मुंबई -संजय राऊतांना खोट्या केसेसमध्ये पुन्हा अटक होऊ शकते. त्यांना गोवण्याचा प्रयत्न होऊ शकतो, असा आरोप आज शिवसेनापक्षप्रमुख उद्धव ठाकरे यांनी केला. तसेच, तपास यंत्रणांचा वापर केंद्र सरकार पाळीव प्राण्यांप्रमाणे करत आहे, अशी घणाघाती टीकाही त्यांनी केली. संजय राऊत यांनी मातोश्रीवर जात आज उद्धव ठाकरेंची भेट घेतली. त्यानंतर आयोजित पत्रकार परिषदेत उद्धव ठाकरे, संजय राऊत, आदित्य ठाकरे यांनी विरोधकांवर जोरदार टीका केली.

उद्धव ठाकरे म्हणाले, केंद्रीय तपास यंत्रणा सुपारी घेतल्याप्रमाणे काम करत आहे. केंद्र सरकारच्या पाळीव प्राण्याप्रमाणे त्यांचा वापर होत आहे. केंद्र सरकार म्हणेल त्यांच्या अंगावर या यंत्रणांना बेकायदेशीरपणे सोडले जात आहे. देशात अशी उदाहरणे आपण रोजच पाहत आहोत. अशा यंत्रणांना केंद्र सरकारच्या यंत्रणा म्हणता येणार नाही. अशा यंत्रणा कायमच्या बंद का करु नये, असा प्रश्न आता पडत आहे.

उद्धव ठाकरे म्हणाले, केंद्र सरकारकडून न्यायव्यवस्थाही अंकित करण्याचा प्रयत्न सुरू आहे. केंद्रीय मंत्री किरण रिजिजू यांनीच न्यायव्यवस्थेवर केंद्राचे काही नियंत्रण हवे, असे वक्तव्य केले आहे. सध्या देशात न्यायालये हे सामान्यांचे एकमेव आशास्थान असताना त्यांनाच आता बुडाखाली घेण्याचे काम केंद्र सरकार करत आहे. सर्व जनतेने याला विरोध केला पाहिजे.

उद्धव ठाकरे म्हणाले, केंद्र सरकारने तपास यंत्रणांचा गैरवापर करून अनेक पक्ष फोडले. विरोधकांवर खोट्या केसेस लादल्या. केवळ महाराष्ट्रातच नव्हे तर तेलंगणामध्ये केसीआर यांना, आप पक्षाला, झारखंडमध्ये सोरेन यांना व पश्चिम बंगालमध्ये ममता बॅनर्जींना छळले जात आहे. हे सर्व पक्ष एकत्र आले तर किती मोठी ताकद निर्माण होईल, याची कल्पना केंद्र सरकारला नाही.

उद्धव ठाकरे म्हणाले, संजय राऊत केवळ शिवसेना नेते, खासदार नाहीत. ते माझे जिवलग मित्र आहेत. आपल्यावर संकट येऊनही जो डगमगत नाही, तोच खरा मित्र. संजय राऊत तसे मित्र आहेत. केवळ मित्र नव्हे तर ते एका लांब पल्ल्याची तोफ आहेत. तसेच, न्यायव्यवस्थेने जो निकाल दिला, तपास यंत्रणेबद्दल जे परखड निरीक्षण नोंदवले, त्याबाबतही मी न्यायालयाचे आभार मानतो. न्यायालय निष्पक्षपणे न्याय देतात, हे या निकालाने अधोरेखित केले आहे. संपुर्ण देशासाठी हे एक चांगले चित्र आहे.

यावेळी संजय राऊत म्हणाले, तुरुंगात गेल्यानंतरही ठाकरे व शिवसेनेचे कुटुंब माझ्या परिवाराची काळजी घेईल, याची खात्री मला होती. त्यामुळेच मी निश्चिंत होतो. शिवसेनेसाठी दहावेळेस तुरुंगात पाठवले तरी जाण्यास मी तयार आहे.

संजय राऊत यांनी सांगितले की, तुरुंगात असताना मला तेथील अनेक समस्या, कर्मचाऱ्यांच्या अडचणी समजून घेता आल्या. राज्याचे गृहमंत्री म्हणून देवेंद्र फडणवीसांसमोर मी या सर्व समस्या मांडणार आहे. त्यासाठी त्यांची भेट घेणार आहे, याच चुकीचे काय. तसेच, तुरुंगात मी दोन पुस्तकांचे काम केले आहे. लवकरच ते सर्वांसमोर मांडणार आहे, अशी माहितीही राऊतांनी दिली.

मुंबई :गुजरातमधील सक्करबाग येथील सिंहाची जोडी नोव्हेंबर अखेरीस मुंबईतील संजय गांधी राष्ट्रीय उद्यानात दाखल होणार आहे. २६  सप्टेंबर रोजी वनमंत्री सुधीर मुनगंटीवार यांच्या गुजरात दौऱ्याच्या वेळी गुजरातचे वन राज्यमंत्री जगदीश विश्वकर्मा यांच्याशी याविषयी चर्चा झाली होती. त्यावेळी गुजरातमधील सिंहाची जोडी मुंबईच्या संजय गांधी राष्ट्रीय उद्यानात पाठविण्याबाबत एकमत झाले होते. केंद्रीय प्राणी संग्रहालय प्राधिकारणाच्या परवानगीसाठी हा विषय थांबला होता. आता ही परवानगी मिळाल्याने गुजरात येथील सक्करबाग प्राणी संग्रहालयातील आशियायी सिंहाची जोडी (एक नर व एक मादी ) आता नोव्हेंबरअखेरीस मुंबईत दाखल होणार आहे.

संजय गांधी राष्ट्रीय उद्यान बोरिवली येथे १२ हेक्टर कुंपण क्षेत्रात क्षेत्रात १९७५-१९७६ मध्ये सिंह सफारी सुरू करण्यात आली होती. सिंह सफारी मुळे उद्यानाच्या महसुलात वाढदेखील झाली होती ; परंतु केंद्रीय प्राणी संग्रहालय प्राधिकरणाने सिंहाचे प्रजनन करण्यास मनाई केल्याने येथील सिंहाची संख्या कमी झाली. गेल्या महिन्यात १७वर्षे वयाच्या सिंहाचा मृत्यू झाल्याने उद्यानात एकच नर सिंह शिल्लक राहिला.दरम्यान वन मंत्री श्री.मुनगंटीवार यांच्या प्रयत्नांमुळे गुजरात राज्यातील ही सिंहाची जोडी येणार असल्याने उद्यानात पर्यटकांची संख्या पुन्हा वाढणार आहे.

मुंबई, दि. 9 : राज्यातील शारीरिक शिक्षण महाविद्यालयांना अनुदान देण्याबाबत नव्याने सुधारित प्रस्ताव तयार करावा अशा सूचना उच्च व तंत्र शिक्षण मंत्री चंद्रकांत पाटील यांनी दिल्या.आज मुंबईत उच्च व तंत्र शिक्षण मंत्री श्री. पाटील यांच्या अध्यक्षतेखाली त्यांच्या शासकीय निवासस्थानी बैठक आयोजित करण्यात आली होती. या बैठकीला माजी विधान परिषद सदस्य प्रकाश गजभिये, उच्च व तंत्र शिक्षण विभागाचे प्रधान सचिव विकास चंद्र रस्तोगी, सहसंचालक प्रकाश बच्छाव संबंधित अधिकारी उपस्थित होते. कायम विनाअनुदानित शारीरिक शिक्षण महाविद्यालय एनसीटीई दिल्लीच्या मान्यतेने विद्यापीठाशी संलग्नित असून महाविद्यालयात नियमित दोन वर्षीय बी.पी.एड व तीन वर्षीय बी.पी.ई. हे अभ्यासक्रम शिकविण्यात येत आहेत. हे महाविद्यालय 1994 पासून नियमित सुरू असल्याने कायम विनाअनुदानित तत्त्वावर त्यांचा समावेश होत नाही. कायम विनाअनुदानित तत्त्व हे सन 2001 नंतर राज्यातील महाविद्यालयांना लागू झाले आहे. सन 1994 नंतरची 2001 पर्यंत सर्व महाविद्यालय अनुदानास पात्र आहेत, परंतु काही महाविद्यालयानी उच्च न्यायालयात अनुदान मिळण्याबाबत याचिका दाखल केली होती. या याचिकेच्या अनुषंगाने बैठकीत या महाविद्यालयाच्या अनुदानाबाबत सकारात्मक चर्चा करण्यात आली. याबाबत नव्याने पुन्हा सविस्तर प्रस्ताव सादर करावा.त्यानंतर हा प्रस्ताव वित्त विभागाकडे पाठवण्यात येईल, असे सांगून याबाबत शासन सकारात्मक असल्याचे श्री. पाटील यांनी सा

मुंबई, दि. 9 : राज्यातील विविध जिल्ह्यांतील 7 हजार 751 ग्रामपंचायतींच्या सदस्यपदांसह थेट सरपंचपदाच्या सार्वत्रिक निवडणुकांसाठी 18 डिसेंबर 2022 रोजी मतदान होणार आहे. त्यासाठी संबंधित ठिकाणी आजपासून आचारसंहिता लागू झाली असून 20 डिसेंबर 2022 रोजी मतमोजणी होईल, अशी घोषणा राज्य निवडणूक आयुक्त यू. पी. एस. मदान यांनी आज येथे केली.

श्री. मदान यांनी सांगितले की, ऑक्टोबर 2022 ते डिसेंबर 2022 या कालावधीत मुदत संपणाऱ्या; तसेच नव्याने स्थापित या सर्व ग्रामपंचायतींच्या निवडणुकांसाठी 18 नोव्हेंबर 2022 रोजी संबंधित तहसीलदार निवडणुकीची सूचना प्रसिद्ध करतील. नामनिर्देशनपत्र 28 नोव्हेंबर 2022 ते 2 डिसेंबर 2022 या कालावधीत दाखल करण्यात येतील. नामनिर्देशनपत्रांची छाननी 5 डिसेंबर 2022 रोजी होईल. नामनिर्देशनपत्र मागे घेण्याची अंतिम मुदत 7 डिसेंबर 2022 रोजी दुपारी 3 वाजेपर्यंत असेल व त्याच दिवशी निवडणूक चिन्हांचे वाटप होईल. मतदान 18 डिसेंबर 2022 रोजी  सकाळी 7.30 ते सायंकाळी 5.30 या वेळेत होईल. तसेच नक्षलग्रस्त भागात दुपारी 3 वाजेपर्यंतच मतदानाची वेळ असेल. मतमोजणी 20 डिसेंबर 2022 रोजी होईल.

विविध जिल्ह्यांत निवडणूक होणाऱ्या ग्रामपंचायतींची जिल्हा व तालुकानिहाय संख्या : अहमदनगर- 203, अकोला- 266, अमरावती- 257, औरंगाबाद- 219, बीड- 704, भंडारा- 363, बुलडाणा- 279, चंद्रपूर- 59, धुळे- 128, गडचिरोली- 27, गोंदिया- 348, हिंगोली- 62, जळगाव- 140, जालना- 266, कोल्हापूर- 475, लातूर- 351, नागपूर- 237, नंदुरबार- 123, उस्मानाबाद- 166, पालघर- 63, परभणी- 128, पुणे- 221, रायगड- 240, रत्नागिरी- 222, सांगली- 452, सातारा- 319, सिंधुदूर्ग- 325, सोलापूर- 189, ठाणे- 42, वर्धा- 113, वाशीम- 287, यवतमाळ- 100, नांदेड- 181 व नाशिक- 196. एकूण- 7,751.

मुंबई-शिवसेनेचे खासदार संजय राऊत यांना जामीन झाल्यावर “सावधान रहो शेर आ रहा है…” असा इशारा शिवसेना नेते भास्कर जाधव यांनी दिला आहे. ते म्हणाले,’अतिशय खोट्या केसेस तयार केल्या, खोटे पुरावे तयार केले आणि त्यांना जेलमध्ये टाकलं. परंतु जेलमध्ये गेल्यानंतरही संजय राऊत हे दमले नाहीत, थकले नाहीत. कोणत्याही प्रकारे त्यांनी शरणागती पत्कारली नाही. किंबहूना ते अधिक ताकदीने उभा राहिले, हिंमतीने उभा राहिले.”

त्यांना अखेर पीएमएल कोर्टाकडून जामीन मंजूर झाला आहे. यामुळे ठाकरे गटात आनंदाचे वातावरण निर्माण झाले आहे. शिवसैनिक जल्लोष साजरा करत आहेत.

भास्कर जाधव म्हणाले, “आम्ही आज सगळेच आनंदअश्रूंमध्ये न्हाऊन निघतोय. याचं कारण असं आहे की संजय राऊत हे आमचे नेते आहेत. एक लढवय्ये नेते आहेत, तत्वनिष्ठ नेते आहेत. आपल्या भूमिकेशी ठाम राहणारे नेते आहेत. हे नेते मागील चार-दोन वर्षे या देशात जो लोकशाहीवर घाला घातला जात होता. या लोकशाहीचं अधंपतन केलं जात होतं. या लोकशाहीच्या नावाने, सत्तेचा दुरुपयोग करून संपूर्ण देशाला अधोगतीकडे नेण्याचं काम सुरू होतं, त्याविरोधा ते आपल्या लेखणीने प्रहार करत होते. त्यांना विविध प्रकारे थांबवण्याचा प्रयत्न झाला. परंतु ते काही थांबवू शकले नाहीत आणि मग शेवटचा उपाय म्हणून त्यांना जेलमध्ये टाकण्यात आलं. तुरुंगात टाकत असताना अतिशय खोट्या केसेस तयार केल्या, खोटे पुरावे तयार केले आणि त्यांना जेलमध्ये टाकलं. परंतु जेलमध्ये गेल्यानंतरही संजय राऊत हे दमले नाहीत, थकले नाहीत. कोणत्याही प्रकारे त्यांनी शरणागती पत्कारली नाही. किंबहूना ते अधिक ताकदीने उभा राहिले, हिंमतीने उभा राहिले.”

ब्रिटनमधील वेस्टमिडलँड आणि महाराष्ट्रात सामंजस्य करार करणार

इलेक्ट्रिक वाहन, पर्यटन प्रकल्पांच्या निर्मितीसाठी परस्परांना सहकार्य

मुंबई दि 9: :-ब्रिटनमधील वेस्टमिडलँड आणि महाराष्ट्र या दोन राज्यांमध्ये गुंतवणूकविषयक सामंजस्य करार करण्यात येणार आहे. वेस्टमिडलँडचे महापौर अँडी स्ट्रीट यांनी आपल्या शिष्टमंडळासह आज राज्याचे मुख्यमंत्री एकनाथ शिंदे यांची त्यांच्या वर्षा या शासकीय निवासस्थानी सदिच्छा भेट घेतली. या भेटीत त्यांनी परस्पर सहकार्याने दोन राज्यातील संबंध अधिक दृढ  करण्याचा निर्णय घेतला. मुंबई-बर्मिंगहम विमानसेवा सुरू करण्यासाठी राज्य सरकार केंद्राकडे पाठपुरावा करणार असल्याचेही यावेळी मुख्यमंत्र्यांनी सांगितले.

महाराष्ट्रात पुढील काही वर्षात हिंदूह्रदयसम्राट बाळासाहेब ठाकरे महाराष्ट्र समृद्धी महामार्ग, शिवडी न्हावाशेवा सी लिंक असे अनेक मोठे पायाभूत सुविधा प्रकल्प उभे राहत असून त्याद्वारे गुंतवणुकीच्या अनेक मोठ्या संधी उपलब्ध होणार आहेत. त्यामुळे राज्यात भविष्यात निर्माण होणाऱ्या संधीचा फायदा घेण्यासाठी वेस्टमिडलँडमधील कंपन्यांनी राज्यात गुंतवणूक करावी अशी मागणी मुख्यमंत्री एकनाथ शिंदे यांनी केली. याबाबत सकारात्मकता दर्शवत एकमेकांशी गुंतवणूकविषयक सामंजस्य करार करून हे संबंध अधिक वृद्धिंगत करण्याचा निर्णय यावेळी घेण्यात आला.

लंडनपासून जवळच वेस्टमिडलँड हे राज्य वसलेले आहे. जॅग्वार, कॅडबरी आणि जेसीबीसारख्या प्रतिष्ठित कंपन्या या भागातील आहेत. गेल्या काही वर्षात राज्यातील अनेक मराठी तरुणांनी स्टार्टअपद्वारे या राज्यात आपल्या कंपन्या सुरू केल्या असून त्यांना स्थानिक प्रशासनाकडून उत्तम सहकार्य मिळत आहे. त्यामुळे दोन देशांप्रमाणे दोन राज्यामध्ये गुंतवणूकविषयक संबंध अधिक वाढावेत अशी मागणी या बैठकीत वेस्टमिडलँडचे महापौर अँडी स्ट्रीट यांनी मुख्यमंत्री एकनाथ शिंदे यांच्याकडे केली.

वेस्टमिडलँड राज्य हे इलेक्ट्रिक व्हेईकल्स क्षेत्रातले मोठे हब असून त्यादृष्टीने राज्यात नवीन गुंतवणूक येण्यासाठी मोठी संधी आहे. त्यासोबतच मुंबई ते बर्मिंगहम थेट विमानसेवा सुरू झाल्यास या दोन राज्यात पर्यटन वाढीसाठी त्याचा मोठा फायदा होऊ शकतो, ही बाबही अँडी स्ट्रीट यांनी निदर्शनास आणून दिली, त्यावर  ही सेवा लवकरात लवकर सुरू व्हावी यासाठी राज्य सरकार केंद्र सरकारकडे नक्की पाठपुरावा करेल अशी ग्वाही मुख्यमंत्र्यांनी या शिष्टमंडळाला दिली.

वेस्टमेन्सलँड येथे बोरिक कॅसल, एजबर्स्टन क्रिकेट ग्राउंड, एमस्टरडम येथील सुप्रसिद्ध केनॉल अशी अनेक प्रेक्षणीय स्थळे आहेत. या जागा भारतीय पर्यटकांना पहाता येतील त्यामुळे पर्यटनात मोठ्या संधी उपलब्ध असल्याने त्यासाठी पुढाकार घेण्याचा निर्णय या बैठकीत घेण्यात आला आहे. त्यासोबतच पायाभूत सुविधा क्षेत्रात अनेक कंपन्या कार्यरत असून त्यांनादेखील या दोन राज्यामध्ये काम करण्याची संधी मिळू शकेल. त्यामुळे इलेक्ट्रिक वाहन निर्मिती, पर्यटन आणि पायाभूत सुविधांचा विकास या तीन क्षेत्रात महाराष्ट्र आणि वेस्टमिडलँड यांनी एकत्रितरित्या काम करण्याचा निर्णय या बैठकीत घेण्यात आला.

या बैठकीला इयन ब्रूकफिल्ड, एलन गेमेल, मुख्यमंत्री कार्यालयाचे अपर मुख्य सचिव भूषण गगराणी, नील रामी, बेथ येट्स, अभिजित आफले, आशुतोष चंद्रा हेदेखील उपस्थित होते.

मुंबई-कारागृहात 101 दिवस वास्तव्यानंतर आज पीएएलए कोर्टात संजय राऊतांच्या जामिनावर सुनावणी सुरू होती. अचानक टाळ्यांचा कडकडाट झाला तेव्हा राऊतांना नेमके काय झाले हे कळलेच नाही, गोंधळलेली अवस्था असतानाच वकील म्हणाले, तुम्हाला जामीन मिळाला अन्..संजय राऊतांच्या डोळ्यातून आनंदआश्रू तरळले. आता मी पुन्हा लढेल, न्यायदेवतेचे आभार अशी त्यांची प्रतिक्रिया होती.

शिवसेना नेते आणि खासदार संजय राऊत यांना आज दुपारी जामीन मंजूर झाला. राऊतांना जामीन मंजूर होताच कोर्टरुमच्या बाहेरही टाळ्यांचा कडकडाट झाला. राऊतांच्या जामीन अर्जावर आज मुंबई सत्र न्यायालयाच्या विशेष पीएमएल कोर्टाने निकाल दिला. सर्वजण काय निकाल येईल याची वाट पाहात होते. खुद्द संजय राऊत हेही याच गोष्टीची वाट पाहत होते पण राऊतांना जामीन मंजूर होताच कोर्टरुमबाहेर टाळ्यांचा कडकडाट झाला. राऊतांना त्यावेळी नेमके काय झाले हे उमगले नाही. काही क्षणातच त्यांच्या वकिलांनी राऊत यांना जामीन मंजूर झाल्याचे सांगितले. त्यानंतर संजय राऊतांच्या डोळ्यातून अश्रू तराळले.

​​​​​आईसह कुटुंब वाट पाहतेय

संजय राऊतांच्या जामीनावरील सुनावणीवेळी त्यांचे कुटुंबीय न्यायालयात उपस्थित होते. त्यांना जामीन मिळाल्याचे समजताच कुटुंबीय अत्यंत भावूक झाले होते. 102 दिवस दुरावलेले संजय राऊत घरी येणार हा मोठा दिलासा कुटुंबाला मिळाला. हा प्रसंग अत्यंत धीरगंभीर पण आनंदाचा होता. राऊतांच्या कुटुंबियांच्याही डोळ्यांच्या कडाही पानावल्या.

संजय राऊतांना जामीन मंजूर झाल्याची बातमी मिळताच त्यांच्या आई ते येण्याची वाट पाहत आहेत. घरासमोर आता लगबग सुरू असून राऊत यांच्या स्वागताची जय्यत तयारी सुरू आहे. डीजेसह स्वागतासाठीच्या सर्व वस्तूही आणल्या असून त्यांच्या आई अगदी घराच्या वरच्या मजल्यावरील दारात उभे राहून त्या ही सर्व तयारी पाहतानाचे व्हिडीओही समोर आले आहेत.

मुंबई-शिवसेना नेते आणि खासदार संजय राऊत तसेच त्यांचे बंधू प्रवीण राऊत यांना झालेली अटक ही बेकायदेशीर आहे. ईडीने स्वःतच्या मर्जीने आरोपी निवडले आहेत. मुख्य आरोपींना ईडीने अटक केली नाही, अशी गंभीर टीप्पणी ‘पीएमएलए’ कोर्टाने केली आहे.राऊंताच्या जामीन अर्जावर आज झालेल्या सुनावणीवेळी ईडीला ही चपराक लगावली आहे. यावरून येणाऱ्या काळात नवे वादंग निर्माण होण्याची शक्यता आहे.

‘पीएमएलए’ कोर्टाने काय म्हटले?

• ईडीने गुणवत्तेच्या आधारावर युक्तीवाद करावा.
• आरोपींना अटक कायदेशीर होती हे पटवून द्या.
• संजय राऊत यांना कोणतेही कारण नसताना अटक.
• जामीन अर्जावर सुनावणीवेळी ईडीला कोर्टाने खडसावले.
• प्रमुख आरोपी राकेश वाधवान, सारंग वाधवान यांना अटक नाही.
• म्हाडाची भूमिका संशयास्पद पण म्हाडाच्या कोणत्याही अधिकाऱ्यावर कारवाई नाही.
• अन्य आरोपींवर कुठलाही कारवाई कारवाई झाली नाही.
• प्रवीण राऊत यांना दिवाणी प्रकरणात अटक.

हायकोर्टाचा स्थगितीस नकार

विशेषतः हायकोर्टानेही संजय राऊत यांच्या जामीनावर तातडीने स्थगिती देण्यास नकार दिला आहे. पत्राचाळ घोटाळा प्रकरणात ठाकरे गटाचे नेते संजय राऊत यांना जामीन मंजूर झाला. पीएमएलए न्यायालयाकडून त्यांना मोठा दिलासा मिळाला. तसेच, या प्रकरणात प्रवीण राऊत यांनाही न्यायालयाने जामीन मंजूर केला आहे. त्यानंतर या निर्णयाविरोधात इडीतर्फे मुंबई हायकोर्टात धाव घेतली. परंतु, हायकोर्टानेही संजय राऊत यांच्या जामीनावरील स्थगितीला नकार दिला. त्यामुळे उद्या या प्रकरणावर सुनावणी होईल. तुर्तास हा राऊतांना सर्वात मोठा दिलासा तर इडीला झटका मानला जात असून आज सायंकाळी सातपर्यंत राऊत जेलमधून बाहेर येणार आहेत.

कोर्टाचा शेरा विचार करण्यासारखा – अंधारे

सुषमा अंधारे म्हणाल्या, कोर्टाने जो शेरा दिला तो विचार करण्यासारखा आहे. ईडीवर कोर्टाने ज्या टीप्पणी केली आहे. ईडीने दाखल केलेल्या पाच हजार आठ केसेसमध्ये केवळ आठ केसेसचा निकाल लागला म्हणजेच लोकांना बदनाम करणे, कुटुंबांना नाहक त्रास देणे हा याचा अर्थ आहे.

कारागृह, घराबाहेर जल्लोष-आज दिवाळी

संजय राऊत यांच्या सुटकेचा मार्ग मोकळा झाल्यानंतर राज्यभरात आनंदोत्सव साजरा होत आहे. आर्थर रोड कारागृहाच्या आवारात मोठी गर्दी सध्या जमली असून तेथे आनंदोत्सव साजरा केला जात आहे. जेलपासून संजय राऊत यांच्यासह दुचाकी फेरीही निघणार आहे. लढवय्या योद्धा अशा बिरुदावलीचे बॅनरही कार्यकर्त्यांच्या हाती आहेत.

याशिवाय संजय राऊत यांच्या घरीही दिवाळी साजरी होणार असून त्यांच्या घरासमोर रांगोळी काढण्यात आली असून स्वागतासाठी मोठा समुदाय तेथे उपस्थित आहे. राऊत आधी सिद्धीविनायक दर्शनासाठी नंतर बाळासाहेब ठाकरे यांच्या स्मृतिस्थळावर जाऊन दर्शन घेतील. त्यानंतर मातोश्रीवर जातील व शेवटी घरी जातील.