जिल्हा नियोजन समितीच्या बैठकीत निर्णय
जिल्ह्यात ‘गाळमुक्त धरण व गाळयुक्त शिवार’ योजना राबविणार-पालकमंत्री चंद्रकांतदादा पाटील

पुणे दि.१९: राज्याचे उच्च व तंत्रशिक्षण मंत्री तथा जिल्ह्याचे पालकमंत्री चंद्रकांतदादा पाटील यांच्या अध्यक्षतेखाली झालेल्या जिल्हा नियोजन समितीच्या बैठकीत दगडूशेठ गणपती देवस्थानला ‘क’ वर्ग पर्यटनस्थळाचा दर्जा देण्यास मान्यता देण्यात आली. संपूर्ण जिल्ह्यात राज्य शासनाची ‘गाळमुक्त धरण व गाळयुक्त शिवार’ योजना प्रभावीपणे राबविण्यात येईल, मोरया गोसावी देवस्थान परिसर विकासासाठी निधी देण्यात येईल, असे यावेळी श्री. पाटील यांनी सांगितले.

विधानभवन येथे आयोजित बैठकीस ज्येष्ठ नेते खासदार शरद पवार, विधानसभेचे विरोधी पक्षनेते अजित पवार, खासदार सुप्रिया सुळे, श्रीरंग बारणे, डॉ. अमोल कोल्हे, विभागीय आयुक्त सौरभ राव, जिल्हाधिकारी डॉ.राजेश देशमुख, जिल्हा नियोजन अधिकारी किरण इंदलकर आदी उपस्थित होते.

पालकमंत्री श्री.पाटील म्हणाले, जिल्हा परिषद शाळा, रस्ते आणि अंगणवाड्यांच्या बांधकामाबाबत स्वतंत्र बैठकीत सविस्तर आढावा घेण्यात येईल. शाळांना विविध सुविधा उपलब्ध करून देण्यासाठी सामाजिक उत्तरदायित्व निधीतून निधी उपलब्ध करून देण्यात येईल. शाळांमध्ये स्वच्छतागृहाची व्यवस्था असेल याची दक्षता घ्यावी, असे त्यांनी सांगितले.

ते पुढे म्हणाले, पुणे शहरात नव्याने समाविष्ट झालेली गावे लक्षात घेता तेथील सुविधांसाठी जिल्हा नियोजन समितीमार्फत देण्यात येणाऱ्या निधीत वाढ करण्यात आली आहे. शहर आणि ग्रामीण पोलीस दलाला वाहनांसाठी आवश्यक निधी देण्यात येत आहे. पोलिसांनी अद्ययावत साहित्याची मागणी केल्यास अधिकचा निधी देण्यात येईल, तसेच सामाजिक उत्तरदायित्व निधीतून निधी उपलब्ध करून देण्यात येईल.

इंद्रायणी मेडिसिटीबाबत आरोग्यमंत्र्यांसोबत बैठक घेण्यात येईल. जिल्हा परिषदेने जिल्हा नियोजन समिती अंतर्गत प्राप्त निधीतून कामांचे नियोजन वेळेवर करावे. दौंड, इंदापूर आणि बारामती तालुक्यातील शेतकऱ्यांना पुरेशी वीज मिळावी यासाठी महावितरणने आवश्यक कार्यवाही करावी. जिल्ह्यातील सार्वजनिक बांधकाम विभागाच्या रस्त्यांवरील खड्डे बुजविण्याचे काम पावसाळ्यापूर्वी करावे, असे निर्देशही पालकमंत्र्यांनी दिले.

पुणे, दि. १९ मे २०२३: पॉवर ग्रीड कॉर्पोरेशन ऑफ इंडिया लिमिटेडच्या (पीजीसीआयएल) अतिउच्चदाब ४०० केव्ही शिक्रापूर ते तळेगावच्या चारपैकी दोन वीजवाहिन्यांमध्ये गुरूवारी (दि. १८) रात्री ७.१० वाजता अचानक तांत्रिक बिघाड झाला होता. त्यामुळे चाकण एमआयडीसीसह पुणे व पिंपरी चिंचवड शहरातील सुमारे ३ लाख ५५ हजार ग्राहकांचा वीजपुरवठा खंडित झाला होता. या अतिउच्चदाब वीजवाहिन्यांची दुरुस्ती पूर्ण झाल्यानंतर शुक्रवारी (दि. १९) पहाटे १ वाजेपासून सकाळी ८.५५ वाजेपर्यंत सर्वच ग्राहकांचा वीजपुरवठा टप्प्याटप्प्याने पूर्ववत करण्यात आला.

दरम्यान, या तांत्रिक बिघाडामुळे महापारेषणचे अतिउच्चदाब उपकेंद्र बंद पडल्याने तसेच भारव्यवस्थापन शक्य झाले नाही. त्यामुळे गुरुवारी (दि. १८) रात्री १० वाजेपासून पहाटे ३ वाजेपर्यंत कोथरूड, एसएनडीटी, औंध, बाणेर, शिवाजीनगर, बालेवाडी, बावधन, मॉडेल कॉलनी, पाषाण आदी भागांमध्ये एक तासांचे चक्राकार पद्धतीने विजेचे भारनियमन करावे लागले.  

याबाबत माहिती अशी की, पॉवर ग्रीड कॉर्पोरेशन ऑफ इंडिया लिमिटेडच्या शिक्रापूर ते तळेगाव अतिउच्चदाब ४०० केव्ही वीजवाहिन्यांच्या चारपैकी दोन वाहिन्यांमध्ये गुरुवारी (दि. १८) रात्री ७.१० वाजता तांत्रिक बिघाड झाला. पाहणीमध्ये तळेगाव नजिकच्या करंजविहिरे गावाजवळ अतिउच्चदाबाची एक वाहिनी तुटून दुसऱ्या वाहिनीवर पडल्याचे दिसून आले. त्यानंतर रात्रीच अदानी कंपनी आणि महापारेषणचे अभियंता व कर्मचाऱ्यांकडून संयुक्तपणे या वीजवाहिनीच्या दुरुस्तीचे काम युद्धपातळीवर सुरु करण्यात आले.  

परंतु, या बिघाडामुळे महापारेषण कंपनीच्या ४०० केव्ही चाकण, २२० केव्ही चिंचवड, २२० केव्ही उर्से, २२० केव्ही चाकण, १३२ केव्ही चाकण, १३२ केव्ही खराडी या अतिउच्चदाब उपकेंद्रांचा वीजपुरवठा खंडित झाला होता. तब्बल ३९६ मेगावॅट विजेचे वहन बंद पडले होते. परिणामी पुणे शहरातील प्रामुख्याने खराडी, वडगाव शेरी, विमाननगर, येरवडा, धानोरी तसेच पिंपरी गाव, चिंचवड, पुनावळे, वाल्हेकरवाडी, वाकड, ताथवडे, किवळे, रावेत, थेरगाव परिसर, संपूर्ण प्राधीकरण आणइ आकुर्डीमधील ५० टक्के भाग असा एकूण ३ लाख ५५ हजार ग्राहकांचा वीजपुरवठा खंडित झाला होता. सोबतच चाकण एमआयडीसीमधील उच्च व लघुदाहबाच्या सुमारे ५ हजार औद्योगिक ग्राहकांचा वीजपुरवठा बंद पडला.

महापारेषण व महावितरणचे सर्व वरिष्ठ अभियंता सातत्याने एकमेकांशी संपर्कात होते. एकीकडे उन्हाळ्यामुळे वाढलेली विजेची मागणी व तांत्रिक बिघाडामुळे ३९६ मेगावॅट विजेचे थांबलेले वहन या प्रतिकूल परिस्थितीत भारव्यवस्थापनाद्वारे वीजग्राहकांना दिलासा देण्याचे प्रयत्न सुरु होते. यामध्ये साधारणतः मध्यरात्री एक वाजता टप्प्याटप्प्याने वीजपुरवठा पूर्ववत होण्यास प्रारंभ झाला. महापारेषण व महावितरणचे उपकेंद्र टप्प्याटप्प्याने सुरु होत गेले त्याप्रमाणे ग्राहकांचा वीजपुरवठा देखील सुरळीत होत गेला. आज सकाळी ८.५५ पर्यंत पॉवर ग्रीडच्या वीजवाहिन्यांमुळे खंडित झालेल्या सर्व ग्राहकांचा वीजपुरवठा पूर्ववत करण्यात आला आहे.

उत्तम स्मरणशक्तीच्या बळावर न पाहता ‘डेक ऑफ कार्ड’ ओळखण्याचा विक्रम
पुणे – सध्या मोबाईल आणि टिव्हीच्या स्क्रीन टाईममुळे मुलांच्या डोळ्याबरोबर स्मरणशक्तीवर देखील परिणाम झालेला दिसत आहे. मात्र, यावर मात करीत पुण्यातील दिव्यांक जगताप याने वयाच्या अवघ्या पाचव्या वर्षी बुद्धिमत्ता आणि उत्तम स्मरणशक्तीच्या बळावर इंडिया बुक ऑफ रेकॉर्डमध्ये विक्रम नोंदविला आहे. कमी वयात केवळ ५७ सेकंदात ५२ पत्ते न बघता ओळखण्याचा विक्रम त्याने केला आहे. तर अत्यंत कमी वेळात हा विक्रम केल्याने वर्ल्ड वाईड बुक ऑफ रेकाॅर्ड मध्ये देखील त्याची नोंद झाली आहे .

बिबवेवाडी येथे राहणारा दिव्यांक पुण्यातील क्लाइन मेमोरियल स्कूल ऑफ यूबीएस या शाळेत इयत्ता पहिलीच्या वर्गात शिकतो. दिव्यांकला स्मरणशक्तीचे विविध खेळ खेळण्याबरोबर पोहण्याची, सायकल चालविण्याची आवड आहे. मोठे झाल्यानंतर भारतीय प्रशासकीय अधिकारी होण्याचे स्वप्न हा चिमुकला बघतो आहे. त्याचे वडील राहुल जगताप हे इंजिनियर आहेत. तिची आई आराध्या कोचिंग क्लासेसच्या माध्यमातून विद्यार्थ्यांना मार्गदर्शन करते, तर गरजू विद्यार्थ्यांना मोफत शिकविते. त्याचबरोबर मुलांच्या बुद्धीला चालना देणारे वर्ग देखील त्या घेतात.

आराध्याचे वडील राहुल जगताप म्हणाले, मुलांना नेहमी मोबईल किंवा टिव्ही बघण्यापेक्षा विविध कौशल्य आत्मसात केली पाहिजेत. यासाठी आम्ही आमच्या दोन्ही मुलांना प्रोत्साहन देत असतो. दिव्यांक ची स्मरणशक्ती लहानपणापासून चांगली आहे. त्याला कोणतीही गोष्ट सांगितली तरी ती त्याला लक्षात राहत असे.

आराध्याची आई राधिका जगताप म्हणाल्या, दिव्यांकला नेहमी बुद्धीला चालना देणारे खेळ खेळायला आवडतात. म्हणून मी देखील त्याला ते खेळ खेळण्यासाठी प्रोत्साहन दिले आहे. नुकताच माझ्या मुलीने देखील ‘बायनरी कोड’ ओळखण्याचा इंडिया बुक मध्ये विक्रम केला आहे. मुलांना योग्य मार्गदर्शन दिले तर त्यांना योग्य दिशा मिळते.

पुणे : राज्यांनी बनवलेले कायदे वैध ठरवत सर्वोच्च न्यायालयाने बैलगाडा शर्यत, जल्लीकट्टू आणि कंबाला (म्हशींच्या शर्यती) स्पर्धांचा मार्ग मोकळा केला आहे. त्यामुळे प्राण्यांवरील अत्याचार रोखण्यासाठी आता सामान्य माणसाने पुढाकार घेण्याची गरज आहे. तसेच शर्यतींचे आयोजन करताना आयोजकांनी वैद्यकीय यंत्रणा उपलब्ध करण्याची व अत्याचार होणार नाहीत, याची काळजी घेण्याची मागणी पुण्यातील शाकाहार कार्यकर्ते व बैलगाडा शर्यतींवर बंदी घालण्यासाठी लढा देणारे प्राणीप्रेमी डॉ. कल्याण गंगवाल यांनी केले.
डॉ. कल्याण गंगवाल म्हणाले, “न्यायालयाचा हा निर्णय आम्हा सर्व प्राणीप्रेमींना नाराज करणारा व धक्कादायक आहे. असे असले तरी सर्वोच्च न्यायालयाचा हा निकाल स्वीकारावा लागेल. या संदर्भात आम्ही २००९ पासून लढा देत होतो. सत्र न्यायालयात, तसेच सर्वोच्च न्यायालयातही याआधीच्या प्रकरणात आम्ही जिंकलो होतो. मात्र, सर्वच राजकीय पक्षांकडून बैलगाडा शर्यतींचा राजकारणासाठी, मनोरंजनासाठी याचा उपयोग होत असल्याने राज्य सरकारने प्राणी संरक्षण कायद्यात सुधारणा करून सुधारित कायदा न्यायालयात सादर केला. न्यायालयाने काल या कायद्याना वैध ठरवत बैलगाडा शर्यतींवरील बंदी उठवली.”
“जल्लीकट्टू किंवा बैलगाडा शर्यतीत प्राण्यांवर खूप अत्याचार केले जातात. त्यांना स्टिरॉइड देणे, मारहाण करणे, घोड्यासोबत पळवणे, अंधाऱ्या खोलीत डांबणे, कानात मुंग्या सोडणे असे प्रकार होतात. शिवाय शर्यतीच्या ठिकाणी कोणतीही सुरक्षाविषयक काळजी घेतली जात नाही. त्यामध्ये अनेकदा मानवी जीवितहानी होते. आजवर जवळपास ८१३ मृत्यू झाल्याची नोंद आहे. बैलांना जखमा होतात, पाय मोडतात. परिणामी, बैल शर्यती योग्य व शेती योग्य नसल्याचे कारण देऊन त्याला कसायाच्या ताब्यात दिले जाते. हा क्रूरपणा दुर्दैवी आहे. या शर्यती केवळ असुरी आनंद मिळवण्यासाठी आणि राजकारणाची पोळी भाजण्यासाठी वापरल्या जातात. तेव्हा यातील हिंसा लक्षात घेऊन आपण सामान्य नागरिकांनी हे रोखण्यासाठी पुढाकार घ्यावा,” असेही डॉ. गंगवाल यांनी नमूद केले.
प्राण्यांवरील जीवदयेसाठी गेली १०-१२ वर्षे आम्ही लढा देत आहोत. आमच्यासोबत अहमदनगर येथील अनिल कटारिया हेही या लढ्यात सहभागी होते. लाखो रुपयांचा खर्च या लढ्यासाठी झाला आहे. पीपल फॉर एथिकल ट्रीटमेंट ऑफ एनिमल्सने (पेटा) सर्वोच्च न्यायालयात अखेरपर्यंत बाजू लावून धरली. मात्र, राजकीय बाजू वरचढ ठरली आणि बैलगाडा शर्यतींचा मार्ग मोकळा झाला. याबाबात आम्ही जनजागृती करणार असून, कायदेशीर लढा देण्याबाबत पुनर्विचार करणार आहोत, असेही डॉ. गंगवाल म्हणाले.

पुणे-आम आदमी पार्टी महाराष्ट्र राज्य कमिटी व विभागीय कमिटी या बरखास्त करण्यात आलेल्या आहेत.
नुकत्यातच राष्ट्रीय पक्ष म्हणून मान्यता मिळालेल्या आम आदमी पार्टीने आता 2024 च्या निवडणुकीच्या तयारीच्या दृष्टीने पावले उचलत पूर्णतः नव्याने संघटन बांधणी करण्याचा निर्णय घेतलेला आहे.आपचे राष्ट्रीय सचिव खासदार डॉक्टर संदीप पाठक यांनी आज तशी घोषणा केली आहे. तसेच थेट राष्ट्रीय नेतृत्वाच्या मार्गदर्शनात नव्याने कमिटी तयार करण्यात येतील असे या पत्रकात म्हटले आहे.

दिल्ली, पंजाब, गुजरात नंतर अनेक राज्यात पसरण्याचा आम आदमी पार्टी चा प्रयत्न असून महाराष्ट्रातही आप ला मोठी संधी आहे असे राजकीय विश्लेषकांचे मत आहे. त्यामुळे आता आप च्या पुढच्या वाटचालीकडे सर्व पक्षांचे लक्ष आहे.

‘ आम आदमी पार्टी महाराष्ट्रात तळागाळापर्यंत एक मजबूत आणि सशक्त संघटना बांधणी करणार आहे म्हणून आज हे पहिले पाऊल उचलण्यात आले आहे. येणाऱ्या काळात संपूर्ण राज्याच्या कानाकोपऱ्यातून सर्व जाती, धर्म आणि पंथाच्या लोकांना समाविष्ट करून एक सशक्त राज्य समिती बनवण्यात येईल. या समितीच्या माध्यमातून महाराष्ट्राच्या प्रत्येक वस्तीत, गावात आणि बूथ पातळी पर्यंत आम आदमी पार्टीचे कार्यकर्त्यांचे जाळे उभारले जाईल. हे एक अत्यंत महत्वाचे पाऊल आहे. महाराष्ट्रातील बदलणाऱ्या राजकारणात आप वेगाने पुढे वाटचाल करत आहे. महाराष्ट्रातील सर्व बुद्धिवान, सामाजिक व राजकीय लोकांना आम आदमी पार्टीच्या माध्यमातून जनतेची सेवा करण्याची संधी उपलब्ध होईल. ‘ असे आप चे राज्य सह प्रभारी गोपाल इटालिया यांनी म्हंटले आहे.

पुणे-अंधश्रद्धा निर्मूलन समितीचे कार्याध्यक्ष डॉ नरेंद्र दाभोलकर यांच्या खूनाच्या प्रकरणातील तपास बंद करण्याच्या सीबीआयच्या निर्णयाच्या विषयी गुरवारी सुप्रीम कोर्टात सुनावणी झाली. या विषयी मुक्ता आणि हमीद दाभोलकर यांनी दाखल केलेल्या याचिकेवर सुनावणी घेताना सुप्रीम कोर्टाने सीबीआयला त्यांचे म्हणणे मांडण्यासाठी नोटीस बजावली.न्या. संजय किशन कौल आणि न्यायमूर्ती अहसुंद्दिन अमनउल्लाह यांच्या समोर झालेल्या सुनावणीमध्ये ॲड.आनंद ग्रोव्हर आणि ॲड. किशन कुमार यांनी ॲड. अभय नेवागी यांच्यामार्फत तयार केलेल्या याचिकेवर बाजू मांडली.

डॉ नरेंद्र दाभोलकर खून खटल्यात जरी संशयित आरोपींच्या वरती पुणे कोर्टात ट्रायल चालू आहे .सादर याचिका ही पुणे कोर्टातील खटल्याच्या देखरेखीसाठी नसून ह्या खुनाचा सूत्रधार हा फरार असल्याविषयी आहे. हे याचिका कर्त्यांच्या वकिलांचा मार्फत सर्वोच्च न्यायालयात स्पष्ट करण्यात आले.डॉ. दाभोलकर, गोविंद पानसरे, गौरी लंकेश आणि प्रा. एम. एम. कलबुर्गी यांचे खून हे एका व्यापक कटाचा भाग असल्याचे अनेक पुरावे समोर आल्याचे याचिकेमार्फत मांडण्यात आले आहे. तसेच या मागचे सूत्रधार फरार असेपर्यंत विवेकवादी विचारवंतांच्या जीवाला असलेला धोका कायम आहे हे याचिकाकर्त्यां मार्फत मांडण्यात आले आहे. या याचिकेवर न्यायालयाने सीबीआयला त्याच्या तपास बंद करण्याच्या भूमिके विषयी नोटीस बजावली आहे.

पुणे, दि. १८: पुणे- अहमदनगर महामार्गावरील वाढलेल्या रहदारीमुळे होणारी वाहतूक कोंडी आणि अपघातांचे प्रमाण कमी करण्यासाठी खराडी चौक ते शिरुर घोडनदी पूल या मार्गावर विविध उपाययोजना करण्याचे निर्देश जिल्हाधिकारी डॉ. राजेश देशमुख यांनी यंत्रणांना दिले आहेत.

पुणे- अहमदनगर महामार्ग हा पुणे जिल्ह्यास अहमदनगर व मराठवाडा तसेच विदर्भातील इतर जिल्ह्यांना जोडणारा प्रमुख महामार्ग आहे. या रस्त्याची क्षमता ४० हजार वाहने (पॅसेंजर कार युनिट- पीसीयु) इतकी असताना प्रत्यक्षात ७५ हजार वाहने दररोज धावतात. त्यामुळे अपघातांचे प्रमाणे वाढले असून नागरिकांना वाहतूक कोंडीला सामोरे जावे लागत आहे.

यावर उपाययोजना सुचविण्यासाठी जिल्हाधिकारी तथा जिल्हा रस्ता सुरक्षा समितीचे अध्यक्ष डॉ. देशमुख यांनी प्रादेशिक परिवहन अधिकारी आणि सार्वजनिक बांधकाम विभाग यांना महामार्गाची संयुक्त पाहणी करण्याचे निर्देश दिले होते. संयुक्त पाहणीनंतर सुचविण्यात आलेल्या उपाययोजनांची अंमलबजावणी तात्काळ करण्याचे निर्देश जिल्हाधिकाऱ्यांनी सर्व संबंधित यंत्रणांना दिले आहेत.

त्यानुसार वाघेश्वर पार्किंग येथे वाहतूक नियंत्रण सिग्नल बसविणे, वाघेश्वर मंदिर ते वाहनतळ चौक दरम्यान रस्ते दुभाजकांना रंग लावणे, रिफ्लेक्टर, कॅटआय, रेलींग बसवणे, रस्त्यांवर पट्‌टे मारण्याच्या सूचना देण्यात आल्या आहेत. पदपथापरील अतिक्रमणे हटवणे, अनाधिकृत फेरीवाले, टपरीवाले, फळविक्रेत्यांना मज्जाव करण्यात यावा असे नमूद करण्यात आले आहे. वाघोली चौकात प्रवासी बसेसना रस्त्यावर थांबण्यास मज्जाव करुन त्यांच्यासाठी सुयोग्य बसथांबा उपलब्ध करुन द्यावा अशाही सूचना देण्यात आल्या आहेत.

बीजेएस चौक, वन स्टॉप फर्निचर मॉल, सोमेश्वर पार्क फ्लॅश आपले घर, आय व्ही इस्टेट, केसनंद फाटा येथे विकफिल्ड कंपनी व जगताप डेअरी येथील महामार्गाचे वळण व उतार, केसनंद फाटा चौक, थेऊर फाटा, पुरेा फाटा, कोरेगाव भीमा, सणसवाडी चौक, शिक्रापूर, चाकण चौक, वेळू नदीवरील पूल, कोंढापुरी, रांजणगाव गणपती मंदीर, राजमुद्रा चौक, यश ईन चौक, शिरुर बायपास चौक आदी ठिकाणी विविध उपाययोजना कराव्यात असे स्पष्ट करण्यात आले आहे.

पदपथावरील, रस्त्यावरील अतिक्रमणे हटविणे, आवश्यक तेथे ट्रॅफिक सिग्नल्स बसविणे, दिशादर्शक फलक व नो पार्किंग सूचनाफलक बसवणे, दुभाजकांची दुरुस्ती, अनावश्यक छेद दुभाजक बंद करणे, ब्लिंकर्स, वाहनांचा वेग कमी करण्यासाठी रंबलर्स बसविणे, पादचाऱ्यांसाठी रस्ता क्रॉसिंग, झेब्रा क्रॉसिंगची व्यवस्था करणे, गतिरोधक बसविणे, उच्च प्रकाशव्यवस्थेसाठी दिवे बसविणे आदी उपाययोजना करण्याच्या सूचना देण्यात आल्या आहेत.

सार्वजनिक बांधकाम विभाग, महामार्ग पोलीस, परिवहन विभाग, महावितरण, पीएमपीएमएल, पीएमआरडीए, एमआयडीसी, संबंधित ग्रामपंचायती आदी सर्वांनाच याअनुषंगाने उपाययोजना करण्याबाबत जिल्हाधिकाऱ्यांनी सूचना दिल्या आहेत.

या महामार्गावर वाहनांच्या वेगाचे संनियंत्रण करण्यासाठी आवश्यक त्या ठिकाणी स्पीडगन बसविण्यात येणार आहेत. प्रमुख गावातून जाणाऱ्या रस्त्यांवरील दुभाजकांवर रेलिंग बसविण्यात येणार आहेत. पोलीस विभागाने वाहतूक नियमांचे उल्लंघन करणाऱ्यांवर दंडात्मक कारवाईचे प्रमाण वाढवावे, अशाही सूचना देण्यात आल्या आहेत.

अपघातमुक्त महामार्गासाठी नागरिकांच्या सूचनांचे स्वागत
हा महामार्ग अपघातमुक्त करण्यासाठी नागरिकांच्या सूचनांचाही गांभिर्याने विचार करण्यात येईल असे जिल्हाधिकारी डॉ. देशमुख यांनी स्पष्ट केले असून नागरिकांनी आपल्या सूचना rto.12-mh@gov.in या ई-मेलवर पाठवाव्यात असे आवाहन त्यांनी केले आहे.