पुणे- प्रशासकीय कारकिर्दीत महापालिका ठिकठीकाणी अतिक्रमण कारवाई करत आहे पण हा निव्वळ फार्स असून अनेक ठिकाणच्या मोठमोठ्या अतिक्रमनांकडे दुर्लक्ष केले जात असल्याचा आरोप त्यांनी केला आहे .या संदर्भात संदीप खर्डेकर यांनी महापालिका आयुक्त विक्रमकुमार यांना एक पत्र दिले आहे त्यात म्हटले हे कि,’मनपा प्रशासनाने अनेक ठिकाणी अतिक्रमणाविरुद्ध कारवाई सुरु केल्यावर पुणेकरांनी सुटकेचा निःश्वास सोडला. मात्र ह्या कारवाया अतिशय अपुऱ्या आणि देखावा आहे असे पुणेकरांचे मत झाले असून, सर्व स्तरातून आणि सर्व भागातून शहरातील वाढत्या अतिक्रमणा विरोधात नागरिक तक्रार करत आहेत. कर्वेनगर असो किंवा विमाननगर, शहराच्या मध्यवस्तीचा भाग असो अथवा उपनगर, सर्वत्र मोठ्या प्रमाणावर अतिक्रमण दिसून येते आणि यावरील कारवाई ही वर वरची असल्याचे ही लक्षात येते. अगदी ताजी कारवाई म्हणजे पुणे मुंबई महामार्गालगत सूस पुलाच्या अलीकडे उभारलेल्या फर्निचर च्या दुकानांवरील धडक कारवाई !! येथे काही ठराविक शो रूम वर कारवाई झाली आणि पुढचे शोरूम जैसे थे…. सदर दुकाने अधिकृत आहेत का याचा खुलासा करावा.आणि कारवाई नंतर तेथील तोडलेल्या शेड उचलायची, साफ करायची जबाबदारी कोणाची ? तेथे तर व्यवस्थित विक्री सुरु आहे. एखाद्या गरीब भाजी विक्रेत्याचा माल आपण कसा लगेचच जप्त करतो तसा न्याय येथे नाही असे दिसते.नळस्टॉप चौकातील नाईट लाईफ च्या तक्रारी देखील वाढत आहेत, येथे सर्वदर्शन सोसायटी ची परवानगी नसताना हॉटेल सुरु असून पहाटे पर्यंत तेथे धिंगाणा चालतो, तर रस्त्यावरील हातगाड्या ही उशिरापर्यंत सुरु असतात. रात्रीच्या वेळी मनपा अतिक्रमण कारवाई करत नसल्याने अश्यांचे फावते. ह्याचा नागरिकांना प्रचंड त्रास होतो.तक्रार केली तर अधिकारी ,कर्मचारी संबंधितांना तक्रारदाराचे नाव सांगतात आणि त्यामुळे बहुतांश नागरिक तक्रारी करण्यास धजावत नाहीत.अशीच परिस्थिती सर्वत्र आहे, कारवाई झाल्यावर आठवड्याभरात ही सर्व अतिक्रमणे परत जैसे थे स्थितीत येतात आणि तेथे व्यवसाय सुरु होतात. यामागचे गुपित अर्थातच सर्वच जण जाणून आहेत. सध्या तर प्रशासक राज आहे आणि आपले उत्तम काम करण्याचे नाव लौकिक आहे…त्यामुळे धडक कारवाई करण्यास कोणाचा अटकावं असण्याचे कारण नाही. तरी आपण व्यक्तिशः ह्यात लक्ष घालून विनादबाव कारवाई करण्याचे आदेश द्यावेत व सामान्य पुणेकरांना दिलासा द्यावा अशी आग्रही मागणी करत आहे.असे खर्डेकर यांनी म्हटले आहे.

पुणे- पुण्याच्या निसर्ग संपदेची ..सोंदर्य खाण ऐतिहासिक पाण्याची मुबलकता अशी विशेषणे ज्या दक्षिण पुण्याला लावली जातात त्या दक्षिण पुण्याला लोकप्रतिनिधी आणि अधिकारी यांनी कायम फसवत ठेवून बकाल बनवले असा आरोप करत आज येथील सामाजिक कार्यकर्ते नमेश बाबर यांनी पुन्हा आपले उपोषण आंदोलन सुरु केले. दक्षिण पुण्यातल्या वाढत्या समस्यांवर मला वारंवार आंदोलन करावे लागते , माझ्यावर वारंवार सरकारी कामात अडथळे आणल्याचे गुन्हे दाखल करतात मग दक्षिण पुण्याला बकाल करणारे आणि वारंवार फसवी आश्वासने देणाऱ्यांवर गुन्हे का दाखल होत नाहीत असा सवाल बाबर यांनी केला आहे.

एकेकाळी मुबलक पाण्याचे सौख्य लाभलेले आणि मुबलक निसर्ग संपदा लाभलेले पुण्याचे दक्षिण द्वार आज बकाल कोणी बनवले आहे, इथली वाहतूक कोंडी, जीवघेणे अपघात ,पिण्याच्या पाण्याची हि कमतरता, वाढती बेरोजगारी , तरुणाइमध्ये वाढलेली नैराश्याची भावना आणि वाढत चाललेली गुन्हेगारी याला जबाबदार कोण आहे? असा सवाल यानिमित्ताने त्यांनी केला आहे.

कात्रज मधून जाणाऱ्या उड्डाणपुलांच्या बाबत काही मागण्या नोंदवीत त्यांनी आता उपोषणाचे हत्यार पुन्हा एकदा उपसले आहे.

नागपूर, दि. 12 : पिंपरी चिंचवड महानगरपालिकेच्या संभाजीनगर येथील निसर्गकवी बहिणाबाई चौधरी प्राणी संग्रहालयातील 36 प्राण्यांच्या मृत्यू प्रकरणाची चौकशी नगरविकास विभागाच्या प्रधान सचिवांमार्फत करण्याचा निर्णय मुख्यमंत्री एकनाथ शिंदे यांनी आज विधानसभेत जाहीर केला. हे प्राणी संग्रहालय वन विकास महामंडळाकडे हस्तांतरीत करण्याचे निर्देश मुख्यमंत्र्यांनी महापालिकेला दिले आहेत.

यासंदर्भात सदस्या श्रीमती अश्विनी जगताप यांनी प्रश्नोत्तराच्या तासात मुद्दा उपस्थित केला होता. त्याला उत्तर देताना मुख्यमंत्री बोलत होते.

या प्राणी संग्रहालयाच्या नुतनीकरण व सुशोभिकरणासाठी केंद्रीय प्राणी संग्रहालय प्राधिकरणाने आराखडा मंजूर केला आहे. त्यानुसार काम करण्यासाठी 2017 पासून प्राणी संग्रहालय बंद आहे. केंद्रीय प्राणी संग्रहालय प्राधिकरणाच्या नियमाप्रमाणे काही कामे करावयाची असल्याने प्राणी संग्रहालय खुले करण्यात आलेले नाही.

दरम्यान, 2017 ते सन 2023 या कालावधीत एकूण 36 प्राणी मृत्युमुखी पडले आहेत. सदर प्राण्यांचा मृत्यू नैसर्गिक असून औंध येथील शासकीय रूग्णालयामार्फत शवविच्छेदन करून प्राधिकरणाला महानगरपालिकेमार्फत कळविण्यात आलेले आहे. 36 प्राण्यांचा मृत्यू ही गंभीर बाब असून त्याची प्रधान सचिव नगरविकास यांच्या माध्यमातून चौकशी करण्यात येईल, असे मुख्यमंत्री श्री. शिंदे यांनी सांगितले.

राज्याच्या वन विकास महामंडळाकडे महापालिकेने हे प्राणी संग्रहालय हस्तांतरीत करण्याचे निर्देश देखील मुख्यमंत्री श्री. शिंदे यांनी दिले.

यावेळी झालेल्या चर्चेत विरोधी पक्षनेते विजय वडेट्टीवार, सदस्य नाना पटोले, योगेश सागर यांनी भाग घेतला.

मकोका ची ९६ वी कारवाई

पुणे-दरोडा, दरोडयाचा प्रयत्न, जिवे ठार मारण्याच्या उद्देशाने अपहरणे, गंभीर दुखापत, दरोडा व नागरीकांच्या मालमत्तेचे तोडफोड करुन नुकसान करणे, सर्वसामान्य नागरीकांच्या मध्ये दहशतीचे वातावरण निर्माण करणे, बेकायदेशीर शस्त्र जवळ बाळगणे, पोलिसांच्या आदेशाचा भंग करणे, बेकादेशीर जमाव जमविणे या सारखे गंभीर स्वरुपाचे गुन्हे वांरवारकरणाऱ्या निखील विजय कुसाळकरआणि त्याच्या टोळीवर मकोका कारवाई पुणे पोलिसांनी केली आहे. यासंदर्भात पोलिसांनी सांगितले कि,’निखील कुसाळकर (टोळी प्रमुख) व त्याचे इतर ०५ साथीदार यांनी गैरकायदेची मंडळी जमवून तक्रारदार यांचे मित्राकरवी तक्रारदार यांना शेती महामंडळ चौक, पत्रकार नगर, पुणे येथे बोलावुन घेऊन “तु निशांत डोंगरे सोबत का राहतो त्याने मला शिवीगाळ केली आहे आता तुला दाखवतो असे म्हणुन” तक्रारदार यांना जीवे ठार मारण्याच्या उद्देशाने जबरदस्तीने अपहरण करुन अज्ञात स्थळी कॅनॉलच्या बाजुला नेऊन अर्धा ते एक तास हाताने मारहाण करुन लोखंडी हत्यार दाखवुन पोलीसात तक्रार केल्यास तक्रारदार यांचे घरच्यांना मारुन टाकील अशी धमकी देऊन जनवाडी येथे नेऊन तक्रारदार यांना मारहाण करुन त्यांचा चेहरा विद्रुप केला, दोन्ही डोळयावर मारहाण करुन डोळे सुजवुन टाकले व तक्रारदार यांना होमीभाभा चौकात सोडुन दिले त्याबाबत चतुःश्रृंगी पोलीस स्टेशन पुणे शहर ८७४/२०२३ भा.दं.वि.सं.कलम ३६४(अ)३२४,३२३,५०४, ५०६(२),१४१,१४३,१४७,१४९ भारतीय हत्यार कायदा कलम ४ (२५), महाराष्ट्र पोलीस अधिनियम कलम ३७ (१) सह १३५ प्रमाणे गुन्हा नोंद करण्यात आला आहे.
दाखल गुन्हयाच्या तपासा दरम्यान यातील निषन्न आरोपी नामे १) ओंकार सोमनाथ हिंगाडे, वय २२ रा.पी.एम.सी कॉलनी पांडवनगर, पुणे (टोळी सदस्य) २) निखील विजय कुसाळकर, वय २२ रा. कविता हॉटेलचे मागे, महाले नगर, वडारवाडी, दिप बंगला चौक, पुणे. (टोळी प्रमुख) ३) सुबोध अजित सरोदे, वय २० वर्षे, रा. हेल्थ कॅम्प, पांडवनगर, पुणे ४) अभिजीत ऊर्फ प्रफुल्ल बबन चव्हाण वय २१ वर्ष रा. चाफेकर नगर शिवाजीनगर पुणे. ५) आयाज रईस ऊर्फरईसुद्दीन इनामदार वय १९ रा. जनवाडी, पुणे ६) कल्पेश ऊर्फ पाकुळी रमेश कराळे, रा. गोखलेनगर, जनवाडी, पुणे हे असुन अ.नं.१ यास अटक करण्यात आली आहे. अ.नं.२ ते ६ हे पाहिजे आरोपी आहेत.
नमुद आरोपी निखील विजय कुसाळकर (टोळी प्रमुख) याने त्याचेसह अन्य सदस्यांसाठी आपले अधिपत्याखाली प्रत्येक गुन्हयात नवीन साथीदार यांना सोबत घेऊन स्वताःची संघटीत टोळी करुन गुन्हे केलेले असून त्यांनी अवैध मार्गान अर्थिक व इतर फायदा मिळवण्याच्या उददेशाने दरोडा, दरोडयाचा प्रयत्न, जिवे ठार मारण्याच्या उद्देशाने अपहरणे, गंभीर दुखापत, दरोडा व नागरीकांच्या मालमत्तेच तोडफोड करुन नुकसान करणे, सर्वसामान्य नागरीकांच्या मध्ये दहशतीचे वातावरण निर्माण करणे, बेकायदेशीर शस्त्र जवळ बाळगणे, पोलिसांच्या आदेशाचा भंग करणे, बेकादेशीर जमाव जमविणे या सारखे गंभीर स्वरुपाचे गुन्हे वांरवार केले आहेत त्यांचेवर वेळोवेळी प्रतिबंधात्मक कारवाई करुन देखील त्यांनी पुन्हा-पुन्हा गंभीर स्वरुपाचे गुन्हे केलेले आहेत.
यातील आरोपी यांनी संघटीत पणे दहशतीच्या मार्गाने स्वताःच्या अर्थिक फायदया करीता सदरचा गुन्हा केल्याचे दिसुन आल्याने प्रस्तुत गुन्हयास महाराष्ट्र संघटीत गुन्हेगारी नियत्रंण अधिनियम १९९९ चे कलम ३ (१) (ii),३ (२) ३(४) प्रमाणे अंतर्भाव करणेकामी चतुःश्रृंगी पोलिस स्टेशनचे वरिष्ठ पोलिस निरीक्षक श्री.बालाजी पांढरे यांनी पोलिस उपायुक्त परिमंडळ ०४ पुणे श्री. शशीकांत बोराटे यांचे मार्फतीने मा. अपर पोलिस आयुक्त पुर्व प्रादेशीक विभाग पुणे श्री. रंजनकुमार शर्मा यांना प्रस्ताव सादर केलेला होता.

सदर प्रकरणाची छाननी करुन चतुःश्रृंगी पोलीस स्टेशन, पुणे शहर गु.र.न.८७४/२०२३ भा.दं.वि. कलम ३६४(अ),३२४,३२३,५०४,५०६ (२), १४१,१४३,१४७,१४९ भारतीय हत्यार कायदा कलम ४ (२५), महाराष्ट्र पोलीस अधिनियम कलम ३७(१) सह १३५ प्रमाणे दाखल गुन्हयात महाराष्ट्र संघटीत गुन्हेगारी नियत्रंण अधिनियम १९९९ चे कलम ३ (१) (ii). ३ (२) ३ (४) अंतर्भाव करण्याची मा.अपर पोलिस आयुक्त पूर्व प्रादेशीक विभाग पुणे श्री. रंजनकुमार शर्मा यांनी मान्यता दिली आहे.
सदर गुन्ह्याचा पुढील तपास सहा. पोलीस आयुक्त, खडकी विभाग पुणे शहर श्रीमती आरती बनसोडे ह्या करीत आहेत.
सदरची उल्लेखनिय कामगिरी पोलीस आयुक्त रितेश कुमार, सह पोलीस आयुक्त श्री. रामनाथ पोकळे (अति. कार्यभार) अपर पोलीस आयुक्त, पुर्व प्रादेशिक विभाग, रंजनकुमार शर्मा, पोलीस उप-आयुक्त परी-४ पुणे शहर, शशीकांत बोराटे, सहायक पोलीस आयुक्त, श्रीमती आरती बनसोडे यांचे मार्गदर्शनाखाली चतुःश्रृंगी पोलीस स्टेशन पुणे शहरचे वरिष्ठ पोलीस निरीक्षक बालाजी पांढरे, पोलीस निरीक्षक (गुन्हे) अंकुश चिंतामण व जगन्नाथ जानकर, सहा. पोलीस निरीक्षक अनिल केकाण, निगराणी पथकाचे सहा. पोलिस निरीक्षक रत्नदीप गायकवाड, अमंलदार अमित गद्रे, सुहास पवार, दत्तात्रय रेड्डी यांनी केली आहे.
पोलीस आयुक्त, रितेश कुमार यांनी पुणे शहर पोलीस आयुक्तालयाचा कार्यभार स्विकारल्यानंतर गुन्हेगारी नियंत्रणावर बारकाईने लक्ष देवुन, शरीराविरुध्द व मालमत्ते विरुध्द गुन्हे करणारे व समाजा मध्ये दहशत निर्माण करणारे सराईत गुन्हेगार यांचे हालचालीवर बारकाईने लक्ष ठेवुन, गुन्हेगारीचे समुळ उच्चाटन होईल, यावर भर देण्याबाबत सर्व पोलीस अधिकारी व अंमलदार यांना निर्देश दिले आहेत. त्यांचे मार्गदर्शनाखाली मकोका अंतर्गत केलेली ही ९६ वी कारवाई आहे.

• पुणे आरटीओ कार्यालयातील बैठकीत टॅक्सीचे दर निश्चित
• महाराष्ट्र रिक्षा पंचायत ऑटो टॅक्सी फेडरेशनच्या पाठपुराव्याला यश

पुणे! प्रतिनिधी

गेल्या अनेक दिवसांपासून टॅक्सीचे दर वाढविण्यासाठी आंदोलन केले होते. आरटीओने त्याचे दर वाढविण्याला परवानगी दिली आहे.39 रुपये आणि पुढील प्रति एक किलोमीटरसाठी 26 रुपये हे जर टॅक्सी साठी निश्चित करण्यात आले आहेत हे आंदोलनाचे यश असून त्याचा सर्वसामान्य टॅक्सी व रिक्षा चालक मालकांना फायदा होणार त्यांचा व्यवसाय वार्तिक उत्पन्न वाढणार असल्याचे प्रतिपादन महाराष्ट्र रिक्षा पंचायत व ऑटो ट्रान्सपोर्ट फेडरेशनचे राष्ट्रीय अध्यक्ष बाबा कांबळे यांनी केले.

पुणे आरटीओ कार्यालयात टॅक्सी, ऑटो चालक मालक संघटनांच्या प्रतिनिधींच्या उपस्थितीत बैठकीचे आयोजन करण्यात आले. या बैठकीत बाबा कांबळे यांच्या नेतृत्वाखाली महाराष्ट्र रिक्षा पंचायतीचे प्रतिनिधी उपस्थित होते. या वेळी बाबा कांबळे यांनी संघटनेच्या वतीने आपली भूमिका मांडली.

महाराष्ट्र रिक्षा पंचायतीच्या वतीने पुणे येथील आरटीओ कार्यालयासमोर आंदोलन करून टॅक्सीचे दर वाढविण्यासाठी पाठपुरावा केला होता. तसेच पंत प्रधान नरेंद्र मोदी, केंद्रीय मंत्री नितीन गडकरी यांच्याकडेही निवेदनाद्वारे मागणी केली होती. त्या मागणीला अखेर यश आले आहे. टॅक्सी दर वाढविण्याची कार्यवाही आरटीओने केली आहे.

या बैठकीत पुणे प्रादेशिक परिवहन अधिकारी संजय भोर यांच्या प्रमुख उपस्थित झालेल्या बैठकीमध्ये महाराष्ट्र रिक्षा पंचायत व ऑटो ट्रान्सपोर्ट फेडरेशनचे राष्ट्रीय अध्यक्ष बाबा कांबळे, पुणे रिक्षा प्रदर्शनचे अध्यक्ष जेष्ठ नेते आनंद तांबे, सत्यसेवा वाहतूक संघटनेचे अध्यक्ष एकनाथ ढोले, जनता गॅरेज संघटनेचे, सचिन वैराट अल्ताफ शेख, राष्ट्रवादी रिक्षा संघटनेचे विजय रवळे, महाराष्ट्र रिक्षा पंचायत पुणे शहराध्यक्ष मोहम्मद शेख बाळासाहेब ढवळे, शुभम तांदळे, विलास कमसे पाटील, अर्शद अंसारी, किरण एरंडे, लोणावळा शहराचे अध्यक्ष आनंद सदावर्ते, याकूब शेख आदी या वेळी उपस्थित होते.

ऑटो रिक्षाचे दर पहिल्या दीड किलो मीटरसाठी 25 रुपये व पुढील प्रत्येक किलो मीटरसाठी 17 रुपये दर निश्चित करण्यात आला आहे. टॅक्सीचे दर मात्र 17 रुपये होते. परिणामी प्रवासी रिक्षात येत नव्हते. त्याचा रिक्षा चालकांना फटका बसत होता. त्यामुळे टॅक्सीचे दर वाढविण्याची मागणी देखील बाबा कांबळे यांनी केली होती.

बाबा कांबळे म्हणाले की, एप्रिल 2023 मध्ये पुणे आरटीओ समितीने काळ्या पिवळ्या टॅक्सीचा दर हा पहिल्या दीड किलोमीटरला 31 रुपये व पुढील प्रति एक किलोमीटरला 21 रुपये दर करण्यात आला होता. त्यावेळी सीएनजी गॅसचा दर हा 86 रुपये होता. त्या सीएनजी दरामध्ये सध्या वाढ झाली नसल्यामुळे एप्रिल 2023 मध्ये निश्चित केलेला दरच कायम करण्यात आला आहे. खटवा समितीच्या शिफारशीनुसार काळ्या पिवळ्या टॅक्सीच्या दरापेक्षा ओला उबेरच्या एसी कॅबला 25 टक्के दरवाढ करण्यात यावी अशी शिफारस आहे. या शिफारशीनुसार सध्या झालेल्या आरटीओ अधिकाऱ्यांच्या बैठकीमध्ये असे ठरवण्यात आलेले आहे. त्यानुसार ओला उबेर कॅबचा दर हा पहिल्या दीड किलोमीटरसाठी 39 रुपये आणि पुढील प्रति एक किलोमीटरसाठी 26 रुपये दर शिफारस म्हणून पाठवण्याचे ठरले आहे.

पुणे, दि. ११ : यशवंतराव चव्हाण द्रुतगती मार्गावर हायवे ट्रॅफीक मॅनेजमेंट सिस्टम अंतर्गत मुंबई व पुणे वाहिनीवर कुसगाव ढेकू गाव कि.मी ५६/९०० व ओझर्डे ट्रॉमा केअर सेंटरजवळ कि.मी ७४/९०० येथे महाराष्ट्र राज्य रस्ते विकास महामंडळामार्फत गॅन्ट्री उभारण्याचे काम सुरू असून १२ डिसेंबर रोजी दुपारी १२ ते २ या वेळेत पुणे वाहिनीवरील सर्व प्रकारची अवजड वाहतूक तसेच छोटी वाहने (कार) कुसगाव टोलनाक्यावरून जुना मुंबई-पुणे महामार्गाने पुणे दिशेला वळविण्यात येणार असल्याची माहिती महाराष्ट्र राज्य रस्ते विकास महामंडळाने दिली आहे.

पुणे,  दि.  ११  डिसेंबर : विश्वशांती केंद्र (आळंदी), माईर्स एमआयटी विश्वशांती विद्यापीठ, पुणे, भारत  व श्रीक्षेत्र आळंदी-देहू परिसर विकास समिती यांच्या संयुक्त विद्यमानेे संत शिरोमणी श्री ज्ञानेश्वर महाराज यांचा ७२७ वा संजीवन समाधी सोहळा व जागतिक  सहिष्णुता सप्ताहाचा समारोप विश्वरूपदर्शन मंच, श्रीक्षेत्र आळंदी येथे दुपारी १२.०० वाजता वारकर्‍यांच्या उपस्थितीत पार पडला. इंद्रायणी नदीच्या दोन्ही तीरावरील वारकर्‍यांनी गुलाल, बुक्का व फुलांची ओंजळ वाहून ज्ञानेश्वर माऊलीचे भावपूर्ण स्मरण केले. भजन करून नामस्मरणाचा गजर केला. यावेळी विश्वरुप दर्शन मंचावर घंटानाद करण्यात आला. विश्वशांती केंद्राच्या वतीने वारकर्‍यांना महाप्रसाद देण्यात आला.
तत्पूर्वी ह.भ.प.डॉ.सुदाम महाराज पानेगांवकर यांनी काल्याचे कीर्तन केले. त्यानंतर मान्यवरांच्या हस्ते दहीहंडी फोडण्यात आली. याद्वारे शेकडो वर्षांची परंपरा जपण्यात आली. इंद्रायणीच्या घाटावर वारकर्‍यांनी या समाधी सोहळ्याच्या काल्याच्या महाप्रसादाचा लाभ घेतला.
या समारंभासाठी विश्वशांती केंद्र (आळंदी), माईर्स एमआयटी विश्वशांती विद्यापीठाचे संस्थापक अध्यक्ष विश्वधर्मी प्रा.डॉ. विश्वनाथ दा. कराड, ह.भ.प. तुळशीराम दा. कराड,  सौ. उषा विश्वनाथ कराड, माईर्स मायमर वैद्यकीय महाविद्यालयाच्या कार्यकारी संचालिका डॉ. सुचित्रा कराड-नागरे, प्रा.स्वाती कराड चाटे, नागपूर विद्यापीठाचे माजी कुलगुरू डॉ. एस.एन.पठाण, डॉ. मिलिंद पांडे व योगगुरू पाडेकर गुरूजी हे उपस्थित होते.
या सप्ताहात हभप अर्जुन महाराज लाड गुरूजी, हभप हरिहर महाराज दिवेगांवकर, हभप रामराव महाराज ढोक, हभप यशोधन महाराज साखरे व हभप चिन्मय महाराज सातारकर यासारख्या नामवंत कीर्तनकारांनी कीर्तनरूपी सेवा सादर केली. तसेच, प्रियंका ढेरंगे चौधरी, गायिका अपर्णा संत, ज्येष्ठ संगीतकार व गायक श्रीधर फडके, पं. शौनक अभिषेकी व विश्वशांती संगीत कला अकादमीच्या शिक्षक व विद्यार्थ्यांनी अभंगवाणी व भक्तीसंगीताचे कार्यक्रम सादर केले.
ह.भ.प.श्री.बापूसाहेब मोरे-देहूकर म्हणाले,” दुष्काळ पडला तर जनावरे मरतात. मोठा दुष्काळ पडला माणसे व जनावरे मरतात आणि चांगल्या संस्कारांचा व विचारांचा दुष्काळ पडला तर संपूर्ण मानवता मरते. त्यामुळे संताच्या वचनाचे महत्व सृष्टीवर अधिक आहे. संत हे जग वात्सल्य असतात म्हणून संताची महिमा ही शब्दात सांगता येत नाही. संत हे स्वतःच्या दुखांना विराम देऊन दुसर्‍यांचे दुख सावरण्यास पुढे येतात. त्यांना सुख व शांतीचा मार्ग दाखवितात.”
प्रा.डॉ. विश्वनाथ दा. कराड म्हणाले,”या सप्ताहात प्रवचन, कीर्तन, गायन व भजन या मार्गाने नामवंतांनी माऊलीचरणी आपली सेवा रुजू केली. यापुढेही वर्षभर लोकशिक्षणाचे विविध कार्यक्रम या विश्वरूप दर्शन मंचावर होणार आहेत. त्यामध्ये पर्यावरण स्वच्छता व निकोप, सुसंस्कृत समाजनिर्मितीसाठी जनजागृती याद्वारे विज्ञान व अध्यात्म यांचा संगम होईल. पवित्र तीर्थक्षेत्रांचे खर्‍या अर्थाने ज्ञानतीर्थक्षेत्रामध्ये परिवर्तन घडविण्याचा आमचा प्रयत्न आहे. ज्ञान, कर्म आणि भक्तीतून ईश्वर दर्शन होते. त्याग आणि समर्पणाचा संतांनी दिलेला संदेश व त्यांची शिकवण आत्मसात करून त्या मार्गाने चालण्याचा प्रयत्न करावा.”
शालीकराम खंदारे यांनी सूत्रसंचालन व महेश महाराज नलावडे यांनी आभार मानले.

पुणे, ११ डिसेंबर
छत्रपती शिवाजी महाराजांच्या जीवनचरित्रातील विविध पैलूंचे वक्त्यांनी घडवलेले मनोज्ञ दर्शन, श्री शिवरायांच्या पराक्रमाची थोरवी गाणारी भाषणे आणि हिंदवी स्वराज्याचे अनन्यसाधारण महत्त्व श्रोत्यांसमोर उलगडत गेले आणि शिवचरित्राच्या या जागराने श्रोतेही भारावले.

अक्षय सेवा संशोधन प्रतिष्ठान आणि कौशिक आश्रम यांनी आयोजित केलेल्या शिवशाहीर बाबासाहेब पुरंदरे स्मृती व्याख्यानमालेचा समारोप इतिहासाचे अभ्यासक महेश तेंडुलकर यांच्या व्याख्यानाने झाला. शिवचरित्राच्या या जागराला श्रोत्यांची उत्स्फूर्त दाद मिळाली. महर्षी विनोद रिसर्च फाऊंडेशनचे संचालक डॉ. संप्रसाद विनोद आणि राष्ट्रीय स्वयंसेवक संघाचे पुणे महानगर संघचालक रवींद्र वंजारवाडकर यांची यावेळी प्रमुख उपस्थिती होती. शिवशाहीर बाबासाहेब पुरंदरे यांनी शिवचरित्र सर्वदूर पोहोचवण्यासाठी लेखन आणि व्याख्यानांच्या रूपाने जे कार्य केले, त्या कार्याची थोरवी देखील यावेळी मांडण्यात आली.

छत्रपती शिवाजी महाराज सिंहासनाधीश्वर झाले आणि इतिहासाला वेगळे वळण मिळाले. त्यांचे प्रेरणादायी चरित्र सर्वांपर्यंत पोहोचवले पाहिजे, असे वंजारवाडकर म्हणाले. शिवशाहीर बाबासाहेब पुरंदरे कवी होते, लेखक होते, दिग्दर्शक होते, इतिहास संशोधक होते. छत्रपती शिवाजी महाराज यांचे कर्तृत्व त्यांनी विविध माध्यमातून सर्वांपर्यंत पोहोचवले. असे डॉ. विनोद यांनी सांगितले.

शिवचरित्र सर्वांना भावेल अशा पद्धतीने मांडणी करत बाबासाहेब पुरंदरे यांनी शिवचरित्राचा प्रसार केला. त्यांचे हे कार्य अत्यंत महत्त्वपूर्ण आहे. त्यांचे शिवचरित्र मराठी मनावर पकड निर्माण करते. त्यांचे व्यक्तिमत्त्व कला, प्रतिभेसह अनेक गुणांनी संपन्न होते, असे तेंडुलकर म्हणाले.

संस्थेचे ज्येष्ठ विश्वस्त दिवाकर पांडे यांनी प्रास्ताविक आणि नागेश पाटील यांनी सूत्रसंचालन केले.