श्री रामजी संस्थान तुळशीबागतर्फे उत्पत्ति एकादशीनिमित्त कीर्तन
पुणे : संत सांगतात, दान देताना निरपेक्ष भावनेने द्या. जीवनात संपत्ती कमी मिळवा. मानवी देह तुम्हाला पुण्यप्राप्तीसाठीच मिळालेला आहे, त्यामुळे ते पुण्य मिळविण्यासाठी आपण प्रत्येकाने प्रयत्न करायला हवा, असे मत कीर्तनकार ह.भ.प. रवींद्रबुवा चिखलीकर यांनी व्यक्त केले.              
श्रीरामजी संस्थान तुळशीबाग च्यावतीने तुळशीबाग राम मंदिरात उत्पत्ति एकादशीनिमित्त मंदिरात कीर्तनाचे आयोजन करण्यात आले.  यावेळी संस्थानचे कार्यकारी विश्वस्त श्रीपाद तुळशीबागवाले, रामदास तुळशीबागवाले, भरत तुळशीबागवाले, राघवेंद्र तुळशीबागवाले, शिशिर तुळशीबागवाले, कोटेश्वर तुळशीबागवाले यांसह तुळशीबागवाले परिवार उपस्थित होता. 
ह.भ.प. रवींद्रबुवा चिखलीकर म्हणाले, देह जाईल रे बा जाईल रे… पुण्य काम येईल रे… पुण्य मिळविण्याचे साधन म्हणजे आपले दोन हात आहेत. आपण समाजचे देणे लागतो म्हणून दान धर्म केला पाहिजे.  परंतु त्या देण्यामागची भावना कशी आहे याला महत्त्व आहे. 
ते पुढे म्हणाले, आपल्याच विश्वात जो गुरफटून रमतो त्याला संत मूर्ख म्हणतात. जोपर्यंत आहे तुमचा देह आहे, तुम्ही ऐश्वयार्संपन्न आहात, तोपर्यंत तुम्हाला मान सन्मान आहे. परंतु तुमच्या मृत्यू पश्चात देखील तुम्हाला तो मान मिळाला पाहिजे असे पुण्याचे काम करायला हवे, असेही त्यांनी सांगितले.

पुणे,दि. २३ : नैसर्गिक आपत्ती, किडी व रोगांमुळे पिकाचे नुकसान झाल्यास नुकसानीच्या प्रमाणात शेतकऱ्याला विमा संरक्षण देणे आणि नुकसानीच्या परिस्थितीतही शेतकऱ्यांचे आर्थिक स्थैर्य अबाधित राखण्यासाठी प्रधानमंत्री पिक विमा योजना राबवण्यात येते. रब्बी हंगाम २०२२-२३ मध्ये या योजनेत जास्तीत जास्त शेतकऱ्यांनी सहभागी व्हावे, असे आवाहन कृषी विभागाच्यावतीने करण्यात येत आहे.

प्रधानमंत्री पिक विमा योजना ही अधिसूचित केलेल्या क्षेत्रातील केवळ अधिसूचित पिकांसाठी असेल. कर्जदार व बिगर कर्जदार शेतकऱ्यांना ही योजना ऐच्छिक आहे. खातेदाराव्यतिरिक्त कुळाने अगर भाडेपट्टीने शेती करणारे शेतकरी या योजनेत भाग घेण्यास पात्र आहेत. या योजनेअंतर्गत सर्व पीकांसाठी ७० टक्के जोखीमस्तर निश्चित करण्यात आला आहे. योजनेअंतर्गत वास्तवदर्शी दराने विमा हप्ता आकारण्यात येणार असून शेतकऱ्यांवरील विमा हप्त्याचा भार कमी करण्यासाठी शेतकऱ्यांनी भरावयाचा विमा हप्ता, रब्बी हंगामासाठी १.५ टक्के व नगदी पिकांसाठी ५ टक्के असा मर्यादित ठेवण्यात आला आहे.

या योजनेत सहभागी होण्यासाठी ज्वारी बागायत व जिराईत या पीकांसाठी अंतिम मुदत ३० नाव्हेंबर आहे. बागायत ज्वारीसाठी प्रतिहेक्टरी विमा संरक्षित रक्कम ३३ हजार रुपये, जिराईत ज्वारीसाठी विमा संरक्षित रक्कम ३१ हजार आहे. बागायत गहू पीकासाठी विमा संरक्षित रक्कम ३८ हजार रुपये, हरभरा पीकासाठी विमा संरक्षित रक्कम ३५ हजार रुपये, रब्बी कांदा पीकासाठी विमा संरक्षित रक्कम ८० हजार रुपये असून या तिन्ही पिकांसाठी १५ डिसेंबर पर्यंत विमा हत्पा भरुन सहभागी होता येणार आहे. उन्हाळी भूईमुग पीकासाठी विमा संरक्षित रक्कम प्रतिहेक्टरी ४० हजार रुपये असून ३१ मार्च २०२३ पर्यंत सहभागी होता येणार आहे.

शेतकऱ्यांनी अधिक माहितीसाठी विमा कंपनी आय.सी.आय.सी.आय. जनरल लोंबार्ड जनरल इन्शुरन्स कंपनी, पुणे टोल फ्री क्रमांक १८००१०३७७१२, customersupportba@icicilombard.com या इमेल पत्त्यावर तसेच नजीकची जिल्हा मध्यवर्ती सहकारी बँक, राष्ट्रीयकृत बँकेची शाखा, विविध कार्यकारी सहकारी संस्था, कृषि विभागाचे कृषि सहाय्यक व कृषि पर्यवेक्षक, मंडळ कृषि अधिकारी, तालुका कृषि अधिकारी, पुणे, खेड, बारामतीचे उपविभागीय कृषि अधिकारी, जवळचे नागरीक सुविधा केंद्र, जिल्हा अधीक्षक कृषि अधिकारी कार्यालय आदींशी संपर्क साधावा, असे आवाहन जिल्हा अधीक्षक कृषि अधिकारी सुभाष काटकर यांनी केले आहे.
0000

पुणे, दि. २३ : भारतीय लष्करामध्ये अग्नीपथ योजनेंतर्गत अग्नीवर भरतीसाठी अहमदनगर जिल्ह्यातील महात्मा फुले कृषी विद्यापीठ राहुरी येथे पार पडलेल्या ‘अग्नीवीर भरती’ मेळाव्यात उत्तीर्ण झालेल्या उमेदवारांचे निकालअग्नीवर भरती प्रकियेचा निकाल घोषितhttps://joinindianarmy.nic.inया संकेतस्थळावर प्रसिद्ध करण्यात आला असून उमेदवारांनी पुणे क्षेत्रीय भरती कार्यालयात २६ नोव्हेंबर पर्यंत हजर होऊन कागदपत्रे सादर करण्याचे आवाहन करण्यात आले आहे.

अग्नीवीर जनरल ड्युटी, अग्नीवीर टेक्निकल, अग्नीवीर क्लर्क/स्टोअरकीपर आणि अग्नीवीर ट्रेड्समन या पदांसाठी २३ ऑगस्ट ते ११ सप्टेंबर २०२२ दरम्यान ही भरती प्रक्रिया पार पडली. या भरती मेळाव्यामध्ये पुण्यासह अहमदनगर, लातूर, उस्मानाबाद, बीड आणि सोलापूर जिल्ह्यातील उमेदवारांनी सहभाग घेतला होता, अशी माहिती भरती क्षेत्रीय कार्यालय पुणेचे संचालक मनिष कर्की यांनी दिली आहे.
000

बाप्पू मानकर यांच्या भाजयुमो टीमचे राजेश पांडेंनी केले विशेष कौतुक

पुणे-क्रांतीज्योती सावित्रीमाई फुले पुणे विद्यापीठ अधिसभा निवडणुकीत भाजप-शिंदे गटाने महाविकास आघाडीपुरस्कृत पॅनलचा धुव्वा उडवला आहे. विद्यापीठाच्या अधिसभा नोंदणीकृत पदवीधर गटाच्या निवडणुकीत विद्यापीठ विकास मंचने सावित्रीबाई फुले प्रगती पॅनलचा पराभव केला आहे. 10 जागांपैकी 9 जागांवर विद्यापीठ विकास मंचचे उमेदवार निवडणून आले आहेत. तब्बल 20 तास ही मतमोजणी चालली.

राज्यात सत्ताबदल होताच छोट्या निवडणुकांमध्येही भाजप महाविकास आघाडीला धक्का देत आहे. पुणे विद्यापीठाच्या अधिसभा नोंदणीकृत पदवीधर गटाच्या निवडणुकीच्या 10 जागांसाठी रविवारी मतदान झाले. या निवडणुकीची मतमोजनी ही मंगळवारी विद्यापीठातील सभागृहात सकाळी 8 वाजता सुरू झाली. ही मतमोजणी बुधवारी पहाटे पर्यन्त सुरू होती. तब्बल 20 ते 21 तास देखील भाजप पक्षप्रणित विद्यापीठ विकास मंचाने निर्विवाद वर्चस्व मिळवत. महाविकास आघाडीला धक्का दिला आहे.

सावित्रीबाई फुले पुणे विद्यापीठ अधिसभा निवडणुकीत विद्यापीठ विकास मंचचे विजयी उमेदवार प्रसेनजीत फडणवीस (खुला प्रवर्ग), सागर वैद्य (खुला प्रवर्ग), दादासाहेब शिनलकर (खुला प्रवर्ग), युवराज नरवडे (खुला प्रवर्ग), बागेश्री मंठाळकर (महिला प्रवर्ग), राहुल पाखरे (एस.सी.प्रवर्ग), गणपत नांगरे (एस.टी.प्रवर्ग), विजय सोनवणे (एन.टी.प्रवर्ग) आणि सचिन गोरडे (ओबीसी प्रवर्ग)

विद्यापीठ विकास मंचाचे समन्वयक राजेश पांडे म्हणाले कि,’ जगातील नामांकित अशा सावित्रीबाई फुले पुणे विद्यापीठाचा कारभार ही फार मोठी जबाबदारी आहे. भविष्यातील पिढी घडविण्याची ही जबाबदारी म्हणजे राष्ट्र घडविण्याची जबाबदारी होय. अशी महत्वपूर्ण जबाबदारी पार पाडण्यासाठी आणि विद्यापीठाचा लौकिक वाढविण्याचे कार्य करण्यासाठी सर्व विजयी सदस्यांना शुभेच्छा !!विद्यापीठ विकास मंच पहिल्यांदाच ताकदीने अधिसभेच्या निवडणूक रिंगणात उतरला होता. यापूर्वीच्या निवडणुकांमध्ये कोणाशी ना कोणाशी मंचची युती असायची. यंदाची निवडणूक फक्त आणि फक्त मंचच्या सदस्यांनी ताकदीने लढविली. आम्ही हे धाडस करू शकलो यामध्ये अत्यंत महत्त्वाची भूमिका बजावली ती आमच्या अभाविपच्या कार्यकर्त्यांनी. त्यांनी सर्वांनी राष्ट्र निर्मितीच्या विचारांप्रती निष्ठा ठेवून आग्रहाने पूर्व नियोजन करून निवडणुकीत अचूक नियोजन अमलात आणून ही जबाबदारी सांभाळली. त्यांना भाजप शहर पदाधिकारी, नगरसेवक यांनी सहकार्य केलं. यात विशेष उल्लेख करावा वाटतो तो राघवेंद्र मानकर यांच्या नेतृत्वाखाली भारतीय जनता युवा मोर्चाच्या सहकाऱ्यांनी जे बळ दिलं. या सगळ्या ‘टीम वर्क’मुळे विजयाचा मार्ग सुकर झाला.शिक्षण क्षेत्रात तळमळीने काम करू इच्छिणाऱ्या मंचच्या सदस्यांना शिक्षणाविषयी आस्था असलेल्या प्रत्येक घटकाने खंबीर साथ दिली. त्यामुळेच प्राचार्य, संस्थाचालक, पदवीधर अशा तिन्ही ठिकाणी अधिसभेवर विद्यापीठ विकास मंचचा प्रभाव यंदाच्या निकालातून दिसतो आहे. मंचचे एक-दोन प्रतिनिधी अधिसभेवर निवडून यायचे, हा इतिहास काही जुना नाही. गेल्या पाच वर्षांत मंचचे काम विस्तारले. मंचमधून निवडून आलेल्या प्रतिनिधींनी प्रभावी काम केले. शिक्षण क्षेत्रात विद्यापीठ विकास मंचचे नाव चर्चेत आले. त्यामुळेच, आजच्या अधिसभेच्या निवडणुकीनंतर मंचची वाढलेली ताकद प्रेरणा देणारी आहे. शिक्षण क्षेत्रात काम करणाऱ्याच्या पाठीशी आम्ही भक्कमपणे उभे राहतो, हा संदेश निकालाद्वारे मतदारांनी दिला आहे. हा संदेश माझी आणि मंचच्या विजयी सदस्यांची उमेद वाढवणारा आहे.या विजयाचे खरे शिल्पकार मंचाचे सर्व मान्यवर, आवाहक डॉ.गजानन एकबोटे, डॉ.राजेंद्र विखे पाटील, डॉ.अपूर्व हिरे, डॉ.सोमनाथ पाटील, अॅड.नितीन ठाकरे, अॅड.एस.के.जैन, डॉ. सुधाकर जाधवर, श्री.बेबीलालजी संचेती, श्री.अजितभाऊ सुराणा, श्री.दिलीप बेलगांवकर, श्री.बापू येवला, श्री.हेमंत धात्रक, श्री.पंढरीनाथ थोरे, श्रीमती हेमलताताई बिडकर, डॉ.संदीप कदम, प्रा.एन.डी.पाटील, श्री.अनिल ठोंबरे, डॉ.प्रशांत साठे, संतोष ढोरे ल, राघवेंद्र बापू मानकर यांच्यासह अनेक मित्र आणि सहकारी वर्ग तसेच विविध संस्थांचे प्राध्यापक आणि इतर कर्मचारी बांधव हे आहेत. ह्या सर्व निवडणुकीत अखिल भारतीय विद्यार्थी परिषदेच्या सर्व कार्यकर्त्यांनी अथक प्रयत्न केले. तसेच प्रसारमाध्यमांनी देखील आमची भूमिका अतिशय योग्य पद्धतीने मतदार आणि सामान्य जनतेपर्यंत पोहोचविली. ज्यांनी आपला मतदानाचा हक्क बजावला असे मतदार बंधु-भगिनी, निवडणुक अधिकारी आणि कर्मचारी तसेच ज्ञात-अज्ञात सर्व हितचिंतक या सर्वांचे मी मनःपूर्वक आभार मानतो.

पुणे-मराठी आणि हिंदी चित्रपटसृष्टीतील ज्येष्ठ अभिनेते विक्रम गोखले यांची प्रकृती चिंताजनक आहे. त्यांच्यावर पुण्यातील मंगेशकर रुग्णालयात उपचार सुरू आहेत.

विक्रम गोखले यांची महत्त्वाची भूमिका असलेला गोदावरी हा चित्रपट याच महिन्यात प्रदर्शित झाला आहे. या चित्रपटात त्यांच्यासह जितेंद्र जोशी, नीना कुळकर्णी, संजय मोने, गौरी नलावडे हे कलाकार दिसले. विशेष म्हणजे या चित्रपटाच्या चित्रीकरणाआधी विक्रम गोखले रुग्णालयात दाखल होते. रुग्णालयातून सुटी मिळताच त्यांनी गोदावरी चित्रपटाच्या चित्रीकरणाला सुरूवात केली होती. या चित्रपटाला आंतरराष्ट्रीय स्तरावर कौतुकाची पावती मिळाला आहे.

अलीकडेच ते छोट्या पडद्यावर गाजत असलेल्या ‘तुझेच मी गीत गात आहे’ या मालिकेत दिसले होते. विक्रम गोखलेंनी मालिकेत गुरु पंडित मुकूल नारायण यांचे पात्र साकारले होते. यापूर्वी अग्निहोत्री मालिकेत विक्रम गोखलेंनी मोरेश्वर गोखलेंचे पात्र साकारले होते. अनेक वर्षांच्या ब्रेकनंतर ते या मालिकेत दिसले होते.

चित्रपट, मालिका आणि नाटक अशा तीनही माध्यमांतून विक्रम गोखले यांनी काम केले आहे. अभिनयासोबतच त्यांनी लेखन आणि दिग्दर्शन देखील केले आहे. त्यांनी दिग्दर्शित केलेल्या ‘आघात’ हा चित्रपटाचे समीक्षकांनी विशेष कौतुक केले. 2013 मध्ये प्रदर्शित झालेल्या ‘अनुमती’ या चित्रपटातील अभिनयासाठी त्यांना राष्ट्रीय पुरस्काराने गौरवण्यात आले होते. घशाच्या त्रासामुळे त्यांनी नाटकातील अभिनय-संन्यास घेतला होता.

विक्रम गोखले यांना घरातून अभिनयाचा वारसा मिळाला आहे. त्यांच्या पणजी दुर्गाबाई कामत या भारतीय चित्रपट सृष्टीतल्या पहिल्या अभिनेत्री होत्या. तर त्यांच्या आजी कमलाबाई गोखले पुर्वीच्या कमलाबाई कामत या पहिल्या बाल-अभिनेत्री होत्या. 1913 मध्ये दुर्गाबाईंनी दादासाहेब फाळके यांची निर्मिती आणि दिग्दर्शन असलेल्या ‘मोहिनी भस्मासुर’ नावाच्या चित्रपटात पार्वतीची आणि कमलाबाईंनी मोहिनीची भूमिका साकारली होती. विक्रम गोखले यांचे वडील चंद्रकांत गोखले यांनी 71 हून अधिक हिंदी-मराठी चित्रपटांतून भूमिका केल्या आहेत.

पुणे-पुढील वर्षी जानेवारी 2023 मध्ये पुण्यात जगातील आर्थिक विकसित देशांची जी 20 परिषद होणार आहे. या परिषदेसाठी शहरातील प्रमुख 60 चौकांचे सुशोभिकरण खासगी सहभागातून करण्यात येणार असून त्यासाठी महापालिकेकडून स्वतंत्र शहर सौंदर्यीकरण कक्ष स्थापन केला आहे.सदर कक्षामार्फत एक खिडकी योजने अंतर्गत BOT प्रस्तावाला मंजुरी देण्यात येत आहे. आत्ता पर्यंत 43 चौकांचे प्रस्ताव दाखल झालेले आहेत. छाननी करून 12 चौकांचे प्रस्तावांना मंजुरी देण्यात आलेलीआहे.महापालिकेचे शहर अभियंता प्रशांत वाघमारे यांच्या हस्ते मंगळवारी हे मान्यतांचे प्रस्ताव संबधित संस्थाच्या प्रतिनिधींना देण्यात आले आहेत. बांधकाम विभागाचे अधिक्षक अभियंता सुधीर कदम त्यामुळे, या 12 ठिकाणी तातडीनं काम सुरू करण्याचा मार्ग मोकळा झाला आहे.