पुण्याच्या सिद्धी जगदाळेला जिल्हास्पर्धेत सुवर्ण तर विभागात रौप्यपदक

पुणे- नुकत्याच अहमदनगर येथे झालेल्या दक्षिण विभागीय धनुर्विद्या स्पर्धेमध्ये पुण्यातील लोहगावमधील विखे पाटील मेमोरियल स्कूलच्या प्राची चॅटर्जी हिला सुवर्णपदक मिळाले तर पोतदार इंटरनॅशनल स्कुलची विद्यार्थिनी सिद्धी जगदाळे हिला रौप्य पदक मिळाले असून त्याआधी दौण्ड येथे झालेल्या जिल्हास्तरीय शालेय क्रीडा स्पर्धेत सिद्धीला धनुर्विद्या स्पर्धेत सुवर्णपदक मिळाले होते. १७ वर्ष वयोगटातील दोघी विजेत्या आहेत.

देशभरातून या स्पर्धेसाठी सीबीएसई शाळांमधील ३०० स्पर्धकांनी स्पर्धेत सहभाग घेतला होता. यात केरळ, नागपूर, पुणे, नाशिक, सातारा, गोवा, अहमदनगर, दिल्ली, जळगाव येथील विद्यार्थ्यांचा समावेश होता. १४, १७ आणि १९ वयोगटात या स्पर्धा घेण्यात आल्या.

प्रशिक्षक रणजित चांबले यांच्या मार्गदर्शनाखाली सिद्धीचा धनुर्विद्येचा सराव सुरु आहे. सिद्धीने धनुर्विद्येमध्ये मिळविलेले प्रावीण्य वाखाण्याजोगे आहे. यापुढे तिला राष्ट्रीय आणि आंतरराष्ट्रीय स्तरावर खेळायचे आहे. खेळावर सातत्यपूर्ण लक्ष केंद्रित करून दिवसागणिक सराव वाढविण्यावर तिचा भर असल्याचे ती सांगते.

जिल्हाधिकारी डॉ. राजेश देशमुख यांनी घेतली कोविड टास्क फोर्सची बैठक

पुणे, दि. २८: परदेशात वाढणारी कोविड-१९ रुग्णांची संख्या लक्षात घेता या साथरोगाला प्रतिबंध करण्यासाठी तसेच यातून निर्माण होऊ शकणाऱ्या कोणत्याही परिस्थितीला यशस्वीपणे तोंड देण्यासाठी जिल्ह्यातील आरोग्य यंत्रणा सज्ज करण्याचे निर्देश जिल्हाधिकारी डॉ. राजेश देशमुख यांनी दिले.

कोविड-१९ बाबत जिल्हाधिकारी पुणे यांच्या अध्यक्षतेखालील जिल्हास्तरीय कोविड टास्कफोर्स समितीची बैठक दूरदृश्यप्रणालीद्वारे घेण्यात आली. यावेळी पुणे ग्रामीणचे पोलीस अधीक्षक डॉ. अंकित गोयल, जिल्हा शल्य चिकित्सक डॉ. नागनाथ यमपल्ले, जिल्हा आरोग्य अधिकारी डॉ. भगवान पवार आदी उपस्थित होते.

सद्यस्थितीत चीन, अमेरिका, ब्राझील, इंडोनेशिया आदी देशांमध्ये कोरोना रुग्णांची संख्या दिवसेंदिवस वाढत आहे. राज्यात व पुणे जिल्ह्यातही खबरदारी म्हणून प्रतिबंधक उपाययोजनांना गती देण्यासाठी आणि यंत्रणांच्या पूर्वतयारीचा आढावा घेण्यासाठी या बैठकीचे आयोजन करण्यात आले.

जिल्हाधिकारी डॉ. देशमुख म्हणाले, केंद्र शासनाच्या निर्देशाप्रमाणे जिल्ह्यातील प्रशासकीय आणि आरोग्य यंत्रणा सज्ज करण्यात यावी. ऑक्सिजन प्रकल्प, लिक्विड ऑक्सिजन स्टोरेज टँक, मेडिकल ऑक्सिजन पाईपलाईन आदी आवश्यक साहित्य सामुग्रीच्या प्रात्यक्षिकात त्रूटी आढळल्या असल्यास त्या तातडीने दूर करण्यात याव्यात. कोविड-१९ च्या संभाव्य स्थितीचा नियोजनबद्धरित्या सामना करण्यासाठी यंत्रणा सज्ज ठेवावी. जास्तीतजास्त पात्र नागरिकांचे कोविड प्रतिबंधक लसीकरण करण्यासाठी लसीकरण बुथची संख्या वाढविण्याचे निर्देशही जिल्हाधिकारी डॉ. देशमुख यांनी बैठकीत दिले.

डॉ. पवार यांनी यावेळी माहिती दिली, सद्यस्थितीत पुणे जिल्ह्यात कोविडचे ५० रुग्ण असून दैनंदिन सरासरी ११ रुग्ण बरे होत आहेत. कोविड प्रतिबंधक लसीकरणाला गती देण्यात येत असून आतापर्यंत जिल्ह्यात एकूण १ कोटी ९३ लाख ४५ हजार ४७० कोविड प्रतिबंधक लसीकरण करण्यात आले आहे. त्यामध्ये ९९ लाख ५ हजार ४१८ पहिली मात्रा, ८४ लाख ५९ हजार ८३४ दुसरी मात्रा तर ९ लाख ८० हजार २१८ वर्धक मात्रा देण्यात आल्या आहेत. जिल्ह्यातील सर्व प्राथमिक आरोग्य केंद्र, उपकेंद्र स्तरावर सर्व लाभार्थीसाठी कोविड लसीकरणाची सोय केलेली आहे, असेही ते म्हणाले.

कोविड उपाययोजनांतर्गत जिल्ह्यात ११४ पीएसए ऑक्सिजन प्रकल्प तर १०९ लिक्विड ऑक्सिजन स्टोरेज टँक उपलब्ध असून या दोन्हींची मिळून एकूण क्षमता १ हजार २१० मेट्रीक टन आहे. जिल्ह्यामध्ये सुस्थितीतील १ हजार १९६ व्हेंटीलेटर्स तसेच १ हजार ९७ ऑक्सिजन कॉन्सन्स्ट्रेटर्स उपलब्ध आहेत. जिल्ह्यात एकूण ५ हजार ४०१ विलगीकरण बेड, ५ हजार ९६४ ऑक्सिजन बेड, १ हजार २९३ आयसीयु बेड उपलब्ध करण्यात आलेले आहेत.

पुणे दि.२८-पिंपरी चिंचवड उप प्रादेशिक परिवहन कार्यालयाच्या वायुवेग पथकाने थकीत कर वसुलीसाठी मोटार वाहन कायद्यातील अन्य गुन्ह्यांतर्गत कार्यालयाच्या आवारात अटकवून ठेवलेली वाहने मोटार वाहन कर व दंड भरून पुढील ७ दिवसांत सोडवून नेण्याचे आवाहन उप प्रादेशिक परिवहन अधिकारी पिंपरी चिंचवड यांनी केले आहे.

पिंपरी चिंचवड उप प्रादेशिक परिवहन कार्यालयाच्या आवारातील अशी वाहने मालक/चालक यांच्या जबाबदारीवर अटकावून ठेवलेली आहेत. ही वाहने सोडवून नेण्यासाठी वाहन मालकांनी या कार्यालयात वाहन कर, दंड भरलेला नाही अथवा वाहने नेण्यासाठी संपर्क केलेला नाही.

उप प्रादेशिक परिवहन कार्यालयाने मोटार वाहन थकीत कराच्या वसुलीसाठी अटकावून ठेवलेल्या वाहनांच्या जाहीर लिलावाची प्रक्रियादेखील सुरु केलेली आहे. त्यापैकीच १८ वाहनांच्या मालकांना कार्यालयाने नोटीस पाठविल्या होत्या. परंतू वाहन मालक नोंदणीकृत पत्त्यावर आढळून न आल्याने अशा नोटीस वाहन मालकांना पोच झालेल्या नाहीत. अशा वाहनांची यादी या कार्यालयाच्या सूचना फलकावर प्रदर्शित केलेली आहे.

मोटार वाहन कायद्यातील तरतुदीनुसार वाहन मालकांनी नोंदणी प्रमाणपत्रावर पत्ता बदलाची नोंद पत्ता बदल झाल्यास ७ दिवसात करावयाची आहे. परंतू वाहन मालकांनी पत्ता बदल न केल्याने वाहन मालकाचे अद्ययावत पत्त्यावर पत्रव्यवहार करणे शक्य होत नाही व वाहन मालकासोबत संपर्क होऊ शकत नाही.

वाहन मालकांनी आपली वाहने मोटार वाहन कर व दंड भरून पुढील ७ दिवसांत सोडवुन न्यावीत, अन्यथा अशी वाहने बेवारस वाहने आहेत समजुन सक्षम प्राधिकारी यांच्या परवानगीने अशा वाहनांचा जाहीर ई लिलाव करण्यात येईल असेही पिंपरी चिंचवड उप प्रादेशिक परिवहन कार्यालयातर्फे कळविण्यात आले आहे.

नागपूर, दि. 28 : अहमदनगर जिल्ह्याचे नामांतर ‘पुण्यश्लोक अहिल्यादेवीनगर’  करण्याबाबत शासन सकारात्मक आहे. जिल्ह्याची माहिती आल्यानंतर  केंद्र शासनाकडे तातडीने प्रस्ताव पाठविणार असल्याची माहिती शालेय शिक्षणमंत्री दीपक केसरकर यांनी विधानपरिषदेत दिली.

अहमदनगर जिल्ह्याच्या नामांतराचा प्रश्न सदस्य गोपीचंद पडळकर यांनी उपस्थित केला होता. प्रश्नाला उत्तर देताना मंत्री श्री केसरकर बोलत होते.

मंत्री श्री केसरकर यांनी सांगितले की, केंद्र शासनाच्या मार्गदर्शक तत्वानुसार अहमदनगर नामांतरसाठी विभागीय आयुक्त नाशिक आणि जिल्हाधिकारी अहमदनगर यांना परिपूर्ण प्रस्ताव, माहिती पाठविण्यास कळविले आहे. शिवाय अहमदनगर महापालिका, विभागीय रेल्वे व्यवस्थापक, पोस्ट कार्यालय, तहसीलदार यांच्याकडून ना हरकत प्रमाणपत्र देण्याबाबत कळविण्यात आले आहे.

सर्व परिपूर्ण माहिती आल्यानंतर हा प्रस्ताव केंद्र शासनाकडे पाठवून सकारात्मक निर्णय घेतला जाईल, असेही श्री. केसरकर यांनी सांगितले.

यावेळी झालेल्या चर्चेत सदस्य प्रा. राम शिंदे, महादेव जानकर यांनी सहभाग घेतला.

0000

विश्व हिंदू परिषद बजरंग दल सिंहगड भागाच्यावतीने आयोजन : हुतात्मा जवान व हुतात्मा कारसेवक कोठारी बंधू यांच्या स्मरणार्थ रक्तदान
पुणे : विश्व हिंदू परिषद बजरंग दल सिंहगड भागाच्यावतीने शौर्य दिन आणि विजय दिनानिमित्त हुतात्मा जवान व हुतात्मा कारसेवक कोठारी बंधू यांच्या स्मरणार्थ रक्तदान महायज्ञ आयोजित करण्यात आला होता. रक्तदान महायज्ञात ९९७ रक्तपिशव्यांचे संकलन झाले. १२ ठिकाणी एकाच वेळी ही रक्तदान शिबिरे घेण्यात आली.

या शिबिरांमध्ये सुमारे शंभरहून अधिक गणेश मंडळे, विविध हाउसिंग सोसायटी, सामाजिक संस्था, महिला बचत गट आणि बजरंग दलाच्या कार्यकर्त्यांनी सहभाग घेतला. यावेळी राष्ट्रीय स्वयंसेवक संघाचे पंत फडके, दत्ताजी काळे विश्व हिंदू परिषदेचे संजय मुद्राळे, सतीश गोरडे, किशोर चव्हाण, श्रीकांत चिल्लाळ, मनोहर ओक, प्रदिप वाजे, दिनेश लाड, नितीन महाजन धनंजय गायकवाड, आमदार भीमराव तापकीर यांच्यासह सिंहगड रस्ता परिसरातील लोकप्रतिनिधींनी विविध केंद्रांना भेट दिली.

सिंहगड रस्ता परिसरातील जगताप शाळा हिंगणे खुर्द, आनंद मारुती मंदिर आनंदनगर, कृष्णांगण हाईट्स विठ्ठलवाडी, वांजळे तलाव, सनसिटी सोसायटी, पी. जोग शाळा माणिकबाग, सोबा ऑप्टिमा सोसायटी, भैरवनाथ मंदिर वडगाव बुद्रुक, अभिरुची मॉल, वस्ताद पोकळे शाळा धायरी, भैरवनाथ मंदिर नन्हे, नांदेड मल्टिस्पेशालिटी हॉस्पिटल आदी केंद्रांवर शिबिर भरविण्यात आले. या उपक्रमाला रक्तदात्यांनी उत्स्फूर्त प्रतिसाद दिला.  

शिबिरात मोठ्या प्रमाणावर सहभागी झालेल्या महिला हिमोग्लोबिन कमतरतेमुळे रक्तदान करू शकत नसल्याची बाब चिंताजनक असल्याचे मत विहिंप सिंहगड भाग उपाध्यक्षा शुभदा गोडबोले यांनी मांडले तर हिमोग्लोबिन वाढीसाठी तज्ज्ञ डॉक्टरांच्या सल्ल्याने योग्य आहार नियोजन पत्रक लवकरच सर्वांपर्यंत पोहोचवू असे मत विहिंप सिंहगड भाग अध्यक्ष शरद जगताप यांनी व्यक्त केले. यावेळी  मोफत दंत चिकित्सा शिबीर घेण्यात आले. कै. किशोरदादा गोसावी यांच्या स्मरणार्थ दिला जाणारा रक्तदान करंडक सर्वात जास्त रक्तपिशव्या संकलित केल्याबद्दल आनंदनगर केंद्रास देण्यात आला.

भारतीय स्वातंत्र्यदिनाच्या ७५ व्या वर्धापनदिनाच्या निमित्त सुरू केलेला उपक्रम पूर्ण

पुणे : पुणेस्थित द इको फॅक्टरी फाऊंडेशन (टीईएफएफ) या विना-नफा स्वयंसेवी संस्थेची स्थापना आनंद चोरडिया यांनी वर्ष २०१६ मध्ये केली. ही संस्था ग्रामीण, शहरी व औद्योगिक क्षेत्रात शाश्वतता प्राप्त करण्यासाठी अथक कार्यरत आहे. भारतीय स्वातंत्र्यदिनाचा ७५वा वर्धापनदिन साजरा करण्यासाठी आनंद चोरडिया यांनी ७५,०००+ भारतीय वंशाच्या जातींची रोपे / झाडे दान करण्याचा संकल्प केला होता. त्यानुसार टीईएफएफ संस्थेने गेल्या वर्षापासून भारतीय देशी झाडांच्या ३७ जातींची ७५,००० रोपे आदिवासी महिलांकडून बनवून घेऊन, वाढवून ती कंपन्या, शाळा/महाविद्यालये आणि जबाबदार नागरिकांच्या गटाला दान केली आहेत. ह्या उपक्रमामुळे आदिवासी महिलांना रोजगाराचे साधन उपलब्ध झाले आहे. जैववैविध्य जतन करणे व पडीक जमीन सुपीक करणे या उद्देशाने गेल्या १५ ऑगस्टला सुरू झालेला हा उपक्रम नुकताच पूर्ण झाला.

यासंदर्भात प्रतिक्रिया व्यक्त करताना आनंद चोरडिया म्हणाले, “ आपल्या राष्ट्राचे आरोग्य मातीच्या आरोग्यात सामावलेले आहे आणि जोडीलाच कचऱ्यातून संपत्ती व कचऱ्यातून आरोग्य या संकल्पनेवर माझा दृढ विश्वास आहे. त्यामुळे आपण या दिशेने प्रयत्न केले आणि प्रत्येकाला शाश्वत जगण्यासाठी सक्षम बनवले तर देशाला स्वच्छ, हरित, आरोग्यपूर्ण आणि संपन्न बनवू शकतो. भारतीय स्वातंत्र्यदिनाच्या ७५व्या वर्धापनदिनानिमित्त आम्ही आमचा वाटा उचलला ही भावना खूप सुखद आहे. मी आनंदी आणि समाधानी असून यापुढेही खूप काही काम करण्याची अपेक्षा बाळगून आहे.”

या उपक्रमाबाबत अधिक माहिती देताना श्री. चोरडिया म्हणाले, की विविध प्रकल्प संघटितरीत्या राबवण्यासाठी आम्ही आमची कार्यपद्धती चार ‘एस’मध्ये विभागली आहे. हे चार ‘एस’ म्हणजे सेवा, सेतू, सत्त्व आणि संवर्धन. यातून शाश्वत जीवनशैली आणि प्रथा अंगिकारण्याचा आमचा हेतू आहे.” फाऊंडेशनने विविध ठिकाणे, संस्था व खासगी शेतांमध्ये रोपांचे वितरण हाती घेतल्याचे त्यांनी नमूद केले.

प्रत्येक व्यक्तीत आरोग्यपूर्ण जीवनशैली रुजवण्यासाठी प्रत्येकाला शाश्वत जीवन सक्षमीकरणाचा प्रवर्तक बनवणे आणि समाज, पृथ्वी व संपन्नता यासाठीच्या पारंपरिक पण अभिनव पद्धतींची जोपासना करणे, हे श्री. चोरडिया यांचे उद्दिष्ट आहे. धरतीला हिरवीगार बनवणे, जैवविविधतेत सुधारणा व संवर्धन आणि भारतीय देशी वृक्षांचे संवर्धन यासाठी आम्ही अथक काम करत आहोत, असेही त्यांनी बोलून दाखवले.

‘द इको फॅक्टरी फाऊंडेशन’ने ग्रामीण, शहरी, औद्योगिक व वैयक्तिक शाश्वतता या चार मूलभूत क्षेत्रांवर लक्ष केंद्रित केले असून त्यासाठी मोहिम सुरू केली आहे. त्याचे उद्देश पुढीलप्रमाणे –  

अ) नागरी व औद्योगिक क्षेत्रांत बहुशाखीय मार्गाने जीवनाच्या शाश्वत पद्धतीचा प्रसार करणे.

ब) भारतातील पहिल्या  कचरा  व्यवस्थापन  वाटिकेच्या  पर्यावरण  उद्योजकतेला  मदत व प्रसार करणे

क) शाश्वत  भारत  कृषी  रथाच्या  माध्यमातून  ग्रामीण  पातळीवर  व्यवसाय  संधी  निर्माण  करणे 

ड) शून्य हरितगृह वायू उत्सर्जनाचे (नेट झिरो) लक्ष्य गाठणे.

पुणे, दि. २७: पेरणे फाटा येथे १ जानेवारी २०२३ रोजी आयोजित जयस्तंभ अभिवादन सोहळा शासनाच्या सर्व यंत्रणांनी मिळून यशस्वी करावा; कार्यक्रमासाठीची पूर्वतयारी वेळेत पूर्ण करावी, असे निर्देश जिल्हाधिकारी डॉ.राजेश देशमुख यांनी दिले.

जिल्हाधिकारी कार्यालयात आयोजित आढावा बैठकीत ते बोलत होते. बैठकीस अतिरिक्त पोलीस आयुक्त रंजन कुमार शर्मा, पोलीस अधीक्षक अंकित गोयल, प्र.मुख्य कार्यकारी अधिकारी चंद्रकांत वाघमारे, निवासी उपजिल्हाधिकारी हिम्मत खराडे आदी उपस्थित होते.

डॉ.देशमुख म्हणाले, कार्यक्रमादरम्यान स्वच्छतेची चांगली सुविधा राहील याकडे विशेष लक्ष द्यावे, त्यासाठी अतिरिक्त मनुष्यबळ नियुक्त करावे. आरोग्य विभागाने मास्क वाटपाची सुविधा करावी. शौचालयांची नियमित स्वच्छता होईल आणि पिण्याच्या पाण्याची उपलब्धता राहील याकडे विशेष लक्ष द्यावे. कार्यक्रमाच्या दिवशी सर्व संबंधित यंत्रणांनी नियंत्रण कक्षाच्या संपर्कात रहावे, असे त्यांनी सांगितले.

अभिवादन सोहळ्यासाठी १ हजार ५०० शौचालयांची व्यवस्था करण्यात आली असून १५० अतिरिक्त कर्मचारी स्वच्छतेसाठी नियुक्त करण्यात आले आहेत. रस्त्यावर ठिकठिकाणी कचराकुंडी ठेवण्यात येणार आहे. २१ आरोग्य पथकात २४० कर्मचारी, ४१ रुग्णवाहिका, बाईक ॲम्ब्युलन्स, ३८ घंटागाडी, १० अग्निशमन वाहन, १७५ कचारकुंड्यांची व्यवस्था करण्यात आल्याची माहिती यावेळी देण्यात आली. बैठकीस विविध विभागांचे वरिष्ठ अधिकारी उपस्थित होते.