस्त्यावर चार फूट पाणी साचले होते.

गुरुवारी पाणी पुरवठा बंद असल्याने सकाळी महापालिकेच्या कर्मचाऱ्यांकडून खडकवासला ते पर्वतीपर्यंत येणाऱ्या सुमारे 1600 मीमी व्यासाच्या जलवाहिनीचा व्हॉल्व बंद करण्यात येत होता. मात्र, त्यात अचानक बिघाड झाल्याने लाखो लिटर पाणी रस्त्यावर आले. पू. ल देशपांडे उद्यानाच्या समोर हे पाणी रस्त्यावर आले. त्यामुळे वाहनचालकांची चांगलीच कसरत झाली.

पुणे,दि.16 :- महाराष्ट्र व्यवसायकर कायदा- १९७५अन्वये नावनोंदणीकृत, नोंदणीकृत नसलेल्या व्यक्ती, मालक, संस्था, धंदा, व्यापारी किंवा व्यावसायीक यांना व्यवसायकर नोंदणी प्रक्रियत सहकार्य करण्यासाठी व्यवसायकर विभाग, यांच्याकडून विशेष नोंदणी अभियान ९ फेब्रुवारी २०१९ पर्यंत राबविण्यात येत आहे.व्यवसायकर कादयाअंतर्गत नावनोंदणीकृत, नोंदणीकृत नसलेल्या व्यक्ती, मालक, संस्था, धंदा, व्यापारी किंवा व्यावसायीक इत्यांदींना व्यवसायकराची नोंदणी करणे आवश्यक आहे. याकरीता शासनआपल्या दारी या उपक्रमानुसार, व्यवसायकर अधिकारी आपल्या व्यवसायाच्या ठिकाणी अथवा परिसराला भेट देणार आहेत. अनोंदीत असल्यास जागेवर नोंदणी करुन घेतली जाणार आहे. तसेच नोंदणीकरीता बाजारपेठा, मॉल, व्यावसायीक केंद्रे, औद्योगिक वसाहती या ठिकाणी नोंदणी शिबीरे घेण्यात येणार आहेत.

त्याबाबतचे ठिकाण, तारीख www.mahagst.gov.in  या संकेत स्थळावर प्रसिध्द करण्यात येणार आहे. याबरोबरच वस्तु व सेवाकर भवन, तळ मजला, विमानतळ रोड, येरवडा, पुणे ४११००६, येथे मदत कक्ष उपलब्ध करण्यात येणार आहे. तरी अनोंदीत नावनोंदणी, नोंदणी करदात्यांनी याचा लाभ घ्यावा, असे आवाहन व्यवसायकर पुणे विभागाचे अप्पर राज्यकर आयुक्त विलास इंदलकर, राज्य सहआयुक्त प्रदीप चिन्नी व राज्यकर उपायुक्त श्रीमती मनिषा वाघमोडे यांनी केले आहे.