वीजपुरवठा व सुरक्षेसाठी विविध कामे पूर्ण

पुणे, दि. ०९ डिसेंबर २०२३: आळंदी यात्रा सोहळ्यामध्ये महावितरणकडून २४ तास वीजसेवा देण्यासाठी ३५ अभियंते व जनमित्रांचे विशेष पथक तैनात करण्यात आले आहे. तर अखंडित वीजपुरवठा व भाविकांच्या वीजसुरक्षेसाठी विविध उपाययोजनांसह १० ठिकाणी अतिरिक्त् वितरण रोहित्र बसविण्यात आले आहेत. मंगळवार (दि. ५) पासून महावितरणची ही यंत्रणा सज्ज झाली असून बुधवार (दि. १३)पर्यंत विशेष सेवा कायम राहणार आहे.

       आळंदी येथे कार्तिकी एकादशी व संतश्रेष्ठ ज्ञानेश्वर महाराज यांच्या संजीवन समाधी सोहळ्याच्या पार्श्वभूमिवर महावितरणचे मुख्य अभियंता श्री. राजेंद्र पवार यांनी सुरळीत वीजपुरवठा व सुरक्षेसाठी आवश्यक उपाययोजना करण्याच्या सूचना दिल्या होत्या. तसेच श्री. पवार यांनी शुक्रवारी (दि. ८) आळंदी येथे भेट देऊन वीजविषयक कामांची पाहणी केली व आढावा घेतला. यावेळी अधीक्षक अभियंता श्री. युवराज जरग, कार्यकारी अभियंता श्री. राजेंद्र येडके, अतिरिक्त कार्यकारी अभियंता श्री. राजेश भगत, उपकार्यकारी अभियंता श्री. विजय गारगोटे आदींची उपस्थिती होती.

आळंदी यात्रेच्या सोहळ्यापूर्वी महावितरणकडून आळंदी शहर व मंदिर परिसरात विविध १० ठिकाणी २०० एमव्हीएचे अतिरिक्त वितरण रोहित्र बसविण्यात आले. इतर सरकारी यंत्रणेशी समन्वय साधण्यासाठी नियंत्रण कक्ष स्थापन करण्यात आला आहे. तसेच दर्शनबारी, इंद्रायणी घाट, प्रदक्षिणा रस्ता येथील ओव्हरहेड वाहिन्या भूमिगत करण्यात आल्या आहेत. काही ठिकाणी ओव्हरहेड तारांऐवजी एरीयल बंच केबल लावण्यात आली आहे. परिसरातील फिडर पीलर्स सुरक्षित जागी स्थानातंरीत करण्यात आले आहे. यासह संपूर्ण वीजयंत्रणेची देखभाल व दुरुस्तीच्या कामांत विविध तांत्रिक कामे पूर्ण करण्यात आली आहेत. दरम्यान भासा आसखेड धरणातून चाकण एमआयडीसी जलकेंद्राद्वारे आळंदी शहराला पाणीपुरवठा करण्यासाठी महावितरणकडून तात्काळ पर्यायी उपाययोजना करून वीजपुरवठा सुरळीत करण्यात आला.

आळंदी यात्रेसाठी २४ तास वीजपुरवठा व ग्राहकसेवा देण्यासाठी वरिष्ठ अभियंत्यांसह सहायक अभियंता संदीप पाटील, संदीप कुऱ्हाडे, अविनाश सावंत, मंगेश सोनवणे, नितीन माटे, विजय पाटील, सुरेश माने, मदन मुळुक यांची आणि २५ जनमित्रांची विविध ठिकाणी विशेष नियुक्ती करण्यात आली आहे.

पुणे (प्रतिनिधी): पर्वती, शिवाजीनगर मधील विविध वस्त्यांमध्ये लोकायत संघटनेद्वारे मतदार नाव नोंदणी बाबत जनजागृती करण्यात आली. हातावर पोट असलेल्या कष्टकरी घटक ज्यात रिक्षाचालक, पथारी, टेम्पोचालक, घरकाम करणाऱ्या महिला यांना आपलं नाव मतदार यादीत कस शोधायचं? जर मतदार यादीत नाव नसेल तर काय करावं लागत याबाबत माहिती देण्यात आली.
उपक्रमाचे समन्वयक ऋषिकेश येवलेकर यांनी सांगितले की भारत निवडणूक आयोगाच्या निर्देशानुसार 1 जानेवारी 2024 या अर्हता दिनांकावर आधारित छायाचित्र मतदार याद्यांचा विशेष संक्षिप्त पुनरीक्षण कार्यक्रम सुरू आहे.  या दरम्यान जाणवलं की  वस्ती पातळीवर नागरिकांच्या नाव नोंदणी दरम्यान पत्ता बदलणे, जन्म तारीख बदलणे, नावाची स्पेलिंग चुकलेली असणे अशा अडचणी  आहेत पण ते कसे बदलावे याबाबत नागरिकांना पुरेशी माहिती नव्हती त्यामुळे निवडणूक आयोगाचे वोटर हेल्पलाईन ॲप द्वारे जनजागृती करण्यात आली. जवळपास प्रत्येकाच्या घरात एखादा तरी स्मार्ट फोन असतो घरबसल्या मोबाईल वरच मतदार नाव नोंदणी सहजपणे होऊ शकते तसेच लोकशाहीत प्रत्येकाला मतदान देण्याचा मूलभूत अधिकार प्रत्येकाला आहे त्याचा वापर सर्वानी केला पाहिजे या उद्देशाने हा उपक्रम राबविण्यात आला. निवडणूक आयोगाचे वोटर हेल्पलाईन ॲप कस वापरावं याबाबत पॉवर पॉईंट प्रेझेंटेशन बनवण्यात आले होते त्यामुळे नागरिकांनी अँपद्वारे अडचणी सोडावं सोप गेलं जवळपास ३५० पेक्षा अधिक नागरिकांना याचा लाभ झाला

आयएमए च्या वार्षिक परिषदेत आयोजन

पुणे :

इंडियन मेडिकल असोसिएशनच्या ३३ व्या वार्षिक अधिवेशनात ‘मोतीबिंदू शस्त्रक्रियेतील स्थित्यंतरे ‘ या विषयावर ज्येष्ठ नेत्रतज्ज्ञ डॉ.श्रीकांत केळकर यांचे व्याख्यान आयोजित करण्यात आले होते.डॉ.नीतू मांडके यांच्या स्मरणार्थ असलेले हे व्याख्यान शनिवार,दि.९ डिसेंबर,दुपारी १२ वाजता टिळक रस्त्यावरील इंडियन मेडिकल असोसिएशनच्या सभागृहात झाले. डॉ केळकर यांच्या वैद्यकीय सेवेला ५० वर्ष पूर्ण झाल्याबद्दल त्यांचा सत्कार इंडियन मेडिकल असोसिएशन, पुणे शाखेचे अध्यक्ष डॉ. राजू वरयानी, डॉ. अलका मांडके यांच्या हस्ते करण्यात आला. डॉ.श्रीकांत केळकर हे ‘नॅशनल इन्स्टिट्यूट ऑफ ऑफ्थॅल्मॉलॉजी’चे संस्थापक अध्यक्ष आहेत . त्यांनी उपस्थितांना मार्गदर्शन केले.डॉ संजय पाटील, डॉ अलका मांडके, डॉ राजू वरयानी, सौ.अरुणा केळकर, डॉ चारुता मांडके, डॉ जयंत नवरांगे, डॉ गीतांजली शर्मा उपस्थित होते.

डॉ. श्रीकांत केळकर म्हणाले, ‘भारतातील शल्य चिकित्सा सुश्रुत यांच्यापासून सुरू झाली.युरोप मधून मोतीबिंदू शस्त्रक्रियेची सुरुवात झाली. पुर्वी शस्त्रक्रिया झाल्यावर 2 दिवस रुग्णाला बेडवरून हलू दिले जायचे नाही. बेड पॅन दिले जात असे. दोन्ही डोळे बांधले जात असत.

नंतर क्रायो सर्जरी, सुचर टेक्निक आले.१९४९ साली कृत्रिम भिंग विकसित झाले.१९६० साली फॅको इमुल्सिफिकेशन चे तंत्र आले. आता कॅप्सुलेझर आले आहे.फेको,लेसर, लेन्स अशा प्रक्रिया आता उपलब्ध झाल्या आहेत. त्यामुळे रुग्णांना चांगली दृष्टी लाभते, वेळेत कामावर रुजू होता येते. याचे श्रेय संशोधकांना, तंत्रज्ञानाला आणि मानवी प्रयत्नांना जाते.

नाट्यरसिकांकडून नामदार चंद्रकांतदादा पाटील यांचे आभार

पुणे-भारताच्या वैभवशाली इतिहासातील आचार्य चाणक्य हे अतिशय विद्वान आणि कुशल रणनितीकार होते. त्यांचा जीवन प्रवास नव्या पिढीला व्हावा; या उद्देशाने नामदार चंद्रकांतदादा पाटील यांच्या माध्यमातून मनोज जोशी यांच्या ‘चाणाक्य’ नाटकाचे दोन प्रयोग ८ डिसेंबर २०२४ रोजी आयोजित करण्यात आले होते. या नाट्यप्रयोगाला पुणेकरांनी उत्स्फूर्त प्रतिसाद दिला. मनोज जोशी यांच्या दमदार अभियानाने भारावून गेलेल्या अनेक नाट्य रसिकांनी नाटकाचे भरभरून कौतुक केले. तसेच, नामदार चंद्रकांतदादा पाटील यांचे आभार मानले.

पुणेकरांचे नाटकप्रेम सर्वश्रुत आहे. त्यामुळे दर्जेदार नाटकांना पुणेकर नेहमीच डोक्‍यावर घेऊन, उत्स्फूर्तपणे दाद देत असतात. अशा नाटकांची मेजवानी पुणेकरांना मिळावी; यासाठी नामदार चंद्रकांतदादा पाटील नेहमीच वेगवेगळे उपक्रम राबवित असतात. यापूर्वी कोथरुड मतदारसंघातील बाणेरमधील नागरिकांसाठी प्रशांत दामले यांच्या ‘एका लग्नाची दुसरी गोष्ट’ या नाट्य प्रयोगाचे आयोजन केले होते. त्याला बाणेरकरांनीही उत्सफूर्त प्रतिसाद दिला होता.

पुणेकरांना आचार्य चाणक्य यांचे तत्वज्ञान समजावे यासाठी ८ डिसेंबर रोजी प्रसिद्ध अभिनेते मनोज जोशी यांच्या ‘चाणक्य’ या नाटकाचा सायंकाळी ६ आणि रात्री ९ अशा दोन मोफत प्रयोग बालगंधर्व रंगमंदिर येथे आयोजित केला आहे. पुणेकरांनी ही या नाट्य प्रयोगाला उत्स्फूर्त प्रतिसाद दिला. अभिनेते मनोज जोशी यांच्या दमदार अभिनयाने प्रभावित झालेल्या अनेक नाट्य रसिकांनी नाटकाला उत्स्फूर्तपणे दाद दिली. तसेच, नामदार पाटील यांनी आयोजित केलेल्या प्रयोगाबद्दल आभारही मानले‌.

पुणे :

नॉन रेसिडेंट इंडियन्स पॅरेण्टस् ऑर्गनायझेशन(नृपो) संस्थेच्या वतीने सदस्यांचा स्नेह मेळावा शनिवारी उत्साहात पार पडला. ‘नृपोजगत्’ दिवाळी अंकाचे प्रकाशन आणि मृदुला मोघे यांचा ‘एका पेक्षा एक-एकपात्री बहुरूपी’ मनोरंजनपर कार्यक्रमाचे आयोजन करण्यात आले होते. हा कार्यक्रम शनिवार दिनांक ९ डिसेंबर रोजी महाराष्ट्र राज्य हाॅटेल मॅनेजमेंट इन्स्टिट्यूट चे ‘यश रिजन्सी ‘सभागृह,शिवाजीनगर येथे सकाळी साडेनऊ वाजता संपन्न झाला.डॉ. कल्याणी मांडके कार्यक्रमाच्या अध्यक्षस्थानी होत्या.

नवीन सभासदांचे स्वागत व परिचय करून देण्यात आला.दिवंगत सभासदांना श्रद्धांजली वाहण्यात आली.नृपो चे अध्यक्ष बी.बी. कुलकर्णी यांनी प्रास्ताविक करून संस्थेच्या कामकाजाची माहिती दिली. दोनशेहून अधिक सभासद या कार्यक्रमाला उपस्थित होते.’नृपोजगत ‘ दिवाळी अंकाचे प्रकाशन डॉ. कल्याणी मांडके आणि उपस्थित मान्यवरांच्या हस्ते झाले.नृपो चे अध्यक्ष बी.बी. कुलकर्णी यांच्या हस्ते डॉ. कल्याणी मांडके आणि मृदुला मोघे यांचा सत्कार करण्यात आला.

यावेळी बोलताना डॉ. कल्याणी मांडके म्हणाल्या, ‘ नृपो ‘ संस्थेने आयोजित स्नेहमेळाव्यात आपल्या सर्वांशी बोलण्याची संधी मला मिळाली. सामाजिक बांधिलकीतून मी आपल्याला सांगते की,आपण समाजाच काहीतरी देणं लागतो. सामाजिक बांधिलकीची आपल्याला जाणीव असली पाहिजे. हक्क माहित आहेत पण कर्तव्य माहित नाही, ही खूप दरी आहे. वैचारिकदृष्टया सर्व सामाजिक ,स्वयंसेवी संस्था एकत्र आल्या पाहिजेत. १ लाख ८७ हजार स्वयंसेवी संस्थाची नोंदणी आहे. स्वयंसेवी संस्था या दबाव गट झाले पाहिजे. ‘ नृपो ‘ च्या सदस्य या कार्यात आपले योगदान देऊ शकतात. तुमचा वेळ तुमचं ज्ञान त्यांना द्या.तुंम्हाला एखादे आनंदाच झाड मिळेल’.

डॉ. सुरेश मांडके, सुरेश नाईक, नृपो दिवाळी अंकाच्या संपादक प्रा. वैदेही कुलकर्णी, अनेक मान्यवर यावेळी उपस्थित होते.विद्याधर देशपांडे यांनी सूत्रसंचालन केले. राजेंद्र माहूलकर यांनी आभार मानले.यानंतर मृदुला मोघे यांचा ‘एका पेक्षा एक-एकपात्री बहुरूपी’ मनोरंजनपर कार्यक्रमाचे आयोजन करण्यात आले होते. उपस्थितांनी कार्यक्रमाचा मनमुराद आनंद घेतला.

पुणे- वर्षानुवर्षे गर्भश्रीमंतांच्या,आणि काही राजकीय नेत्यांच्या कार्यक्रमांची आणि खानपानाची व्यवस्था बनलेल्या म्हात्रे पूल ते राजाराम पूल दरम्यान नदीकाठच्या हरित पट्ट्यातील बेकायदा बांधकामे,मातीचे भराव आणि अतिक्रमणे यावर आज अखेरीस महापालिकेने बुलडोझर चालवून ती हटवून टाकली.यापूर्वी कित्येक वर्षात अनेकदा महापालिकेच्या बांधकाम विभागाने यावर अनेकदा कारवाई केली पण राजकीय वरदहस्त लाभल्याने प्रत्येकवेळी येथील अतिक्रमणांना आश्रय मिळत गेला.मात्र येथील सुजन सहकारी सोसायटीने २०१५ साली राष्ट्रीय हरित अधिकरण – National Green Tribunal कडे याबाबत याचिका दाखल केली होती.त्यावर NGT न्यायालयाने 10 ऑक्टोबर 23 रोजी नदी पात्रातील निळ्या व लाल पूररेषा मध्ये बांधकाम अतिक्रमण या वर कारवाई करून १० डिसेंबर या तारखेपर्यंत अहवाल सादर करण्याचे आदेश दिले होते.त्या अनुषंगाने ही कारवाई करण्यात आली.म्हात्रे पुल ते राजाराम पूल दरम्यानच्या नदीकाठच्या हरित पट्ट्या मधील डीपी रस्त्यावर महापालिकेच्या बांधकाम विकास विभागाच्या वतीने कारवाई करण्यात आली.यावेळी विविध मंगल कार्यालय,लान्स, हॉटेल इ. वर कारवाई करण्यात आली.एकूण १५ मिळकतीवर कारवाई करण्यात आली त्यामध्ये सृष्टी गार्डन,कृष्णसुंदर लॉन्स,नारायणी लॉन्स,श्री वनारसे,मजेन्टा लॉन्स, केशवबाग,पंडित फार्म,या मिळकतदार व व्यावसायीक यांचा सह बहुतांश मिळकत धारकांनी स्वतःहून अनधिकृत बांधकामे काढून घेतली.या कारवाईत सुमारे दीड लाख चौरस फुट विनापरवाना बांधकाम काढण्यात आले.एका मिळकत धारकाने निळ्या व लाल पूर रेषे मध्ये केलेला भराव सात जेसीबी लावून काढून घेण्यात आला. यावेळी सहा डंपर चे मदतीने सुमारे ६000 घन फुट भराव काढून वाघोली प्लांट येथे पाठविण्यात आला.या कारवाईत ७ जेसीबी,४ गॅस कटर, 3 ब्रेकर वापरण्यात आले. ५० कर्मचारी व पोलीस कर्मचारी यांनी कारवाईत प्रत्यक्ष सहभाग घेतला.हि कारवाई अधीक्षक अभियंता युवराज देशमुख,कार्यकारी अभियंता बिपीन शिंदे यांचे मार्गदर्शनाखाली उप अभियंता सुनिल कदम,उप अभियंता श्रीकांत गायकवाड,कनिष्ठ अभियंता मनोज कुमार मते,शाखा अभियंता राहुल रसाळे,शाखा अभियंता भावना जड़कर,समीर गडइ,ईश्वर ढमाले,सागर शिंदे कनिष्ट अभियंता यांनी पूर्ण केली.

महापालिकेच्या बांधकाम विभागाने सातत्याने केले होते आवाहन

बेकायदा बांधकामे असलेली मंगल कार्यालये, लोन्स,हॉटेल या ठिकाणी लग्न समारंभ अगर अन्य कार्यक्रमांचे आयोजन करू नका असे आवाहन महापालिकेच्या बांधकाम विभागाने काही वर्षापासून सातत्याने केली होती.तरीही कारवाई काही होत नाही अशा समजुतीने अनेकजण येथे समारंभांचे आयोजन करतात आणि अशावेळी कारवाई झाली कि अडचणींचा त्यांना सामना करावा लागतो असाच प्रकार गेल्या कारवाईच्या वेळी देखील घडला होता आणि आज देखील घडल्याचे दिसून आले आहे.

येथून पुढे काय होणार ?

राष्ट्रीय हरित अधिकरण – National Green Tribunal ने येथे अतिक्रमणे होऊ नये म्हणून विशेष आदेश दिल्याने आता यापुढील काळात पुन्हा यथे अतिक्रमणे होणार काय ? असा प्रश्न उपस्थित केला जातोय .महापालिकेच्या प्रशासकीय काळात अशी बांधकामे होणार नाहीत असाही दावा केला जातो आहे. तर वारंवार कारवाया केल्या तर येथील व्यावसायिकांचे देखील अतोनात नुकसान होणारच आहे . या सर्व पार्श्वभूमीवर येथे पुन्हा अतिक्रमणे होणार काय ? हे येणारा काळच स्पष्ट करणार आहे.