वैयक्तिक मोबाईल क्रमांकाच्या मेसेजला प्रतिसाद देऊ नका – महावितरण

पुणे, दि. २४ मे २०२२: वीजग्राहकांना वैयक्तिक क्रमांकावरून बनावट ‘एसएमएस’ पाठवून वैयक्तिक मोबाईल क्रमांकावर संपर्क साधायला सांगणे. त्यानंतर एखादी लिंक पाठवून किंवा सॉफ्टवेअर डाऊनलोड करण्यास सांगणे व याप्रकारे वीजग्राहकाने प्रतिसाद दिल्यास आर्थिक फसवणूक करण्याचे प्रकार होत आहे. त्यामुळे कोणत्याही परिस्थितीत वैयक्तिक मोबाईल क्रमांकावरून प्राप्त झालेल्या बनावट ‘एसएमएस’ना कोणताही प्रतिसाद देऊ नये असे आवाहन महावितरणकडून करण्यात आले आहे.

दरम्यान, सोमवारी (दि. २३) पुणे शहरातील एका ग्राहकाला असाच बनावट ‘एसएमएस’ पाठवून ऑनलाईनद्वारे २२ हजार रुपये लुबाडल्याचा प्रकार घडला आहे. याप्रकरणी संबंधित ग्राहकाने सायबर सेल पोलीस स्टेशन (शिवाजीनगर पोलीस स्टेशन) मध्ये तक्रार दाखल केली आहे. यासोबतच महावितरणकडून देखील बनावट ‘एसएमएस’प्रकरणी सायबर सेलमध्ये याआधी तक्रारी दाखल करण्यात आल्या आहेत.

‘मागील महिन्याचे वीजबिल अपडेट नसल्याच्या कारणावरून आज रात्री ९.३० वाजता वीजपुरवठा खंडित करण्यात येणार आहे. करिता ताबडतोब सोबत दिलेल्या वैयक्तिक मोबाईल क्रमांकावर संपर्क साधावा’, असे बनावट ‘एसएमएस’ नागरिकांना पाठविण्यात येत आहेत. मात्र कोणत्याही वैयक्तिक मोबाईल क्रमांकावरून अशा प्रकारचे ‘एसएमएस’ व व्हॉट्स अॅप मेसेज पाठविण्यात येत नाही, असे महावितरणकडून स्पष्ट करण्यात आले आहे.

महावितरणकडून केवळ मोबाईल क्रमांकाची नोंदणी केलेल्या वीजग्राहकांनाच सिस्टीमद्वारे ‘एसएमएस’ पाठविण्यात येतात आणि त्याचा सेंडर आयडी (Sender ID) हा ‘एमएसईडीसीएल’ (MSEDCL) (उदा. VM-MSEDCL, VK-MSEDCL) असा आहे. तसेच या अधिकृत मेसेजमधून वीजग्राहकांना किंवा नागरिकांना महावितरणच्या कोणत्याही अधिकाऱ्याच्या वैयक्तिक मोबाईल क्रमांकावर संपर्क करण्याबाबत कळविले जात नाही.

‘वीजबिलाची रक्कम भरलेली नसल्याने वीजपुरवठा आज रात्री खंडित करण्यात येत आहे’ असा संदेश वेगवेगळ्या वैयक्तिक मोबाईल क्रमांकावरून पाठविण्यात येत असल्याचे पुन्हा प्रकार घडत आहेत. या मेसेजनंतर वीजबिल भरण्यासाठी वैयक्तिक मोबाईल क्रमांकावरून ऑनलाईन पेमेंटसाठी बनावट लिंक पाठविण्यात येत आहे. तसेच ग्राहकांना वीजबिल भरण्यासाठी सॉफ्टवेअर डाऊनलोड करण्यास सांगितले जात आहे. ग्राहकांनी त्यास प्रतिसाद दिल्यास मोबाईल किंवा संगणक हॅक करून बॅक खात्यातील शिल्लक रक्कम लंपास करण्याची मोठी शक्यता आहे. त्यामुळे वीजग्राहकांनी या बनावट मेसेज व लिंककडे संपूर्णपणे दुर्लक्ष करावे.

महावितरणकडून मोबाईल क्रमांकाची नोंदणी केलेल्या वीजग्राहकांनाच ‘एसएमएस’द्वारे पूर्वनियोजित देखभाल व दुरुस्ती, तांत्रिक किंवा अन्य कारणांमुळे वीजपुरवठा खंडित झाल्यास तो पूर्ववत होण्यास लागणारा संभाव्य कालावधी तसेच दरमहा वीजबिलांची रक्कम, स्वत:हून मीटर रिडींग पाठविण्याचे ग्राहकांना आवाहन, मीटर रिडींग घेतल्याची तारीख व वापर केलेली एकूण युनिट संख्या, वीजबिलाची रक्कम, देय दिनांक, वीजपुरवठा खंडित करण्याची रीतसर नोटीस आदींची माहिती पाठविण्यात येते. परंतु, सध्या वैयक्तिक मोबाईल क्रमांकावरून नागरिकांना पाठविण्यात येणारे मेसेज हे बनावट आहे. त्यास प्रतिसाद देऊ नये. बिलाच्या पेमेंटसाठी लिंक किंवा कोणतेही सॉफ्टवेअर डाऊनलोड करून नये. तसेच मेसेजमध्ये नमूद केलेल्या कोणत्याही वैयक्तिक मोबाईल क्रमांकावर संपर्क साधू नये. काही शंका व तक्रारी असल्यास वीजग्राहकांनी चोवीस तास सुरु असलेल्या १९१२, १८००१०२३४३५ किंवा १८००२३३३४३५ या टोल फ्री क्रमांक किंवा नजीकच्या कार्यालयांशी संपर्क साधावा, असे आवाहन महावितरणकडून करण्यात आले आहे.

पुणे, दि.२३:- मान्सून कालावधीत विशेषत: जून व जुलै या महिन्यात वीज पडण्याचे प्रमाण लक्षात घेता जीवितहानी टाळण्यासाठी प्रतिबंधात्मक उपाययोजना म्हणून पृथ्वी मंत्रालयाने तयार केलेले “दामिनी ” अॅप वापरण्याचे जिल्हा प्रशासनाच्यावतीने आवाहन करण्यात आले आहे.सुरक्षात्मक उपाययोजना म्हणून सर्व शासकीय यंत्रणेतील अधिकारी, कर्मचारी, क्षेत्रीय अधिकारी, मंडळ अधिकारी, अव्वल कारकून, महसूल सहाय्यक, सरपंच, पोलिस पाटील, तलाठी, कृषिसेवक, कोतवाल, आशा कार्यकर्ती, अंगणवाडी सेविका, आरोग्य सेवक, ग्रामपंचायत संगणक परिचालक आणि नागरिकांना अॅपचा वापर करावा.

“दामिनी” अॅप गुगल प्लेस्टोअरवर https://play.google.com/store/apps/details?id=com.lightening.live.damini या लिंकवरुन डाऊनलोड करता येईल. या ॲपमध्ये जीपीएस स्थळाद्वारे वीज पडण्याच्या १५ मिनिटांपूर्वी स्थिती दर्शविण्यात येते. अॅपमध्ये आपल्या सभोवतालीच्या परिसरात वीज पडण्याची सूचना प्राप्त होताच त्या ठिकाणापासून सुरक्षित स्थळी स्थालंतरीत व्हावे. यावेळी झाडाचा आश्रय घेऊ नये.गावातील सर्व स्थानिक शासकीय अधिकारी, कर्मचारी यांनी ॲप डाऊनलोड करून त्यामध्ये प्राप्त सुचनेनुसार गावातील नागरिकांना पूर्वसूचना द्यावी आणि होणारी जीवितहानी टाळण्याच्या अनुषंगाने कार्यवाही करावी, असे निवासी उपजिल्हाधिकारी हिम्मत खराडे यांनी कळविले आहे.

पुणे- रस्त्यावरचा वाहतुकीचा ताण कमी करण्यासाठी व भविष्यातील रहदारीच्या दृष्टीने महत्त्वपूर्ण ठरणार्‍या पुणे शहराअंतर्गत  ‘हाय कॅपेसिटी मास्ट ट्रांझिस्ट रूट’चा ( एचसीएमटीआर)  प्रकल्प अंतिम टप्प्यात येऊनही आजमितीस   अंमलबजावणी झालेली नाही. त्यामुळे या प्रकल्पासाठी गेली १८ वर्षे पाठपुरावा करणारे  काँग्रेसचे पालिकेतील माजी गटनेते आबा बागुल यांनी  जीवघेण्या वाहतुकीतून पुणेकरांची सुटका करण्यासाठी आता   मुख्यमंत्री व उपमुख्यमंत्र्यांनीच  एचसीएमटीआर रस्त्याच्या अंमलबजावणीला   प्राधान्य द्यावे, अशी मागणी केली आहे. यासंदर्भात मुख्यमंत्री उद्धव ठाकरे,उपमुख्यमंत्री अजित पवार यांना  पाठवलेल्या पत्रात  काँग्रेसचे पुणे महापालिकेतील माजी गटनेते  आबा बागुल यांनी म्हटले आहे की, या  ‘हाय कॅपेसिटी मास्ट ट्रांझिस्ट रूट’मुळे (एचसीएमटीआर रस्ता) पुण्यातील जीवघेण्या वाहतुकीचा प्रश्न सुटून पुणेकरांना दिलासा मिळण्याचा मार्ग सहज सुकर असतानाही  गेल्या  35  वर्षांपासून  एचसीएमटीआर रस्त्याचा प्रस्ताव रखडला आहे. विशेष म्हणजे अंतिम टप्प्यात आलेला हा प्रस्ताव अजूनही मार्गी लागलेला नाही.   गेली ३५ वर्षे हा प्रकल्प रखडला असून १८ वर्षांपासून मी हा प्रकल्प मार्गी लागण्यासाठी सातत्याने पाठपुरावा केला आहे. त्याची निविदा प्रक्रिया पूर्ण झाली असून निविदा जास्त रकमेने आल्यामुळे सदर निविदा रद्द करण्यात आली. परंतु यासाठी फेर निविदा प्रक्रिया राबविणे गरजेचे होते. तदनंतर कोणत्याही हालचाली निविदा प्रक्रिया राबविण्यासाठी  झाल्या नाहीत व हा प्रकल्प प्रशासनाच्या ढिसाळ कारभारामुळे रखडला गेला,ही खेदजनक बाब आहे.  याकडेही आबा बागुल यांनी लक्ष वेधले आहे.  त्यामुळे आपण या प्रकल्पाकडे वैयक्तिक लक्ष घालावे.  जेणेकरून पुण्याच्या वाहतुकीचा मोठा प्रश्न सुटण्यास मदत होईल. हा रस्ता ३७ किलोमीटर लांबीचा व २४ मीटर रुंदीचा आहे. जुन्या पुण्याच्या ११० स्क्वेअर  किमी हद्दीचा हा रस्ता असून त्यावेळी पुण्यातील इंजिनिअरिंग  कॉलेजने १९८० साली सादर  केला होता  व तो १९८७ च्या विकास आराखड्यात अंतर्भूत करण्यात आला आहे. परंतु आजपर्यंत हा रस्ता अस्तित्वात आलेला नाही. हा रस्ता पूर्ण होणे अत्यंत गरजेचे असून काही स्वार्थी विकसकामुळे व दरवेळी त्यात अदलाबदल केल्यामुळे, त्या विकसकांना ‘फेव्हर’ केले जात आहे. अशा पुणेकरांच्या भावना झाल्या आहेत. हा रस्ता आपण लवकरात लवकर मार्गी लावावा व त्याबाबत तात्काळ आदेश आपण महापालिका आयुक्तांना द्यावेत . मुंबईच्या धर्तीवर पुण्यातील हा वाहतुकीच्या व पुणेकरांच्या सुरक्षिततेच्या  दृष्टीने महत्वाचा असलेला  एचसीएमटीआर   रस्ता आपल्या काळात   मार्गी लागून पुण्याच्या जीवघेण्या वाहतुकीतून पुणेकरांची सुटका होईल  हीच पुणेकरांची अपेक्षा असल्याचेही आबा बागुल यांनी नमूद केले आहे. 

पुणे : शहराला पाणीपुरवठा करणाऱ्या विविध जलकेंद्रांच्या देखभाल दुरुस्तीच्या कामामुळे, येत्या गुरुवारी (२६ मे) संपूर्ण शहराचा पाणीपुरवठा बंद राहणार आहे.तसेच शुक्रवारी उशिरा व कमी दाबाने पाणीपुरवठा होणार आहे.

महापालिकेच्यावतीने पर्वती गुरुवारी जलकेंद्र पम्पिंग, लष्कर जलकेंद्र पम्पिंग, एस.एन.डी.टी / वारजे जलकेंद्र, नवीन व जुने होळकर जलकेंद्र येथील विद्युत / पम्पिंग विषयक व स्थापत्यविषयक तातडीचे देखभाल दुरुस्तीचे काम केले जाणार असल्याने, या दिवशी संपूर्ण दिवसाचा पाणीपुरवठा बंद राहणार असल्याची माहिती पाणीपुरवठा विभागाचे प्रमुख अनिरुद्ध पावसकर यांनी दिली.

पाणी पुरवठा बंद असणारा भाग

पर्वती जलकेंद्र – शहरातील सर्व पेठा, दत्तवाडी परिसर, राजेंद्रनगर, लोकमान्यनगर, डेक्कन परिसर, शिवाजीनगर परिसर, स्वारगेट परिसर, पर्वती दर्शन, मुकुंदनगर, पर्वती गाव, सहकारनगर, सातारा रोड परिसर, पद्मावती, बिबवेवाडी, इंदिरानगर परिसर, कर्वे रस्ता, एसएनडीटी परिसर, एरंडवणा, संपूर्ण कोथरूड परिसर, डहाणूकर कॉलनी, कर्वेनगर, लॉ कॉलेज रोड, सेमिनरी झोन वरील मीठानगर, शिवनेरीनगर, भाग्योदयनगर, ज्ञानेश्वरनगर, साईबाबानगर, सर्व्हे नं. ४२,४६ (कोंढवा खुर्द) इत्यादी परिसर, पर्वती टँकर भरणा केंद्र, पद्मावती टँकर भरणा केंद्र.

लष्कर जलकेंद्र पम्पिंग भाग – लष्कर भाग, पुणे स्टेशन परिसर, मुळा रस्ता, कोरेगाव पार्क ताडीवाला रस्ता, रेसकोर्स परिसर, वानवडी, कोंढवा, हडपसर, महंमदवाडी, काळेपडळ, मुंढवा, चंदननगर, खराडी, सोलापूर रस्ता, गोंधळेनगर, सातववाडी इत्यादी.

चतु:श्रुंगी / एस.एन.डी.टी/वारजे जलकेंद्र परिसर – भुसारी कॉलनी, शास्त्रीनगर, बावधन, भूगाव रोड परिसर, सूस रोड, बाणेर, बालेवाडी, पाषाण, वारजे हायवे परिसर, रामनगर, कर्वेरोड परिसर, एरंडवणा, कोथरूड, डेक्कन जिमखाना परिसर, जयभवानीनगर, सुतारदरा, डहाणूकर कॉलनी, परमहंसनगर, कर्वेनगर, गांधीभवन, महात्मा सोसायटी, हिंगणे होम कॉलनी, हॅपी कॉलनी, गोसावी वस्ती, कॅनॉल रोड, वारजे जकात नाका परिसर, शिवाजीनगर, भोसलेनगर, घोलेरोड, सेनापती बापट रोड, हनुमाननगर, जनवाडी, वैदूवाडी, मॉडेल कॉलनी, वडारवाडी, रेव्हेन्यू कॉलनी, पोलीस लाईन, संगमवाडी, भांडारकर रोड इत्यादी.

नवीन व जुने होळकर जलकेंद्र पम्पिंग भाग – मुळा रोड, खडकी, एमईएस, हाय एक्स्प्लोझिव्ह फॅक्टरी, हरिगंगा सोसायटी इत्यादी.