पुणे दि १७ : राज्य राखीव पोलीस बल गट क्र. ५ दौंड यांच्यामार्फत सशस्त्र पोलीस शिपाई भरती २०२१ शारीरिक चाचणीमधील १ हजार ९४४ उमेदवार लेखी परीक्षेसाठी पात्र ठरले असून पात्र उमेदवारांची लेखी परीक्षा २३ जुलै २०२३ रोजी सकाळी ११ वाजता मेरी मेमोरीयल स्कूल दौंड व वंदनीय राष्ट्रीय संत तुकडोजी महाराज विद्यालय दौंड येथे घेण्यात येणार असल्याची माहिती दौंड राज्य राखीव पोलीस बल गट क्र. ५ च्या समादेशक विनीता साहू यांनी दिली आहे.

लेखी परिक्षेसाठी पात्र उमेदवारांनी २३ जुलै रोजी सकाळी ८ वाजता परीक्षा केंद्रावर उपस्थित रहावे. उशीरा येणाऱ्या उमेदवारांना परीक्षा केंद्रावर प्रवेश दिला जाणार नाही. परीक्षेला येताना उमेदवारांनी महाआयटी यांनी ई-मेलद्वारे दिलेले शारिरीक चाचणी व लेखी परीक्षेचे ओळखपत्र डाऊनलोड करुन त्याची रंगीत प्रिंट आणि आवेदन अर्जावरील दोन रंगीत पासपोर्ट साईज फोटो आणणे आवश्यक आहे. तसेच मैदानी चाचणीसाठी पुरविण्यात आलेले ओळखपत्र घेऊन येणे अनिवार्य आहे.

परीक्षा केंद्रावर उमेदवारांनी मोबाईल फोन, डिजीटल घड्याळ, इलेक्ट्रॉनिक वस्तु किंवा इतर तत्सम वस्तू तसेच शक्यतो कोणत्याही प्रकारच्या बॅग आणू नयेत. बॅग व त्यातील वस्तू गहाळ अथवा चोरीस गेल्यास त्यास कार्यालय जबाबदार राहणार नाही याची उमेदवारांनी नोंद घ्यावी.

परीक्षा केंद्रावर उमेदवारांना प्रश्नपत्रिका, उत्तरपत्रिका, काळा पेन तसेच पॅड बैठक व्यवस्थेच्या ठिकाणी पुरविण्यात येणार आहे.लेखी परीक्षेत उमेदवारांनी कोणत्याही गैरमार्गाचा अवलंब करु नये, अशी बाब निदर्शनास आल्यास तात्काळ भरती प्रमुखांशी संपर्क साधावा.

पोलीस भरतीमध्ये कोणत्याही अमिषाला अथवा भूलथापांना बळी पडू नये. लाच देणे अथवा घेणे कायद्याने गुन्हा असून असे आढळून आल्यास लाचलुचपत विभागाच्या टोल फ्री क्रमांक १०६४ वर संपर्क साधावा. परीक्षेबाबतच्या अधिक माहितीसाठी राज्य राखीव पोलीस बल गट क्र.५, दौंड यांच्या ०२११७- २६२३४७ किंवा ७२७६७६८३४७ या क्रमांकावर संपर्क साधावा अथवा www.mahapolic.gov.in व www.maharashtrasrpf.gov.in या संकेतस्थळाला भेट द्यावी, असेही कळविण्यात आले आहे.
0000

पुणे-पुणे महानगर परिवहन महामंडळाच्या स्वारगेट डेपोमधून ५० पुण्यदशम बसेस संचलनात होत्या मात्र दि. ०८जुलै ला यांच्या प्रमाणपत्रांची मुदत संपली आणि या बसेस फिटनेस प्रमाणपत्र मिळेपर्यंत रस्त्यावर येणे बंद झाले .दरम्यान आता कालच ९ बसेस ला फिटनेस प्रमाणपत्र मिळाल्याने त्या रस्त्यावर धावू लागल्या आहेत.आणि आणखी ११ बसेस १९ तारखेपासून फिटनेस प्रमाणपत्र घेऊन धावू लागतील असे pmpml च्या व्यवस्थापनाने कळविले आहे .
या संदर्भात pmpml ने कळविले आहे कि,’ बसेसचे फिटनेस संपल्यामुळे आर.टी.ओ. फिटनेसकामीकारणाने तात्पुरत्या स्वरूपात या बसेस मार्गावर संचलनात नव्हत्या. तथापिशनिवार, दि. १५/०७/२०२३ रोजी ९ बसेसचे फिटनेस सर्टिफिकेट प्राप्त झाल्यामुळे सदर ९ बसेस आता संचलनात आहेत.
बुधवार, दि. १९/०७/२०२३ रोजी ११ बसेसचे फिटनेस सर्टिफिकेट प्राप्त झाल्यानंतर या ११ बसेस आणखी संचलनात येणार
आहेत. उर्वरीत बसेस टप्प्याटप्प्याने दि. २२/०७/२०२३ पासून फिटनेस सर्टिफिकेट प्राप्त झाल्यानंतर संचलनात येणार
आहेत. पुण्यदशम बसेस फिटनेस अभावी संचलनात येणार नसल्याने प्रवाशांची गैरसोय होऊ नये याकरीता त्याच्या जागी
साध्या बसेसची व्यवस्था करणेत आलेली आहे.
पुण्यदशम बसेसचे आर.टी.ओ. फिटनेसची प्रक्रिया पूर्ण करण्यासाठी प्रथम संबंधित कंपनी (आयशर) त्यांच्या
पोर्टलवरून सदर बसेसची ऑनलाईन के.वाय.सी. व ऑनलाईन व्ही.एल.टी.डी. सर्टिफिकेट प्राप्त करून देते. सदरची दोन्ही
सर्टिफिकेट कंपनीकडून प्राप्त झाल्यानंतर सदर बसेस पीएमपीएमएल कडून आर.टी.ओ. फिटनेससाठी उपलब्ध करून
दिल्या जातात. सदरची प्रक्रिया पीएमपीएमएल मध्ये नवीन असल्यामुळे व प्रथमतःच करणेत येत असल्याने ऑनलाईन
सर्व्हरच्या अडचणीमुळे फिटनेस सर्टिफिकेट प्राप्त करून घेण्यास विलंब होत आहे. सदर कारणास जबाबदार असलेल्या
आयशर बसेसची देखभाल दुरूस्ती करणाऱ्या ठेकेदारावर जबाबदारी निश्चित करणेत आलेली आहे. तरी प्रवाशांच्या काही
प्रमाणात होत असलेल्या गैरसोयी बद्दल पुणे महानगर परिवहन महामंडळाकडून दिलगिरी व्यक्त करण्यात आली आहे.

श्रीमंत दगडूशेठ हलवाई सार्वजनिक गणपती ट्रस्टतर्फे चातुर्मासानिमित्त आयोजित कीर्तनमालेला प्रारंभ

पुणे : आपल्या प्रवृत्तीची गंगा सागरामध्ये जावून स्थिर होते. खरे तर, भक्ती आणि प्रेमरुपी सागरामध्ये स्थिर होत असते. वारकरी संप्रदाय किंवा भागवत धर्म हा पचायला खूप अवघड आहे. ज्या वेळेला आपली दृष्टी विठ्ठलाने भरेल, त्यावेळी आपल्याला काहीच कमी वाटणार नाही. सर्व साधने जिथे खुंटून जातात, तिथे भक्ती व प्रेमाचा उदय होतो, असे ह.भ.प.भगवती ताई सातारकर- दांडेकर यांनी सांगितले.

श्रीमंत दगडूशेठ हलवाई सार्वजनिक गणपती ट्रस्ट व सुवर्णयुग तरुण मंडळातर्फे चातुर्मासानिमित्त गणेश कला क्रीडा मंच येथे कीर्तन महोत्सवाचे आयोजन करण्यात आले आहे. तब्बल ३५ वर्षांहून अधिक काळ ट्रस्टतर्फे हा कार्यक्रम सुरु आहे. कीर्तनमालेत ह.भ.प.भगवती ताई सातारकर- दांडेकर यांचे सुश्राव्य कीर्तन झाले. यावेळी ट्रस्टचे विश्वस्त, पदाधिकारी व मंडळाचे कार्यकर्ते उपस्थित होते.

भगवती ताई सातारकर – दांडेकर म्हणाल्या, ईश्वरी सत्तेची प्रतिती संतांना दिसली. संतांना ज्या प्रतितीमध्ये परमेश्वर दिसला, त्यामध्ये विरुन जाणे हे आपले काम आहे. परमेश्वराचे नाम घेतल्याशिवाय विश्वात असलेले ज्ञान, भक्ती, आनंद सामान्यांना मिळणार नाही. नाम हे अमृत आहे, त्यामुळे आपण नामस्मरण करायला हवे.

ट्रस्टचे अध्यक्ष माणिक चव्हाण म्हणाले, गणेश कला क्रीडा मंच येथे दिनांक १९ जुलै पर्यंत दररोज सायंकाळी ५.३० ते ८ यावेळेत चातुर्मासानिमित्त कीर्तन महोत्सव असून त्यामध्ये महाराष्ट्रातील दिग्गज कीर्तनकार कीर्तन सादर करणार आहेत. कीर्तन महोत्सव सर्वांसाठी विनामूल्य खुले असून पुणेकरांनी मोठया संख्येने सहभागी व्हावे, असे आवाहनही त्यांनी केले.

पुणे : डेक्कन जिमखाना नदीपात्रातील चौपाटी परिसरात मध्यरात्रीपर्यंत सुरू असलेले हाॅटेल बंद करण्यास सांगितल्याने हाॅटेलचालकाने पोलीस ठाण्यात पोलीस निरीक्षकाशी अरेरावी केल्याची घटना घडली. पोलीस निरीक्षकाशी(PI) वाद घालून एका पोलीस कर्मचाऱ्याला धक्काबुक्की केली. सरकारी कामात अडथळा आणल्या प्रकरणी हाॅटेलचालकास पोलिसांनी अटक केली.

सचिन हरिभाऊ भगरे (वय ३३, रा. कबीर बाग परिसर, नारायण पेठ) असे अटक करण्यात आलेल्याचे नाव आहे. याबाबत गुन्हे शाखेच्या युनिट तीनचे पोलीस निरीक्षक श्रीहरी बहिरट यांनी डेक्कन जिमखाना पोलीस ठाण्यात फिर्याद दिली आहे. नदीपात्रातील चौपाटी परिसरातील हाॅटेल सदगुरू मध्यरात्री दीड वाजेपर्यंत सुरू होते. रात्रपाळीत गुन्हे शाखेचे पथक गस्त घालत होते. पोलिसांनी हाॅटेल बंद करणास सांगितले. त्या वेळी हाॅटेल चालक भगरेने पोलिसांशी वाद घातला. पोलिसांनी कारवाई करण्यासाठी त्याला डेक्कन पोलीस ठाण्यात नेले. तेव्हा गुन्हे शाखेचे पोलीस निरीक्षक श्रीहरी बहिरट यांच्याशी भगरे याने पोलीस ठाण्यात वाद घालण्यास सुरुवात केली.‘तुला काय करायचे ते कर’, असे भगरे त्यांना म्हणाला. पोलीस निरीक्षक बहिरट यांच्याशी वाद घातला. एका पोलीस कर्मचाऱ्याला धक्काबुक्की केली. सरकारी कामात अडथळा आणल्या प्रकरणी भगरे याला अटक करण्यात आली असून, गुन्हे शाखेचे पोलीस निरीक्षक साळुंखे तपास करत आहेत.

क्लासिक व इक्वीप्ड दोन्हीही प्रकारात जिंकले  “स्ट्रॉंग वुमन ऑफ इंडिया” टायटल

राष्ट्रीय पाॅवरलिफ्टिंग स्पर्धेमध्ये मायलेकींचे यश
पुणे : जी. एम. आर. इन्स्टिट्यूट ऑफ टेक्नॉलॉजी राजम आंध्र प्रदेश येथे झालेल्या राष्ट्रीय मास्टर्स पॉवरलिफ्टिंग स्पर्धेमध्ये ५७ किलो महिला गटात डॉ. शर्वरी इनामदार यांनी क्लासिक पाॅवरलिफ्टिंग व इक्वीप्ड पाॅवर लिफ्टिंग अशा दोन्ही प्रकारांमध्ये सुवर्णपदक पटकावले, तर त्यांच्या आई डॉ. पूर्णा भारदे यांनी  ६९ किलो  मास्टर ३  वजनी गटामध्ये चुरशीच्या स्पर्धेत रौप्य पदकाची कमाई केली. 
स्पर्धेत केरळ, कर्नाटक, तामिळनाडू, आंध्र प्रदेश, छत्तीसगड, हरियाणा, पंजाब, दिल्ली, उत्तर प्रदेश, मध्य प्रदेश, महाराष्ट्र, तेलंगणा, गोवा, ओडिसा, राजस्थान, पश्चिम बंगाल, उत्तराखंड आदी २२ राज्यांचा सहभाग होता.
 सर्व वजनी गटांमधून जास्तीत जास्त वजन उचलणाऱ्या खेळाडूचा “बेस्ट लिफ्टर ऑफ इंडिया” म्हणजेच “स्ट्रॉंग वुमन ऑफ इंडिया” हा मानाचा किताब डॉ. शर्वरी इनामदार यांनी क्लासिक व इक्वीप्ड अशा दोन्ही स्पर्धांमध्ये खेचून आणला. ऑक्टोबर महिन्यात मंगोलिया येथे होणाऱ्या जागतिक पाॅवरलिफ्टिंग स्पर्धेसाठी दोघी मायलेकींची निवड झाली आहे.

डेपो निहाय नेमलेल्या पालक अधिकारी यांनी जाणून घेतल्या प्रवाशांच्या अडी – अडचणी.
पुणे-पुणे महानगर परिवहन महामंडळाच्या संचलन कार्यक्षेत्रातील विविध मार्गांवर, स्थानकांवर प्रवाशी वर्गास
चांगली, तत्पर व विश्वसनीय बससेवा देण्याच्या दृष्टीने व बससेवेबाबत प्रवाशांना येणाऱ्या अडचणी/तक्रारींची तातडीने
दखल घेणे आवश्यक असल्याने पुणे महानगर परिवहन महामंडळाचे अध्यक्ष व व्यवस्थापकीय संचालक यांच्या
संकल्पनेतून बससेवेतील त्रुटी दूर करण्यासाठी, प्रवाशी सेवा लोकाभिमुख होण्यासाठी व प्रवाशांचे मोलाचे मार्गदर्शन
परिवहन महामंडळास मिळावे याकरीता प्रत्येक आगारामध्ये प्रत्येक महिन्याच्या दुसऱ्या व चौथ्या शुक्रवारी दुपारी
०३.०० ते सायंकाळी ०५.०० या वेळेत प्रवासी दिन हा उपक्रम सुरु करण्यात आला आहे.
शुक्रवार, दि. १४ जुलै २०२३ रोजी प्रवासी दिना निमित्त महामंडळाचे मा. अध्यक्ष व व्यवस्थापकीय संचालक
यांच्यासह प्रत्येक डेपोसाठी नेमणूक केलेले पालक अधिकारी यावेळी प्रत्येक डेपो मध्ये उपस्थित होते. प्रवासी दिन या
उपक्रमाच्या माध्यमातून प्रवाशी नागरिकांच्या ३७ तक्रारी व १४ सुचना प्राप्त झाल्या असून सदरच्या तक्रारी संबंधित
विभागास पाठवून तक्रारींचे निराकरण करण्यात येत आहे.

अध्यक्ष व व्यवस्थापकीय संचालक यांच्यासह पालक अधिकारी यांनी साधला प्रवाशांशी संवाद.
शनिवार, दि. १५ जुलै २०२३ रोजी पहाटे ०५:०० ते सकाळी ०८:०० पर्यंत अध्यक्ष व व्यवस्थापकीय
संचालक यांच्यासह प्रत्येक डेपोचे पालक अधिकारी यांनी प्रत्येक डेपोमध्ये उपस्थित राहून पाहणी केली. तसेच सकाळी
०८:०० ते सकाळी ११:०० पर्यंत मार्गावरील बसेसमधून प्रवास करत प्रवाशी नागरिकांशी संवाद साधला व त्यांच्या
अडी-अडचणी समजून घेतल्या.

मुंबई-शरद पवार जेष्ठ नेते आहेत. त्यांचा आशीर्वाद घेण्यासाठी आमदार गेले असतील तर त्यात वाईट काय आहे. राष्ट्रवादीचं मनोमिलन व्हावं ही आमची इच्छा आहे. मोदी साहेब आणि पवार साहेब चांगले मित्र आहेत, महाराष्ट्राच्या प्रश्नासाठी दोघांनी एकत्र यावे ही इच्छा आहे, असे मत शिंदे गटातील मंत्री दीपक केसरकर यांनी व्यक्त केले.

अजित पवार गटाने शरद पवारांची आज सोमवारी पुन्हा भेट घेतली. या भेटीत सर्व अजित गटातील सर्व आमदारांनी शरद पवारांना एकत्रित काम करण्यासंदर्भात मनधरणी केली. मात्र शरद पवारांनी अद्याप मौन बाळगलेले आहे. राष्ट्रवादीतल्या या घडामोडीवर शिंदेगटातील मंत्र्यांनी प्रतिक्रिया दिली आहे.

रविवारी अचानक अजित पवार गटाचे मंत्री आणि काही नेते शरद पवारांच्या भेटीसाठी वायबी सेंटरमध्ये पोहोचले होते. या बैठकीनंतर प्रफुल्ल पटेल यांनी शरद पवारांना सोबत काम करण्याची विनंती केल्याचं स्पष्ट केलं होतं. त्यानंतर जयंत पाटील यांनीही फुटीर गटाने दिलगिरी व्यक्त केल्याचं सांगून ते पक्षात परत आले तर आनंदच होईल, अशी भूमिका मांडली.मात्र पवार काहीही बोलले नव्हते. त्यानंतर झालेल्या राष्ट्रवादी युवक काँग्रेसच्या कार्यक्रमात शरद पवारांनी पुरोगामी विचारांसोबत पुढे जाण्यासंदर्भात भाष्य केलं. त्यामुळे राष्ट्रवादीत नेमकं काय सुरुय, हे अद्याप स्पष्ट होत नाहीये.

पुणे, दि. १७ जुलै २०२३: वडगाव शेरी उपविभाग अंतर्गत आनंद पार्क बसथांब्यानजिक लावलेला एक फ्लेक्स काढण्यासाठी रोहित्राच्या वीज खांबावर चढल्याने १५ वर्षीय मुलाला ११ केव्ही वाहिनीचा धक्का बसला व विद्युत अपघात झाल्याचे महावितरणच्या प्राथमिक पाहणीत आढळून आले होते. ही घटना दि. २४ एप्रिल रोजी दुपारी १.४५ वाजता घडली होती. दरम्यान विद्युत अपघातात जखमी झालेला अंकुश खंडू बनसोडे याचा रविवारी (दि. १६) उपचारादरम्यान दुर्दैवी मृत्यू झाला.

या विद्युत अपघातप्रकरणी राज्य शासनाच्या विद्युत निरीक्षक विभागाने त्याचवेळी घटनास्थळाची पाहणी केलेली आहे. त्यांच्याकडून अहवाल प्राप्त झाल्यानंतर महावितरणकडून नियमानुसार पुढील कार्यवाही करण्यात येणार आहे.