मुंबई, दि. 15 : मेजर ध्यानचंद खेलरत्न पुरस्कार, खेळामध्ये यश संपादन केल्याबद्दल ध्यानचंद जीवनगौरव पुरस्कार, मौलाना अबुल कलाम आझाद ट्रॉफी (विद्यापीठांकरिता), द्रोणाचार्य पुरस्कार, राष्ट्रीय खेल प्रोत्साहन पुरस्कार, अर्जुन पुरस्कार 2022 च्या नामांकनाकरिता नामनिर्देशन प्रस्ताव मागविण्यात येत आहेत.

हे प्रस्ताव दिनांक 20 सप्टेंबर 2022 रोजी रात्री 11.59 वाजेपर्यंत केंद्र शासनाकडे सादर करण्यात येणार आहे. विहित कालावधीनंतर प्राप्त होणारे अर्ज तसेच अपुर्ण अर्जांचा विचार केला जाणार नाही. या वर्षीपासून पात्र खेळाडुंनी या पुरस्काराकरिता मार्गदर्शक तत्त्वानुसार ऑनलाईन अर्ज करावयाचा आहे. हे अर्ज भरताना कोणत्याही विभागाची अथवा व्यक्तींची शिफारस न घेता ते केंद्र शासनाच्या https://dbtyas-sports.gov.in/ या संकेतस्थळावर थेट सादर करावे. अर्ज संदर्भात नियमावली तसेच विहित नमुन्यातील अर्ज https://yas.nic.in/sports या संकेतस्थळावर उपलब्ध आहेत.

ऑनलाईन अर्जाबाबत काही अडचण असल्यास Department of sports च्या section.sp4-moyas@gov.in या ई-मेल किंवा 011-23387432 या क्रमांकावर कार्यालयीन कामाकाजाच्या दिवशी सकाळी 9 ते सायंकाळी 5.30 पर्यंत संपर्क करावा, असे आवाहन जिल्हा क्रीडा अधिकारी, मुंबई उपनगर यांनी कळविले आहे.

मुंबई, 15 सप्टेंबर 2022

केंद्रीय अर्थमंत्री निर्मला सीतारामन यांच्या अध्यक्षतेखाली आज मुंबईत आर्थिक स्थैर्य आणि विकास मंडळाची 26 वी बैठक पार पडली.इतर अनेक बाबींसोबत, या बैठकीत मंडळाच्या सदस्यांनी अर्थव्यवस्थेबाबतच्या धोक्याची पूर्वसूचना देणारे संकेत आणि त्यासंदर्भातील आपली सज्जता, सध्याच्या आर्थिक/कर्जविषयक माहिती प्रणालींच्या कार्यक्षमतेत सुधारणा, आर्थिक बाजारांच्या पायाभूत सुविधांसह प्रणाली संदर्भात महत्त्वाच्या आर्थिक संस्थांमधील प्रशासन तसेच व्यवस्थापनविषयक समस्यांवर उपाययोजना, आर्थिक क्षेत्रातील सायबर सुरक्षा आराखडा मजबूत करणे, सर्व अर्थविषयक सेवा आणि संबंधित व्यवहारांसाठी सामायिक केवायसी, अकाऊंट ॲग्रीगेटरबाबत अद्ययावतीकरण तसेच पुढील पावले, उर्जा क्षेत्राला वित्तपुरवठा करण्याशी संबंधित मुद्दे, नव्या आत्मनिर्भर भारताच्या उभारणीत जीआयएफटी आयएफएससीची धोरणात्मक भूमिका आणि सर्व सरकारी विभागांतर्फे  नोंदणीकृत व्हॅल्युअरच्या सेवांचा उपयोग करून घेण्याची आवश्यकता या मुद्यांवर चर्चा केली.

आर्थिक क्षेत्रातील जोखीम, आर्थिक स्थिती आणि बाजारातील घडामोडी यांच्यावर सरकारने तसेच नियामकांनी सतत लक्ष ठेवण्याची गरज आहे जेणेकरून विपरीत परिस्थिती उद्भवल्यास असुरक्षितेचा सामना करता येईल आणि आर्थिक स्थैर्य अधिक मजबूत करण्यासाठी वेळेवर, योग्य उपाययोजना करता येऊ शकतील हा मुद्दा या बैठकीत ठळकपणे मांडण्यात आला.

भारताच्या अध्यक्षतेखाली वर्ष 2023 मध्ये होणाऱ्या जी-20 राष्ट्रांच्या बैठकीत चर्चिल्या जाणाऱ्या आर्थिक क्षेत्रातील समस्यांच्या संदर्भातील तयारीचा मंडळाच्या सदस्यांनी आढावा देखील घेतला.

केंद्रीय अर्थ राज्यमंत्री डॉ.भागवत किशनराव कराड, केंद्रीय अर्थ राज्यमंत्री पंकज चौधरी भारतीय रिझर्व्ह बँकेचे गव्हर्नर शक्तीकांत दास, केंद्रीय अर्थ सचिव आणि केंद्रीय अर्थ मंत्रालयातील व्यय विभागाचे सचिव डॉ.टी.व्ही.सोमनाथन, केंद्रीय अर्थ मंत्रालयातील आर्थिक व्यवहार विभागाचे सचिव अजय सेठ, केंद्रीय अर्थ मंत्रालयातील महसूल विभागाचे सचिव तरुण बजाज, केंद्रीय अर्थ मंत्रालयातील आर्थिक सेवा विभागाचे सचिव संजय मल्होत्रा, केंद्रीय अर्थ मंत्रालयातील मुख्य आर्थिक सल्लागार डॉ.व्ही.अनंत नागेश्वरन, सेबीच्या अध्यक्ष माधोबी पुरी बुच, आयआरडीएचे अध्यक्ष देबाशिष पांडा,पीएफआरडीएचे अध्यक्ष सुप्रतीम बंदोपाध्याय, आयबीबीआयचे अध्यक्ष रवी मित्तल, आयएफएससीएचे अध्यक्ष आणि आर्थिक व्यवहार विभागाच्या एफएसडीसीचे सचिव इंजेती श्रीनिवास हे देखील या बैठकीला उपस्थित होते.

मुंबई, 15 सप्टेंबर 2022

केंद्रीय पेट्रोलियम आणि नैसर्गिक वायू मंत्री हरदीप सिंह पुरी यांनी आज मुंबईत, भारत सरकारच्या पेट्रोलियम आणि नैसर्गिक वायू मंत्रालयाच्या (MoP&NG) अंतर्गत, हिंदुस्थान पेट्रोलियम कॉर्पोरेशन लिमिटेडच्या संयुक्त विद्यमाने, सेंटर फॉर हाय टेक्नॉलॉजी (CHT) द्वारे आयोजित 25 व्या ऊर्जा तंत्रज्ञान मेळाव्याला संबोधित केले. देशातील नागरिकांसाठी ऊर्जा सुरक्षा सुनिश्चित करण्याच्या भारताच्या प्रगतीवर मंत्र्यांनी प्रकाश टाकला तसेच देशातील ऊर्जा मिश्रण अधिक शाश्वत आणि पर्यावरणपूरक बनविण्याच्या सरकारच्या योजनांची रूपरेषा सांगितली.

पूर्वी रिफायनिंग अँड पेट्रोकेमिकल्स टेक्नॉलॉजी मीट म्हणून ओळखल्या जाणार्‍या, ह्या वार्षिक ऊर्जा तंत्रज्ञान संमेलनात भारत आणि परदेशातील 1000 हून अधिक प्रतिनिधी उपस्थित होते. या वर्षी 15 ते 17 सप्टेंबर दरम्यान चालणारा हा कार्यक्रम, ऊर्जा क्षेत्राशी थेट संबंध असलेल्या अलीकडील काळातील प्रगती आणि तंत्रज्ञानाच्या विकासाचे प्रदर्शन करण्यासाठी एक व्यासपीठ उपलब्ध करुन देणारा ठरला आहे. “नवीन ऊर्जा युगातील परिष्करण” या संकल्पनेअंतर्गत, 25 व्या ऊर्जा तंत्रज्ञान संमेलनात देशातील बदलत्या ऊर्जा परिदृश्यावर लक्ष केंद्रित केले जाईल.

या संमेलनाला संबोधित करताना, केंद्रीय पेट्रोलियम आणि नैसर्गिक वायू मंत्री हरदीप सिंह पुरी म्हणाले की, सध्याच्या जागतिक परिस्थितीमुळे निर्माण झालेली नवी आव्हाने समोर उभी असताना देखील, भारताने आपले शून्य कार्बन उत्सर्जनाचे लक्ष्य कायम ठेवले आहे. तसेच, भारत हायड्रोकार्बनच्या जगातून अशा जगात संक्रमण करण्यासाठी कटिबद्ध आहे, जिथे हरित आणि शाश्वत ऊर्जा आपली ऊर्जेची गरज भागवेल.

मंत्री म्हणाले की, जागतिक संकटांच्या पार्श्वभूमीवर भारताने ऊर्जा, अन्न आणि इंधन या तीन आघाड्यांवर अत्यंत चांगली कामगिरी केली आहे. ऊर्जेची उपलब्धता आणि किफायतशीरतेची हमी देत जागतिक स्तरावर निर्माण झालेल्या संकटातून देशाला आत्मविश्वासाने मार्ग काढता आला. ते म्हणाले की, देशाचा दरडोई ऊर्जेचा वापर सध्या जागतिक सरासरीच्या एक तृतीयांश आहे आणि येत्या काही वर्षांत तो जागतिक सरासरी ओलांडेल. भारत 2030 मध्ये 10 ट्रिलियन डॉलरची अर्थव्यवस्था आणि 2047 पर्यंत जगातील तिसरी सर्वात मोठी अर्थव्यवस्था होण्याच्या मार्गावर आहे आणि त्यामुळे ऊर्जा मिश्रणात बदल करण्याची गरज आहे, असे ते म्हणाले.

ऊर्जा क्षेत्रात देशाने केलेली प्रगती अधोरेखित करताना हरदीप सिंह पुरी म्हणाले की, आज आधुनिकीकरण आणि डिजिटायझेशन हे निवडीचे पर्याय राहिले नसून अनिवार्य घटक झाले आहेत. मे 2022 पर्यंत, भारताने आधीच 10% जैवइंधन मिश्रण उद्दिष्ट गाठले असून येत्या एक-दोन वर्षात 20% मिश्रणाचा टप्पा गाठणार आहे.

केंद्रीय पेट्रोलियम आणि नैसर्गिक वायू राज्यमंत्री रामेश्वर तेली यांनीही उपस्थित प्रतिनिधींना संबोधित केले आणि पेट्रोलियम आणि नैसर्गिक वायू क्षेत्रातील देशाच्या प्रगतीवर प्रकाश टाकला. देशातील ऊर्जा मिश्रणातील नैसर्गिक वायूचा वाटा सध्याच्या 6% वरुन 2030 पर्यंत 15% पर्यंत वाढवण्याच्या सरकारच्या संकल्पाची माहिती त्यांनी दिली. ते पुढे म्हणाले की, पंतप्रधान नरेंद्र मोदी यांच्या नेतृत्वाखालील सरकारने 2030 पर्यंत देशात 18 हजार कॉम्प्रेस्ड नॅचरल गॅस (सीएनजी) केंद्र स्थापन करण्याचा निर्णय घेतला आहे. भारत सरकारने देशभरात सीएनजी आणि पीएनजी (पाईप्ड नॅचरल गॅस) दोन्हीची उपलब्धता अधिक चांगल्या प्रकारे सुनिश्चित करण्यासाठी केलेल्या इतर उपाययोजनांची माहिती तेली यांनी दिली.

25 व्या ऊर्जा तंत्रज्ञान मेळाव्यात 15 तांत्रिक सत्रांमध्ये, एकूण 82 मौखिक शोध निबंध सादर केले जातील ज्यात 43 परदेशी कंपन्यांच्या निबंधाचा तर परदेशातील 24 वक्त्यांचा समावेश आहे. याव्यतिरिक्त, आघाडीच्या तेल कंपन्या, तंत्रज्ञान / सेवा प्रदात्यांनी आपले तंत्रज्ञान, उत्पादन आणि सेवा याबाबत माहिती देणारे 16 प्रदर्शन स्टॉल्स देखील लावले आहेत.

अंतर्गत स्पर्धा संपवून विभागाचा कारभार अधिक स्वच्छ व पारदर्शक ठेवा
विभागाची प्रतिमा व कामाची गुणवत्ता अधिक सुधारा
-सार्वजनिक बांधकाम मंत्री रविंद्र चव्हाण यांचे आवाहन

मुंबई दि.१५ सप्टेंबर : सार्वजनिक बांधकाम विभागासमोर आज अनेक आव्हाने असली तरी यासर्वांवर मात करून प्रत्येक कामामध्ये सकारात्मकता आणून नवनवीन अत्याधुनिक तंत्रज्ञानाच्या माध्यमातून जनतेला उत्कृष्ट सेवा देण्याबरोबरच प्रत्येकाने सर्वोत्कृष्ट काम करण्याचा संकल्प करून राज्याला प्रगतीपथावर नेवूया, तसेच आपल्या विभागाची कामगिरी सर्वोत्तम करण्याच्यादृष्टीने विभागाचा कारभार स्वच्छ व पूर्णपणे पारदर्शक ठेवायाला हवा. विशेष म्हणजे विभागात कोणामध्येही कसल्याही प्रकारची असलेली सध्याची अंतर्गत स्पर्धा संपली पाहिजे. आपला विभाग हा जनसामान्यांशी जोडलेला असल्यामुळे यापुढे विभागाची प्रतिमा व कामाची गुणवत्ता,दर्जा हा अधिक सुधारण्याचे आवाहन सार्वजनिक बांधकाम मंत्री रविंद्र चव्हाण यांनी व्यक्त केले.

माटुंगा येथील षण्मुखांनद सभागृहात, भारतरत्न सर मोक्षगुंडम विश्वेश्वरैया यांचा जन्मदिन राष्ट्रीय अभियंता दिन म्हणून साजरा केला जातो. या निमित्ताने सार्वजनिक बांधकाम विभागातील अभियंत्यांनी केलेल्या उल्लेखनिय कामगिरीचा गौरव समारंभ शानदारपणे पार पडला. याप्रसंगी विभागात उल्लेखनीय कामगिरी केलेल्या ६५ अभियंताचा गौरव सार्वजनिक बांधकाम मंत्री रविंद्र चव्हाण यांच्या हस्ते प्रमाणपत्र व स्मृतीचिन्ह प्रदान करुन करण्यात आला. यावेळी उपस्थितांना मंत्री रविंद्र चव्हाण यांनी मार्गदर्शन केले. यावेळी बोलताना रविंद्र चव्हाण यांनी सांगितले की, भारतरत्न विश्वेश्वरैया यांनी आधुनिक भारताची निर्मिती केली आणि देशाला नवे रूप दिले. अभियांत्रिकी क्षेत्रात त्यांनी असाधारण योगदान दिले आहे. आज सार्वजनिक बांधकाम विभागासमोर अनेक आव्हाने आहेत. आपल्या विभागाकडून जनतेच्याही खूप अपेक्षा आहेत त्या पूर्ण क्षमतेने परिपूर्ण करण्यासाठी काम करा. आपापल्या कामामध्ये सकारात्मकता आणा. जगासोबत जाताना अत्याधुनिक तंत्रज्ञान अवगत करा. कोणताही रस्ता अथवा बांधकाम करताना ते दर्जेदार व उत्कृष्टपणे निर्माण करा. देश घडविण्याची जबाबदारी आपल्या प्रत्येकाची आहे. त्यादृष्टीने विभागाने आपल्या कार्यपध्दतीमध्ये बदल करुन पावले उचलण्याची गरज आहे. विभागाला सध्या निधीची कमतरता आहे, तरीही कमी निधीमध्ये आवश्यक पण दर्जेदार स्वरुपाची कामे करण्याची मानसिकता आपण ठेवली पाहिजे व त्यादृष्टीने प्रयत्न केले पाहिजे. आपल्या विभागाची प्रतिमा उंचावण्यासाठी आगामी काळात आपण सर्वोतोपरी प्रयत्न करणार असून सर्वांच्या सूचनांचे स्वागत करण्यात येईल. आपली कामे हे पूर्ण क्षमतेने करा. कोणीही आपल्या विभागाविषयी तक्रार करता कामा नये याची प्रत्येकाने दक्षता घ्यायला हवी. मी माझ्या विभागाच्या कामामध्ये उत्कृष्ट सेवा देणार असे जर सर्वांनीच ठरवले तर येणा-या काळात आपला महाराष्ट्र राज्य नक्कीच प्रगतीपथावर जाईल असा विश्वासही मंत्री चव्हाण यांनी व्यक्त केला.

मंत्री चव्हाण यांनी सांगितले की, रस्त्यांवरील अपघात प्रवण क्षेत्र दुरुस्तीच्या अनुषंगाने अधिक सक्षम उपाययोजना करा, नाविन्यपूर्ण प्रकल्प कार्यान्वित करण्याच्या दृष्टीने नियोजनबध्द आराखडा असणे आवश्यक आहे. रस्ते, पूल बांधणी यामध्ये नवीन साहित्य, व अत्याधुनिक तंत्रज्ञान यांचा वापर करा, विभागाच्या सर्व कामांची गुणवत्ता सुधारण्याबाबत उपाययोजना करण्यासंदर्भात सर्वांनी अंतर्गत स्पर्धा टाळून काम करा. आपण सुचवलेल्या सूचनांवर नक्की काम करता येईल. तसेच, इंजिनियरिंगच्या विद्यार्थ्यांसाठी अप्रेंटिस सारख्या नवीन उपक्रम राबवावा जेणेकरून नवोदित अभियंता राज्याला मिळतील, असेही त्यांनी सांगितले.

आजचा दिन ईडीचा आहे म्हणजेच इंजिनिअरिंग डे आहे असा उल्लेख करुन मंत्री रविंद्र चव्हाण यांनी सांगितले की, गुगल, उबेर सारख्या ज्या कंपन्यांनी आज जगामध्ये क्रांती घडविली व यशाची नवीन शिखरे गाठली आहेत. त्या कंपन्याच्या यशाचे गमक म्हणजे एका इंजिनिअरने आपल्या कल्पकतेने या कंपन्या स्थापन केल्या व यश मिळविले. याच पध्दतीने आपल्या विभागाच्या प्रत्येक कर्मचा-यांमध्ये असलेल्या इच्छाशक्तीच्या जोरावर मिशन मोडमध्ये काम करुन त्यांनी नव्याने इंजिनिअरप्रमाणे बदल घडवून विभागाला प्रगतीपथावर नेले पाहिजे, अशी अपेक्षाही रविंद्र चव्हाण यांनी व्यक्त केली.

मुख्यमंत्री एकनाथ शिंदे व उपमुख्यमंत्री देवेंद्र फडणवीस यांच्या नेतृत्वाखाली आमचे सरकार आता ख-या अर्थाने तळागळातील जनसामान्यांसाठी काम करण्यासाठी तत्पर आहे. आमचे सरकार जनसामान्यांचे असून जनतेची अधिक सेवा सरकारला करावयाची आहे. त्यामुळे हे सरकार अधिक गतीने काम करेल असेही रविंद्र चव्हाण यांनी सांगितले.

राज्याच्या विकासात सार्वजनिक बांधकाम विभागाची महत्त्वाची भूमिका :- उपमुख्यमंत्री देवेंद्र फडवणीस

राज्याला शाश्वत आणि सर्वसमावेशक भविष्याकडे नेवून राज्याच्या विकासात सार्वजनिक बांधकाम विभाग महत्त्वाची भूमिका बजावेल असा विश्वास उपमुख्यमंत्री देवेंद्र फडणवीस यांनी व्यक्त केला. भारतरत्न मोक्षगुंडम विश्वेश्वरय्या यांच्या जन्मदिनानिमित्त उपमुख्यमंत्री देवेंद्र फडणवीस यांनी व्हिडिओ संदेशाच्या माध्यमातून राष्ट्रीय अभियंता दिनानिमित्त शुभेच्छा दिल्या.

गेल्या दीडशे वर्षात बांधले गेलेले रस्ते, पूल, रेस्ट हाऊस , सर्किट हाऊस आणि अनेक प्रशासकीय इमारतींच्या बांधकामांचा साक्षीदार असलेल्या सार्वजनिक बांधकाम विभागाचे राज्याच्या पायाभूत सुविधा उभारणीत महत्त्वाचे योगदान आहे. संपूर्ण बांधकाम चक्रामध्ये कार्बन उत्सर्जन कमी करणाऱ्या तंत्रज्ञानाचा वापर करणे आज महत्वाचे झाले आहे. महाराष्ट्रात ग्रीन बिल्डींग उभ्या रहात आहेत, मात्र त्याला आणखी गती देण्याची गरज आहे. तसेच, स्वदेशी आणि स्थानिक पातळीवर तयार झालेले बांधकाम साहित्य आणि आधुनिक तंत्रज्ञानाची सांगड घालून सार्वजनिक बांधकाम विभागाला आपली नवी कार्यपद्धती विकसित करावी लागेल असेही उपमुख्यमंत्री यावेळी म्हणाले,

यावेळी विभागाची बलस्थाने, कोणकोणती नवीन कामे करता येवू शकतात तसेच विभागाच्या कामामध्ये जाणवणा-या विविध अडचणी याबद्दल राज्यातील अभियंता यांनी सूचना केल्या व मत मांडली.पुरस्कार वितरणसोहळा पार पडल्यानंतर पुरस्कार प्राप्त अभियंत्यांनी यावेळी मनोगत व्यक्त केले. राज्याच्या सार्वजनिक बांधकाम विभागाचा कायापालट करण्याच्या दृष्टीने विभागाची कार्यपध्दती अधिक दर्जेदार व सक्षम करण्यासाठी अपर मुख्य सचिव मनोज सौनिक व विविध मान्यवरांनी मनोगत व्यक्त केले.

याप्रंसगी बांधकाम विभागाचे अपर मुख्य सचिव मनोज सौनिक, सचिव (रस्ते) स.शं.साळुंखे, सचिव (इमारती) प्र.द.नवघरे, मुंबई प्रदेश प्रादेशिक विकास प्राधिकरणाचे सचिव सु.अ.वांढेकर, मुख्यमंत्री ग्रामसडक योजनाचे सचिव खं.तु.पाटील, महाराष्ट्र राज्य रस्ते विकास प्राधिकरणाचे सह व्यवस्थापकीय संचालक अ.ब.गायकवाड, सार्वजनिक बांधकाम प्रादेशिक विभागाचे र.रा.हांडे यांच्यासह राज्यातील सर्व विभागीय मुख्य अभियंता, अधिक्षक अभियंता, कार्यकारी अभियंता, उप अभियंता, शाखा अभियंता उपस्थित होते. सचिव (रस्ते) स.शं.साळुंखे यांनी कार्यक्रमाचे प्रास्ताविक केले. कार्यक्रमाचे सूत्रसंचालन पूनम चांदोरकर यांनी केले.

सन २०१३ ते २०१९ पर्यंत उत्कृष्ट अभियंत्यांच्या पुरस्कार विजेते पुढीलप्रमाणे-

वर्ष २०१३-१४

तत्कालीन कार्यकारी अभियंता साहेबराव सुरवसें, कार्यकारी अभियंता बी.एन. बहिर ,तत्कालीन उप अभियंता लक्ष्मीकांत जाधव,उप अभियंता प्रदीप दळवी,सहाय्यक अभियंता श्रीमती रिता शुक्ला,कनिष्ठ अभियंता सुरेश जोशी,कनिष्ठ अभियंता श्री.संदीप चाफले,तत्कालीन वास्तुशास्त्रज्ञ मिंथिला जाधव,अंजली माटोडकर.

वर्ष २०१४-१५

तत्कालीन अधीक्षक अभियंता खंडेराव पाटील,कार्यकारी अभियंता विजय कारंडे,कार्यकारी अभियंता संजय मुनगिलवार,कार्यकारी अभियंता अनिल लक्ष्मण पवार,उप अभियंता श्रीकांत ढगे, उप अभियंता अनील निमकर, तत्कालीन उप अभियंता अस्मिता खोंडे,कनिष्ठ अभियंता समीर राऊळ,सहा.अभियंता श्रेणी-2 राहुल कुलकर्णी,कनिष्ठ अभियंता मोहन महाडीक,तत्कालीन वास्तुशास्त्रज्ञ श्रीमती यशोधरा देशपांडे.

वर्ष २०१५-१६

तत्कालीन अधीक्षक अभियंता राजीव गायकवाड,कार्यकारी अभियंता विनोद भदाणे,कार्यकारी अभियंता पोपट वाघमारे,उप अभियंता अजय भोसले,उप अभियंता संदीप कोटलवार,उप अभियंता कृष्णा वाघ,कनिष्ठ अभियंता शिवानंद बिराजदार,कनिष्ठ अभियंता संजय सोमाण,कनिष्ठ अभियंता (विद्युत)इशांत प्रकाश कुलकर्णी,तत्कालीन वास्तुशास्त्रज्ञ संजय गेडाम,वास्तुशास्त्रज्ञ हर्षद साळुंके.

वर्ष २०१६-१७

अधीक्षक अभियंता शामकांत पाटील,तत्कालीन कार्यकारी अभियंता नारायण वेदपाठक,कार्यकारी अभियंता बाबासाहेब थोरात,कार्यकारी अभियंता प्रमोद बनगोसावी,
उप अभियंता सच्चिदानंद श्रावणी (अमरावती),उप अभियंता गणेश पाटील (नाशिक),उप अभियंता (विद्युत) संभाजी घोरपडे,कनिष्ठ अभियंता जितेंद्र नेहेते,कनिष्ठ अभियंता आनंद नागरे,सहाय्यक अभियंता श्रीकांत गुलकोटवार,वास्तुशास्त्रज्ञ शिल्पा कडू,सतिश पाटील.

 
सन २०१७-१८

अधीक्षक अभियंता सुनिल देशमुख, तत्कालीन कार्यकारी अभियंता सुषमा साखरवाडे,तत्कालीन कार्यकारी अभियंता जयंत कुलकर्णी,उप अभियंता ललिता गिरीबुवा,उप अभियंता सत्यशील नगराळे, उप अभियंता सुग्रीव गंगाधर केंद्रे,उप अभियंता संजीवनी करले,कनिष्ठ अभियंता बाबू शिंदे,कनिष्ठ अभियंता सुभाष बल्लाळ.

सन २०१८-१९

अधीक्षक अभियंता विकास रामगुडे,कार्यकारी अभियंता मिलिंद बारभाई,कार्यकारी अभियंता सचिन चिवटे,कार्यकारी अभियंता गजानन टाके,उप अभियंता रश्मी डोळे,कनिष्ठ अभियंता जितेंद्र काळे,कनिष्ठ अभियंता अतुल मुंडे,कनिष्ठ अभियंता (विद्युत) तानाजी थोपटे, पंकज पाटील, योगिता सोडल, दिपाली पवार, आर.बी.राजगुरु

मुंबई-सलमान खान गेल्या 4 वर्षांपासून लॉरेन्स बिश्नोई टोळीच्या निशाण्यावर आहे. या टोळीने एवढ्या वर्षांत सलमानच्या हत्येचा 4 वेळा प्रयत्न केला होता. आता याप्रकरणी पंजाब पोलिसांनी गुरुवारी नवा खुलासा केला आहे. त्यानुसार लॉरेन्स टोळीने गेल्या तीन महिन्यांत सलमानवर हल्ला करण्याचे आणखी दोन प्रयत्न केले होते. या टोळीने सलमानला त्याच्या फार्म हाऊसच्या वाटेवर मारण्याचा कट रचला होता.पंजाब पोलिसांनी तीन दिवसांपूर्वी शूटर कपिल पंडितला अटक केली होती. त्याने चौकशीदरम्यान सलमानच्या हत्येचा खुलासा केला आणि संपूर्ण कटाची माहिती दिली.

पंजाब पोलिसांनी दिलेल्या माहितीनुसार, गायक सिद्धू मुसेवालाला मारण्यापूर्वी लॉरेन्सने सलमानच्या हत्येचा कट रचला होता. प्लॅन ए अयशस्वी झाल्यानंतर टोळीने प्लॅन बी तयार केला. मात्र, याबाबत फारशी माहिती मिळालेली नाही. या योजनेचे नेतृत्व गोल्डी ब्रार करत होता. गोल्डीने सलमानला मारण्यासाठी कपिल पंडित (लॉरेन्स गँगचा शार्प शूटर) ची निवड केली होती आणि पनवेल फार्महाऊसवर जाताना अभिनेत्यावर प्राणघातक हल्ला करण्याचा निर्णय घेण्यात आला होता.

शूटर्स दीड महिना फार्महाऊसजवळ राहिले, रेकीही केली होती
कपिल पंडित, संतोष जाधव, दीपक मुंडी आणि बाकीचे शूटर्स पनवेल येथे भाड्याच्या खोलीत राहिले, कारण पनवेल येथे सलमानचे फार्म हाऊस आहे. येथे ते शूटर्स सुमारे दीड महिना राहिले. लॉरेन्स गँगच्या या सर्व शूटर्सनी सलमानवर हल्ला करण्यासाठी लहान शस्त्रे, पिस्तूल आणि काडतुसे खोलीत ठेवली होती.

वृत्तानुसार, हिट अँड रन प्रकरणानंतर सलमान खान वाहनाचा वेग कमी ठेवत असल्याचेही शूटर्सच्या लक्षात आले होते. सलमान जेव्हाही त्याच्या पनवेल येथील फार्महाऊसवर येतो तेव्हा शेरा त्याच्यासोबत असतो.

लॉरेन्सने 2018 मध्ये पहिल्यांदा दिली होती धमकी
लॉरेन्सने 2018 मध्ये जोधपूर कोर्टातील सुनावणीदरम्यान सलमानला मारण्याची धमकी दिली होती. त्यानंतर सलमान केवळ दोनदा जोधपूरच्या कोर्टात आला होता. दोन्ही वेळेस त्याची सुरक्षा कडेकोट ठेवण्यात आली होती. अलीकडेच सलमान खानच्या वकिलालाही धमकीचे पत्र आले होते. असेच पत्र त्याचे वडील सलीम खान यांनाही मिळाले होते. यानंतर हे पत्र लॉरेन्सनेच पाठवले असल्याची भीती व्यक्त केली जात होती.

सलमान खानला मारण्यासाठी लॉरेन्सने 4 वेळा प्लॅन केला होता. यासाठी त्याने एक रायफलही खरेदी केली होती. लॉरेन्सने 2018 मध्ये सलमानला मारण्यासाठी शूटर संपत नेहराला मुंबईत पाठवले होते. संपतकडे पिस्तूल होते. सलमान पिस्तुलच्या रेंजपासून खूप लांब होता. त्यामुळे त्याला मारता आले नाही. नंतर लांब पल्ल्याची रायफल 4 लाख रुपयांना विकत घेऊन संपतला देण्यात आली. सलमानला मारण्यापूर्वीच तो पकडला गेला. यानंतर लॉरेन्सने आणखी दोन प्रयत्न केले, पण सलमानला मारण्याची संधी मिळाली नाही.

काळवीट शिकार प्रकरणामुळे लॉरेन्स नाराज
लॉरेन्स सलमानवर काळवीट शिकार प्रकरणामुळे नाराज आहे. त्यामुळे त्याला मारण्याचा लॉरेन्सचा कट आहे. सलमान 24 वर्षांपासून काळवीट प्रकरणात कोर्टाच्या फेऱ्या मारत आहे. अलीकडेच लॉरेन्सने कबूल केले होते की, त्याचा समुदाय काळवीटांच्या शिकारीच्या विरोधात आहे. म्हणूनच सलमानला मारायचे आहे. यासाठी शूटरही पाठवण्यात आले होते.