पुणे,: सामाजिक न्याय विभागामार्फत अनुसुचित जाती घटकात चर्मकार समाजातील गटई काम करणाऱ्या कामगारांसाठी पत्र्यांचे स्टॉल देण्याची योजना राबवण्यात येत असून त्यासाठी ३१ जानेवारी २०२३ पर्यंत अर्ज करण्याचे आवाहन करण्यात आले आहे.

चर्मकार समाजातील गटई काम (चामड्याच्या वस्तू दुरुस्ती व पादत्राणे दुरुस्ती) करणाऱ्या व्यक्तीस रस्त्याच्या कडेला ऊन व पावसापासून संरक्षण होण्यासाठी १०० टक्के अनुदानावर ४ फूट लांबीx ५ फूट रुंदीx ६.५ फूट उंची या आकाराचा पत्र्याचा स्टॉल शासनाकडून देण्यात येतो.

या योजनेचा लाभ घेण्यासाठी अर्जदार अनुसूचित जाती प्रवर्गातील असावा व त्याबाबतचे जातीचे प्रमाणपत्र जोडावे. अर्जदाराचे वय १८ ते ६० वर्षादरम्यान असावे व वार्षिक उत्पन्न नागरी भागासाठी ५० हजार रुपयांपेक्षा कमी तर ग्रामीण भागासाठी ४० हजार रुपयांपेक्षा कमी असावे. उत्पनाचा दाखला सोबत जोडणे आवश्यक आहे. स्टॉल ठेवण्यासाठी स्वत:ची जागा असावी किंवा नगर परिषद, महानगरपालिका जागेमध्ये ठेवण्यासाठी ना- हरकत प्रमाणपत्र असावे. तसेच स्टॉल विकणार नसल्याचे हमीपत्रही अर्जासोबत जोडणे आवश्यक आहे.

इच्छुकांनी मुदतीत सहाय्यक आयुक्त, समाज कल्याण कार्यालय, सामाजिक न्याय भवन, सर्वे नं. १०४/१०५. विश्रावाडी पोलिस स्टेशनच्या समोर येरवडा, पुणे ४११००६ (दूरध्वनी क्र. ०२०-२९७०६६११) येथे अर्ज करावा, असे आवाहन समाज कल्याणच्या सहायक आयुक्त संगिता एन. डावखर यांनी केले आहे.

                                             
पिंपरी-देशामध्ये कोरोनाची तिसरी लाट येण्याची शक्यता कमी आहे. पण आवश्यक ती काळजी घेणे आवश्यक आहे असे डॉ. रवी गोडसे (अमेरिका)यांनी सांगितले. १८ व्या जागतिक मराठी संमेलनातील ” जागतिक आरोग्य व्यवस्था आणि भारत” या परिसंवादात ते बोलत होते.
   आय. सी. एम. आर.चे माजी संचालक पद्मश्री डॉ. रमण गंगाखेडकर, डॉ. श्रीकांत चिंचालकर(कॅनडा), डॉ. रवी गोडसे(अमेरिका), डॉ. मकरंद जावडेकर(अमेरिका) हे यामध्ये सहभागी झाले होते. डॉ. शंतनु अभ्यंकर(वाई -सातारा)यांनी सूत्रसंचालन केले.

     आपला देश हा महाशक्ती झाला पाहिजे त्यादृष्टीने प्रयत्न सुरु आहेत. आवश्यक धोरणे राबविण्यात येत असून त्याबरोबर लोक शिक्षणावर भर देण्याची गरज आहे. आपल्या देशात आणखी संशोधन होण्यास वाव आहे. मात्र त्यासाठी प्रशिक्षणाची गरज आहे. त्याकरता मानसिकता तयार केली पाहिजे, असे डॉ. रवी गोडसे म्हणाले.
     डॉ. गंगाखेडकर म्हणाले, कोरोना भारतात आल्यावर रुग्णांची तपासणी करण्यात आपणाला यश आले आहे. त्याचप्रमाणे त्यावर संशोधन करुन लस तयार करण्यात यशस्वी झालो आहोत. पण अजूनही बरेच काम करण्याची गरज आहे.
      डॉ. जावडेकर यांनी सांगितले की, विविध प्रकारच्या औषध उत्पादनात आपल्या देशाने चांगले काम करुन दाखविले आहे आणि त्यावर अधिक संशोधन करण्यात येत आहे. मोठा पुरवठादार देश म्हणून जग आपल्याकडे आकर्षित होत आहे. असे ते म्हणाले.
डॉ. चिंचालकर यांनी मनोगत व्यक्त केले.
    पिंपरीच्या डॉ. डी. वाय. पाटील विद्यापीठाचे कुलपती आणि या संमेलनाचे स्वागताध्यक्ष डॉ. पी. डी. पाटील यांनी सर्व मान्यवरांचा शॉल, स्मृतिचिन्ह व रोपटे देऊन गौरव केला. कार्यक्रमास प्रेक्षकांनी मोठी गर्दी केली होती.

पुणे : पाणी व्यवस्थापनाशी संबंधित तंत्रज्ञान, विकास, नियोजन यासाठी कार्यरत इंडियन वॉटर वर्क्स असोसिएशनचे (आयवा) तीन दिवसीय ५५ वे अखिल भारतीय वार्षिक अधिवेशन २०, २१ व २२ जानेवारी २०२३ रोजी होत आहे. ‘शाश्वत पाणी पुरवठा व सार्वजनिक आरोग्य-सर्वांसाठीची उपलबद्धता’ या संकल्पनेवर देशभरातील तज्ज्ञ या अधिवेशनात विचार मंथन करतील,,” अशी माहिती अधिवेशनाच्या संयोजन समितीचे अध्यक्ष, ‘आयवा’चे उपाध्यक्ष व महाराष्ट्र जीवन प्राधिकरणचे मुख्य अभियंता सुभाष भुजबळ यांनी पत्रकार परिषदेत दिली. पत्रकार भवन येथे झालेल्या पत्रकार परिषदेवेळी संयोजन समिती उपाध्यक्ष, ‘आयवा’चे राष्ट्रीय सरसचिव डॉ. डी. बी. पानसे, महाराष्ट्र जीवन प्राधिकरणाच्या अधीक्षक अभियंता वैशाली आवटे, अनंत नामपूरकर, पराग कश्यप, अनिल कुलकर्णी, शिवराज कुलकर्णी, राजेंद्र आंटद, दिलीप पंडित, दीपक म्हस्के आदी उपस्थित होते.
सुभाष भुजबळ म्हणाले, “हडपसर येथील मेस्से ग्लोबल (लक्ष्मी लॉन्स) पुणे येथे २० जानेवारीला राज्याचे पाणीपुरवठा मंत्री गुलाबराव पाटील व पुण्याचे पालकमंत्री चंद्रकांत पाटील यांच्या हस्ते या अधिवेशनाचे उद्घाटन होणार आहे. विविध सत्रात तज्ज्ञ विचार मांडतील. त्यासोबतच पाणीपुरवठा क्षेत्रात उल्लेखनीय कार्य करणाऱ्या व्यक्तींचा सन्मान केला जाणार आहे. लखनौ येथील इंजि. अनिल कुमार गुप्ता यांना ‘जलनिर्मलता’, शासकीय अभियांत्रिकी महाविद्यालय पुणे येथील डॉ. पराग सादगीर यांना ‘जलसेवा’ पुरस्कार, तर लखनौ येथील पल्लवी राय यांना युवा महिला अभियंता म्हणून ‘ब्रिज नंदन शर्मा पुरस्कार’ देऊन सन्मानित केले जाणार आहे. यासह इतर पुरस्कारांचे वितरण या अधिवेशनात होणार आहे.”
डॉ. डी. बी. पानसे म्हणाले, “संयुक्त राष्ट्राच्या पर्यावरण कार्यक्रमाचे माजी संचालक डॉ. राजेंद्र शेंडे व सावित्रीबाई फुले पुणे विद्यापीठाचे माजी कुलगुरू डॉ. नितीन करमाळकर यांचे वातावरणातील बदलांचे पाण्यावर होणारे परिणाम यावर व्याख्यान होईल. तरुणांना उद्योगासाठी चालना देणाऱ्या उद्योजकता विकास कार्यशाळेचे आयोजन केले असून, त्यामध्ये सायन्स अँड टेक्नॉलॉजी पार्कचे महासंचालक डॉ. राजेंद्र जगदाळे, पुणे पालिकेच्या सहआयुक्त पूनम मेहता, शास्त्रज्ञ डॉ. पवन लाभशेटवार, युनिसेफ इंडियाचे युसूफ कबीर, महाराष्ट्र प्रदूषण नियंत्रण मंडळाचे वैज्ञानिक अधिकारी डॉ. अमर सुपाते, मुख्य अभियंता सुभाष भुजबळ, एम. मॅथियालगन आदी मार्गदर्शन करणार आहेत. युनिसेफ आणि स्थानिक संस्थांच्या सहकार्याने हे सत्र होत आहे.”
“या परिषदेत ‘हर घर जल : आव्हाने व उपाय’, ‘ग्रामीण व शहरी भागासाठी चोवीस तास पाणीपुरवठा’, शहरी व ग्रामीण भागातील सांडपाणी नियोजन’, मानवी विष्ठेचे नियोजन/व्यवस्थापन’, ‘जलशुद्धीकरण व मैलापाणी शुद्धीकरण’, ‘यंत्रणांचे संचलन व देखभाल’, ‘जलस्रोतांचे व्यवस्थापन’ आदी विषयांवर विचारमंथन होईल. यासह ‘जलजीवन अभियान’ व ‘अमृत’ ही विशेष सत्रे व युरोप, जपान आणि ब्रिटन येथील तज्ज्ञांचे ‘संशोधन व विकास तंत्रज्ञानाचे आदानप्रदान’वर आंतरराष्ट्रीय चर्चासत्र, तरुणाईसाठी पाणी क्षेत्राशी निगडित पोस्टर स्पर्धा, तज्ज्ञ व अनुभवी व्यक्तींचे शोधनिबंध सादरीकरण असा भरगच्च कार्यक्रम आखण्यात आला आहे. अत्याधुनिक यंत्रे, उपकरणे व तांत्रिक माहिती असलेल्या १४२ स्टॉल्सचे प्रदर्शन असणार आहे. भारतासह परदेशातून ११०० पेक्षा अधिक अभियंता प्रतिनिधी, तर १५० हुन अधिक युवकांनी सहभागासाठी नोंदणी केली आहे. प्रशासनातील विविध अधिकारी, आंतरराष्ट्रीय पातळीवरील तज्ज्ञ व्यक्ती या परिषदेला प्रमुख पाहुणे म्हणून उपस्थित राहणार आहेत,” डॉ. डी. बी. पानसे यांनी नमूद केले.
इंडियन वॉटर वर्क्स असोसिएशन विषयी:इंडियन वॉटर वर्क्स असोसिएशन देशातील ३६ केंद्रांद्वारे पाणी पुरवठा व सार्वजनिक आरोग्य विभागाशी संबधित १२ हजार व्यक्तींच्या माध्यमातून शहरी व ग्रामीण, औद्योगिक व कृषी, जलशुद्धीकरण यावर काम करत आहे. पाणी पुरवठा व जलस्वच्छता यावर संस्था अद्ययावत तंत्रज्ञान, माहिती पुस्तिका, मार्गदर्शक सूचना आदी माध्यमातून प्रसार व जागृती करत आहे. पाणी व संबंधित क्षेत्राशी निगडित व्यावसायिक, तंत्रज्ञ, सल्लागार, यांना एकाच व्यासपीठावर चर्चा व विचारमंथन तसेच तंत्रज्ञानाची देवाणघेवाण करून समस्यांचे निराकरण, दूरगामी परिणाम साधणाऱ्या उपायोजना सुचविण्यासाठी ही वार्षिक परिषद महत्वपूर्ण असते.

पुणे- पालघरच्या तन्वी पोस्तुरे हिने ५३ किलो गटात सुवर्णपदक जिंकून महिलांच्या तायक्वांदो स्पर्धेत चमकदार यश मिळविले. अन्य गटात रागिणी जयस्वार (४९ किलो) व आकांक्षा बोरकर (५७ किलो) यांना सुवर्णपदक मिळाले.

शिवछत्रपती क्रीडा नगरीत सुरू असलेल्या या स्पर्धेत
पोस्तुरे हिने ५३ किलो गटाच्या अंतिम फेरीत पुण्याच्या श्रुती शेटे हिच्यावर मात केली. या गटात श्रुती शिर्के (मुंबई( व विद्या नागपूरे (नागपूर) यांना ब्रॉंझपदक मिळाले. ४९ किलो गटाच्या अंतिम फेरीत रागिनी हिने पालघर संघाची खेळाडू माही निपाणकर हिचा पराभव केला. भक्ती चव्हाण सातारा व अपूर्वा देसाई रायगड यांना ब्रॉंझपदक मिळाले.
महिलांच्याच ५७ किलो गटात पुण्याची आकांक्षा बोरकर हिने सोनेरी कामगिरी करताना रायगडच्या जयश्री गोसावी हिचा पराभव केला.‌ धृती हाते (मुंबई) व सपना मोरे (सातारा) यांनी ब्रॉंझपदक जिंकले.

पुणे, 7 जानेवारी: नागपूरच्या स्नेहल आणि संजना या जोशी भगिनींनी शनिवारी येथील बालेवाडी स्टेडियमवर महाराष्ट्र राज्य ऑलिम्पिक 2023 मध्ये अनुक्रमे सुवर्ण आणि रौप्य पदक जिंकून राज्यातील ट्रायथलॉन स्पर्धेत आपले वर्चस्व सिद्ध केले.

गेल्या वर्षी नेपाळमधील आशियाई ट्रायथलॉन चषक स्पर्धेत भाग घेतलेल्या जोशी भगिनींनी, जलतरण आणि सायकलिंग फेरीनंतर झालेल्या धावण्याच्या शर्यतीनंतर पुण्याच्या मानसी मोहितेला पिछाडीवर टाकले.

वर्ध्याच्या अंगद इंगळेकरने पुरुषांच्या ट्रायथलॉन क्रमवारीत पुण्याच्या पार्थ मिरगे आणि कोल्हापूरच्या हृषीकेश पाटील यांना मागे टाकत अव्वल स्थान पटकावले.

तलवारबाजी स्पर्धेचे आयोजन करणाऱ्या औरंगाबादमध्ये, स्थानिक खेळाडू सय्यद अंबीर आणि वैदेही लोहिया यांनी अनुक्रमे पुरुष आणि महिला फॉइल प्रकारात सुवर्णपदके जिंकली. अंबीरने पुरुषांच्या अंतिम फेरीत त्याचा सहकारी तेजस पाटीलचा पराभव केला तर लोहियाने महिलांच्या अंतिम लढतीत मुंबईच्या वैभवी इंगळेचा पराभव केला.

अमरावती येथे झालेल्या तिरंदाजी प्रकारात नाशिकच्या पुरुष आणि अमरावतीच्या महिलांनी रिकर्व्ह सांघिक सुवर्णपदके जिंकली, तर पुण्याच्या पुरुष आणि महिलांनी कंपाउंड प्रकारात दोन्ही सुवर्णपदके जिंकली.

फुटबॉल स्पर्धेत, पुण्याचे पुरुष आणि महिला दोन्ही संघ संबंधित अंतिम फेरीत पोहोचल्यानंतर दुहेरी मुकुट मिळवण्याचे उद्दिष्ट असेल.

पुण्याच्या पुरुषांनी मुंबईचा 2-1 असा पराभव करून अंतिम फेरी गाठली. त्यांच्यापुढे कोल्हापूरचे आव्हान असणार आहे. अन्य उपांत्य फेरीत कोल्हापूर संघाने पालघरचा 4-0 असा पराभव केला.
ठाणे महिला संघाने नागपूरचा ३-० असा पराभव करत टेबल टेनिस सांघिक विजेतेपद पटकावले.

सविस्तर निकाल

धनुर्विद्या:
पुरुष:
रिकर्व्ह: सुवर्ण: नाशिक, रौप्य: उस्मानाबाद, कांस्य: बुलढाणा
कंपाऊंड : सुवर्ण : पुणे, रौप्य : सातारा, कांस्य : अकोला
महिला:
रिकर्व्ह: सुवर्ण: अमरावती, रौप्य: नाशिक, कांस्य: अ’नगर
सुवर्ण: पुणे, रौप्य: नागपूर, कांस्य: बुलढाणा

कुंपण
पुरुष:

फॉइल : सुवर्ण : सय्यद अंबीर (औरंगाबाद), रौप्य : तेजस पाटील (औरंगाबाद), कांस्य : अनिल महिपती (कोल्हापूर), आदित्य राठोड (मुंबई)
इप्पे : सुवर्ण : गिरीश जकाते (सांगली), रौप्य : प्रथमकुमार शिंदे (कोल्हापूर), कांस्य : यश वाघ (औरंगाबाद), सौरभ तोमर (भंडारा)

महिला:
फॉइल : सुवर्ण : वैदेही लोहिया (औरंगाबाद), रौप्य : वैभवी इंगळे (मुंबई), कांस्य : अनिता साळोखे (कोल्हापूर), ज्योती सुतार (कोल्हापूर)
इप्पे : सुवर्ण : ज्ञानेश्वरी शिंदे (लातूर), रौप्य : माही अरदवाड (लातूर), कांस्य : हर्षदा वडते (औरंगाबाद), वैष्णवी कोडलकर (अ’नगर)
फुटबॉल (उपांत्य फेरी)
पुरुष: पुणे (नरशिमा मगम, रोमॅरियो नाझरेथ) वि.वि मुंबई (मार्क डिसोझा पेनल्टी) 2-1;

कोल्हापूर (सतेज साळोखे, संकेत साळोखे, करण चव्हाण)३-० वि.वि नागपूर

महिला: मुंबई (सानिया पाटील स्वयं गोल, भूमिका माने) २-० वि.वि कोल्हापूर;
पुणे (दिव्या पावपा, सुमैय्या शेख ३ गोल) ४-० वि.वि. पालघर .

टेबल टेनिस (अंतिम फेरी):
महिला
संघ : ठाणे वि.वि नागपूर ३-०
कांस्यपदक विजेते: पुणे आणि नाशिक

ट्रायथलॉन
मुले : अंगद इंगळेकर (वर्धा), २. पार्थ मिरगे (पुणे), ३. हृषीकेश पाटील (कोल्हापूर)

मुली : १. स्नेहल जोशी (नागपूर), २. संजना जोशी (नागपूर), ३. मानसी मोहिते (पुणे)

बारामती- विजेतेपदासाठी दावेदार असलेल्या पुणे संघाने रायगड व मुंबई उपनगर यांच्यासह राज्य मिनी ऑलिंपिक क्रीडा स्पर्धेतील महिलांच्या गटात आगेकूच कायम राखली.

तुळजाराम चतुरचंद महाविद्यालयात सुरू असलेल्या या स्पर्धेत पुणे संघाने नागपूर संघाचा ५२-१४ असा धुव्वा उडविला. मध्यंतराला ३६-५ अशी आघाडी घेत त्यांनी आपला विजय निश्चित केला होता. त्याचे श्रेय आम्रपाली गलांडे व अंकिता जगताप यांच्या चतुरस्त्र खेळास द्यावे लागेल. मुंबई उपनगर संघाने आपले पारंपारिक प्रतिस्पर्धी असलेल्या मुंबई शहर संघाला ४८-३६ असे पराभूत केले.‌ त्यावेळी पूर्वार्धात त्यांनी २३ विरुद्ध १७ अशी सहा गुणांची आघाडी घेतली होती. मुंबई उपनगर संघाकडून हरदीप कौर, याशिका पुजारी व प्रांजल पवार यांनी अष्टपैलू खेळ केला.‌ मुंबई शहर संघाकडून मेधा कदम व प्रतीक्षा तांडेल यांचे प्रयत्न अपुरे ठरले.
रायगड संघाने अमरावती संघावर ३३-१९ अशी मात केली त्यावेळी पूर्वार्धात त्यांच्याकडे १८-१० अशी आघाडी होती. रायगड संघाच्या या विजयाचे श्रेय तेजा सकपाळ व रचना मात्रे यांच्याकडे द्यावे लागेल. अमरावती संघाकडून बरखा गेडाम व मंगला राऊत यांनी दिलेली लढत अपुरी ठरली.‌
पुरुष गटात मुंबई शहर संघाने विजयी वाटचाल कायम राखताना धुळे संघावर ४६-१६ असा दणदणीत विजय नोंदविला त्यावेळी मध्यंतराला त्यांनी ३१-१० अशी भक्कम आघाडी घेतली होती. मुंबई शहर संघाच्या या विजयात सुशांत नाईक व मयूर शिवतीर्थकर यांचा महत्त्वाचा वाटा होता. धुळे संघाकडून दिनेश अहिरराव याची लढत एकाकी ठरली.

पुणेकरांचा उत्स्फूर्त प्रतिसाद

पुणे, दि.७: पुण्यात होणाऱ्या ‘जी-२०’ परिषदेबाबत नागरिकांमध्ये जागृती व्हावी या उद्देशाने पुणे महापालिका सायकल क्लबतर्फे सायकल फेरीचे आयोजन करण्यात आले.महापालिकेचे अतिरिक्त आयुक्त रवींद्र बिनवडे, डॉ. कुणाल खेमनार आणि विकास ढाकणे यांनी झेंडा दाखवून या फेरीचा शुभारंभ केला.

सायकल फेरीच्या माध्यमातून ‘जी-२०’ बाबत तसेच पर्यावरण विषयक जनजागृती करण्यात आली. महापालिका मुख्य भवनापासून सुरू झालेली सायकल फेरी जंगली महाराज रस्ता, लोकमान्य टिळक रस्ता, थोरले बाजीराव रस्ता, शनिवार वाडा आणि पुन्हा महानगरपालिका इमारत अशा मार्गाने पूर्ण करण्यात आली.

सुमारे पंधराशे सायकलप्रेमी नागरिक या सायकल फेरीत सहभागी झाले. पुणे महापालिकेचे सर्व विभाग प्रमुखदेखील या सायकल फेरीत सहभागी झाले होते.या सायकल फेरीचे नियोजन पुणे महानगरपालिका सायकल क्लबचे मुख्य समन्वयक सुरेश परदेशी आणि महापालिकेचे उपायुक्त (क्रीडा) संतोष वारुळे यांनी केले.
000