मुंबई:

उद्धव ठाकरे माफी मागा, अजित पवार माफी मागा, नाना पटोले माफी मागा, पाकिस्तान हाय हाय अश्या घोषणा देत भाजपा कार्यकर्त्यांनी आज मुंबईत ठिकठिकाणी रोष प्रकट केला. विशेष म्हणजे या आंदोलनात वारकरी दिंड्या ही सहभागी झाल्या होत्या.

हिंदू-देवदेवतां व महापुरूषांविरोधात वारंवार अपमानास्पद वक्तव्य करणारे महाविकास आघाडीतील नेते, विशेषत: शिवसेना उप नेत्या सुषमा अंधारे तसेच परमपूज्य महामानव डॉ. बाबासाहेब आंबेडकर यांच्या जन्मस्थळाचा वाद निर्माण करणारे शिवसेना ( उध्दव बाळासाहेब ठाकरे ) नेते संजय राऊत यांच्या विरोधात भाजपाने निदर्शने केली.
तसेच पाकिस्तानचे परराष्ट्रमंत्री बिलावल भुट्टो यांनी संयुक्त राष्ट्रांमध्ये पंतप्रधान नरेंद्र मोदी यांच्यासंदर्भात केलेल्या वादग्रस्त विधानाचा निषेध ही
यावेळी करण्यात आला. मुंबईतील सहा विभागातील खासदार, आमदार, पदाधिकारी यांच्यासह मोठ्या संख्येने कार्यकर्ते सहभागी झाले होते.

मुंबईत कांदिवली रेल्वेस्थानक, अंधेरी पूर्व रेल्वेस्थानक, घाटकोपर पूर्व, दादर पूर्व रेल्वेस्थानक, भाजप प्रदेश कार्यालयाजवळ, स्वा. सावरकर पुतळा, विलेपार्ले या ठिकाणी भाजप कार्यकर्त्यांनी मोठ्या संख्येने एकत्र येत निदर्शनं केले. यावेळी जोरदार घोषणाबाजी करण्यात आली. या सर्वांच्या पार्श्वभूमीवर प्रचंड जनप्रक्षोभ निर्माण झाला आहे. या विरोधात हे ‘माफी मागो’ आंदोलन करण्यात आले. टाळ मृदंगाचा गजर करीत वारकरी मोठ्या संख्येने या आंदोलनात सहभागी झाले होते. संतश्रेष्ठ ज्ञानेश्वर महाराज तसेच एकनाथ महाराज यांचा अपमान करणाऱ्या अंधारे यांचा तीव्र शब्दात निषेध नोंदवला.

मंत्री मंगलप्रभात लोढा, खासदार गोपाळ शेट्टी, मनोज कोटक, विधान परिषद गट नेते प्रवीण दरेकर, मुंबई प्रभारी अतुल भातकलकर, आमदार अमित साटम, आमदार प्रसाद लाड, कालिदास कोळंबकर, मनिषा चौधरी, योगेश सागर, सुनील राणे, यांच्यासह महामंत्री संजय उपाध्याय, माजी आमदार मधू चव्हाण, माजी नगरसेवक, जिल्हा अध्यक्ष, पदाधिकारी मोठ्या संख्येने सहभागी झाले होते.

मुंबई : महाविकास आघाडीचा आजचा मोर्चा असफल झाला आहे. तीन पक्ष एकत्र येऊनदेखील आजची संख्या पाहता हा मोर्चा ड्रोनशॉट लायकदेखील नव्हता, अशी खोचक टीका उपमुख्यमंत्री देवेंद्र फडणवीस यांनी केली.

महाविकास आघाडीच्या मोर्चानंतर देवेंद्र फडणवीसांनी माध्यमांशी बोलताना मोर्चावर जोरदार टीका केली. उपमुख्यमंत्री देवेंद्र फडणवीस म्हणाले की, आजचा महाविकास आघाडीचा मोर्चा हा असफल मोर्चा आहे. संपूर्ण महाराष्ट्रातून या ठिकाणी लोक आलेच नाही. विशेष म्हणजे तीन पक्ष मिळून हा विराट मोर्चा असल्याचे सांगितले जाते. परंतू तसे मुळात अजिबात नाही. हा मोर्चा अतिशय मिनी होता.

आजच्या मोर्चातरी उद्धव ठाकरे नवीन काहीतरी बोलतील अशी आशा होती. पण तसे अजिबात झालेच नाही. नेहमीप्रमाणे उद्धव ठाकरे हे ठरलेले वाक्य बोलले आहेत. उद्धव ठाकरे हे किती दिवस तेच तेच डायलॉग बोलणार आहेत. शिवराळ भाषा वापरायची म्हणजे झाले बोलणे, अशी गत ठाकरेंची झालेली आहे. त्यांनी नवीन गोष्टी पाहाव्या, नवीन स्क्रिफ्ट ठेवावा, अशी टीका उपमुख्यमंत्री देवेंद्र फडणवीसांनी केली आहे.

महाविकास आघाडीच्या नेत्यांना आम्ही आझाद मैदानावर मोर्चा घ्यावा, असे आवाहन केले होते. एव्हाना आम्ही त्यासाठी परवानगी देऊ इच्छित होतो. परंतु त्यांना माहित होते की, एवढी लोकांची संख्या आपल्याकडून आणणे शक्य होणार नाही. त्यामुळे त्यांनी गल्लीबोळातून हा मोर्चा काढण्याची परवानगी घेतली. एक प्रकारे हा मोर्चा असफल झाला आहे, ड्रोनशूंिटगलायक देखील हा मोर्चा नव्हता, अशी खोचक टीका फडणवीसांनी केली आहे.

जे संतांना शिव्या देतात, ज्यांना बाबासाहेबांचा जन्म कुठं झाला माहित नाही, ते मोर्चा काढतात; अशी टीका उपमुख्यमंत्री देवेंद्र फडणवीसांनी केली आहे. देवेंद्र फडणवीस म्हणाले की, आजचा मोर्चा हा राजकीय मोर्चा आहे. जे संतांना शिव्या देतात, ज्यांना डॉ बाबासाहेब आंबेडकर यांचा जन्म कुठे झाला हे माहित नाही, ते आज मोर्चा काढतात. रोज सावरकरांचा अपमान काँग्रेसने केला, तेव्हा शिवसेना कुठे होती. राजकीय भांडवल करण्याचा प्रयत्न होतोय, अशी टीका फडणवीसांनी केली.

मुंबई – महापुरुषांच्या अवमानाविरोधात महाविकास आघाडीने काढलेल्या महामोर्चात उद्धव ठाकरे, अजित पवार आणि नाना पटोलेंसह अनेक प्रमुख नेते सहभागी झाले होते.या मोर्चाचे सभेत रूपांतर झाले आहे. या सभास्थळावर नेते स्थानापन्न होत असताना आदित्य ठाकरे यांनी संजय राऊत यांना मान देत केलेल्या एका कृतीची चर्चा होत असून, त्याचं कौतुक होत आहे.

मोर्चाचे सभेत रूपांतर झाल्यानंतर सभास्थानी नेते स्थानापन्न होत होते. आदित्य ठाकरेही खुर्चीवर बसले होते. मात्र तेव्हा शिवसेना उद्धव बाळासाहेब ठाकरे गटाचे ज्येष्ठ नेते संजय राऊत यांना मंचावर बसण्यासाठी खुर्ची नव्हती. तेव्हा आदित्य ठाकरे यांनी संजय राऊत यांना आग्रह करून आपल्या जागेवर बसवले आणि स्वत: उभे राहिले. त्यांच्या या कृतीमुळे उपस्थितांचं लक्ष वेधलं गेलं. तसेच आदित्य ठाकरेंच्या या कृतीचं कौतुक होत आहे.

मुंबई – राज्यात शिंदे-फडणवीस सरकार आल्यापासून सीमावादाचा प्रश्नाने डोके वर काढले असून सीमेवरची गावं शेजारच्या राज्यात जाण्याची मागणी करत आहेत.

महापुरुषांचा अपमान, सीमावाद या प्रश्नावर महाराष्ट्रद्र्योह्यांच्या विरोधात महाविकास आघाडीचा हा मोर्चा आहे. स्व. यशवंतराव चव्हाण यांनी महाराष्ट्र स्थापनेचा मंगल कलश आणला तेव्हापासून महाराष्ट्र एकसंध रहावा यासाठी प्रयत्न करण्यात आले, पण ईडी सरकार मात्र महाराष्ट्राचे तुकडे करू पहात असून आम्ही ते कदापी होऊ देणार नाही, असा इशारा महाराष्ट्र प्रदेश काँग्रेस कमिटीचे अध्यक्ष नाना पटोले यांनी दिला आहे.

महाविकास आघाडीने रिचर्डसन अँड कृडास कंपनी, नागपाडापासून छत्रपती शिवाजी महाराज टर्मिनसपर्यंत हल्लाबोल मोर्चा काढला. या मोर्चात माजी मुख्यमंत्री उद्धव ठाकरे, माजी उपमुख्यमंत्री अजित पवार, काँग्रेस प्रदेशाध्यक्ष नाना पटोले, काँग्रेस विधिमंडळ पक्षनेते बाळासाहेब थोरात, माजी मुख्यमंत्री पृथ्वीराज चव्हाण, मुंबई काँग्रेसचे अध्यक्ष आ. भाई जगताप यांच्यासह मविआचे सर्व घटक पक्ष व कार्यकर्ते मोठ्या संख्येने उपस्थित होते. राष्ट्रवादी काँग्रेसचे अध्यक्ष खा. शरद पवार यांनीही मोर्चाला संबोधित केले.

नाना पटोले पुढे म्हणाले की, महाराष्ट्राच्या दैवतांचा अपमान करण्याचे काम राज भवनातून भगतसिंह कोश्यारी यांच्यापासून सुरु झाले आणि नंतर भाजपाच्या नेत्यांनी सातत्याने तेच काम सुरु ठेवले. भाजपा नेते सातत्याने महापुरुषांचा अपमान करत आहेत यावर जनतेत प्रचंड चीड आहे. उच्च व तंत्रशिक्षण मंत्री चंद्रकांत पाटील यांनी तर कर्मवीर भाऊराव पाटील, डॉ. बाबासाहेब आंबेडकर, महात्मा ज्योतीबा फुले यांनी शिक्षण संस्थांसाठी भीक मागितली असे उद्गार काढून महापुरुषांच्या अपमानाचा कळसच गाठला.

मुंबई-राज्यपाल भगतसिंग कोश्यारींसह भाजपा नेत्यांनी शिवरायांबाबत केलेल्या वादग्रस्त विधानांविरोधात आज महाविकास आघाडीकडून महामोर्च्याचे आयोजन करण्यात आले होते. या मोर्चाचा समारोप छत्रपती शिवाजी महाराज टर्मिनस येथे करण्यात आला. यावेळी आयोजित सभेत बोलताना विरोधी पक्षनेते अजित पवार यांनी विविध मुद्द्यांवरून शिंदे-भाजपा सरकारला लक्ष केलं. तसेच बेताल वक्तव्य करणाऱ्यांविरोधात कारवाई करण्यासाठी कडक कायदा आणावा, अशी मागणीही त्यांनी यावेळी केली.“मागील काही दिवसांपासून ज्या पद्धतीने शिवरायांबाबत आणि इतर महापुरुषांबाबत विधानं करण्यात आली आहेत, ती बघून राज्यपालांना त्यांच्या पदावरून हटवले पाहिजे. जे आमदार, मंत्री अशी विधानं करत आहेत, त्यांनाही पदावरून हटवले पाहिजे. सोमवारपासून नागपूर येथे हिवाळी अधिवेश सुरू होणार आहे. या अधिवेशनात राज्य सरकारने अशी बेताल वक्तव्य करणाऱ्यांविरोधात कडक कायदा करावा. विरोधी पक्ष म्हणून आम्ही त्याचे समर्थन करू”,  असेही ते म्हणाले.

यावेळी बोलताना त्यांनी सीमावादाच्या मुद्द्यावरूनही शिंदे-फडणवीस सरकारला लक्ष्य केलं. “बेळगावसह सीमाभागातील ८६५ मराठी गावं महाराष्ट्रात आणण्याचा संघर्ष सुरू असताना अचानक ही गावं कर्नाटकात जाण्याचा मुद्दा कसा उपस्थित झाला? यासाठी टुलकीट कोणी दिली? याचाही राज्यातील नागरिकांनी गांभीर्याने विचार केला पाहिजे. अडीच वर्ष आम्ही उद्धव ठाकरेंच्या नेतृत्वात काम करत होतो. त्यापूर्वी विलासराव देशमुख, सुशील कुमार शिंदे, अशोक चव्हाण यांच्या बरोबर काम केलं. मात्र, तेव्हा कोणीही अशी मागणी केली नव्हती”, असेही ते म्हणाले.

“शिंदे-फडणवीस सत्तेत आल्यानंतर सीमेवरील गावं शेजारच्या राज्यात जातो म्हणायला लागली आहेत. अशा स्थितीत महाराष्ट्राचे मंत्रीमंडळ कर्नाटक बॅंकेत खाती उघडण्याचा निर्णय कसा घेऊ शकतात? कर्नाटक सातत्याने आपल्यावर अन्याय करत आहेत. तरीही असा निर्णय घेतला जातो आहे. त्यामुळे तुमचं पुतना मावशीचं प्रेम सर्वांना कळलं आहे, अशी टीका अजित पवारांनी केली. एकंदरीत परिस्थिती बघता, या सरकारला त्यांची जागा दाखवण्याचे काम आपण सर्वांनी केलं पाहिजे”, असेही ते म्हणाले.

हे लफंगे महाराष्ट्र लुटायला आले आहेत! हल्लाबोल मोर्चात उद्धव ठाकरे कडाडले

मुंबई-

बऱ्याच वर्षांनंतर एवढा मोठा मोर्चा देशाने पाहिला असेल. जेव्हा ह्या मोर्चाची घोषणा केली, तेव्हा मला काही जणांनी विचारलं तुम्ही चालणार का? मी एकटा नाही, तर माझ्याबरोबर लाखो महाराष्ट्रप्रेमी महाराष्ट्रद्रोह्यांच्या छाताडावर चालणार आहेत. ज्यांनी ज्यांनी आपल्याला डिवचलं त्यांच्या छाताडावर चालण्याची हीच वेळ आहे, असा एल्गार शिवसेना पक्षप्रमुख उद्धव ठाकरेंनी केला आहे.

महाविकास आघाडीने आयोजित केलेल्या ‘महामोर्चा’त उद्धव ठाकरे बोलत होते. उद्धव ठाकरे म्हणाले, “संयुक्त महाराष्ट्रानंतर असे दृष्य देशाने नव्हे तर जगाने पाहिलं असेल. संयुक्त महाराष्ट्राच्या लढ्यावेळी प्रचंड संघर्ष करावा लागला. मुंबईसह संयुक्त महाराष्ट्र झाला, पण अजूनही बेळगाव कारवार निपाणीसह संयुक्त महाराष्ट्र झाला नाही. तो घेतल्याशिवाय आम्ही स्वस्थ बसणार नाही,” असे उद्धव ठाकरेंनी म्हटलं.

उद्धव ठाकरे म्हणाले की, कर्नाटक असो वा आणखी कोणी असोत, हे सगळे एकत्र महाराष्ट्रावर तुटून पडत आहेत. या महाराष्ट्र द्रोह्यांचा राजकीय शेवट करणार. आजचा मोर्चा त्याची सुरुवात आहे. ज्यांनी-ज्यांनी डिवचलं त्यांच्या छाताडावर चालण्याची हीच वेळय. संयुक्त महाराष्ट्राच्या लढ्यानंतर जगानं हे दृश्य पहिल्यांदाच पाहिले. संयुक्त महाराष्ट्रासाठी असाच संघर्ष करावा लागला. बेळगाव, निपाणी, कारवारसह संयुक्त महाराष्ट्र घेतल्याशिवाय गप्प बसणार नाही, असा निर्धार त्यांनी व्यक्त केला.

शिंदेंवर तोतये म्हणून टीका…

ठाकरे पुढे म्हणाले की, महामोर्चासाठी सर्व पक्ष एकटवलेत. फक्त महाराष्ट्र द्रोही आणि बाळासाहेबांचे विचार सोबत घेऊन जाणारे तोतये या महामोर्चा नाहीत. राज्यपाल कोण असावा, केवळ केंद्रात बसतो म्हणून त्यांची सोय म्हणून पाठवून द्यायचे हे चालणार नाही. छत्रपती शिवाजी महाराज, फुले यांच्याबद्दल अवमानकारक बोलतात. महात्मा फुले, सावित्रीबाई फुले नसते तर आज आपण कुठे असतो, त्याचे उदाहरण मंत्र्यांनी भीक शब्द उच्चारून दाखवून दिलाय. सावित्रीबाईंनी शेणमार सहन केला. ते डगमगले नाहीत. महिला शिकल्याच पाहिजेत. त्या शिकल्या नसत्या, आपण शाळेत गेलो नसतो, तर भीक मागत बसलो असतो, अशी उद्विग्नता त्यांनी व्यक्त केली.

बौद्धिक दारिद्र्याचे मंत्री

ठाकरे पुढे म्हणाले की, मिंदे सरकारमध्ये मुळात बौद्धिक दारिद्रय असलेले मंत्री सुप्रियाताई सुळेंबद्दल काय बोललो आपण पाहिलेच. हे आंदोलन त्यांच्याविरोधात आहे. या लफ्यग्यांना महाराष्ट्राबद्दल बोलण्याचा अधिकार नाही. एक – दोन मंत्री झाले. तिसरे मुंबईचे पालकमंत्री. त्यांनी महाराजांची आग्रह्याहून सुटका झाली त्यांची तुलना चक्क खोकेवाल्यांसोबत केली. मात्र, आग्राहून सुटल्यानंतर शिवरायांनी स्वराज्य स्थापन केले. मात्र, स्वतःच्या आईच्या कुशीत वार करून सरकार स्थापन केले.

प्रकल्प पळवणे सुरू

महामोर्चातल्या गर्दीने महाराष्ट्र द्वेष्ट्याचे डोळे उघडले पाहिजेत. मुंबईचा, महाराष्ट्राचा लचका कसा तोडतायत ते पाहतोच. उद्धव ठाकरे म्हणाले की, आम्ही सत्तेत असताना अनेक प्रकल्प सुरू केले, पण ते दुसऱ्या राज्यात पळवले जात आहेत. सध्याचे मुंबईचे पालकमंत्री स्केअर फूटमध्ये बोलतात. मात्र, मुंबईत विकणारी जागा नाही. ती आमची माय आहे. तिच्याशी खेळायचा प्रयत्न केला, तर आगडोंब उसळेल. यांना महाराष्ट्राची अस्मिता संपवून टाकायची आहे. मात्र, महाराष्ट्र द्रोह्यांना या मातीत गाढल्याशिवाय राहणार नाही. महाराष्ट्र द्रोह्यांच्या छाताडावर चालण्याची हीच वेळ आहे, असा इशारा ठाकरे यांनी दिला.