समाज सेवेसाठी संवेदना महत्वाची : सुहासराव हिरेमठ

पुणे : “निःस्वार्थ समाज सेवेसाठी संवेदना महत्वाची आहे. ही संवेदना कधीही क्षीण होता कामा नये. कारण संवेदनेतूनच समाजासाठी काम करण्याची प्रेरणा, उभारी मिळते,” असे प्रतिपादन राष्ट्रीय स्वयंसेवक संघाचे जेष्ठ प्रचारक सुहासराव हिरेमठ यांनी केले.

भारतीय संस्कृती संवर्धक संस्थेला (मोतीबाग) जेष्ठ उद्योजक जयंत नातू आणि अश्वमेध परिवाराच्या वतीने एक कोटी रुपयांचा निधी समारंभपूर्वक प्रदान करण्यात आला. त्यावेळी हिरेमठ बोलत होते. राष्ट्रीय स्वयंसेवक संघाचे केंद्रीय कार्यकर्ते प्रा. अनिरुद्ध देशपांडे, भारतीय संस्कृती संवर्धक संस्थेचे अध्यक्ष राजीव जोशी, पुणे महानगर संघचालक रविंद्र वंजारवाडकर, उद्योजक जयंत नातू आदी उपस्थित होते.
सुहासराव हिरेमठ म्हणाले, “आजच्या काळात सर्व काही मिळेल; पण दानशूर आणि समाजासाठी काही करण्याची प्रेरणा असणाऱ्या दात्यांची कमी आहे. आजच्या या कार्यक्रमातून समाजालाही प्रेरणा मिळणार आहे. त्यांच्यातील संवेदना जागृत होण्यास मदत होणार आहे. प्रत्येकाने समाजासाठी, सेवा प्रकल्पासाठी संकल्प करायला हवा. दरवर्षी विशिष्ट रक्कम, वेळ सेवा प्रकल्पासाठी द्यावी. घरातील मंगलप्रसंगी सेवा प्रकल्पासाठी गरजूंना मदतीचा हात द्यावा.”

प्रा. अनिरुद्ध देशपांडे यांनी सांगितले की, भारतीय संस्कृतीमध्ये दातृत्व हा महत्वाचा गुण आहे. हा गुण जपण्याबरोबरच विकसित करण्याचा प्रयत्न करायला हवा. राष्ट्रीय स्वयंसेवक संघ आणि समाज हे स्वतंत्र नाही तर एकरुप असे आहेत. समर्पण भावनेने काम करण्याची गरज आहे. ही भावना अशा कार्यक्रमामुळे वाढीस लागणार आहे. आजचा कार्यक्रम म्हणजे समर्पणाचे दर्शन घडवत आहे. 

जयंत नातू यांनी मनोगत व्यक्त करताना सांगितले की, राष्ट्रीय भावनेने काम करणारे कार्यकर्ते संघाच्या माध्यमातून तयार झाले आहेत. देशासाठी अनेक प्रचारक घडविले आहेत. समाज आणि संघाने आयुष्यात जे दिले त्याची परतफेड करता येत नाही; पण कर्तव्य भावनेतून हा निधी प्रदान करत आहे.
राजीव जोशी यांनी संघ कार्याची आणि मोतीबाग संस्थेच्या नवीन बांधकाम प्रकल्पाबाबत माहिती सांगितली. अशोक वझे यांनी स्वागत केले. ऍड. पद्मा गोखले यांनी सूत्रसंचालन व प्रास्ताविक केले. मेधावी नातू यांनी स्वागत संघ गीत सादर केले. डॉ. पुष्पा रानडे यांनी वंदे मातरम् सादर केले.

रोटरी क्लब ऑफ पुणे युवा आणि सुपरमाईंडच्या वतीने इयत्ता दहावीतील विद्यार्थ्यांसाठी ‘दहावी सक्सेस मंत्रा’ कार्यक्रम
पुणे : जग दिवसेंदिवस अधिक स्पर्धात्मक होत आहे. अशावेळी विद्यार्थ्यांना अभ्यासामध्ये वेगळेपणा दाखवणे गरजेचे आहे. हे वेगळेपण केवळ ‘हार्ड वर्क’ करून येणार नाही, तर त्यासाठी विद्यार्थ्यांनी ‘स्मार्ट वर्क’ केले पाहिजे. स्मार्ट पद्धतीने अभ्यास करून विषय समजून घेणे आणि त्यानुसार कोणत्याही ताणतणावाशिवाय परीक्षा देणे, हाच खऱ्या अर्थाने दहावीतील सक्सेस मंत्रा आहे, असे मत रोटरी क्लब ३१३१ च्या डिस्ट्रिक्ट गव्हर्नर व व्याख्यात्या मंजू फडके यांनी व्यक्त केले.

रोटरी क्लब ऑफ पुणे युवा आणि सुपरमाईंडच्या वतीने इयत्ता दहावीतील विद्यार्थ्यांसाठी ‘दहावी सक्सेस मंत्रा’ या विनामूल्य कार्यक्रमाचे आयोजन कोथरूडमधील यशवंतराव चव्हाण नाट्यगृहात करण्यात आले होते. कार्यक्रमाला रोटरी क्लब ऑफ पुणे युवाचे अध्यक्ष निनाद जोग, श्रीकांत जोशी, अर्चिता मडके, दीपा बडवे, क्लबचे इतर पदाधिकारी व सदस्य आदी उपस्थित होते.

मंजू फडके म्हणाल्या, स्पर्धा कोणत्या बाजूने येईल हे सांगता येत नाही. त्यामुळे विद्यार्थ्यांनी कायम स्पर्धेसाठी तयार राहिले पाहिजे. दहावी हा केवळ आपल्या शैक्षणिक करिअरचाच नव्हे तर संपूर्ण आयुष्याचा पाया असतो. यानंतरच तुमच्या आयुष्याला योग्य दिशा मिळणार आहे.  त्यामुळे दहावी मध्ये मजा मस्ती न करता आता जर तुम्ही कष्ट करून अभ्यास केला तरच तुम्हाला चांगले करिअर मिळू शकेल.

निनाद जोग म्हणाले, दहावी मध्ये असताना मुलांबरोबर पालकांनाही त्यांच्या भविष्याची चिंता असते. दोघांच्याही चिंतेचे निराकरण वेगवेगळ्या पद्धतीने करता येऊ शकते. त्यासाठीच अशा प्रकारचा कार्यक्रम आयोजित करण्यात आले आहे.  या कार्यक्रमामधून पालकांचे व विद्यार्थ्यांचे मार्कंचे टेन्शन कमी होते व विद्यार्थ्यांना मोटिव्हेशन मिळते.

गेले सात वर्षे सातत्याने हा उपक्रम राबविला जातो. 40-50% पासून 90-95% पर्यंतच्या विद्यार्थ्यांना या सेमिनारच्या माध्यमातून मार्गदर्शन मिळते. म्हणूनच या कार्यक्रमाला दिवसेंदिवस उत्स्फूर्त प्रतिसाद मिळत आहे. असे क्लबचे माजी अध्यक्ष श्रीकांत जोशी यांनी सांगितले.

महाराष्ट्र राज्य माध्यमिक आणि उच्च माध्यमिक मंडळाच्या विज्ञान विषयाच्या सदस्या डॉ. सुलभा विधाते यांनी विज्ञान विषयावर, मंजुषा वैद्य यांनी आयएमपी स्टडी टेक्निक आणि डॉ. जयश्री अत्रे यांनी गणित विषयावर विद्यार्थ्यांना मार्गदर्शन केले. दीपा बडवे व अर्चिता मडके यांनी सूत्रसंचालन केले व आभार दिनेश अंकम यांनी मानले

पुणे (दि. १९ ऑक्टोंबर २०२३) विश्व श्रीराम सेनेच्या वतीने मोशी येथे इंद्रायणी नदीच्या तीरावर रविवारी (दि.१९) सायंकाळी ‘भव्य काशी गंगा आरती’चे आयोजन करण्यात आले होते. भक्ती भावपूर्ण वातावरणात इंद्रायणी मातेची यावेळी काशी येथून आलेल्या पौरोहित्यांनी विधिवत आरती केली.
यावेळी पालघर हिंदूशक्ती पीठ येथील स्वामी श्री भारतानंद सरस्वती महाराज, विश्व हिंदू परिषदेचे सहमंत्री शंकर गायकर, समस्त हिंदू आघाडीचे संस्थापक मिलिंद एकबोटे, आमदार महेश दादा लांडगे, भाजपा प्रदेश उपाध्यक्ष राजेश पांडे, राष्ट्रीय मागासवर्ग आयोगाचे महाराष्ट्र राज्य समन्वयक अर्जुन गुप्ता, भारतीय खाद्य महामंडळ महाराष्ट्र सल्लागार समिती सदस्य व विश्व श्रीराम सेनेचे राष्ट्रीय अध्यक्ष संयोजक डॉ. लालबाबू अंबीकलाल गुप्ता, माजी नगरसेवक धनंजय आल्हाट, सुरेश म्हेत्रे, हभप शेष महाराज, राष्ट्रीय स्वयंसेवक संघाचे विश्राम कुलकर्णी, अनिल उपाध्ये, चंद्रकांत तापकीर, गणेश आंबेकर, उमेश सिंग
आदींसह हजारो उत्तर भारतीय भक्त भाविक उपस्थित होते.
राष्ट्रीय एकतेतून राष्ट्र विकास हे ध्येय ठेवून विविध सामाजिक व धार्मिक उपक्रमासह विश्व श्रीराम सेना ही संस्था छठ महापुजा निमित्त भव्य गंगा आरतीचे आयोजन करीत असते. या महोत्सवाची सांगता सोमवारी पहाटे पाच वाजता सूर्योदय झाल्यानंतर सूर्याला अर्ध्य देऊन होणार आहे. सुर्यषष्टी महाव्रत महापूजा, छोटकी छट, भव्य गंगा आरती सह विविध, धार्मिक, सामाजिक, प्रबोधनात्मक कार्यक्रमांचे आयोजन करण्यात आले होते. सूर्याची उपासना करण्यासाठी छटपूजेचे व्रत केले जाते. सर्व मनोकामना पूर्ण करणारे हे व्रत असल्याचे प्राचीन काळापासूनची सामाजिक धारणा आहे. निसर्गात आणि समाजात एकरूपता साधणार्‍या या व्रतात, आस्था, प्रेम, विश्वास, त्याग आणि पर्यावरण प्रति समर्पणाची भावना आहे अशी माहिती लालबाबु गुप्ता यांनी दिली.
यावेळी संजय सम्राट म्युझिकल ग्रुप यांनी धार्मिक गीते सादर केली.

संयोजनात श्याम गुप्ता, उमेश सिंग, मुन्ना सिंह, राजकुमार गुप्ता, विनोद गुप्ता, माधव गुप्ता, पप्पू गुप्ता, राजकुमार प्रसाद, संजय विश्वकर्मा आदींनी सहभाग घेतला होता.

पुणे-

   भारताच्या महिला माजी पंतप्रधान स्व. इंदिराजी गांधी यांच्या १०६ व्या जयंती निमित्त आज पुणे शहर जिल्हा काँग्रेस कमिटीच्या वतीने काँग्रेस भवन येथे त्यांच्या प्रतिमेस व पुतळ्यास शहराध्यक्ष अरविंद शिंदे यांच्या हस्ते पुष्पहार अर्पण करून अभिवादन करण्यात आले.

      यावेळी बोलताना अरविंद शिंदे म्हणाले की, ‘‘आयर्न लेडी पंतप्रधान इंदिराजी गांधी या देशाच्या स्वाभिमान आहे. आज खास करून जयंती निमित्ताने काँग्रेस भवनचा परिसर अनेक महिलांच्या उपस्थितीने गौरवान्वित झाला आहे. इंदिरा गांधी यांची वीससूत्री प्रणाली आजही देशाला दिशादर्शक आहे. इंदिराजींनी त्यांच्या कालावधी मध्ये आणलेल्या विविध योजनांपैकी हरितक्रांती मुळे भारत देश सुजलाम सुफलाम झालेला आहे. त्यांनी जाहिर केलेल्या गरीबी हटाव नारा यामुळे पुढील ३० वर्षांमध्ये देशातील गरीबी ५०% ने कमी झाली.

      विदेशी वस्तूंवर बहिष्कार करणाऱ्या आंदोलनाची पहिली समर्थक जीने आपले विदेशी कपडे व खेळणी यांची होळी केली ती लहानगी म्हणजे इंदिरा.

      बालवयातच मायेचे छत्र हरपलेली, वडिलांच्या स्वातंत्र्य लढ्यातील सहभागामुळे स्वमदतीतून स्वत:ला सावरणारी निडर मुलगी म्हणजे इंदिरा.

      ‘मै नेहरू की बेटी हूँ कितना भी मारो मगर मै चिल्लाउंगी नही और तिरंगा झेंडा छोडुंगी नही’ असे इंग्रजांना ठणकाहून सांगणारी आंदोलक म्हणजे इंदिरा.

      चूल आणि मूल यांच्या पलीकडे महिलांना काँग्रेस पक्षात पहिल्यांदाच महिलांसाठी एक स्वतंत्र्य फ्रंटल संघटक सुरू करून महिलांना जबाबदारी व अधिकारी देणारी पहिली महिला म्हणजे इंदिरा. प्रजासत्ताक राष्ट्राची साहसी, पोलादी महिला व आजवर झालेल्या पंतप्रधानांपैकी एकमेव महिला पंतप्रधान म्हणजे इंदिराजी गांधी.

      तळागाळात कारखानदारी पोहचावी, सर्वांना रोजगार मिळावा अशी भूमिका इंदिरा गांधी यांची होती. स्थानिक नागरिक व नेतृत्वांची विचार सरणी बदलणार नाही तो पर्यंत राष्ट्र प्रगती करू शकणार नाही. त्यासाठी सर्वांची आर्थिक पत वाढली पाहिजे त्या अनुषंगाने बँकांचे राष्ट्रीयकरण करणारी व उद्योजकता वाढीस लावणारे धुरंधर नेतृत्व म्हणजे इंदिराजी गांधी होत. त्यांच्या जयंती दिनी कोटी कोटी प्रणाम.’’

      यानंतर महाराष्ट्र प्रदेश काँग्रेसचे सरचिटणीस ॲड. अभय छाजेड, महिला काँग्रेसच्या ॲड. राजश्री अडसूळ, विठ्ठल गायकवाड, ॲड. अश्विनी गवारे यांनी आपले विचार व्यक्त केले.  

 यावेळी नगरसेविका लता राजगुरू, संगिता तिवारी, ब्लॉक अध्यक्ष सुजित यादव, हेमंत राजभोज, राजू ठोंबरे, रमेश सोनकांबळे, रमेश सकट, युवक अध्यक्ष राहुल शिरसाट, द. स. पोळेकर, सुरेश नांगरे, वाल्मिक जगताप, उषा राजगुरू, छाया जाधव, अनिता मखवाणी, ताई कसबे, मोतीबाई उडते, दिपक ओव्हाळ, आशुतोष जाधव, राज घलोत, फैयाज शेख, हरिदास अडसूळ, विठ्ठलराव हाडके आदींसह असंख्य काँग्रेसजण उपस्थित होते.

      कार्यक्रमासाठी उपस्थित असणाऱ्यांचे आभार प्रदेश प्रतिनिधी यशराज पारखी पाटील यांनी मानले. आभार व्यक्त ते म्हणाले की, ‘‘आधुनिक काळातील जीवनावश्यक तंत्रज्ञानाची पाया भरणी इंदिराजी गांधी यांनी केली. महिला आरक्षण मिळवून देणाऱ्या व महिलांना स्वयंपूर्ण करणाऱ्या प्रणेत्या म्हणजे इंदिराजी गांधी होत. देशांतर्गत मैदान राजकारणाचे असो, आतंरराष्ट्रीय रणनीतीचे असो किंवा खेळाचे असो इंदिराजींनी कधीही जातीय भाषीय प्रांतीय भेदभावाला थारा दिला नाही. इंदिरा गांधी पंतप्रधान असताना भारतात आशियाई खेळांचे भव्य दिव्य आयोजन केले होते. समता, समानता व बंधूभाव यांचे त्यांनी नेहमीच स्वागत केले.’’

संमेलनाचे मुख्य प्रवर्तक व ज्येष्ठ साहित्यिक दशरथ यादव यांची माहिती

सासवड, दि. १९ खानवडी (ता.पुरंदर) येथे सोळाव्या राज्यस्तरीय महात्मा फुले प्रबोधन मराठी साहित्य संमेलनात पुणे महापालिकेचे विभागीय आरोग्य निरीक्षक आशिष माणिकराव सुपनार यांना राज्यस्तरीय महात्मा फुले प्रशासकीय कार्य गौरव पुरस्कार प्रदान करण्यात येणार आहे, अशी माहिती
संमेलनाचे मुख्य संयोजक व ज्येष्ठ साहित्यिक दशरथ यादव यांनी दिली.
अखिल भारतीय मराठी साहित्य संशोधन परिषदेच्या वतीने महात्मा फुले यांच्या मूळ खानवडी गावी २७ नोव्हेंबर रोजी साहित्य संमेलनाचे आयोजन करण्यात आले आहे,
पुणे जिल्हा परिषदेत दुर्गम भागात 4 वर्ष उत्कृष्ठ आरोग्य सेवा केली आहे.
पुणे महानगरपालिकेत 12वर्षे सेवा करीत सर्व सामान्य नागरिकांच्या तक्रार निवारण करीता त्यांनी भरीव कामगिरी केली आहे. कोरोना काळात अनेकांचे प्राण वाचवण्यात मोलाचे योगदान दिले. सामाजिक कामात त्यांचा नेहमी सहभाग असतो. उरुळी कांचन येथील सामाजिक व धार्मिक कार्यक्रम आयोजित करण्यात त्यांचा नेहमी पुढाकार असतो.
प्रमुख पाहुणे म्हणून खासदार सौ सुप्रिया सुळे,आमदार सजंय जगताप, माजी मंत्री विजयबापू शिवतारे यांच्या हस्ते सुपनार यांना पुरस्कार देण्यात येईल.

पुणे -एकदिवसीय क्रिकेट विश्वचषक स्पर्धेत न्यूझीलंडचा पराभव करून भारताने अंतिम फेरीत धडक मारली असून रविवारी( दि.१९)होणाऱ्या अंतिम सामन्यात विजयी होऊन विश्वकरंडकावर भारतानेच नाव कोरावे यासाठी शनिवारी ग्रामदैवत श्री कसबा गणपतीला साकडे घालण्यात आले
पुणे शहर काँग्रेसचे सरचिटणीस अमित बागुल व मित्रपरिवारातर्फे ग्रामदैवत श्री कसबा गणपतीची महाआरती करून भारताने विश्वचषक जिंकावा अशी मनोभावे प्रार्थना करण्यात आली.यावेळी संयोजक अमित बागुल, नंदकुमार बानगुडे,महेश ढवळे,अभिषेक बागुल, इम्तियाज तांबोळी,सुनील भोसले, सुरेश कांबळे, चेतन अगरवाल, राजु नाणेकर, सुरेश गायकवाड, समीर शिंदे, क्रिकेट कोच मारवाडी, बाबालाल पोळके, राकेश नामेकर, राहुल तौर, जयकुमार ठोंबरे, विश्वास दिघे, गोरख मरळ आदी उपस्थित होते.यावेळी मंदिराबाहेर जल्लोष करून भारतीय क्रिकेट संघाला शुभेच्छाही देण्यात आल्या.यावेळी अमित बागुल म्हणाले की, यंदा क्रिकेट विश्वचषक २०२३ मध्ये भारतीय क्रिकेट संघाने सर्व सामने जिंकून आपले वर्चस्व कायम ठेवले आहे. उत्कृष्ट कामगिरी करत १०पैकी १०सामन्यांमध्ये भारतीय क्रिकेट संघ अपराजित राहिला आहे.त्यामुळे यंदाच्या विश्वकरंडकावर भारताचे नाव कोरले जाईल असा आशावाद संपूर्ण देशात आहे.त्यासाठी स्थानिक क्रिकेट खेळाडूंसमवेत ग्रामदैवत श्री कसबा गणपतीच्या चरणी प्रार्थना करण्यात आली.

पुणे : खराडी-चंदननगर येथील महालक्ष्मी लॉन्स पुणे नगर रोड या ठिकाणी सकल मराठा समाजाच्या सभेच्या निमित्ताने २० नोव्हेंबर रोजी सकाळी ६ ते रात्री १२ वाजेपर्यंत वाहतुक कोंडी टाळण्याच्यादृष्टीने जिल्हाधिकारी डॉ.राजेश देशमुख यांनी पुणे-अहमदनगर रोडवरील जड-अवजड वाहतूक पर्यायी मार्गाने वळविण्याचे आदेश दिले आहेत.

अहमदनगर बाजूकडून पुणे शहराकडे येणारी जड-अवजड वाहने शिक्रापूर येथून चाकण, भोसरीमार्गे पुणे- मुंबईकडे जातील. सदर आदेश अत्यावश्यक सेवेतील वाहने, उदा. पोलीस, रुग्णवाहिका, अग्निशमन वाहन, पेट्रोल- डिझेल टँकर्स, पीएमपीएमएल बसेस, स्कुल बस यांना लागू राहणार नाही.

गावखेड्याच्या अपेक्षा पूर्ण करण्याची मागणी
पुणे : गावगाड्याचा कारभार चालवणाऱ्या सरपंच, ग्रामसेवक, संगणक परिचालक या प्रमुख घटकांच्या अपेक्षा पूर्ण कराव्यात. शासनदरबारी वारंवार मागण्या करूनही गावखेड्यांना सावत्रपणाची वागणूक दिली जात आहे. आमच्या मागण्यांचा सकारात्मक विचार झाला नाही, तर राज्य शासनाला गावकरभाऱ्यांच्या रोषाला सामोरे जावे लागेल, असा इशारा गावखेड्यांच्या अपेक्षा मोर्चाच्या सहविचार व पूर्वतयारीच्या राज्यस्तरीय बैठकीतून देण्यात आला.
अखिल भारतीय सरपंच परिषदेच्या पुढाकाराने पुण्यातील पाषाण रोड भागातील सीपीआर इन्स्टिट्युटच्या सभागृहात सरपंच, ग्रामसेवक, संगणक परिचालक, ग्राम रोजगार सेवक आणि ग्रामपंचायत कर्मचारी या सर्व राज्यस्तरीय संघटनांची संयुक्त बैठक आयोजित करण्यात आली होती. अखिल भारतीय सरपंच परिषदेचे संस्थापक प्रदेशाध्यक्ष जयंतराव पाटील यांच्या संकल्पनेतून राज्यभरातील ग्रामपंचायतींना आणि ग्रामविकासाचा गाडा चालवणाऱ्या प्रमुख घटकांना एकत्र करून लढा उभारण्यासाठी ही विचारविनिमयाची बैठक होती. या बैठकीत ग्रामपंचायत चालवणाऱ्या सर्व घटकांच्या संघटनांची एकत्रित मोट बांधण्याचा व यापुढे सर्वांच्या प्रलंबित मागाण्यांसाठी समान कृती कार्यक्रम तयार करून एकत्रित लढा उभारण्याचे धोरण जाहीर करण्यात आले.

सरपंच परिषदेचे जयंतराव पाटील, ग्रामसेवक संघटनेचे प्रदेशाध्यक्ष संजीव निकम, संगणक परिचालक संघटनेचे प्रदेशाध्यक्ष सिद्धेश्वर मुंडे, ग्राम रोजगार संघटनेचे प्रदेशाध्यक्ष विनोद चव्हाण, सरपंच परिषदेचे प्रदेश सरचिटणीस विवेक ठाकरे, कोअर कमिटीचे पुरुजीत चौधरी, प्रदेश उपाध्यक्ष शशिकांत मोरे, महिला उपाध्यक्षा रेखा विद्याधर टापरे, प्रदेश सल्लागार प्रा. राजेंद्र कराडे आदी प्रमुख उपस्थित होते. प्रदीप माने यांनी बैठकीचे प्रास्ताविक केले. जळगाव जिल्हाध्यक्ष वासुदेव नरवाडे यांनी आभार मानले.

जयंतराव पाटील म्हणाले, “गावखेड्यांना देण्यात येणारी सावत्र वागणूक थांबवावी, सरपंचांना जाहीर केलेले मानधन नियमित अदा करावे, अनियमिततेच्या नावाखाली ग्रामसेवकांना नाहक फौजदारी कचाट्यात अडकवण्याचे प्रकार थांबवावेत, संगणक परिचालकांना कर्मचारी दर्जा द्यावा, त्यांना खाजगी कंपनीच्या मार्फत नेमून दरसाल कोट्यावधी रुपये वाचवावेत, ग्राम रोजगार सेवकांना दुर्लक्षित करू नये, ग्रामपंचायत कर्मचाऱ्यांना राहणीमान भत्ता लागू करावा, अशा आमच्या मागण्या आहेत. यावर शासनाने त्वरित निर्णय घ्यावा व आम्हाला न्याय द्यावा.”

“ग्रामपंचायत कारभारात भूमिका असणाऱ्या सर्व प्रमुख घटकांना एकत्र करत शासनाकडे वर्षानुवर्षे प्रलंबित मागण्यांकडे मुद्दाम दुर्लक्ष होत असल्याने येत्या पंधरवाड्यात राज्य शासनाच्या ग्रामविकास विभागाकडे पुन्हा मागणी करण्यात येणार आहे. याबाबत शासनाने तात्काळ धोरण न ठरवल्यास डिसेंबर महिन्याच्या शेवटच्या आठवड्यात राज्यभरातील ग्रामपंचायती काम बंद आंदोलन उभारतील, असा निर्धार सर्वानुमते करण्यात आला आहे. शासनाचे लक्ष वेधण्यासाठी येत्या काळात सरपंच, उपसरपंच, ग्रामपंचायत सदस्य, ग्रामसेवक, ग्राम रोजगार सेवक, संगणक परिचालक व ग्रामपंचायत कर्मचारी यांच्या सर्वांचा सुमारे तीन लाखाचा मोर्चा मुंबई मंत्रालयावर काढण्याचे ठरले आहे,” असेही पाटील यांनी नमूद केले.

पुणे-लष्करातून निवृत्त झालेल्या एका 64 वर्षीय कर्मचाऱ्यांला अज्ञातांनी अश्लील व्हिडिओ व्हायरल करण्याची धमकी देत3 लाख 74 हजार 232 रुपये ट्रान्स्फर करायला लावून फसवणूक केल्याची तक्रार लोणीकंद पोलीस ठाण्यात दाखल झाल्याची माहिती पोलिसांनी दिली आहे.याप्रकरणी लष्करातून निवृत्त झालेल्या 64 वर्षीय व्यक्तीने फिर्याद दिली आहे. त्यानुसार फोन वरून बोलणाऱ्या राहुल शर्मा आणि अज्ञात मोबाईलधारकाविरोधात फसवणुकीचा गुन्हा दाखल करण्यात आला आहे. ही घटना 11 ते 17 ऑगस्ट 2023 दरम्यान ऑनलाईन घडली आहे.

पोलिसांनी दिलेल्या माहितीनुसार, फिर्यादी हे लष्करातून निवृत्त झाले असून ते पुण्यातील वाघोली परिसरात कुटुंबा समवेत राहायला आहेत. सायबर चोरट्याने फिर्यादी यांना व्हिडिओ कॉल केला. फिर्यादी यांच्याकडून अवधानाने तो व्हिडिओ कॉल उचलल्या गेल्या. त्यावेळी समोरील व्यक्ती कपडे काढत होती. यामुळे फिर्यादी यांनी व्हिडिओ कॉल लगेच ठेवला. मात्र सायबर चोरट्याने तो व्हिडिओ कॉल रेकॉर्ड केला. यानंतर सायबर चोरट्याने व्हिडिओ व्हायरल करण्याची धमकी देऊन फिर्यादी यांना पैशाची मागणी केली. तसेच सायबर चोरट्याने फिर्यादी यांना दिल्ली पोलीस मधून बोलत असल्याचे सांगत व्हिडीओ खूप मोठा असून सोशल मीडियावरून डिलिट करण्यासाठी वेळोवेळी 3 लाख 74 हजार 232 रुपये ट्रान्स्फर करायला लावून फसवणूक केली आहे. या प्रकरणाचा पुढील तपास लोणीकंद पोलिस ठाण्याचे पोलिस निरीक्षक (गुन्हे) एस ढाकणे करत आहेत.