महाराष्ट्रातील पदाधिकारी ठरवणार पुढील दिशा –

 पुणे-मातंग समाजावर वारंवार होणा-या जिवघेणे व जुलमी अत्याचाराला थांबविण्याकरीता  मातंग समाजाच्या प्रमुख कार्यकर्त्यांची व नेत्यांच्या राज्यव्यापी बैठकीचे आयोजन 28 मे रोजी  पुण्यात करण्यात आले आहे .         

या राज्यव्यापी बैठकीचे आयोजन मातंग एकता आंदोलन या सामाजिक संघटनेच्या वतीने करण्यात आले आहे .या बैठीकाला माजी मंत्री रमेश बागवे प्रमुख मार्गदर्शक म्हणून उपस्थित राहणार आहेत.  असे सांगून आयोजकांनी सांगितले कि,’    फुले ,शाहू, आंबेडकर, छत्रपती शिवाजी महाराज यांच्या पावनभुमी महाराष्ट्र राज्यामध्ये मोठ्या संख्येने असलेल्या मातंग समाजावर सध्याच्या काळात वारंवार अन्याय, अत्याचार जुलमी व जिवघेणे हल्ले त्याच बरोबर माता भगिनींवर शाररीक व मानसिक अत्याचार होत असून त्यामध्ये दिवसेंदिवस वाढ होत चालली आहे.डॉ. बाबासाहेब आंबेडकरांनी दिलेल्या संविधानाची कास धरून फुले, शाहू. अण्णाभा साठे यांच्या विचाराने महाराष्ट्र प्रामाणिकपणे व कष्टमय जिवन जगत असलेल्या समाजावर मागील काळात व सदयस्थितीत अनेक अन्याय अत्याचार होत आहेत. यामध्ये मातंग समाजाचे प्रेत जाळू न देणे, महिला भगिनींवर शाररीक व मानसिक अत्याचार वाढत आहेत. अनेक तरुणाचे नाहक बळी घेतले जात आहेत.
यामध्ये सदयस्थितीतील औरंगबादची मनोज आव्हाड यांना बांधून अमानूष जिवे मारण्याची घटना अशा अनेक घटना या महाराष्ट्रात घडत आहेत. यामुळे आज मातंग समाजाला स्वातंत्र्य मिळाले आहे की नाही असे संपुर्ण मातंग समाजाला वाटू लागत आहे. छत्रपती शिवाजी महाराजा सारखे अन्याया विरोधात लढणारे राजे या महाराष्ट्राचे खरे राज्यकर्ते होते. तथापी सध्याचे राज्यकर्ते मातंग समाजावर होणा-या अन्याय अत्याचाराला खतपाणी घालत आहेत असेच वाटू लागले.   हे अन्याय अत्याचार यापुढे आपणच थांबवायचे असा निर्धार मातंग समाजाने केला असून हे जुलमी अन्याय अत्याचार कशा प्रकारे थांबवायचे यावर विचार विनिमय करण्याकरीता मांतग एकता आंदोलनाचे राज्याचे संस्थापक अध्यक्ष गृहराज्य मंत्री रमेश बागवे यांच्या अध्यक्षते खाली व कार्याध्यक्ष नगरसेवक अविनाश बागवे यांच्या नेतृत्वात व मार्गदर्शनामध्ये राज्याच्या जिल्हाध्यक्ष, तालुकाध्यक्ष व प्रमुख पदाधिका-यांची दिशा दर्शक महत्वाची बैठक जनरल अरुणकुमार वैदय स्टेडियम भवानी पेठ पुणे ४२ येथे २८/०५/२०२२ रोजी दुपारी १२ वाजता. आयोजित केली आहेअशी माहिती महाराष्ट्र राज्य समन्वयक विठ्ठल थोरात ,अरुण गायकवाड ,संजय साठे यांनी दिली आहे .

पुणे- सारसबागेतील पावभाजी स्टॉल च्या अतिक्रमणांवर झालेली कारवाई चुकीची असा दावा करत राष्ट्रवादीचे शहर अध्यक्ष प्रशांत जगताप आणि नगरसेविका अश्विनी कदम यांनी महापालिका आयुक्त विक्रमकुमार यांची भेट घेऊन अतिक्रमण कारवाई करून हे व्यवसाय सिल करणे चुकीचे आहे. त्याऐवजी पुणे महानगरपालिकेने या ठिकाणी खाऊ चौपाटी विकसित करावी व सर्व व्यावसायिकांना जागा ठरवून देत त्याप्रमाणे कर लावण्यात यावा व पुन्हा ही चौपाटी सुरू करण्यात यावी अशी मागणी केली .

या संदर्भात राष्ट्रवादीच्या प्रसिद्धी पत्रकात म्हटले आहे की, पुणे शहरातील प्रत्येक व्यक्तीसाठी सारस बागेत असणारी चौपाटी हे कधी ना कधी भेट दिलेले हे कधी ना कधी भेट दिलेले ठिकाण आहे. पुणे महानगरपालिकेच्या कॉफीटेबल बुकमध्ये अभिमानाने सारसबाग चौपाटी चे नाव “प्राईड ऑफ पुणे” म्हणून समाविष्ट करण्यात आलेले आहे. असे असताना पुणे महानगरपालिकेत ने अतिक्रमण विरोधी कारवाई करत संपूर्ण चौपाटी सिल केली आहे. मुळात सारसबाग चौपाटी ही ज्या रस्त्यावर आहे, त्या रस्त्यावर कुठलीही रहदारी नाही, इतर कुठल्याही मोठ्या वाहनांची ये-जा होत नाही. त्या रस्त्याला जर गेल्या ६० वर्षांपासून असणाऱ्या चौपाटीवर अचानकपणे झालेली कारवाई चुकीची आहे. येथे व्यवसाय करणारे व्यवसायिक गेल्या ६० वर्षांपासून या ठिकाणी आपला व्यवसाय करतात. त्यांची दुकाने अशी अचानक पणे सिल करणे देखील चुकीचे आहे. त्याऐवजी पुणे महानगरपालिकेने या ठिकाणी चौपाटी विकसित करावी व सर्व व्यावसायिकांना जागा ठरवून देत त्याप्रमाणे कर लावण्यात यावा व पुन्हा ही चौपाटी सुरू करण्यात यावी अशी विनंती निवेदनाद्वारे पुणे महानगरपालिका आयुक्त श्री.विक्रम कुमार यांना करण्यात आली. याबाबत येत्या गुरुवारी २६ मे रोजी मा.आयुक्तांच्या दालनात याबाबत बैठक आयोजित करत या प्रश्न सोडविणार असल्याचे पुणे महानगरपालिका आयुक्त विक्रमकुमार यांनी सांगितले.
“निश्चितच राष्ट्रवादी काँग्रेस पार्टी या सर्व स्टॉलधारकांच्या पाठीशी आहे, कारण या स्टॉलवर येणारा ग्राहक हा सर्वसामान्य पुणेकर असतो.त्या सर्वसामान्य पुणेकरांसाठी असणारी ही चौपाटी वाचली पाहिजे , हीच राष्ट्रवादी काँग्रेस पार्टीची भूमिका आहे.पुणे शहरात महानगरपालिकेकडून सुरू असलेली अतिक्रमण विरोधी कारवाईमुळे बऱ्याच ठिकाणी व्यवसायिक अडचणीत आले आहेत, अगोदरच कोविडच्या काळात २ वर्ष सर्वांचे व्यवसाय बंद होते.ते पुन्हा सुरू झाले असतानाच आता पुन्हा अतिक्रमण विरोधी कारवाई सुरू करण्यात आली आहे. या सर्वच ठिकाणी सामंजस्याने मार्ग काढला गेला पाहिजे. शहराला शिस्त लावत असतानाच शहरातील व्यवसायिक अडचणीत येऊ नयेत ही आमची प्रामाणिक मागणी आहे”,असे मत शहराध्यक्ष श्री. प्रशांत जगताप यांनी व्यक्त केले.
समवेत स्थायी समितीच्या माजी अध्यक्षा सौ. अश्विनी कदम व सारसबाग चौपाटीतील व्यवसायिक देखील उपस्थित होते.

पुणे, 23 मे 2022:  मुंबई उपनगर टेनिस संघटना यांच्या वतीने आयोजित व सुहाना प्रायोजितएमएसएलटीए सुहाना स्मार्ट 10वर्षांखालील टेनिस सर्किट या स्पर्धेच्या मुंबई लीग स्पर्धेत मुलींच्या गटात मुंबईच्या तमन्ना नायर हिने  तर, मुलांच्या गटात मुंबईच्या आरव छल्लाणी या खेळाडूंनी आपापल्या प्रतिस्पर्ध्यांचा पराभव करून विजेतेपद संपादन केले. 
प्रकटेनिस अंधेरी येथील टेनिस कोर्टवर पार पडलेल्या या दोन दिवसीय स्पर्धेत मुलींच्या गटात अंतिम फेरीत दुसऱ्या मानांकित मुंबईच्या तमन्ना नायरने अव्वल मानांकित पुण्याच्या सृष्टी सूर्यवंशीचा 4-0, 2-4, 5-3असा तीन सेटमध्ये संघर्षपूर्ण पराभव करून विजेतेपदाचा मान पटकावला. तमन्ना हि सुलोचनादेवी सिंघानिया शाळेत शिकत आहे. याआधीच्या उपांत्य फेरीच्या लढतीत अव्वल मानांकित सृष्टी सूर्यवंशीने पाचव्या मानांकित समीक्षा शेट्टीचा 6-0 असा तर, दुसऱ्या मानांकित तमन्ना नायरने तिसऱ्या मानांकित मायरा शेखचा 6-0 असा पराभव करून अंतिम फेरी गाठली. 
मुलांच्या गटात अंतिम फेरीत दुसऱ्या मानांकित आरव छल्लाणी याने अव्वल मानांकित अधिराज दुधानेचा 5-3, 4-0 असा पराभव करून विजेतेपदाला गवसणी घातली. आरव हा नेरुळ येथील दिल्ली पब्लिक शाळेत पाचवी इयत्तेत शिकत असून बिलीफ टेनिस अकादमीत प्रशिक्षक गोटेश अवस्थी यांच्या मार्गदर्शनाखाली सराव करतो. स्पर्धेचे पारितोषिक वितरण एमएसएलटीए सुपरवायझर सोनल वैद्य यांच्या हस्ते करण्यात आले.   
निकाल: मुली: उपांत्य फेरी: 
सृष्टी सूर्यवंशी[1] वि.वि.समीक्षा शेट्टी[5] 6-0; तमन्ना नायर[2]वि.वि.मायरा शेख[3] 6-0;अंतिम फेरी: तमन्ना नायर[2]वि.वि.सृष्टी सूर्यवंशी[1] 4-0, 2-4, 5-3;      
मुले: उपांत्य फेरी:
अधिराज दुधाने[1] वि.वि.वीर चतुर[3] 6-4आरव छल्लाणी[2] वि.वि.आरव शहा[15] 6-2;अंतिम फेरी: आरव छल्लाणी[2] वि.वि.अधिराज दुधाने[1] 5-3, 4-0. 

पुणे : देशात राहून देशासाठी काम करणारे अनेकजण आहेत. परंतु, देशासाठी प्राणाची आहुती जवान देत असतात. त्यांचे कुटुंबीय देखील देशासाठी त्यांचे प्राण अर्पण करण्याकरिता त्यांच्या मागे ठाम उभे राहतात, त्यामुळे त्यांचे बलिदान हे सर्वात मोठे आहे. बलिदानाचे मूर्तिमंत उदाहरण म्हणजे वीर माता व वीरा पत्नी आहेत. जवानांसाठी काही करायचे असेल तर त्यांच्या कुटुंबाच्या पाठीशी आपण भक्कमपणे उभे रहा, असे मत कर्नल प्रणय पवार यांनी व्यक्त केले.

भारत माता महिला मंडळ ट्रस्ट पुणे व इंडियन आर्मी आयोजित ‘अतूट बंधन – वीर नारी सन्मान’ सोहळ्याचे आयोजन पर्वती पायथ्या जवळील भारतमाता अभ्यासिकेच्या प्रांगणात करण्यात आले. कार्यक्रमात वीरमाता आणि वीरपत्नी यांचा सन्मान करण्यात आला. यावेळी भाजपा पुणे शहराध्यक्ष जगदीश मुळीक, बॅंक ऑफ महाराष्ट्रचे श्रीकांत कारेगावकर, आयोजिका प्रियांका शेंडगे शिंदे, माजी महापौर सरस्वती शेंडगे, राजाभाऊ शेंडगे, कालिदास शिंदे, राजाभाऊ तुंगतकर,आकाश मालोदे, तनिषा वाड आदी उपस्थित होते.

कर्नल प्रणय पवार म्हणाले, तुम्ही कधी काश्मिरला बॉर्डरवर गेलात तर तेथील माती घेऊन या आणि ती देवाऱ्यात ठेवा. त्याची पूजा करा आणि तुमच्या मुलांना सांगा की, एक देवळातला देव आणि दुसरा देव म्हणजे ही माती, ज्या मातीत जवानांनी प्राणाची आहुती दिली आहे. तुमच्या मुलांना प्रेरणा मिळावी यासाठी त्यांना काश्मीरच्या भूमीवर घेऊन जा आणि जवानांनी केलेला संघर्षाची प्रेरणादायी गोष्ट त्यांना सांगा, असेही त्यांनी सांगितले.

जगदीश मुळीक म्हणाले, देशाच्या सिमेवर राहून सैनिक देशाची रक्षा करतात. तर आपण देशात राहून देशासाठी काम केले पाहिजे. महापुरुषांचे विचार, जवानांच्या संघर्षगाथा पुढच्या पिढीला सांगितल्या पाहिजेत. महापुरूषांच्या विचारावर व सैनिकांची प्रेरणा घेवून आपल्याला देश घडवायचा आहे. जगात भारत विश्वगुरू म्हणून सिद्ध करायचा आहे.

प्रियांका शेंडगे शिंदे म्हणाल्या, देशाच्या सिमेवर सैनिक अहोरात्र लढत असतात. मृत्यू समोर येतो, तेव्हा ते स्वतः:च्या कुटुंबाचा नाही तर देशाच्या रक्षणाचा विचार करीत असतात. त्यामुळे देशाचे जवान हे खरे हिरो आहेत. त्यांच्यासाठी काही करायचे असेल तर त्यांच्या कुटुंबाचा आधार आपण झाले पाहिजे, असेही त्यांनी सांगितले. मृणमयी परळीकर व मयूर पाटील यांनी सूत्रसंचालन केले, राजाभाऊ शेंडगे यांनी आभार मानले.

पुणे,  23 मे 2022: फर्ग्युसन कॉलेज आणि नंदन बाळ टेनिस अकादमी यांच्या तर्फे आयोजित व एमएसएलटीए आणि एआयटीए यांच्या मान्यतेखाली होत असलेल्या डी.ई.एस. फर्ग्युसन कॉलेज एआयटीए चॅम्पियनशीप सिरीज 16वर्षांखालील  टेनिस अजिंक्यपद स्पर्धेत पहिल्या फेरीत मुलांच्या गटात पियुश जाधव, आशुतोष कवडेकर, अद्विक नाटेकर यांनी तर, मुलींच्या गटात ध्रुवा माने, आर्या शिंदे या खेळाडूंनी मानांकित खेळाडूंना पराभवाचा धक्का देत दुसऱ्या फेरीत प्रवेश केला.  
फर्ग्युसन कॉलेज टेनिस कोर्ट येथे सुरु असलेल्या या स्पर्धेत मुलांच्या गटात बिगरमानांकीत ध्रुवा मानेने दुसऱ्या मानांकित ईश्वरी मार्कंडेचा 6-4, 6-3 असा पराभव करून खळबळजनक निकालाची नोंद केली. आर्या शिंदेने आठव्या मानांकित दुर्गा बिराजदारचा 6-0, 1-6, 6-4 असा संघर्षपूर्ण पराभव करून आगेकूच केली. 
मुलांच्या गटात बिगरमानांकीत अद्विक नाटेकर याने सातव्या मानांकित देवेंद्र कुलकर्णीचा 6-3, 6-2 असा सरळ सेटमध्ये पराभव केला. आशुतोष कवडेकरने पाचव्या मानांकित आदित्य आयंगरचा टायब्रेकमध्ये 6-3, 7-6(3) असा पराभव केला. पियुश जाधवने सहाव्या मानांकित स्वराज ढमढेरेचा 6-2, 6-3 असा सहज पराभव करून दुसऱ्या फेरीत धडक मारली. 
निकाल: मुख्य ड्रॉ(पहिली फेरी): मुले:लक्ष गुजराथी[1] वि.वि.साहिल कोठारी 6-2, 6-2;
अनुज तशीलदार वि.वि.क्रिशांक जोशी 3-6, 6-1, 7-5;अवनीश चाफळे वि.वि.शिवम पडिया 6-3, 6-2;अद्विक नाटेकर वि.वि.देवेंद्र कुलकर्णी[7] 6-3, 6-2;अमोघ दामले वि.वि.देव तुराकिया 6-2, 6-1;आशुतोष कवडेकर वि.वि.आदित्य आयंगर[5] 6-3, 7-6(3);अर्चित धूत[8] वि.वि.कौशिक कोठा 6-2, 6-1;पियुश जाधव वि.वि.स्वराज ढमढेरे[6] 6-2, 6-3;ओमकार शिंदे वि.वि.मनन अगरवाल 6-1, 6-3;राघव अमीन[3] वि.वि.शार्दूल खवळे 6-1, 6-1;
मुली:श्रीया साई[1] वि.वि.आर्या हिरे 7-6(4), 6-3;श्रावणी देशमुख वि.वि.काव्या देशमुख 6-4, 6-2;रिद्धी शिंदे[7] वि.वि.श्रेया होनकन 6-3, 6-0;आर्या शिंदे वि.वि.दुर्गा बिराजदार[8] 6-0, 1-6, 6-4;भक्ती ताजने वि.वि.जान्हवी चौगुले 6-0, 6-1; ध्रुवा माने वि.वि.ईश्वरी मार्कंडे[2] 6-4, 6-3. 

बालेवाडीत खेळाडूंच्या सराव शिबिरास प्रारंभ

            पुणे दि.23: हरियाणा येथे ३ ते १३ जुन २०२२ या कालावधीत चौथ्या खेलो इंडिया युवा स्पर्धेसाठी २१ क्रीडाप्रकारात महाराष्ट्राचे ३५५ खेळाडु पात्र ठरले असून त्यांच्या सराव शिबिरास बालेवाडी येथील शिवछत्रपती क्रीडापीठ येथे प्रारंभ झाला आहे. स्पर्धेत १०८ प्रशिक्षक आणि पदाधिकाऱ्यांसह ४६३ सदस्यांचे पथक सहभागी होणार आहे.

            स्पर्धेच्या पूर्वतयारीसाठी आयोजित हे शिबिर ३१ मेपर्यंत चालणार आहे. तर काही स्पर्धेचे ७ जूनपर्यंत चालणार आहे. हरियाणातील पंचकुला या  मुख्य मैदानावर ही स्पर्धा होणार आहे. ४ जून रोजी स्पर्धेचे उदघाटन होणार असून १३ जून रोजी स्पर्धेची सांगता होणार आहे. बालेवाडीतील सराव शिबिरानंतर १ ते ८ जून या कालावधीत हे सर्व संघ हरियाणाकडे रवाना होतील. सायकल रोड रेस आणि आर्चरी हे संघ ८ जून रोजी म्हणजे सर्वात शेवटी हरियाणाला जातील. तोपर्यंत त्यांचे टप्प्याटप्प्याने बालेवाडीत सराव शिबिर सुरू राहणार आहे.

’खेलो इंडिया’त महाराष्ट्राची कामगिरी

            केंद्र शासनाच्या क्रीडा विभागांतर्गत देशातील प्रतिभावंत खेळाडूंचा शोध घेण्यासाठी खेलो इंडीया राष्ट्रीय क्रीडा स्पर्धांचे आयोजन २०१७-१८ पासून करण्यात येते. २०१७-१८ या वर्षी खेलो इंडिया क्रीडा स्पर्धेअंतर्गत पहिल्या राष्ट्रीय क्रीडा स्पर्धांचे आयोजन दिल्ली येथे करण्यात आले होते. या स्पर्धेत एकूण ३९७ खेळाडू १३ खेळ प्रकारांमध्ये सहभागी होऊन महाराष्ट्र राज्याने एकूण ३६ सुवर्ण,३२ रौप्य, ४३ कांस्य अशा एकूण १११ पदकांसह द्वितीय स्थान प्राप्त केले होते.

पुढील वर्षी २०१८-१९ मध्ये १७ व २१ वर्षाखालील मुले- मुली या गटाच्या एकूण १८ खेळ प्रकारांच्या द्वितीय राष्ट्रीय स्पर्धेचे आयोजन शिवछत्रपती क्रीडा संकुल बालेवाडी पुणे येथे करण्यात आले. या स्पर्धेत ७२९ खेळाडू व १६० पदाधिकारी असे ८९९ सदस्यांचे महाराष्ट्र राज्याचे पथक सहभागी झाले. राज्याने एकूण ८५ सुवर्ण, ६१ रौप्य ८१ कास्य अशा एकूण २२७ पदके संपादन करुन संपूर्ण देशातून एकूण पदक तालिकेमध्ये प्रथम स्थान प्राप्त केले.

गुवाहाटी येथे ९ ते २१ जानेवारी २०२० या कालावधीत झालेल्या तिसऱ्या खेलो इंडिया क्रीडा स्पर्धेत २० खेळांच्या राष्ट्रीय स्पर्धांचे आयोजन करण्यात आले. या स्पर्धेत एकूण १९ खेळ प्रकारात महाराष्ट्राचे ५९० खेळाडू पात्र ठरले. १४५ पदाधिकारी मिळुन एकुण ७३५ सदस्यांचे पथक सहभागी झाले. या स्पर्धेत महाराष्ट्र संघास १४७ सुवर्ण, १०७ रौप्य व १५४ कास्य असे एकुण ४०८ पदक महाराष्ट्राने मिळवले आहेत.

महाराष्ट्राचे अव्वल स्थान कायम ठेवण्याचा खेळाडूंचा निर्धार

खेलो इंडिया ही राष्ट्रीय स्तरावर घेतली जाणारी स्पर्धा आहे. त्यामुळे देशभरातील खेळाडूंमध्ये उत्साहाचे वातावरण आहे. गेल्या तीन वर्षांपासून या स्पर्धेवर महाराष्ट्रातील खेळाडूंनी अधिराज्य गाजवले आहे. राज्य शासनाच्या क्रीडा विभागाने दिलेल्या सुविधांमुळे खेळाडूंना अनेक क्रीडा प्रकारात चांगले यश संपादन करता आले आहे.. खो-खो, मल्लखांब, कबड्डी आणि कुस्ती या खेळात महाराष्ट्राला पदकांची अपेक्षा आहे. आतापर्यंत खेलो इंडियामध्ये महाराष्ट्र अव्वल राहिला आहे. याही वर्षी तो कायम राहण्याचा निर्धार खेळाडूंनी केला आहे. त्यादृष्टीने क्रीडानगरीत त्यांचा कसून सराव सुरू आहे.

सहभागी क्रीडा प्रकार

राज्यातील तब्बल २१ क्रीडाप्रकारातील संघ खेलो इंडिया स्पर्धेत सहभागी होणार आहेत. कंसात सहभागी खेळाडूंची संख्या कब्बडी (२४),  बॅडमिंटन (४), कुस्ती  (३३), गटका (१६), थांगता (५), योगासन (२२), वेटलिफ्टिंग (२०), जिम्नॅस्टिक (४५), सायकल ट्रॅक ( ६), शुटिंग (७), टेनिस (६), मल्लखांब (१२), जलतरण (२८), खो-खो (२४), बास्केटबॉल (१२), ॲथलेटिक्स (३६), टेबल टेनिस (८), बॉक्सिंग (१६), ज्युदो (१४), सायकल रोड रेस (६), आर्चरी (१२). असे २१ संघ स्पर्धेत उतरणार आहेत.

खेलो इंडियासाठी महाराष्ट्राचा कबड्डी संघ सज्ज

खेलो इंडियासाठी महाराष्ट्राचा मुलींचा कबड्डी संघ सज्ज झाला आहे. या स्पर्धेच्या तयारीसाठी बालेवाडीत सध्या त्यांचा सराव शिबिर सुरू आहे. मुलींच्या संघाने यंदा जय्यत तयारी केली आहे. हा संघ १८ वर्षांखालील असून ६५ किलो वजन गटात तो खेळणार आहे.

बालेवाडीत सराव शिबीरात तज्ज्ञांचे मार्गदर्शन

चौथ्या खेलो इंडीया क्रीडा स्पर्धेत सहभागी होणाऱ्या महाराष्ट्र संघाचे १३ दिवसांचा सराव शिबीर शिवछत्रपती क्रीडापीठ म्हाळुंगे बालेवाडी येथे सुरु आहे स्पर्धेसाठी सहसंचालक चंद्रकांत कांबळे, यांची समन्वयक अधिकारी तर उपसंचालक अनिल चोरमले पथक प्रमुख तसेच क्रीडा अधिकारी अरुण पाटील यांची मुख्य व्यवस्थापक म्हणून नियुक्ती करण्यात आलेली आहे. क्रीडा क्षेत्रातल्या चांगल्या मार्गदर्शकांच्या निरीक्षणाखाली खेळाडू तयारी करीत आहेत.

 ओमप्रकाश बकोरिया, क्रीडा आयुक्त राज्यातील उत्तम खेळाडूंना राज्याचे प्रतिनिधीत्व करण्यासाठी हरियाणाला पाठवित आहोत. खेळाडुंचा आत्मविश्वासही उंचावलेला आहे. खेलो इंडियाच्या गेल्या तीन स्पर्धांमध्ये  राज्याने अव्वल स्थान मिळवले आहे, यावर्षीदेखील प्रत्येक खेळाडू पूर्ण प्रयत्न करून राज्याला अग्रेसर ठेवण्यासाठी प्रयत्न करतील.

मेट्रो आणि वनविभागावर मिसाळ यांचे ताशेरे

पुणे, ता. २३ :तळजाई , पाचगांव पर्वती वन आराखड्यासाठी मंजूर करून आणलेला १३ कोटी रुपयांच्या निधीचा विनियोग वनीकरणासाठीच केला जाईल, वन विभागाने या ठिकाणी कॉंक्रिटिकरण किंवा सुशोभिकरणाचा प्रयत्न केला तर तो हाणून पाडू असा इशारा आमदार माधुरी मिसाळ यांनी दिला.

मिसाळ यांनी आज सकाळी तळजाई टेकडी वनक्षेत्रांत (पाचगांव पर्वती) भेट देऊन नागरिकांच्या समस्या जाणून घेतल्या. वन विभागाचे अधिकारी दीपक पवार, प्रदीप संकपाल, माजी नगरसेवक महेश वाबळे, साईदिशा माने, श्रीकांत जगताप, पर्वती भाजपचे अध्यक्ष जितेंद्र पोळेकर, सरचिटणीस प्रशांत दिवेकर, शैलेश देशपांडे, विश्वास ननावरे, सहकार नगर नागरीक मंचच्या तळजाई बचाव अभियानाचे अमित अभ्यंकर, पुरुषोत्तम दुरवास यांची प्रमुख उपस्थिती होती.

आमदार मिसाळ म्हणाल्या, पाचगांव पर्वती वनक्षेत्राच्या वनीकरणासाठी १३ कोटी रुपयांचा निधी मी पाठपुरावा करून मिळविला. या निधीतून टेकडीवर कॉंक्रिटिकरण आणि सुशोभिकरणाच्या कामांचा शुभारंभ वन विभागाने राज्यमंत्री दत्तात्रय भरणे यांच्या हस्ते केला. स्थानिक आमदार या नात्याने मला विश्वासात घेतले गेले नाही. गेली अनेक वर्षे या टेकडीवर वन संपदेचे संरक्षण आणि संवर्धनासाठी आम्ही नागरिकांसह प्रयत्न करीत आहोत. या नागरिकांमध्ये वन विभागाच्या प्रकल्पाबाबत प्रचंड नाराजीची भावना आहे. उपलब्ध निधीतून परिसरात मियावाकी वन, बांबू वन, उंच रोपवन या स्वरूपाची कामे केली जातील. केवळ परदेशी झाडांच्या जागेवर स्थानिक प्रजातींची झाडे लावण्यात येणार आहेत. येत्या पावसाळ्यात टेकडीवर मोठ्या प्रमाणात वृक्ष लागवड करण्यात येणार आहे. कॉंक्रिटिकरण किंवा सुशोभीकरणाचा प्रयत्न झाल्यास तो हाणून पाडू.

मिसाळ पुढे म्हणाल्या, मेट्रोने टेकडीवर पुनर्रोपण केलेले वृक्षांची वाताहात झाली आहे. वन विभाग आणि मेट्रोने त्याकडे अक्षम्य दुर्लक्ष केले आहे. विविध खात्यांमध्ये समन्वयाचा अभाव आहे. यासाठी पुढील आठवड्यात महापालिकेचे अधिकारी, वन विभागाचे अधिकारी आणि मेट्रोचे अधिकारी यांच्या एकत्रित बैठकीचे आयोजन करण्यात येणार आहे.