पुणे, दि. २० : यशवंतराव चव्हाण द्रुतगती मार्गावर हायवे ट्रॅफीक मॅनेजमेंट सिस्टीम अंतर्गत पुणे वाहिनीवर कि.मी ३५/५०० येथे गॅन्ट्री उभारण्याचे काम महाराष्ट्र राज्य रस्ते विकास महामंडळामार्फत सुरू असून २१ नोव्हेंबर रोजी दुपारी १२ ते २ या वेळेत या लांबीत मुंबईहून पुण्याकडे जाणारी वाहतूक पूर्णत: बंद राहणार आहे. या कालावधीत मुंबईहून पुण्याकडे जाणारी हलकी वाहने द्रुतगती मार्गाच्या कि.मी ०८/२०० येथील शेडूंग फाटा येथून वळवून रा.म.मा. क्र. ४८ जुना मुंबई पुणे महामार्गावरील शिंग्रोबा घाटातून द्रुतगती मार्गाच्या मॅजिक पॉइंट कि.मी. ४२/१०० येथून पुन्हा द्रुतगती मार्गावरील पुणे वाहिनीवर मार्गस्थ करण्यात येईल. तसेच गॅन्ट्री बसविण्याचे काम पूर्ण झाल्यावर दुपारी २ वाजता द्रुतगती मार्गावरील मुंबईहून पुण्याकडे जाणारी वाहतूक पुन्हा सुरु करण्यात येणार असल्याची माहिती महाराष्ट्र राज्य रस्ते विकास महामंडळाने दिली आहे.

पुणे, दि. २० नोव्हेंबर २०२३: पश्चिम महाराष्ट्रातील शहरी व ग्रामीण भागामध्ये वीजतारा तुटणे, झोल पडणे किंवा जमिनीवर लोंबकळणे, फ्यूज पेट्या व फिडर पिलरचे दरवाजे तुटणे किंवा नसणे, खोदाईमुळे भूमिगत केबल उघड्यावर पडणे अशा वीजसुरक्षेला धोका निर्माण करणाऱ्या यंत्रणेची माहिती मोबाईलच्या व्हॉटस् अॅपद्वारे द्यावी असे आवाहन महावितरणकडून करण्यात आले आहे.

पुणे परिमंडल अंतर्गत पुणे व पिंपरी चिंचवड शहरांसह हवेली तालुका तसेच मुळशी, वेल्हे, मावळ, खेड, जुन्नर व आंबेगाव तालुक्यांसाठी ७८७५७६७१२३ तसेच बारामती मंडल अंतर्गत बारामती, इंदापूर, दौंड, शिरूर, भोर व पुरंदर या तालुक्यांसाठी ७८७५७६८०७४ हा व्हॉटस् अॅप मोबाईल क्रमांक महावितरणकडून उपलब्ध करून देण्यात आला आहे. तसेच सोलापूर जिल्ह्यासाठी ७८७५४४०४५५, कोल्हापूर- ७८७५७६९१०३, सांगली- ७८७५७६९४४९ आणि सातारा जिल्ह्यासाठी ७८७५७६८५५४ हा व्हॉटस् अॅप मोबाईल क्रमांक उपलब्ध करून देण्यात आला आहे.

या सर्व क्रमांकावर फक्त वीज वितरण यंत्रणेपासून सुरक्षेचा धोका असल्याचा फोटो व संपूर्ण पत्ता किंवा लोकेशनसह माहिती / तक्रारी स्वीकारण्यात येत आहेत. त्यामुळे नागरिकांनी कॉल करण्याऐवजी फक्त व्हॉटस् अॅपद्वारे माहिती द्यावी. तसेच ज्या नागरिकांकडे व्हॉटस् अॅप नाहीत त्यांनी ‘एसएमएस’द्वारे संबंधित मोबाईल क्रमांकावर माहिती दिल्यास त्याचेही निराकरण करण्यात येणार आहे. यासोबतच २४ तास सुरू असणाऱ्या १८००-२१२-३४३५ किंवा १८००-२३३-३४३५ किंवा १९१२ या महावितरणच्या टोल फ्री क्रमांकावर संपर्क साधता येईल.

महावितरणची वीजतार तुटलेली आहे. तारेचा झोल किंवा तार जमिनीवर लोंबळकत आहे. फ्यूज पेट्या किंवा फिडर पिलरचे झाकणे उघडे किंवा तुटलेले आहे. रोहित्राचे कुंपण उघडे आहे. खोदाईमुळे भूमिगत वाहिनी उघड्यावर आहे आदी स्वरुपाची माहिती/तक्रारी छायाचित्रांसोबत संबंधित स्थळाच्या संपूर्ण पत्त्याचा उल्लेख करून किंवा लोकेशनसह व्हॉटस् अॅपच्या मोबाईल क्रमांकावर पाठवता येत आहे.

व्हॉटस् अॅपद्वारे प्राप्त झालेली फोटोसह माहिती किंवा तक्रार लगेचच संबंधित विभागीय व उपविभागीय कार्यालयात पाठविण्यात येत आहेत. त्याप्रमाणे वीजयंत्रणेच्या दुरुस्तीचे काम झाल्यानंतर संबंधित तक्रारकर्त्यांना व्हॉटस् अॅपद्वारेच दुरूस्तीनंतरचे छायाचित्र पाठवून कळविण्यात येत आहे. नागरिकांनी पाठविलेल्या काही तक्रारींचे निवारण करण्यासाठी वरिष्ठ कार्यालयांची मंजूरी, निधी किंवा शिफ्टींगची गरज असल्यास तसे प्रस्ताव वरिष्ठ कार्यालयाकडे पाठविण्यात येतील व त्याबाबत संबंधित तक्रारकर्त्यांना कळविण्यात येणार आहे. महावितरणच्या या उपक्रमाला सार्वजनिक वीजसुरक्षेसाठी प्रतिसाद द्यावा व सहकार्य करावे, असे आवाहन पुणे प्रादेशिक संचालक श्री. अंकुश नाळे यांनी केले आहे.

महावितरणचे रोहित्र, फिडर पिलर, वीजखांब आदींवर कोणत्याही प्रकारचे पोस्टर्स, पत्रके चिकटवू नयेत. पोस्टर्स किंवा पत्रके चिकटवताना विद्युत अपघाताची शक्यता आहे. त्यामुळे जीव धोक्यात घालून कोणत्याही प्रकारचे पत्रके किंवा पोस्टर्स वीजयंत्रणेवर लावू नयेत किंवा चिकटवू नयेत असे आवाहन करण्यात आले आहे.

पुणे-दिवाळीपासून हवेतील गारव्यात वाढ झाली असून सध्या (Maharashtra) राज्यभरात कोरडे वातावरण आहे. पुढील तीन दिवस राज्याच्या बहुतेक भागांत किमान तापमानात सरासरी दोन ते तीन अंश सेल्सिअसने घट होण्याचा अंदाज हवामान विभागाने व्यक्त केला आहे. हवामान विभागाने दिलेल्या माहितीनुसार, राज्यावर सध्या कोणतीही हवामान प्रणाली सक्रिय नाही. त्यामुळे 23 नोव्हेंबरपर्यंत किमान तापमानात घट होण्याचा कल कायम राहील.

सरासरी दोन ते तीन अंश सेल्सिअसने तापमानात घट होण्याचा अंदाज आहे. विदर्भ आणि उत्तर महाराष्ट्रात गारठा जाणवेल. राज्यात 23 नोव्हेंबरपासून आग्नेय दिशेने येणाऱ्या बाष्पयुक्त वाऱ्याचा वेग वाढेल. त्यामुळे दक्षिण महाराष्ट्रात कमाल तापमानात वाढ होईल.

दक्षिण आणि मध्य महाराष्ट्रात ढगाळ वातावरण निर्माण होण्याचा अंदाज आहे. 24 नोव्हेंबर रोजी दक्षिण आणि मध्य महाराष्ट्राच्या काही भागांत हलक्या सरी पडण्याची शक्यता आहे. अनेक ठिकाणी पहाटे धुके पडण्याची शक्यता आहे.

राज्यात रविवारी सर्वांत कमी 14 अंश सेल्सिअस तापमान जळगावात नोंदवले गेले, तर रत्नागिरीत सर्वाधिक 35.6 अंश सेल्सिअस (Maharashtra) तापमान होते.

●    २१ नोव्हेंबर रोजी सुरू होत असलेल्या या चॅम्पियनशीपमध्ये पुण्यातील शालेय खेळाडू श्री शिव छत्रपती स्पोर्ट्स कॉम्प्लेक्स आणि विमान स्केटिंग रिंग येथे स्पर्धा करतील

●    ६०० शाळांतील १२,००० पेक्षा जास्त खेळाडू स्पर्धेत सहभागी होण्यासाठी सज्ज 

पुणे, २० नोव्हेंबर २०२३ – एसएफए चॅम्पियनशीप्स, पुणेची दुसरी आवृत्ती २१ नोव्हेंबरपासून सुरू होणार असून त्यामध्ये ६०० शाळांतील १२,००० पेक्षा जास्त खेळाडू सहभागी होणार आहे. हे खेळाडू फुटबॉल, बास्केटबॉल, स्केटिंग, धनुर्विद्या, बॅडमिंटन, कबड्डी, थ्रोबॉल, स्पीडक्युबिंग आणि इतर विविध खेळांत सहभागी होतील. एसएफए चॅम्पियनशीप विविध शाळांतील अद्याप समोर न आलेल्या गुणवान खेळाडूंना पुढे आणणार असून हे खेळाडू ३० क्रीडा विभागांमध्ये सहभागी होऊन पुण्यातील ‘क्रीडा क्षेत्रातील पहिल्या क्रमांकाची शाळा’ हा किताब मिळवण्यासाठी स्पर्धा करतील. 

श्री शिवछत्रपती स्पोर्ट्स कॉम्प्लेक्स (बालेवाडी) विमान नगर स्केटिंग रिंग आणि गंगा लीजंड्समध्ये अत्याधुनिक पायाभूत सुविधांचा समावेश असून ३ ते १८ वर्ष वयोगटातील शालेय खेळाडू एसएफए चॅम्पियनशीपमध्ये आपली गुणवत्ता दर्शवतील. या खेळाडूंमध्ये ६६ टक्के मुले व ३४ टक्के मुलींचा समावेश असून त्यांची फुटबॉल, अथलेटिक्स, स्केटिंग, पोहणे आणि बास्केटबॉलला पसंती आहे. 

या वर्षी पहिल्यांदाच एसएफए चॅम्पियनशीपच्या पुणे आवृत्तीमध्ये जिमनॅस्टिक्सचा समावेश करण्यात आला असून मुलींच्या संख्येत लक्षणीय वाढ झाली आहे. जिमनॅस्टिकमधील मुलींची संख्या तसेच त्यांचे कौशल्य मोठ्या प्रमाणावर विस्तारले आहे. दुसरीकडे स्केटिंगमध्ये यावर्षी ८०० जणांनी भाग घेतला असून कोणत्याही क्रीडा प्रकारासाठी ही चांगली सुरुवात आहे. २०२३- २०२४ एसएफए चॅम्पियनशीपच्या पुणे आवृत्तीत फुटबॉल, अथलेटिक्स, बास्केटबॉल, बुद्धीबळ या क्रीडाप्रकारांना मुलांचा सर्वाधिक सहभाग लाभला आहे, तर मुली खेळाडूंची अथलेटिक्स, पोहणे, बास्केटबॉल, स्केटिंग आणि फुटबॉल या क्रीडाप्रकारांना जास्त पसंती मिळाली आहे.

खेळाडूंना सर्वोत्तम अनुभव मिळवून देण्यासाठी एसएफए चॅम्पियनशीपमध्ये व्यावसायिक पायाभूत सुविधा आणि उपकरणे, क्रीडा संघटनांचे मान्यताप्राप्त सामना अधिकारी आणि पंच, सर्वसमावेशक वैद्यकीय स्टेशन्स, ऑन- साइट फिजिओथेरपिस्ट, क्लिनिक्स आणि वर्कशॉप्स यांचा समावेश करण्यात आला आहे. डिजिटल इंटिग्रेटेड यंत्रणेमुळे खेळाडूंना तपशीलवार आकडेवारी, कामगिरीचे विश्लेषण आणि सामन्याची व्हिडिओग्राफी मिळणार आहे. या मल्टी- स्पोर्ट प्लॅटफॉर्मकडे ऑलिंपिक्सप्रमाणे पाहाता येईल, जिथे प्रत्येक शाळेला त्यांच्या खेळाडूला क्रीडाप्रकारात स्पर्धा करण्यासाठी पाठवता येईल.

एसएफएने २०२३-२०२४ मधील चार महिन्यांत १० एसएफए चॅम्पियनशीप्सच्या माध्यमातून २ लाख खेळाडूंना प्रोत्साहन देण्याची बांधिलकी ठेवली आहे. यातून या चॅम्पियनशीपने शाळांना केंद्रस्थानी ठेवणारा क्रीडा- तंत्रज्ञान प्लॅटफॉर्म उभारण्याच्या, खेळाडूंना आघाडीवर ठेवण्याच्या आणि भविष्यातील चॅम्पियन बनण्यासाठी मार्ग आखून देण्याच्या दिशेने लक्षणीय पाऊल टाकले आहे.

सामन्यांच्या अद्ययावत माहितीसाठी आणि शालेय स्कोअरबोर्डसाठी www.sfaplay.com वर ट्यून इन करा. पहिल्या दिवशी शालेय खेळाडू श्री शिव छत्रपती स्पोर्ट्स कॉम्प्लेक्समध्ये धनुर्विद्या आणि स्केटिंग स्पर्धेत सहभागी होतील.

नामदेव समाजोन्नती परिषद, शाखा पुणे शहर व पिंपरी चिंचवड शहर : श्री संत शिरोमणी नामदेव महाराज यांच्या जयंतीनिमित्त कार्यक्रमाचे आयोजन

पुणे : श्री संत शिरोमणी नामदेव महाराज यांच्या ७५३ व्या जयंतीनिमित्त डाॅ. रामचंद्र देखणे साहित्य कला प्रतिष्ठान प्रस्तुत ‘बहुरूपी भारुड’ या कार्यक्रमाचे आयोजन करण्यात आले आहे. नामदेव समाजोन्नती परिषद शाखा पुणे शहर व पिंपरी चिंचवड शहर यांच्या संयुक्त विद्यमाने या कार्यक्रमाचे आयोजन करण्यात आले आहे. कार्यक्रमात अवधूत गांधी, अभय नलगे यांसाह ३५ हून अधिक कलाकार कार्यक्रमात सहभागी होणार असून डॉ. भावार्थ देखणे यांचे प्रमुख सादरीकरण होणार आहे, अशी माहिती नामदेव समाजोन्नती परिषद, पुणे शाखेचे अध्यक्ष संदीप लचके व पिंपरी चिंचवड शहर शाखेचे अध्यक्ष एकनाथ सदावर्ते यांनी पत्रकार परिषदेत दिली.

यावेळी सचिव सुभाष मुळे, कार्याध्यक्ष रणजीत माळवदे, खजिनदार विजय कालेकर, उपाध्यक्ष कैलास नेवासकर, सचिव रेखा गाडेकर उपस्थित होते. स्वारगेट येथील गणेश कला क्रीडा रंगमंच येथे कार्यक्रमाचे आयोजन करण्यात आले असून बुधवार, दिनांक २२ नोव्हेंबर २०२३ रोजी सायंकाळी ५.३० वाजता कार्यक्रम होणार आहे. कार्यक्रमासाठी विनामूल्य प्रवेश आहे.

संदीप लचके म्हणाले, सध्याची तरूण पिढी सोशल मीडिया आणि इंटरनेटच्या विळख्यात गुरफटलेली असून संतसाहित्य व लोककला लोप पावत चालली आहे. हीच सामाजिक बांधिलकी ओळखून श्री संत शिरोमणी नामदेव महाराज यांच्या ७५३ व्या जयंती निमित्त बहुरूपी भारुड या कार्यक्रमाचे आयोजन करण्यात आले आहे. 

संत नामदेव महाराज पालखी सोहळ्यासह संत नामदेव महाराज व पांडुरंग यांची भेट, वासुदेव, सत्वर पाव ग मला कडकलक्ष्मी, गोंधळ आदीचे सादरीकरण हे कार्यक्रमाचे विशेष आकर्षण असणार आहे. कार्यक्रमाला पिंपरी चिंचवड शहराध्यक्ष एकनाथ सदावर्ते यांचे सहकार्य व नामदेव समाजोन्नती परिषदेचे अध्यक्ष संजय नेवासकर यांचे मार्गदर्शन लाभले आहे, अशी माहिती पुणे शहर शाखेचे सचिव सुभाष मुळे यांनी दिली.

पुणे: पाठलाग करत कोयत्याने एका तरुणाची हत्या केल्याचा धक्कादायक प्रकार समोर आला आहे. किरकोळ वादातून पाठलाग करून कोयत्याने हत्या करण्यात आल्याने मध्यवर्ती भागात एकच खळबळ उडाली आहे.पुण्यातील फरासखाना पोलीस ठाण्याच्या हद्दीत हा धक्कादायक प्रकार घडला.पोलिसांनी दोन आरोपींना ताब्यात घेतले आहे. या प्रकरणी खुनाचा गुन्हा दाखल करण्यात आला आहे.

पुण्यातील गणेश पेठेतील ओसवाल बिल्डिंगच्या छतावर मध्यरात्री ही घटना घडली. सिद्धार्थ नंदकुमार हादगे असे खून झालेल्या व्यक्तीचे नाव आहे. मिळालेल्या माहितीनुसार, सिद्धार्थ आणि आरोपींचे वाद झाले होते. आरोपी कोयते घेऊन त्याच्या मागे लागले. तो ओसवाल बिल्डिंगच्या छतावर गेला असता आरोपींनी त्याला एकटे गाठत वार करून खून केला.

पुणे : मित्राला कामावरून काढल्याचा राग धरून बाणेर महाबळेश्वर चौक जवळ बंदुकी मधून झालेल्या फायरिंग मध्ये एक जण जखमी झाला असून या प्रकरणी चतुर्श्रुंगी पोलीस स्टेशन मध्ये दोघांच्या विरोधात गुन्हा दाखल करण्यात आला आहे.

या प्रकरणी आदित्य दीपक रणवरे व सागर लक्ष्मण बनसोडे रा. बाणेर या दोघांना पोलीसांनी अटक केली आहे. आरोपीचा मित्र रोहित याला कामावरून काढल्याचा राग मनात धरून निलेश पिंपळकर याला 45 एवेन्यू बिल्डिंग बाणेर जवळ भेटण्यासाठी बोलवून मारहाण करत जीवे मारण्याच्या उद्देशाने फायरिंग केली. या फायरिंग मध्ये आकाश बाणेकर वय 28, राहणार लवळे मुळशी यांच्या उजव्या पायाच्या मांडीला गोळी लागून तो गंभीर जखमी झाला.
दरम्यान पोलिसांनी एक जिवंत काढतूस, दोन खाली केस ताब्यात घेतले असून कलम 307, 506 (2),34, आर्म ऍक्ट 3 (25), महाराष्ट्र पोलीस कायदा 37 (1), सह 135 कलमाप्रमाणे गुन्हे दाखल करण्यात आले आहे. याप्रकरणी अधिक तपास चतु:शृंगी पोलीस स्टेशन अंतर्गत सुरू आहे.

समाज सेवेसाठी संवेदना महत्वाची : सुहासराव हिरेमठ

पुणे : “निःस्वार्थ समाज सेवेसाठी संवेदना महत्वाची आहे. ही संवेदना कधीही क्षीण होता कामा नये. कारण संवेदनेतूनच समाजासाठी काम करण्याची प्रेरणा, उभारी मिळते,” असे प्रतिपादन राष्ट्रीय स्वयंसेवक संघाचे जेष्ठ प्रचारक सुहासराव हिरेमठ यांनी केले.

भारतीय संस्कृती संवर्धक संस्थेला (मोतीबाग) जेष्ठ उद्योजक जयंत नातू आणि अश्वमेध परिवाराच्या वतीने एक कोटी रुपयांचा निधी समारंभपूर्वक प्रदान करण्यात आला. त्यावेळी हिरेमठ बोलत होते. राष्ट्रीय स्वयंसेवक संघाचे केंद्रीय कार्यकर्ते प्रा. अनिरुद्ध देशपांडे, भारतीय संस्कृती संवर्धक संस्थेचे अध्यक्ष राजीव जोशी, पुणे महानगर संघचालक रविंद्र वंजारवाडकर, उद्योजक जयंत नातू आदी उपस्थित होते.
सुहासराव हिरेमठ म्हणाले, “आजच्या काळात सर्व काही मिळेल; पण दानशूर आणि समाजासाठी काही करण्याची प्रेरणा असणाऱ्या दात्यांची कमी आहे. आजच्या या कार्यक्रमातून समाजालाही प्रेरणा मिळणार आहे. त्यांच्यातील संवेदना जागृत होण्यास मदत होणार आहे. प्रत्येकाने समाजासाठी, सेवा प्रकल्पासाठी संकल्प करायला हवा. दरवर्षी विशिष्ट रक्कम, वेळ सेवा प्रकल्पासाठी द्यावी. घरातील मंगलप्रसंगी सेवा प्रकल्पासाठी गरजूंना मदतीचा हात द्यावा.”

प्रा. अनिरुद्ध देशपांडे यांनी सांगितले की, भारतीय संस्कृतीमध्ये दातृत्व हा महत्वाचा गुण आहे. हा गुण जपण्याबरोबरच विकसित करण्याचा प्रयत्न करायला हवा. राष्ट्रीय स्वयंसेवक संघ आणि समाज हे स्वतंत्र नाही तर एकरुप असे आहेत. समर्पण भावनेने काम करण्याची गरज आहे. ही भावना अशा कार्यक्रमामुळे वाढीस लागणार आहे. आजचा कार्यक्रम म्हणजे समर्पणाचे दर्शन घडवत आहे. 

जयंत नातू यांनी मनोगत व्यक्त करताना सांगितले की, राष्ट्रीय भावनेने काम करणारे कार्यकर्ते संघाच्या माध्यमातून तयार झाले आहेत. देशासाठी अनेक प्रचारक घडविले आहेत. समाज आणि संघाने आयुष्यात जे दिले त्याची परतफेड करता येत नाही; पण कर्तव्य भावनेतून हा निधी प्रदान करत आहे.
राजीव जोशी यांनी संघ कार्याची आणि मोतीबाग संस्थेच्या नवीन बांधकाम प्रकल्पाबाबत माहिती सांगितली. अशोक वझे यांनी स्वागत केले. ऍड. पद्मा गोखले यांनी सूत्रसंचालन व प्रास्ताविक केले. मेधावी नातू यांनी स्वागत संघ गीत सादर केले. डॉ. पुष्पा रानडे यांनी वंदे मातरम् सादर केले.