पुणे-युवाशक्तीचा उपयोग राष्ट्राला व्हावा, या हेतूने शिक्षण क्षेत्रात विविध योजना वेगवेगळ्या स्तरावर राबविण्याचा प्रयत्न मी निश्चित करणार आहे असे भाजपाचे राजेश पांडे यांनी म्हटले आहे . महाराष्ट्र सरकारच्या राष्ट्रीय सेवा योजनेच्या (एनएसएस) राज्य सल्लागार समितीची नुकतीच पुनर्रचना करण्यात आलीय. या समितीत अशासकीय सदस्य म्हणून पांडे यांची नेमणूक करण्यात आली आहे. त्याबद्दल उपमुख्यमंत्री देवेंद्र फडणवीस आणि उच्च व तंत्रशिक्षण मंत्री चंद्रकांतदादा पाटील यांचे आभार मानून ते म्हणाले ,’राज्यातील सर्व प्रकारची विद्यापीठे तसेच महाविद्यालयांतील एनएसएसचे कामकाज अधिक कार्यक्षम पद्धतीने व्हावे, म्हणून ही समिती काम करत असते. दर तीन वर्षांनी या समितीची पुनर्रचना करण्यात येते. राज्याच्या उच्च व तंत्रशिक्षण मंत्र्यांच्या अध्यक्षतेखालील या समितीत सर्व विद्यापीठाच्या कुलगुरूंसह एनएसएसचे कार्यक्रम अधिकारी यांचा समावेश असतो. समितीत अशासकीय सदस्य म्हणून माझ्यासोबत राज्याचे माजी संपर्क अधिकारी डॉ.प्रमोद पाब्रेकर, डॉ. बाबासाहेब आंबेडकर मराठवाडा विद्यापीठाचे व्यवस्थापन परिषदेचे सदस्य किशोर शितोळे, राष्ट्रसंत तुकडोजी महाराज नागपूर विद्यापीठाचे सहायक प्रा. डॉ. सतीश लोकपाल चापले यांचाही समावेश आहे.

पांडे पुढे असे म्हणाले कि,’या समितीच्या सदस्यपदी झालेली निवड म्हणजे सावित्रीबाई फुले पुणे विद्यापीठ व्यवस्थापन परिषदेच्या माध्यमातून मी केलेल्या कामाची पावती आहे, असे मी मानतो. गेल्या ४० वर्षातील विद्यार्थी, सामाजिक, राजकीय, शैक्षणिक आणि युवकांसंदर्भातील कामाचा आणि सेवेचा अनुभव या समितीच्या माध्यमातून उपयोगात आणून केलेली निवड सार्थ ठरवेन, याबद्दल मला विश्वास आहे.तरुणांमध्ये समाजसेवेची जाण झाल्यानंतरचा पुढचा टप्पा म्हणजे राष्ट्रसेवा होय. शिक्षण क्षेत्रातून सेवासंस्कार तरुणांवर व्हावा, तरुणांकडून राष्ट्रसेवा घडावी, युवाशक्तीचा उपयोग राष्ट्राला व्हावा, या हेतूने शिक्षण क्षेत्रात विविध योजना वेगवेगळ्या स्तरावर राबविण्याचा प्रयत्न आमच्याकडून नक्कीच केला जाईल, याची सर्व समिती सदस्यांच्यावतीने ग्वाही देतो.

पुणे : अंडरवॉटर स्पोर्ट्स फेडरेशन ऑफ इंडिया (USFI) द्वारे आयोजित दुसऱ्या नॅशनल फिनस्विमिंग चॅम्पियनशिपला पुणे 2022 ला शिवछत्रपती क्रीडा संकुल, म्हाळुंगे – बालेवाडी येथे आज सुरूवात झाली. स्पर्धेच्या पहिल्या दिवशी पश्चिम बंगालने सात सुवर्णपदकासह १२ पदके पटकावत आघाडी घेतली, तर केरळने एका सुवर्णपदकासह 8 पदके मिळवली.

दुसऱ्या नॅशनल फिनस्विमिंग चॅम्पियनशिपला पुणे 2022 स्पर्धेच्या उद्घाटन प्रसंगी सुहास दिवसे (क्रीडा आयुक्त), सुभाष पाटील ( उप संचालक क्रिडा विभाग), यूएसएफआईचे जनरल सेक्रेटरी व द्रोणाचार्य पुरस्कार विजेते राष्ट्रीय प्रशिक्षक डॉ. तपन पाणिग्रही, अचिंता पंडित (कोषाध्यक्ष USFI),रियर एडमिरल पीडी शर्मा (अध्यक्ष RLSS (I),गौरव भट्टाचार्य आदी उपस्थित होते

स्पर्धेच्या पहिल्या दिवसाच्या समारोपानंतर लाईफ सेव्हिंग स्पोर्टची प्रात्यक्षिकेही दाखवण्यात आली. यात विविध राज्यांतील जलतरणपटूनी वैविध्यपूर्ण कसरती सादर केल्या. तसेच महाराष्ट्राचे मुख्यमंत्री एकनाथ शिंदे यांनी व्हिडीओ संदेशाद्वारे स्पर्धेला शुभेच्छा दिल्या

स्पर्धेचा निकाल पुढीलप्रमाणे-
पुरुष 800 मीटर गटात प्रतीक पासी( छत्तीसगड) ला सुवर्णपदक, तर मॅचा राजू ( पाॅंडेचरी) रौप्य पदक, तर आकाश व्ही. एस (केरळ) कांस्य पदक, महिलांमध्ये द्विपन्विता मंडल (पश्मि बंगाल) सुवर्ण, सोहेली मंडल( पश्चिम बंगाल) रौप्य, प्रभालक्ष्मी डी (तामिळनाडू) कांस्य पदक पटकावले.

मुले (ज्युनिअर बी) 400 मीटर बीएन- फिन स्विमिंग गटात पौल आरम( केरळ) सुवर्णपदक), मानस मकड( गुजरात) रौप्य, प्रणित एस ( तामिळनाडू) कांस्य तर, मुलीमंध्ये ओलिविया बॅनर्जी( केरळ) सुवर्ण, नेहा सन्नाभाटी ९ पश्चिम बंगाल) रौप्य पदक, तर बानसुरी मकवाना (गुजरात) कांस्य पदक मिळाले.

मुले (ज्युनिअर सी) 200 मीटर बीएन- फिन स्विमिंग गटात अभिनव एस( केरळ) सुवर्ण पदक, ध्रुव टंक (गुजरात) रौप्य, तन्मय कौसल्या( तेलंगणा) कांस्य, तर मुलींमध्ये नादिया सैफ( केरला) सुवर्ण, अभिरामी पी.जे (केरळ) रौप्य, विहा जानी (गुजरात) कांस्य

मुले (ज्युनिअर डी) 200 मीटर बीआई- फिन स्विमिंग गटात जय जसवंत आर (तामिळनाडू) सुवर्ण, ईशांत (हरियाणा) रौप्य, त्रिदीप मंडल( पश्चिम बंगाल) कांस्य तर मुलींमध्ये रायमा चक्रवर्ती( पश्चिम बंगाल) सुवर्ण, श्रीजा साहा( पश्चिम बंगाल) रौप्य, तर निया पतंगे ( महाराष्ट्र) कांस्य,

मुले (ज्युनिअर ई) 200 मीटर बीआई- फिन स्विमिंग गट- श्रीशंक साहा( पश्चिम बंगाल) सुवर्ण, सचिनसात्विक सुरेशसरिता( तेलगंणा) रौप्य, तर विजयाशंकर पीव्ही( केरळ) कांस्य, मुलींमध्ये- सोहिनी दत्ता( पश्चिम बंगाल) सुवर्ण, सिल्मी हिबाह(पश्चिम बंगाल) कांस्य, व्यासघी के.एस. (केरळ) कांस्य पदक

200 मीटर बीआई फिन स्विमिंग (मास्टर व्हि ओ पुरुष गटात) ओमदत्त सिंग (उत्तराखंड) सुवर्णपदक, तर महिला गटात वेदनाथम भानुप्रिया ( आंधप्रदेश) सुवर्ण)

50 मीटर सरफेस मोनेफिन सीनिअर ए गटात पुरुषांमध्ये प्रल्हाद साहनी (उत्तरप्रदेश) सुवर्ण, चार्ल्स येन्नु( तेलगंणा) रौप्य, दीपक चौहान ( उत्तरप्रदेश)कांस्य, तर महिलांमध्ये सुनंदा दत्ता( पश्चिम बंगाल) सुवर्ण, साची ग्रामोपाध्ये ( गोवा) रौप्य, साग्रती मौर्या ( उत्तरप्रदेश) कांस्य,

50 मीटर सरफेस मोनेफिन ज्युनिअर बी- गट मुलांमध्ये दिबांका दास ( पश्चिम बंगाल) सुवर्ण, धनुष पी.जे (केरळ) रौप्य, जी. जैस (केरळ) कांस्य पदक तर मुलींमध्ये जिनल पित्रोदा( गुजरात) सुवर्ण, रिशीता दत्ता ( पश्चिम बंगाल), खुशी बेरा ( पश्चिम बंगाल) कांस्यपदक,

50 मीटर सरफेस मोनेफिन ज्युनिअर सी- गट पाथुरी भुवास- तेलगांना (सुवर्ण) विराट चौहान- उत्तरप्रदेश( रौप्य), तन्मय कौश्यल्या- तेलगांना ( कांस्य) तर मुलींमध्ये तनिशा मंडल- बंगाल ( सुवर्ण), प्रिशा टांक ( गुजरात) रौप्य, पवित्रा डी- तामिलनाडू( कांस्य)

भारतीय कुस्ती महासंघाने दिले आयोजनाच्या जबाबदारीचे पत्र

पुणे : महाराष्ट्राच्या कुस्ती विश्वातील सर्वात प्रतिष्ठेची असणाऱ्या ६५ व्या ‘महाराष्ट्र केसरी’ स्पर्धेचे आयोजन करण्याचा मान संस्कृती प्रतिष्ठानला मिळाला आहे. या संदर्भात कुस्ती स्पर्धेच्या आयोजनाची अधिकृत जबाबदारी संस्कृती प्रतिष्ठानला दिल्याचे पत्र भारतीय कुस्ती महासंघाचे अध्यक्ष खा. ब्रिजभूषण सिंह यांच्याकडून स्वीकारल्याची माहिती संयोजक माजी महापौर मुरलीधर मोहोळ यांनी दिली. स्पर्धेच्या तारखा आणि ठिकाण लवकरात लवकर कळवण्याच्या सूचना या पत्रात कुस्ती महासंघाने दिल्या आहेत.

नवी दिल्ली येथे बृजभूषण सिंह यांनी यांनी मोहोळ यांना हे पत्र दिले. यावेळी राज्य कुस्तीगीर महासंघाचे अध्यक्ष खासदार रामदास तडस, पुणे जिल्हा कुस्तीगीर परिषदेचे अध्यक्ष पै. संदीप भोंडवे, पुणे राष्ट्रीय तालीम संघाचे अध्यक्ष योगेश दोडके समवेत होते. दरम्यान, ब्रिजभूषण सिंह यांना या स्पर्धेचे निमंत्रण देण्यात आले असून, ते त्यांनी स्वीकारले असल्याचेही मोहोळ यांनी नमूद केले. ‘महाराष्ट्र केसरी’ अधिकृतपणे कोण भरवणार याबाबत संभ्रम होता. मात्र, कुस्ती महासंघाने संस्कृती प्रतिष्ठानच्या आयोजनावर शिक्कामोर्तब केल्याने हा संभ्रम दूर झाला असून, महासंघाच्या अस्थायी समितीचे पदाधिकारी यासंदर्भातील कार्यभार पाहत आहेत.

“महाराष्ट्र कुस्तीगीर संघाचे संस्थापक आणि ‘महाराष्ट्र केसरी’चे जनक स्व. मामासाहेब मोहोळ यांच्या कुटुंबियांकडे ‘महाराष्ट्र केसरी’चे आयोजन येणे, ही निश्चितच समाधान देणारी बाब आहे. प्रत्येकाच्या आठवणीत राहील आणि कुस्तीला आणखी उंचीवर नेता येईल, अशा प्रकारचे आयोजन करण्याचा प्रामाणिक प्रयत्न असेल. लवकरच महाराष्ट्र केसरी स्पर्धेचा सविस्तर कार्यक्रम जाहीर केला जाईल,” असे मुरलीधर मोहोळ यांनी सांगितले.

ब्रिजभूषण सिंह म्हणाले, “महाराष्ट्राला कुस्तीची मोठी परंपरा लाभलेली आहे. ११ ते १५ जानेवारी २०२३ या कालावधीत पुण्यात ही महाराष्ट्र केसरी कुस्ती स्पर्धा भरवली जावी. या स्पर्धेसाठी आपण स्वतः उपस्थित राहणार आहोत. शाहू महाराजांनी कुस्तीला प्रोत्साहन दिले. त्यातून अनेक कुस्तीगीर घडले. तालीम संघ मोठ्या प्रमाणावर आहेत. तेव्हा ही स्पर्धा चांगल्या स्वरूपात पार पडेल.”

पुणे, दि. ८ : औद्योगिक प्रशिक्षण संस्था औंध येथे सोमवार दिनांक १२ डिसेंबर रोजी सकाळी १० वाजता प्रधानमंत्री राष्ट्रीय शिकाऊ उमेदवार भरती मेळाव्याचे आयोजन करण्यात आले आहे.

शिकाऊ उमेदवारी प्रशिक्षण योजना ही कुशल कारागीर बनवणारी योजना आहे. कौशल्य विकास व उद्योजकता विभाग नवी दिल्ली यांच्या निर्देशानुसार आय. टी.आय. उत्तीर्ण व इच्छुक उमेदवारांसाठी या जिल्हास्तरीय मेळाव्याचे आयोजन करण्यात आले आहे. मेळाव्याचा आय. टी.आय. उत्तीर्ण उमेदवारांनी लाभ घ्यावा, असे आवाहन औद्योगिक प्रशिक्षण संस्था औंधचे सहा. सल्लागार (तां). यशवंत कांबळे व उपसंचालक आर. बी. भावसार यांनी केले आहे.

सेवा कर्तव्य त्याग सप्ताहांतर्गत ७६ विद्यार्थ्यांना ‘सोनिया शक्ती’ शिष्यवृत्तीचे वितरण; १४० तरुणांना पोलीस भरतीसाठी साहाय्य
पुणे : “भारत हा तरुणांचा देश असून, या तरुणाईला सक्षम बनविण्यात काँग्रेस पक्षाने कायमच पुढाकार घेतला आहे. श्रीमती सोनिया गांधी यांच्या वाढदिवसानिमित्त सुरु केलेला ‘सोनिया शक्ती’ शिष्यवृत्तीचा उपक्रम विद्यार्थ्यांच्या पंखांना बळ देईल. याच मदतीची जाणीव ठेवून भविष्यात इतर गरजूना मदतीची भावना तुमच्या मनात निर्माण व्हायला हवी,” असे मत माजी गृह राज्यमंत्री आमदार सतेज पाटील यांनी व्यक्त केले.
श्रीमती सोनिया गांधी यांच्या वाढदिवसानिमित्त आयोजित १८ व्या सेवा कर्तव्य त्याग सप्ताहांतर्गत महाराष्ट्र प्रदेश युवक काँग्रेसचे सरचिटणीस प्रथमेश आबनावे यांच्या पुढाकारातून ७६ गरजू मुलींना ‘सोनिया शक्ती’ शालेय साहित्य शिष्यवृत्तीचे, तसेच बळीराम डोळे व इम्रान शेख यांच्या पुढाकारातून पोलीस भरतीतील १४० विद्यार्थ्यांना ९० हजारांचे साहाय्य सतेज पाटील यांच्या हस्ते वितरित करण्यात आले. 

बालगंधर्व कलादालनात झालेल्या या कार्यक्रमाच्या अध्यक्षस्थानी महाराष्ट्र प्रदेश काँग्रेसचे उपाध्यक्ष माजी आमदार मोहन जोशी होते. यावेळी माजी मंत्री रमेश बागवे, महाराष्ट्र प्रदेश काँग्रेसचे सरचिटणीस वीरेंद्र किराड, दत्ता बहिरट, सत्संग मुंडे, चंद्रशेखर कपोते, रमेश अय्यर, चेतन अगरवाल, आयुब पठाण, रोहन सुरवसे, सौरभ अमराळे, पुष्कर आबनावे, प्रवीण करपे, बळीराम डोळे, कान्होजी जेधे आदी उपस्थित होते.

सतेज पाटील म्हणाले, “कर्तृत्ववान नेत्यांचा वाढदिवस सामाजिक उपक्रमातून साजरा करण्याचे मोठे काम मोहन जोशी यांनी केले. एकनिष्ठतेचे उदाहरण त्यांनी विद्यार्थ्यांना घालून दिले आहे. अभ्यासात, नोकरी-व्यवसायामध्ये एकनिष्ठता जपली पाहिजे. ‘भारत जोडो’ यात्रा पक्षाची नव्हे; तर देशाची आहे. जात, धर्मविरहित मैत्रीपूर्ण संबंध निर्माण होण्यासाठी राहुल गांधी चालत आहेत. यातून प्रेमाचे, आपुलकीचे वातावरण तयार होईल. राज्यघटनेने सर्वसामान्यांना समान अधिकार दिले, त्याचे पालन व्हावे. राज्यघटनेच्या संरक्षणासाठी आपण प्रत्येकाने काम केले पाहिजे.”
प्रास्ताविकात मोहन जोशी म्हणाले, “दर महिन्याला ७६ याप्रमाणे वर्षात ७६० विद्यार्थ्यांना ही शिष्यवृत्ती दिली जाणार आहे. देशातील महिला वर्ग ही खरी शक्ती असून, महिलांना स्वावलंबी बनवून त्यांना सक्षम करण्याचे काम काँग्रेस पक्षाने केले आहे.”

रमेश बागवे म्हणाले, “तरुणांना, महिलांना प्रोत्साहन देण्याचे काम काँग्रेस पक्षाने आजवर केले आहे. सोनिया गांधी, राहुल गांधी काँग्रेसच्या माध्यमातून भारत एकसंध राहावा, सामाजिक ऐक्य जपावे यासाठी प्रयत्न करत आहेत.”

अभिषेक अवचार यांनी सूत्रसंचालन केले. चेतन अगरवाल यांनी आभार मानले.