पुणे, ९ डिसेंबर-
हिंदवी स्वराज्याची राजधानी राहिलेल्या रायगडावरील विविध घटना, प्रसंगांचा इतिहास कथन करतानाच गडाचे दरवाजे, गडावरील वाडे, बुरुज, बाजारपेठ, सदर, राजवाडा, राजसभा, नगारखाना, मनोरे या वास्तूंचे महत्त्व काय, त्यांची निर्मिती कशी झाली, त्यांचे वैशिष्ट्य काय, याचे दर्शन प्रभावीरीतीने घडवण्यात आले आणि रायगडाचा सारा इतिहासच श्रोत्यांसमोर उलगडला.

शिवशाहीर बाबासाहेब पुरंदरे स्मृती व्याख्यानमालेत ‘असा होता रायगड’ या विषयावरील पहिले पुष्प डॉ. रमा लोहोकरे यांनी गुंफले. डॉ. लोहोकरे यांनी यावेळी दुर्ग रायगडाची करून दिलेली ओळख श्रोत्यांना भावली. अक्षय सेवा संशोधन प्रतिष्ठान आणि कौशिक आश्रम यांनी या व्याख्यानमालेचे आय़ोजन केले आहे. उद्घाटन कार्यक्रमात शि. प्र. मंडळीचे अध्यक्ष अॅड. एस. के. जैन आणि राष्ट्रीय स्वयंसेवक संघाच्या पश्चिम महाराष्ट्र प्रांताचे कार्यवाह डॉ. प्रवीण दबडघाव यांची प्रमुख उपस्थिती होती.

कार्यक्रमाच्या दुसऱ्या सत्रात इतिहासाचे अभ्यासक प्रसाद तारे यांनी ‘असा झाला राज्याभिषेक’ या विषयावर सादरीकरण केले. छत्रपती शिवरायांच्या व्यक्तिमत्त्वाचे अनेकविध पैलू त्यांनी उलगडून दाखवले.

छत्रपती शिवाजी महाराजांचे कार्य सर्वांना माहिती होण्यासाठी बाबासाहेब पुरंदरे यांनी जे काम केले त्याला तोड नाही. ते एक आदर्श स्वयंसेवक होते, असे अॅड. जैन यांनी सांगितले. छत्रपती शिवरायांचा इतिहास सर्वत्र पोहोचवण्याचे कार्य बाबासाहेब पुरंदरे यांनी केले. प्रभू श्रीरामचंद्र, छत्रपती शिवाजी महाराज यांचा इतिहास आता युवक-युवतींना माहिती करून देणे आवश्यक आहे, असे डॉ. दबडघाव म्हणाले.

संस्थेचे अध्यक्ष सुनील राऊत यांनी प्रास्ताविक, विश्वस्त राजाभाऊ पानगावे यांनी संयोजन आणि नागेश पाटील यांनी सूत्रसंचालन केले.

शिक्षण प्रसारक मंडळीच्या निगडी शाळेत कार्तिकी एकादशी निमित्त प्रवचन

पुणे (दि.९ डिसेंबर २०२३) मानवी जीवनात संस्काराला खूप महत्त्व आहे. संस्कार हे आई, वडील, गुरु, मित्र आणि संत महात्म्यांच्या सानिध्यातून तसेच वाचनातून होत असतात. दूध आणि पाणी एकत्र केले असतानाही दूध पितो त्यालाच ‘राजहंस’ पक्षी म्हणतात. कावळा आणि कोकिळेचा रंग काळा असतो. परंतु वसंत ऋतूमध्ये जो पक्षी गातो त्यालाच कोकिळा म्हणतात. शिक्षकांनी शिकवलेल्या प्रत्येक धड्यात, कवितेत प्रश्न उत्तरांपूर्तेच न पाहता त्यामध्ये मूल्य असतात या दृष्टिकोनातून पाहावे. मानवी जीवनात ही मूल्य च आपल्यावर संस्कार करीत असतात असे मार्गदर्शन ह.भ.प. किसन महाराज चौधरी यांनी विद्यार्थ्यांना केले.
शिक्षण प्रसारक मंडळीच्या निगडी शाळेत आळंदी यात्रा आणि कार्तिक भागवत एकादशी निमित्त विद्यार्थ्यांसाठी प्रबोधनपर प्रवचनाचे आयोजन केले होते. शाळेच्या रौप्य महोत्सवी वर्षानिमित्त हा नाविन्यपूर्ण उपक्रम घेण्यात आला. वारकरी आणि भागवत संप्रदायाची ओळख विद्यार्थ्यांना व्हावी तसेच महाराष्ट्रातील संतांची विचारधारा विद्यार्थ्यांपर्यंत पोहोचावी आणि याद्वारे त्यांच्यावर संस्कार घडावे या उद्देशाने या कार्यक्रमाचे आयोजन केले होते. यावेळी ह.भ.प. दिगंबर महाराज ढोकले, शाळा समिती अध्यक्ष ॲड. दामोदर भंडारी उपस्थित होते. वारकरी पोशाखातील विद्यार्थ्यांनी सर्वांचे लक्ष वेधून घेतले.
ज्ञानेश्वर महाराजांनी पसायदानात म्हटले आहे,
‘जे खळांची व्यंकटी सांडो तया सत्कर्मी रती वाढो।
भूतां परस्परे जडो। मैत्र जिवांचे।।’ दुष्टां मधील दुष्टपणा जावा आणि चांगले गुण आपल्यामध्ये यावेत अशी भावना ज्ञानेश्वर महाराजांनी या पसायदानाद्वारे व्यक्त केली आहे. रावण दुष्ट नव्हता तर रावणातील प्रवृत्ती दुष्ट होती‌. हंस केवळ पाण्यातील दूध पितो. त्याप्रमाणे विद्यार्थ्यांनी ज्ञान संपादन करावे. त्यातून पुढील जीवनाचा प्रवास सुखकर होतो, असे किसन महाराज यांनी विद्यार्थ्यांना सांगितले.
शिक्षिका स्नेहल देशपांडे, रमा जोशी यांनी अभंग गायन केले. स्वागत सुनील सावंत, शिवाजी बांदल यांनी केले. प्रीती शेटे आणि दीपा सातपुते यांनी सूत्रसंचालन केले.
शाळा समिती अध्यक्ष ॲड. दामोदर भंडारी यांच्या संकल्पनेतून तसेच मुख्याध्यापिका ज्योती बक्षी, लीना वर्तक, उमा घोळे, मुख्याध्यापक रविंद्र मुंगसे, मुख्याध्यापिका सविता बिराजदार यांच्या मार्गदर्शनाखाली आणि सर्व शिक्षक शिक्षकेतर कर्मचारी यांच्या सहभागातून कार्यक्रमाचे आयोजन करण्यात आले होते.

पुणे, दि.९: विधान परिषदेच्या उपसभापती डॉ. नीलम गोऱ्हे यांनी पिंपरी-चिंचवड परिसरात तळवडे येथील कारखान्यात काल झालेल्या दुर्घटनेत जखमी रुग्णांची ससून रुग्णालयात भेट घेऊन संवाद साधला. ‘घाबरु नका, शासन आपल्या पाठीशी खंबीरपणे उभे आहे,’ अशा शब्दात त्यांनी रुग्णांना धीर दिला. ससून रुग्णालयात या सर्व रुग्णांवर आवश्यक उपचाराची सर्व व्यवस्था करण्यात आली आहे.

तत्पूर्वी शासकीय विश्रामगृह येथे दुर्घटनेच्या पार्श्वभूमीवर बैठकीचे आयोजन करण्यात आले. यावेळी घडलेल्या घटनेबाबत संबंधित अधिकाऱ्यांकडून माहिती घेतली.यावेळी आमदार उमा खापरे, पिंपरी-चिंचवड महानगरपालिका आयुक्त शेखर सिंह, अतिरिक्त आयुक्त विजयकुमार खोराटे, उपविभागीय अधिकारी संजय आसवले, पिंपरी-चिंचवड शहर पोलीस आयुक्तलयाच्या सहायक पोलीस आयुक्त स्वप्ना गोरे, ससून सर्वोपचार रुग्णालयाचे अधिष्ठता डॉ. विनायक काळे, यशवंतराव चव्हाण स्मृती रुग्णालयाचे अधिष्ठता डॉ. राजेंद्र वाबळे, जिल्हा आपत्ती व्यवस्थापन अधिकारी विठ्ठल बनोटे आदी उपस्थित होते.

घटनेबद्दल माहिती घेऊन श्रीमती गोऱ्हे म्हणाल्या, पिंपरी चिंचवडमधील तळवडे येथील दुर्घटनेत मृतांच्या कुटुंबीयांना पाच लाख रुपयांची आर्थिक मदत देण्याचे मुख्यमंत्री एकनाथ शिंदे यांनी जाहीर केले आहे. तसेच दुर्घटनेतील जखमींवर शासकीय खर्चाने उपचार करण्याचे निर्देशही मुख्यमंत्र्यांनी दिले आहेत. या घटनेत बाधित कुटुंबाला प्रधानमंत्री कार्यालय तसेच पिंपरी-चिंचवड महानगरपालिकेकडून आवश्यक ती मदत करण्याबाबत उचित कार्यवाही करण्याच्या सूचना त्यांनी दिल्या.

‘रेड झोन’ मधील नागरिकांबाबत केंद्रीय पातळीवर धोरणात्मक निर्णय होण्याच्याअनुषंगाने मुख्यमंत्री आणि उपमुख्यमंत्री यांच्यसॊबत चर्चा करण्यात येईल. बाधित झालेल्या कुटुंबियांसाठी सामाजिक सुरक्षेची योजना राबविण्यात यावी. आपत्तीजनक परिस्थितीत तात्काळ प्रतिसाद देता यावा या अनुषंगाने पुणे, पिंपरी-चिंचवड महानगरपालिका क्षेत्रात आपत्ती व्यवस्थापन विभागाने मोहिम हाती घ्यावी. अशा घटना टाळण्यासाठी महानगरपालिका, उद्योग विभागाने मोहिम राबवावी, असे निर्देश त्यांनी दिले.

पुणे – वाढत्या गुन्हेगारीला आळा घालण्यासाठी बोपोडी पोलीस चौकीत आधुनिक यंत्रणा उपलब्ध करून दिल्या जातील, असे आश्वासन आमदार सिद्धार्थ शिरोळे यांनी दिले.

बोपोडी पोलीस चौकीचे नूतनीकरणाचे काम पूर्ण झाले असून, त्याचे उदघाटन आमदार शिरोळे यांच्या हस्ते शनिवारी करण्यात आले. बोपोडीतील कायदा, सुव्यवस्था लक्षात घेऊन, या ठिकाणी पोलीस चौकी करण्याची मागणी विधीमंडळ अधिवेशनात सरकारकडे करण्यात आली होती, त्या मागणीला यश आले आहे. चौकीतील यंत्रणा लवकरच अत्याधुनिक केली जाईल असे, आमदार शिरोळे यांनी यावेळी सांगितले. तसेच ह्या अनुषंगाने चौकीला लवकरात लवकर आमदार निधी मधून संगणक पुरवले जातील असे आमदार शिरोळे यांनी सांगितले

या प्रसंगी पोलीस उपायुक्त शशिकांत बोराटे, पोलिस निरीक्षक सहाणे, उपनिरीक्षक मानसिंग पाटील, प्रकाश ढोरे, सुनीता वाडेकर, आनंद छाजेड, कार्तिकी हिवरकर, सचिन वाडेकर, अनिल भिसे, अभिजित गायकवाड, मुकेश गवळी, धर्मेश शहा, संजय कांबळे, सुभाष पाडळे, रोहीत भिसे, गणेश स्वामी, सुप्रीम चोंधे, मयुरेश गायकवाड, अजित पवार, अनिल तीळवणकर, गणेश नायकरे, संकेत कांबळे, अभिषेक चव्हाण, अनिकेत भिसे, मनीषा कांबळे, शुभम आयने, सिद्धांत जगताप, अकबर शेख आदि उपस्थित होते.

पुणे ः
भारतीय विद्या भवन आणि इन्फोसिस फाऊंडेशनच्या सांस्कृतिक प्रसार उपक्रमांतर्गत देविका वेंकटसुब्रमणियन (मुंबई)यांच्या  एकल भरतनाट्यम नृत्य सादरीकरणाला  शनीवारी सायंकाळी चांगला प्रतिसाद मिळाला. पारंपरिक भरतनाट्यम मार्गम आणि रामायणातील उर्मिला या विषयावर नव्या नृत्यरचना त्यांनी सादर केल्या . पुणेकर रसिक मोठ्या संख्येने उपस्थित होते.
हा कार्यक्रम शनीवार, ९ डिसेंबर    २०२३ रोजी सायंकाळी  साडे पाच   वाजता  भारतीय विद्या भवनचे सरदार महादेव बळवंत नातू सभागृह,(सेनापती बापट रस्ता) येथे  झाला.भारतीय विद्या भवन आणि इन्फोसिस फाऊंडेशनच्या सांस्कृतिक प्रसार कार्यक्रमांतर्गत सादर होणारा हा  १९७ वा कार्यक्रम  होता.भारतीय विद्या भवनचे मानद सचिव प्रा.नंदकुमार काकिर्डे यांनी स्वागत केले.

पुणे :
डॉ.कर्नल अनिल आठल्ये(निवृत्त) लिखित ‘द लीगसी ऑफ शिवाजी द ग्रेट’ पुस्तकाचे प्रकाशन शनिवार,दि.९ डिसेंबर रोजी सायंकाळी ५ वाजता मुक्तांगण विज्ञान शोधिका केंद्र,भारतीय विद्या भवन जवळ,सेनापती बापट रस्ता येथे झाले.भारतीय विद्या भवन आणि इंडस सोर्स बुक्स यांच्यातर्फे या कार्यक्रमाचे आयोजन करण्यात आले होते.भारतीय विद्या भवन पुणे केंद्राच्या अध्यक्षा लीना मेहेंदळे आणि ज्येष्ठ निवृत्त सनदी अधिकारी श्रीनिवासराव सोहोनी हे प्रमुख पाहुणे म्हणून उपस्थित होते.छत्रपती शिवाजी महाराजांचे  लष्करी धोरण,नौदल सामर्थ्य आणि मराठा साम्राज्यावर हे पुस्तक आधारित आहे.

 भारतीय विद्या भवन चे मानद सचिव नंदकुमार काकिर्डे ,इंडस सोर्स बुक्स च्या संचालक सोनावी देसाई,जनरल कुलकर्णी, जनरल अशोक जोशी, अजित आपटे आदि मान्यवर उपस्थित होते.नंदकुमार काकिर्डे यांनी आभार मानले.
डॉ.कर्नल अनिल आठल्ये(निवृत्त)हे निवृत्त लष्करी अधिकारी असून संरक्षण मंत्रालयाच्या युद्ध अध्ययन विभागाचे माजी प्रमुख   आहेत.
 ‘युद्ध कौशल्यांच्या बाबतीत अलेक्झांडरला ‘ अलेक्झांडर द ग्रेट’ म्हणतात ,तशीच महान कौशल्ये छत्रपती शिवाजी महाराजांची असल्याने हे पुस्तक लिहिले आहे’,असे डॉ.अनिल आठल्ये यांनी सांगितले. 
डॉ अनिल आठल्ये म्हणाले, ‘जगभरच्या युद्ध नीतीचा अभ्यास करताना असे जाणवले की छत्रपती शिवाजी महाराज यांची रणनीती, गनिमी कावा जगभर माहिती नाही.ती माहिती करुन देण्याची गरज आहे. त्यामध्ये आपण कमी पडलो. शिवाजी महाराज दहा वर्ष आणखी जगले असते तर आपले नौदल जगात सर्वोत्कृष्ट ठरले असते. मराठा सैन्याची बहादुरी पुढे आली पाहिजे. स्वराज्य ही संकल्पना शिवाजी महाराज यांनी पुढें आणली. त्यापूर्वी स्वराज्य किंवा हिंदवी स्वराज्य हा उच्चार होत नव्हता.
डॉ श्रीनिवास सोहोनी म्हणाले,’ छत्रपती शिवाजी महाराज यांच्यावर माता जिजाऊ आणि पिता शहाजीराजे यांचा मोठा प्रभाव होता. राष्ट्रप्रेम, कर्तव्य यांची बीजे त्यांनी रुजवली’.

‘धर्मशास्त्रपासुन युद्धनितीपर्यंत अनेक शास्त्रे त्यांना अवगत होती. गडांच्या नावातून त्याचे सामर्थ्य लक्षात येते, राज्य व्यवहार कोषातून मराठी भाषेचा वापर वाढवणे, या गोष्टी अद्भुत आहेत’, असेही त्यांनी सांगितले .
लीना मेहेंदळे म्हणाल्या,’जगातील इतर राजांचा, देशांचा विचार केला तर शिवाजी महाराजांचे स्वराज्य हे लहान भौगोलिक स्वराज्य वाटू शकते, पण इतिहासाला या स्वराज्याने महान तत्वे , धैर्य ,विचार दिले. पिढ्यान् पिढ्या ही मूल्ये पुढे चिरंतन झाली.पुस्तक रूपाने या गोष्टी येत आहेत, ही मोठी गोष्ट आहे.

पुणे दि.९: मराठा-कुणबी, कुणबी-मराठा जातीचे जात प्रमाणपत्र पात्र व्यक्तींना देण्याबाबतची कार्यपद्धती विहीत करण्यासाठी गठित केलेल्या समितीची बैठक विभागीय आयुक्त कार्यालयात झाली. ‘मराठा कुणबी, कुणबी मराठा’ या जात नोंदींचे सबळ पुरावे ठरणारी कागदपत्रे, पुरावे निश्चित करण्यासंदर्भात या कामकाजात सविस्तर चर्चा झाली.

समितीचे अध्यक्ष न्यायमूर्ती संदीप शिंदे (निवृत्त), विभागीय आयुक्त सौरभ राव, उपायुक्त वर्षा लड्डा, विभागातील सर्व जिल्ह्यांचे जिल्हाधिकारी, मुख्य कार्यकारी अधिकारी, वरिष्ठ पोलीस अधिकारी, निवासी उपजिल्हाधिकारी, जिल्ह्यातील सर्व उपविभागीय अधिकारी, महापालिका आणि पुरातत्व विभागाचे अधिकारी आदी उपस्थित होते.

बैठकीच्या प्रारंभी समितीचे अध्यक्ष व सदस्यांचे स्वागत करण्यात आले. विभागीय आयुक्त श्री. राव यांनी विभागात आतापर्यंत केलेल्या कागदपत्रांच्या तपासणीची माहिती सादर केली. त्यानंतर विभागातील पाचही जिल्हाधिकाऱ्यांनी सादरीकरणाद्वारे केलेल्या कार्यवाहीची माहिती सादर केली. न्या.शिंदे यांनी विभागात झालेल्या कामकाजाबद्दल समाधान व्यक्त केले.

पुणे- रुबी हॉल या नामांकित रुग्णालयात रिसेप्शनिस्ट स्वरूपाचे काम करणाऱ्या ४२ वर्षीय मिताली आचार्य नामक महिलेने राहते घरी गळफास घेवुन आत्महत्या आत्महत्या केल्याने खळबळ उडाली आहे. पोलीस उपनिरीक्षक भारती इंगोले(८२०८५६३८१४) याप्रकरणी अधिक तपास करत असून हॉस्पिटलमध्ये कामकाज समयी झालेल्या मानसिक छळवादातून या महिलेने आत्महत्या केली असल्याची माहिती पोलिसांनी दिली आहे. या संदर्भात पोलिसांनी असे सांगितले कि,’कोरेगांव पार्क पोलीस ठाण्यात याप्रकरणी गुन्हा दाखल करण्यात आला आहे. कोरेगाव पार्कमधील विद्युतनगर सोसायटीत राहणाऱ्या मिताली यांच्या ७८ वर्षीय सासूने यांसंदर्भात फिर्याद दिली आहे. रुबी हॉल मधील दोन महिला व एच. आर. विभाग प्रमुख यांच्याविरोधात या संदर्भात गुन्हा दाखल करण्यात आला आहे. जानेवारी २०२३ ते ३१/१०/२०२३ रोजीचे कालावधीत हॉस्पीटल, मध्ये यातील फिर्यादी यांची सुन मिताली आचार्य ही रुबी हॉस्पीटल मध्ये नोकरी करीत असताना, यातील हॉस्पीटल मधील दोन महिला यांनी आपसात संगनमत करून, किरकोळ कारणावरुन स्टाफ समोर तीस टोचुन बोलत असताना, सदरबाबत तीने व एच. आर. विभाग प्रमुख यांचेकडे तक्रार केली असता, त्यांनी तीस अपमानस्पद वागणुक देवुन, तीला राजीनामा देण्यास भाग पाडुन, त्यानंतर मिताली ही नोकरी साठी लेखी अर्ज घेवुन त्याचेकडे गेली असता विभागप्रमुख याने मी कोणाला पण नोकरी देईल, पण तुला नोकरी देणार नाही असे बोलुन, तीचा अर्ज तीचे अंगावर फेकुन तीस मानसिक त्रास दिल्याने त्यामुळे तीचेवर मानसिक दडपण आणून , त्यांचे त्रासाला कंटाळुन, मिताली हिस तीचे राहते घरी गळफास घेवुन आत्महत्या केली आहे.तिला आत्महत्येस प्रवृत्त केल्याबद्दल तिघांवर पोलिसांनी गुन्हा दाखल केला आहे.

पुणे-उत्तमनगर पोलीस ठाणे परिसरात दहशत माजविणा-या २२ वर्षीय तरुण अट्टल गुन्हेगारावर पोलीस आयुक्त, पुणे शहर यांनी एम. पी.डी.ए. कायद्यान्वये स्थानबध्दतेची कारवाई केली आहे. या संदर्भात पोलिसांनी सांगितले कि,’
पुणे पोलीस आयुक्तालयातील उत्तमनगर पोलीस स्टेशनचे हद्दीमध्ये गुन्हे करणारा अट्टल गुन्हेगार चेतन लक्ष्मण चव्हाण, वय-२२ वर्षे, रा. फ्लॅट नं ५०१, इंगळे कॉलनी, इंगळे कॉर्नर, शिवणे, ता. हवेली, जि. पुणे हा अभिलेखावरील सराईत गुन्हेगार आहे. त्याने साथीदारांसह बंडगार्डन व उत्तमनगर पोलीस स्टेशनच्या हद्दीत पिस्तूल, तलवार, धारदार हत्यार या सारख्या जीवघेण्या घातक हत्यारांसह खुनाचा प्रयत्न, घातक हत्याराने दुखापत करणे, दुखापत, दंगा, बेकायदा पिस्तूल व हत्यारे बाळगणे यासारखे गंभीर स्वरुपाचे गुन्हे केले आहेत. मागील ०५ वर्षामध्ये त्याचेविरूध्द ०५ गंभीर गुन्हे दाखल आहेत. त्याच्या गुन्हेगारी कृत्यांमुळे सदर परिसरातील सार्वजनिक सुव्यवस्थेस बाधा निर्माण झालेली होती. तसेच त्याच्यापासून जीविताचे व मालमत्तेचे नुकसान होईल या भितीमुळे नागरिक उघडपणे तक्रार करणेस धजावत नव्हते.
प्राप्त प्रस्ताव व सह कागदपत्रांची पडताळणी करुन पोलीस आयुक्त,रितेश कुमार,
यांनी नमूद इसमाचे विरुध्द एम.पी.डी.ए. कायद्यान्वये अमरावती मध्यवर्ती कारागृह, अमरावती येथे ०१ वर्षाकरीता स्थानबध्दतेचे आदेश पारीत केले आहेत. नमूद इसमास स्थानबध्द करण्यामध्ये वरिष्ठ पोलीस निरीक्षककिरण बालवडकर,चंद्रकांत बेदरे, वरिष्ठ पोलीस निरीक्षक, पी.सी.बी. गुन्हे शाखा, पुणे शहर यांचे अधिपत्याखालील पोलीस अधिकारी व पोलीस अंमलदार यांनी सदरची कामगिरी केली आहे.
पोलीस आयुक्त, पुणे शहर यांनी कडक प्रतिबंधक कारवाई करण्याचे धोरण अवलंबिले आहे.
पोलीस आयुक्त, पुणे शहर यांनी चालु वर्षामध्ये दहशत निर्माण करणा-या व सक्रिय अट्टल गुन्हेगारांवर एम.पी.डी.ए. कायद्यान्वये स्थानबध्दतेच्या ६६ कारवाया केल्या आहेत. यापुढेही सराईत व अट्टल गुन्हेगारांचे कृत्यांना आळा घालण्यासाठी प्रभावी प्रतिबंधक कारवाई करण्यात येणार आहे.