कुंभार समाज शिक्षक संघातर्फे गुणगौरव समारंभ
नारायणगाव/पुणे, ता. १८ : “देशासाठी, समाजासाठी शिक्षक अहोरात्र कष्ट घेऊन मुलांना घडवतात. समाज घडविण्यात शिक्षकांचे अनन्यसाधारण महत्व आहे. त्यांच्या पाठीवर कौतुकाची थाप मारण्याचे अभिमानास्पद काम जुन्नर तालुका कुंभार समाज शिक्षक संघ करीत आहे,” असे मत लिज्जत पापडचे कार्यकारी संचालक सुरेश कोते यांनी व्यक्त केले.
जुन्नर तालुका कुंभार समाज शिक्षक संघातर्फे शिक्षक दिनानिमित्त नुकताच ‘गुणगौरव समारंभ २०२२’ आयोजिला होता. या वेळी कार्यक्रमाच्या अध्यक्षस्थानावरून सुरेश कोते बोलत होते. शिक्षण उपसंचालक कार्यालयातील पर्यवेक्षीय अधिकारी रंगनाथ जाधव, ह.भ. प. निलेश महाराज कोरडे यांच्या हस्ते शिक्षकांचा गुणगौरव करण्यात आला. यावेळी ज्येष्ठ पत्रकार विजय अंबाडे, कुंभार समजोन्नती मंडळाचे अध्यक्ष संतोष कुंभार, पांडुरंग कार्लेकर गुरुजी, बाबाजी कुंभार आदी उपस्थित होते.
सुरेश कोते म्हणाले, “विद्यार्थ्यांना घडविण्याची जुन्नर तालुक्याची परंपरा आहे. या तालुक्याला शिवाजी महाराजांच्या काळापासून एक वेगळा इतिहास आहे. शिक्षकांचा सत्कार करण्याचे संघाचे काम कौतुकास्पद आहे. शिक्षकांनी समाजाला योग्य दिशा देण्याचे कार्य असेच अविरतपणे सुरू ठेवावे.” दरम्यान, सत्कारार्थी विद्यार्थी, शिक्षकांनी आपला सन्मान केल्याबद्दल संघाविषयी कृतज्ञता व्यक्त केली.

पुणे-दोन सैन्यांमध्ये वर्चस्व प्रस्थापित करण्यासाठी आता युद्ध होत नाही. युद्धाची रुपरेषा बदलली आहे. व्यवसाय, उद्योग, समग्र बाजारमूल्य, महसूल, संचालक मंडळाचे नियंत्रण असे त्याचे स्वरूप झाले असून, अहंकार हे युद्धाचे मूळ कारण आहे. या युद्धात यशस्वी नेतृत्वासाठी भगवद्गीता मार्गदर्शक असल्याचे मत, इस्कॉनच्या नियामक मंडळाचे सदस्य आणि आंतरराष्ट्रीय कीर्तीचे व्याख्याते गौरांग प्रभू यांनी व्यक्त केले.

‘भगवद्गीता आणि आदर्श नेतृत्व’ या विषयावर शहरातील विविध संस्थांनी एकत्र येऊन प्रभू यांचे स. प. महाविद्यालयात व्याख्यान आयोजित केले होते. या वेळी प्रभू मार्गदर्शन करीत होते.

समर्थ युवा फाउंडेशनचे राजेश पांडे, भक्तिवेदांतचे जनार्दन चितोडे, इस्कॉनचे संजय भोसले, विवेक व्यासपीठचे महेश पोहनेरकर, स्वामीनारायणचे राधेश्याम अग्रवाल, लक्ष्मीनारायण देवस्थानचे प्रल्हाद राठी आणि मुकुंद भवन ट्रस्टचे पुरुषोत्तम लोहिया यांची प्रमुख उपस्थिती होती.

प्रभू म्हणाले, ‘आदर्श नेतृत्व करण्यासाठी आंतरव्यक्ति कौशल्य, संवाद कौशल्य, प्रश्न व समस्या सोडविण्याची वृत्ती, संवेदनशीलता आणि चांगले मार्गदर्शन व प्रशिक्षण देण्याची क्षमता आवश्यक असल्याचे भगवान श्रीकृष्णाने भगवद्गीतेतून युद्धभूमीवर युद्ध सुरु होण्यापूर्वी सांगितले आहे. त्याचा अर्थ समजावून घेऊन कृती करणे आवश्यक आहे. यासाठी भगवद्गीतेचा प्रचार आणि प्रसार महत्त्वाचा आहे.’

प्रभू पुढे म्हणाले, ‘ धेय्य, विचार व सवयींवर नियंत्रण, निकोप दृष्टिकोन, योग्य मूल्यांकन करण्याची क्षमता, आत्मविश्वास, सहनशीलता, अनपेक्षित परिस्थितीत काय करायचे याची जाण, सत्य, हितकारी व न दुखावणारी भाषा, प्रार्थनेची जीवनशैली आत्मसात करणे, कोणावरही वर्चस्व न गाजवता ज्ञान, प्रेरणा, प्रेम, दया आणि भावनांचे आदान प्रदान करण्याचे करण्याचे कौशल्य विकसित करणे आदी गुण यशस्वी नेतृत्वाने संपादन केले पाहिजे.’

समर्थ युवा फाउंडेशनचे राजेश पांडे यांनी प्रास्ताविक, भक्तिवेदांतचे जनार्दन चितोडे यांनी परिचय, इस्कॉनचे संजय भोसले यांनी सूत्रसंचालन आणि विवेक व्यासपीठचे महेश पोहनेरकर यांनी आभार प्रदर्शन केले.

पुणे, १८ सप्टेंबर ; कोथरूडच्या पहिल्या महिला फॅमिली डॉक्टर मंगलाताई पटवर्धन (वय ९१ वर्षे) यांचे वृद्धापकाळाने निधन झाले. त्या कोथरूड परिसरातील पहिल्या एमबीबीएस डॉक्टर होत्या.

त्यांनी कोथरूड, कर्वेनगर, वडगाव, खडकवासला, मुळशी परिसरात सर्वसामान्य नागरिकांची १९५४ पासून अविरतपणे वैद्यकीय सेवा केली. प्राप्त परिस्थितीत रस्त्यांचा अभाव असताना प्रसंगी रात्री अपरात्री सायकल, घोडागाडीत प्रवास करून त्यांनी रुग्णसेवा केली.

वैद्यकीय व्यवसायाला उत्पन्नाचे साधन न करता त्यांनी आयुष्यभर एक व्रत म्हणून वैद्यकीय सेवा केली. कोथरूड परिसरात हजारो कुटुंबांच्या त्या फॅमिली डॉक्टर होत्या.

ज्येष्ठ समाजवादी विचारवंत व स्वातंत्र्य सैनिक किशाभाऊ पटवर्धन यांच्या त्या पत्नी होत्या. भांडारकर प्राच्यविद्या संशोधन संस्थेच्या कार्यकारी मंडळाचे अध्यक्ष भूपाल पटवर्धन, डॉ. महिपाल पटवर्धन, डॉ. वासंती पटवर्धन, डॉ. अवंती पटवर्धन आणि नातवंडे असा परिवार त्यांच्या पश्चात आहे.

पुणे दि.१७: युवकांनी आधुनिक विज्ञान आणि अध्यात्माच्या संगमाद्वारे नवे विश्व घडवावे. छात्र संसदेतील विचारमंथनाच्या माध्यमातून विश्वबंधुत्वाच्या भारतीय विचाराचा प्रसार आणि‍ विकास करावा, असे आवाहन राज्यपाल भगत सिंह कोश्यारी यांनी केले.

एमआयटी वर्ल्ड पीस युनिव्हर्सिटी आयोजित बाराव्या भारतीय छात्र संसदेच्या समारोप सत्राला दूरदृष्य प्रणालीद्वारे त्यांनी संबोधित केले. कार्यक्रमाला उपमुख्यमंत्री देवेंद्र फडणवीस, ग्रामविकास मंत्री गिरीष महाजन, माजी लोकसभा अध्यक्षा मीरा कुमार, पद्मभूषण सुमित्रा महाजन, ज्येष्ठ शास्त्रज्ञ पद्मविभूषण डॉ. रघुनाथ माशेलकर, एमआयटी विद्यापीठाचे संस्थापक डॉ.विश्वनाथ कराड, राहुल कराड आदी उपस्थित होते.

श्री.कोश्यारी म्हणाले, समाजाला सकारात्मक दृष्टीकोनाची गरज आहे. भारत हे लोकशाही राष्ट्र असल्याने आपल्याला स्वत:ला राजकारणापासून दूर ठेवता येणार नाही. त्यामुळे विद्यार्थी जीवनापासूनच चांगले लोकशाही राष्ट्र घडविण्याचा विचार करावा. जीवनात कोणत्याही परिस्थितीत निराश न होता उच्च ध्येय ठेवून वाटचाल सुरू ठेवावी.

छात्र संसदेच्या माध्यमातून युवकांना संसदीय लोकशाहीसाठी आवश्यक नव्या गोष्टी कळतील. सहभागी युवकांनी विविध विषयावर विचार करावा आणि राष्ट्र उभारणीत आपले योगदान कसे देता येईल याचा ध्यास धरावा. छात्र संसदेच्या माध्यमातून युवकांना चांगले मार्गदर्शन मिळेल आणि हा उपक्रम देशासाठी मार्गदर्शक ठरेल, असा विश्वास त्यांनी व्यक्त केला.

राष्ट्रप्रेमाच्या भावनेने प्रेरित होऊन युवकांनी देशकार्यात योगदान द्यावे – उपमुख्यमंत्री देवेंद्र फडणवीस

भारतीय स्वातंत्र्याच्या अमृत महोत्सवानिमित्त लोकशाहीचा उत्सव साजरा करत असताना लोकशाहीला पुढे नेणाऱ्या युवकांशी संवाद साधताना आनंद होत असल्याचे सांगून समारोप भाषणात उपमुख्यमंत्री देवेंद्र फडणवीस म्हणाले, भारताने जगाला विचारांनी जिंकले आहे. ‘वसुधैव कुटुंबकम्’ संकल्पनेला पुढे नेण्याचे कार्य आपल्याला करावे लागेल. सहिष्णुतेच्या आधारे एकमेकांना पुढे नेत विचारांची कटुता, भेदभाव बाजूला सारत भ्रष्टाचार समुळ नष्ट करूनच देशाला पुढे नेता येईल. देशाला युवकांकडून मोठ्या अपेक्षा आहे. निडरता आणि राष्ट्रप्रेमाच्या भावनेने प्रेरित होऊन युवकांनी देशकार्यात योगदान द्यावे, असे आवाहन त्यांनी केले.

स्वातंत्र्याचा अमृत महोत्सव विचारांच्या मुक्ततेसाठी आहे, आपल्या ज्ञानकक्षा रुंदावण्यासाठी आहे. भारताची संस्कृती जगातील पुरातन संस्कृतीपैकी एक आहे. जगातील जुने विद्यापीठ भारतात होते. त्यामुळे विकसीत भारत आणि विश्वगुरू भारताची कल्पना करताना आपला वैभशाली गतकाळ जाणून घ्यावे लागेल. आपल्या चुकीच्या कामगिरीमुळे आपण पारतंत्र्यात गेलो हे लक्षात घेऊन प्रत्येकाला उत्तमतेसाठी प्रयत्न करावे लागतील. त्यातूनच आपण देशाला पुढे नेऊ शकतो.

क्षमता, विश्वास, युवाशक्ती, शक्यता, विचार आणि मूल्यांचा आधारे देश उभा रहातो. मूल्य जाणून घेतल्याशिवाय देशाला महान करता येणार नाही. सीमेवर लढणे सर्वांना शक्य होत नाही, नेतृत्व करणे प्रत्येकाला शक्य नाही. शक्य असलेल्या लहान कामातून आपण देशासाठी योगदान देऊ शकतो.

देशासाठी सर्वसमावेशक विकास महत्वाचा आहे. देशातील सर्व घटकांना सोबत घेऊनच पुढे जाता येईल. देशाची संपत्ती वाढविण्याचे प्रयत्न व्हायलाच हवे, पण त्यासोबत संसाधने अंतिम व्यक्तीपर्यंत पोहोचविणे हाच विकासाचा योग्य मार्ग आहे. भारत  स्टार्ट अपच्या बाबतीत दुसऱ्या क्रमांकाचा देश बनला आहे. आज सामान्य व्यक्ती युनिकॉर्न तयार करून देशात संपत्तीची निर्मिती करताना अनेकांना रोजगार देतो, हीच देशाची खरी शक्ती आहे.

आज जगात आपल्याला मोठी शक्ती मानले जाते. आपण जगातील पाचवी अर्थव्यवस्था आहोत. अशा परिस्थितीती नव्या तरुणाईला मनुष्यबळात परिवर्तीत करणे गरजेचे आहे. त्यांना देशाच्या अर्थव्यवस्थेत सहभागी करून घेणे आणि त्याच्या माध्यमातून अर्थव्यवस्था पुढे नेली जाणे महत्वाचे आहे. त्यादृष्टीने देशाचे नवे शैक्षणिक धोरण उपयुक्त आहे. आपली शिक्षण पद्धती उपयोजित होत आहे. रोजगार देणारे मनुष्यबळ निर्माण करण्याचे प्रयत्न आहेत, असे त्यांनी सांगितले. नवमाध्यमे अभिव्यक्ती स्वातंत्र्यासाठी आहेत. त्यांचा सम्यक उपयोग केल्यास सकारात्मक विचार समाजात पोहोचविता येतील असेही श्री.फडणवीस म्हणाले.

छात्र संसदेच्या माध्यमातून देशातील विविधतेचे दर्शन-गिरीष महाजन

मंत्री श्री.महाजन म्हणाले, छात्र संसदेच्या माध्यमातून भारतातील विविधतेचे दर्शन घडते आहे. भारताला तरुणांचा देश म्हणून ओळखले जाते. सरासरी ३० वर्ष वयाची  सर्वाधिक  लोकसंख्या भारतात आहेत. या युवाशक्तीला योग्य दिशा देण्यासाठी हे आयोजन उपयुक्त आहे. इथे ऐकलेले विचार व्यवहारात आणून युवकांनी देशकार्यासाठी योगदान द्यावे. लोकशाही व्यवस्था विकसीत करण्यासाठी युवकांनी राजकारणात यावे. त्याग, निष्ठा आणि समर्पण भावनेने काम केल्यास तुम्हाला कोणी पराभूत करू शकत नाही. भारतीय छात्र संसदेच्या माध्यमातून युवकांनी देशविकासात अधिकाधीक योगदान द्यावे आणि  देशाला महाशक्ती बनविण्यासाठी प्रयत्न करावे, असे आवाहन त्यांनी केले.

नवे स्वप्न घेऊन समाज घडवा-मीरा कुमार

श्रीमती मीरा कुमार म्हणाल्या, सामान्य, अतिसामान्य नागरिकांनी इंग्रजांविरुद्ध लढ्यात सहभाग घेतल्याने आपल्याला स्वातंत्र्य मिळाले. भौतिक प्रगती साधतांना मानसिक विकासाकडेही लक्ष देण्याची गरज आहे. परिश्रम आणि विवेक एकमेकांशिवाय अर्थहीन आहेत आणि त्यासोबत स्वप्नही आवश्यक आहे. नव्या पिढीने नवे स्वप्न घेऊन समाज घडविण्यासाठी, वंचितांना त्यांचे हक्क देण्यासाठी पुढे यावे असे आवाहन त्यांनी केले.

चारित्र्य निर्माण महत्त्वाचे – सुमित्रा महाजन

श्रीमती महाजन म्हणाल्या, चांगले कार्य आवश्यक आहे, पण त्यापेक्षाही चारित्र्य निर्माण महत्वाचे आहे. मन शुद्ध ठेवून कर्तव्य भावनेने पुढे गेल्यास जीवनात निश्चितपणे यशस्वी व्हाल. राष्ट्रभावनेने कार्य केल्यास यश तुच्याकडे धावून येईल. आपल्या गुणांच्या आधारे समाजासमोर आपली प्रतिमा उभी रहाते आणि ती कायम रहाते हे लक्षात ठेवावे, असे त्यांनी सांगितले.

भारतीय संस्कृतीचा लौकिक जगात पोहोचवा – डॉ.विश्वनाथ कराड

डॉ.कराड म्हणाले, आपल्या पालकांना अभिमान वाटेल असे कार्य युवकांनी करावे. भारतीय संस्कृती, परंपरा आणि ज्ञान प्रगतीचा खरा मार्ग आहे. सुख, समाधान आणि शांतीचे नवे स्वरुप जगासमोर ठेवण्याची जबाबदारी नव्या पिढीवर आहे. मनाचे शास्त्र जाणण्याचा प्रयत्न करावा. आपल्या कुटुंब आणि भारतीय संस्कृतीचा लौकिक जगात होईल असा प्रयत्न करावा, असे आवाहन त्यांनी केले.

सर्वसमावेशक नेतृत्वाचा विकास करा-डॉ.रघुनाथ माशेलकर

श्री.माशेलकर म्हणाले, युवकांनी नेहमी उच्च ध्येय ठेवावे आणि ते गाठण्यासाठी प्रयत्न करावे. आपण केलेल्या विचाराचा, निश्चयाचा नेहमी ध्यास धरावा. स्वत: सर्वसमावेशक नेतृत्वाचा विकास करा. नव्या नेतृत्वाने नेहमी नवे ज्ञान, विचार, मूल्य शिकण्याचा प्रयत्न करावा. युवकांनी नव्या विश्वासाने आणि उमेदीने आपल्या क्षेत्रात कार्यरत रहावे. आपल्या यशाला कोणत्याही मर्यादा नाहीत हा विचार मनात ठेवत निश्चित केलेल्या मार्गावर वाटचाल करावी, असे आवाहन त्यांनी केले.

रजिस्ट्रार ऑफ कंपनीज पुणे मंगेश जाधव यांनीही यावेळी मनोगत व्यक्त केले. भारत लोकशाही राष्ट्र असून लोकशाहीची मूल्ये पुढे नेण्याचे कार्य युवकांचे आहे. भारताची मूल्ये जगात पोहोचवून आपण देशाच्या लौकिकात भर घालावी, असे आवाहन त्यांनी केले.

लोकसभा अध्यक्ष ओम बिर्ला यांनी आयोजनाला पत्राद्वारे शुभेच्छा दिल्या. यावेळी सहभागी युवकांनी देशासाठी योगदान देण्याची शपथ केली.

यशस्वी  एकेडमी फॉर  स्किल्स तर्फे  आयोजित  ‘कौशल्य  दीक्षांत  समारंभ’ संपन्न

पुणे : दिनांक  १७ सप्टेंबर  २०२२ : कौशल्य  प्रशिक्षणाकडे  सकारात्मकतेने  पाहण्याची आवश्यकता  असून कौशल्य  प्रशिक्षणाचा सामाजिक स्तर  उंचावण्यासाठी  सर्वांनी प्रयत्नशील होण्याची गरज  आहे, असे  मत  भारतीय  युवा शक्ती ट्रस्टच्या मेन्टॉर  जुही  बोस  यांनी  व्यक्त केले.

यशस्वी  एकेडमी  फॉर स्किल्स तर्फे पुण्यातील  शिवाजीनगर  येथे आयोजित करण्यात  आलेल्या  कौशल्य  दीक्षांत  समारंभात त्या  प्रमुख  अतिथी  म्हणून  बोलत  होत्या. यावेळी बोलताना त्या म्हणाल्या  की, एखाद्या डिप्लोमा  किंवा पदवी धारकाला  ज्याप्रमाणे  समारंभपूर्वक  प्रमाणपत्र  प्रदान केले जाते. त्याचप्रमाणे  अप्रेन्टिसशिप  प्रशिक्षण पूर्ण  करणाऱ्या प्रशिक्षणार्थ्यांना देखील  समारंभपुर्वक  प्रमाणपत्र  प्रदान करण्यासाठी  ‘कौशल्य  दीक्षांत  समारंभ’ आयोजित  करणे  ही  केंद्र सरकारची संकल्पना खूपच  प्रेरणादायी  आहे असे मत जुही  बोस  यांनी  व्यक्त केले.   

अप्रेन्टिसशिप  प्रशिक्षण  पूर्ण  केल्यानंतर  उद्योगक्षेत्रात रोजगारसंधी प्राप्त  झाल्यानंतरसुद्धा आपल्यातील  शिकण्याची  वृत्ती  कायम जागी  ठेवा. सातत्याने आपल्यातील दोषांचे  निरसन  करत सद्गुणांची  वाढ करण्याकडे लक्ष  देत राहायला हवे. आपल्याला  जे आणि ज्या प्रकारचे काम करण्याची संधी मिळालेली  असेल त्या काम करण्याच्या  पद्धतीमध्ये आपण आणखी  काय  सुधारणा  करू  शकतो, यादृष्टीने  विचार  करीत एकमेकांना  सहकार्य  करण्याची, एकमेकांकडून  शिकण्याची वृत्ती  जोपासायला  हवी  असे  मत  जुही  बोस  यांनी  व्यक्त  केले.

याप्रसंगी  बोलताना  भारतीय  युवा शक्ती ट्रस्टचे  फिल्ड  ऑफिसर सोहम धापटे यांनी उदयोजकता  म्हणजे काय हे विविध  उदाहरणांद्वारे  समजावून  सांगत  बीवायएसटी कशाप्रकारे नवउद्योजकांना  सहकार्य व मार्गदर्शन  करते  याविषयी  सविस्तर  माहिती  दिली.  

यावेळी कार्यक्रमाचे प्रास्ताविक करताना  यशस्वी एकेडमी फॉर स्किल्सचे  संचालक  राजेश  नागरे यांनी कौशल्य दीक्षांत  समारंभानिमित्त  विद्यार्थ्यांचे  अभिनंदन  करीत त्यांना  पुढील  वाटचालीसाठी  मार्गदर्शन  करीत  शुभेच्छा  दिल्या.

यावेळी मान्यवरांच्या हस्ते अप्रेन्टिस योजनेंतर्गत  विविध  स्केटर स्किल कौन्सिलच्या  अंतर्गत  पुणे येथील विविध  आस्थापनांमधील अप्रेन्टिस  प्रशिक्षण  पूर्ण केलेल्या प्रशिक्षणार्थ्यांना  प्रमाणपत्र प्रदान  करण्यात  आली. कार्यक्रमाला  यशस्वी  एकेडमी  फॉर स्किल्सच्या  संचालिका  स्मिता  धुमाळ, ‘यशस्वी’ संस्थेचे  संचालक  संजय  छत्रे, बीवायएसटी चे क्लस्टर  हेड  अभिषेक  धर्माधिकारी  उपस्थित  होते.

या कार्यक्रमासाठी  ईशा  फाटक, गणेश  साळवे, अबिद  शेख  आदींनी  विशेष  सहकार्य  केले.

डॉ. अविनाश भोंडवे लिखित ‘पुनरावलोकन कोरोना काळाचे’ या पुस्तकाचे प्रकाशन 
पुणे : देशात करोना संसर्गाला सुरुवात झाली त्यावेळी परिस्थिती भयंकर होती परंतु करोनाचा उद्रेक झाल्यानंतर ज्या पातळीवरून आपण त्यातून बाहेर पडलो ती अतिशय सकारात्मक गोष्ट आहे.  कोरोनामुळे नागरिकांमध्ये आरोग्याविषयी जनजागृती वाढली आहे. परंतु  देशात विज्ञान आणि आरोग्याबाबत साक्षरता नाही, अशी खंत पद्मश्री डाॅ. रमण गंगाखेडकर यांनी व्यक्त केली
डॉ. अविनाश भोंडवे लिखित ‘पुनरावलोकन कोरोना काळाचे’ या पुस्तकाचे प्रकाशन डॉ. गंगाखेडकर यांच्या हस्ते नवी पेठ येथील पत्रकार भवन येथे झाले. यावेळी महाराष्ट्र टाइम्सचे निवासी संपादक श्रीधर लोणी, दिलीपराज प्रकाशनचे राजीव बर्वे, डाॅ.अविनाश भोंडवे उपस्थित होते. दिलीपराज प्रकाशनने पुस्तकाचे प्रकाशन केले आहे.

डॉ.रमण गंगाखेडकर म्हणाले, कोरोना संसर्गाच्या सुरुवातीच्या काळात कम्युनिकेशन मॉडेल्स नव्हते त्यामुळे लोकांशी संवाद साधण्यास अडचणीचे जात होते. कोरोनाच्या दुसऱ्या लाटेत काही चुका झाल्या त्यामुळे आपले नुकसान झाले, असेही त्यांनी या वेळेला सांगितले.
डॉ.अविनाश भोंडवे म्हणाले, कोरोनाचे प्रतिबंधात्मक उपाय लोक विसरले. कोरोना अखेरच्या घटका मोजत आहे, परंतु तो संपला नाही. कोरोना काळात सोशल मीडियाच्या माध्यमातून अनेकदा चुकीची माहिती पसरविली गेली. भारत देश फारसा शास्त्रोक्त नाही. त्यामुळे शास्त्रावर आधारित गोष्टींवर पटकन विश्वास न ठेवता पारंपारिक समजुतीवर लोक जास्त विश्वास ठेवतात. आरोग्याविषयक जनजागृतीचा बहुसंख्य लोकांवर परिणाम होत नाही परंतु, काही टक्के लोकांवर नक्की परिणाम होतो यासाठी आरोग्य विषयी जनजागृती करत राहिली पाहिजे, असेही त्यांनी सांगितले.

अखिल मंडई मंडळाच्यावतीने  गणेशोत्सवात सेवा देणारे स्वच्छता कर्मचारी आणि निवृत्त सैन्याधिकाऱ्यांचा कृतज्ञता सन्मान सोहळा

पुणे : आपल्याला नेमून दिलेले काम आपण सगळेच करतो. परंतु काही लोक हे आपले काम भक्ती समजून करतात. कामाचे स्वरूप भक्तिमय होते तेव्हा ते कार्य कर्तृत्व म्हणून नावाजले जाते. असे मत एअरमार्शल भूषण गोखले (नि.) यांनी व्यक्त केले.
अखिल मंडई मंडळाच्यावतीने गणेशोत्सवात आणि विसर्जन मिरवणूकीनंतर शहराची स्वच्छता करणाऱ्या सफाई कर्मचाऱ्यांच्या कृतज्ञता सन्मान सोहळ्याचे आयोजन करण्यात आले होते. यावेळी भारतीय स्वातंत्र्याच्या अमृतमहोत्सवानिमित्त तिन्ही दलातील  निवृत्त सैन्याधिकाऱ्यांचा देखील सन्मान करण्यात आला. प्रशासकीय अधिकारी आश्विनी भागवत, लोकमान्य मल्टीपर्पज बॅंकेचे हर्षद झोडगे, अखिल मंडई मंडळाचे अध्यक्ष अण्णा थोरात, कोषाध्यक्ष संजय मते, विश्वास भोर, देविदास बहिरट, सुरज थोरात, विकी खन्ना, दादा मोरे, संजय यादव, नारायण चांदणे यावेळी उपस्थित होते.
भूषण गोखले म्हणाले, पुण्याला सर्वात चांगले शहर समजले जाते. यामध्ये स्वच्छता कर्मचाऱ्यांचे देखील मोठे योगदान आहे. देशासाठी लढणारे सैनिक आणि स्वच्छता कर्मचारी हे भक्तीच्या भावनेतून आपले काम करत असतात. गणपतीवर भक्ती करणारे जसे कार्यकर्ते असतात तसेच भारत मातेची सेवा करणारे सैनिक हे देशाचे कार्यकर्ते आहेत, अशी भावना त्यांनी व्यक्त केली.

अण्णा थोरात म्हणाले, विसर्जन मिरवणुकीनंतर सर्वत्र कचऱ्याचा खच पडलेले दिसतात. स्वच्छता कर्मचाऱ्यांमुळे विसर्जन मिरवणूक संपल्यानंतर काही वेळातच पुण्यातील रस्ते चकाचक होतात. त्यामुळे शहरातील स्वच्छता कर्मचाऱ्यांचा मान राखणं हे गरजेचे आहे.