बाणेरमध्ये एकाला रिक्षाने उडवलं, उपचाराच्या बहाण्याने नेलं ,पण त्या वृद्धाला हॉस्पिटल मध्ये न नेता निर्जनस्थळी फेकलं, तब्बल 5 महिन्यांनी झाला उलगडा

पुणे : बाणेर रस्त्यावर ज्येष्ठ नागरिकाला धडक देऊन रेंज हिल्स परिसरात रेल्वे रुळाजवळ गवतात मरणासन्न अवस्थेत सोडून पळून गेलेल्या रिक्षा चालकाला पाच महिन्यांनंतर दिल्लीतून अटक करण्यात बाणेर पोलिसांना यश मिळाले. या अपघातात डोक्याला गंभीर दुखापत झालेल्या ज्येष्ठाचा वेळेत उपचार न मिळाल्याने मृत्यू झाला होता.

इसराइल मंगला गुर्जर, वय २२ वर्षे, रा. महिपालपुर रेडलाईट एरीया, महिपालपुर, दिल्ली गांव नौनेर पोस्ट, नगलिया भेवगजरौला, अमरोहा उत्तर प्रदेश असे अटक केलेल्या आरोपीचे नाव आहे. ‘दिल्ली न्यायालयाकडून ट्रान्झिट रिमांड घेऊन त्याला शनिवारी पुण्यात आणण्यात आले. त्यानंतर पुणे न्यायालयाने त्याला १२ डिसेंबरपर्यंत पोलिस कोठडी सुनावली,’ अशी माहिती बाणेर पोलिस ठाण्याचे वरिष्ठ निरीक्षक चंद्रशेखर सावंत यांनी दिली.बाणेर-बालेवाडी फाटा येथील न्यू पूना बेकरीसमोर २० जुलै रोजी सायंकाळी रस्ता ओलांडणाऱ्या गोपाळ गोविंद वाघ (वय ६३, रा. बालेवाडी) यांना गुर्जर याने धडक दिली. यात वाघ यांच्या डोक्याला गंभीर दुखापत झाली होती. रुग्णालयात नेण्याची बतावणी करून गुर्जरने त्यांना रिक्षात बसविले. त्यानंतर त्यांना रेंज हिल्स परिसरातील रेल्वे रुळाजवळच्या गवतात त्यांना जखमी अवस्थेत सोडून पळ काढला होता. वेळेत उपचार न मिळाल्याने वाघ यांचा मृत्यू झाला होता.या प्रकरणी रिक्षा चालकाच्या विरोधात बाणेर पोलिस ठाण्यात गुन्हा दाखल करण्यात आला. सीसीटीव्ही चित्रीकरण तपासले असता, संबंधित रिक्षा सांगवी येथे सापडली. त्यानंतर रिक्षा मालकाकडे केलेल्या चौकशीत रिक्षा चालकाचे नाव व मोबाइल क्रमांक मिळाला. तोपर्यंत आरोपी गुर्जरने उत्तर प्रदेश गाठले. उत्तर प्रदेश आणि दिल्लीत त्याने सुतारकाम सुरू केलेनवीन फोन आणि सिमकार्ड घेतल्याने त्याचा ठावठिकाणा मिळत नव्हता. दरम्यान, गुर्जरने वडिलांना दुसऱ्या मोबाइल क्रमांकावरून संपर्क साधला. तांत्रिक तपासात तो दिल्लीत असल्याची माहिती बाणेर पोलिसांना मिळाली. त्यानंतर पोलिसांच्या पथकाने दिल्लीतून गुर्जरला अटक केली.

इसराइल हा दिल्ली येथे ऐरोसीटी व महिपाल परिसरात कोठे तरी राहत असल्याची गुप्त माहिती बाणेर पोलीसांना मिळाली असता या माहितीवरुन पोलीस तपास पथकाचे सहा. पोलीस निरीक्षक डाबेराव, पोलीस अंमलदार शिंगे, गायकवाड, आहेर हे आरोपीचा शोध कामी दिल्ली येथे रवाना झाले. या पोलीस पथकातील पोलीस अधिकारी व पोलीस अंमलदार यांना नमुद आरोपीचा सतत ०७ दिवस दिल्ली येथे शोध घेवुन त्याला पकडले आणि अटक केली. त्याला दि.१०/१२/२०२५ रोजी पर्यंत पोलीस कोठडी रिमांड देण्यात आला आहे. पुढील तपास पोलीस निरीक्षक (गुन्हे) श्रीमती अलका सरग ह्या करीत आहेत.
संबधित कामगिरी, अपर पोलीस आयुक्त मनोज पाटील, पोलीस उप-आयुक्त, परि.४ सोमय मुंडे, सहा. पोलीस आयुक्त, खडकी विभाग विठ्ठल दबडे यांचे मार्गदर्शनाखाली बाणेर पोलीस स्टेशनचे वरिष्ठ पोलीस निरीक्षक चंद्रशेखर सावंत, पोलीस निरीक्षक (गुन्हे)अलका सरग यांचे सुचनेप्रमाणे सहा. पोलीस निरीक्षक के.बी डाबेराव, सहा. पोलीस निरीक्षक रायकर, पोलीस अंमलदार गणेश गायकवाड, बाबा आहेर, किसन शिंगे, संदेश निकाळजे, अतुल इंगळे, प्रितम निकाळजे, शरद राऊत, गजानन अवातिरक, प्रदिप खरात, रोहीत पाथरुट व स्वप्नील मराठे यांनी केली आहे.

पुणे : किराणा आणि ग्वाल्हेर घराण्याचा सुंदर मिलाफ दाखविणारे पद्मश्री पंडित डॉ. एम. व्यंकटेश कुमार यांचे प्रगल्भ तर आश्वासक युवा गायिका शिवानी मारुलकर-दसककर यांच्या प्रभावी गायनाने रसिकांची सकाळ संस्मणीय ठरली.

निमित्त होते निनादिनी आणि ललित कला केंद्र गुरुकुल, सावित्रीबाई फुले पुणे विद्यापीठातर्फे आयोजित ‘देवगांधार : अमृत-स्वर’ या सांगितीक महोत्सवाचे. एस. एम. जोशी सभागृहात कार्यक्रम झाला. महोत्सवाचे यंदाचे १७वे वर्ष आहे.

प्रथम सत्रात ग्वाल्हेर, किराणा आणि जयपूर घराण्याचा वारसा जपणाऱ्या सुप्रसिद्ध गायिका विदुषी अलका देव-मारुलकर यांच्या शिष्या व कन्या शिवानी मारुलकर-दसककर यांची गायन मैफल रंगली. त्यांनी आपल्या सादरीकरणाची सुरुवात राग गुजरी तोडीतील विलंबित तीन तालातील ‘सुघर बन री’ या पारंपरिक बंदिशीने केली. मध्य द्रुत अध्धामधील ‘मै जानत तोहे’ ही रचना सादर करून द्रुत एकतालातील ‘भर डारुंगी रंग सो’ ही बंदिश प्रभावीपणे सादर केली. कोमल धैवताचा विभास ऐकविताना त्यांनी डॉ. अलका देव-मारुलकर रचित मध्य रूपकातील ‘हे करो मंगल’ ही भक्तीरचना सादर केली. संपूर्ण जगाचे कल्याण होऊ दे, सर्वत्र सकारात्मकता पसरू दे या आशयाच्या बंदिशीच्या सादरीकरणातून शिवानी यांनी भक्तीरसाची जागृती करत भावपूर्ण गायनातून रसिकांना आनंदित केले. अमेय बिचू (संवादिनी), प्रणव गुरव (तबला), शिवानी मोघे-लाड, निधी अगरवाल (तानपुरा, सहगायन) यांनी साथसंगत केली.

‘समझा मना कोई नही अपना’..

कार्यक्रमाच्या उत्तरार्धात भारतीय शास्त्रीय संगीतातील ओजस्वी आवाज असलेले तसेच भक्तीभाव आणि अवघड ताना, सरगम लिलया सादर करणारे सुप्रसिद्ध गायक पद्मश्री पंडित डॉ. एम. व्यंकटेश कुमार यांची गायन मैफल रंगली. त्यांनी आपल्या मैफलीची सुरुवात राग जौनपुरीमधील ‘बाजे झनन पायलिया मोरी’ या बंदिशीने केली. द्रुत लयित ‘नाम लेलो हरदम मौला’ रचना सादर केल्यानंतर पंडित व्यंकटेश कुमार यांनी अतिशय क्लिष्ट समजला जाणारा देसकार राग ‘हुतो तोरे कारन जागी रे’ या बंदिशीतून प्रभावीपणे मांडला. ‘काज किजिए हररोज’ ही रचना कोमल रिषभ आसावरीत सादर करून रसिकांसाठी ‘तीर्थ विठ्ठल क्षेत्र विठ्ठल’ ही मराठी भक्तीरचना सादर केली. त्यानंतर ‘तोरे बुजिस बहुदे’ ही कन्नड भाषेतील भक्तीचरना रसिकांच्या आग्रहास्तव ऐकविली. मैफलीची सांगता भैरवीतील ‘समझा मना कोई नही अपना’ या रचनेने करत रसिकांना मंत्रमुग्ध केले. पंडित व्यंकटेश कुमार यांच्या अमृतस्वरांच्या स्वरवर्षावात रसिक चिंब झाले. भरत कामत (तबला), सुयोग कुंडलकर (संवादिनी), शिवराज पाटील, कैवल्य पाटील (तानपुरा आणि सहगायन) यांनी साथसंगत केली.

मैफल के राजा बने रहे…

डॉ. अलका देव-मारुलकर यांनी पंडित व्यंकटेशकुमार यांच्या सादरीकरणाचे कौतुक करत ‘मैफल के राज बने  रहे’ अशा शब्दात शुभचिंतन केले. पंडित व्यंकटेशकुमार यांचे गायन हा फक्त स्वराविष्कार नसून तो स्वरावतार असल्याचेही त्या म्हणाल्या.

कार्यक्रमाच्या सुरुवातीस भा. रा. तांबे यांनी लिहिलेल्या व डॉ. अलका देव-मारुलकर यांनी स्वरसाज चढविलेल्या ‘जय जय जननी देवी’ या गीताच्या सादरीकरणाने झाली. डॉ. मारुलकर यांच्या शिष्यांनी हे गीत सादर केले. कलाकारांचा सत्कार मधुवंती देव, प्रफुल्ल देव, किरण जाधव यांनी केला. कार्यक्रमाचे सूत्रसंचालन मंजिरी धामणकर यांनी केले.

‘पुणेकरांशी संवाद साधून निवडणुकीसाठी वचननामा तयार करणार’–मुरलीधर मोहोळ यांच्या अध्यक्षतेखालील कोअर कमिटीत निर्णय

पुणे –
‘आगामी महापालिका निवडणुकीसाठी भारतीय जनता पक्षातर्फे वचननामा तयार केला जात आहे. त्यासाठी पक्षाचे कार्यकर्ते घरोघर जाऊन पुण्याच्या पुढील २५-५० वर्षातील विकास व भविष्याबाबत पुणेकरांचे मत जाणून घेतील. त्यातून हा वचनमाना तयार केला जाईल, अशी माहिती केंद्रीय राज्यमंत्री मुरलीधर मोहोळ यांनी रविवारी दिली. तर ही निवडणूक मोहोळ यांच्या नेतृत्वात लढणार असल्याची घोषणा कॅबिनेट मंत्री चंद्रकांत पाटील यांनी केली.

लवकरच महापालिका निवडणूक जाहीर होण्याची शक्यता आहे. या पार्श्वभूमीवर महापालिका निवडणुकीसाठीच्या पुणे शहर कोअर कमिटीची बैठक रविवारी मोहोळ यांच्या अध्यक्षतेखाली झाली. राज्याचे कॅबिनेट मंत्री चंद्रकांत पाटील, पश्चिम महाराष्ट्राचे संघटन मंत्री मकरंद देशपांडे, शहराध्यक्ष धीरज घाटे, माजी केंद्रीय मंत्री प्रकाश जावडेकर, प्रदेश सरचिटणीस राजेश पांडे, ज्येष्ठ नेते दिलीप कांबळे, खासदार मेधा कुलकर्णी, निवडणूक प्रमुख गणेश बिडकर, आमदार भिमराव तापकीर, आमदार सुनिल कांबळे, आमदार सिद्धार्थ शिरोळे, आमदार योगेश टिळेकर, श्रीनाथ भिमाले यांच्यासह विस्तारित कोअर कमिटीचे सदस्य उपस्थित होते.

‘महापालिका निवडणुकांच्या शक्यतेच्या पार्श्वभूमीवर पक्षाच्या नियमित प्रक्रियेचा भाग म्हणून ही प्राथमिक बैठक झाली. भाजपची यंत्रणा बाराही महिने कार्यरत असते. परंतु, निवडणुकीच्या दृष्टीने शहर पातळीवर आणखी काय करता येईल, याचे प्राथमिक नियोजन या बैठकीत झाले. पक्षाच्या कार्यकर्त्यांची मोठी संख्या पाहता इच्छुकांची संख्या अधिक असण्याची शक्यता आहे. त्यामुळे आजपासून दोन दिवस शहर कार्यालयात अर्ज मागवले जातील. हे अर्ज प्रदेश कार्यालयाकडे पाठवले जातील. त्यानंतर मुख्यमंत्री देवेंद्र फडणवीस, प्रदेशाध्यक्ष रवींद्र चव्हाण यांच्या आदेशानुसार कोअर कमिटी चर्चा करून पुढील निर्णय घेईल,’ असे मोहोळ म्हणाले.

​‘भाजपचा वचननामा तयार करण्याचे कामही सुरू झाले आहे. त्यासाठी प्रत्येक प्रभागात कार्यकर्ते घरोघर जातील, पुणेकरांशी चर्चा करतील. पुढील २५-५० वर्षातील पुण्याचे भवितव्य, पुण्याच्या विकासाबाबत पुणेकरांच्या अपेक्षा जाणून घेतील. यात सर्वसामान्यांच्या अपेक्षांबरोबरच विविध विषयातील तज्ज्ञांशीही संवाद साधून त्यांचे मतही विचारात घेतले जाईल. त्यावर आधारित वचननामा तयार केला जाईल. पुढील पाच वर्षात आम्ही त्याची १०० टक्के अंमलबजावणी करू,’ असे मोहोळ म्हणाले. याशिवाय शहराध्यक्षांच्या स्तरावर प्रमुख पदाधिकाऱ्यांसह प्रत्येक प्रभागात संघटनात्मक बैठका घेण्यात येतील. कार्यकर्त्यांशी चर्चा करून त्यांच्या भावनाही जाणून घेतल्या जातील.

‘आम्ही महायुतीचे घटक आहोत. ‘युतीधर्म’ पाळा, अशी भूमिका आमच्या नेत्यांनी मांडली आहे. स्थानिक परिस्थिती पाहून सामंजस्याने जिथे शक्य असेल तिथे महायुती म्हणून निवडणूक लढू जिथे शक्य नाही तिथे मैत्रीपूर्ण लढाई होईल. वरिष्ठांच्या आदेशानुसार पुढील भूमिका स्पष्ट केली जाईल,’असे मोहोळ यांनी नमूद केले.

अन्य पक्षातील माजी नगरसेवकांना, नेत्यांना प्रवेश देण्याबाबत प्रवेशाचे धोरण ठरेल, तेव्हा चर्चा होईल. एकमताने पक्षप्रवेशाबाबत निर्णय घेतला जाईल. जिथे संबंधित कार्यकर्त्यांना प्रवेश दिल्याने पक्षाची ताकद वाढेल, तिथे प्रवेश दिला जाईल. माात्र, जिथे भाजपचा कार्यकर्ता, संघटना सक्षम असेल तिथे कार्यकर्त्यांनाच प्राधान्य राहील, असेही मोहोळ यांनी स्पष्ट केले.

मतदारयादीतील त्रुटी, गोंधळ यावर भारतीय जनता पक्ष गांभीर्याने काम करत आहे. मतदार यादीतील चुका सुधारल्या गेल्याच पाहिजेत. परंतु, त्यावर राजकारण करता कामा नये, असेही मोहोळ यांनी सांगितले.

लोकशाही वाचवण्यासाठी पुणेकरांनी पुढे यावे

माजी मंत्री बाळासाहेब थोरात यांचे आवाहन

पुणे : सत्तेत राहण्यासाठी भाजपकडून कोणत्याही थराचे राजकारण केले जात असून ईव्हीएम प्रक्रियेबाबत गंभीर शंका निर्माण झाल्या आहेत. धार्मिक ध्रुवीकरण आणि मतचोरी करणे हा भाजपाचा मुख्य फंडा बनला आहे. लोकशाहीचा मूलभूत ढाचा वाचवण्यासाठी सर्वांनीच पुढे येणे आवश्यक असल्याचे मत माजी महसूलमंत्री बाळासाहेब थोरात यांनी व्यक्त केले. देशाच्या स्वातंत्र्यलढ्यात पुणेकरांचे मोठे योगदान आहे. आज लोकशाही वाचवण्यासाठी पुणेकरांनी पुढे आले पाहिजे, असे आवाहनही त्यांनी यावेळी केले.

काँग्रेसच्या माजी अध्यक्षा सोनियाजी गांधी यांच्या वाढदिवसानिमित्त बालगंधर्व रंगमंदिरात आयोजित ‘सेवा, कर्तव्य, त्याग’ सप्ताह कार्यक्रमात ‘लोकशाहीची हत्या व वोटचोरी’ या विदारक सत्यावर आधारित विशेष प्रदर्शनाचे उद्घाटन थोरात यांच्या हस्ते झाले. या वेळी महाराष्ट्र युवक काँग्रेसचे प्रदेशाध्यक्ष शिवराज मोरे प्रमुख पाहुणे म्हणून उपस्थित होते. कार्यक्रमाचे संयोजक आणि महाराष्ट्र प्रदेश काँग्रेस कमिटीचे वरिष्ठ उपाध्यक्ष मोहन जोशी, माजी गृहराज्यमंत्री रमेश बागवे, राष्ट्रवादी काँग्रेस पक्षाचे शहराध्यक्ष प्रशांत जगताप, शिवसेना (उद्धव बाळासाहेब ठाकरे) शहरप्रमुख संजय मोरे, प्रदेश काँग्रेस प्रवक्ते गोपाळ तिवारी, माजी नगरसेवक वीरेंद्र किराड, अविनाश बागवे, महिला काँग्रेस अध्यक्षा स्वाती शिंदे, लता राजगुरू, कैलास गायकवाड, अनिल सोडकर, प्रथमेश आबनावे आणि चेतन अग्रवाल उपस्थित होते.

आपल्या भाषणात थोरात म्हणाले की, २००४ ते २०१४ या काळात काँग्रेस सरकारने अन्न सुरक्षा कायदा, शैक्षणिक योजना, भू-अधिग्रहण कायद्यात सुधारणा, तसेच जागतिक स्तरावर गाजलेल्या पोलिओ निर्मूलन मोहिमेसह अनेक लोककल्याणकारी उपक्रम राबवले. मात्र २०१४ नंतर भाजपने तांत्रिक साधने, अफवा आणि जातीय ध्रुवीकरणाचा वापर करून सत्ता काबीज केली आणि देशाची दिशा भरकटवली. महाराष्ट्र हा संतांची परंपरा जपणारा प्रदेश असताना, आज धर्माचे उघडपणे राजकारण केले जात आहे. सोनम वंगचुक, हरियाण्यातील शेतकरी आंदोलन, महिला ऑलिम्पिक विजेत्यांचे आंदोलन, मुख्य न्यायाधीशांवर फेकलेला बूट—या घटनांनंतरही समाज उदासीन राहणे म्हणजे लोकशाहीची हत्या असल्याचे त्यांनी स्पष्ट केले.

युवक काँग्रेसचे प्रदेशाध्यक्ष शिवराज मोरे म्हणाले की, मोदी सरकार मतचोरीच्या ठरावीक पॅटर्नवर सत्तेत आले असून ही जनतेची व लोकशाहीची मोठी फसवणूक आहे. निवडणुका झाल्यानंतर निकाल पुढे ढकलणे आणि नंतर ईव्हीएमच्या जोरावर सत्ता मिळवणे ही पद्धत लोकशाहीस घातक आहे. मोदी सरकारला रोखण्यासाठी जनआंदोलन उभारण्याची वेळ आली असून सर्वांनी एकत्र येण्याची गरज असल्याचे त्यांनी सांगितले.

शिवसेनेचे शहरप्रमुख संजय मोरे म्हणाले की, विविध राष्ट्रीय मुद्द्यांवर राहुल गांधी यांनी आवाज उठविल्यामुळे जनजागृतीला गती मिळाली आहे. आपले मत नक्की कुठे आणि कसे जाते याचा शोध घेण्याचा प्रयत्न या प्रदर्शनातून करण्यात आला असून आर्थिक भ्रष्टाचारासोबत मतचोरी ही भाजपची मोठी चाल असल्याचे त्यांनी ठामपणे सांगितले.

माजी महापौर प्रशांत जगताप यांनी म्हटले की, लोकशाहीची हत्या आणि मतचोरीचे विदारक वास्तव दाखवणारे हे प्रदर्शन लोकशाही रक्षणासाठी महत्त्वाचा उपक्रम आहे. केंद्र सरकारविरुद्ध लोकांमध्ये वाढता असंतोष दिसत असून मतचोरीची प्रक्रिया लोकांपर्यंत पोहोचवणे आवश्यक आहे. मतदार याद्यांतील घोळही तातडीने दूर करणे गरजेचे असल्याचे त्यांनी स्पष्ट केले.
कार्यक्रम संयोजक मोहन जोशी म्हणाले की, पुण्याच्या सर्वांगीण विकासाचे श्रेय काँग्रेसचेच आहे. आजवर २५ पेक्षा जास्त प्रकल्प राबवून शहराचा विकास साधला. ‘सेवा, कर्तव्य, त्याग’ सप्ताहातून जनजागृती, सामाजिक बांधिलकी आणि लोकशाहीचे महत्त्व अधोरेखित करणे हा उद्देश असल्याचे त्यांनी सांगितले.
अविनाश बागवे यांनी प्रास्ताविक केले. सूत्रसंचालन प्रथमेश आबनावे यांनी केले, तर सुनील मलके यांनी आभार मानले.

पुणे-39व्या पुणे अंतरराष्ट्रीय मॅरेथॉनमध्ये रविवार दि. 7 डिसेंबर रोजी सपन्न झालेल्या पूर्ण मेरेथॉन स्पर्धेत पुरुष गटात इथोपियाचा टेरेफे हैमानोत ( 2तास 20 मिनिटे 08 सेकंद) आणि पूर्ण मेरेथॉन महिला गटात भारताची साक्षी जडियाला ( 2 तास 39 मिनिटे 37 सेकंद ) यांनी प्रथम क्रमांक मिळवला. 42. 195 किमीच्या पूर्ण मेरेथॉन पुरुष गटात द्वितीय क्रमांक इथोपियच्या मिको देरेजे अलेनू (2तास 20 मिनिटे 09 सेकंद) आणि तृतीया क्रमांक भारताच्या त्रिथा पुन (2 तास 20 मिनटे 17 सेकंद) यांनी मिळवला.
पूर्ण मेरेथॉन महिला गटात द्वितीय क्रमांक इथोपियाच्या इडो टूलो (2तास 40 मिनटे 56 सेकेंद) आणि तृतीय क्रमांक इथोपियाची वारे डेमिसी (2तास 50 मिनटे 46 सेकेंद) यांनी मिळवला.

अर्ध मेरेथॉनमध्ये पुरुष गटात प्रथम क्रमांक भारताच्या सचिन यादव (1तास 3 मिनिटे 43 सेकेंद), द्वितीय क्रमांक भारताच्या राज तिवारी (1 तास 3 मिनिटे 44 सेकंद) आणि तृतीय क्रमांक भारताच्या मुकेश कुमार (1 तास 4 मिनटे 3 सेकंद) यांनी मिळवला
.मिहालांच्या अर्ध मेरेथॉनमध्ये भारताच्या भारती (1 तास 13 मिनटे 59 सेकंद), द्वितीय क्रमांक भारताची रविणा गायकवाड (1तास 15 मिनटे 58 सेकंद) आणि तृतीय क्रमांक भारताची तसेहय देसजन (1 तास 18 मिनटे 19 सेकंद) यांनी मिळवला. 

याशिवाय 10 किमी, 5 किमी आणि व्हीलचेअर स्पर्धाही उत्सहात पार पडली.
पहाटे 3 वाजता ऍड. अभय छाजेड यांच्या हस्ते फ्लेग ऑफ करून स्पर्धेचा प्रारंभ सणस मैदान जवळील हॉटेल कल्पना – विश्व चौकातून झाला. सर्व गटातील सर्व स्पर्धक परंतल्यानंतर सणस मैदान येथे बक्षीस वितरण समारंभ पार पडला. यावेळी प्रदेश काँग्रेस अध्यक्ष हर्षवर्धन सपकाळ, पोलीस सहआयुक्त रंजनकुमार, अरविंद शिंदे, बाळासाहेब शिवरकर, विशाल चोरडिया,  दीप्ती चवधरी, कमल व्यवहारे, आबा बागुल, प्रशांत जगताप, संजय मोरे, सुनील शिंदे, लता राजगुरू, डॉ. सतीश देसाई, संगीता तिवारी, डॉ. राजेंद्र जगताप, सचिन आडेकर, यासिन शेख, अक्षय जैन, रेस डायरेक्टर सुमंत वायकर, जॉईंट रेस डायरेक्टर रोहन मोरे व गुरुबंस कौर व अन्य पदाधिकारी उपस्थित होते.

प्रारंभी पुणे अंतरराष्ट्रीय मेरेथॉनचे विश्वस्त ऍड. अभय छाजेड यांनी स्वागत केले. प्रदेश अध्यक्ष हर्षवर्धन सपकाळ म्हणाले कि, आपण आपल्या देशाला भारतमाता म्हणतो. मातृभूमीला माता म्हणणे ही आपली संस्कृती आहे. जात, धर्म, भाषा, प्रांत, यापेक्षाही खेळाडू म्हणून सगळे येथे एकत्र आले आहेत याचा आनंद आहे. हा उद्याचा भारत आहे. त्यासाठी बघ्याची भूमिका न घेता नागरिक म्हणून प्रत्येकाने पाऊल पुढे टाकावे. आजची मेरेथॉनची गर्दी त्यादृष्टीने खूप आश्वास्क आहे असे सांगून त्यांनी आयोजक अभय छाजेड व संयोजकांचे कौतुक केले.यास्पर्धेला पुणे महानगरपालिकेने 35 लाख रुपयांची बक्षिसे दिली. स्पर्धा पूर्ण करणाऱ्या सर्व गटातील सर्व खेळाडूंना फिनिशिंग मेडल देण्यात आले. 15 हजारहून अधिक धावपटू यात सहभागी झाले होते. कार्यक्रमच्या शेवटी रेस डायरेक्टर सुमंत वायकर यांनी आभार मानले.