:एमआयटी डब्ल्यूपीयूत प्रथम जागतिक
कॉन्शियसनेस – ‘द अल्टिमेट रियॅलिटी’ परिषदेचे उद्घाटन

पुणे, १४ नोव्हेंबरः “ मन शुद्धता हा विषय विद्यापीठ पातळीवर चर्चीला जाऊ शकतो. या विषयाला नविन शैक्षणिक धोरणामध्ये कशा प्रकारे आणता येईल हे पाहणे गरजेचे आहे . त्यासाठी सर्वांनी एकत्रीत येऊन प्रयत्न करावे. या विषयामुळे संपूर्ण मानव जात ही सुख,शांती आणि समाधानाचा अनुभव घेऊ शकेल.” असे विचार जागतिक कीर्तिचे संगणक तज्ञ पद्मभूषण डॉ. विजय भटकर यांनी व्यक्त केले.
एमआयटी वर्ल्ड पीस युनिव्हर्सिटी (डब्ल्यूपीयू)च्या एमआयटी स्कूल ऑफ कॉन्शियसनेस अँड अल्टिमेट रियॅलिटी, पुणे तर्फे देशात प्रथमच जागतिक दर्जाची ‘कॉन्शियसनेसः द अल्टिमेट रियॅलिटी’ विषयावर कोथरूड येथील एमआयटी डब्ल्यूपीयूच्या संत श्री ज्ञानेश्वर सभागृहात आयोजित दोन दिवसीय परिषदेच्या उद्घाटन प्रसंगी प्रमुख पाहुणे म्हणून ते बोलत होते.
यावेळी मा. महंत योगी अमरनाथ हे सन्माननीय पाहुणे म्हणून उपस्थित होते. अध्यक्षस्थानी एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ. विश्वनाथ दा. कराड होते.
तसेच, एमआयटी स्कूल ऑफ कॉन्शियसनेस अँड अल्टिमेट रियॅलिटीचे संचालक डॉ. जयंत खंदारे, प्रसिद्ध न्यूरोसर्जन डॉ. दीपक रानडे व एमआयटी डब्ल्यूपीयूचे कुलगुरू डॉ. आर.एम.चिटणीस उपस्थित होते.
डॉ. विजय भटकर म्हणाले,“मानवी जीवनात येणारे अनेक संकटे हे शुद्धतेच्या परिभाषेेने टाळता येऊ शकतात. त्यामुळे मानवी मन सदैव चैतन्य राहिल. वर्तमान काळ पाहता या विषय संदर्भातील परिषद ही देशातील सर्व शाळा व महाविद्यालयात घ्यावे. तसेच विद्यार्थ्यांना याचे अनिवार्य शिक्षण द्यावे. ”
“ कॉन्शसनेस मध्ये उच्च दर्जाचे ज्ञान प्राप्त होते. वैदिक ज्ञान, ४ उपनिषेद आणि उपवेद यात संपूर्ण जगाच्या अस्तित्वाचे ज्ञान समाविष्ठ आहे. स्व अनुभव घेण्याचा उत्तम मार्ग म्हणजे चैतन्य स्वरूपात जाणे. या भूतलावर अध्यात्माचा अनुभव घेणे हे एक अलौकिक सत्य आहे. मोबाइल सारख्या साधनामुळे संपूर्ण जगाचे ज्ञान मिळत आहे. ब्रम्हांडाचे सत्य जाण्यासाठी त्याचा उपयोग करावा. त्या करीता अनेक भाषेचे ज्ञान असावे. या विश्वाकडे वैदिक दृष्टिकोनातून पाहण्याची आज गरज आहे. ”
डॉ. विश्वनाथ दा. कराड म्हणाले, “अविनाशी आत्मा आणि मनाचे खरे स्वरूप कळाल्यानंतर जीवन सुखमय होते. ओम आणि योग हे दोन शब्द सर्वात महत्वाचे असून तेच शांतीचे सर्वात मोठे सूत्र आहे. अद्वैत ज्ञान हे विज्ञानाचे तत्वज्ञान आहे.  संत श्री ज्ञानेश्वर महाराज यांनी सांगितलेले ज्ञान, कर्म, आत्मा आणि मनाचे स्वरूप हे जगातिल कोणत्याही प्रयोगशाळेत सापडणार नाही. या परिषदेच्या नंतर जगातिल कोणत्याही विज्ञान परिषदेत आध्यात्मिक व्यक्तींना उंच दर्जाचे असे स्थान मिळेल. सद्गुणांची पूजा हीच ईश्वर सेवा असून त्या संदर्भात आत्मपरीक्षाची गरज आहे.”
डॉ. दीपक रानडे म्हणाले, भारतीय तत्वज्ञानाने जीवन जगण्याचा मार्ग दाखविला आहे. विज्ञान आणि अध्यात्म यांच्या समन्वयातून जीवनात सुख आणि आनंद प्राप्त होतो. संत ज्ञानेश्वर यांनी सांगितलेले सत्य हे अंतिम आहे.
त्या नंतर आयोजित प्रथम चर्चासत्रात डॉ. अ‍ॅलेक्सी हॅकी, डॉ. यूलिसी डी क्रोपो व स्वामी राधिकानंद सरस्वती , दुसर्‍या सत्रात डॉ. के रघू, आनंदी रविनाथ व डॉ. रामकृष्ण भट, आणि तिसर्‍या सत्रात महंत योगी अमरनाथ, विवेक सावंत आणि डॉ. मिलिंद पात्रे यांनी आपले विचार मांडले.
डॉ. जयंत खंदारे यांनी प्रस्ताविकेत परिषदेचे महत्व विषद केले.

मावळातील मोर्वेगाव येथील साई फार्म हाऊस मध्ये बसले होते लपून

पुणे : मार्केट यार्ड परिसरात अंगडीयाच्या कार्यालयात भरदिवसा घुसून गोळीबार करीत 28 लाख रुपयांची रोकड लुटणाऱ्या 7 दरोडेखोरांना पुणे पोलिसांच्या खंडणी विरोधी पथकाने अवघ्या दोन दिवसातच पकडले आहे.. हि घटना शनिवारी दुपारी साडे बारा वाजण्याच्या सुमारास मार्केट यार्ड येथे घडली होती.”या गुन्ह्यातील दोन आरोपीना मोका लावलेला आहे, त्यामध्ये ते फरारी होते. आरोपी कारागृहात असतानाच त्यांनी दरोडा टाकण्याचा कट रचला. त्यानंतर त्यांनी हा गुन्हा केला. पोलिसांनी सात जणांना दोन दिवसातच त्यांना अटक केली.यात आणखी 4 ते 5 जण सहभागी असावेत जे अजूनही फरारी आहेत.” अशी माहिती पोलिस आयुक्त अमिताभ गुप्ता आणि तपास अधिकाऱ्यांनी आज पत्रकार परिषदेतून दिली. पोलिसांनी आरोपींकडून आतापर्यंत 11 लाखाची रोकड, तीन दुचाकी, मोबाईल असा 13 लाख रुपयांचा मुद्देमाल जप्त केला आहे.

अविनाश उर्फ सनी रामप्रताप गुप्ता ( वय 20, मंगळवार पेठ), आदित्य अशोक मारणे (वय २८, रा. रामनगर,वारजे), दिपक ओम प्रकाश शर्मा ( वय १९, राहुलनगर, शिवणे), विशाल सतीश ( वय २०, मंगळवार पेठ), अजय बापू दिवटे ( वय २३, श्रीराम चौक, वारजे), गुरुजनसिंह सेवासिंह विरक (वय २२, वर्षे,शिवाजीनगर), निलेश बाळू (वय २०, एस. आर. ए. स्कीम, मंगळवार पेठ) अशी अटक केलेल्यांची नावे आहेत.

पोलिसानी दिलेल्या माहितीनुसार, मार्केटयार्ड येथील गेट नंबर दोन येथे गणराज मार्केट नावाची इमारत आहे. संबंधित इमारतीमध्येच द प्रोफेशनल कुरिअर नावाने अंगडीयाचा व्यावसाय चालतो. तर इमारतीच्या पाठीमागील बाजुस असलेल्या पोटमाळावजा जागेत त्याचे कार्यालय आहे. येथे शनिवारी दुपारी साडे बारा वाजण्याच्या सुमारास अंगडीयाच्या कार्यालयात दोन कर्मचारी उपस्थित होते. ते काचेच्या केबिनमध्ये बसून त्यांचे नियमीत काम करीत होते.त्यावेळी एक व्यक्ती तेथे आला, त्यानंतर तो थेट कर्मचारी काम करीत असलेल्या काचेच्या केबिनमध्ये घुसण्याचा प्रयत्न करु लागला.यातील एका कर्मचाऱ्याने त्यास धक्का देऊन बाहेर काढत दार लावून घेतले. त्यानंतर संबंधित व्यक्तीने कोयता काढून केबिनची काच फोडली. तर त्याच्या मागून आलेल्या दुसऱ्या व्यक्तीने थेट पिस्तूल काढून जमिनीवर गोळी झाडली. त्यापैकी एकाने केबिनमध्ये घुसून तेथील रोकड बाहेरील व्यक्तीकडे दिली. त्यांनी रोकड पिशवीमध्ये भरुन तेथून पळ काढला. दरम्यान, इमारतीच्या बाहेर त्यांनी त्यांचे तीन साथीदार थांबविले होते. दरोडा टाकल्यानंतर पाचही जणांनी धावत जाऊन पुढे थांबलेल्या दोन दुचाकींवरुन पळ काढला. दरम्यान, या घटनेची माहिती मिळताच अतिरीक्त पोलिस आयुक्त नामदेव चव्हाण, सहाय्यक पोलिस आयुक्त पौर्णिमा तावरे, गुन्हे शाखेचे पोलिस निरीक्षक हेमंत पाटील यांनी घटनास्थळी भेट दिली.

या घटनेनंतर पोलिसांनी संबंधित कार्यालय व रस्त्यावरील सीसीटीव्ही चित्रीकरण थाब्यात घेतले. त्यामध्ये दरोडेखोर दुचाकीवरुन शिवनेरी रस्त्याने पुणे सातारा रस्त्याच्या दिशेने गेल्याचे चित्रीकरणात दिसून आले होते. त्यादृष्टीने पोलिसांनी तांत्रिक तपास केला. त्यामध्ये आरोपी मावळ तालुक्यातील मोर्वेगाव येथील साई फार्म हाऊस येथे लपून बसल्याची माहिती पोलिसांना मिळाली. त्यानुसार पोलिसांनी अधिक तपास करून आरोपींना बेड्या ठोकल्या.

सदरची कारवाई पोलीस आयुक्त श्री अमिताभ गुप्ता व सह पोलीस आयुक्त संदिप कर्णिक,
अपर पोलीस आयुक्त (गुन्हे) रामनाथ पोकळे, पोलीस उप आयुक्त (गुन्हे) श्री. श्रीनिवास घाडगे,
सहायक पोलीस आयुक्त – १, गुन्हे शाखा, गजानन टोपे यांच्या मार्गदर्शनाखाली खंडणी विरोधी पथक-१ चे
वरिष्ठ पोलीस निरीक्षक अजय वाघमारे, पो.उप निरी विकास जाधव, श्रेपोउनि यशवंत ओबासे, पोलीस
अंमलदार मधूकर तुपसौंदर, सयाजी चव्हाण, प्रमोद सोनवणे, संजय भापकर, हेमा ढेबे, नितीन कांबळे, किरण
ठवरे, दुर्योधन गुरव, अमोल आवाड, राजेंद्र लांडगे, विजय कांबळे, प्रफुल्ल चव्हाण, संभाजी गंगावणे यांनी केलेली
आहे.

पुणे : श्री सद्गुरू गजानन महाराज की जय चा जयघोष… गं्रथ पठणातून निर्माण झालेले अध्यात्मिक वलय…  आणि तब्बल -१६०० हून अधिक भक्तांनी एकत्रित येत श्री गजानन विजय गं्रथाचे केलेले सामुदायिक पठण… अशा श्री गजानन महाराजांच्या जयघोषाने भक्तीमय झालेल्या वातावरणात आळंदी कार्तिक वारीनिमित्त आयोजित श्री गजानन विजय गं्रथाचा भव्य सामुदायिक पारायण सोहळा संपन्न झाला. या पारायण सोहळ््यात तब्बल १८५० हून अधिक भाविकांनी सहभाग घेतला.

श्री गजानन महाराज (शेगांव) सेवाधारी परिवार, पुणे  या संस्थेतर्फे न्यू इंग्लिश स्कूल रमणबाग येथे पारायण सोहळ्याचे आयोजन करण्यात आले. यावेळी अध्यात्मिक क्षेत्रात उल्लेखनिय कार्य करणा-या ह.भ.प.ज्योत्स्ना मोदले यांना श्री गजानन महाराज सेवाधारी भूषण पुरस्काराने गौरविण्यात आले. चिंचवड येथील डॉ.गजानन खासनीस यांच्या उपस्थितीत आणि न्यासातील सेवाधा-यांच्या हस्ते पुरस्कार प्रदान करण्यात आला. यावेळी संस्थेचे अध्यक्ष मदन कस्तुरे व पदाधिकारी, सेवाधारी उपस्थित होते. 
शाल, श्रीफळ, सन्मानपत्र व रोख रक्कम अकरा हजार रुपये असे पुरस्काराचे स्वरूप होते. सोहळ््याचे यंदाचे १६ वर्ष आहे. प.पू. स्वामी गणेशानंद सरस्वती महाराज उर्फ दादा महाराज यांच्या उपासनेचा आणि अध्यात्माचा वारसा पुढे नेणा-या व्यक्तिस हा पुरस्कार दिला जातो. 
ह.भ.प.ज्योत्स्ना मोदले म्हणाल्या, मंदिरात उपासना सुरु करणे सोपे असते, मात्र ती सतत प्रवाहित ठेवणे अवघड असते. परमेश्वराची मंदिरात स्थापना सहजपणे करणे शक्य असते, मात्र भक्तांच्या ह्रदयात परमेश्वराची स्थापना होणे कठिण असते. परंतु महाराजांच्या कृपेने हे शक्य होत आहे. भक्तांनी मंदिरात एकत्रित यावे आणि संघटित होणे, हे महत्वाचे आहे. त्यातूनच विधायक कार्य चांगल्या पद्धतीने घडू शकते. 
पारायण सोहळ््यादरम्यान लायन्स क्लब आॅफ पुणे,सहकारनगर यांच्यावतीने महिलांसाठी कर्करोग तपासणी, डोळे तपासणी, चष्मे वाटप, रक्त व हिमोग्लोबिन, शर्करा तपासणी व जनजागृतीचे आयोजन करण्यात आले. यावेळी ४५० जणांची तपासणी करण्यात आली.  

पुणे, दि. १४: महाराष्ट्र शासनाच्यावतीने आयोजित करण्यात आलेल्या दोन दिवसीय ‘ग्रंथोत्सव- २०२२’चे जिल्हाधिकारी डॉ. राजेश देशमुख यांच्या हस्ते मंगळवार १५ नोव्हेंबर रोजी सकाळी ११.३० वा. उद्घाटन होणार आहे. पंडित जवाहरलाल नेहरू सभागृह, घोलेरोड, शिवाजीनगर येथे हा ग्रंथोत्सव होणार आहे.

महाराष्ट्र राज्य सांस्कृतिक धोरण-२०१० अंतर्गत उच्च व तंत्र शिक्षण विभाग ग्रंथालय संचालनालय मुंबई व जिल्हा ग्रंथालय अधिकारी कार्यालय पुणे यांच्या संयुक्त विद्यमाने या ग्रंथोत्सवाचे आयोजन करण्यात आले आहे. या निमित्ताने ग्रंथ प्रदर्शन, विक्री आणि त्यासोबतच विविध साहित्यिक व सांस्कृतीक कार्यक्रमांचे आयोजन करण्यात आले आहे. ९५ व्या अखिल भारतीय साहित्य संमेलनाचे अध्यक्ष भारत सासणे हे उद्घाटन कार्यक्रमाचे अध्यक्ष असतील.

ग्रंथदिंडीने ग्रंथोत्सवाची सुरुवात
१५ नोव्हेंबर रोजी पहिल्या सत्रात सकाळी १० वाजता ग्रंथदिंडीचे आयोजन करण्यात आले असून ११.३० वा. ग्रंथ प्रदर्शनाचे उद्घाटन होणार आहे. दुपारी ३ ते ४ वा. ‘सार्वजनिक ग्रंथालयांची उर्जित अवस्था’ या विषयावर ज्येष्ठ साहित्यिक डॉ. सुनीलकुमार लवटे यांचे मार्गदर्शन होणार आहे. दुपारी ४ ते ५ वा. जी.एं.च्या कथांचे अभिवाचन, दुपारी ५ ते सायं. ६ वा. एकपात्री काव्य नाट्यानुभव ‘कुटुंब रंगले काव्यात’चे सादरीकरण होणार आहे.

दोन दिवसीय ग्रंथोत्सवात विविध नामांकित प्रकाशकांच्या दर्जेदार पुस्तकांच्या प्रदर्शनाचे आयोजन केले आहे. प्रदर्शनाची वेळ सकाळी १० ते रात्री ८ वाजेपर्यत असून प्रवेश विनामूल्य आहे. तरी सर्व नागरिक व ग्रंथप्रेमी रसिकांनी या दोन दिवसीय ग्रंथोत्सवाचा लाभ घ्यावा आणि ग्रंथखरेदी करुन वाचनचळवळीत सहभागी व्हावे, असे आवाहन जिल्हा ग्रंथालय अधिकारी श्रीमती श्रे. श्री. गोखले यांनी केले आहे.

पुणे दि.१४: महाराष्ट्र शासनाच्या सामाजिक न्याय विभागामार्फत अनुसूचित जाती व नवबौद्ध घटकांच्या नोंदणीकृत स्वयंसहायता बचत गटांना मिनी ट्रॅक्टर व त्याच्या उपसाधनांचा पुरवठा करणे ही योजना सहाय्यक आयुक्त समाज कल्याण पुणे यांच्यामार्फत राबविण्यात येत आहे.

२०२२-२३ या आर्थिक वर्षाकरीता गटविकास अधिकारी, कृषी अधिकारी किंवा प्रकल्प संचालक जिल्हा ग्रामीण विकास यंत्रणा यांच्याकडे नोंदवलेल्या आणि राष्ट्रीयकृत बँकेमध्ये खाते असलेल्या अनुसूचित जाती व नवबौद्ध घटकांच्या पात्र बचत गटांच्या बँक खात्यात या योजनेअंतर्गत ३ लाख १५ हजार रुपये मिनी ट्रॅक्टर व त्याची उपसाधने खरेदी केल्यानंतर जमा करण्यात येतात.

स्वयंसहाय्यता बचत गटातील सदस्य हे महाराष्ट्र राज्याचे रहिवासी असावे. बचत गटातील किमान ८० टक्के सदस्य हे अनुसूचित जाती व नवबौद्ध घटकातील असावेत. मिनी ट्रॅक्टर व त्याची उपसाधने यांच्या खरेदीची कमाल मर्यादा रुपये ३ लाख ५० लाख हजार राहील. नोंदणीकृत स्वयंसहाय्यता बचत गटांनी कमाल मर्यादा रकमेच्या १० टक्के स्वहिस्सा भरल्यानंतर ९० टक्के शासकीय अनुदान अनुज्ञेय राहिल. ठरवून दिलेल्या उद्दीष्टापेक्षा अधिक अर्ज प्राप्त झाल्यास बचत गटांची निवड लॉटरी पद्धतीने करण्यात येईल. योजनेअंतर्गत ९ ते १८ अश्वशक्तीचा मिनी ट्रॅक्टर व त्याची उपसाधने कल्टिव्हेटर किंवा रोटव्हेटर ट्रेलर खरेदी करता येईल.

योजनेचा लाभ घेण्यासाठी आवश्यक कागदपत्रांसहित विहित नमुन्यातील अर्ज सहाय्यक आयुक्त समाज कल्याण, डॉ. बाबासाहेव आंबेडकर सामाजिक न्याय भवन, विश्रांतवाडी रोड, विश्रांतवाडी पोलीस स्टेशन समोर, येरवडा पुणे- ४११०१५ (दूरध्वनी क्र. ०२०-२९७०६६११) येथे पंधरा दिवसाच्या आत प्रत्यक्ष सादर करावेत, असे आवाहन सहाय्यक आयुक्त संगीता डावखर यांनी केले आहे.

पुणे दि.१४: औंध येथील शासकीय औद्योगिक प्रशिक्षण संस्थेत अल्पसंख्यांक समाजातील महिला व युवक तसेच ‘सारथी’ अंतर्गत लाभार्थ्यांसाठी अल्पमुदतीच्या रोजगारक्षम विनाशुल्क व्यवसाय प्रशिक्षण कार्यक्रमांचे येत्या १५ नोव्हेंबरपासून आयोजन करण्यात आले आहे.

कौशल्य विकास, उद्योजकता व नाविन्यता विभागामार्फत हे अभ्यासक्रम सुरू करण्यात आले आहेत. अल्पसंख्यांक समाजातील तसेच ‘सारथी’ अंतर्गत मराठा, कुणबी, कुणबी-मराठा, मराठा-कुणबी घटकातील काही कारणास्तव पूर्णवेळ किंवा दीर्घ मुदतीचे प्रशिक्षण पूर्ण करू शकत नाहीत असे बेरोजगार युवक, युवती किंवा आयटीआय उत्तीर्ण उमेदवारांना अधिकचे कौशल्य प्राप्त करण्यासाठी या अल्पमुदतीच्या कौशल्य प्रशिक्षणाचा लाभ घेता येईल.

सुरुवातीला अल्पसंख्यांक समाजातील युवकांसाठी एकूण सहा अभ्यासक्रम सुरू करण्यात येत आहेत. त्यामध्ये सीएनसी सेटर कम ऑपरेटर टर्निंग, ड्राफ्ट्समन- मेकॅनिकल, क्यूसी इन्स्पेक्टर लेव्हल ४, फील्ड टेक्निशियन- एसी, ऑटोमोटिव्ह सर्व्हिस टेक्निशियन लेव्हल ३, मॅन्युअल मेटल आर्क वेल्डिंग/शील्डेड मेटल आर्क वेल्डिंग वेल्डर या अभ्यासक्रमांचा समावेश आहे. सारथी अंतर्गत लाभार्थ्यांसाठी सध्या फक्त सीएनसी सेटर कम ऑपरेटर टर्निंग हा अभ्यासक्रम सुरू करण्यात येत आहे.

अभ्यासक्रमास प्रवेश घेण्यासाठी उमेदवाराची वयोमर्यादा १८ ते ४० वर्षे, शिक्षण किमान इयत्ता आठवी ते दहावी उत्तीर्ण असावे. या अभ्यासक्रमांसाठी मुलींना प्राधान्य असून प्रत्येक व्यवसायातील प्रवेश क्षमता ३० आहे. किमान तीन महिन्याचा हा अभ्यासक्रम असणार आहे. प्रवेश घेण्यासाठी गुणपत्रिका, टीसी, आधार कार्डची छायांकित प्रत, अल्पसंख्यांक उमेदवारांसाठी अल्पसंख्यांक असल्याचा पुरावा आदी कागदपत्रे तसेच दोन छायाचित्रे आवश्यक आहेत. इच्छुकांनी प्रवेशासाठी https://forms.gle/m7jZocco3RFcmBav5 या लिंकचा उपयोग करावा.

अधिक माहितीसाठी सुनिल तुपलोंढे (भ्रमणध्वनी क्र. – ९८५०१५१८२५) तसेच रविंद्र रापतवार (भ्रमणध्वनी क्र. -९४२१७६६४५६) यांच्याशी संपर्क साधावा. या अल्पमुदतीच्या अभ्यासक्रमांचा लाभ घेऊन उमेदवारांनी कौशल्यवृद्धी करावी, असे आवाहन संस्थेचे उपसंचालक आर. बी. भावसार यांनी केले आहे.