पुणे : ज्येष्ठ समाजवादी नेते आणि कामगार आणि कष्टकरी समाजाचे नेते बाबा आढाव यांचे आज रात्री 8 वाजून 25 मिनिटांनी निधन झाले, ते ९५ वर्षांचे होते. गेल्या काही महिन्यांपासून ते आजारी होते, त्यांतच त्यांची प्रकृती बिघडल्यामुळे त्यांना रुग्णालयात दाखल करण्यात आले होते. दोन दिवसांपूर्वीच, शरद पवार हे बाबा आढावांच्या भेटीला रुग्णालयात गेले होते. पुना हॉस्पिटलमध्ये बाबा आढाव यांच्यावर उपचार सुरु असताना त्यांनी रुग्णालयात जाऊन विचारपूस केली होती. तर, गेल्याच आठवड्यात ज्येष्ठ समाजवादी नेते पन्नालाल सुराणा यांचे निधन झाले होते. तेव्हाही शरद पवारांनी सोशल मीडियावर पोस्ट करत पन्नालाल सुराणा यांच्या कार्याची आठवण काढत त्यांना आदरांजली वाहिली होती.तत्कालीन पंतप्रधान चंद्रशेखर , व्ही पी सिंह यांना बाबा आढावांच्या सामाजिक कार्याबाबत मोठा आदर होता या दृष्टीने त्यांनी पंतप्रधान असताना देखील पुण्यात बाबा आढाव यांच्याशी सातत्याने संपर्क ठेवला होता. समाजवादी नेते म्हणूनच नव्हे तर ते कष्टकरी समाजाचे नेते म्हणूनही त्यांचा परिचय होता.भाई वैद्य , एस एम जोशी , मोहन धारिया आणि बाबा आढाव हि पुण्यातील समाजवादी नेते मंडळी देशभर आपल्या कार्याने परिचित होती.

बाबा आढाव यांना गेल्या 10 ते 12 दिवसांपासून पुना हॉस्पिटलमध्ये ऍडमिट करण्यात आले होते. हृदयरोगतज्ज्ञ डॉ. अभिजित वैद्य व तज्ज्ञ डॉक्टरांच्या देखरेखीखाली त्यांच्यावर आवश्यक ते उपचार सुरू होते. उपचार करणाऱ्या डॉक्टरांनी सांगितल्यानुसार त्यांची प्रकृती गंभीर असल्याने त्यांना आय.सी.यू. मध्ये ठेवण्यात आले होते. अखेर, आज रात्री 8.25 वाजता त्यांनी अखेरचा श्वास घेतला. त्यांच्या जाण्याने कष्टकऱ्यांसाठी लढणारा, समाजवादी विचारांचा नेता महाराष्ट्राने गमावल्याची भावना व्यक्त होत आहे.

1970 च्या दशकात डॉ. बाबा आढाव पुणे महापालिकेचे नगरसेवक होते. तात्कालीन समाजवादी पक्षाचे सदस्य होते आणि रिक्षा पंचायतीने नेते म्हणूनही काम करत होते. ‘एक गाव एक पाणवठा’ नावाची मोहिम चालवली जात होती. बाबा आढाव त्याचे प्रणेते होते. ज्येष्ठ सामाजिक कार्यकर्ते म्हणून त्यांची मोठी ओळख होती, मृत्यूसमयी ते 95 वर्षांचे होते.

दरम्यान, शिवसेना आणि राष्ट्रवादीतील फुटीनंतर देशातील आणि राज्यातील राजकीय परिस्थितीवर त्यांनी परखडपणे भाष्य केलं होतं. माणूस सकाळी कुठं असेल अन संध्याकाळी कुठं असेल, सध्या अशी परिस्थिती आहे. कारण त्यांना सत्तेची भूक आहे. पण लक्षात ठेवायला हवं, 140 कोटी जनताच ठरवेल, कोणाचं काय करायचं असं बाबा आढाव म्हणाले. ते म्हणाले की, काळ कठीण आहे, काळाचे भान ठेवा. सध्याचं राजकारण खूप विलक्षण आहे. कॅनडा मधून माझे कुटुंबीय म्हणतायेत की भारतात काय चाललंय नेमकं? आपल्या इथं फक्त सत्तेसाठी सगळं सुरू आहे, असे म्हणत राष्ट्रवादीतील फुटीनंतर बाबा आढाव यांनी देशातील राजकीय परिस्थितीवर भाष्य करत वयाच्या 93 व्या वर्षीही आंदोलन केलं होतं.

ईव्हीएमच्या विरोधात आत्मक्लेश

बाबा आढाव खऱ्या अर्थाने संघर्ष करणारे नेते होते. त्यांनी गेल्यावर्षी ईव्हीएमच्या विरोधात आत्मक्लेश आंदोलन केलं होतं. वयाच्या 95 व्या वर्षी त्यांनी सलग तीन दिवस ईव्हीएमच्या विरोधात आत्मक्लेश आंदोलन केलं होतं. विधानसभा निवडणुकीचा निकाल जाहीर झाल्यानंतर अनेकांनी ईव्हीएमवर टीका केली होती. त्यानंतर बाबा आढाव यांनी महात्मा फुले यांच्या पुण्यतिथीचे औचित्य साधत महात्मा फुले वाडा येथे आत्मक्लेश उपोषण सुरु केलं होतं. माजी मुख्यमंत्री उद्धव ठाकरे यांच्या हस्ते पाणी पिवून त्यांनी आपलं उपोषण सोडलं होतं. त्यावेळी उपमुख्यमंत्री अजित पवार, जयंत पाटील, संजय राऊत या नेत्यांनी त्यांची भेट घेतली होती.
बाबा आढाव यांचा जन्म १९३७ मध्ये पुण्यात झाला. ते नाना पेठेतील नामांकीत आयुर्वेदिक डॉक्टर होते. याच नाना पेठ भागात अनेक व्यवसायांतील कामगार त्यांच्याकडे उपचार घेण्यासाठी येत असतं त्यातूनच त्यांना हमालांना येणार्‍या अनेक अडचणी लक्षात आल्या. हमालांचे शोषण होऊनही त्यांना कुठलेही कायदेशीर संरक्षण नसल्याचे त्यांनी पाहिले. अखेर त्यांनी १९६६ मध्ये बाबांनी डॉक्टरकीचा व्ववसाय सोडला आणि कामगारांच्या पाठीशी उभे राहायचे ठरवले.

डॉ. बाबा आढाव सुरुवातीला समाजवादी पक्षाबरोबर काम करायचे. मात्र, त्यांनी तो राजकीय पक्ष सोडला आणि १९५५ मध्ये हमाल पंचायत स्थापन केली. याच पंचायतीची पुढे १९७२ मध्ये कामगार संघटना झाली. १९५६ मध्ये वाहतूक क्षेत्रातील कामगारांना योग्य वेतन मिळावे, या मागणीसाठी हमाल पंचायतीने पहिले आंदोलन केले. त्यानंतर त्यासाठी केलेल्या सततच्या संघर्षामुळे १९६९ ला राज्यात महाराष्ट्र माथाडी, हमाल व इतर श्रमजीवी कामगार कायदा मंजूर झाला. असंघटित कामगारांच्या कल्याण आणि सुरक्षेसाठी भारतातील हा पहिला कायदा होता. याच संपूर्ण श्रेय हे बाबा आढाव यांच्या संघर्षालाच जाते. १९७२ मध्ये दलितांना सर्व ठिकाणी पाणी मिळावे, यासाठी त्यांनी ‘एक गाव, एक पाणवठा’ नावाने राज्यभर मोर्चे काढले. पुण्यातील कामगारांना स्वस्त, पौष्टिक जेवण उपलब्ध करून देणारी ‘कष्टाची भाकरी योजना’ हीदेखील आढाव यांचीच कल्पना होती. या योजनेतील पहिल्या शाखेची सुरुवात २ ऑक्टोबर १९७४ रोजी भवानी पेठेत झाली

नाताळ सण सर्वधर्मीयांसह सिटी चर्च येथे साजरा करण्याचा परंपरा कायम असून या चर्चने शैक्षणिक कार्य उभे करण्यात मोठा सहभाग नोंदविला असे येथेख्रिश्चन समाजाचे नेते लुकस केदारी यांनी सांगितले..

पुणे : सवाई माधवराव पेशव्यांनी१७९२ मध्ये सिटी चर्चसाठी जमीन दिली. हे शहरातील पहिले चर्च आहे. तेव्हा येथून शहराला सुरुवात होत असे. सिटी चर्चने या जागेत शाळा सुरू करून या भागात मोठे शैक्षणिक कार्य उभा केले आहे, अशी भावना पुष्करसिंह पेशवा यांनी सोमवारी व्यक्त केली.
नाना पेठ क्वार्टर गेट येथील सिटी चर्च या सर्वात जुन्या कॅथोलिक चर्चला सोमवारी २३३ वर्षे पूर्ण झाली. यानिमित्त आयोजित कार्यक्रमात पुष्करसिंह पेशवा, त्यांच्या मातु:श्री जयमंगलाराजे पेशवा आणि कन्या रियाराजे पेशवा यांचा अवर लेडी ऑफ इमॅक्युलेट कन्सेपशन चर्चचे प्रमुख धर्मगुरू फादर लुई हेरेडिया यांच्या हस्ते सत्कार करण्यात आला. पेशव्यांचा चर्चतर्फे सत्कार करण्याच्या संकल्पनेबद्दल ज्येष्ठ पत्रकार प्रवीण प्र वाळिंबे यांचा सत्कार फादर गॉडवीन सालढाणा यांच्या हस्ते करण्यात आला. यावेळी फादर अल्फानसो, फादर भाऊसाहेब संसारे, रिजनल ख्रिश्चन सोसायटीचे अध्यक्ष
लुकस केदारी , सोसायटीचे संघटक पीटर डिसुझा , फ्लॉरिना वाझ, मिलिफा फर्नांडिस, जोएन डिसुझा उपस्थित होते.
पुष्करसिंह पेशवा म्हणाले, आज जाती आणि धर्मांकडे वेगळ्या नजरेने पाहिले जात आहे. सत्तेसाठी पूर्वी संघर्ष झाला. मात्र , एका पातळीनंतर संबंध जोपासले जात होते.
चिम्माजीअप्पांनी वसईच्या लढ्यात पोर्तुगीजांचा पराभव केला. मात्र, मराठ्यांनी तेथील पोर्तुगीजांचा धर्म बदलला नाही. आज तेथे मराठी आणि ख्रिश्चन लोक मिळूनमिसळून राहतात. हेच उदाहरण पुण्यात सिटी चर्चच्या बाबतीत दिसते. सवाई माधवराव पेशव्यांनी १७९२ मध्ये सिटी चर्चसाठी जमीन दिली. माझे वडील उदयसिंह पेशवा या चर्चच्या कार्याविषयी नेहमी माहिती सांगायचे. चर्चला २२५ वर्षे पूर्ण झाली. तेव्हाही आम्ही येथे आलो होतो. पेशव्यांची आठवण ठेवून तेव्हाही आम्हाला गौरविण्यात आले होते. थोरले बाजीराव पेशव्यांची माझी दहावी पिढी आहे. हे पहिले सिटी चर्च आहे असे वडील सांगायचे. येथून शहराला सुरुवात होत असे. सिटी चर्चने येथे शाळा सुरू करून मोठे शैक्षणिक कार्य उभा केले आहे. आमच्या तर्फे सर्वांना नाताळच्या शुभेच्छा.
प्रमुख धर्मगुरू फादर लुई हेरेडिया यांनी पेशवा कुटुंबीयांबद्दल कृतज्ञता व्यक्त केली. यावेळी उपस्थित शेकडो ख्रिस्ती बांधवांनी टाळ्यांचा कडकडाट केला.

शहरातले पहिले चर्च

सन १७८८ मध्ये शंभर पोर्तुगीज सैनिक आणि दोनशे कॅथोलिक सैनिक हे दारूगोळ्यासह पेशव्यांच्या सैन्यात दाखल झाले. पोर्तुगीजांचे अधिकारी नोमिन्हो हे माधवराव पेशवे (दुसरे) यांच्या संपर्कात होते. त्यांच्या विनंतीनुसार माधवराव पेशव्यांनी पाच एकर जागा पोर्तुगीजांना दान केली. त्यावरच पुण्यातील पहिले चर्च उभा राहिले. तेच आज सिटी चर्च म्हणून ओळखले जाते.

निवडणुकीसाठी इच्छुक उमेदवारांचे अर्ज वाटप – पहिल्याच दिवशी मोठा प्रतिसाद

पुणे- महानगरपालिका सार्वत्रिक निवडणुकीच्या पार्श्वभूमीवर राष्ट्रवादी काँग्रेस पार्टीच्या वतीने इच्छुक उमेदवारांसाठी उमेदवारी अर्ज वाटपाची प्रक्रिया आज उत्साहात आणि शिस्तबद्ध पद्धतीने पार पडली. पक्षाचे पूर्व विभागाचे अध्यक्ष सुनील टिंगरे व पश्चिम विभागाचे अध्यक्ष सुभाष जगताप साहेब या दोघांच्या हस्ते पक्षाच्या पुणे शहर कार्यालयात सकाळपासूनच मोठ्या प्रमाणावर इच्छुक उमेदवारांनी अर्ज घेतले.

राष्ट्रवादी काँग्रेस पार्टीने सामाजिक न्यायाच्या धोरणाला अनुसरून उमेदवारी अर्जाची रक्कम निश्चित केली आहे.ओपन व ओबीसी प्रवर्गासाठी उमेदवारी अर्जासोबत २०,००० रुपये, तर अनुसूचित जाती (SC) व अनुसूचित जमाती (ST) प्रवर्गासाठी १०,००० रुपये निश्चित करण्यात आले आहेत. अर्जाचा फॉर्म शुल्क केवळ ५०० रुपये ठेवण्यात आले असून, सर्वसामान्य कार्यकर्ते, तरुण आणि समाजाच्या विविध घटकांना संधी देण्याचा पक्षाचा ठाम उद्देश यातून स्पष्ट होतो. अर्ज विक्रीस सुरुवात व अर्ज स्वीकारण्याची तारीख 8 डिसेंबर पासून ते 18 डिसेंबर पर्यंत अशी 10 दिवस ठेवण्यात आली आहे.

आज दिवसभरात सुमारे २०० हून अधिक उमेदवारी अर्ज वितरित झाले असून, यामधून राष्ट्रवादी काँग्रेस पार्टीवर पुणेकरांचा असलेला विश्वास आणि आगामी महापालिका निवडणुकीबाबतची सकारात्मक ऊर्जा स्पष्टपणे दिसून येते. आजी-माजी नगरसेवक, युवक कार्यकर्ते, महिला प्रतिनिधी तसेच नव्या नेतृत्वाने मोठ्या उत्साहाने अर्ज घेतले.

पुणे शहराच्या सर्वांगीण विकासासाठी, पारदर्शक व लोकाभिमुख प्रशासन देण्यासाठी राष्ट्रवादी काँग्रेस पार्टी कटिबद्ध असून, सक्षम, स्वच्छ प्रतिमा असलेले व जनतेशी नाळ जोडलेले उमेदवार निवडणूक रिंगणात उतरवण्याचा पक्षाचा मानस आहे. त्यामुळेच उमेदवार निवड प्रक्रियेत सामाजिक समतोल, कार्यक्षम नेतृत्व आणि लोकसेवेची बांधिलकी हे प्रमुख निकष असतील, असे पक्षाच्या वतीने स्पष्ट करण्यात आले.

पुणे- महानगरपालिकेच्या आगामी निवडणुकीच्या पार्श्वभूमीवर, पुणे शहर भारतीय जनता पक्षाच्या कार्यालयात उमेदवारी अर्ज भरण्याची प्रक्रिया सोमवारी सुरू झाली. यावेळी भाजपच्या उमेदवारीसाठी इच्छुकांची मोठी गर्दी दिसून आली.पुणे महापालिका निवडणूक लवकरच होणार असून, विविध राजकीय पक्षांतील इच्छुक उमेदवारांनी आपापल्या मतदारसंघांत प्रचाराची कामे सुरू केली आहेत. पुण्यात भाजपचे १०० नगरसेवक असल्याने, पक्षाकडून उमेदवारीसाठी मोठी स्पर्धा आहे. अर्ज स्वीकारण्याच्या पहिल्याच दिवशी सकाळपासून २ हजार अर्जांची मागणी करण्यात आली, ज्यामुळे भाजपला मोठी पसंती मिळत असल्याचे चित्र आहे. इच्छुकांची गर्दी मोठ्या प्रमाणात झाल्याने भाजप नेत्यांची देखील उमेदवारी देताना सर्कस होणार आहे.

रिपब्लिकन पार्टी ऑफ इंडिया (आठवले) च्या वतीने महापालिका निवडणुकीसाठी १० डिसेंबर पासून अर्ज स्वीकृती

दरम्यान रिपब्लिकन पार्टी ऑफ इंडिया (आठवले) पक्षाच्या वतीने आज कोअर कमिटीची महत्त्वाची बैठक घेण्यात आली. या बैठकीत पुणे महानगरपालिका निवडणूक भारतीय जनता पक्षासोबत महायुतीतून लढवण्याचा निर्णय सर्वानुमते घेण्यात आला. तसेच पक्षाच्या उमेदवार निवडीसंदर्भात महत्वाचे वेळापत्रक जाहीर करण्यात आले आहे. इच्छुक उमेदवारांच्या अर्जांचे वाटप आणि अर्ज स्वीकृती १० ते १३ डिसेंबर २०२५ या कालावधीत करण्यात येणार आहे. पक्षाच्या मुख्य कार्यालयात सकाळी ११ ते संध्याकाळी ५ वाजेपर्यंत छापील अर्जफॉर्म उपलब्ध राहतील. इच्छुक उमेदवारांनी निर्धारित सर्व माहिती अचूकपणे भरून नियोजित वेळेत अर्ज जमा करण्याचे आवाहन पक्षतर्फे करण्यात आले आहे. बैठकीस शहराध्यक्ष संजय सोनवणे, प्रदेश सचिव बाळासाहेब जानराव,  प्रदेश संघटन सचिव परशुराम वाडेकर, अशोक कांबळे, शहर प्रभारी शैलेंद्र चव्हाण, अशोक शिरोळे, मोहन जगताप, बाबूराव धाडगे, महिपाल वाघमारे, शाम सदाफुले, शहर महिला अध्यक्षा हिमाली कांबळे आदी पदाधिकारी उपस्थित होते.

फॅशन शो, के-पॉप, फ्यूजन संगीत व कोरियन खाद्य-संस्कृतीच्या स्टॉलना उत्स्फूर्त प्रतिसाद

पुणे : इंडो-कोरियन सेंटर, किंग सेजोंग इन्स्टिट्यूट पुणे येथे आयोजित कोरियन सांस्कृतिक महोत्सवाला विद्यार्थ्यांसह त्यांचे कुटुंबीय आणि कोरियन संस्कृतीच्या चाहत्यांचा उत्स्फूर्त प्रतिसाद लाभला. फॅशन शो, के-पॉप, फ्युजन संगीत व कोरियन खाद्य-संस्कृतीचे विविध स्टॉल, चार ऋतूंचे प्रदर्शन आदी उपक्रमांनी पुणेकरांची मने जिंकली.

बालेवाडी येथील इंडो-कोरियन सेंटरचा संपूर्ण परिसर कोरियन रंग, संगीत आणि के-पॉपच्या उत्साहाने रंगून गेला. दक्षिण कोरियाचे मुंबईतील वाणिज्य दूत यु डोंग-वॉन यांनी प्रमुख पाहुणे म्हणून उपस्थित राहून भारत–कोरिया सांस्कृतिक नातेसंबंध मजबूत करण्यासाठी संस्थेने घेतलेल्या पुढाकाराचे कौतुक केले. इंडो-कोरियन सेंटरच्या संचालिका डॉ. एउन्जु लिम, सहसंस्थापक आणि करिअर डेव्हलपमेंट सेंटरचे प्रमुख संजीब घटक आदी उपस्थित होते.

स्वागतपर भाषणात डॉ. एउन्जु लिम म्हणाल्या, कोरियाच्या सांस्कृतिक, क्रीडा व पर्यटन मंत्रालयाच्या अंतर्गत २०२३ मध्ये स्थापन झालेल्या इंडो-कोरियन सेंटर या संस्थेत कोरियन भाषेचे प्राथमिक व माध्यम स्तरावरील अभ्यासक्रम तसेच इंटरप्रिटेशन, कोरियन संगीत, कोरियन-थ्रू-मीडिया आणि कामकाजासाठी लागणारा प्रोफेशनल कोरियन असे विशेष अभ्यासक्रम उपलब्ध आहेत. विद्यार्थ्यांना कोरियातील उच्च शिक्षणासाठी मार्गदर्शन आणि करिअर मार्गदर्शनाची सुविधा दिली जाते.

महोत्सवाची सुरुवात सेजोंग इन्स्टिट्यूटच्या विद्यार्थ्यांच्या प्रभावी सादरीकरणांनी झाली. इंडो-कोरियन फ्यूजन संगीत, कोरियन काव्यपठण आणि उत्साहवर्धक के-पॉप डान्सने उपस्थितांना कोरियन संस्कृतीची झलक अनुभवायला मिळाली. निवांत, संवादात्मक वातावरणामुळे भेट देणाऱ्यांना कोरियन संस्कृतीशी सहज जुळवून घेता आले.

कल्चरल अ‍ॅक्टिव्हिटी झोन हे महोत्सवाचे मुख्य आकर्षण ठरले. स्क्विड गेम-वर आधारित खेळांना प्रचंड प्रतिसाद मिळाला. तसेच ‘फोर सीझन्स ऑफ कोरिया’ फोटोबूथ, हान्गूल कॅलिग्राफी, नामसान टॉवरच्या मॉडेलवर रंगीबेरंगी हृदय-लॉक्स टांगणे आणि कोरियन-स्टाइल फेस पेंटिंग अशा उपक्रमांमध्येही भेट देणाऱ्यांनी उत्साहाने सहभाग घेतला. कोरियन लोकप्रिय स्नॅक्स देणारा फूड काऊंटरही विशेष लोकप्रिय ठरला. यावेळी सत्र-३ चा समारोप समारंभही पार पडला. विद्यार्थ्यांनी आपले अनुभवकथन केले. उत्कृष्ट कामगिरी, उपस्थिती आणि मेहनतीसाठी विद्यार्थ्यांना पुरस्कार प्रदान करण्यात आले.

शेवटी रंगतदार फॅशन शो आणि उत्साहात भर घालणाऱ्या के-पॉप रँडम प्ले डान्सने संपूर्ण वातावरण जल्लोषमय झाले. इंडो-कोरियन सेंटर भाषिक, सांस्कृतिक आणि करिअर-केंद्रित कार्यक्रमांचा विस्तार करत असून, पुण्यातील वाढत्या के-कल्चर समुदायासाठी हे केंद्र महत्त्वाची भूमिका बजावत असल्याचे प्रास्ताविकात संजीब घटक यांनी नमूद केले.

पुणे -मुंढवा भूखंड घोटाळ्यातील आरोपी असलेल्या निलंबित तहसीलदाराने आपल्या कुटुंबीयांच्या नावे असलेली सुमारे 85.50 लाख रुपयांची थकबाकी रोख स्वरुपात भरली आहे. सामाजिक कार्यकर्ते विजय कुंभार व अंजली दमानिया यांनी या प्रकरणी एका सरकारी अधिकाऱ्याकडे एवढी रोख कशी आली? असा सवाल उपस्थित करत चौकशीची मागणी केली आहे. हा सरळ सरळ मनी लाँड्रिंगचा प्रकार असल्याचे ते म्हणालेत.

पुण्यातील मुंढवा भूखंड घोटाळ्याप्रकरणी उपमुख्यमंत्री अजित पवार यांचे सुपुत्र पार्थ पवार अडचणीत सापडले. त्यांच्या अमेडिया कंपनीवर 1800 कोटींची महार वतनाची जमीन अवघ्या 300 कोटींत घेतल्याचा आरोप आहे. या प्रकरणी पोलिसांनी ही जमीन अमेडियाला विकण्याचा प्रयत्न केल्याप्रकरणी शीतल तेजवानी नामक महिलेला अटक केली आहे. या प्रकरणात तहसीलदार सूर्यकांत येवले यांच्यावर निलंबनाची कारवाई करण्यात आली आहे. पण आता या प्रकरणाची चौकशी सुरू असतानाच सूर्यकांत येवले यांनी आपल्या कुटुंबीयांच्या नावे असलेली सुमारे 85.50 लाख रुपयांची थकबाकी रोख स्वरुपात भरल्याचे समोर आले आहे.

विजय कुंभार यांनी सोमवारी एका पोस्टद्वारे हा मुद्दा उजेडात आणला आहे. मुंढवा जमीन घोटाळ्यातील आरोपी, निलंबित तहसीलदार सूर्यकांत येवले यांने कुटुंबियांची पतसंस्थेची थकबाकी ₹85.50 लाख रोख भरले. मुंढवा प्रकरण सुरू असतानाच ही रक्कम भरली गेलीय. एका सरकारी अधिकाऱ्याकडे एवढी रोख रक्कम आली कुठून? हा सरळ सरळ भ्रष्टाचार आणि मनी लॉन्डरिंगचा प्रकार दिसतो! ED व सरकारने तात्काळ चौकशी करून दोषींना अटक करावी, असे ते म्हणालेत. कुंभार यांनी या प्रकरणी अंजली दमानियांसोबत प्रशासनाला एक निवेदन दिले आहे. त्यात त्यांनी या प्रकरणाच्या चौाकशीची मागणी केली आहे.
विजय कुंभार व अंजली दमानिया म्हणतात, पुण्यातील मुंढवा जमीन घोटाळा प्रकरणातील एक प्रमुख आरोपी पुण्यातील निलंबित तहसीलदार सूर्यकांत गुलाबराव येवले यांच्या कुटुंबातील दोन व्यक्तींची कर्ज खाती नागेश्वर नागरी सहकारी पतसंस्था मर्या., बावडा, ता. खंडाळा, जि. सातारा येथे आहेत.

1) चंद्रकांत गुलाबराव येवले, मु. पो. भोगाव, ता. वाई, जि. सातारा – कर्ज खाते क्र. 195/99 थकबाकी – 52.50 लाख
2) बाळकृष्ण जगू जाधव, मु. पो. खानापूर, ता. वाई, जि. सातारा – कर्ज खाते क्र. 295/132. थकबाकी – 33 लाख.

वरील दोन्ही खात्यांना आरोपी सूर्यकांत येवले हे जामीनदार आहेत. दोन्ही खात्यांची एकूण थकबाकी 85 लाख 50 हजार एवढी होती. दैनिक पुढारी व 7/12 यावरूनही सूर्यकांत येवले यांच्या दोन्ही मिळकतींवर जप्ती आदेशाने नागेश्वर नागरी सहकारी पतसंस्थेचा बोजा असल्याचे दिसते.

आमच्या माहितीनुसार, दिनांक 10 ते 17 ऑक्टोबर 2025 या कालावधीत सूर्यकांत येवले यांनी एकूण 85.50 लाख इतकी संपूर्ण रक्कम रोख स्वरुपात नागरी सहकारी पतसंस्थेत जमा केली असल्याचे दिसून येते.

या संदर्भात गंभीर शंका निर्माण करणारे मुद्दा पुढीलप्रमाणे –

एका सामान्य शासकीय अधिकाऱ्याने एवढी मोठी रक्कम रोख स्वरुपात कशी जमा केली?
सहकारी पतसंस्था एकाच व्यक्तीकडून एवढी मोठी रोख रक्कम कायद्याने स्वीकारू शकते का?
ही रक्कम मुंढवा जमीन घोटाळ्यातील गैरव्यवहारातून आली असण्याची शक्यता अत्यंत जास्त आहे. अशा स्वरुपातील व्यवहार काळा पैसा पांढरा करण्याचा (मनी लाँड्रिंग) गंभीर प्रयत्न असण्याची शक्यता आहे.

म्हणूनच आमची आपणास विनंती आहे की, सूर्यकांत येवले यांनी जमा केलेल्या 85.50 लाखांच्या मूळ स्त्रोताची अतिशय सखोल, निष्पक्ष चौकशी करण्यात यावी. या व्यवहारात सहभागी नागेश्वर नागरी सहकारी पतसंस्था, तिचे पदाधिकारी व कर्मचारी यांच्या भूमिकेची चौकशी करावी.

हा व्यवहार मुंढवा जमीन घोटाळ्यातील पैसे वळवण्यासाठी वापरला गेला का? याची स्वतंत्र चौकशी आर्थिक गुन्हे शाखा/ अंमलबजावणी संचालनालय (ईडी) मार्फत केली जावी.

सदर व्यवहारातील कोणतीही अनियमितता आढळल्यास संबंधित आरोपी, जामीनदार, तसेच संस्थेतील जबाबदार पदाधिकाऱ्यांवर कठोर कायदेशीर कारवाई करण्यात यावी. या गंभीर प्रकणातील आर्थिक बाबींमागे प्रचंड गैरव्यवहार, भ्रष्टाचार व मनी लाँड्रिंगचा ठोस व स्पष्ट संशय निर्माण होत आहे. त्यामुळे तत्काळ व प्रभावी कारवाई होणे अत्यावश्यक आहे. आपण याबाबत त्वरीत चौकशी करून सर्व संबंधितांवर फौजदारी गुन्हे दाखल करावेत ही विनंती, असे या पत्रात नमूद करण्यात आले आहे.

तंत्रज्ञानाचे हस्तांतरण ऑथेंटिक केमिकल्स अँड रिसर्च सेंटर, टेंभुर्णी यांना

पुणे:-सीएसआयआर- राष्ट्र्रीय रासायनिक प्रयोगशाळा (सीएसआयआर-एनसीएल), पुणे, यांनी ताडीत
आढळणाऱ्या क्लोरल हायड्रेट भेसळीचा त्वरित शोध घेण्यासाठी सोपे, जलद आणि वापरास सुलभ असे
क्लोरल हायड्रेट टेस्ट किट (सीएचटी-किट) विकसित केले आहे. या तंत्रज्ञानाचे व्यापारीकरणासाठी ऑथेंटिक
केमिकल्स अँड रिसर्च सेंटर (ACRC-TEM), टेंभुर्णी यांना हस्तांतरण करण्यात आले आहे.
ताडी हे ताडाच्या झाडांपासून मिळणारे नैसर्गिक किण्वित पेय असून, ते राज्य शासन मान्यताप्राप्त
दुकानांमधून विक्रीस उपलब्ध असते. ताडीत सामान्यतः ५–६ टक्के इथाइल अल्कोहोल तसेच आरोग्यदायी
नैसर्गिक घटक असतात. महाराष्ट्र शासनाने ताडीच्या गुणवत्तेबाबत वाढलेल्या चिंतेची दखल घेऊन, उत्पादन
शुल्क अधिकारी, ताडी पुरवठादार, सीएसआयआर-एनसीएलचे वैज्ञानिक व तज्ज्ञ यांचा समावेश असलेली
समिती स्थापन केली होती. समितीच्या अहवालात ताडीत क्लोरल हायड्रेट या भारतात विक्रीस बंदी
असलेल्या रासायनिक पदार्थाची मोठ्या प्रमाणावर भेसळ होत असल्याचे निष्पन्न झाले. अनेक नमुन्यांमध्ये
या रासायनिक द्रव्याचे अत्यंत धोकादायक प्रमाण आढळले.
क्लोरल हायड्रेट शरीरात गेल्यावर ते ट्रायक्लोरोइथॅनॉल (एक प्रभावी मध्यवर्ती मज्जासंस्था दमनकारी)
आणि ट्रायक्लोरोअॅसिटिक आम्ल (क्षारक संयुग) मध्ये रूपांतरित होते. हे रसायन त्वचेवर पुरळ, उलट्या,
पोटाचे विकार, अल्सर, अवयवांचे नुकसान तसेच कोमामध्ये जाण्यापर्यंत गंभीर दुष्परिणाम करतात.
क्लोरल हायड्रेट, ट्रायक्लोरोइथॅनॉल आणि ट्रायक्लोरोअॅसिटिक आम्ल ही तिन्ही संयुगे संभाव्य
कर्करोगजनक म्हणून ओळखली जातात.

सध्याच्या चाचणी पद्धतींमध्ये उत्पादन शुल्क अधिकाऱ्यांना विविध उपकरणे बाळगावी लागतात अथवा
नमुने प्रयोगशाळेत पाठवावे लागतात, ज्यामुळे अडचणी निर्माण होतात आणि निकालास विलंब होतो. ही
समस्या सोडवण्यासाठी सीएसआयआर-एनसीएलच्या वैज्ञानिकांनी व्यापक प्रयोग करून फील्ड लेव्हलवर
त्वरित तपासणी करता येईल असे सीएचटी-किट विकसित केले आहे.
सीएचटी-किटमध्ये विशिष्ट प्रमाणात मिश्रित अभिक्रियेचे द्रावण असते. ताडीच्या नमुन्यात क्लोरल हायड्रेट
≥ 10 mg/L प्रमाणात उपस्थित असल्यास किट तत्काळ गुलाबी रंग दर्शवते. गुलाबी रंग न दिसल्यास नमुना
क्लोरल हायड्रेट भेसळीपासून मुक्त असल्याची खात्री मिळते. या किटची कार्यक्षमता महाराष्ट्र सरकारच्या
फॉरेन्सिक सायन्स लॅबोरेटरी (FSL) ने प्रमाणित आणि मंजूर केली आहे.
सीएसआयआर-एनसीएलने हे किट महाराष्ट्र शासनाच्या राज्य उत्पादन शुल्क विभागातील अधिकाऱ्यांना
सादर केले असून, उत्पादन व पुरवठ्यासाठीचे तंत्रज्ञान ACRC-TEM, टेंभुर्णी यांना अधिकृतरीत्या
हस्तांतरित केले आहे. ताडीतील घातक क्लोरल हायड्रेट भेसळीचा जलद व परिणामकारक शोध घेण्यासाठी
सीएसआयआर-एनसीएलचे सीएचटी-किट हे एक अद्वितीय, कार्यक्षम आणि लोकांच्या आरोग्य व सुरक्षेसाठी
महत्त्वपूर्ण साधन ठरेल.