पुणे, 16 डिसेंबर 2022

आगामी लष्कर  दिन संचलन बंगळुरू (कर्नाटक) येथे  15 जानेवारी 2023 रोजी आयोजित करण्यात आले आहे.नागरिकांना मोठ्या प्रमाणात सहभागी करून घेण्यासाठीं आणि व्यापकपणे पाहता यावे या दृष्टीने, राष्ट्रीय महत्त्वाच्या  कार्यक्रमांचे आयोजन राष्ट्रीय राजधानीबाहेर करण्याच्या निर्णयाशी सुसंगत राहून हे आयोजन करण्यात आले आहे. 15 जानेवारी 1949 रोजी भारतीय लष्कराचे पहिले  कमांडर-इन-चीफ, फील्ड मार्शल केएम करिअप्पा यांनी  ब्रिटिश पूर्वसूरींची जागा घेत भारतीय लष्कराची औपचारिक सूत्रे हाती घेतली होती, यानिमित्त दरवर्षी  15  जानेवारी रोजी  लष्कर दिन साजरा केला जातो.  यंदा बंगळुरू येथे  या ऐतिहासिक कार्यक्रमाचे आयोजन म्हणजे दक्षिण भारतातील लोकांनी  राष्ट्रासाठी दिलेले  शौर्य, बलिदान आणि सेवा यांचा गौरव आहे तसेच  कर्नाटकचे असलेले फील्ड मार्शल केएम करिअप्पा यांनाही ही समयोचित आदरांजली  आहे.

भारतीय लष्कराने, पुढील एक महिना , शालेय/महाविद्यालयीन विद्यार्थी, दुर्गम गावे आणि समाजातील सर्व स्तरातील लोकांसोबत कार्यक्रम आयोजित करून नागरिकांशी असलेले संबंध  दृढ करण्यासाठी व्यापक जनसंपर्क  मोहीम आखली आहे.

लष्करप्रमुख जनरल मनोज पांडे बंगळुरू येथे हुतात्म्यांना आदरांजली अर्पण करतील आणि 15 जानेवारी 23 रोजी होणाऱ्या लष्कर दिन संचलनाचे पुनरावलोकन करतील. या संचलनामध्ये, भारतीय लष्कराचा पराक्रम अधोरेखित करतानाच   भविष्यातील सज्जतेसाठी   तंत्रज्ञानावर आधारित, घातक आणि चपळ वेगवान दलामध्ये  रूपांतरित करण्याच्या भारतीय लष्कराच्या प्रयत्नांचे दर्शन घडणार  आहे.  देशाच्या  तरुण पिढ्यांना  प्रेरित करण्यासाठी लष्करी संचलन तुकडी  आणि लष्करी बँड सोबत, मोटार सायकल डिस्प्ले, पॅरा मोटर्स आणि कॉम्बॅट फ्री फॉल यांसारख्या  साहसी उपक्रमांचे आयोजन  करण्यात येणार आहे. देशासाठी लष्करी जवानांनी  शौर्य आणि गुणवत्तापूर्ण सेवा प्रदान केल्याचा गौरव म्ह्णून लष्करप्रमुखांकडून शौर्य पुरस्कार आणि लष्कराच्या तुकड्यांना  प्रशस्तिपत्रके प्रदान केली जातील. लष्कर दिन 2023 ची पूर्वतयारी म्हणून, 13 जानेवारी 23 रोजी बंगळुरू येथे दक्षिण  कमांड पुरस्कार प्रदान  समारंभ आयोजित करण्यात आला आहे., ज्यामध्ये दक्षिण कमांडचे आर्मी  कमांडर लेफ्टनंट जनरल ए के सिंग लष्करी जवानांना विशिष्ट सेवा पुरस्कार प्रदान करतील.

भारतीय लष्कराची देश  उभारणीत असलेली बांधिलकी दर्शविणाऱ्या कार्यक्रमांची मालिका पुढील एका महिन्यात दक्षिण कमांडच्या लष्करी तुकड्यांद्वारे समाजाच्या सर्व स्तरांतील नागरिकांच्या सर्वांगीण सहभागासह आयोजित  करण्यात आली आहे.विजय दिवसाच्या स्मरणार्थ 17 डिसेंबर 22 रोजी दक्षिणी स्टार विजय दौड  – 2022  (संकल्पना  – जवानांसाठी  धावा – जवानांसह धावा) हा कर्टन रेझर कार्यक्रम होणार आहे. यामध्ये दक्षिण कमांडमधील 18 ठिकाणांवरील (जैसलमेर, जोधपूर, अहमदाबाद, भुज आणि अल्वर, भोपाळ, सिकंदराबाद, झाशी, ग्वाल्हेर, चेन्नई, बेंगळुरू, बेळगाव, वेलिंग्टन (टीएन), पुणे, नाशिक, नागपूर, अहमदाबाद आणि मुंबई) 50,000 हून अधिक सहभागींना    एकाच वेळी हिरवा झेंडा दाखवला जाईल.

त्यानंतर भारतीय लष्कराची देशाप्रती असलेली वचनबद्धता दर्शविणारे अनेक कार्यक्रम,  स्थानिक संस्था आणि समाज यांच्या समन्वयाने आयोजित केले जातील त्याचा तपशील खालीलप्रमाणे :-

24 डिसेंबर 2022  : रक्तदान (संकल्पना : रक्तदान करा – जीवन वाचवा) गरजू रुग्णांसाठी 7,500 युनिट रक्त संकलन आणि 75,000 स्वैच्छिक रक्तदात्यांच्या डेटाचे संकलन 

30 डिसेंबर 2022 :  75x दुर्गम / सीमावर्ती / कमी विकसित गावांमध्ये भारतीय सैन्याद्वारे जनसंपर्क  कार्यक्रम (संकल्पना : ग्राम सेवा- राष्ट्र सेवा) यामध्ये  वैद्यकीय शिबिरे, अग्निपथ योजना जागृती, वीर नारी आणि वीर माता यांचा सत्कार, स्वच्छता अभियान, क्रीडा सुविधांची निर्मिती -व्हॉलीबॉल / खो खो / कबड्डी आणि क्रीडा स्पर्धांचे आयोजन केले जाईल.

07 जानेवारी 2023 : ‘विद्यांजली योजना, ज्यात  क्रीडा पायाभूत सुविधा सामायिक करणे, क्रीडा स्पर्धांचे आयोजन करणे आणि योग आणि इतर सुप्त कौशल्यांना प्रोत्साहन देणे यासांसारख्या  परस्पर फायदेशीर विकास कार्यक्रम सामायिक  आणि देवाणघेवाण करण्यासाठी आर्मी पब्लिक स्कूल 75 x सरकारी/सरकारी अनुदानित शाळांशी संलग्नता साधतील.

10 जानेवारी 2023 : 75 x अमृत सरोवर/तलाव (संकल्पना : जल – जीवन सुरक्षा) यांच्या पुनरुज्जीवनासाठी आणि पर्यावरणाच्या विकासासाठी कार्य

14 जानेवारी 2023 : ‘वृक्षरोपण’ (संकल्पना : पर्यावरण सुरक्षा) दक्षिण कमांड परिसरात  हरित भारतासाठी 75,000 रोपांची लागवड.

 लष्कर दिनाच्या  (09 -15 जानेवारी 2023)  आधीच्या आठवड्यात, शस्त्रे आणि उपकरणे प्रदर्शन, बँड सादरीकरण , प्रश्नमंजुषा स्पर्धा, चित्रकला आणि निबंध लेखन स्पर्धा, सायक्लोथॉन, शौर्य पुरस्कार विजेत्यांकडून प्रेरक भाषणे, प्रसिद्ध युद्धांचे  सादरीकरण, युद्ध स्मारक/युद्ध संग्रहालयांना भेटी आणि ‘एक भारत सर्वश्रेष्ठ भारत’ या संकल्पनेवर  आधारित सांस्कृतिक कार्यक्रम या अतिरिक्त उपक्रमांचेही आयोजन करण्यात आले आहे. 

लष्कर दिन संचलनापर्यंत  आयोजित करण्यात येणाऱ्या विविध कार्यक्रमांमध्ये समाजातील सर्व स्तरातील लोकांनी सक्रिय सहभाग घेण्याचे आवाहन भारतीय लष्कराने केले आहे.

पुणे : नवनियुक्त पोलिस आयुक्त रितेश कुमार यांनी शुक्रवारी पुणे पोलिस आयुक्त पदाची सूत्रे स्वीकारली. मावळते पोलिस आयुक्त अमिताभ गुप्ता यांनी रितेश कुमार यांच्याकडे पदभार सुपूर्द केला.पोलिस अधिकारी व कर्मचारी यांनी फुलांची उधळण करीत त्यांचे स्वागत केले. राज्य सरकारच्या गृह विभागातर्फे 13 डिसेंबर रोजी राज्यातील वरिष्ठ पोलीस अधिकाऱ्यांच्या बदल्या करण्यात आल्या. त्यामध्ये मागील काही दिवसांपासून पुण्याच्या पोलिस आयुक्त पदी कोण विराजमान होणार, यावरून मोठ्या प्रमाणात चर्चा सुरू होती. अखेर राज्य सरकारने रितेश कुमार यांची नियुक्ती केल्यानंतर चर्चेला पूर्णविराम मिळाला. दरम्यान, रितेश कुमार हे सोमवारी पदभार स्वीकारणार होते, मात्र त्यांनी शुक्रवारी सायंकाळी पावणे पाच वाजताच पोलिस आयुक्तालयात हजेरी लावून पदभार स्वीकारला.

सहपोलीस आयुक्त संदीप कर्णिक यांनी त्यांचे स्वागत केले. त्यानंतर ते पोलिस आयुक्तांच्या कार्यालयात आले. उपस्थित पोलिस अधिकारी व कर्मचारी यांनी फुलांची उधळण करीत त्यांचे स्वागत केले. त्यानंतर मावळते पोलिस आयुक्त अमिताभ गुप्ता यांच्याकडे पदभार सुपूर्द केला. अतिरिक्त पोलिस आयुक्त नामदेव चव्हाण, रामनाथ पोकळे यांच्यासह सर्व परिमंडळाचे, विभागाचे पोलिस आयुक्त, वरिष्ठ पोलीस निरीक्षक यावेळी उपस्थित होते. रितेश कुमार यांनी उपस्थित वरिष्ठ अधिकाऱ्याशी संवाद साधला.

पुणे-पुण्यातील एका साेसायटी संस्थेचे फेरलेखापरीक्षण करताना सहकार विभागातील लेखापरीक्षक आणि प्रशासक यांनी दाेन लाख दाेन हजार रुपयांचा अपहार केल्याप्रकरणी दाेघांवर मुंढवा पोलिस ठाण्यात गुन्हा दाखल करण्यात आला आहे. अशी माहिती पोलिसांनी शुक्रवारी दिलीे लेखापरीक्षक किरण चाैधरी आणि प्रशासक हरुन सय्यद अशी गुन्हा दाखल झालेल्या आराेपींची नावे आहे.

याप्रकरणी सहकार विभागाचे वर्ग एकचे अधिकारी अपर लेखा परीक्षक महेश चंद्रकांत जाधव (वय-55) यांनी पोलिसांकडे आराेपी विराेधात फिर्याद दाखल केली आहे. तक्रारदार हे अप्पर लेखापरीक्षण श्रेणी सहकारी संस्था, पुणे येथे विशेष लेखापरीक्षक पदावर काम करत आहे. 16/6/2017 राेजी प्राप्त झालेल्या तक्रारीच्या अनुषंगाने यल्लाे ब्लाॅसम सहाेरी गृहरचना संस्था, बी.टी.कवडे राेड,घाेरपडी,पुणे या संस्थेचे 2011-12 या कालावधीचे फेरलेखापरीक्षण करण्याचे आदेश प्राप्त झाले हाेते.

याबाबत तक्रारदार यांनी जिल्हा उपनिबंधक सहकारी संस्था,पुणे यांचे फेरलेखापरीक्षण पूर्ण करुन वैधानिक लेखापरीक्षक किरण चाैधरी व प्रशासक हरुन सय्यद यांनी दाेन लाख दाेन हजार रुपये रक्कमेचा अपहार केले असल्याचा फेरलेखापरीक्षण अहवाल 27/9/2022 राेजी उपनिंबधक पुणे शहर सहकारी संस्था यांचेकडे सादर केल्याने गुन्हा दाखल करण्यात आला आहे. याबाबत पुढील तपास मुंढवा पोलिस करत आहे.

पुणे दि. १६ : औद्योगिक प्रशिक्षण संस्था औंध येथे आयोजित करण्यात आलेल्या प्रधानमंत्री राष्ट्रीय शिकाऊ उमेदवारी तसेच रोजगार भरती मेळाव्यात विविध कंपन्याकडून नोंदणी केलेल्या १९० पैकी १६९ उमेदवारांची निवड करण्यात आली.

या मेळाव्यात जिल्ह्यातील एकूण ३२ आस्थापना सहभागी झाल्या होत्या. उपस्थित आस्थापनांची विविध व्यवसायांकरीता १०५२ शिकाऊ उमेदवारांची मागणी होती. परंतु प्रत्यक्षात १९० उमेदवार उपस्थित राहिल्याने त्यापैकी १६९ उमेदवारांची निवड करण्यात आली.

औंध औद्योगिक प्रशिक्षण संस्थेचे उपसंचालक बी. आर. भावसार यांच्या हस्ते मेळाव्याचे उदघाटन करण्यात आले. यावेळी सहाय्यक प्रशिक्षणार्थी सल्लागार यशवंत कांबळे, गणित निदेशक श्रीमती जी. बी परदेशी, कनिष्ठ प्रशिक्षणार्थी सल्लागार एस. आर. खुडे व डी. टी.चौधरी आदी उपस्थित होते.

पुणे दि.१६- माता आरोग्य क्षेत्रात उल्लेखनीय कामगिरी करून माता मृत्यू दर कमी करण्यासाठी तसेच प्रसूतीदरम्यान पुरविल्या जाणाऱ्या सुविधांची गुणवत्ता वाढविण्यासाठी लक्ष्य संस्था प्रमाणिकरणामध्ये महाराष्ट्राला राष्ट्रीय स्तरावर दोन पुरस्कार प्राप्त झाले आहेत. या यशाबद्दल राज्याचे आरोग्य व कुटुंबकल्याण मंत्री डॉ. तानाजी सावंत यांनी सार्वजनिक आरोग्य विभागाचे अधिकारी आणि कर्मचाऱ्यांचे विशेष अभिनंदन केले आहे.

शाश्वत विकास ध्येय (SDG) साध्य करण्यासाठी आणि देशातील माता मृत्यूचे प्रमाण कमी करण्यासाठी माता आरोग्य केंद्रात नाविन्यपूर्ण योजनांच्या देवाणघेवाणीबाबत विचार विनिमयासाठी नवी दिल्ली येथे राष्ट्रीय मातृत्व आरोग्य कार्यशाळेचे आयोजन करण्यात आले होते. माता मृत्यू कमी करण्यासाठी आयोजिण्यात आलेल्या या कार्यशाळेची मुख्य संकल्पना ‘टाळता येण्याजोगे माता मृत्यू शून्य करण्यासाठी प्रयत्न’ अशी होती.

माता आरोग्याच्या क्षेत्रातील उल्लेखनीय कामगिरीबद्दल राज्यांना पुरस्कार देण्यात आले आहेत. नोव्हेंबर २०२२ मध्ये रजिस्ट्रार जनरल इंडियाने प्रकाशित केलेल्या नमूना नोंदणी प्रणालीच्या सर्वेक्षण अहवालानुसार सन २०१७-१९ मध्ये देशातील मातामृत्यु प्रमाण १०३ प्रति लक्ष जिवंत जन्म वरुन सन २०१८-२० मध्ये ९७ प्रति लक्ष जिवंत जन्म इतका झालेला आहे आणि महाराष्ट्र राज्यामध्ये मातामृत्यू प्रमाण सन २०१७-१९ च्या ३८ प्रति लक्ष जिवंत जन्म वरुन सन २०१८-२० मध्ये ३३ प्रति लक्ष जिवंत जन्म झाला आहे. देशामध्ये मातामृत्यूचे प्रमाण कमी करण्यावर महाराष्ट्र राज्य दुसऱ्या स्थानावर आहे तर पहिल्या स्थानावर केरळ राज्य आहे. सार्वजनिक आरोग्य विभागाने जननी सुरक्षा योजना, जननी शिशु सुरक्षा कार्यक्रम, प्रधानमंत्री सुरक्षित मातृत्व अभियान, मातृत्व अनुदान योजना, मानव विकास कार्यक्रम, प्रधानमंत्री मातृ वंदना योजना इत्यादी योजना प्रभावीपणे राबवल्या तसेच सुरक्षित मातृत्वासाठी विविध उपाय योजना राबवल्यामुळे राज्याला हे साध्य करता आले.

राष्ट्रीय स्तरावर लक्ष्य संस्था प्रमाणिकरणासाठी महाराष्ट्राला द्वितीय पुरस्कार

लक्ष संस्था प्रमाणिकरणामध्ये महाराष्ट्राला राष्ट्रीय स्तरावर द्वितीय पुरस्कार प्राप्त झाला आहे. केंद्र सरकारने प्रसूतीदरम्यान पुरविल्या जाणाऱ्या सुविधांची गुणवत्ता वाढविण्याकरीता डिसेंबर २०१७ मध्ये लक्ष्य (LaQshya) कार्यक्रमाला सुरुवात केलेली आहे. प्रसूतीगृह आणि माता शस्त्रक्रियागृहमध्ये गुणवत्ता सुधारणा करुन त्याद्वारे माता मृत्यू, उपजत मृत्यू आणि नवजात अर्भक मृत्यू कमी करणे तसेच प्रसूतीदरम्यान दर्जात्मक सेवेसोबतच मातृत्वाची काळजी घेणे हे या कार्यक्रमाचे प्रमुख उद्दिष्ट्य आहे. लक्ष्य २०१७ च्या मार्गदर्शक सूचनानुसार राज्यात सन २०१८-१९ पासून लक्ष्य कार्यक्रम महाराष्ट्र राज्यात राबविण्यात येत आहे.

महिला व बालकाचे आरोग्य सुधारण्यासाठी तसेच आरोग्य यंत्रणा बळकट करण्यासाठी राज्याचे सार्वजनिक आरोग्य मंत्री मा. डॉ. तानाजी सावंत यांच्या मार्गदर्शनाखाली राज्याला हे मोठे यश मिळाले आहे. दिल्ली येथे केंद्रीय आरोग्य व कुटुंब कल्याण राज्यमंत्री डॉ. भारती पवार यांच्या शुभहस्ते हे दोन्ही पुरस्कार डॉ. अशोक नांदापुरकर, उपसंचालक, कु.क. पुणे व डॉ. अनिरुध्द देशपांडे, सहाय्यक संचालक व नोडल अधिकारी, माता आरोग्य, कु. क. पुणे यांनी स्वीकारले.

राष्ट्रीय स्तरावर उत्कृष्ट काम केल्याबद्दल आशा व परिचारिका गटात महाराष्ट्र राज्याला द्वितीय पुरस्कार गोंदिया जिल्ह्यातील डव्वा प्राथमिक आरोग्य केंद्रातील आशासेविका गीता चोपराम भेंडारकर व परिचारिका पंचफुला राणे यांना देण्यात आला.

पुणे येथे आयोजित बैठकीत मंत्री सावंत यांनी सर्वांचे अभिनंदन केले. यावेळी आरोग्य सेवा संचालक डॉ.नितीन आंबाडेकर, सहसंचालक डॉ.भोये, डॉ.रामचंद्र हंकारे , डॉ.अशोक नंदापूरकर , डॉ.अनिरुद्ध देशपांडे व इतर अधिकारी उपस्थित होते.

पुणे, दि. १६ : ढगाळ वातावरणामुळे हरभरा पिकावरील घाटेअळीचा प्रादुर्भाव वाढण्याची शक्यता आहे. घाटेअळीचा प्रादुर्भाव रोकण्यासाठी शेतकऱ्यांनी वेळीच उपाय योजना कराव्यात, असे आवाहन कृषि सह संचालक (विस्तार व प्रशिक्षण) पुणे डॉ. तुकाराम मोटे यांनी केले आहे.

सध्या आढळणारी कीड ही अंडी अवस्था व प्रथम अवस्थेतील अळी असल्यामुळे शेतकऱ्यांनी वेळीच उपाय योजना केल्यास कमी खर्चात किडींचे नियंत्रण होऊ शकते. बऱ्याच ठिकाणी अळीने प्रादुर्भाव करण्यास सुरुवात केली असून ही कीड बहुभक्षी असून विशेषतः पिक फुलोरा आणि प्रामुख्याने घाटे अवस्थेत नुकसानकारक असते.

शेतकऱ्यांनी शेताची कोळपणी किंवा निंदणी करून पिक तणविरहित ठेवून घाटेअळीच्या मोठ्या अळ्या हाताने वेचून त्यांना नष्ट कराव्यात. घाटेअळीच्या सर्वेक्षणासाठी हेक्टरी ५ कामगंध सापळे जमिनीपासून १ मिटर उंचीवर लावावेत. कामगंध सापळयामध्ये पतंग आढळल्यास किटकनाशकाची फवारणी करावी.

शेतामध्ये पक्षी बसण्यासाठी पिकाच्या किमान एक ते दोन फूट उंचीवर हेक्टरी ५० ते ६० ठिकाणी पक्षी थांबे उभारावेत. पिक कळी अवस्थेत असतांना ५ टक्के निंबोळी अर्काची किंवा अझेंडिरेक्टिन ३०० पीपीम ५ मिली प्रति लिटर पाण्यातून फवारणी करावी. घाटेअळी लहान अवस्थेत असताना एच.ए.एन.पी. व्ही. ५०० एल. ई. १ मिली प्रति लिटर पाण्यात ५ ग्रॅम निळ टाकून संध्याकाळच्या वेळेला फवारणी करावी.

किडींचा प्रादुर्भाव आर्थिक नुकसान पातळीच्यावर आढळून आल्यास इमामेक्टीन बेन्झोएट ५, एसजी ४.४ ग्रॅम किंवा फ्ल्युबेन्डामाईड ३९.३५ एससी २ मिली किंवा क्लोरॅनट्रीनीलीप्रोल १८.५ एससी २५ मिली यापैकी एका कीटकनाशकाची प्रती १० लिटर पाण्यात मिसळून फवारणी करावी.

कीटकनाशकांचे प्रमाण नॅपसॅक पंपासाठी असून पेट्रोल पंपासाठी मात्रा तीनपट वापरावी. शेतात किटकनाशकांचा वापर करतांना हातमोजे व तोंडावर मास्कचा वापर करावा व सुरक्षिततेची योग्य ती काळजी घ्यावी, असे आवाहनही कृषि विभागातर्फे करण्यात आले आहे.

पुणे, 16 डिसेंबर 2022-पुणे येथील दक्षिण कमांड युद्ध स्मारक येथे आज 16 डिसेंबर 2020 रोजी पारंपरिक पद्धतीने आणि उत्साहात विजय दिवस 2022 साजरा करण्यात आला. 51 वर्षांपूर्वी युद्धात, भारताने पाकिस्तानवर मिळवलेल्या रोमहर्षक विजयाचे स्मरण म्हणून हा दिवस दरवर्षी साजरा केला जातो.या युद्धातील भव्य विजयानंतर पाकिस्तानचे विभाजन होऊन, स्वतंत्र देश म्हणून बांगलादेश उदयाला आला आणि या विजयामुळे भारत आशिया प्रांतात एक मोठी शक्ती म्हणून उदयास आला. भारताच्या पारंपरिक शत्रूवरील या निर्णायक विजयानंतर भारताची सैन्यदले देशाच्या सामर्थ्याचे एक भक्कम अंग असल्याचे पुन्हा एकदा सिद्ध झाले.

1971 साली पाकिस्तानचे तत्कालीन लष्करशहा जनरल याह्या खान यांच्या नेतृत्वाखाली पाकिस्तानी लष्कराने पूर्व पाकिस्तानमध्ये केलेल्या नृशंस हत्याकांडांमुळे भारतावर ही युद्धजन्य आपत्ती ओढवली. हे अल्पकाळ चाललेले मात्र अत्यंत भीषण स्वरूपाचे युद्ध भारताच्या पूर्व आणि पश्चिम दोन्ही सीमांवर लढले गेले. 13 दिवसांच्या या युद्धानंतर, पाकिस्तानी सैन्य पूर्णपणे शरण आले आणि त्यानंतर बांगलादेशची निर्मिती झाली. या युद्धात, भारतीय सैन्य, पाकिस्तानी लष्करावर सर्व दृष्टीनी वरचढ ठरले.युद्धादरम्यान, दक्षिण कमांडच्या सैन्याने शौर्य गाजवत पाकिस्तानच्या कारवायांपासून देशाच्या सीमांचे रक्षण केले. या युद्धादरम्यान दक्षिण कमांड क्षेत्राकडील जबाबदारीच्या क्षेत्रात लढल्या गेलेल्या गाजलेल्या लढायांमध्ये लोंगेवाला लढाईत पाकिस्तानी सैन्याचा भारतीय जवानांनी धुव्वा उडवला होता. लेफ्टनंट कर्नल भवानी सिंग (नंतर ब्रिगेडियर), यांच्या नेतृत्वाखाली 10 पैरा कमांडो बटालियनने पाकिस्तानामधल्या छाछरो गावात घुसून परबत अलीवर मिळवलेला ताबा ही दक्षिण कमांडची आणखी एक गाजलेली लढाई होती. या लढायांमध्ये भारतीय सैन्याचे शौर्य, दृढनिश्चय आणि पराक्रमाचे सर्वांना दर्शन घडले.

आपल्या महान राष्ट्राच्या सार्वभौमत्व आणि स्वातंत्र्याचे रक्षण करण्यासाठी ज्यांनी आपल्या प्राणांची आहुती देण्यापूर्वी एकदाही विचार केला नाही अशा भारतीय सशस्त्र दलातील शूर सैनिक, हवाई दल आणि नौसैनिकांना आदरांजली अर्पण करण्यासाठी दक्षिण कमांड युद्ध स्मारक येथे पुष्पअर्पण कार्यक्रम आयोजित करण्यात आला होता. दक्षिण कमांड मुख्यालयाच्या सर्व कर्मचाऱ्यांच्या वतीने मुख्यालयाचे प्रमुख लेफ्टनंट जनरल मनजीत कुमार यांनी पुष्पचक्र अर्पण केले. या कार्यक्रमाला पुणे स्थित लष्करी अधिकारी आणि जवान तसेच 1971 च्या भारत पाकिस्तान युद्धात सहभागी झालेल्या भारतीय लष्कर, हवाई दल आणि नौदलाचे ज्येष्ठ माजी सैनिक उपस्थित होते. त्यानंतर शूर वीरांप्रति कृतज्ञता व्यक्त करण्यासाठी काही क्षण मौन पाळण्यात आले.

ॲड. असिम सरोदे,विश्वभंर चौधरी कॉंग्रेसच्या कार्यक्रमात सहभागी

पुणे, १६ डिसेंबर – भारत जोडो यात्रेला १०० दिवस पुर्ण झाले त्या निमित्ताने भारत जोडो यात्रा समिती, पुणे तर्फे पुण्यात प्रतिकात्मक पदयात्रा काढण्यात आली. भारताला जोडणाऱ्या महात्मा गांधींचे राजकीय गुरू गोपाळ कृष्ण गोखले यांच्या पुतळ्याला हार घालून पदयात्रेची सुरूवात करण्यात आली.

      यावेळी बोलताना सामाजिक कार्यकर्ते  ॲड. असिम सरोदे म्हणाले की, ‘‘देशातील विभाजनकारी शक्तींना प्रेम, सत्य, अहिंसेच्या मार्गाने हरविले जाऊ शकते हा या यात्रेचा संदेश आहे.भारत जोडोमुळे अनेक लोक एकत्र आली. काँग्रेस पक्षाला लोक जोडली जातील का? याचा विचार न करता राहुल गांधी आज चालत आहेत यामुळे लोक त्यांच्याकडे आर्कषली जात आहेत. भारत जोडो यात्रेमुळे देशाची लोकशाही मजबूत होईल अशी खात्री राहुलजी गांधी यांना आहे.’’

      यानंतर सामाजिक कार्यकर्ते विश्वभंर चौधरी यांनीही आपले मनोगत यावेळी व्यक्त केले. ते म्हणाले की, ‘‘गेल्या आठ वर्षात समाजात, जातीजातीत, धर्माधर्मात व्देष, तेढ निर्माण करून देशातील वातावरण दूषित करण्यात आले  आहे. हे प्रयास आजही सुरू आहे. अशा वातावरणात देशाला धर्मनिरपेक्षतेच्या सूत्रात पुन्हा एकत्र बांधण्याचे काम महात्मा गांधींचे आचार विचार करू शकत होते. गेले शंभर दिवस कन्याकुमारी पासून सुरू केलेल्या भारत जोडो यात्रेत काँग्रेस नेते राहुल गांधी यांनी ते ठळकपणे अधोरेखीत केले आहे. त्यामुळे या यात्रेमुळे म. गांधींनी दाखवलेल्या धर्मनिरपेक्षतेचा मार्ग काँग्रेसला पुन्हा एकदा गवसला आहे.’’

      पुणे शहर जिल्हा काँग्रेस कमिटीचे अध्यक्ष अरविंद शिंदे यावेळी म्हणाले की, ‘‘सत्तारूढ हे धर्मा धर्मांमध्ये तेढ निर्माण करणे, महिलांचा सन्मान न करणे, महापुरूषांचा वारंवार अपमान करणे, संविधानाचा न पाळण्याचे काम आत्ताचे सत्ताधारी करीत आहेत. भाजप नेते किरीट सोमय्या हे ईडीचे मुख्य कार्यकारी असल्यासारखे वागत आहे. या सत्ताधारी पक्षाने लाजलज्जा सोडली आहे म्हणून आम्ही भारत जोडो म्हणत आहोत’’

या पदयात्रेचे प्रास्ताविक करताना ॲड. अभय छाजेड म्हणाले की, ‘‘भारत जोडो यात्रा देश जोडणारी यात्रा असून ही यात्रा काश्मीर मध्ये पोहोचल्यानंतर देशातील राजकीय वातावरण पूर्णपणे बदलेले असेल. राहुल गांधीजींच्या भारत जोडो यात्रेचा जो देश हिताचा उद्देश आहे, त्या प्रयत्नांना साथ देण्यासाठी आम्ही ही पदयात्रा काढीत आहोत.’’  

      महागाई, बेरोजगारीच्या विरोधात निघालेल्या या यात्रेचा संदेश घराघरापर्यंत पोहोचविण्याची जबाबदारी आपली आहे असे लोकायतच्या अलका जोशी म्हणाल्या.

      तिरंगा झेंड्याखाली निघालेल्या या पदयात्रेचा समारोप पोलिस ग्राउंड येथे करण्यात आला. संपूर्ण पदयात्रे दरम्यान ‘महागाईशी नाते तोडा, भारत जोडा‘ या व इतर घोषणांनी, ‘रंग दे बसंती‘ , ‘हम होंगे कामयाब‘ या गाण्यांनी फर्ग्युसन कॉलेज रोडवर जोशपूर्ण वातावरण तयार झाले होते.

      समारोप करताना पुणे शहर जिल्हा कॉंग्रेस कमिटीचे अध्यक्ष अरविंद शिंदे यांनी सर्वांचे आभार मानले. यावेळी युक्रांदचे संदीप बर्वे, काँग्रसचे दत्ता बहिरट यांनी मनोगत व्यक्त केले.

      या पदयात्रेतगोपाळ कृष्ण गोखले यांची नात शर्मिष्ठा खेरे, युवराज शाह, निरज जैन, संगिता तिवारी, रजनी त्रिभुवन, रफिक शेख, जाबुंवत मनोहर, ॲड. अनिल कांकरीया, गोपाळ तिवारी, रविंद्र म्हसकर, संदीप मोकाटे, विनय ढेरे, विजय खळदकर, अजित जाधव, अविनाश गोतारणे, रमेश सोनकांबळे, रविंद्र आरडे, हेमंत राजभोज, जयकुमार ठोंबरे, विनोद रणपिसे, गुलाम खान, चैतन्य पुरदंरे, भगवान कडू, अशोक गेलोत, शिलार रतनगिरी, सुनिल शिंदे, आबा जगताप, सोमेश्वर बालगुडे, प्रसन्न मोरे, राजेंद्र भूतडा, विश्वास दिघे, सुंदरा ओव्हाळ, शर्वरी गोतारणे, रजिया बल्लारी इ. तसेच लोकायत व युक्रांतचे कार्यकर्ते सहभागी होते.

पुणे, दि.१५: पूर्व उच्च प्राथमिक शिष्यवृत्ती परीक्षा (इयत्ता ५ वी) व पूर्व माध्यमिक शिष्यवृत्ती परीक्षा (इयत्ता ८ वी) या परीक्षेकरीता शाळा माहिती प्रपत्र व ऑनलाईन आवेदनपत्र भरण्याकरीता २० डिसेंबर २०२२ पर्यंत मुदतवाढ देण्यात आली आहे.या परीक्षेचे ऑनलाईन आवेदनपत्र भरण्याची १५ डिसेंबरपर्यंत अंतिम मुदत देण्यात आली होती. मात्र अद्यापपर्यंत शाळांनी ऑनलाईन शाळेची माहिती व आवेदनपत्र भरलेले नसल्याने मुदतवाढ देण्यात आली आहे. शाळा माहिती प्रपत्र व ऑनलाईन आवेदनपत्र व नियमित शुल्क ऑनलाईन भरण्याची मुदत २० डिसेंबर, विलंब शुल्क २१ ते २५ डिसेंबर, अतिविलंब शुल्क भरण्याची मुदत २६ ते ३१ डिसेंबर २०२२ पर्यंत आहे. शाळांनी आपली माहिती व आवेदनपत्र विहीत मुदतीत भरण्याचे आवाहन महाराष्ट्र राज्य परीक्षा परिषदेचे उपायुक्त संजयकुमार राठोड यांनी केले आहे.