मुंबई, दि.२१ : “योगाला हजारो वर्षांची परंपरा आहे. प्राचीन काळापासून सिद्ध झाले आहे की योगाने आजार पळून जात. योग हे प्रतिबंधात्मक औषध म्हणून काम करीत आहे. शासन, प्रशासन यांना तणावमुक्त राहण्यासाठी रोज योगा करूया आणि निरोगी राहूया”, असा कानमंत्र मुख्यमंत्री एकनाथ शिंदे यांनी आज दिला.

आंतरराष्ट्रीय योग दिनानिमित्त मंत्रालयात आयोजित योगाभ्यासादरम्यान मुख्यमंत्री श्री. शिंदे बोलत होते. यावेळी मुख्य सचिव मनोज सौनिक, सामान्य प्रशासन विभागाचे अपर मुख्य सचिव नितीन गद्रे, वित्त विभागाचे अपर मुख्य सचिव नितीन करीर, गृह विभागाच्या अपर मुख्य सचिव सुजाता सौनिक, राजशिष्टाचार विभागाच्या अपर मुख्य सचिव मनीषा म्हैसकर, अपर मुख्य सचिव राजगोपाल देवरा, अपर मुख्य सचिव राजेश कुमार, मुख्यमंत्री यांचे प्रधान सचिव विकास खारगे, माहिती व जनसंपर्क विभागाच्या महासंचालक जयश्री भोज यांच्यासह मंत्रालयातील वरिष्ठ सनदी अधिकारी, कर्मचारी योगाभ्यासामध्ये सामील झाले होते.

मुख्यमंत्री श्री. शिंदे यांनी आंतरराष्ट्रीय योग दिनाच्या सर्वांना शुभेच्छा देऊन सांगितले की, प्रधानमंत्री नरेंद्र मोदी यांनी संपूर्ण जगभरात योग पोहोचविला. योगदिनाचा प्रस्ताव प्रधानमंत्र्यांनी संयुक्त राष्ट्रसंघात मांडला होता. योगाचे महत्त्व ओळखून संयुक्त राष्ट्र संघानेही (युनो) मान्यता दिल्याने जगभरात २१ जून हा आंतरराष्ट्रीय योग दिन साजरा करण्यात येत आहे. प्रधानमंत्री हे सध्या न्यूयार्कमध्ये योग करीत आहेत. ही आपल्या देशासाठी अभिमानाची गोष्ट आहे. महाराष्ट्रात एकाचवेळी ३५ लाख नागरिक, अधिकारी, कर्मचारी योग करीत आहेत, ही आपल्यासाठी मोठी उपलब्धी आहे. योग ही आता काळाची, समाजाची चळवळ होत आहे. आपला देश जगाला नवनवीन कार्यक्रम देत असून जी-२० ची थीम ‘वसुदैव कुटुंबकम’ असून संपूर्ण देश हा आपला परिवार आहे, असे पंतप्रधान मानतात, याचाही आपल्याला अभिमान आहे.         सकाळपासून योग कार्यक्रमांचे विविध ठिकाणी आयोजन केले आहे. मंत्रालयातील अधिकारी, कर्मचाऱ्यांचाही योगाभ्यास झाल्याने त्यांनाही नवी ऊर्जा मिळेल, अशी अपेक्षा मुख्यमंत्र्यांनी व्यक्त केली.

प्रारंभी मुख्य सचिव श्री. सौनिक यांनी मुख्यमंत्र्यांचे पुष्पगुच्छ देऊन स्वागत केले. योगाभ्यासात मुख्यमंत्री श्री. शिंदे यांनी सहभाग घेतला. द योग इन्स्टिट्यूट, सांताक्रूजच्या डॉ. हंसाजी योगेंद्र यांच्या योगसाधकांनी योगप्रात्यक्षिके केलीत.

मुंबई, दि. २१ :- राज्यातील सर्व  शासकीय वैद्यकीय, आयुष,आयुर्वेद, योग, युनानी, सिध्द व होमिओपॅथी चिकित्सापद्धत अशा सर्व  महाविद्यालयांत डॉक्टर, रुग्ण आणि कर्मचाऱ्यांसाठी नियमित योग करण्यासाठी योग केंद्र सुरू करण्यात येणार असून त्याठिकाणी तज्ञ  योग प्रशिक्षकांची नेमणूक करण्यात येणार असल्याची घोषणा वैद्यकीय शिक्षण व औषधी द्रव्य मंत्री गिरीष महाजन यांनी आंतरराष्ट्रीय योग दिनानिमित्ताने केली.

नॅशनल स्पोर्टस् क्लब, वरळी येथील डोम सभागृह येथे वैद्यकीय शिक्षण व औषधी द्रव्य विभागाच्यावतीने आंतरराष्ट्रीय योग दिनानिमित्त ‘वसुधैव कुटुंबकम् साठी योग’ या कार्यक्रमाचे आयोजन करण्यात आले होते, त्यावेळी ते बोलत होते. यावेळी वैद्यकीय शिक्षण व औषधी द्रव्य विभागाच्या सचिव अश्विनी जोशी, आयुक्त राजीव निवतकर यांची प्रमुख उपस्थिती होती.

मंत्री श्री महाजन म्हणाले, “आजच्या या धावपळीच्या जीवनात माणूस आरोग्यापासून लांब होत चालला आहे. कोरोना सारख्या महामारीने आपल्याला चांगलाच धडा शिकवला आहे की आपले शरीर निरोगी असेल तरच आपण आयुष्यातील सर्व गोष्टीचा आनंद घेऊ शकतो. त्यामुळे आपले शरीर निरोगी असणे महत्त्वाचे आहे. योगाभ्यास व योगाची संपूर्ण पद्धती सर्वांना माहित व्हावी तसेच जगभरात योगाचा प्रसार व्हावा या हेतूने दरवर्षी २१ जून रोजी ‘जागतिक योग दिन’ साजरा केला जात आहे”, असे त्यांनी सांगितले.

“योगासन म्हणजे केवळ व्यायाम नाही, तर हे आपले शरीर आणि मन दोन्ही जोडण्याचे साधन आहे. उत्तम आरोग्य तसेच शरीर, मन आणि श्वासोच्छ्वास यांचा योगामुळे संयोग झाल्याने आपल्याला अगणित फायदे होतात. तणावमुक्त जगण्याबरोबरच तुमचे मन, शरीर आणि श्वास यांचे एकमेकांशी संतुलन राखले गेल्याने जीवनाचा प्रवास शांत, आनंदी आणि सर्वार्थाने सफल होतो”. असे श्री. महाजन यांनी सांगितले.

कैवल्यधाम संस्थेच्या योग मार्गदर्शकांनी उपस्थित मान्यवर आणि वैद्यकीय महाविद्यालयाच्या विद्यार्थ्यांकडून विविध योगासने करून घेतली. तसेच पोतदार वैद्यकीय महाविद्यालयातील विद्यार्थ्यांनी संगीत योगाचे सादरीकरण केले.

कार्यक्रमाच्या प्रास्ताविक विभागाच्या सचिव अश्विनी जोशी यांनी आंतरराष्ट्रीय योगदिनाचे महत्त्व सांगून २०२३ ची संकल्पना ‘वसुधैव कुटुंबकम्’ असल्याचे सांगितले. ‘हर घर योगा, हर आंगन योगा’ करण्यात येणार असल्याचे त्यांनी सांगितले. प्रधानमंत्री श्री नरेंद्र मोदी यांचे योगाविषयीचे विचार शेवटच्या घटकापर्यंत पोहचविण्यासाठी प्रयत्न केले जातील असेही त्यांनी यावेळी सांगितले.

यावेळी वैद्यकीय शिक्षण विभागातील वरिष्ठ अधिकारी उपस्थित होते. कार्यक्रमाचे सूत्रसंचलन कुणाल रेगे यांनी केले. आभार वैद्यकीय शिक्षण विभागाचे आयुक्त राजीव निवतकर यांनी मानले.

मुंबई, दि. २१  :  भारतरत्न डॉ. बाबासाहेब आंबेडकर स्वाधार योजनेअंतर्गत अनुसूचित जाती व नवबौध्द घटकातील विद्यार्थ्यांचे सन २०२२-२३ मधील अर्ज दि. ३१ मार्च, २०२३ पर्यंत स्वीकारण्यात आले होते. आता या योजनेसाठी अर्ज सादर करण्यासाठी मुदतवाढ देण्यात आली असल्याने विद्यार्थ्यांनी दि. १४ जुलै, २०२३ पर्यंत अर्ज करावेत, असे आवाहन सामाजिक न्याय व विशेष सहाय्य विभागाचे सहसचिव दि.रा. डिंगळे यांनी केले आहे.

सामाजिक न्याय विभागांतर्गत शासकीय वसतिगृहात प्रवेश घेण्यास पात्र असलेल्या परंतु शासकीय वसतिगृहात प्रवेश न मिळालेल्या अनुसूचित जाती व नवबौध्द विद्यार्थ्यांपैकी इयत्ता ११ वी व १२ वी तसेच इयत्ता १२ वी नंतरच्या व्यवसायिक तसेच बिगर व्यवसायिक अभ्यासक्रमामध्ये विविध स्तरावरील महाविद्यालयात/ शिक्षण संस्थांमध्ये प्रवेश मिळालेल्या विद्यार्थ्यांना भोजन, निवास, शैक्षणिक साहित्य, निर्वाह भत्ता उपलब्ध करून घेण्यासाठी भारतरत्न डॉ. बाबासाहेब आंबेडकर स्वाधार योजना सुरू करण्यात आलेली आहे. या योजनेच्या माध्यमातून मुंबई शहर, मुंबई उपनगर,नवी मुंबई, ठाणे, पुणे, पिंपरी-चिंचवड, नागपूर या ठिकाणी उच्च शिक्षण घेणाऱ्या विद्यार्थ्यांना ६० हजार रुपये, इतर महसूली विभागतील शहरात व उर्वरित क वर्ग महानगरपालिका क्षेत्रांमध्ये उच्च शिक्षण घेणाऱ्या विद्यार्थ्यांसाठी रू ५१ हजार रुपये व इतर जिल्ह्यांच्या ठिकाणी उच्च शिक्षण घेणाऱ्या विद्यार्थ्यांसाठी ४३ हजार रुपये इतकी रक्कम संबंधित विद्यार्थ्यांच्या आधार संलग्न बँक खात्यामध्ये जमा करण्यात येते, अशी माहिती श्री. डिंगळे यांनी दिली.

इंटरनेट बंद झाल्याने एटीएममधून पैसे काढणेही बंद,ऑनलाइन पेमेंट बंद

मणिपूरमध्ये ३ मे रोजी सुरू झालेला हिंसाचार परिस्थिती पाहता 4 मे पासून बंद असलेल्या शाळांच्या सुट्या पुन्हा एकदा वाढवण्यात आल्या आहेत. यापूर्वी २१ जून रोजी शाळा सुरू करण्याची तयारी होती, मात्र परिस्थिती नियंत्रणात नसल्याने शाळांच्या सुट्या १ जुलैपर्यंत वाढवण्यात आल्या आहेत.दुसरीकडे, राज्यातील इंटरनेट बंदी 25 जूनपर्यंत वाढवण्यात आली आहे. तथापि, मणिपूर उच्च न्यायालयाने राज्य सरकारला मर्यादित नेट सेवा देण्याचे निर्देश दिले आहेत. न्यायमूर्ती अहंथेम बिमोल सिंग आणि ए गुणेश्वर शर्मा यांनी काही लोकांसाठी इंटरनेट आवश्यक आहे, विशेषत: विद्यार्थ्यांच्या प्रवेशाबाबत , असे निरीक्षण नोंदविलेले आहे.

इंटरनेट सेवा बंद झाल्याने लोकांना सर्वाधिक त्रास सहन करावा लागत आहे. एटीएममधून पैसे काढणेही अवघड झाले आहे. इम्फाळ खोऱ्यातील वांगखाई येथील रहिवासी असलेल्या प्रीतम सिंह यांनी सकाळपासून पैसे काढण्यासाठी तीन-चार एटीएम शोधले, पण पैसे काढता आले नाहीत.

यानंतर ते दुसऱ्या भागातील सिंगजेमे मार्केटमध्ये पोहोचले. प्रीतम सिंह सांगतात, ‘येथे जवळपास 100 एटीएम आहेत, त्यापैकी फक्त 5 ते 10 एटीएममध्ये पैसे आहेत. इंटरनेट बंद असल्याने ऑनलाइन पेमेंट बंद, खरेदी रोखीनेच करावी लागत आहे. त्यामुळे रोज एटीएममध्ये जावे लागते. अनेक वेळा रांगेत असताना एटीएममधील पैसे संपतात.

हिंसाचाराच्या काळात तांदळाच्या किमतीत लक्षणीय वाढ झाली. साधारणत: तांदूळ ३० रुपयांच्या खाली मिळत होता, मात्र भाव ५० रुपये किलोवर पोहोचला आहे.बटाट्याचा भाव 80 रुपये किलोवर पोहोचला आहे. वस्तूंच्या किमती वाढल्याने आमचे बजेटही बिघडले आहे. दुसरीकडे, चिंगखाम संगीता या महिला दुकानदाराने सांगितले की, ‘आम्ही ज्यांच्याकडून वस्तू खरेदी करतो त्यांनी त्यांच्या किमती वाढवल्या आहेत, त्यामुळे आम्हालाही वस्तूंच्या किमती वाढवाव्या लागल्या.

त्याचवेळी लष्कराने युनायटेड नॅशनल लिबरेशन फ्रंट (UNLF) या प्रतिबंधित संघटनेच्या चार सदस्यांनाही अटक केली आहे. त्यांच्याकडून 51 मिमी मोर्टार आणि बॉम्ब जप्त करण्यात आला आहे. लष्कराने ट्विट करून माहिती दिली की, 19 जूनच्या संध्याकाळी त्यांना लिलाँग भागात केलेल्या तपासणी मोहिमेत पकडण्यात आले.

मोदी हीरो आहेत, मी त्यांचा फॅन आहे, मोदींना भारतासाठी खूप काही करायचे आहे ,मोदीं भारतात नवीन कंपन्यांचे स्वागत खुल्या हातांनी करतात अशा शब्दात टेस्लाचा आणि ट्विटरचे सर्वेसर्वा एलॉन मस्क यांनी पंतप्रधान मोदींची स्तुती केली आहे. त्यांनी मोदींची न्यूयॉर्कमध्ये भेट घेतली.यावेळी टेस्लाचा भारतातील कारखाना कुठे उभारणार? याप्रश्ना वर वर्षाअखेरीस अंतिम निर्णय होईल, अशी प्रतिक्रिया मस्क यांनी दिली. मोदी हीरो आहेत, त्यांना भारतासाठी खूप काही करायचं आहे, त्यांच्याशी अतिशय व्यापक चर्चा झाली, असंही मस्क म्हणाले. तसेच मी पंतप्रधानांचा फॅन असल्याचे देखील मस्क यावेळी म्हणाले. पंतप्रधान नरेंद्र मोदी अमेरिका दौऱ्यासाठी न्यूयॉर्कमध्ये दाखल झाले आहेत. ते अमेरिकेच्या तीन दिवसांच्या दौऱ्यावर आहेत. या तीन दिवसांच्या दौऱ्यात अनेक कार्यक्रमांचे आयोजन करण्यात आले आहे. मंगळवारी पंतप्रधान नरेंद्र मोदी यांनी ट्विटर सीईओ एलॉन मस्क यांची भेट घेतली. या भेटीत त्यांनी भारतात येण्याची इच्छा व्यक्त केली. पुढील वर्षी मस्क भारत दौऱ्यावर येणार आहेत.लोटे न्यूयॉर्क पॅलेस हॉटेलमध्ये पंतप्रधान मोदींची भेट घेतल्यानंतर एलॉन मस्क यांनी भारत भेटीची इच्छा व्यक्त केली. पुढच्या वर्षी भारत दौऱ्यावर येणार असल्याचे त्यांनी सांगितले.मी पंतप्रधानांचा फॅन असल्याचे सांगत एलॉन मस्क म्हणाले की, मी भारताच्या भविष्याबाबत खूप उत्सुक आहे. जगातील इतर कोणत्याही देशापेक्षा भारताकडे अधिक शक्यता आहेत.पंतप्रधान मोदींना भारताच्या उज्जवल भविष्यासाठी अनेक गोष्टी करायच्या आहेत. नवीन कंपन्यांबाबत त्यांचा दृष्टिकोन, धोरण उदारमतवादी आहे. मोदीं भारतात नवीन कंपन्यांचे स्वागत खुल्या हातांनी करतात त्यामुळे मी त्यांचा फॅन आहे.

पंतप्रधान मोदींसोबतच्या भेटीची माहिती देताना मस्क म्हणाले की, पंतप्रधानांशी भेट चांगली होती. आम्ही अनेक गोष्टींवर चर्चा केली. पुढील वर्षी मी भारतात येण्याचा विचार करत आहे. पंतप्रधान मोदींसोबतच्या भेटीबाबत विचारल्यावर मस्क म्हणाले की, मोदींना त्यांच्या देशाची खूप काळजी आहे. म्हणूनच ते भारतात गुंतवणुकीसाठी खूप सक्रिय आहेत. आम्ही देखील भारतात गुंतवणुकीच्या संधी शोधत आहोत. आम्ही फक्त योग्य वेळेची वाट पाहत आहे. तसेच मोदींना ब्रॉडबँड इंटरनेट सेवा स्टारलिंक भारतात आणायची आहे. या सेवेमुळे ग्रामीण भागातील नागरिकांपर्यंत इंटरनेटची सुविधा पोहचण्यास मदत होणार आहे. एलॉन मस्क यांनी पंतप्रधान मोदींचे कौतुक केले आणि सांगितले की, भारताच्या भविष्याबद्दल मी खूप उत्सुक आहे.पंतप्रधान मोदींना त्यांच्या देशाबद्दल खूप प्रेम आणि काळजी आहे. म्हणूनच ते आम्हाला भारतात गुंतवणूक करण्यासाठी प्रोत्साहन देत आहे.