पुणे दि.२०- जिल्हाधिकारी डॉ.राजेश देशमुख यांनी कोतवाल संवर्गातील ५७ कर्मचाऱ्यांना दिवाळीचा सण जवळ आला असताना पदोन्नतीची विशेष भेट दिली आहे.

महाराष्ट्र राज्यातील कोतवाल महसूल विभागाच्या अधिपत्याखालील अवर्गीकृत कर्मचारी आहे. महाराष्ट्र शासनाच्या महसूल व वन विभागाकडील निर्णयानुसार महसूल विभागांतर्गत असणाऱ्या गट ‘ड’ च्या प्रथम नियुक्तीच्या पदांपैकी नियमित पदांमधून ४० टक्के पदे कोतवालांसाठी राखीव ठेवण्यात आलेली आहेत. पुणे जिल्ह्याच्या आस्थापनेवरील गट ‘ड’ शिपाई संवर्गाच्या एकूण पदांच्या ४० टक्क्यांनुसार येणाऱ्या पदापैकी ५९ पदे कोतवालातून गट ‘ड’ शिपाई पदावर प्रथम नियुक्ती देण्यासाठी उपलब्ध झाली आहेत.

जिल्हाधिकारी डॉ. देशमुख, अपर जिल्हाधिकारी विजयसिंह देशमुख आणि निवासी उपजिल्हाधिकारी संजय तेली, भूसंपादन अधिकारी श्रीमंत पाटोळे यांच्या मार्गदर्शनानुसार कोतवालातून गट ‘ड’ शिपाई पदावर प्रथम नियुक्ती देण्याचे कामकाज प्राधान्य देत पूर्ण करण्यात आलले आहे. गुणवत्तेनुसार पात्र असलेल्या ५७ कोतवाल कर्मचाऱ्यांना दिवाळीच्या मुहूर्तावर अनोख्या भेट स्वरूपात डॉ. देशमुख यांच्या हस्ते गट ‘ड’ शिपाई संवर्गाच्या रिक्त पदावर प्रथम नियुक्ती आदेश वितरीत करण्यात आले.

पदोन्नती मिळालेल्या कर्मचाऱ्यांमध्ये शिरूर तालुक्यातील ३, हवेली २, मावळ २, खेड ४, दौंड ११, पुरंदर ६, बारामती ६, इंदापूर ५, जुन्नर ७, आंबेगाव १, भोर ९ आणि वेल्हा तालुक्यातील एक कोतवालांचा समावेश आहे, अशी माहिती श्री. तेली यांनी दिली आहे. पदोन्नतीमुळे या सर्व कोतवालांसाठी ही दिवाळी आनंददायी ठरण्यासोबतच स्मरणीयही राहणार आहे

व्ही. व्ही. नातू स्मृती अखिल भारतीय बॅडमिंटन स्पर्धा

पुणे : महाराष्ट्राच्या हर्षिल दाणी, रोहन गुरबानी, मालविका बनसोड, पूर्वा बर्वे, नेहा पंडित यांनी पुणे जिल्हा आणि मेट्रोपोलिटन बॅडमिंटन संघटनेच्या (पीडीएमबीए) वतीने आयोजित व्ही. व्ही. नातू स्मृती अखिल भारतीय मानांकन बॅडमिंटन स्पर्धेत विजयी सलामी दिली.

शिवाजीनगर येथील पीडीएमबीएच्या मॉडर्न स्पोर्ट्स कॉम्प्लेक्समध्ये ही स्पर्धा सुरू आहे. या स्पर्धेचे अधिकृत उदघाटन महाराष्ट्र बॅडमिंटन संघटनेचे अध्यक्ष अरुण लखानी यांच्या हस्ते झाले. यावेळी पीडीएमबीएचे सचिव रणजीत नातू, अध्यक्ष अनिरुद्ध देशपांडे, टूर्नामेंट रेफ्री ओमर राशिद, आयोजन समिती सचिव राजीव बाग, पीडीएमबीएचे वरिष्ठ उपाध्यक्ष सदाशिव नातू तसेच श्रीकांत वाड, शिरीष बोराळकर, अविनाश जाधव, आनंद जोशी, सारंग लागू, शशांक हळबे यावेळी उपस्थित होते.यावेळी उपस्थित होते. याच वेळी पुणे येथे होणाऱ्या वरीष्ठ राष्ट्रीय बॅडमिंटन स्पर्धेच्या लोगोचे अनावरण करण्यात आले.

पात्रता फेरीतून आलेल्या हर्षिलने तमिळनाडूच्या खिरुथिक सी.चा २१-११, २१-१४ असा, तर रोहन गुरबानीने हरियाणाच्या बलराज कजलाचा २१-११, २१-१७ असा पराभव केला. पात्रता फेरीतून आलेल्या कर्नाटकाच्या डॅनिएल फरिद एस.ने वाइल्ड कार्डद्वारे प्रवेश मिळालेल्या महाराष्ट्राच्या आर्य भिवपाठकीला २१-१७, २१-१३ असे नमविले. यानंतर पात्रता फेरीतून आलेल्या राजस्थानच्या प्रणय कट्टाने महाराष्ट्राच्या दर्शन पुजारीला २१-११, २१-१४ असे, तर कर्नाटकाच्या पृथ्वी रॉय के.ने महाराष्ट्राच्या वसीम शेखला २१-१७, २१-१४ असे पराभूत केले. कौशल धर्मामेरने तेलंगणच्या ऋषेंद्र तिरुपतीला २१-९, २२-२० असे नमविले.

महिला एकेरीच्या सलामीच्या लढतीत अग्रमानांकित मालविका बनसोडने पात्रता फेरीतून आलेल्या महाराष्ट्राच्याच ओजल राजकवर २१-९, २१-२ असा सहज विजय मिळवला. यानंतर रिया हब्बूने कर्नाटकाच्या ग्लोरिया आठवले व्ही.वर २१-१७, १८-२१, २१-१२ अशी, तर तिसऱ्या मानांकित पूर्वा बर्वे गोव्याच्या अंजनाकुमारीवर २१-११, २१-६ अशी मात केली. सातव्या मानांकित नेहा पंडितने पात्रता फेरीतून आलेल्या हरियाणाच्या चित्वान खत्रीवर १९-२१, २१-१५, २१-१५ असा, अकराव्या मानांकित श्रुती मुंदडाने महाराष्ट्राच्याच सानिका पाटणकरवर २१-१, २१-८ असा विजय मिळवला.

निकाल : पुरुष एकेरी – अभिषेक सैनी (हरियाणा) वि. वि. अधीप गुप्ता (गुजरात) २१-१८, २१-१४, कौशिक सी. एस. (तमिळनाडू) वि. वि. सिद्धार्थ मिश्रा (उत्तर प्रदेश) २१-१४, १२-२१, २१-१९, प्रणव राव गंधम (तमिळनाडू) वि. वि. हर्ष चापलोत (राजस्थान) २१-१८, २१-१६, तुकूम ला वि. वि. ऋषभ देशपांडे (महाराष्ट्र) १७-२१, २१-१८, २१-१५, मनराजसिंग (हरियाणा) वि. वि. किरणकुमार (तेलंगण) २१-१५, १९-२१, २१-१०, कार्तिक जिंदाल (हरियाणा) वि. वि. जस्करण सिंग (हरियाणा) २२-२०, २१-८, हेमंत एम. जी. (कर्नाटक) वि. वि. सिद्धान्त गुप्ता (तमिळनाडू) २२-२०, १३-२१, २१-१३.

महिला एकेरी – मिहिका भार्गव (मध्य प्रदेश) वि. वि. उत्सवा पलित (पश्चिम बंगाल) १४-२१, २१-७, २१-१६, मेघना रेड्डी (तेलंगण) वि. वि. हिमांशी रावत (उत्तराखंड) २१-१५, २१-९, मेघना एस. (केरळ) वि. वि. ऋथ मिशा विनोद २५-२३, २२-२०, ऐश्वर्या मेहता (मध्य प्रदेश) वि. वि. प्रीती के. (आंध्र प्रदेश) २१-१६, २५-२३, मधुमिता नारायण (महाराष्ट्र) वि. वि. प्रज्ञा के. पी. एस. (२२-२०, १४-२१, २१-११), श्रेया लेले (गुजरात) वि. वि. गायत्री राणी जैस्वाल (कर्नाटक) २१-१२, २१-११.

पुणे, दि. २० ऑक्टोबर २०२२: सणांचा राजा असलेल्या दिवाळीची लगबग सुरु झाली आहे. दिवाळीनिमित्त होणारी विद्युत सजावट, रोषणाई तसेच फटाक्यांची आतषबाजी करताना वीजसुरक्षेची काळजी घेणे आवश्यक आहे. त्यातच सध्या पावसाची दररोज हजेरी सुरु असल्याने वीज सुरक्षेबाबत अधिक काळजी घेणे गरजेचे आहे. सार्वजनिक वीजयंत्रणेसोबतच घरगुती रोषणाईच्या विद्युत उपकरणांपासून सतर्क राहावे. कोणत्याही प्रकारचा धोका न पत्करता वीजसुरक्षेची काळजी घेत दिवाळी सण साजरा करण्याचे आवाहन महावितरणने केले आहे.

दरम्यान, दिवाळी सणाच्या कालावधीत वीजपुरवठा सुरळीत ठेवण्यासाठी महावितरणच्या पुणे परिमंडलातील अभियंता व कर्मचाऱ्यांनी सज्ज व सतर्क राहण्याच्या सूचना मुख्य अभियंता श्री. सचिन तालेवार यांनी दिल्या आहेत.

महावितरणची विजयंत्रणा ही सार्वजनिक ठिकाणी आहे. यात उच्च व लघुदाबाच्या उपरी वीजवाहिन्या, रोहित्र, फिडर पिलर आदी यंत्रणा उघड्यावर असल्याने फटाके फोडताना त्यापासून सुरक्षित अंतर ठेवावे. फटाक्यांच्या आतषबाजीत सार्वजनिक वीजयंत्रणेला आगीचा धोका निर्माण होणार नाही याची काळजी घ्यावी. रोहित्र, फ्यूज पेट्या, फिडर पिलर, रिंग मेन युनिटजवळ फटाके फोडू नयेत किंवा त्याठिकाणी कोणत्याही प्रकारचा कचरा टाकू नये अथवा तो जाळू नये. वीजवाहिन्यांना स्पर्श होईल किंवा धोका निर्माण होईल असे रॉकेटसारखे फटाके वाहिन्यांखाली उडवू नयेत. मोकळ्या जागेतच फटाके उडवावेत. वीजयंत्रणेला आग लागल्यास, धोका निर्माण झाल्यास, वीजपुरवठा खंडित झाल्यास महावितरणच्या २४ तास सुरु असणाऱ्या कॉल सेंटरच्या १८००-२१२-३४३५ किंवा १८००-२३३-३४३५ किंवा १९१२ या टोल फ्री क्रमांकावर संपर्क साधावा.

दिवाळी साजरी करताना घरगुती विद्युत उपकरणांपासून देखील सतर्क राहावे. घराच्या किंवा इमारतीच्या रोषणाईसाठी दिव्यांची विद्युत माळ चांगल्या दर्जाची असल्याची खात्री करून घ्यावी. विद्युत माळेचे वायर, दिवे, सॉकेट दर्जेदार नसल्यास धोका निर्माण होऊ शकतो. घर किंवा इमारतीचे अर्थिंग योग्य असल्याची तपासणी करावी. घराबाहेर आकाशकंदील लावताना तुटलेल्या वायरचा वापर टाळावा किंवा तुटलेली वायर चांगल्या दर्जाच्या इन्सूलेशन टेपने सुरक्षित करून घ्यावी. घरगुती उपकरणांसह विद्युत माळेपासून सुरक्षित अंतरावर तेलाच्या वातीचे दिवे लावावेत. विद्युत सॉकेटवर अधिकचा भर टाकू नये. आकाश कंदिल किंवा दिव्यांच्या विद्युत माळेसाठी थ्रीपीनचा वापर न करता वायर्स थेट प्लगच्या छिद्रात आगपेटीच्या काड्यांच्या सहाय्याने खोचले जातात. त्यामुळे त्या प्लगमध्ये स्पार्कींग सुरु होऊन आग लागण्याची शक्यता असते. गॅलरीमधील लोखंडी जाळी किंवा घराचा लोखंडी जिना किंवा इतर कोणत्याही लोखंडी वस्तूपासून विद्युत दिव्यांची व आकाश कंदिलाची वायर दूर ठेवावी. ही वायर एकसंघ असावी. तुटलेली किंवा सेलोटेपने जोडलेली नाही याची खात्री करून घ्यावी.

पुणे, पिंपरी-चिंचवड, पुणे महानगर प्रदेश विकास प्राधिकरण, जिल्हा परिषद आणि अन्य स्थानिक स्वराज्य संस्थांच्या अधिपत्याखाली असलेल्या जिल्ह्यातील नागरिकांना पाणीटंचाईला सामोरे जावे लागत असल्याने त्या विरोधात पुणे, पिंपरी-चिंचवड आणि जिल्ह्यातील अनेक संघटनांनी एकत्र येत मुंबई उच्च न्यायालयात याचिका दाखल केलेल्या याचिकेवर या यंत्रणांना मुंबई उच्च न्यायालायने नोटिस बजाविली असून २९ नोव्हेंबरपर्यंत त्यांचे म्हणणे मांडण्याचे आदेश न्यायालयाने दिले आहेत.

वाघोली हाउसिंग सोसायटी असोसिएशन, पुणे जिल्हा सहकारी गृहनिर्माण संस्था आणि अपार्टमेंट फेडरेशन, अखिल भारतीय ग्राहक पंचायत, पिंपरी-चिंचवड सहकारी गृहनिर्माण संस्थांचा संघ मर्यादित, बाणेर-पाषाण लिंक रोड वेलफेअर ट्रस्ट, बालेवाडी रेसिडेन्सी को-ऑपरेटिव्ह हाउसिंग वेलफेअर फेडरेशन लिमिटेड, डिअर सोसायटी वेलफेअर असोसिएशन, बावधन सिटीझन्स फोरम, हिंजवडी एम्प्लाॅइज ॲण्ड रेसिडन्ट्स ट्रस्ट, औंध विकास मंडळ, असोसिएशन ऑफ नगर रोड सिटीझन फोरम या संस्थांनी ॲड. सत्या मुळे यांच्या मार्फत याचिका दाखल केली आहे. केंद्र सरकार, केंद्रीय भूजल मंडळ, जलसंपदा विभाग, महाराष्ट्र जीवन प्राधिकरण, महाराष्ट्र जलसंपत्ती नियामक प्राधिकरण, पुणे महापालिका, पिंपरी-चिंचवड महापालिका, पुणे महानगर प्रदेश विकास प्राधिकरण आणि जिल्हा परिषद यांच्याविरोधात ही याचिका आहे, अशी माहिती ॲड. सत्या मुळे यांनी दिली.

गेल्या तीन ते चार वर्षांपासून मुबलक प्रमाणात पाऊस होऊनही जिल्हा आणि शहरी भागातील रहिवाशांना पाणीटंचाईचा सामना करावा लागत आहे. त्यासंदर्भात स्थानिक स्वयंसेवी संस्था आणि रहिवासी संघटनांनी स्थानिक प्राधिकरणाबरोबर बैठका घेतल्या, निवेदनेही दिली आहेत. मात्र पाणीपुरवठ्यात कोणतीही सुधारणा झालेली नाही. विंधन विहिरींद्वारे पाणी उपसा करण्यासाठी संरक्षण आणि नियमन करण्याचे कोणतेही धोरण नाही. कृत्रित पाणीटंचाई करून पाणी विकत घेण्यास भाग पाडले जात आहे. त्यामुळे जलवाहिनी द्वारे किंवा अन्य कोणत्याही पर्यायी पद्धतीने माणसी १३५ लिटर पाणीपुरठा तत्काळ करावा, असे या याचिकेत नमूद करण्यात आले आहे.

पुणे दि.२०: प्रधानमंत्री पिक विमा योजनेअंतर्गत सहभाग नोंदविलेल्या शेतकऱ्यांनी विमासंरक्षीत पिकाच्या गारपीट, अवेळी पाऊस, ढगफुटी आदी नैसर्गिक कारणाने झालेल्या नुकसानीची माहिती घटना घडल्यापासून ७२ तासाच्या आत नुकसानग्रस्त पिकाच्या फोटोसह आपल्या संबंधित विमा कंपनीकडे सादर करावी, असे आवाहन कृषी उपसंचालक अरुण कांबळे यांनी केले आहे.

प्रधानमंत्री पिक विमा योजनेअंतर्गत सहभाग नोंदविलेल्या शेतकऱ्यांचे विमा संरक्षित क्षेत्र जलमय होणे, भूस्खलन, ढगफुटी किंवा वीज कोसळल्यामुळे लागणारी नैसर्गिक आग आदी घटनांमुळे पिकांचे नुकसान झाल्यास नुकसानीच्या स्वरुपानुसार विहित रक्कम शेतकऱ्यांना देय असते. नैसर्गिक आपत्ती या घटकांतर्गत विमा संरक्षित क्षेत्रात पडलेल्या पावसामुळे पाण्याची पातळी वाढून किंवा पुराचे पाणी शेतात शिरून, शेत दीर्घकाळ जलमय राहिल्यामुळे पिकाचे नुकसान झाल्याचे निदर्शनास आल्यास नुकसानग्रस्त शेतकऱ्यांनी घटना घडल्यापासून ७२ तासाच्या आत माहिती द्यावी.

नुकसानीबाबतची माहिती शेतकऱ्यांनी आपल्या संबंधित विमा कंपनीला देण्यासाठी क्रॉप इन्शुरन्स ॲप, विमा कंपनीचा टोल फ्री क्रमांक, विमा कंपनीचा ई-मेल, विमा कंपनीचे तालुकास्तरीय कार्यालय, कृषी विभागाचे मंडल कृषी अधिकारी कार्यालय, ज्या बँकेत विमा जमा केला ती बँक शाखा या पर्यायांचा वापर करता येईल, असेही आयुक्तालयाने कळवले आहे.
000

जाहिराती करून बोगस माल खपविणाऱ्यांवर छापे मारण्याची मागणी –कपड्यांचे बोगस ब्रँड तपासण्याची मोहीम राबवा

पुणे, दि. २०: अन्न व औषध प्रशासन कार्यालयाच्यावतीने पुणे शहरातील विविध मिठाईच्या दुकानांनी मागवलेला ५ लाख ९० हजार ४०० रुपये किंमतीचा गुजरात बर्फीचा साठा जप्त केला आहे.अन्न व औषध प्रशासन पुणे कार्यालयाने मिळालेल्या माहितीच्या अनुषंगाने सोमवारी (ता. १७) रोजी अशोक राजाराम चौधरी यांच्या वाहनातून गुजरात बर्फी – स्वीट हलवा (व्हानवटी), रिच स्वीट डिलाईट (ब्रिजवासी), स्वीट हलवा (ब्रिजवासी), स्वीट हलवा (पारस), स्पेशल बर्फी व स्वीट हलवा या अन्न पदार्थाचे ६ नमुने तपासणीसाठी घेवून हा साठा जप्त केला.

हा गुजरात बर्फी अन्न पदार्थ पुणे शहरातील मे. अग्रवाल स्वीट मार्ट, बुधवार पेठ, मंडई, मे. कृष्णा डेअरी फार्म, मानसरोवर अॅनेक्स, कोंढवा बु., मे. अशोक राजाराम चौधरी, गहुंजे, देहुरोड व हिरसिंग रामसिंग पुरोहित, बालेवाडी यांनी गुजरात व वसई (जि. पालघर) येथून मागविला असल्याचे आढळून आले. या विक्रेत्याकडे त्यांनी मागवलेल्या गुजरात बर्फीचा वापर कशासाठी करण्यात येत होता याबाबत अधिक तपास करून त्याअनुषंगाने संबंधितांविरुद्ध नियमाप्रमाणे कारवाई करण्यात येणार आहे.

अन्न व औषध प्रशासन पुणे कार्यालयातर्फे दिवाळीच्या पार्श्वभूमीवर तपासणी नमुने घेण्याची मोहिम राबविण्यात येत असून या अंतर्गत १ ऑक्टोबर ते १९ ऑक्टोबर या कालावधीत मिठाईचे २८, खवा-२, रवा, मैदा, बेसन- १२, खाद्यतेल- ७, वनस्पती/घी- २, नमकीन- ३ व इतर अन्न पदार्थाचे १६ असे एकूण ७० अन्न नमुने विश्लेषणासाठी घेतले आहेत. तसेच खाद्यतेल पॅकिंगसाठी जुन्या डब्याचा पुनर्वापर केल्याचे आढळून आल्याने तीन ठिकाणी ४ लाख ५१ हजार ४०० रुपये किंमतीचा साठा, हिरवा वाटाणा- ३९ हजार ८०० रुपये, मिठाई- ६ हजार ७५० रुपये आणि घी /खवा १२ हजार ४०० रुपये असा एकूण ५ लाख १० हजार ४०० रुपये किंमतीचा साठा जप्त करण्यात आला आहे.

सर्व मिठाई विक्रेत्यांनी दुकानात विक्रीसाठी ठेवलेल्या मिठाईच्या ट्रे वरती ‘बेस्ट बिफोर’ दिनांक नमूद करावा व मिठाई बनविण्यासाठी भेसळयुक्त स्वीट खवा (गुजरात बर्फी) चा वापर करु नये, दुधापासून बनविलेल्या चांगल्या दर्जाच्या खव्याचा वापर करावा. स्वीट खवा(गुजरात बर्फी) चा वापर करुन मिठाई बनवित असल्याचे आढळल्यास मिठाई विक्रेत्यावर कारवाई करण्यात येईल, असे अन्न व औषध प्रशासन विभागाचे सहआयुक्त संजय नारागुडे यांनी स्पष्ट केले आहे.

जाहिराती करून बोगस माल खपविणाऱ्यांवर छापे मारण्याची मागणी

दरम्यान दिवाळी निमित्त कपडे आणि तदनुषंगिक इलेक्ट्रोनिक बाजार तेजीत असतो याचा फायदा घेऊन १ वर २ फ्री , ३ वर ८ फ्री अशा स्वरूपाच्या जाहिराती करून बोगस ब्रँड कपडे मोठ्या प्रमाणात शहरात विकले जातात , कपडेच नाहीत तर इलेक्ट्रोनिक वस्तूंच्या बाबत हि असेच प्रकार होतात .याकडे लक्ष वेधून यावर कारवाई केली पाहिजे अशी मागणी होऊ लागली आहे.
0000