पुणे, दि.८: आंतराष्ट्रीय महिला दिन आणि आंतरराष्ट्रीय कडधान्य वर्ष हा एक सुरेख संगम असून यानिमित्ताने राज्यातील सर्व माता, भगिनी व महिलांनी आपल्या कुटुंबाचे आरोग्य निरोगी ठेवावे असे आवाहन राज्याचे कृषि आयुक्त सुनील चव्हाण यांनी आज येथे केले. आंतरराष्ट्रीय महिला दिनाचे औचित्य साधून राज्य कृषि आयुक्तालय व विभागीय माहिती कार्यालय पुणे यांच्या संयुक्त विद्यमाने पुणे येथील शासकीय मध्यवर्ती इमारतीमध्ये प्रवेशद्वारात सर्व महिला अधिकारी / कर्मचारी यांचा सन्मान स्वागत सोहळा संपन्न झाला. यावेळी ते बोलत होते.
या कार्यक्रमास मुख्य अभियंता, अतुल चव्हाण, सार्वजनिक बांधकाम विभाग, पुणे, कृषिविस्तार प्रशिक्षण संचालक विकास पाटील, कृषि संचालक निविष्ठा व गुणनियंत्रण दिलीप झेंडे, माहिती उपसंचालक डॉ. पुरुषोत्तम पाटोदकर, पर्यटन विभागाच्या उपसंचालक सुप्रिया करमरकर, जिल्हा माहिती अधिकारी डॉ. किरण मोघे आदी उपस्थित होते.
कृषि आयुक्त श्री. चव्हाण यांनी प्रारंभी महिला दिनानिमित्त मध्यवर्ती इमारतीमध्ये कार्यरत असलेल्या सर्व महिला अधिकारी -कर्मचारी यांना महिला दिनाच्या शुभेच्छा देऊन स्वागत केले. पुढे बोलताना ते म्हणाले, संयुक्त राष्ट्रसंघाने यावर्षीचा आंतरराष्ट्रीय महिला दिन ‘डिजिटऑल-लिंग समानतेसाठी नाविन्यता आणि तंत्रज्ञान’ (डिजिटऑल- इनोव्हेशन ॲण्ड टेक्नॉलॉजी फॉर जेंडर इक्वॅलिटी) या संकल्पनेवर राबवण्याचा निर्णय घेतला आहे. या माध्यमातून सर्व महिलांना डिजिटल साक्षर करण्यासह त्यांच्या सर्वसमावेशक विकासाचे काम करणे अपेक्षित आहे.
ते पुढे म्हणाले, भारताच्या प्रयत्नामुळे २०२३ हे वर्ष आंतरराष्ट्रीय भरडधान्य वर्ष म्हणून राबवण्यात येत आहे. महिलावर्ग आरोग्याप्रती जागृत असतात. भरडधान्य हे पौष्टिक असल्याने महिलांनी आपल्या आणि कुटुंबाच्या आरोग्यासाठी त्यांचा पुरेपूर वापर करावा असेही आवाहन त्यांनी केले.
माहिती उपसंचालक डॉ. पुरुषोत्तम पाटोदकर म्हणाले, महिला दिनाचे औचित्य साधून स्त्रीशक्ती प्रती आदर व्यक्त करण्यासाठी हा उपक्रम राबवण्यात येत आहे. स्त्री ही कुटुंबाचे आर्थिक, मानसिक स्थैर्य तसेच आरोग्यासाठी नेहमी झटत असते. त्यामुळे महिलांप्रती आपल्याकडे नेहमीच आदरभाव असला पाहिले. या उपक्रमाच्या माध्यमातून तृणधान्याचे महत्त्व महिलांपर्यंत पोहोचवण्याचे काम करण्यात येत आहे, असेही डॉ. पाटोदकर म्हणाले.
आंतरराष्ट्रीय भरडधान्य वर्ष व महिला दिनानिमित्त अतिशय चांगला उपक्रम राबविल्याबद्दल मुख्य अभियंता अतुल चव्हाण यांनी कृषि आयुक्तालय व विभागीय माहिती कार्यालयाचे कौतुक केले. त्यांनी महिला अधिकारी-कर्मचाऱ्यांना शुभेच्छा दिल्या.
शासकीय मध्यवर्ती इमारतीच्या प्रवेशद्वारातच रेड कारपेटद्वारे महिला वर्गाचे स्वागत करण्यात आले. त्यांचे गुलाबपुष्प, तुळशीचे रोप, पेढा तसेच तृणधान्यापासून बनविण्यात आलेले पौष्टिक पदार्थांचे पाकिटं देऊन स्वागत करण्यात आले.
हा उपक्रम यशस्वी करण्यासाठी विभागीय माहिती कार्यालयातील गीतांजली अवचट, विलास कसबे, सचिन बहुलेकर, सुहास सत्वधर, सुजीत भिसे, जितेंद्र खंडागळे व सुनील झुंझार तसेच कृषि आयुक्त कार्यालयातील संगीता माने, उज्वला रजपुत, अश्विनी भोपळे, शिवकुमार सदाफुले, प्रिती हिराळकर आदींनी परिश्रम घेतले.

नाविन्यपूर्ण उपक्रम – स्वागताने महिलावर्ग आनंदी
आंतरराष्ट्रीय महिला दिनी शासकीय मध्यवर्ती इमारतीत अशा प्रकारचा आगळावेगळा स्वागत सोहळा प्रथमच होत आहे. या स्वागत सोहळ्यामुळे मनस्वी आनंद झाला. कृषि आयुक्त सुनील चव्हाण यांच्या संकल्पनेतून साकारलेल्या या उपक्रमाबद्दल उपस्थित महिला कर्मचाऱ्यांनी आनंद व्यक्त केला. तसेच हा नाविन्यपूर्ण उपक्रम राबविल्याबद्दल त्यांनी कृषि आयुक्तालय व विभागीय माहिती कार्यालयाचे आभारही मानले.

पुणे-सुनेचा खून करून तिच्या अपघाती मृत्यूचा बनाव करणाऱ्या सासूला पुणे पोलिसांनी २४ तासात घटनेचा छडा लाऊन अटक केली .
या प्रकरणी पोलिसांनी सांगितले कि,’ ससुन हॉस्पीटल येथुन मिळालेल्या माहितीनुसार रितु मालवी या महिलेचा पाय घसरुन मृत्यु झाल्याची माहिती देण्यात आली होती. सदर घटनेत काही घातपात अथवा संशयाचा प्रकार आहे का याची चौकशी करीत असतांना, मयताचे झाले तपासाचे चौकशीअंती कागदपत्राचे अवलोकन करता, रितु हिचा मृत्यु हा तीची सासु हिने किरकोळ कारणावरुन झालेल्या वादातुन शिवीगाळ करुन केलेल्या मारहाणीत झाला होता.खुनाचा गंभीर गुन्हा लपविण्यासाठी आरोपी सासु हिने तिला उपचारासाठी दाखल केल्यानंतर तिचा पाय घसरुन बेशुध्द झाल्याची माहिती डॉक्टरांना दिली होती.
विमानतळ पोलीसांना या घटनेत संशय निर्माण झाल्यामुळे सासु हिचेकडे केलेल्या अधिक तपासात त्यांनी सुन रितु हिस हाताने मारहान करुन फ्रिजवर ढकलुन, जमिनीवर डोके आपटुन खून केल्याची कबुली दिली. त्या दोघींमध्ये यापुर्वी देखील किरकोळ
कारणावरुन वारंवार भांडणे होत होती. त्यातुनच सासु हिने रागाच्या भरात सुन रितु माळवी हिस मारहाण करुन त्या मारहाणीत ती फरशीवर पडल्यानंतर, तीचे केसाला पकडुन तीचे डोके जमीनीवर आपटुन, तीला जीवे ठार मारले होते. याप्रकरणीविमानतळ पोलीसांनी आरोपी सासुविरुध्द विमानतळ पो स्टे १२७/२०२२, भादविक ३०२,२०३,५०४ अन्वये खुनाचा गुन्हा दाखल करुन तीस अटक केली आहे. सदर गुन्ह्याचा तपास सपोनि लहाने विमानतळ पो. स्टे. हे करीत आहेत.सदरची उल्लेखनीय कामगिरी ही पोलीस आयुक्त पुणे शहर, रितेश कुमार, पोलीस सह आयुक्त, पुणे शहर संदीप कर्णिक, अपर पोलीस आयुक्त, गुन्हे, पुणे शहर,रामनाथ पोकळे, पोलीस उप आयुक्त, परि ४, पुणे शहर, शशिकांत बोराटे, सहा.पोलीस आयुक्त, येरवडा विभाग, पुणे, किशोर जाधव यांचे मार्गदर्शनाखाली विमानतळ पो. स्टे. चे वरिष्ठ पोलीस निरीक्षक, विलास सोंडे, पोलीस निरीक्षक (गुन्हे), श्रीमती संगिता माळी, सहा.पो.निरी.एस.एन.लहाणे, म.पो.उप निरी. समु चौधरी, सहा. पोलीस फौज.शेवाळे, पोलीसअंमलदार, पठाण व तोडेकर यांनी केलेली आहे.

पुणे- आण्णाभाऊ साठे संशोधन व प्रशिक्षण संस्था (ARTI)  पुणे यांचे  वतीने   सामाजिक व शैक्षणिक क्षेत्रात  उल्लेखनीय कार्य करणाऱ्या व्यक्तींना ‘सत्यशोधक मुक्ता साळवे समाजभूषण पुरस्कार २०२३’   पुरस्कार  देऊन सन्मानित केले जाते.   २०२३ चा पुरस्कार अखिल भारतीय मराठा शिक्षण परिषदेच्या सरचिटणीस सौ.प्रमिला गायकवाड  यांनी शिक्षण क्षेत्रात केलेल्या भरीव कार्याची दाखल घेऊन  जागतिक महिला दिनाच्या पूर्वसंध्येला जेष्ठ सामाजिक कार्यकर्ते डॉ. बाबा आढाव यांचे हस्ते देऊन सन्मानित करण्यात आले. सौ. प्रमिला गायकवाड या अविरतपणे बहुजन समाजातील गरजू, होतकरू  विद्यार्थ्याचे केवळ गरीब परिस्थिती अथवा  फी अभावी शिक्षण थांबता कामा नये, किंवा असे   विद्यार्थी शिक्षण प्रवाहातून बाहेर पडू नये या साठी कार्य करत आहे.   याचा कार्याची दखल घेऊन आण्णाभाऊ साठे संशोधन व प्रशिक्षण संस्था (ARTI)  पुणे यांनी हा पुरस्कार देऊन सन्मानित  केले. समाजभूषण स्व.उत्तमराव पाटील यांचा वारसा लाभलेल्या  सौ. प्रमिला गायकवाड  यांना कार्यामध्ये यजमान माजी न्यायाधीश ॲड. भागवतराव गायकवाड  व कुटुंबीय  यांचे मदत झाली.

अखिल ब्राह्मण मध्यवर्ती संस्था (नाशिक), पुणे केंद्र युवा आघाडी तर्फे स्वा. सावरकर यांच्या पुण्यतिथीनिमित्त स्वा. सावरकर विचार दर्शन व्याख्यान संपन्न 

भारतीयाने भारतीयाचा खून करण्याच्या विरोधात सावरकर
पुणे : देशात हिंदू पेटून उठला, तर सावरकरांना माफीवीर म्हणण्याची हिंमत कोणालाही होणार नाही असे वक्तव्य येथे ज्येष्ठ अभिनेते व सावरकरप्रेमी शरद पोंक्षे यांनी केले.अखिल ब्राह्मण मध्यवर्ती संस्था (नाशिक), पुणे केंद्र युवा आघाडी तर्फे स्वा. सावरकर यांच्या पुण्यतिथीनिमित्त स्वा. सावरकर विचार दर्शन या शरद पोंक्षे यांच्या व्याख्यानाचे आयोजन सदाशिव पेठेतील भरत नाटय मंदिर येथे करण्यात आले. यावेळी अ. ब्राह्मण मध्यवर्ती संस्थेचे अध्यक्ष अ‍ॅड.अविनाश भिडे, विश्वनाथ भालेराव, मकरंद माणकीकर, अनिल शिदोरे, सुभाष सबनीस, परेश मेहेंदळे, मोहना गद्रे आदी व्यासपीठावर उपस्थित होते.

 वैचारिक मतभेद असले, तरी आपण भारतीय एक आहोत. समोरच्याने शस्त्र उचलल्यावर आपण अहिंसक होऊन चालणार नाही, त्यामुळे आपण नाईलाजाने शस्त्र उचलावे, असा स्वातंत्र्यवीर सावरकर यांचा विचार होता. भारतीयाने भारतीयाचा खून करण्याच्या विरोधात सावरकर होते, त्यामुळे गांधी हत्येत सावरकर असणे शक्यच नाही आणि तसे न्यायालयात  सिद्धही झाले आहे, असे मत शरद पोंक्षे यांनी व्यक्त केले.
शरद पोंक्षे म्हणाले, देशात हिंदू पेटून उठला, तर सावरकरांना माफीवीर म्हणण्याची हिंमत कोणालाही होणार नाही. संतश्रेष्ठ ज्ञानेश्वर महाराज, समर्थ रामदास स्वामी, छत्रपती शिवाजी महाराज, धर्मवीर संभाजी महाराज यांना बदनाम करायचे आणि हिंदुत्वाची ताकद मोडण्याचे काम सध्या सुरु आहे. नरेंद्र मोदी हे रा. स्व. संघातील व्यक्ती पंतप्रधानपदी विराजमान असल्याची ही पोटदुखी आहे.

ते पुढे म्हणाले, स्वा. सावरकर हे हिंदू राष्ट्रवादी होते आणि ते कॉंग्रेसमध्ये गेले नाहीत, हाच त्यांचा गुन्हा होता. हिंदी राष्ट्रवादाचा बुरखा फाडणारे पहिले व्यक्तिमत्व सावरकर हे होते. वेद, पुराण, कुराण आणि बायबल हे वंदनीय व पूजनीय आहेत. पण काळानुसार अनुकरणीय आहेतच असे नाही, कारण ते काळानुरुप बदलत नाहीत. त्यामुळे विज्ञान हा धर्मग्रंथ हवा, असे सावरकरांचे मत होते.

जातीभेदाबद्दल बोलताना ते म्हणाले, देशात १८ पगड जातींमधील भेद हा हिंदू धर्माला शाप आहे. त्यामुळे जाती संपायला हव्यात, हा विचार मांडून त्याप्रमाणे सावरकरांनी सन १९२४ मध्ये काम केले. हिंदू राष्ट्रवाद हा देशाला तारणारा आहे. हिंदी राष्ट्रवादाऐवजी हिंदू राष्ट्रवाद आपण स्विकारला असता, तर स्वातंत्र्यानंतरची ७५ वर्षे लांगुलचालनाचा तमाशा बघायला लागला नसता, असेही पोंक्षे यांनी सांगितले. मानसी फडके यांनी सूत्रसंचालन केले. मोहना गद्रे यांनी प्रास्ताविक केले. परेश मेहेंदळे यांनी आभार मानले.

महाराष्ट्र बॉडी बिल्डिंग असोसिएशन 2023 च्या निवडणुका पूर्ण झाल्या

महाराष्ट्र शरीरसौष्ठव संघटनेच्या निवडणुकीत १७ पदाधिकारी निवडून आले

पुणे८ मार्च 2023, :  सिल्व्हर बँक्वेट हॉल ताथवडे, पुणे येथे नुकत्याच झालेल्या महाराष्ट्र बॉडीबिल्डिंग असोसिएशनच्या सर्वसाधारण सभेत महाराष्ट्र शरीरसौष्ठव कार्यकारिणीची निवड करण्यात आली, त्यामध्ये 22 जिल्ह्यातील पदाधिकारी उपस्थित होते. या निवडणुकीत बॉडी बिल्डिंग अँड फिजिक्स स्पोर्ट्स असोसिएशन पिंपरी-चिंचवडचे अध्यक्ष किरण सावंत यांची पुढील पाच वर्षांसाठी महाराष्ट्र शरीरसौष्ठव संघटनेच्या अध्यक्षपदी बिनविरोध निवड करण्यात आली. किरण सावंत यांचा शरीरसौष्ठव या खेळावरचा विश्वास आणि प्रेम आणि आजपर्यंत या क्षेत्रात तिने मिळवलेले ठोस यश यामुळे तिची बिनविरोध निवड झाली. यावेळी अधिवक्ता कुमार यांनी निवडणूक निर्णय अधिकारी म्हणून काम पाहिले तर वर्ल्ड बॉडी बिल्डिंग अँड फिजिक स्पोर्ट्स फेडरेशनचे सरचिटणीस चेतन पठारे यांनी संपूर्ण निवडणूक प्रक्रियेत निरीक्षक म्हणून काम पाहिले. यावेळी जागतिक शरीरसौष्ठव संघटनेचे कायदेशीर सल्लागार व दक्षिण आशियाई बॉडीबिल्डिंगचे अध्यक्ष श्री.विक्रम रोठे व महाराष्ट्र शरीरसौष्ठवचे माजी अध्यक्ष श्री.प्रशांत आपटे उपस्थित होते. सदर निवडणूक कार्यकारिणी समितीमध्ये एकूण 9 पदांची निवड करण्यात आली असून एकूण 17 पदांसाठी निवडणूक प्रक्रिया पूर्ण करण्यात आली आहे. पिंपरी चिंचवड शरीरसौष्ठव सरचिटणीस महेश गंगणे यांनी सर्व पदाधिकाऱ्यांचे स्वागत केले.
                                                                                                                                                                          महाराष्ट्र बॉडी बिल्डिंग असोसिएशनने अध्यक्षपदासाठी पिंपरी चिंचवडमधून किरण सावंत, उपाध्यक्षपदी ठाण्यातून प्रशांत आपटे, मुंबईतून अजय खानविलकर, साताऱ्यातून राजेंद्र हेंद्रे, औरंगाबादमधून सचिन टापरे, नाशिकमधून गोपाळ गायकवाड, जळगावमधून मोहन चव्हाण यांची निवड केली आहे. पश्चिम ठाणे.मधून सचिन डोंगरे निवडून आले सरचिटणीसपदी ठाण्यातील राजेंद्र चव्हाण, औरंगाबादचे कुतुबुद्दीन सय्यद आणि सहसचिवपदी नवी मुंबईचे हेमंत खेबडे, खजिनदारपदी मुंबई उपनगरचे सुनील शेगडे, कोल्हापुरातून राजेश वाडम, अहमदनगरचे मनोज गायकवाड, सिंधुदुर्गातून सूरज तेंडुलकर, परभणीतून मनीष नंद यांची निवड झाली. सहसचिवपदी तर जफर खान यांची परभणीतून निवड झाली. यावेळी जिल्ह्यातील पदाधिकाऱ्यांनी नवनिर्वाचित सदस्यांचे अभिनंदन केले.

• भाजपाच्या शिष्टमंडळाने घेतली मुख्यमंत्री-उपमुख्यमंत्र्यांची भेट
• निर्णयासाठी पुढील आठवड्यात बैठक : मुरलीधर मोहोळ

मुंबई/पुणे-

पुणे महापालिका हद्दीत मिळकत करात पुणेकरांना देण्यात येणारी ४० टक्के सवलत कायम ठेवावी, अशी मागणी भारतीय जनता पार्टीच्या शिष्टमंडळाने मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्याकडे केली. शिवाय देखभाल दुरुस्ती खर्च १ एप्रिल २०१० पासून १५ टक्क्यांहून १० टक्के फरकाची रक्कम मिळकतींकडून वसूल करण्यात येऊ नये, अशीही मागणी यावेळी करण्यात आली. या दोन्ही मागण्यांसदर्भात पुढील आठवड्यात मुख्यमंत्री आणि उपमुख्यमंत्री बैठक घेणार असल्याची माहिती माजी महापौर मुरलीधर मोहोळ यांनी दिली.

यावेळी पालकमंत्री चंद्रकांतदादा पाटील, माजी महापौर मोहोळ यांच्यासमवेत यावेळी आ. माधुरीताई मिसाळ, आ. भीमराव तापकीर, आ. सिद्धार्थ शिरोळे उपस्थित होते.

मिळकत करातील ४०% सवलत दि. १/८/२०१९ पासून स्व: वापर करीत असलेल्या निवासी मिळकतीची काढण्यात येऊ नये आणि देखभाल दुरुस्ती खर्च दि. १/४/२०१० पासून १५% हून १०% फरकाची रक्कम मिळकतींकडून वसूल करण्यात येऊ नये, अशा दोन मागण्या या निवदेनातून करण्यात आल्या आहेत.

या संदर्भात माहिती देताना माजी महापौर मोहोळ म्हणाले, ‘निवासी मिळकतींना देण्यात येणारी ४०% सवलत आणि १५% हून १०% देखभाल दुरुस्ती खर्च नवीन आकारणी होत असलेल्या मिळकतीना दिनांक १/४/२०१९ पासून बंद करण्यात आली आहे. यासंदर्भात २०१९ आणि २०२२ ला महापालिकेच्या मुख्य सभेचा पुन्हा ठराव केला होता. त्याद्वारे हीसवलत रद्द न करता सुरू रहावी, असा ठराव राज्य सरकारकडे पाठवण्याला होता. मात्र तत्कालिन महाविकास आघाडी सरकारने कोणाताही निर्णय घेतला नाही’.

महारापालिकेच्या २०१९ आणि २०२२ च्या ठरावाच्या आधारावर राज्य सरकारकडे या मागण्या केल्या असून याबाबत तातडीने पुढील आठवड्यातच बैठक घेऊन याबाबत पुणेकरांना मोठा दिलासा मिळेल, हा विश्वास आहे, असेही मोहोळ म्हणाले.

महाविकास आघाडीच्या आमदारांचे आंदोलन केवळ नौटंकी : मोहोळ

आम्ही मुख्यमंत्री आणि उपमुख्यमंत्र्यांची भेट घेतल्यावर पुण्यातील महाविकास आघाडीच्या आमदारांना जाग आली आणि त्यांनी घाईघाईने विधिमंडळाच्या पायऱ्यांवर आंदोलनाची नौटंकी केली. स्वतःची निष्क्रियता छाकण्यासाठी केलेल्या आंदोलनाच्या नौटंकीला पुणेकर भुलणार नाहीत, अशा शब्दात मोहोळ यांनी उत्तर दिले.

राजे शिवराय प्रतिष्ठान, कर्वेनगर तर्फे नरवीर तानाजी मालुसरे व ज्ञानेश सेवा समर्पण पुरस्कार प्रदान सोहळा
पुणे :  हिंदुस्थानवर परकीय आक्रमणे शेकडो वर्षांपासून होत आहेत. इस्लाम धर्मियांच्या आक्रमणांनी हिंदू संस्कृती नष्ट करण्याचा प्रयत्न केला. या विचारसरणीतूनच पुण्यातील पुण्येश्वर महादेवाचे मंदिर पाडण्यात आले. राजकीय हिंदुत्व पुन्हा निर्माण करणे ही काळाची गरज असून त्यासाठी पुण्येश्वर महादेव मंदिराची पुर्नस्थापना व्हायलाच हवी, अशी भावना माजी खासदार प्रदीप रावत यांनी व्यक्त केली. 
राजे शिवराय प्रतिष्ठान तर्फे जय शिवराय चौक, कर्वेनगर येथे आयोजित करण्यात आलेल्या शिवजयंती उत्सवात २१ वर्षीय हुतात्मा जवान यश देशमुख यांना नरवीर सुभेदार तानाजी मालुसरे पुरस्कार आणि पंचशील आश्रमाच्या माध्यमातून आदिवासी भागात शिक्षणाची गंगा पोहोचविणा-या स्व. के.मधुकरराव यांना मरणोत्तर स्व. ज्ञानेश पुरंदरे यांच्या स्मृती प्रित्यर्थ ज्ञानेश सेवा समर्पण पुरस्कार प्रदान करण्यात आले. शिवजयंती महोत्सवानिमित्त शिवप्रेरणा मंदिर – पुण्येश्वर मंदिर पुननिर्माण संकल्प सभेचे आयोजन करण्यात आले. 
यावेळी जगद््गुरु तुकाराम महाराज यांचे वंशज ह.भ.प.शिरीष महाराज मोरे, प्रतिष्ठानचे संस्थापक महेश पवळे, माजी नगरसेविका वृषाली चौधरी, युवा उद्योजक परिक्षीत थोरात, कुणाल कांबळे, पुण्येश्वर महादेव मंदिर स्थापना समितीचे प्रमुख सुनील तांबट, सामाजिक कार्यकर्ते चित्रसेन खिलारे, प्रतिष्ठानचे अध्यक्ष शिवाजी खरात, संघटक विक्रम बर्गे, स्वप्नील महाडीक, सनी येळवंडे व उत्सव प्रमुख अक्षय जाधव आदी उपस्थित होते. 
प्रदीप रावत म्हणाले, हजारो वर्षांपासून हिंदुस्तान परकीय आक्रमणाच्या विरोधात लढत आहे. इस्लाम धर्मियांनी हिंदुस्थानाची संस्कृती नष्ट करण्याचा वारंवार प्रयत्न केला. परंतु छत्रपती शिवाजी महाराजांसारख्या धुरंदर योद्ध्यांनी हा प्रयत्न हाणून पाडला. छत्रपती शिवाजी महाराजांच्या शौर्र्यातून प्रेरणा घेऊन आपण पुन्हा एकदा पुण्येश्वर महादेवाच्या मंदिराची स्थापना केली पाहिजे. 
शिरीष महाराज मोरे म्हणाले, छत्रपती शिवाजी महाराजांचा विचार  घराघरात पोहोचवला पाहिजे. त्यांच्या नावाचा केवळ जयघोष न करता त्यांचा विचार आपल्या आयुष्यामध्ये उतरवला पाहिजे आणि त्यांच्या विचारांप्रमाणे आपले आयुष्य जगले पाहिजे. 
महेश पवळे म्हणाले, इस्लामच्या विचारांच्या प्रेरणेतूनच पुण्यातील पुण्येश्वर महादेवाचे मंदिर पाडून त्या ठिकाणी मशिद बांधण्यात आली. आज आपण हिंदूंनी एकसंध होऊन पुण्येश्वर महादेवाचे मंदिर पुन्हा स्थापन करण्यासाठी चळवळ उभारली पाहिजे, असेही त्यांनी सांगितले. पुरस्कार समारंभापूर्वी शाहीर श्रीकांत रेणके यांचा गर्जना सह्याद्रीची हा पोवाडयाचा कार्यक्रम झाला. शिवप्रेरणा मंदिराचा देखावा तयार करणारे शिल्पकार महेश रांजणे यांचा यावेळी सत्कार करण्यात आला.

पुणे : पुण्याची ख्याती जगभर पसरलेली आहे, त्यात आणखीन एक मानाचा तुरा लावण्यासाठी मराठमोळ्या वेशात नऊवारी साडी नेसून पुणेरी महिला रमिला लटपटे मोटरसायकल वरून जगभ्रमंतीसाठी 9 मार्चला निघणार असून सुमारे 365 दिवस प्रवास करून 8 मार्च 2024 रोजी पुन्हा भारतात परतणार आहे.
यासंदर्भात माहिती देताना रमिला लटपटे म्हणाली की, जगभ्रमंती मध्ये 12 खंड, 20 ते 30 देशातून प्रवास करित सुमारे एक लाख किलोमीटर्सचा प्रवास पुर्ण करणार आहे. फक्त प्रवास नाही करणार तर महाराष्ट्रातील विविध बचत गटाच्यामाध्यमातून बनविण्यात आलेले विविध पदार्थांचा आणि भारतीय संस्कृतीचा प्रसार करीत महाराष्ट्राची संस्कृती प्रत्येक देशा पर्यंत पोहोचविण्याचा मानस भारताची मुलगी रमिला लटपटेचा आहे.
रमा (रायजींग एबल मॅनकाईंड ऑल राऊंड) या जगभ्रमंती मोहिमेचे नियोजन केले आहे. त्यानुसार रमिला लटपटे 9 मार्च 2023 रोजी सांयकाळी 4.30 वाजता गेट-वे-ऑफ इंडिया येथून त्यांच्या भ्रमंतीच्या प्रवासाचा प्रारंभ होणार आहे. यावेळी फ्लॅग ऑफसाठी मुख्यमंत्री एकनाथ शिंदे, शंतनू नायडू, प्रसाद नगरकर, खासदार श्रीरंग बारणे, आमदार महेश दादा लांडगे, अश्‍विनी ताई जगताप, सुरेश भोईर आदी उपस्थित राहणार आहेत.
 तसेच महिला दिनाचे औचित्य साधत भारतीय महिलांमध्ये साहस, जिद्द आणि चिकाटी यावी हा संदेश देण्यासाठीच ह्या जगभ्रमंतीचा घाट घातला आहे.
काही दिवसापुर्वी रमिला लटपटे यांनी मुख्यमंत्र्यांची भेट घेऊन त्यांना आपल्या मोहिमेची माहिती दिली होती,या उपक्रमांचे मुख्यमंत्र्यांनी कौतुक ही केले होते. रमिला लटपटे या चिंचवड (पुणे) येथील निवासी आहेत. त्या अहिल्या फाऊंडेशन या स्वयंसेवी संस्थेसाठी महिला व तरुणांच्या सक्षमीकरणाचे उपक्रम राबवतात.