लायन्स क्लब ऑफ शिवाजीनगर च्या वतीने ५० बालकांसोबत दिवाळी उत्सव
    पुणे : दिवाळीतील सुंदर सजावट…आवडीची गाणी लावल्यानंतर गाण्यांच्या तालावर नाचण्याचा आनंद लुटणारी मुले..जादूचे कार्यक्रम आणि विविध खेळ खेळत केक कापण्याचा आनंद  केमोथेरपी घेत असलेल्या कॅन्सरग्रस्त मुलांनी लुटला. दिवाळी उत्सवाचा आनंद या चिमुकल्यांना देखील मिळावा यासाठी त्यांच्यासोबत दिवाळी साजरी करण्यात आली. 
लायन्स क्लब पूना शिवाजीनगर यांच्या वतीने भारती हाॅस्पीटल व संशोधन केंद्र पुणे येथे ५० बाल कर्करूग्णांसाठी दिवाळी सेलिब्रेशन विथ डिफरन्स उपक्रमांतर्गत दिवाळी उत्सवाचे आयोजन करण्यात आले होते.प्रमुख पाहुणे नरेंद्र भंडारी, क्लबचे अध्यक्ष जीवन हेंद्रे, प्रकल्प समन्वयक विजया बांगड आणि विजय जाजू, त्यांचे मार्गदर्शक डॉ. ज्योती तोष्णीवाल उपस्थित होते. भारती हाॅस्पीटलच्या उपवैद्यकीय संचालक डॉ. अरुंधती पवार आणि कर्करोग-विशेषज्ञ डॉ. विभा बाफना यांचे सहकार्य उपक्रमाला मिळाले. कॅन्सरग्रस्त मुले आणि त्यांच्या कुटुंबियांच्या चेहऱ्यावर हास्य फुलवण्याचा प्रयत्न लायन्स क्लब पूना शिवाजीनगरच्या सदस्यांच्यावतीने करण्यात आला.
डॉ. अनिल तोष्णीवाल यांच्या उपस्थितीत अध्यक्ष जीवन हेंद्रे आणि इतरांना आंतरराष्ट्रीय अध्यक्ष प्रमाणपत्र देऊन सन्मानित केले. संजीव भोसले आणि नीलिमा भोसले यांनी हा उपक्रम प्रायोजित केला होता.

नरेंद्र भंडारी म्हणाले, केमोथेरपी उपचार घेत असलेली ही मुले खूप नाजूक आहेत. त्यांना एकत्र आणणे खूप कठीण आहे. भारती हॉस्पिटल आणि रिसर्च सेंटरच्या प्रचंड सहकार्याने आमच्या लायन्स क्लब शिवाजीनगरने मुलांच्या चेहऱ्यावर हास्य फुलवण्यासाठी केलेला हा कार्यक्रम कौतुकास्पद आहे.

पुणे : मोठ्या मुलीने फ्लॅट आपल्या नावावर करावा, यासाठी आपल्या ८३ वर्षाच्या आईचा हात पिरगळुन तो फॅक्चर केल्याचा प्रकार समोर आला आहे. याप्रकरणी हडपसरमधील अमरगीत सोसायटीत राहणार्‍या एका ८३ वर्षाच्या महिलेने हडपसर पोलीस ठाण्यात फिर्याद (गु. रजि. नं. १३५७/२२) दिली आहे. त्यावरुन पोलिसांनी परमजित नावाच्या मुलीवर गुन्हा दाखल केला आहे. हा प्रकार ३० ऑक्टोबर रोजी सकाळी साडेअकरा वाजता घडला होता.याबाबत पोलिसांनी दिलेल्या माहितीनुसार, आरोपी ही फिर्यादी यांची मोठी मुलगी आहे.”हा फ्लॅट माझ्या नावावर कर, हा फ्लॅट माझ्या वडिलांनी मला दिलेला आहे. तू या घरात परत यायचे नाही.परत तुम्ही दोघीही येथे आल्यास मी तुमचा जीव घेईन,”असे परमजित हिने आपल्या आईला धमकाविले.फिर्यादी व तिची लहान मुलगी यांना शिवीगाळ करुन परमजित कौर हिने आपल्या ८३ वर्षाच्या आईचा उजवा हातपिरगळला. हाताची करंगळी पिळगल्याने ती फॅक्चर झाली आहे. पोलीस हवालदार क्षीरसागर तपास करीत आहेत.

पुणे -कोंढवा येथील क्लोव्हर हिल प्लाझा इमारतीत असलेल्या लॅविटेट हॉटेल व द ब्रेक रूम हॉटेल या दोन हॉटेलमधील अवैध हुक्का बारवर गुन्हे शाखेच्या सामाजिक सुरक्षा विभागाने छापा टाकला.या कारवाईत पोलिसांनी 65 हजार रुपयांचा मुद्देमाल जप्त करुन दोन जणांवर कोंढवा पोलीस ठाण्यात गुन्हा दाखल केला आहे. ही कारवाई काल येथे करण्यात आली.

सामाजिक सुरक्षा विभागाच्या पोलिसांना कोंढवा येथील लॅविटेट हॉटेल व द ब्रेक रुम हॉटेल मध्ये अवैध हुक्का बार सुरु असल्याची माहिती मिळाली. पथकाने पाळत ठेवून दोन्ही हॉटेलवर छापा टाकला असता त्याठिकाणी बेकायदेशीरपणे हुक्का बार सुरु असल्याचे आढळून आले. पोलिसांनी दोन्ही ठिकाणावरुन वेगवेगळ्या कंपनीचे हुक्क्याचे फ्लेवर व हुक्क्याचे साहित्य असा एकूण 65 हजार 210 रुपयांचा मुद्देमाल जप्त करुन दोन जणांना ताब्यात घेतले.ताब्यात घेण्यात आलेल्या दोघांना पुढील कारवाईसाठी कोंढवा पोलिसांच्या ताब्यात देण्यात आले आहे.ही कारवाई आयुक्त अमिताभ गुप्ता पोलीस सह पोलीस आयुक्त संदीप कर्णिक, अपर पोलीस आयुक्त गुन्हे रामनाथ पोकळे पोलीस उपायुक्त गुन्हे श्रीनिवास घाडगे यांच्या मार्गदर्शनाखाली पथकाने केली आहे.

श्री संत नामदेव महाराजांच्या ७५२ व्या जयंतीनिमित्त कीर्तन महोत्सवाचे आयोजन : अभिनेता स्वानंद बर्वे यांच्या हस्ते महोत्सवाचे उद्घाटन

पुणे : विठ्ठल आवडी प्रेमभावो, विठ्ठल नामाचा रे टाहो… देहुडा चरण वाजवितो वेणु, गोपिकारमणु स्वामि माझा…माझे माहेर पंढरी, आहे भीवरेच्या तीरी… आकाशी झेप घे रे पाखरा, सोडी सोन्याचा पिंजरा… अशा एकाहून एक सरस रचना सादर करीत कलाकारांनी गायनसेवा सादर केली. या गायनसेवेला पुणेकरांनी मोठया संख्येने हजेरी लावली आणि भक्तीगीतांच्या सादरीकरणाने संपूर्ण परिसर भक्तीरंगात न्हाऊन निघाला.

श्री संत नामदेव महाराजांच्या ७५२ व्या जयंती निमित्त नामदेव समाजोन्नती परिषद पुणे शहर शाखेच्या वतीने भक्ती संगीत व कीर्तन महोत्सवाचे आयोजन करण्यात आले आहे. महोत्सवाचे उद्घाटन अभिनेता स्वानंद बर्वे यांच्या हस्ते संपन्न झाले. यावेळी कार्यक्रमाच्या अध्यक्षस्थानी डॉ. अजय फुटाणे, संजय नेवासकर, अॅड. ज्ञानेश्वर पाटसकर, वसंतराव खुर्द,  राजेंद्र पोरे, संत नामदेव महाराज यांचे अभ्यासक डाॅ. ओम दत्तोपासक, अध्यक्ष संदिप लचके तसेच पुणे शहर कार्यकारिणीचे सर्व पदाधिकारी उपस्थित होते. यावेळी गायक संजीव मेहेंदळे, कविता मेहेंदळे व सहकारी यांनी गायनसेवा दिली. कार्यक्रमाचे संयोजन सचिव सुभाष मुळे, उपाध्यक्ष प्रदीप खोले, रणजित माळवदे, कुंदन गोरटे, सोमनाथ मेटे, राहुल सुपेकर  यांनी केले.

कार्यक्रमाची सुरुवात विठ्ठल आवडी प्रेमभावो … या संतवाणीने झाली. माझे मनोरथ पूर्ण करी देवा,केशवा माधवा नारायणा… देव म्हणे नाम्या, ज्ञानदेव मीच आहे… अश्या गीतांच्या सादरीकरणातून वातावरणात निर्माण झालेल्या भक्ती वलयाची अनुभूती रसिकांनी घेतली.

संदीप लचके म्हणाले, महोत्सवात  नामदेव महाराजांचे १७ वे वंशज, ह .भ .प मुरारी महाराज नामदास (पंढरपूर) यांची वारकरी कीर्तन सेवा होणार असून या कार्यक्रमास संत तुकाराम महाराजांचे वंशज डॉ. सदानंद मोरे, संत नामदेव महाराज यांची भूमिका करणारे अभिनेते अवधुत सुधीर गांधी, सावित्रीबाई फुले पुणे विद्यापीठाचे परीक्षा विभागाचे संचालक डाॅ. महेश काकडे उपस्थित राहणार आहेत. कार्यक्रमाचे सूत्रसंचालन प्रशांत सातपुते यांनी केले तर आभार संदिप लचके यांनी मानले.

मैत्रयुवा फाऊंडेशनतर्फे आयोजन ; दिव्यांग, मूकबधिर, कर्णबधिर मुलांच्या चेह-यावर हास्य
पुणे : समाजातील प्रत्येक घटक ज्या आनंदाने आणि उत्साहाने दिवाळीचा सण साजरा करतो, तसेच समाजातील मुख्य प्रवाहापासून दूर गेलेल्या दिव्यांग, दृष्टीहिन, मूकबधिर, कर्णबधिर अशा विशेष मुलांना सण-उत्सवाचा आनंद देण्याकरीता तरुणाईने पुढाकार घेतला. नवीन कपडे, फराळ, भेटवस्तू देऊन या ५०० चिमुकल्यांसोबत पणत्या रंगवून पुण्यात विशेष दिवाळी साजरी झाली. 
मैत्र युवा फाऊंडेशनच्या पुढाकाराने सेवासदन दिलासा कार्यशाळा, सेवासदन दिलासा केंद्र, जीवनधारा, सहेली आणि बालसदन या पाच संस्थांमध्ये विशेष दिवाळी उत्सव साजरा झाला. यावेळी ज्येष्ठ शिक्षणतज्ज्ञ डॉ.न.म.जोशी, अर्चना क्षीरसागर, चिंतामणी पटवर्धन, तेजस्वी सेवेकरी, अश्विनी नायर, मेघना जोशी, संगिता नागपूरकर, संतोष डिंबळे, पद्मजी कुलकर्णी, करुणा गायकवाड, फाऊंडेशनचे अध्यक्ष संकेत देशपांडे आदी उपस्थित होते. 
समाजातील विविध दिग्गजांनी पणती रंगवून विशेष दिवाळी उत्सवात सहभाग घेतला. शिक्षण, कला, सामाजिक अशा विविध क्षेत्रातील मान्यवरांनी एकत्रितपणे विशेष मुलांसोबत पणती रंगवून चिमुकल्यांना भेटवस्तू देत सण करु साजरे, माध्यम जरा वेगळे असा संदेशही दिला. 
संकेत देशपांडे म्हणाले, एक पणती तिच्यासाठी या उपक्रमांतर्गत त्यांच्यासोबत पणत्या रंगविण्यात आल्या. विविध संस्थांतील मुलांना दिवाळीचा आनंद मिळावा, याकरीता पणत्या आणि नवे कपडे देण्यात आले. वर्षभर या मुलांसाठी विविध उपक्रम, संस्कार वर्ग राबविले जातात. मात्र, दिवाळी हा त्यांच्यासाठी अत्यंत आनंदाचा सण असतो आणि समाजातील प्रत्येक घटक यामध्ये आम्हाला साथ देतो, असेही ते म्हणाले.

पुणे : रिपब्लिकन पार्टी ऑफ इंडियाच्या (आठवले) महिला आघाडीच्या महाराष्ट्र प्रदेश सचिवपदी ॲड. अर्चिता मंदार जोशी यांची नियुक्ती करण्यात आली. केंद्रीय सामाजिक न्याय राज्यमंत्री व ‘रिपाइं’चे राष्ट्रीय अध्यक्ष रामदास आठवले व महिला आघाडीच्या राष्ट्रीय अध्यक्षा सीमा आठवले यांच्या हस्ते ॲड अर्चिता मंदार जोशी यांना नियुक्तीपत्र देण्यात आले. तसेच त्यांचा रामदास आठवले व सीमा आठवले यांच्या हस्ते सत्कार करण्यात आला.

नुकत्याच झालेल्या राज्य कार्यकारिणीच्या बैठकीत महिला प्रदेश अध्यक्षा चंद्रकांता सोनकांबळे यांनी त्यांना नियुक्तीपत्र दिले. ॲड अर्चिता मंदार जोशी या पुणे बार असोसिएशनच्या विद्यमान सदस्य असून, अनेक संस्थांमध्ये कायदेशीर सल्लागार म्हणून त्या कार्यरत आहेत. तसेच अखिल महाराष्ट्रीय ब्राह्मण महासंघाच्या कार्याध्यक्षा आहेत.महिलांना न्याय मिळवून देण्यासाठी त्या कायम अग्रेसर आहेत.

सर्व समाजाच्या महिलांना सोबत घेऊन त्यांचे प्रश्न सोडविण्याचा व कायदेशीर मार्गाने महिलांवरील अन्याय दूर करण्याचा प्रयत्न करणार असल्याचे तसेच ‘रिपाइं’ पक्षाला अधिक बळकट करण्यासाठी प्रयत्नशील राहणार असल्याचे ॲड अर्चिता मंदार जोशी यांनी सांगितले.

पोलीस आयुक्तांनी खेचलेच पाहिजेत महापालिकेचे कान..

पुणे :बीआरटी,सायकल मार्ग यांनी त्या त्या रस्त्यांवर खाजगी वाहनांची गळचेपी करत वाहतूक कोंडी केली हे खरेच आहे आणि हे सत्य पोलीस आयुक्त अमिताभ गुप्तांना पटल्यानेच त्यांनी महापालिकेचे कान खेचले पाहिजेत अशी भूमिका आता घेतली गेली तर नवल वाटू नये.ज्या बीआरटी ने कलमाडींची /कॉंग्रेसची सत्ता उलथवून टाकली आणि बीआरटी ला विरोध करून सत्तेवर आलेल्या अजित पवारांनी प्रत्यक्षात सत्तेवर आल्यावर मात्र बीआरटी ला समर्थन दिले त्या अजित पवारांचीही सत्ता येथून गेली आणि त्यानंतर भाजपाच्या काळात देखील बीआरटी आणि सायकल मार्गाचा खेळखंडोबा सुरूच राहिला तो कशासाठी ? या प्रश्नाचे उत्तर सर्वांनाच ठाऊक आहे. खाजगी वाहनांची गळचेपी होते आहे, रस्त्यावर हक्क सर्वांचाच सारखा आहे.हे विसरून केवळ काही वेगळाच कारभार करतच या दोन्ही प्रकल्पांची सुमारे १५ वर्षे री ओढली गेली.वाहतूक कोंडी सोडविण्यासाठी आणि जलदगतीने प्रवास करता यावा यासाठी बस रॅपीड ट्रान्झिट- बीआरटी सेवा सुरू करण्यात आली असा देखावा करण्यात आला पण हा देखावा फार काल लपून राहू शकलेला नाही. पुण्याच्या वाहतूक कोंडीला जशी राज्यकर्त्यांकडून महापालिकेची वारंवार वाढविण्यात येणारी हद्द जबाबदार आहे तसाच महापालिकेतील भ्रष्ट कारभार हि जबाबदार आहे.

आता कुठे शहरातील वाहतूक कोंडीला बीआरटी मार्ग कारणीभूत असल्याचा ठपका ठेवत पोलिसांनी या वाहतूक कोंडीचे खरे खापर महापालिकेवर फोडले आहे. वाहतूक कोंडी कमी करायची असेल तर, सर्व बीआरटी मार्ग बंद करा आणि अनावश्यक सायकल मार्ग काढून टाका, असे पत्र पोलिसांनी महापालिकेला पाठविले आहे.याच महापालिकेने आणि पदाधिकारी अधिकारी यांनी आमच्या सारख्या माध्यमांनी बीआरटी येण्यापूर्वीपासून बीआरटी आणि सायकल मार्गानाही केलेल्या विरोधाकडे डोळेझाक केलेली आहे.बीआरटी,सायकल मार्ग,व्यावसायिक दुकानांमधील अनधिकृत बांधकामे,पोटमाळे यांना वेळोवेळी आमच्या सारख्यांनी विरोध केलेलाच आहे.ज्या दुकानात,हॉटेलात ५० ग्राहकांची क्षमता होती त्यांनी पोटमाळे करून ती ८० पर्यंत वाढविली त्यामुळे दुकानांसमोर / हॉटेलांसमोर ५० ऐवजी ८० ग्राहकांची वाहने उभी राहू लागली.लक्ष्मी रस्त्यावरील दुकानदारांनी बांधलेले पोटमाळे अनधिकृत ठरवून ते पाडण्याची कार्यवाही पूर्वी होत होती पण कलमाडींनी निवडणुकीपूर्वी त्यांच्यासाठी पोटमाळे अधिकृत करून देण्याची सुविधा उपलब्ध करवून दिली.हा इतिहास आहे.

शहरात गेल्या काही दिवसांपासून बहुतांश भागात वारंवार वाहतूक कोंडी होत आहे. त्यावरून केवळ वाहतूक पोलिसांवर टीका होत आहे.शहरामध्ये गर्दीच्या ठिकाणी वाहतूक कोंडी होत आहे. गर्दीच्या ठिकाणी अवजड वाहतुकीस बंदी आहे. मात्र त्यानंतरही अवजड वाहने शहरात येत आहेत. शहराबाहेर धनकवडी येथे यासाठी कित्येक वर्षापूर्वीच ट्रक टर्मिनस उभारले गेले.पण हे ट्रक टर्मिनस आज कोणत्या स्थितीत आहे अशीच तत्कालीन शहराबाहेर अवजड वाहनांसाठी ठेवलेल्या जागांची काय अवस्था आहे याची माहिती देखील पोलिसांनी घेतली पाहिजे, शहरातील वाहनतळांची आणि पार्किंग साठी राखीव ठेवण्यात येणाऱ्या जागांची /भूखंडांची अवस्था काय आहे याचीही माहिती घेतली पाहिजे म्हणजेच महापालिकेला ताळ्यावर आणण्यासाठी पावले उचलली पाहिजेत.

बस, रिक्षा त्यांच्या थांब्या व्यतिरिक्त अन्य ठिकाणी थांबत आहेत. त्यामुळे वाहतूक कोंडीत भर पडत आहे. वाहतूक कोंडी होऊ नये यासाठी ठोस उपाययोजना कराव्या लागणार आहेत. त्यानुसार अवजड वाहने शहरात प्रवेश करताना त्यांना वाहतूक पोलिसांनी अटकाव करावा आणि बस, रिक्षा यांना योग्य त्या ठिकाणी थांबे देण्याबाबतचे नियोजन करावे, अशी मागणी पत्राद्वारे महापालिका प्रशासनाकडून वाहतूक पोलिसांकडे काही दिवसांपूर्वी करण्यात आली होती. त्यासंदर्भात उत्तर म्हणूनच वाहतूक कोंडीचे योग्य खापर पोलिसांनी महापालिकेवर फोडले आहे.

शहरातील चोवीस रस्त्यांची दुरवस्था झाली आहे. त्यामुळे वाहतूक कोंडी होत आहे. त्यातच बीआरटी मार्ग आणि सायकल मार्गांमुळे वाहतूक कोंडीत भर पडत आहे, असा दावा पोलिसांनी महापालिकेला दिलेल्या पत्रात केला आहे.नगर रस्ता, सोलापूर रस्ता आणि सातारा रस्त्यावर महापालिकेने बीआरटी मार्ग सुरू केला आहे. यातील नगर रस्ता हा राज्य मार्ग असून सोलापूर आणि सातारा रस्ता राष्ट्रीय महामार्ग आहेत. बाहेरील जिल्ह्यातून मुंबई, नगर, सोलापूर आणि सातारा येथे जाणारी वाहने शहरातून याच मार्गावरून जातात. या मार्गांवर जड वाहनांची वाहतूक मोठी आहे. या रस्त्यांवर बीआरटी मार्ग असल्याने बीआरटी मार्ग सार्वजनिक वाहतूक सेवेसाठी वापरला जात आहे. त्याचा ताण उर्वरित रस्त्यांवर येत असून लहान मोठे अपघात होण्याबरोबरच वाहतूक कोंडीलाही सामोरे जावे लागत आहे. या परिस्थितीत बीआरटी मार्ग आणि सायकल मार्ग काढल्यास वाहतूक कोंडी टाळता येणे शक्य आहे, असे पोलिसांनी महापालिकेला दिलेल्या पत्रात नमूद केले आहे.त्यास आक्षेप घेता येणारा नाही.

शहरातील सार्वजनिक वाहतुकीचे सक्षमीकरण आणि वाहतूक कोंडी कमी करण्यासाठी तसेच वेगवान वाहतुकीचे शाश्वत साधन उपलब्ध व्हावे, यासाठी पंधरा वर्षांपूर्वी बीआरटी योजना सुरू करण्यात आली. मात्र बीआरटी मार्ग पंधरा वर्षानंतरही त्याने वाहतूक कोंडी कमी करू शकलेला नाही हे उघड सत्य आहे. मेट्रो आणूनही पुण्याची वाहतूक कोंडी ची समस्या सुटणार नाही अगर कमी होणार नाही हे देखील वारंवार सांगितले गेलेले आहे. पण निव्वळ घाई प्रकल्प आणायची केली गेली,समस्या सोडविण्याची केली गेली नाही हे लक्षात घेतले गेले पाहिजे.अनधिकृत बांधकामे थांबलीच पाहिजेत,सायकल मार्गाची शहराला गरज नाही, बीआरटी उखडून फेकून दिलीच पाहिजे.पार्किंगच्या,ट्रक टर्मिनसच्या जागांचे रक्षण केले गेलेच पाहिजे आणि आता महापालिकेच्या हद्दी वाढविण्याला लगाम घातलाच पाहिजे.रस्ते रुंद केले गेलेच पाहिजेत.याच यावरील उपाय योजना आहेत.शहराच्या बाहेर ५० किलोमीटर पर्यंत शेती झोन ठेऊन पुढे खेडी विकसित करण्याचे धोरण ठेवले पाहिजे. एखाद्या एका दुसऱ्या शहरावरच अब्जावधींची उधळण करण्यापेक्षा शहरापासून ५० किमी अंतरापुढे असलेली खेडी विकसित करण्याचे धोरण राबविले पाहिजे.याकडे राज्यकर्त्यांनी दुर्लक्ष केल्याने शहरांचे अजगर फोफावत चाललेले आहेत हे प्रमुख कारण लक्षात घेतले जात नाही हि खंत आहे.

अनधिकृत बांधकामे ही वाहतूक कोंडीला कारणीभूत

पुणे- काही वर्षांपूर्वी अगदी तत्कालीन सत्ताधीश ढोले पाटलांच्या ,रामकृष्ण मोरेंच्या आणि कलमाडींच्या हॉटेलांचा समावेश असूनही अशा बेकायदा बांधकामे केलेल्या हॉटेल्स चे सर्वेक्षण करून तत्कालीन नगर अभियंता शिवाजीराव पवार यांनी महापालिकेच्या सभागृहात अशा हॉटेल्सची नावे आणि मालकांची नावे देखील समोरच जाहीरपणे सांगितली होती . पण आता गेल्या ५ वर्षात महापालिकेच्या हद्दीतील अशा हॉटेल्सचे सर्वेक्षणच झाले नसल्याचे उघड झाले आहे. पूर्वीच्या काळात साईड मार्जिन आणि माळे अशा स्वरूपात हॉटेल्सनी बेकायदा बांधकामे केली होती तर आता रुफ टॅाप हॅाटेल म्हणून देखील नवा प्रकार रुजला आहे. बांधकाम निरीक्षक हा अशा सर्वेक्षणात महत्वाची भूमिका बजावतात ज्याना जे इ म्हटले जाते . यांना आपल्या हद्दीतील बहुतेक सर्वच अनधिकृत बांधकामांची माहिती असते . आणि ते कुणाची आहेत हे देखील ठाऊक असते . पण ते अशा बांधकामांकडे दुर्लक्ष करत असल्याचे कायमच दिसून आले आहे. कधी राजकीय दबाव , कधी प्रशासनातील बड्या अधिकाऱ्यांच्या नावाने दबाव तर कधी स्वहित साधण्याच्या हेतूने देखील अशा बांधकामाकडे दुर्लक्ष केले जात असल्याचे वेळो वेळी स्पष्ट झाले आहे . हॉटेल्स , लॉजेस , होस्टेल्स , व्यावसायिक इमारती , दुकाने अशा ठिकाणे आगीच्या भक्ष्यस्थानी पडून जीवितहानी होऊ शकते पण याकडे देखील आजवर दुर्लक्षच झाल्याचे दिसून आले आहे .काही वर्षांपूर्वी अनधिकृत बांधकामांवरील कारवाई साठी महापालिकेला स्वतंत्र पोलीस अधिकारी आणि कुमक कायमस्वरूपी दिलेली आहे तरीही स्थानिक पोलीस बंदोबस्त मिळत नाही असे कारण देऊन अशा बांधकामांवर कारवाई टाळली जात असल्याचे दिसून आले आहे. गेल्या ६ वर्षात कोण त्याही महापालिका आयुक्तांनी अशा प्रकारचे सर्वेक्षण करून अहवाल सादर करण्याचे आदेश संबधितांना दिलेले नाहीत . निव्वळ फेरीवाले, स्टोल धारक यांच्यावर अतिक्रमण विभागाकडून कारवाई केली जाते आणि लक्ष्मी रस्त्यासह बड्या बड्या व्यापाऱ्यांनी रस्त्यावर दुकानासमोर टाकलेल्या जाळ्या, रस्त्यावर पुढे सरकत आणलेले दुकाने याकडे देखील सर्रास दुर्लक्ष केले जाते आहे. जेई हा कर्मचारीच या सर्वांच्या केंद्रस्थानी असून त्यास बड्या अधिकाऱ्यांनी पाठबळ दिलेले असल्याने शहरातील अशा बांधकामांची संख्या झपाट्याने वाढली असून ती जीवितहानी हि करू शकेल अशा स्वरूपाची असल्याचे नाकारता येणार नाही. परवानगी पेक्षा दुपटी तिपटीने जास्त बांधकामे बांधल्याची प्रकरणे देखील मोठ्या संख्येने आहेत . त्यातच रुफ टोप हि पद्धत रूढ होत चालली आहे . निव्वळ कधी तरी आग लागून धोका होईल एवढीच शक्यता यश प्रकरणात गृहीत धरता येत नाही तर अशी बांधकामे वाहतुकीच्या कोंडीला देखील जबाबदार असल्याचे स्पष्ट आहे .पण केवळ करोडोच्या मागे धावणाऱ्या व्यवस्थेला याकडे पाहाण्याची इच्छ्याच नसल्याचे स्पष्ट झालेले आहे. राजीव अगरवाल , अरुण भाटीया या दोन आयुक्तांच्या कारकिर्दीत बडी बडी अनधिकृत बांधकामे उखडून टाकण्यात आली . अशी कारवाई अद्याप कोणत्याही अधिकाऱ्याने केलेले नसल्याचे स्पष्ट झालेले आहे.

पुणे: बांधकाम व्यावसायिकाकडे ६५ लाखांची खंडणी मागणाऱ्या गुंड गजानन उर्फ गजा मारणे टोळीतील रूपेश मारणे याच्यासह चौघा जणांच्या विरोधात वारजे माळवाडी पोलीस ठाण्यात गुन्हा दाखल करण्यात आला आहे. या प्रकरणी रूपेश कृष्णराव मारणे (वय ३८, रा. एकता काॅलनी, शास्त्रीनगर, कोथरुड) याच्यासह उमेश प्रसाद वाफगावकर (रा. यशराज अपार्टमेंट, तपोधाम सोसायटी, वारजे), नितीन तुकाराम ननावरे (वय ४१, रा. विंड बिल व्हिलेज बावधन), अनिल अंबादास लोळगे (वय ४०, रा. गोल्डफिंच पेठ, नवी पेठ, सोलापूर,) यांच्या विरोधात गुन्हा दाखल करण्यात आला आहे.

याबाबत कोथरूड भागातील एका बांधकाम व्यावसायिकाने खंडणी विरोधी पथकाचे वरिष्ठ पोलीस निरीक्षक बालाजी पांढरे यांच्याकडे तक्रार अर्ज दिला होता. बांधकाम व्यावसायिकाने मारणे आणि साथीदारांकडून एक कोटी ८५ लाख रुपये व्यवसायासाठी कर्ज घेतले होते. त्या बदल्यात व्याजासह बांधकाम व्यावसायिकाने आरोपींना दोन कोटी ३० लाख रुपये परत केले होते. त्यानंतर मारणे आणि साथीदारांनी त्यांच्याकडे आणखी ६५ लाख रुपयांची मागणी केली. रूपेश मारणे याच्या सांगण्यावरून आरोपींनी कर्वेनगर भागातील एका गृहप्रकल्पातील १२ सदनिकांचा ताबा घेतला. बांधकाम व्यावसायिकास सदनिका विक्रीस मनाई केली तसेच सदनिका बळकाविण्याचा प्रयत्न केला, असे बांधकाम व्यावसायिकाने तक्रार अर्जात म्हटले आहे.