अखेरच्या फेरीतील 66 गुणांच्या जोरावर सहा फटक्यांनी विजय; कार्तिक शर्माला दुसरे स्थान

पुणे, 5 डिसेंबर 2021: अखेरच्या फेरीतील फोर अंडर 66 अशा अत्यंत प्रभावी कामगिरीच्या जोरावर नजीकच्या प्रतिस्पर्ध्यावर 6 फटक्याच्या अंतराने विजय मिळवताना चंदीगडच्या अभिजित सिंग चड्डा याने 40 लाख रुपये पारितोषिक रकमेच्या पुणे ओपन गोल्फ चॅम्पियनशिप मध्ये  विजेतेपदाचा मान पटकावला.पूना क्लब गोल्फ कोर्सवर पार पडलेल्या या स्पर्धेत अभिजित सिंग   चड्डा ने सलग तिसऱ्या फेरीत एकाही बोगीची नोंद न करता चमकदार कामगिरी केली.

30 वर्षीय अभिजित सिंग याने नजीकचा प्रतिस्पर्धी कार्तिक शर्मावर तिसऱ्या फेरीअखेर(63-65-64-66) एका फटक्याची आघाडी घेतली होती. चौथ्या फेरीअखेर चार बर्डीजची नोंद करताना अभिजितने एकूण 21-अंडर 258 अशा एकूण गुणसंख्येसह विजेतेपदावर शिक्कामोर्तब केले.

अत्यंत आव्हानात्मक परिस्थितीला यशस्वीपणे तोंड देताना अभिजित सिंग चड्डा  ने संपूर्ण आठवडाभर प्रभावी कामगिरी केली. पहिल्या फेरीतील पहिल्या होलनंतर झालेल्या बोगीची चूक त्याने पुढच्या 71 होलमध्ये होऊ दिली नाही. याच कामगिरीच्या जोरावर सहा वर्षातील पाहिले विजेतेपद पटकवताना अभिजित सिंग चड्डाने 6,46,600/-  रुपयांची पारितोषिक रक्कम पटकावली. या विजयामुळे पीजीटीआय मानांकन यादीत अभिजीतने नऊ क्रमांकानी प्रगती करताना 15व्या स्थानावर झेप घेतली.

गुरुग्रामचा युवा खेळाडू कार्तिक शर्माने(66-60-67-71) अशा कामगिरीसह या स्पर्धेत दुसरा क्रमांक पटकावला. तिसऱ्या फेरीअखेर केवळ एका फटक्याने पिछाडीवर असलेल्या कार्तिकला अखेरच्या फेरीतील 1-ओव्हर 71 अशा कामगिरीमुळे एकूण 15-अंडर264 अशा कामगिरीसह दुसऱ्या क्रमांकावर समाधान मानावे लागले. या अखेरच्या फेरीत त्याने एका बर्डीची नोंद केली असली, तरी दोन बोगी मुळे त्याने विजेतेपदाची संधी गमावली. तरीही डावखुऱ्या कार्तिक शर्मासाठी ही कामगिरी कारकिर्दीतील सर्वोत्तम ठरली.त्यामुळेच त्याला मानांकन यादीत सात क्रमांकानी प्रगती करून 18व्या स्थनावर झेप घेता आली. या मौसमात त्याने पाचव्यांदा पहिल्या10 क्रमांकात स्थान मिळवले आहे.

स्पर्धेच्या दुसऱ्या दिवशी सर्वोत्तम कामगिरी करणाऱ्या कोलकत्ताच्या सुनीत चौरसियाने सलग दुसऱ्या फेरीत चांगली कामगिरी करताना एकूण 13-अंडर 266 अशा गुणांसह तिसरा क्रमांक पटकावला. चौरसियाच्या 65 गुणांची बरोबरी चंदीगडच्या युवराज सिंग संधू (7- अंडर272) , बेंगळुरूच्या सी मुनियप्पा(3-अंडर 276), आणि गुरुग्रामच्याअंकुर चड्ड्या(2-ओव्हर 281)या खेळाडूंनी ही केली.

चौथ्या व अंतिम फेरीअखेर पूना क्लबच्या गोल्फ कोर्सवरील सर्वोत्तम कामगिरीचा निकष 70 गुण असा होता आणि ही फेरी वेळेवर सुरू झाली. परंतु पावसाचा अडथळा अखेरपर्यंत कायम राहिला.2010 आशियाई स्पर्धेतील रौप्य विजेत्या अभिजीत सिंगने पहिल्यापासून आपल्या प्रतिस्पर्ध्यावर वर्चस्व गाजवले. त्यातच नजीकच आव्हानवीर कार्तिकने सलग दुसऱ्या व तिसऱ्या होलला दोन चुका केल्यानंतर अभिजीतने त्याचा फायदा घेत आपली घौडदौड कायम राखली. पाचव्या व सहाव्या होलला 10फुटांवरून बर्डीची नोंद करताना त्याने तब्बल पाच फटक्यांची आघाडी मिळवली.

त्यानंतर, कार्तिकला ही आघाडी मोडता आली नाही. तसेच अभिजीतनेही सोळाव्या व सतराव्या होलला बर्डीची नोंद करताना तसेच तब्बल 66 फुटांवरून अचूक लक्ष वेध करताना आपली आघाडी वाढवत नेली आणि अखेर 6फटक्यांनी विजेतेपदाची निश्चिती केली.

फुटबॉल शौकीन आणि पंजाबी संगीताचा चाहता असणाऱ्या अभिजीतने आपल्या कामगिरीबद्दल आनंद व्यक्त करताना प्रतिकूल परिस्थितीत सातत्य राखता आल्याबद्दल समाधान व्यक्त केले. तो म्हणाला की, अंतिम फेरीत इतकी सातत्याने कामगिरी करता येईल, अशी मला अपेक्षा नव्हती. परंतु कार्तिकने सुरुवातीला केलेल्या चुकांचा फायदा मी घेतला त्यानंतर केवळ कमीतकमी चूका करणे इतकेच माझे लक्ष्य राहिले. त्यामुळे माझ्यावर दडपण ही नव्हते. गेल्या तीन स्पर्धांमध्ये मी दोनदा पहिल्या दहात व अकरावा क्रमांक पटकावला होता. या विजेतेपदामुळे मी प्रगती पथावर असल्याचे निश्चित झाले आहे.अखेरीच्या होलमध्ये लक्षवेध केल्यानंतर मला माझ्या सर्व परिश्रमाचे फळ मिळाल्याची भावना मनात आली आणि सर्वकाही जुळून येत असल्याचे पाहून मी समाधानचा निश्वास टाकला. माझ्या यशात माझा अनुभवी कॅडी राजू याचा मोठा वाटा आहे. त्याने संपूर्ण आठवडाभर अत्यंत व्यावसायिक व बिनचूक कामगिरी केली

बेंगळुरूच्या सईद साकीब अहमद(69)याने 9-अंडर270 अशी कामगिरी करताना चौथा क्रमांक पटकावला. पुण्याच्या खेळाडूंपैकी हौशी गोल्फपटू रोहन ढोले पाटीलने 75-67-68-70 अशा कामगिरी सह(एकूण 1-ओव्हर 280) संयुक्त 24वे स्थान मिळवले. तसेच, त्याने सर्वोत्तम हौशी खेळाडूचा करंडक ही पटकावला.

दिल्लीचा हौशी युवा खेळाडू कृष्णव चोप्रा हा भारताचा माजी क्रिकेटपटू निखिल चोप्राचा पुत्र असून त्यानेही 16व्या होलमध्ये होल-इन-वन अशी कामगिरी करताना एकूण 2-ओव्हर 281 अशा गुणांसह संयुक्त 26वेस्थान निश्चित केले.

पुणे,5 डिसेंबर 2021: महाराष्ट्र राज्य लॉन टेनिस संघटना(एमएसएलटीए) आणि डेक्कन जिमखाना यांच्या वतीने आयोजित आर्यन पंप्स आशियाई ज्युनियर(कुमार) टेनिस अजिंक्यपद स्पर्धेत  मुलांच्या गटात कोरियाच्या वोबीन शिन यांना, तर मुलींच्या गटात कझाकस्तानच्याआरझून सेगनडिकोव्हा यांना अग्रमानांकन देण्यात आले  आहे. 

डेक्कन जिमखाना टेनिस कोर्टवर सुरु असलेल्या या स्पर्धेस आज( डिसेंबर रोजी)मुख्य ड्रॉच्या सामान्यांना सुरुवात होणार आहे. मुलांच्या गटात कोरियाच्या वोबीन शिनने अव्वल मानांकन, तर भारताच्या निशांत दबसला दुसरे व थायलंडच्या तानापत निरुद्रोणला तिसरे मानांकन देण्यात आले आहे.  

मुलींच्या गटात तैपेईच्या यु-युन ली व भारताच्या श्रुती अहलावत यांना अनुक्रमे दुसरे व तिसरे मानांकन देण्यात आले आहे. 

खेळाडूंची मानांकन यादी खालीलप्रमाणे: मुले:वोबीन शिन(कोरिया), निशांत दबस(भारत), तानापत निरुद्रोण(थायलंड), अमन दहिया(भारत), मॅक्स बात्यूतेंको(कझाकस्तान), चिराग दुहान(भारत), डेनिम यादव(भारत), युवान नांदल(भारत)

मुली: आरझून सेगनडिकोव्हा(कझाकस्तान), यु-युन ली(तैपेई), श्रुती अहलावत(भारत), सारा साईतो(जपान), सेंदुगेस केंझीबायव्हा(कझाकस्तान), हायु किनोशिता(जपान), झेनल रुस्तमोव्हा(कझाकस्तान), सुहिता मारूरी(भारत).  

पुणे – 1971 चा भारत पाकिस्तान युद्धातील भारताचा विजय म्हणजे अनेक दशकांनंतर भारताने खरा पहिला निर्णायक विजय पंतप्रधान इंदिरा गांधी यांच्या कणखर नेतृत्वाखाली  मिळवला. हा विजय म्हणजे जशी लोकशाहीची ताकद आहे तशी देशाला ओळख देणार्‍या व एकत्र ठेवणार्‍या राज्य घटनेचीही ताकद आहे. भारतीय सैन्य, हवाई दल आणि नौदल यांच्या प्रभावशाली एकत्रित कामगिरीचे प्रत्येकाने कौतुकच  केले पाहिजे असे सांगून काँग्रेसचे ज्येष्ठ नेते व महाराष्ट्राचे माजी मुख्यमंत्री पृथ्वीराज चव्हाण यांनी सुवर्ण विजय व्दीसप्ताह अतिशय कल्पकतेने साजरा करीत असल्याबाबत याचे संयोजक आबा बागूल यांचे कौतुक  व अभिनंदन केले. पुणे मनपा काँग्रेसचे गटनेचे आबा बागूल यांच्या संकल्पनेतून 3 ते 16 डिसेंबर या काळात आयोजित सुवर्ण विजय व्दीसप्ताहमधील चित्रकारांच्या पेंटिंग उदघाटन प्रसंगी ते बोलत होते. या प्रसंगी लेफ्टनंट जनरल एस. एस. मेहता (निवृत्त), ब्रिगेडिर अजित आपटे (निवृत्त) व ज्येष्ठ व्यंगचित्रकार चारूहास पंडित प्रमुख पाहुणे म्हणून उपस्थित होते. पुण्याच्या जंगली महाराज रस्त्यावरील संभाजी उद्यानाबाहेरील पदपथावर पुण्यातील सुमारे 25 नामवंत चित्रकारांनी इंदिरा “गांधी आणि 1971 चे युद्ध” या विषयावर पेंटिंग्ज काढली. सकाळी 7 ते सायंकाळी 5 या काळात हे चित्रकार आपल्या कुंचल्यातून चित्रे साकारत असताना ती बघण्यासाठी शेकडो पुणेकरांनी गर्दी केली होती.सुवर्ण विजय व्दीसप्ताहातील चित्रकारांच्या या अभिनव उपक्रमाच्या उदघाटन प्रसंगी या संकल्पनेचे जनक पुणे मनपा काँग्रेसपक्ष गटनेते आबा बागूल यांनी सर्वांचे स्वागत व सत्कार केला. आबा बागुल म्हणाले की, सुवर्ण विजय व्दीसप्ताह आयोजित करताना चित्रकारांनी पंतप्रधान इंदिरा गांधी व 1971 चे युद्ध या विषयावर थेट सादरीकरण करायची अभिवन कल्पना आम्ही येथे साकारली आहे. या युद्धातील विजयाची व सैन्य दलाच्या पराक्रमाची माहिती युवा पिढीपर्यंत जावी यासाठी असे कार्य क्रम आयोजित केले आहेत.

लष्कर आणि जनता यांना एकमेकांशी संवाद करण्याची फारशी संधी नसते त्यामुळे अनेक निवृत्त सैन्य अधिका-यांना या व्दीसप्ताहात आवर्जून निमंत्रित केले आहे असे सांगून आबा बागूल यांनी चित्रकार चित्र साकरताना ते बघायला आलेल्या शेकडो पुणेकरांचेही आभार मानले.या प्रसंगी बोलताना लेफ्टनंट जनरल एस.एस. मेहता (निवृत्त) यांनी आबा बागूलांच्या पुढाकाराने साजरे होणार्‍या सुवर्ण विजय व्दीसप्ताहाचे कौतुक करून म्हटले की, पाकिस्तान बरोबर झालेल्या युद्धात भारताने निर्णायक विजय मिळवला.  हे युद्ध म्हणजे नरसंहार, क्रूरता विरूद्ध मानवता यांच्यातील युद्ध होते. हा देशाचा विजय आहे. देशवासीयांचा विजय आहे असे मी मानतो. देशाचे सैन्यदल, देशवासीय जनता आणि राजकीय व्यवस्था (लोकशाही) हे तिन्ही घटक एकत्र आल्यामुळे आपण हा निर्णायक विजय मिळवला. त्यामुळे हा लोकशाहीचा विजय आहे, असे ते म्हणाले. 

या प्रसंगी ब्रिगेडियर अजित आपटे (निवृत्त) यांनी आपल्या कुटुंबाच्या चार पिढ्या सैन्य दलात आहेत असे सांगून म्हटले की, 1971 युद्धात माझे वडिलही लष्करात ब्रिगेडियर होते. मी सुद्धा नुकताच सैन्यदलात प्रवेश केला होता. मला या युद्धात भाग घेण्याची संधी मिळाली असे सांगून ते म्हणाले की, माझे बंधू प्रदीप आपटे हे हवाईदलात होते व त्यांनी चांगले शौर्य गाजवले पण पाकिस्ताने त्यांचे विमान पाडले आणि छळ करून त्यांना ठार केले. आपण मात्र 1971 युद्धात शरण आलेल्या 93000 पाकिस्तानी सैनिकांना चांगली वागणूक देऊन परत पाठवले. हीच भारताच्या सुसंकृत सैन्याची ओळख आहे, असे ते म्हणाले.या प्रसंगी ज्येष्ठ व्यंगचित्रकार चारूहास पंडित म्हणाले की, या युद्धाच्यावेळी मी चिंटूच्या वयाचा होतो. त्यावेळी वर्तमानपत्र आणि रेडिओ ही महितीची माध्यमे होती. या युद्धानंतर या विजयावर व्यंगचित्रांची पुस्तके निघाली होती आणि त्यातील अनेक पुस्तकातील मी सर्व व्यंगचित्रे त्यातील संवादासह पुन्हा काढली आहेत.या कार्यक्रमाचे सूत्रसंचलन घनश्याम सावंत यांनी केले. शिक्षण मंडळाच्या माजी अध्यक्षा संगीता तिवारी यांनी आभार प्रदर्शन केले. राष्ट्रगीत होऊन कार्यक्रम संपला. या कार्यक्रमास माजी महापौर कमल व्यवहारे, नगरसेविका लता राजगुरू, गोपाळ तिवारी, रोहित टिळक, मुकतार शेख, नरेंद्रपालसिंग बक्षी, सौ जयश्री बागुल, अमित बागुल यांसह अनेक मान्यवर उपस्थित होते. चित्रकारांच्या या कलाकृती शिवदर्शन येथील वसंतराव बागूल उद्यानातील भारतरत्न पंडित भीमसेन जोशी कलादालनात 18 डिसेंबरपर्यंत बघण्यास नागरिकांना उपलब्ध असतील.

छोटी छोटी संस्थाने, राज्ये, व्यापक भारतवर्ष, हिंद, हिंदी आणि हिंदू …पराभवांची मालिका , 65 चा करार- ड्रॉ, 1971 चा विजय, आणि तरीही बांगला देशाला दिलेला स्वतंत्र राष्ट्राचा दर्जा,आणि आजची आर्थिक स्थिती … यावर पृथ्वीराज चव्हाण यांची अत्यंत मार्मिक विधाने अवघ्या शेवटच्या 9 मिनिटात..

पुणे : जयंत पाटील केवळ जलसंपदा मंत्रीच नाही तर प्रथम ते राष्ट्रवादीचे प्रदेशाध्यक्ष आहेत हे आज त्यांनी दाखवून दिले आणि पुण्याचा महापौर पाणी कपातीच्या जलसंपदा च्या आदेशावरच बोलण्यासाठी तासभर प्रतीक्षा करत असताना, त्यांनी आपल्या पक्षाच्या पदाधिकाऱ्यांना भेटून पत्रकार परिषद घेऊन पुण्याची पाणी कपात करण्याचा निर्णय संपूर्णतः मागे घेतली पुणेकरांच्या रोषाला आता सामोरे जावे लागेल हे त्यांच्या लक्षात आल्यानेच त्यांनी हा निर्णय घेतला आणि देवेंद्र फडणविसांवर राजकीय टिप्पणी केली असा दावा पुण्याचे महापौर मुरलीधर मोहोळ यांनी येथे केला . एकंदरीत या प्रकरणी चुकीचे आदेश काढून , पोलीस बंदोबस्तात पाणी कपात करा असे शब्द टाकून , नंतर पुण्याच्या महापौरांना टाळून जयंत पाटील यांनीच हे राजकारण केल्याची अप्रत्यक्ष टीका महापौरांनी केली आहे.

ते म्हणाले,’ पुण्याच्या पाणी प्रश्‍नावर जलसंपदा मंत्री जयंत पाटील यांची वेळ घेऊन पाच वाजता सिंचन भवन येथे गेलो, तासभर वाट पाहिली. त्यांनी राष्ट्रवादीच्या पदाधिकाऱ्यांची बैठक घेऊन थेट पत्रकार परिषदेला गेले.त्यामुळे मी सिंचन भवन येथून निघून आलो. माझ्या वैयक्तीक कामासाठी नाही तर पुणेकरांचा प्रतिनिधी म्हणून त्यांना पूर्वकल्पना देऊन भेटण्यासाठी गेलो होते. तरीही भेट झाली नाही, ” अशा शब्दात महापौर मुरलीधर मोहोळ यांनी नाराजी व्यक्त केली.दरम्यान पुणेकरांच्या दबावामुळे भितीपोटी जलसंपदा मंत्र्यांनी पाणी कपात रद्द केली याचे आम्ही स्वागत करतो, असा खोचक टोला मोहोळ यांनी लावला.जयंत पाटील यांनी भाजपवर केलेल्या आरोपांमध्ये मला जायचे नाही, पण दोन दिवसांपूर्वी तुमच्या खात्याने आदेश काढून पोलिस बंदोबस्तात पाणी कपात करणार असल्याचे सांगितले. तरीही पाणी कपातीचा कोणताही प्रस्ताव नव्हता असे मंत्री सांगत आहेत. हे राजकारण सुज्ञ पुणेकर बघत आहेत. भामा आसखेडचे पाणी मिळाले म्हणून खडकवासल्याचे पाणी कपात केले जात आहे, यात देवेंद्र फडणवीस यांच्यावर टीका करायचा काय संबंध, वड्याचे तेल वांग्यावर काढत असल्याची टीका मोहोळ यांनी केली.

पुणे : सावित्रीबाई फुले पुणे विद्यापीठ पुणे शहर विभागीय क्रीडा समिती व पूना कॉलेज कॅम्प पुणे यांच्या संयुक्त विद्यमाने आयोजित आंतरमहाविद्यालयीन बॉक्सिंग स्पर्धेत पूना कॉलेजने ५ सुवर्णपदके पटकाविली. यामध्ये मिनाज शेख, आलिया सय्यद, मोहित सिंग भोदोरिया, रोहन पंढरे, अहुजी अनिल रामा यांनी सुवर्णपदक पटकाविले.

मथुरावाला बॉक्सिंग रिंग येथे ही स्पर्धा पार पडली. या स्पर्धेच्या उद्घाटनप्रसंगी पुना कॉलेजचे प्राचार्य डॉ. आफताब अन्वर शेख, नगरसेवक विनोद मथुरावाला, दादोजी कोंडदेव पुरस्कार विजेते अजित सिंग कोचर, महाराष्ट्र बॉक्सिंग संघटनेचे उपाध्यक्ष भरतकुमार व्हावळ, आंतरराष्ट्रीय प्रशिक्षक विजय गुजर, पुणे शहर विभागीय क्रीडा समिती सचिव मनीषा कोंढरे, शांताराम ढमाले, आयोजक सचिव डॉ. आयाज शेख, प्रा. इमान पठाण प्रा. आशद शेख उपस्थित होते

विजेते पुरुष:- अजय शिर्के- मॉडर्न कॉलेज शिवाजीनगर –प्रथम (४६-४८ किलो)

मोहित सिंग भौदोरीया -पूना कॉलेज-प्रथम, परशुराम पगारे -नौरोजी वाडिया कॉलेज-द्वितीय (४८-५१ किलो)
संकेत गौड-नौरोजी वाडिया कॉलेज–प्रथम, राज जाधव -शिवछत्रपती आर्ट्स कॉलेज-द्वितीय (५१-५४ किलो)
साहिल पाटणवाला -एम ए रंगूनवाला कॉलेज-प्रथम, प्रतिक मस्के- सेंट विन्सेंट-द्वितीय (५४-५७ किलो)

अनिल रामा अहुजी. पूना कॉलेज-प्रथम, कार्तिक राजपूत –  मॉडेल कॉलेज-५-द्वितीय (६०-६३.५)
रोहन पंढरे -पूना कॉलेज-प्रथम, मुस्तफा तांबोळी- ऑल इंडिया श्री शिवाजी मेमोरियल कॉलेज ऑफ इंजीनियरिंग-द्वितीय (६३.५-६७ किलो)

महिला:-
मीनाज शेख (पुना कॉलेज) -प्रथम, प्राजक्ता ताडे (पूना कॉलेज) द्वितीय (४५-४८ किलो)

जाधव वैष्णवी अनिल( स.प.कॉलेज)-प्रथम परदेशी योगिता कैलाश(नेस वाडिया) द्वितीय – (४८-५० किलो)

आर्या कुलकर्णी ( एम एम सी सी कॉलेज) -प्रथम, पिंकी चव्हाण (सरहद कॉलेज) द्वितीय (५०-५२ किलो)

अलीया सय्यद (पूना कॉलेज) -प्रथम, नृता शहा (बी.एम.सी.सी.कॉलेज) द्वितीय (५२-५४ किलो)

पुणे : “पंडित नेहरूंनी दूरदृष्टी ठेवून निवडणूक आयोग, नियोजन आयोग, मतदानाचा अधिकार, संशोधन संस्था, सार्वजनिक क्षेत्राची बांधणी केली. विकासाची धोरणे राबवत देशाला आकार दिला. इंदिरा गांधी यांनी आपल्या खंबीर नेतृत्वाने देशाला सर्वार्थाने सक्षम बनवले. राजीव गांधी यांनी तंत्रज्ञान आत्मसात करत भारताला तरुण व अद्ययावत बनवले. सत्तर वर्षात काँग्रेसने केलेल्या विकासाचा, उभारलेल्या संस्थांचा, धोरणांचा विध्वंस करण्याचे काम नरेंद्र मोदी करत आहेत. खासगीकरण आणि केवळ शब्दांचा खेळ करून गेल्या सात वर्षात मोदी सरकार केवळ विध्वंसक गोष्टींचा उत्सव साजरा करण्यात दंग आहे,” असे प्रतिपादन ज्येष्ठ संपादक खासदार कुमार केतकर यांनी केले. मोदी आणि भक्तमंडळी ‘देशाला २०१४ मध्ये स्वातंत्र्य मिळाले आणि भारत भ्रष्टाचारमुक्त झाला’, अशा अविर्भावात वावरत असल्याची खोचक टीकाही त्यांनी केली. 
अखिल भारतीय काँग्रेस पक्षाच्या अध्यक्षा खासदार सोनिया गांधी यांच्या वाढदिवसानिमित्त आयोजित सेवा-कर्तव्य-त्याग सप्ताहात ‘७० वर्ष आणि ७ वर्ष’ या विषयावरील व्याख्यानात कुमार केतकर बोलत होते. कार्यक्रमाच्या अध्यक्षस्थानी राज्याचे माजी मुख्यमंत्री पृथ्वीराज चव्हाण होते. यावेळी काँग्रेसच्या महाराष्ट्र सह-प्रभारी सोनलबेन पटेल, संयोजक माजी आमदार मोहन जोशी, शहराध्यक्ष रमेश बागवे, प्रदेश कमिटीचे संजय बालगुडे, वीरेंद्र किराड, माजी आमदार दीप्ती चवधरी, माजी महापौर कमल व्यवहारे, नगरसेवक अजित दरेकर, सुजाता शेट्टी, रफिक शेख, शेखर कपोते, प्रशांत सुरसे, चेतन अग्रवाल आदी उपस्थित होते.
कुमार केतकर म्हणाले, “भारतीय राज्यघटना देशाला समर्पित करत काँग्रेसने लोकशाही रुजवण्याचे काम केले. भविष्याचा वेध घेत नेहरूंनी अर्थव्यवस्थेला प्रगतीपथावर घेऊन जाणारे निर्णय घेतले. बँकांचे राष्ट्रीयीकरण, लोकांना स्वतःच्या पायावर उभे करण्यासाठी राबवलेल्या योजना, विविध शैक्षणिक-संशोधन, सामाजिक व सांस्कृतिक संस्थांची उभारणी या काळात झाली. आज या सर्व संस्थांचा, काँग्रेसच्या काळात झालेल्या विकासाचा लाभ घेत मोदी आणि त्यांच्या सरकारमधील लोक ‘काँग्रेसने सत्तर वर्षात काय केले?’ हा प्रश्न बालिशपणे विचारत आहेत. गांधी-नेहरू कुटुंबावर घराणेशाहीचा आरोप करताना त्यांचा त्याग ही मंडळी विसरतात, हे दुर्दैव आहे.”
“नियोजन आयोग बरखास्त करणे, सरकारी संस्थांचे खासगीकरण करणे, नोटबंदीसारखा निर्णय लादणे अशा कितीतरी विध्वंसक गोष्टी या सात वर्षात झाल्या आहेत. इतिहास आणि भूगोल या दोन्हीचा अभाव असलेले मोदी आज गांधींना चांगले म्हणतात, तर नेहरूंवर टीका करतात. हा दुटप्पीपणा २०२४ नंतर कदाचित संपले आणि ते गांधींवरही टीका सुरु करतील. विध्वंसक गोष्टी अंगाशी येताहेत, असे जाणवले की काँग्रेसवर खापर फोडायचे ही रणनीती आहे. भाजपला, संघालाही मोदी नकोसे आहेत. पण त्यांचा नाईलाज होतोय. खोटी आकडेवारी, लबाड धोरणे राबवून जनतेची फसवणूक करण्याचा सपाटा यांनी लावला आहे. शेतकरी आंदोलनावरून आंतरराष्ट्रीय स्तरावर मोदींची नाचक्की झाली आहे. २०१४ मध्ये भ्रष्टाचाराविरोधात आंदोलन करणारे अण्णा हजारे आज झोपले आहेत, अरविंद केजरीवाल यांना जनलोकपालचा विसर पडला आहे,” असेही केतकर यांनी नमूद केले.
पृथ्वीराज चव्हाण म्हणाले, “काँग्रेसची विकासाची विचारधारा, परंपरा पुढे नेण्याचे काम सोनियाजीनी केले. सामान्य कार्यकर्त्यांवर विश्वास टाकून काम करण्याची संधी देण्याचा त्यांचा स्वभाव आहे. काँग्रेस कमिटी, केंद्रात राज्यमंत्री आणि पुढे राज्याचा मुख्यमंत्री म्हणून मला काम करत आले. पंतप्रधान कार्यालयात समन्वय साधण्याची आणि काँग्रेस कमिटीत त्यांना रिपोर्ट करण्याचे काम करायचो. सोनियजींबद्दल अनेकदा गैरसमज पसरवले जातात. मात्र, त्यांनी कधीही आपली मते लादली नाहीत. पंतप्रधान पदाचा कटाक्षाने त्यांनी सन्मान ठेवला. युपीए आणि मनमोहन सिंग सरकार उभारणीत सोनिया गांधी यांचे मोलाचे योगदान होते. मात्र, त्यांनी कधीही सरकारच्या कामात हस्तक्षेप केला नाही. मोदींनी निर्णयप्रक्रियेत एकाधिकारशाही आणली आहे. सात वर्षात सत्तर वर्षाच्या भरीव कामाची वाट लावणाऱ्या या मोदी सरकारला सत्तेपासून दूर करण्याची गरज आहे.”
प्रास्ताविक मोहन जोशी यांनी सांगितले. सूत्रसंचालन संजय बालगुडे यांनी केले. आभार प्रवीण करपे यांनी मानले.