पुणे, दि. १२ जानेवारी २०२३:यंदाच्या विद्युत सुरक्षा सप्ताहाचा प्रारंभ करताना महावितरणच्या पुणे परिमंडलामध्ये सकारात्मक व्याख्यानाची जोड देण्यात आली. बुधवारी (दि. ११) सायंकाळी सीओईपी टेक्नॉलॉजी विद्यापीठाच्या सभागृहात आयोजित कार्यक्रमात प्रसिद्ध लेखक व माईंड पॉवर ट्रेनर डॉ. दत्ता कोहिनकर यांचे व्याख्यान झाले. तसेच मुख्य अभियंता श्री. राजेंद्र पवार यांच्या प्रमुख उपस्थितीत सुमारे ८०० अधिकारी, कर्मचाऱ्यांची विद्युत सुरक्षेची शपथ घेतली व विद्युत सुरक्षा सप्ताहाला प्रारंभ करण्यात आला.

पुणे परिमंडलातील विविध संवर्गातील निवडक कर्मचाऱ्यांसाठी डॉ. दत्ता कोहिनकर यांचे ‘मनाची मशागत व सकारात्मकता’ या विषयावर व्याख्यान आयोजित करण्यात आले होते. ते म्हणाले, अंतर्मनात सकारात्मक विचार कायम ठेवले तर त्याचप्रमाणे कृती घडत जाते. नकारात्मक विचारांनी कृती देखील नकारात्मक होते. त्यामुळे आयुष्यात अडचणी व ताणतणाव वाढण्यास सुरवात होते. आरोग्यासोबतच कौटुंबिक स्वास्थ्य सुद्धा बिघडत जाते. एकाकीपणा येतो. आयुष्य उदास होते. त्यामुळे कौटुंबिक आणि नोकरीतील कर्तव्य व जबाबदाऱ्यांकडे जाणता अजाणता दुर्लक्ष होते. हे सर्व टाळून कोणतेही आव्हान स्वीकारणे व ते यशस्वी करणे यासाठी मनातील सकारात्मक विचार हेच खरे पाठबळ आहे असे डॉ. कोहिनकर यांनी सांगितले. त्यांच्या संपूर्ण व्याख्यानाला अधिकारी व कर्मचाऱ्यांनी भरभरून प्रतिसाद दिला.

यावेळी मुख्य अभियंता श्री. राजेंद्र पवार म्हणाले, की वीजग्राहकांना उत्कृष्ट तसेच तत्पर व आपुलकीची सेवा देणे महावितरणचे कर्तव्य आहे. त्यासाठी प्रत्येकाच्या मनात सकारात्मक विचार रूजवणे महत्त्वाचे आहे. मनाची एकाग्रता व सजगता कायम ठेवून प्रत्येक काम सकारात्मकतेने केले पाहिजे. त्यातून कामाचा आनंद मिळतो, मानसिक समाधान मिळते. सोबतच वीज यंत्रणेच्या दुरुस्तीचे काम करताना तांत्रिक कर्मचाऱ्यांनी सुरक्षा साधनांचा वापर केलाच पाहिजे. सतर्क राहून सर्व खबरदारी घ्यावी. तसेच संबंधित कार्यक्षेत्रातील नागरिकांना विद्युत सुरक्षेबाबत माहिती द्यावी असे आवाहन श्री. पवार यांनी केले.

या कार्यक्रमात विद्युत सुरक्षेची शपथ घेण्यात आली. यावेळी अधीक्षक अभियंते सर्वश्री प्रकाश राऊत व सतीश राजदीप, सहायक महाव्यवस्थापक सौ. माधुरी राऊत (वित्त व लेखा) व श्रीमती ज्ञानदा निलेकर (मानव संसाधन), उपमुख्य औद्योगिक संबंध अधिकारी श्री. शिरीष काटकर तसेच परिमंडलातील अभियंता, अधिकारी व कर्मचारी उपस्थित होते. कार्यक्रमाचे सूत्रसंचालन डॉ. संतोष पटनी यांनी केले व आभार मानले. महावितरणच्या विद्युत सुरक्षेचा जागर येत्या २५ जानेवारीपर्यंत सुरू राहणार आहे. यामध्ये सर्व तांत्रिक कर्मचाऱ्यांना प्रशिक्षण वर्गांचे तसेच नागरिक तसेच विद्यार्थ्यांसाठी प्रबोधनपर जनजागरण उपक्रमांचे आयोजन करण्यात आले आहेत. 

‘सीओईपी’कडून राजेंद्र पवार यांचा गौरव – सीओईपी टेक्नॉलॉजी विद्यापीठाच्या वतीने कुलगुरू प्रा. मुकुल सुतावणे यांच्याहस्ते या विद्यापीठाचे माजी विद्यार्थी व मुख्य अभियंता श्री. राजेंद्र पवार यांचा गौरव करण्यात आला. सामाजिक बांधिलकी जपणारे श्री. पवार यांचा विद्यापीठाला अभिमान आहे. महावितरण व विद्यापीठाच्या संयुक्त सहकार्याने वीज क्षेत्रातील विविध अभ्यासक्रमांना चालना दिली जाईल असे कुलगुरू प्रा. सुतावणे यांनी सांगितले.

न-हे येथील जाधवर ग्रुपच्या इन्स्टिटयूट आॅफ नर्सिंग व डॉ.सुधाकरराव जाधवर कॉलेज आॅफ पॅरामेडिकल यांच्यातर्फे राष्ट्रीय युवा दिनानिमित्त आयोजन
पुणे : आम्ही व्यसन करणार नाही आणि इतरांनाही करु देणार नाही, अशी शपथ घेत दारु, गुटखा, चरस, सिगारेट, गांजा अशा व्यसनांच्या प्रतिकात्मक राक्षसाचे दहन करण्यात आले. व्यसनाधिनतेकडे वळणा-या तरुणाईला त्यापासून परावृत्त करण्यास प्रयत्न करु, असा निर्धार करीत नर्सिंगच्या विद्यार्थ्यांनी राष्ट्रीय युवा दिन साजरा केला. व्यसनमुक्त युवा… व्यसनमुक्त भारताचा संकल्प देखील यावेळी करण्यात आला. 
जाधवर ग्रुप च्या इन्स्टिटयूट आॅफ नर्सिंग व डॉ.सुधाकरराव जाधवर कॉलेज आॅफ पॅरामेडिकल यांच्यातर्फे राष्ट्रीय युवा दिनानिमित्त व्यसनांच्या प्रतिकात्मक राक्षसाचे दहन व शपथ कार्यक्रमाचे आयोजन न-हे येथील संस्थेच्या प्रांगणात करण्यात आले. यावेळी इन्स्टिटयूटचे अध्यक्ष प्राचार्य डॉ.सुधाकर जाधवर, उपाध्यक्ष अ‍ॅड.शार्दुल जाधवर, इन्स्टिटयूट आॅफ नर्सिंगच्या शितल निकम, अनुश्री पारधी, श्वेता कुंभार उपस्थित होते. महाविद्यालयातील नर्सिंगच्या विद्यार्थीनी या उपक्रमात सहभागी झाल्या होत्या.
अ‍ॅड.शार्दुल जाधवर म्हणाले, व्यसनांच्या विळख्यात अडकणा-या मुलांच्या संख्येइतकेच मुलींचेही प्रमाण वाढत आहे. त्यामुळे व्यसनांपासून सर्वांनी परावृत्त व्हावे, याकरीता आम्ही नर्सिंग कॉलेजच्या माध्यमातून प्रयत्न करीत आहोत. नर्सिंगच्या माध्यमातून पुढे या महाविद्यालयातील विद्यार्थीनी रुग्णसेवा करतात. परंतु व्यसनापासून दूर राहिल्यास आरोग्य खराब होणार नाही, हे तरुणाईला समजावे, याकरीता असे उपक्रम राबविले जातात. व्यसनमुक्त युवा…व्यसनमुक्त भारत हे ब्रीद अंगिकारुन व्यसनमुक्तीचा संदेश सर्वत्र देण्याचा संस्थेचा प्रयत्न असल्याचेही त्यांनी सांगितले.

पुणे , 12 जानेवारी 2023

गेल्या काही वर्षात भारतामध्ये  डिजिटल क्रांती घडून आली असून अशा वेळी जी 20 सारख्या संघटनेचे अध्यक्षपद भारताकडे येणे फार महत्वपूर्ण असल्याचे आंतरराष्ट्रीय घडामोडींचे अभ्यासक डॉ शैलेंद्र देवळाणकर यांनी आज पुण्यात बोलताना सांगितले.

पुण्यात होत असलेल्या जी 20 परिषद बैठकीच्या जनजागृतीसाठी आणि राजमाता जिजाऊ त्याचबरोबर स्वामी विवेकानंद जयंतीनमित्त आज भव्य मोटारसायकल रॅली चे आयोजन करण्यात आले होते . या रॅली चा समारोप सावित्रीबाई फुले पुणे विद्यापीठात झाला . यावेळी भारताचे जी 20 अध्यक्षपद , संधी ,आव्हाने आणि युवकांची भूमिका या विषयावर श्री देवळाणकर यांनी उपस्थितांना मार्गदर्शन केले.

आपल्या देशातील युवकांमुळे देशाची ही प्रगती झाली असून स्टार्ट अप, मेक इन् इंडिया, आत्मनिर्भर भारत यासारख्या योजना यशस्वी होत असल्याचे श्री देवळाणकर यावेळी म्हणाले . भारताची प्रगती दाखवण्याचे जी 20 हे प्रमुख माध्यम असून या संघटनेचे अध्यक्ष पद ही भारताला मिळालेली एक मोठी संधी असल्याचे त्यांनी सांगितले .

21 व्या शतकात भारत जागतिक महासत्ता बनणार असून देशातील प्रत्येक युवक या देशाचा राजदूत बनला पाहिजे , त्यासाठी तरुणांनी आपली स्वप्ने देशाच्या विकासाशी जोडली पाहिजेत असे आवाहन देवळाणकर यांनी यावेळी केले . जागतिक पातळीवरील अनेक महत्वाच्या संघटनांना जी २० देशांची ही संघटना महत्व पूर्ण निर्देश देत असून संपूर्ण जग त्यांचे पालन करीत असल्याने या संघटनेचे अध्यक्ष पद भारताकडे येणे ही फार मोलाची गोष्ट असल्याचे ते म्हणाले.

कार्यक्रमाचे प्रास्ताविक राष्ट्रीय सेवा योजनेच्या राज्य सल्लागार समितीचे सदस्य राजेश पांडे यांनी केले तर प्र कुलगुरू संजीव सोनवणे यांनी आभार मानले. कार्यक्रमाला महापालिकेचे अतिरिक्त आयुक्त विकास ढाकणे , उपायुक्त संतोष वारुळे यांच्यासह विद्यापीठ अधिसभेचे सदस्य उपस्थित होते .

तत्पूर्वी आज सकाळी पुण्यातील ऐतिहासिक लाल महाला मध्ये राजमाता जिजाऊ यांच्या पुतळ्याला पुष्पहार अर्पण करून जनजागृती रॅलीला प्रारंभ झाला . पुणे महापालिकेचे आयुक्त विक्रम कुमार , विद्यापीठाचे कुलगुरू डॉ . कारभारी काळे यांच्यासह अनेक मान्यवर यावेळी उपस्थित होते . बाईक रॅली मध्ये शहरातील तरुणाई मोठ्या संख्येने सहभागी झाली होती .सर्वसामान्य पुणेकरांनी देखील रस्त्याच्या दुतर्फा उभे राहून या रॅली ला उत्स्फूर्त प्रतिसाद दिला .
 

चोविसाव्या राष्ट्रीय बंधुता साहित्य संमेलनाचे उद्घाटन
पुणे, ता. १२ : “आज समाज विविध जाती आणि धर्मामध्ये विभागला आहे. अशावेळी बंधुतेची पताका हाती घेऊन समानतेच्या पांडुरंगाचे दर्शन घेण्याची आस असलेले वारकरी घडविले पाहिजेत. दिवसेंदिवस दुभंगत चाललेल्या समाजामध्ये पुन्हा एकसंधपणा आणायचा असल्यास बंधुतेचा विचार खोलवर रुजविण्याची गरज आहे,” असे प्रतिपादन चोविसाव्या राष्ट्रीय बंधुता साहित्य संमेलनाचे अध्यक्ष, ज्येष्ठ साहित्यिक शंकर आथरे यांनी केले.

राष्ट्रीय बंधुता साहित्य परिषद आणि औंध येथील रयत शिक्षण संस्थेचे डॉ. बाबासाहेब आंबेडकर महाविद्यालय या संस्थाच्या वतीने नवी पेठेतील एस. एम. जोशी सभागृहात ज्येष्ठ साहित्यिक शंकर आथरे यांच्या अध्यक्षतेखाली हे संमेलन होत आहे. बंधुतेची ज्योत प्रज्वलित करून संमेलनाचे उद्घाटन झाले. यावेळी संमेलनाचे उद्घाटक प्रसिद्ध साहित्यिक सायमन मार्टिन, राष्ट्रीय बंधुता साहित्य परिषदेचे संस्थापक अध्यक्ष बंधुताचार्य प्रकाश रोकडे, स्वागताध्यक्ष दंतरोपण तज्ज्ञ डॉ. विजय ताम्हाणे, निमंत्रक डॉ बाबासाहेब आंबेडकर महाविद्यालयाचे प्राचार्य डॉ. अरुण आंधळे, ज्येष्ठ विचारवंत प्रकाश जवळकर, लेखक-कवी चंद्रकांत वानखेडे, संयोजक व मराठी विभाग प्रमुख प्रा. प्रभंजन चव्हाण उपस्थित होते.
उद्घाटनावेळी मेघना पाटील (डोंबिवली), दिवाकर जोशी (परळी वै.), रघु देशपांडे (नांदेड), ज्ञानेश्वर शिंदे (कोपरगाव), रघु गरमडे (चंद्रपूर), राजू आठवले (सिल्लोड), रामदेव सित्रे (अकोला), अनुया काळे (मुरबाड) यांना ‘बंधुता शब्दक्रांती साहित्य पुरस्कार’ प्रदान करण्यात आला. दुसऱ्या सत्रामध्ये ज्येष्ठ गझलकार सिराज शिकलगार यांच्या अध्यक्षतेखाली काव्य पंढरी कवी संमेलन झाले. कवी गुलाब राजा फुलमाळी यांना ‘लोककवी वामनदादा कर्डक पुरस्कार’, कवी किशोर भुजाडे यांना ‘लोक गायक प्रल्हाद शिंदे पुरस्कार’ आणि कवी अमोल घाटविसावे यांना ‘पद्मश्री नामदेव ढसाळ काव्य पुरस्कार’ प्रदान करण्यात आले.
शंकर आथरे म्हणाले, “लेखकाने सूक्ष्म निरीक्षणातून मांडणी करत समाज कायम जागता ठेवण्याचे काम केले पाहिजे. चिंतनशील व प्रबोधनात्मक लेखनाने समाजातील संवेदनशील मन घडवतानाच चांगल्या मार्गावर नेण्याचे काम केले पाहिजे. बंधुतेचा विचार जाती-धर्माचा भेद विसरून एकत्रित नांदायला लावण्याची प्रेरणा देतो. महाराष्ट्रात प्रबोधनाचा मोठा वारसा आहे. हा वारसा जपण्याचे काम अशा साहित्य संमेलनामधून होतो. नव्या पिढीमध्ये राष्ट्राभिमान जागृत ठेवत मूल्यशिक्षणाचा प्रचार करणे आणि बंधुता चळवळ अधिक बळकट करण्याचा प्रयत्न आपण करायला हवा.” 
सायमन मार्टिन म्हणाले, “जग घडविण्यामध्ये साहित्यिकांचे मोठे योगदान आहे. आज माणूस जात, धर्म, वर्ण, पंथ, भाषा, प्रांत यामध्ये विभागला गेला आहे. दुसऱ्यांचे अस्तित्व आणि विचार मान्य करायचे नाहीत अशा टोकापर्यंत समाज पोहोचलेला आहे. हा विचार दूर करण्यासाठी बंधुतेचा विचार पुढे आणला पाहिजे. यासाठी अशी संमेलने उपयुक्त ठरतात व त्यातून समाजाच्या संवेदना जागृत राहतात.” 
प्रकाश रोकडे म्हणाले, “साहित्यिक आणि कलावंताची एकच भाषा असते ती म्हणजे देश. आज जाती-धर्माच्या भिंती उभ्या राहिल्यामुळे देशात भयाचे व चिंतेचे वातावरण आहे. देशात पुन्हा एकदा इंग्रजांच्या गुलामगिरीप्रमाणेच व्यवस्थेची गुलामगिरी येते की काय अशी स्थिती असून, सहिष्णुता आणि मानवता धोक्यात आली आहे. या काळामध्ये बंधुता समाजाच्या तळागाळापर्यंत पोहोचविले पाहिजे.”
प्रकाश जवळकर यांनीही मनोगत व्यक्त केले. डॉ. विजय ताम्हाणे यांनी स्वागत केले. डॉ. अरुण आंधळे यांनी प्रास्ताविक केले. संगीता झिंजुर्के यांनी सूत्रसंचालन केले.

रा.स्व.संघाचे महाराष्ट्र प्रांत कार्यवाह डॉ.प्रविण दबडगाव यांची उपस्थिती ; अखिल भारतीय ग्राहक पंचायत व ग्राहक पेठेतर्फे स.प.महाविद्यालय चौकात आयोजन
पुणे : हिंदू धर्म मानवतेचे नाते निर्माण करतो, असे स्वामी विवेकानंद नेहमी सांगायचे. संघटन, शिक्षण व अध्यात्माची जोड देऊन त्यांनी समाजाला दिशा दिली. हे राष्ट्र माझे आहे, ही भावना आपल्यामध्ये असायला हवी, अशी स्वामीजींची धारणा होती. त्यामुळे त्यांच्या विचारांचे अनुकरण करीत आपले राष्ट्र मोठे करण्याचा निर्धार आपण करुया, असे मत रा.स्व.संघाचे महाराष्ट्र प्रांत कार्यवाह डॉ.प्रविण दबडगाव यांनी व्यक्त केले.
अखिल भारतीय ग्राहक पंचायत व ग्राहक पेठेतर्फे स्वामी विवेकानंद जयंतीनिमित्त स.प.महाविद्यालय चौकात अहिल्यादेवी प्रशाला, डी.ई.एस. प्रशालेतील विद्यार्थीनींनी घोषवादन करुन स्वामीजींना अभिवादन केले. यावेळी अखिल भारतीय ग्राहक पंचायतीचे राष्ट्रीय उपाध्यक्ष व ग्राहक पेठेचे कार्यकारी संचालक सूर्यकांत पाठक, संचालक रमेश गोंदकर आदी उपस्थित होते. स्वामी विवेकानंदांच्या पूर्णाकृती पुतळ्याला यावेळी पुष्पहार अर्पण करण्यात आला. 
सूर्यकांत पाठक म्हणाले, सन १९७४ ला ग्राहक पंचायत सुरु झाली. स्वामी विवेकानंदांना आदर्श मानून पंचायतीचे कार्य सुरु झाले. त्यामुळे दरवर्षी हा कार्यक्रम ग्राहक पंचायतीच्या शाखांमध्ये देशभर साजरा केला जातो, असेही त्यांनी सांगितले. घोषवाद्यांवरील देशभक्तीपर गीतांच्या वादनाने आणि भारत माता की जय च्या घोषणांनी परिसर दुमदुमून गेला होता. यावेळी सुधीर पाचपोर यांनी हे वीर विवेकानंद… हे गीत सादर केले. संचालक महेश जोशी यांनी सूत्रसंचालन केले.

एमआयटीमध्ये स्वामी विवेकानंद जयंती साजरी

पुणे, दि. १२ जानेवारी:“युवकांमध्ये असीम शक्ती सामावलेली आहे. त्यांनी सतत धैर्याने, शौर्याने पुढे चालावे. एका  दिवसात वा एका वर्षात यश आपल्या पदरी पडेल अशी अपेक्षा बाळगू नका. सर्वदा प्रामाणिक रहा. स्वतःचे व्यक्तिमत्व, स्वतःचे जीवन हेच शक्तीचे रहस्य आहे.”असे विचार प्रसिद्ध गिर्यारोहक व गिरीप्रेमीचे संस्थापक संचालक उमेश झिरपे यांनी व्यक्त केले.भारताचे महान सुपुत्र स्वामी विवेकानंद यांची १६०वीं जयंती एमआयटी वर्ल्ड पीस युनिव्हर्सिटी आणि द स्टूडेंट कॉन्सिल ऑफ एमआयटी डब्ल्यूपीयूच्या वतीने विद्यापीठात मोठ्या उत्साहात साजरी करण्यात आली.
एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ. विश्वनाथ दा. कराड अध्यक्षस्थानी होते. तसेच गिरीप्रेमी उषःप्रभा पागे, डब्ल्यूपीयूचे कुलगुरू डॉ. आर.एम.चिटणीस, संस्कृतचे गाढे अभ्यासक पं. वसन्तराव गाडगीळ, डॉ. संजय उपाध्ये, डॉ. मृदुला कुलकर्णी, एमआयटी डब्ल्यूपीयू अ‍ॅडव्हेंचर क्लबचे अध्यक्ष डॉ. समर्थ पटवर्धन, समन्वयक प्रा.रश्मी वारके आणि महेश थोरवे उपस्थित होते.
या प्रसंगी एमआयटी डब्ल्यूपीयू अ‍ॅडव्हेंचर क्लबचे उद्घाटन मान्यवरांच्या हस्ते करण्यात आले.
उमेश झिरपे म्हणाले,“ स्वामी विवेकांनद म्हणत असे की बलवान व निरोगी शरीरात सशक्त मन नांदते. विद्यार्थ्यांनी एखादी कल्पना स्वीकारली की मग तिलाच आपले जीवन सर्वस्व बनवा. सतत तिचाच ध्यास घ्या. तुमचे स्नायू, मज्जातंतू, शरीराचा अणुरेणु त्याच कल्पनेने भरला जाऊ दया, इतर कोणत्याही विचारांना थारा देऊ नका. यशस्वी होण्याचा हाच मार्ग आहे. तसेच गिर्यारोहण करतांना निर्सगात किती रहस्य आहेत हे कळेल.”
प्रा.डॉ. विश्वनाथ दा. कराड म्हणाले,“ स्वामी विवेकानंद यांनी १८९३ मध्ये जागतिक धर्म परिषदेत भाकीत केले होते की, विज्ञान आणि अध्यात्माच्या समन्वयातून जगात सुख, समाधान आणि शांती नांदेल. २१ व्या शतकात माझी भारत माता ज्ञानाचे दालन आणि विश्व गुरू म्हणून उदयास येईल. स्वामी विवेकानंदांनी भारताचा विचार जगासमोर मांडला. ते द्रष्टे व्यक्ती होते. धर्म, प्रार्थना आणि ध्यान या विषयी विचार जगासमोर ठेवले आहेत. त्यामुळे प्रत्येकाने त्यांचा आदर्श घ्यावा.”
डॉ. संजय उपाध्ये म्हणाले,“ स्वामी विवेकांनद या शब्दाचे विस्तृतीकरण खूप सुंदर आहे. त्यात  स्वामी म्हणजे स्वतःला जिंकणे, विवेक म्हणजे विवेका बरोबर जगणे आणि आंनद म्हणजे स्वतःमध्ये आनंद शोधणे असा अर्थ होतो.”
डॉ. आर.एम.चिटणीस यांनी उद्घाटन पर भाषण सांगितले की देशातील तरूणांना  स्वामींच्या विचारांनी प्रेरित करण्यासाठी हा दिवस अत्यंत महत्वाचा आहे. २१ व्या शतकात भारत जगाचा नेता म्हणून उदयास येईल. तरुणांची जबाबदारी असल्याने त्यांनी स्वामीजींनी दाखवलेल्या मार्गावर चालावे.
यानिमित्तान घेण्यात आलेल्या फोटोग्राफी प्रदर्शनी, बुद्धिबळ स्पर्धा, स्ट्रीट प्ले, मधील यशस्वी विद्यार्थ्यांचा सत्कार करण्यात आला.
याप्रसंगी चैतन्य कुलकर्णी यांच्या मार्गदर्शनात स्वामी विवेकानंद यांच्या जीवनावर आधारित एक स्ट्रीट प्ले विद्यार्थ्यांनी सादर केले. विविध समस्यांचा सामना करण्यासंदर्भात विद्यार्थ्यांना मार्गदर्शन करण्यात आले. निरज खेडकर या विद्यार्थ्यांने स्वामी विवेकानंद यांची भूमिका सादर केली.
त्याच प्रमाणे स्वामी विवेकानंद यांच्या जीवन चरित्रावर नंदिनी, श्रेयका व अन्य विद्यार्थ्यांनी आपले विचार मांडले.
स्टूडेंट कॉन्सिलच्या स्पोर्टस सेक्रेटरी श्रृती देशमुख यांनी आभार मानले.

पुणे:ज्या राजमाता जिजाऊंनी छत्रपती शिवरायांमार्फत स्वराज्याची स्थापना केली ,त्या राजमाता जिजाऊंच्या पदस्पर्शाने पावन झालेल्या लाल महाल येथून प्रारंभ झालेली ही रॅली सुराज्याचे प्रणेते असलेल्या स्वामी विवेकानंद यांच्या स्मारक स्थळापर्यंत काढण्यात आली.

या रॅली मध्ये तरुणाईचा सहभाग मोठ्या प्रमाणात होता यावेळी सर्वांना स्वराज्याचे रक्षण करत सुराज्यासाठी प्रतीज्ञा करण्यात आली ज्यात ..
राजमाता जिजाऊ आईसाहेब
छत्रपती शिवाजी महाराज, फुले-शाहू आंबेडकर आणि स्वामी विवेकानंद यांच्या पुण्यस्मृतींना स्मरुन आम्ही राष्ट्रवादी काँग्रेसचे युवक-युवती-पदाधिकारी व कार्यकर्ते शपथ घेतो की, स्व यशवंतराव चव्हाण साहेब आणि आमचे नेते आदरणीय शरदचंद्रजी पवार साहेब यांच्या विचारांतून प्रेरणा घेत भारताचे नागरीक म्हणून आमच्या संवैधानिक हक्क आणि कर्तव्यासाठी सदैव कार्यरत राहू.या देशाची धर्मनिरपेक्ष, समाजवादी वीण कायम ठेवू.आम्ही आमच्या अस्मितेची जपणूक करीत असताना या देशाच्या विविधतेतून एकतेची परंपरा कायम राखली जाईल याची दक्षता घेऊ. या देशातील सौहार्द, एकोपा आणि सद्विवेक यांच्या विरोधातील कोणत्याही शक्तीपुढे आम्ही न झुकता तिचा प्राणपणाने प्रतिकार करु. आम्ही राष्ट्रवादी काँग्रेसचे कार्यकर्ते या देशातील राष्ट्रपुरुषांचे विचार तथा स्वातंत्र्यलढ्यातून तावून सुलाखून लाभलेल्या स्वराज्याचे सुराज्य करण्यासाठी आयुष्यभर काम करण्याची प्रतिज्ञा घेत आहोत.
॥जय हिंद॥
॥जय महाराष्ट्र॥
||जय राष्ट्रवादी||

तसेच यावेळी “होय आम्ही कठीबद्ध आहोत..
शिवराय – फुले – शाहू -आंबेडकर यांचा लोककल्याणकारी वसा आणि वारसा पुढे चालवण्यासाठी..” , “होय आम्ही कटिबद्ध आहोत..
युवकांना रोजगाराच्या संधी उपलब्ध करून देण्यासाठी..” , “होय आम्हीहोय आम्ही कटिबद्ध आहोत..
कायदा आणि सुव्यवस्था अबाधित राखण्यासाठी.” , “कटिबद्ध आहोत..
सशक्त युवा पिढी निर्माण करण्यासाठी..” , “होय आम्ही कटिबद्ध आहोत..
देशाच्या उज्वल भविष्यासाठी..” अश्या सर्व घोषणांनी रॅलीचा संपूर्ण परिसर दणाणून सोडला होता.

“आपल्या देशासह महाराष्ट्रातील सध्याचे वातावरण पाहता स्वराज्याचे आदर्श घेऊन पुन्हा एकदा सुराज्याची स्थापना व्हावी , अश्याच प्रकारचे आहे. नको त्या गोष्टींवरून वाद निर्माण केले जात आहेत, सर्वसामान्य रयतेच्या मनातील, लोकांच्या गरजेच्या अनेक प्रश्नांना बगल देत, चुकीचा इतिहास दाखवत, इतिहासावरून संभ्रम निर्माण केला जात आहे. यामध्ये स्वराज्य आणि सुराज्य या दोन्ही गोष्टीच्या मूळ हेतूला बगल देत राजकारणासाठी इतिहास बदलून आपल्या फायद्याचा राजकीय इतिहास लिहिला जात आहे. अशा परिस्थितीमध्ये पुन्हा एकदा सर्वांना स्वराज्य व सुराज्य यांची आठवण करून देण्यासाठी राष्ट्रवादी काँग्रेस पार्टीने राजमाता जिजाऊ यांच्या जयंतीच्या व स्वामी विवेकानंद यांच्या जयंती – युवा दिनाच्या पूर्वसंध्येला अश्या प्रकारच्या रॅलीचे आयोजन केले असल्याचे शहराध्यक्ष प्रशांत जगताप यांनी सांगितले.
रॅलीप्रसंगी प्रशांत जगताप , प्रवक्ते प्रदीप देशमुख ,मूणालिनी वाणी , किशोर कांबळे , विक्रम जाघव ,सुषमा सातपुते , महेश शिंदे , गणेश नलावडे , उदय महाले , संतोष नांगरे , शंतनू जगदाळे , अजिंक्य पालकर , मनोज पाचपुते ,शुभम माताळे , वेणू शिंदे , शालिनी जगताप आदींसह मोठ्या संख्येने तरुणांनी या रॅलीमध्ये सहभाग नोंदवला.