पुणे: जमीन नावावर करुन न दिल्याने एका शेतकऱ्याला बेदम मारहाण केल्याप्रकरणी हिंदू राष्ट्र सेनेचा प्रमुख धनंजय देसाई याच्यासह सहा जणांना पौड पोलिसांनी अटक केली. मुळशीतील दारवली गावात ही घटना घडली.याबाबत प्रदीप शिवाजी बलकवडे (वय ३५, रा. दारवली, ता. मुळशी, जि. पुणे) यांनी पौड पोलीस ठाण्यात फिर्याद दिली आहे. याप्रकरणी धनंजय देसाई याच्यासह सहा जणांना अटक करण्यात आल्याची माहिती पौड पोलीस ठाण्याचे पोलीस निरीक्षक मनोज यादव यांनी दिली.

याप्रकरणी देसाई याच्यासह रमेश जायभाय, श्याम सावंत, रोहित यांच्यासह १० ते १५ साथीदारांवर गुन्हा दाखल करण्यात आला आहे. पौड परिसरातील दारवली गावात बलकवडे कुटुंबीय राहायला आहे. बलकवडे गावातील सचिन ठोंबरे यांच्या घरात बसले होते. त्यावेळी देसाईचे साथीदार घरात शिरले. देसाई यांच्या नावावर जमीन का करुन दिली नाही, अशी विचारणा करुन त्यांना धमकावले. जमीन नावावर करुन न दिल्यास तुझ्यासह कुटुंबीयांना जीवे मारू, अशी धमकी दिली. बलकवडे यांना श्याम सावंतने पिस्तुलाचा धाक दाखवून मारहाण केली. आरोपींकडे काठ्या, गज होते, असे बलकवडे यांनी फिर्यादीत म्हटले आहे. आरोपींनी गावातील नागरिकांनी धमकावले. पोलीस निरीक्षक यादव तपास करत आहेत.

धनंजय देसाई याने बारा वर्षांपूर्वी पौड भागात अतिक्रमण करुन घर बांधले. देसाई हिंदू राष्ट्र सेना चालवित असून त्याची गुन्हेगारी पार्श्वभूमी आहे. त्याच्याविरुद्ध गंभीर गु्न्हे दाखल झाले आहेत. मुळशी तालुक्यात देसाई आणि साथीदारांनी दहशत माजविली आहे. गोशाळेच्या नावाखाली पाळीव जनावरे शेतात सोडून दिली जातात. देसाईला जाब विचारल्यास तो ग्रामस्थांना धमकावतो. संघटनेच्या नावाखाली तो समाजात जातीय तेढ निर्माण करण्याचे काम केले आहे. त्याने दारवलीलीत हुलावळेवाडीतील तरुणांना मारहाण केली होती, असे समस्त ग्रामस्थ दारवलीकडून प्रसिद्धीस दिलेल्या पत्रकात म्हटले आहे.दरम्यान, देसाईविरुद्ध कारवाई करण्यासाठी दारवली ग्रामस्थांकडून बुधवारी पौड पोलीस ठाण्यावर मोर्चा काढण्यात आला.

पुणे, दि.२: पुणे चक्राकार महामार्गासाठी संमतीने भूसंपादन करण्याची प्रक्रिया सुरू करण्यात आली असून त्याला जमीन मालकांचा चांगला प्रतिसाद मिळत आहे. आतापर्यंत १२५ एकराचा ताबा घेण्यात आला असून २५० कोटींचा मोबदला वाटप करण्यात आला आहे.

जिल्हाधिकारी डॉ.राजेश देशमुख यांच्या मार्गदर्शनाखाली जिल्ह्यासोबत राज्यासाठी महत्वाच्या असलेल्या या प्रकल्पासाठी भूसंपादनाचे काम सुरू आहे. याबाबत जमीन मालकांशीदेखील संवाद साधण्यात येत असून त्यांना विश्वासात घेतले जात आहे. संमती निवाड्याने जमीन घेताना भूधारकांना २५ टक्के अधिक मोबदला देण्यात आला आहे. जिल्हास्तरीय मूल्यांकन समितीच्या बैठकीत संमतीचा विकल्प सादर करणे व करारनामा करण्यास ३१ जुलैपर्यंत मुदत देण्यात आली होती.

चक्राकार महार्गासाठी भूसंपादन प्रक्रियेशी संबंधित ३५ गावातील एकूण १६ हजार ९४० खातेदारांपैकी ८ हजार ३० खातेदारांनी भूसंपादनासाठी संमती दर्शविली आहे. त्यापैकी २७५ खातेदारांना १२५ एकर जमिनीच्या मोबदल्यात २५० कोटी रुपयांचे वाटप करण्यात आले आहे. मोबदला वाटपाची प्रक्रिया वेगाने होत असल्याने त्याला भूधारकांचेही चांगले सहकार्य मिळत आहे.

जिल्हाधिकाऱ्यांनी भूसंपादन प्रक्रीयेचा आज आढावा घेतला. संमतीने निवाडा करण्याच्या विकल्पास भूधारकांचा चांगला प्रतिसाद मिळत असून जमीन ताब्यात देण्यासाठी आवश्यक कागदपत्रांची जुळवाजुळव करण्यास अवधी लागत असल्याने संमतीचा विकल्प सादर करण्यासाठी वाढविण्याची विनंती भूधारकांनी केली होती. त्यानुसार २१ ऑगस्ट २०२३ पर्यंत विकल्प सादर करण्यास मुदतवाढ देण्याचा निर्णय घेण्यात आला आहे. २१ ऑगस्ट पर्यंत संमतीपत्र आणि करारनामा प्राप्त न झाल्यास उर्वरीत भूधारकांची संमती नाही असे समजून २५ टक्के वाढीव मोबदल्याशिवाय भूसंपादनाचा निवाडा प्राधिकृत भूसंपादन अधिकाऱ्यांकडून घोषीत करण्यात येणार आहे.

भूधारकांनी दिलेल्या मुदतीत संमती विकल्पाद्वारे २५ टक्के अधिक मोबदल्याचा लाभ घ्यावा आणि जिल्ह्याच्या विकासासाठी महत्वाच्या या प्रकल्पासाठी योगदान देण्याच्या भावनेने प्रशासनाला सहकार्य करावे, असे आवाहन जिल्हाधिकारी डॉ.देशमुख यांनी केले आहे.
0000

पुणे दि.2: कृषी निविष्ठा विक्रेत्यांसाठी राबविण्यात येणाऱ्या कृषी विस्तार सेवा पदविका अभ्यासक्रमाचा (डीएईएसआय- देसी) 2021-2022 या वर्षातील पदविका प्रदान सोहळा वैकुंठ मेहता राष्ट्रीय सहकारी प्रबंधन संस्था (वामनीकॉम) येथे नुकताच संपन्न झाला.

कृषी मंत्रालय भारत सरकार, राष्ट्रीय कृषी विस्तार व्यवस्थापन संस्था (मॅनेज), हैद्राबाद, वनामती नागपूर तसेच कृषी विभाग आत्मा यांच्या मान्यतेने हा एक वर्ष कालावधीचा अभ्यासक्रम राबविण्यात येतो. या पदवीप्रदान सोहळ्यास वामनीकॉमच्या संचालक डॉ. हेमा यादव, आत्माचे संचालक दशरथ तांबाळे, कृषी प्रशिक्षण उपसंचालक हनमंत शिंदे, वामनीकॉमचे सहयोगी प्राध्यापक महेश कदम, ‘मॅनेज’चे सल्लागार महेश माने, शाश्वत शेती विकास प्रतिष्ठानचे प्रमुख अवधूत कदम, कार्यक्रम सन्मवय अतुल खुडे आदी उपस्थित होते.

श्री. तांबाळे यांनी कृषी निविष्ठा विक्रेत्यांचे कृषी विस्तार सेवेतील महत्व, जबाबदारी आणि योगदान याबाबत मार्गदर्शन केले. डॉ. यादव यांनी कृषी निविष्ठा विक्रेत्यांना सहकारी क्षेत्रातील विविध व्यवसाय संधींच्या अनुषंगाने माहिती दिली. अभ्यासक्रम उत्तीर्ण झालेल्या विद्यार्थ्यांना मान्यवरांच्या हस्ते सन्मान चिन्ह व प्रमाणपत्र वितरीत करण्यात आले.
0000

पुणे, दि.2: सामाजिक न्याय व विशेष सहाय्य विभाग आणि इतर मागास बहुजन विभाग या दोन विभागांतर्गत देण्यात येणाऱ्या भारत सरकार शिष्यवृत्ती, शिक्षण शुल्क, परीक्षा शुल्क प्रतिपूर्ती, राजश्री शाहू महाराज गुणवत्ता शिष्यवृत्ती आणि व्यावसायिक पाठ्यक्रमात शिक्षण घेत असलेल्या विद्यार्थ्यांना निर्वाह भत्ता आदी योजना २०२३-२४ या शैक्षणिक वर्षातील अर्ज भरण्याकरिता केंद्र शासनाने सुधारीत मार्गदर्शक सूचना निर्गमित केल्या आहेत.

महाविद्यालयासंबंधीची मान्यता, नोंदणी अभ्यासक्रमाची मान्यता, महाविद्यालयांची मान्यताप्राप्त विद्यार्थी क्षमता, अभ्यासक्रमाची मान्यता प्राप्त शुल्क रचना आदी बाबींची पडताळणी व खातरजमा महाविद्यालयांनी करणे आवश्यक आहे. विद्यार्थ्यांच्या प्रत्यक्ष हजेरीबाबतची अट अवलंबिणे, एक अभ्यासक्रम एक शिष्यवृत्ती धोरण अवलंबिणे आवश्यक आहे. सर्व महाविद्यालयांनी त्यांच्या प्रत्येक शैक्षणिक वर्षांचा वार्षिक लेखापरीक्षण अहवाल राज्य शासनास सादर करणे आवश्यक आहे.

योजनेचा लाभ केवळ राज्य शासनाची मान्यता प्राप्त विद्यापीठे किंवा केंद्रीय विद्यापीठातर्गंत सलग शिक्षण घेत असलेल्या अनुसूचित जाती प्रवर्गातील विद्यार्थ्यांना अनुज्ञेय राहील. योजनेच्या लाभाचे वितरण प्राधान्याने आधार संलग्नीकृत बँक खाते असलेल्या लाभार्थ्यांनाच अनुज्ञेय राहील.

कुटुंबाचे वार्षिक उत्पन्न २ लाख ५० हजार रुपये व त्यापेक्षा कमी असलेल्या अनुसूचित जाती प्रवर्गातील विद्यार्थ्यांना मॅट्रिकोत्तर शिष्यवृत्ती योजना तसेच २ लाख ५० हजार रुपयांपेक्षा अधिक उत्पन्न असलेल्या विद्यार्थ्यांना शिक्षण शुल्क, परीक्षा शुल्क अनुज्ञेय राहील.

योजनेंतर्गत विद्यार्थ्यांना द्यावयाच्या निर्वाह भत्याचे दर हे केंद्र शासनामार्फत वेळोवेळी निर्धारित केलेल्या दरानुसार अद्ययावत करण्यात येतील. योजनेकरिता ऑनलाईन प्रणालीवर केवळ नोंदणीकरिता शैक्षणिक वर्षामध्ये कोणत्याही मुदत कालावधीचे बंधन नाही. लाभार्थ्याला चालू शैक्षणिक वर्ष संपेपर्यंत प्रणालीवर प्राथमिक नोंदणी करता येईल.

या सूचनांचे महाविद्यालयांकडून काटेकोरपणे पालन करण्यात यावे. महाविद्यालयात प्रवेशित एकही पात्र मागासवर्गीय विद्यार्थी शिष्यवृत्तीपासून वंचित राहणार नाही याची खबरदारी घ्यावी. विहित मुदतीत अर्ज सादर न केल्यास आणि त्यामुळे एखादा पात्र मागासवर्गीय विद्यार्थी शिष्यवृत्तीपासून वंचित राहिल्यास त्याची जबाबदारी महाविद्यालय प्रशासनाची राहील, असे समाज कल्याण सहाय्यक आयुक्त कैलास आढे यांनी कळविले आहे.
0000

महाराष्ट्राचे उपमुख्यमंत्री देवेंद्र फडणवीस यांची उपस्थिती ; ‘अर्थ साक्षरता अभियानाला’ होणार प्रारंभ
पुणे : संपदा सहकारी बँक लि. पुणे च्या सुवर्णमहोत्सवी वर्षानिमित्त सुवर्ण महोत्सवी ‘संपदा’ शुभारंभ सोहळा रविवार, दिनांक ६ आॅगस्ट रोजी सायंकाळी ५.३० वाजता टिळक स्मारक मंदिर येथे आयोजित करण्यात आला आहे.  महाराष्ट्राचे उपमुख्यमंत्री देवेंद्र फडणवीस यांच्या शुभहस्ते आणि विद्यावाचस्पती शंकर अभ्यंकर यांच्या अध्यक्षतेखाली हा सोहळा होणार आहे, अशी माहिती बँकेचे अध्यक्ष अश्विनीकुमार उपाध्ये यांनी पत्रकार परिषदेत दिली.

पत्रकार परिषदेला बँकेचे उपाध्यक्ष महेश लेले, मुख्य कार्यकारी अधिकारी गिरीश सरदेशपांडे, व्यवस्थापन मंडळ अध्यक्ष मुकुंद भालेराव आदी उपस्थित होते.

महेश लेले म्हणाले, या सोहळ्यासाठी विशेष अतिथी म्हणून रा.स्व.संघाचे पश्चिम महाराष्ट्राचे संघचालक सुरेश ऊर्फ नाना जाधव, अम्ब्रेला आॅर्गनायझेशनचे मुख्य कार्यकारी अधिकारी अतुल खिरवाडकर यांसह विविध क्षेत्रातील मान्यवर उपस्थित राहणार आहेत. कार्यक्रमात सुवर्ण महोत्सवी वर्ष बोधचिन्ह अनावरणासह अर्थ साक्षरता अभियानांतर्गत पुस्तिकेचे प्रकाशनही होणार आहे.

गिरीश सरदेशपांडे म्हणाले, अर्थ साक्षरता अभियानांतर्गत बँकेच्या सर्व ८ शाखांच्या परिसरातील वस्त्यांमध्ये जावून तेथील नागरिकांना बँकिंग व्यवहार बद्दल विविध नियमांची माहिती, खात्यांचे विविध प्रकार, डिजिटल व्यवहारांमधील धोके, घ्यावयाची काळजी आदी माहिती देण्यात येणार आहे. आजपर्यंत याचे ८ कार्यक्रम देखील झाले आहेत. येत्या वर्षभरात जास्तीत जास्त कार्यक्रम करण्याचा आमचा प्रयत्न असणार आहे.  

मुकुंद भालेराव म्हणाले, बँकेच्या ८ शाखांमध्ये मिळून १७०. १८ कोटींच्या ठेवी असून १०१.०८ कोटींचे कर्ज वाटप केले आहे. बँकेचे निव्वळ एनपीए चे प्रमाण ०.०० % असून यावर्षी १.३२ कोटी इतका नफा झाला आहे. बँकेने नुकतेच सभासदांना ८ टक्के लाभांश देखील जाहीर केला आहे. सन २०२२-२३ साठी वैधानिक लेखापरीक्षकांनी बँकेस अ आॅडिट वर्ग दिला आहे. तसेच बँकेने ग्राहकांसाठी डेबिट कार्ड, मोबाईल बँकिंग, युपीआय आदी सुविधा दिल्या आहेत. धायरी व कात्रज येथे बँकेची दोन एटीएम मशीन असून डेटा सुरक्षिततेसाठी बँकेने क्लाऊड कम्प्युटिंग तंत्रज्ञान अवलंबिले आहे.

महाराष्ट्र गो सेवा आयोगाचे अध्यक्ष शेखर मुंदडा यांची उपस्थिती :

महा एनजीओ फेडरेशनचे संचालक अमोल उंबरजे यांना पुरस्कार प्रदान

पुणे : भारतरत्न डॉ.ए. पी. जे अब्दुल कलाम यांच्या पुण्यतिथीनिमित्त ड्रीम फउंडेशन व डॉ. अब्दुल कलाम कौशल्य विकास केंद्र द्वारा आयोजित डॉ. कलाम प्रेरणा पुरस्कार सोहळ्याचे आयोजन पंडित जवाहरलाल नेहरू सांस्कृतिक सभागृह येथे करण्यात आले होते.  महा एनजीओ फेडरेशनचे संचालक अमोल उंबरजे यांना प्रेरणा पुरस्काराने सन्मानित करण्यात आले.

यावेळी महाराष्ट्र गो सेवा आयोगाचे अध्यक्ष शेखर मुंदडा, महा एनजीओ फेडरेशनचे  मुकुंद शिंदे राहुल जगताप आदी उपस्थित होते.  

शेखर मुंदडा म्हणाले, आयुष्यात कधीही तुम्ही अपयशी झालात तर हार मानू नका, कारण अपयशाचा अर्थ तुम्ही यश मिळविण्यासाठी केलेला पहिला प्रयत्न असतो. दुसऱ्याला पराभूत करणे तर फार सोपे आहे. कठीण तर दुसऱ्याचे मन जिंकणे आहे.

ते पुढे म्हणाले, कोणतेही ध्येय यशस्वीपणे गाठायचे असेल तर त्या ध्येयाशी तुमची कमालीची एकनिष्ठता असावी लागते, सगळे प्रयत्न त्या एकाच दिशेने वळवावे लागतात. ही शिकवण भारतरत्न डॉ.ए. पी. जे अब्दुल कलाम यांनी दिली आहे ती आपण अंगिकारली पाहिजे. येत्या काळात आपल्याला  ५ जी  वर काम करावे लागणार आहे ते म्हणजे गीता, गंगा, गोमाता , गुरु व गोविंद, असेही त्यांनी सांगितले. काशिनाथ भातगुणकी यांनी कार्यक्रमाचे नियोजन केले होते.