पुणे:ज्येष्ठ भरतनाट्यम नृत्यांगना, नृत्यगुरु डॉ. सुचेता भिडे – चापेकर यांच्या अमृत महोत्सवानिमित्त त्यांच्या शिष्यवर्गाकडून पुण्यात सत्काराचे आयोजन करण्यात आले आहे.हा सत्कार दि.६ डिसेंबर रोजी सायंकाळी ६.१५ वाजता बाल शिक्षण मंदिर सभागृह, कोथरुड येथे पद्मश्री डॉ.लीला पूनावाला यांच्या हस्ते होणार आहे. कार्यक्रमाच्या संयोजक अरुंधती पटवर्धन, स्मिता महाजन यांनी पत्रकाद्वारे ही माहिती दिली.या कार्यक्रमात डॉ.सुचेता भिडे चापेकर यांच्या शिष्या विविध विलोभनीय नृत्यप्रकार सादर करणार आहेत.डॉ.चैतन्य कुंटे हे डॉ .सुचेता भिडे -चापेकर यांची प्रकट मुलाखत घेणार आहेत.हा कार्यक्रम विनामुल्य आहे.

समर्पित नृत्य जीवन: डॉ.सुचेता भिडे -चापेकर
डॉ.सुचेता भिडे -चापेकर (जन्म ६ डिसेंबर १९४८) या शास्त्रीय नृत्यांगना, नृत्य दिग्दर्शिका आहेत. त्या भरतनाट्यम या नृत्य प्रकारांत निपुण आहेत. भरतनाट्यम या शास्त्रीय नृत्य क्षेत्रातील एक अग्रगण्य नाव. गुरु, वाग्येकार आणि संरचनाकार असलेल्या सुचेता चापेकरांना संगीत नाटक अकादमीने २००७ साली पुरस्कार देऊन गौरविले आहे.

६ डिसेंबर १९४८ रोजी एका सुसंस्कृत आणि प्रतिष्ठित घरात सुचेताताईंचा जन्म झाला.बालपण मुंबई येथे गेले. मुलीची नृत्यातली गती आणि आवड बघून स्वतः चित्रकार असलेल्या वडिलांनी त्यांना नृत्य शिकण्यासाठी प्रोत्साहन दिले.गुरु पार्वतीकुमार यांच्या मार्गदर्शनाखाली त्यांचे अरंगेत्रम १९६३ साली वयाच्या १५व्या वर्षी झाले. पार्वतीकुमार यांच्या नृत्य कार्यक्रमातून त्यांचा सक्रिय सहभाग असे. त्याचप्रमाणे गुरूंच्या भरतनाट्यम नृत्यातील तंजावर येथील मराठी राजांच्या योगादानाविषयीच्या अभ्यासातही सुचेताताई त्यांच्या सहाय्यक होत्या. मुंबईच्या जे.जे.स्कूल ऑफ आर्टमधून पदवी संपादन करत असतानाच देशभर विविध ठिकाणी त्यांचे नृत्याचे कार्यक्रम होत होते. मद्रास म्युझिक अकादमी येथील त्यांच्या कार्यक्रमाला विशेष पसंती मिळाली.त्यानंतर त्यांना गुरु के.पी.किट्टप्पा यांच्याकडून भरतनाट्यम नृत्यातील प्राचीन रचना आणि कर्नाटक संगीताचे मार्गदर्शन मिळाले.

लग्नानंतर पुण्यात स्थायिक झालेल्या सुचेताताईंनी १९८२ साली पहिला विदेश दौरा केला. लंडन,पॅरीस,रोटरडॅम येथील त्यांच्या नृत्य प्रस्तुतीला रसिकांचा भरभरून प्रतिसाद मिळाला. ऐंशीच्या दशकात महाराष्ट्रासह उत्तर भारतात त्यांनी अनेक कार्यक्रम केले. त्यादरम्यान त्यांच्या लक्षात आलं की केवळ भाषेच्या अडचणीमुळे भरतनाट्यमसारख्या सुंदर कलेचा आस्वाद उत्तर भारतीय रसिक घेऊ शकत नाहीत. त्यातूनच मग नृत्यगंगा या अनुपम नृत्य शैलीचा जन्म झाला. १९८२ साली याचा पहिला प्रयोग मुंबईच्या नॅशनल सेंटर फॉर परर्फॉमिंग आर्ट्स येथे झाला. भरतनाट्यमचे मूळ सौंदर्य कायम राखत हिंदुस्तानी संगीतात हिंदी मराठी रचना त्यांनी सादर केल्या आणि या त्यांच्या प्रयोगाला समीक्षकांसह रसिकांचीही भरघोस दाद मिळाली.या त्यांच्या अभिनव प्रयोगासाठी त्यांनी तंजावूरच्या मराठी राजांच्या रचनांचा सखोल अभ्यास केला आणि पीएच.डी. मिळाली. शहाजीराजे,सरफोजीराजे यांच्या अनेक मराठी,हिंदी आणि संस्कृत रचनांच्या सादरीकरणातून त्यांनी नृत्यकलेत भर घातली आहे.

सवाई गंधर्व संगीत महोत्सवात तीन वेळा नृत्य करण्याचा बहुमान त्यांनी प्राप्त केला आहे. आनंदासाठी कला,कलेसाठी कला आणि जीवनासाठी कला हे ब्रीद घेऊन त्यांनी१९८८ मध्ये समविचारी लोकांच्या बरोबर ‘कलावर्धिनी चॅरिटेबल ट्रस्ट ’ या कलेच्या प्रसार प्रचार करणाऱ्या संस्थेची स्थापना केली. या माध्यमातून अनेक नृत्य कलाकार,रचनाकार आणि अध्यापक यांची जडणघडण त्यांनी केली आहे.

अनेक पुरस्कार त्यांना मिळाले आहेत.राज्यसरकार – महाराष्ट्र गौरव पुरस्कार, सूरसिंगार संसद,मुंबई- नृत्यविलास उपाधी, राष्ट्रीय संगीत नाटक अकादमी,नवी दिल्ली – भरतनाट्यम क्षेत्रातील योगदानासाठीचा सर्वोच्च सन्मान,संगीत नाटक अकादमी पुरस्कार (२००७),
पुणे महापालिकेने रोहिणी भाटे यांच्या नावाने दिला गेलेला २०१५ सालचा ’स्वर्गीय गुरू पंडिता रोहिणी भाटे पुरस्कार’.

पुणे:महाराष्ट्र गांधी स्मारक निधी आणि युवक क्रांती दलाच्या वतीने आयोजित ‘महात्मा गांधी आणि द्विराष्ट्रवादाचा सिद्धांत ‘ या विषयावरील लेखक,समाजशास्त्र अभ्यासक शमसुल इस्लाम यांच्या व्याख्यानाला शुक्रवारी चांगला प्रतिसाद मिळाला. डॉ कुमार सप्तर्षी अध्यक्ष स्थानी होते. प्रशांत कोठडीया,डॉ. शशिकला रॉय, संदीप बर्वे आदी मान्यवर उपस्थित होते.हे व्याख्यान शुक्रवार, दि.१ डिसेंबर २०२३ रोजी सायंकाळी ६ वाजता गांधी भवन, कोथरूड येथे झाले.शमसुल इस्लाम म्हणाले,’पाकिस्तान ज्या प्रमाणे धर्माच्या आधारे इस्लाम राष्ट्र झाले , त्या नुसार भारत हिंदू राष्ट्र होण्यास महात्मा गांधींनी विरोध केला. त्यामुळेच त्यांची हत्या झाली.

शमसूल इस्लाम पुढे म्हणाले की महात्मा गांधी यांचा द्विराष्ट्रवादाला आणि धार्मिक तसेच जातीयवादाला प्रथम पासूनच विरोध होता, त्यामुळेच त्यांची पाच वेळा वेगवेगळ्या ठिकाणी हत्या करण्याचे कट करण्यात आले. त्याच प्रकारे अलिकडच्या काळातही ज्यांनी धार्मिक वादाला आणि जातीयवादाला विरोध केला त्या गौरी लंकेश, दाभोळकर, कलबुर्गी, पानसरे यांचीही हत्या झाली.
. त्यामुळे ४० कोटी वा ५५ कोटी पाकिस्तानला दिल्याने गांधींची हत्या केली ही सरळ सरळ एक पुढे केलेली ढोंगी सबब होती”

“महात्मा गांधींची लोकसहभागातून मोठी आंदोलने उभारण्याच्या दृष्टीला आणि हातोटीला शह देण्यासाठीच सत्ताधारी इंग्रजांनी मुस्लिम लीग आणि हिंदू महासभेला हाताशी धरून द्विराष्ट्रवाद म्हणजेच देशात फूट पाडली, या द्विराष्ट्रवादाच्या मोहाला मुस्लिम लीग आणि हिंदू महासभा हे धर्माच्या मोहापायीच बळी पडले आणि त्यातून, ज्यांना दोन राष्ट्र, दोन देश नको होती, फाळणी नको होती, त्यांना ती जबरदस्तीने स्वीकारावी लागली, असेही स्पष्टपणे दिसून येते, असेही मत शमसूल इस्लाम यांनी मांडले.

पुणे : दुकानांवरील इंग्रजी नामफलक, पाट्या हटवून मराठी पाट्यांसाठी आंदोलन करुन तोडफोड केल्याप्रकरणी महाराष्ट्र नवनिर्माण सेनेच्या (मनसे) पदाधिकाऱ्यांसह कार्यकर्त्यांविरुद्ध पोलिसांनी गुन्हे दाखल केले आहेत. याप्रकरणी डेक्कन आणि विश्रामबाग पोलीस ठाण्यात दोन स्वतंत्र गुन्हे दाखल करण्यात आले आहेत.टिळक रस्त्यावरील महाराष्ट्र इलेक्ट्रॉनिक्स शोरुमच्या इंग्रजी पाटीची तोडफोड केल्याप्रकरणी विश्रामबाग पोलिसांनी मनसेच्या कार्यकर्त्यांविरुद्ध गुन्हा दाखल केला आहे. याप्रकरणी साईनाथ बाबर यांच्यासह कार्यकर्त्यांविरुद्ध गुन्हा दाखल करण्यात आला आहे. याबाबत स्वनेंदू घोष यांनी फिर्याद दिली आहे.आणि शाही भोज हॉटेलचे मालक ब्येनाराम मनारामजी देवासी यांनी डेक्कन पोलीस ठाण्यात फिर्याद दिली आहे.सहायक पोलीस निरीक्षक बाळकृष्ण नाणेकर तपास करत आहेतआणि सहायक पोलीस निरीक्षक वर्षा शिंदे तपास करत आहेत.

मनसेचे शहराध्यक्ष साईनाथ बाबर, कुलदीप यादव, शाम ताठे, प्रवीण मिसाळ, संदीप माने, प्रवीण सोनवणे, राजेंद्र वागस्कर, दादा साठे, योगेश खडके यांच्यासह दहा ते बारा कार्यकर्त्यांविरुद्ध गुन्हे दाखल करण्यात आले आहेत. याबाबत शाही भोज हॉटेलचे मालक ब्येनाराम मनारामजी देवासी यांनी डेक्कन पोलीस ठाण्यात फिर्याद दिली आहे. मराठी पाट्या दुकाने, उपाहारगृहांवर लावण्याचे आदेश शासनाने दिले आहेत. मराठी पाट्या न लावल्याच्या निषेधार्थ मनसेच्या कार्यकर्त्यांनी मुंबई, पुणेसह राज्यभरात आंदोलन केले. मराठी पाट्या न लावणाऱ्या दुकानांच्या पाट्यांची तोडफोड करुन काळे फासले. जंगली महाराज रस्त्यावरील शाही भोज हॉटेलच्या बाहेर मनसे कार्यकर्त्यांनी घोषणाबाजी केली. इंग्रजी पाटीची तोडफोड केली, तसेच जंगली महाराज रस्त्यावरील लेव्हीज शोरुम, शुभम टाइम्स, बुट्टे पाटील ग्रुपने लावलेल्या इंग्रजी पाट्यांची तोडफोड केली. सहायक पोलीस निरीक्षक वर्षा शिंदे तपास करत आहेत

पुणे-प्रख्यात ऑलिम्पियन सर्कस सिंहगड रस्त्यावरील वडगाव परिसरात फन टाइम थिएटरच्या मागे असणाऱ्या शिंदे मैदान येथे सुरू झाली असून, रोज दुपारी ४ व सायंकाळी ७ असे सर्कस शो असणार आहेत. शनिवारी व रविवारी अतिरिक्त दुपारी १ वाजतादेखील शो होईल. सर्कशीचा तंबू फायरप्रूफ असून, सर्कसच्या तंबूची आसनक्षमता १२०० आहे. ७५० रुपये अधिक जीएसटी ५०० रुपये, ३०० रुपये व २०० रुपये असे तिकीटदर आहेत. तीन वर्षांखालील बालकांना प्रवेशशुल्क नाही. पार्किंगची स्वतंत्र व्यवस्था आहे.या सर्कसमध्ये मेक्सिको, उझबेकिस्तान, रशिया यांसह देशातील सुमारे २५ कलावंत आहेत आणि एकूण ६० स्टाफ आहे. एकूण दोन तास चालणाऱ्या या सर्कसमध्ये चित्तथरारक कसरती हे वैशिष्ट्य आहे. रशियन रोलर बॅलन्स, रिंग अॅक्रोबॅटिक्स, कॉमिक जग्लिंग. हुल्ला हूप्स, सिल्क अॅण्डस रिंग, नेत्रदीपक सायकल कसरती, मोटारसायकल ग्लोब, मिस्टर स्लिंकी अॅक्ट्स, हंटर अॅक्ट्स, हेअर हँगिंग, स्प्रिंग नेट, तलवारीच्या टोकावरील बॅलन्स, अॅक्रोबॅटिक्स मणिपुरी, रंगतदार दोरीवरील उड्या, कॅण्डल बॅलन्स, क्विक चेंज, लेजरमॅन शो, कॉमेडी शोज्, अॅनिमल कस्टम्स, बटरफ्लाय कॉमेडी असे अनेक मनोरंजनाचे चित्तथरारक खेळ सर्कसमध्ये बघायला मिळतील.सर्कस उद्योगाला सध्या आर्थिक अडचणीचे दिवस आले असताना पुणेकरांनी सर्कसला नेहमीच भरघोस प्रतिसाद दिला आहे, हे महत्त्वाचे आहे, असे ऑलिम्पियन सर्कसचे मालक जॉन मॅथ्यू यांनी सांगितले की, शहरांमध्ये मध्यवर्ती भागात कमी भाड्यात मैदाने उपलब्ध होत नाहीत. वीजपुरवठा अखंडित राहावा, यासाठी संपूर्ण शोला जनरेटरमार्फत वीजपुरवठा केला जातो. डिझेलच्या वाढत्या किमतींमुळे खर्चात अधिक भर पडली आहे. प्रवास, नाष्टा-जेवण, आरोग्य हे सारेच खर्च वाढले आहेत. शिवाय सर्कसला शासकीय मदत नाही. सर्कसला लोकाश्रय खूप आहे, मात्र राजाश्रय नाही, अशी खंत त्यांनी व्यक्त केली. सर्कस अडचणीत असतानाही अपंग, अनाथ यांना आम्ही सर्कस मोफत दाखवतो व सामाजिक जबाबदारी पार पाडतो, असे सांगून अधिकाधिक लोकांनी कुटुंबीयांसमवेत आवर्जून सर्कस बघावी, असे आवाहन त्यांनी केले. ७ जानेवारी २०२४ पर्यंत सर्कसचा मुक्काम पुण्यात असणार आहे. 

पुणे नागरी सहकारी बँक्स् असोसिएशन लि., पुणे (महाराष्ट्र) तर्फे आयोजन : राज्याचे सहकार आयुक्त अनिल कवडे यांची उपस्थितीमहाराष्ट्रातील ११२ हून अधिक बँकांच्या पदाधिका-यांचा सहभाग
पुणे : नागरी सहकारी बँकांमध्ये नियामक अनुपालन म्हणजेच रेग्युलेटरी कम्प्लेयन्स आणि तांत्रिक अनुप्रयोग म्हणजेच आयटी चा उपयोग कशा प्रकारे व्हावा, त्याबाबत आव्हाने आणि संधी काय आहेत, याविषयी चर्चा व मार्गदर्शन करण्याकरिता पुणे नागरी सहकारी बँक्स असोसिएशन लि., पुणे (महाराष्ट्र) तर्फे बुधवार, दिनांक ६ डिसेंबर रोजी सकाळी ९ ते सायंकाळी ५.३० यावेळेत राज्यस्तरीय बँकिंग परिषद पुणे रेल्वे स्टेशनजवळील हॉटेल शेरेटॉन ग्रँड येथे आयोजित करण्यात आली आहे. पुण्यासह इतर जिल्ह्यातील ११२ हून अधिक बँकांचे अध्यक्ष, उपाध्यक्ष, मुख्य कार्यकारी अधिकारी, संगणक विभाग प्रमुख व पदाधिकारी सहभागी होणार आहेत, अशी माहिती असोसिएशनचे अध्यक्ष अ‍ॅड. सुभाष मोहिते यांनी पत्रकार परिषदेत दिली.

पत्रकार परिषदेला उपाध्यक्ष अ‍ॅड.साहेबराव टकले, संचालक निलेश ढमढेरे, मुख्य कार्यकारी अधिकारी प्रा. डॉ.अनिल कारंजकर, आदी उपस्थित होते.

राज्यस्तरीय परिषदेचे उद््घाटन बुधवारी सकाळी ९ वाजता राज्याचे सहकार आयुक्त अनिल कवडे यांच्या हस्ते होणार आहे. उद््घाटनप्रसंगी पुणे जिल्हा नागरी सहकारी बँक्स असोसिएशनचे अध्यक्ष अ‍ॅड. सुभाष मोहिते, बाळासाहेब अनास्कर, अतुल खिरवाडकर, आमदार संजय जगताप, विजय ढेरे, रमेश वाणी, मिलिंद काळे, निलेश ढमढेरे, माजी आमदार नामदेव पवार यांसह अनेक मान्यवर उपस्थित राहणार आहेत. परिषदेत बँकिंग क्षेत्रात काम करणारे ३०० हून अधिक पदाधिकारी सहभागी होणार आहेत.

अ‍ॅड. सुभाष मोहिते म्हणाले, परिषदेमध्ये नागरी सहकारी बँकांमध्ये नियामक अनुपालन – आव्हान व संधी, व्यय परिणामकारक तांत्रिक अनुप्रयोग आणि परिणामकारक तांत्रिक अनुप्रयोगाच्या माध्यमातून नागरी सहकारी बँकांचे नियामक अनुपालन आदी विषयांवर चर्चा व सुसंवाद होणार आहे. यामध्ये विद्याधर अनास्कर, जयंत काकतकर, अपेक्षिता ठिपसे, राजेंद्र गांगुर्डे, प्रदीप भोईर, अतुल खिरवाडकर, विक्रांत पोंक्षे, अ‍ॅड.राजेश  पिंगळे आदी क्षेत्रातील अनेक मान्यवर परिषदेत उपस्थितांना मार्गदर्शन करणार आहेत.

नागरी सहकारी बँकेतील निर्णयाचे अधिकारी असणा-या अध्यक्ष, उपाध्यक्ष तसेच मुख्य कार्यकारी अधिकारी यांच्यामध्ये चर्चा व्हावी व सहकारात सहकार निर्माण होऊन नागरी सहकारी बँकांना बळ द्यावे, हा परिषदेचा उद्देश आहे. तसेच अधिकारी व कर्मचा-यांना दैनंदिन कामकाजात येणा-या अडचणींवर मार्गदर्शन करण्यासाठी असोसिएशन सदैव तत्पर असते. बँकांचे संचालक, सेवक उत्तमप्रकारे प्रशिक्षीत व्हावेत आणि सहकारी चळवळ सुदृढ व्हावी, हा असोसिएशनचा प्रयत्न असतो.

• लग्न समारंभासाठी बुकिंग करताना सावधान

पुणे- प्रसिद्धीच्या झोतात राहणाऱ्या एका लोकप्रतिनिधीच्या अतिक्रमणासह मुळा नदीचा गळा घोटणाऱ्या ३० अतिक्रमणांना महापालिकेने नोटीसा बजावल्या आहेत आणि राष्ट्रीय हरित अधिकरण – National Green Tribunal च्या आदेशानुसार तातडीने हि अतिक्रमणे काढून घ्यायला सुरुवात झाल्याचा दावा करण्यात येतो आहे. सुजन सहकारी सोसायटीने २०१५ साली राष्ट्रीय हरित अधिकरण – National Green Tribunal कडे याबाबत याचिका दाखल केली होती. २०१७ मध्ये येथे महापालिकेने कारवाई केली होती.तत्कालीन महापौर आणि पदाधिकाऱ्यांनी त्यावेळी गणेश उत्सवापूर्वी सर्व अतिक्रमणे हटविण्यात येतील असे माध्यमांना सांगितले होते.पण प्रत्यक्षात तसे काही झाले नाही. १० ऑक्टोबर रोजी National Green Tribunal ने हि सारी अतिक्रमणे हटवून तातडीने १० डिसेंबर पर्यंत याबाबतचा अहवाल सादर करण्याचे आदेश महापालिकेला दिले होते.त्यानुसार महापालिकेने आता कारवाई ची तयारी ठेवत नोटीसा दिल्या आहेत.ज्यामध्ये एका मान्यवर लोकप्रतिनिधीच्या बेनामी अतिक्रणाचा समावेश देखील असल्याचे समजते.

म्हात्रे पुलाकडून राजाराम पुलाकडे जाणाऱ्या DP रोड वरील अतिक्रमणे आणि तेथील व्यवसायअति उच्चभ्रूंसाठी असल्याचे मानले जातात.हि चालविणारी मंडळी मोठी आहेत आणि येथे होणारे व्यवहार देखील मोठ्या आर्थिक स्वरूपाचे आहेत.याच ठिकाणी रात्री अनेक हॉटेलांच्या,लाॅन्स नावाखाली पब सदृश्य धांगडधिंगा देखील सुरु असतो.NGT च्या आदेशानुसार नदीच्या किनारी ब्ल्यू लाईन च्या क्षेत्रात येणारी अतिक्रमणे हटविण्यात येणार आहेत मात्र ब्ल्यू लाईन आणि DP रस्ता या दरम्यानच्या क्षेत्रात मात्र हे व्यावसायिक व्यवसाय करू शकतील असा दावा केला जातो आहे.

दरम्यान येथे लग्न समारंभासाठी बुकिंग करताना नागरिकांनी आता सावधानता बाळगली पाहिजे,अन्यथा लग्नसमारंभ करताना अडचणींचा सामना करावा लागण्याची दाट शक्यता आहे.

दुष्काळाची दाहकता कमी करण्यासाठी सामाजिक संस्थानी सक्रीय सहभाग घ्यावा- डॉ. नीलम गोऱ्हे

पुणे, दि.२ : कमी पावसामुळे राज्य शासनाने १५ जिल्ह्यातील ४० तालुक्यात दुष्काळ जाहीर केला असून या क्षेत्रातील दुष्काळाची दाहकता कमी करण्यासाठी स्वयंसेवी, सामाजिक संस्थानी सक्रीय सहभाग घ्यावा, असे प्रतिपादन विधानसभेच्या उपसभापती डॉ. नीलम गोऱ्हे यांनी केले.

महाराष्ट्र दुष्काळ निवारण आणि मदत कार्यक्रम समिती व स्त्री आधार केंद्र पुणे यांच्या संयुक्त विद्यमाने विभागीय आयुक्त कार्यालयात दुष्काळ निवारण अंमलबजावणीबाबत आयोजित एक दिवसीय कार्यशाळेत त्या बोलत होत्या.

यावेळी महाराष्ट्र दुष्काळ निवारण आणि मदत कार्यक्रम समितीचे (एमडीआरएसपी) शिरीष कुलकर्णी व स्त्री आधार केंद्राच्या अपर्णा पाठक, गौतम गालफाडे, झेलम जोशी, राज्यातील विविध ठिकाणच्या सामाजिक संस्थांचे प्रतिनिधी उपस्थित होते.

यावेळी डॉ. गोऱ्हे म्हणाल्या, राज्यात या वर्षी दुष्काळाची तीव्रता अधिक आहे. जून ते सप्टेंबर या कालावधीतील पर्जन्याची तूट, उपलब्ध असलेल्या भुजलातील कमतरता आदी निकष लक्षात घेऊन १५ जिल्ह्यातील २४ तालुक्यात गंभीर तर १६ तालुक्यात मध्यम स्वरूपाचा दुष्काळ जाहीर केला आहे. काही भागात अतिवृष्टी, तर काही भागात कमी पाऊस, सध्या अवकाळी पावसामुळे शेतकरी मेटाकुटीला आला आहे. अशा परिस्थितीत शासनाकडून मदत दिली जात आहे. त्याचबरोबर राज्यातील विविध भागात सामाजिक संस्था दुष्काळाची दाहकता कमी करण्यासाठी मोलाचे कार्य करीत आहेत.

त्या पुढे म्हणाल्या, दुष्काळात पिण्याचे पाणी, चारा टंचाई, बेरोजगारी इत्यादी परिस्थितीला सामोरे जावे लागते. बेरोजगारीमुळे वंचित घटक, आदिवासी, शेतमजूर आदी घटकातील नागरिक मोठ्या प्रमाणात स्थलांतर करतात. याची सर्वाधिक झळ महिला, जेष्ठ व्यक्ती, मुलांना बसते. त्यांचे स्थलांतर रोखून त्यांना रोजगार हमी योजनेअंतर्गत काम मिळवून देणे, त्यासाठी त्यांना जॉब कार्ड मिळवून देणे आवश्यक आहे, असेही त्यांनी सांगितले.

शालेय, महाविद्यालयीन विद्यार्थ्यांच्या परीक्षा शुल्कात माफी, कृषी पंपाच्या वीजबिलात सुट, आवश्यक तेथे पिण्याचे पाणी पुरविण्यासाठी टँकरचा वापर होतो का आदींची माहिती संस्थानी निर्दशनास आणावी. दुष्काळ निवारणाच्या कामात स्वयंसेवी संस्था व शासकीय यंत्रणा यांच्यामध्ये समन्वय ठेवून जास्तीत जास्त दुष्काळग्रस्तांपर्यंत शासनाच्या विविध योजना पोहचविण्यात याव्यात. संस्थानी सक्षम होऊन चांगल्या प्रकारे सर्वेक्षण करावे. कामे करताना अडचणींना सामोरे जावे लागू नये यासाठी संस्थांच्या प्रतिनिधींना ओळखपत्र देण्यात यावे. दुष्काळाच्या परिस्थितीतही शाश्वत विकास कसा राहील, याची सर्वांनीच दक्षता घ्यावी, असे आवाहनही त्यांनी यावेळी केले.

यावेळी श्री. कुलकर्णी आणि श्रीमती पाठक यांनी त्यांचे मनोगत व्यक्त केले. तसेच विविध संस्थांच्या प्रतिनिधींनी आपापल्या भागातील दुष्काळाची परिस्थिती सांगितली.